کورونا کا تیل پیدا کرنے والے ممالک پر اثر، معیشت 7.6 فیصد تک گِر سکتی ہے

لائیو کوریج

1. 30 جون 2020امریکہ: کورونا ٹاسک فورس سربراہ کا ٹیسٹنگ بڑھانے پر زور

   

   ،تصویر کا ذریعہGetty Images

   وائٹ ہاؤس کی کورونا وائرس ٹاسک فورس کی سربراہ ڈاکٹر ڈیبوراہ برکس نے مقامی حکام پر زور دیا ہے کہ وہ ٹیسٹنگ کا دائرہ کار بڑھائیں۔

   امریکہ فی الوقت دنیا میں وبا سے سب سے زیادہ متاثر ملک ہے۔

   سی بی ایس نیوز کے مطابق ریاستی گورنرز کے ساتھ پیر کو ایک کال کے دوران ڈاکٹر برکس نے ٹیکساس اور ایریزونا کی ریاستوں کو 'اہم ہاٹ سپاٹ' قرار دیا اور کہا کہ ٹاسک فورس 'چند نئی ٹیسٹنگ تکنیکوں کے نفاذ' میں مدد کرنا چاہتی ہے تاکہ 'علاقائی سطح پر بڑی آبادیوں کو ٹیسٹ کیا جا سکے۔'

   انھوں نے کہا کہ 'بھلے ہی ہمارے یہاں اموات کی شرح ہفتہ در ہفتہ کم ہوتی جا رہی ہے اور ہمارا خیال ہے کہ اس ہفتے یہ مستحکم سطح پر آ جائے گی، لیکن اگر ہم نے جامع انداز میں کوششیں نہ کیں تو یہ شرح دوبارہ بڑھ سکتی ہے۔'

   امریکہ میں اب تک 25 لاکھ سے زیادہ لوگ اس وائرس سے متاثر ہو چکے ہیں جبکہ اموات کی تعداد ایک لاکھ 26 ہزار سے زیادہ ہے۔

2. 30 جون 2020بریکنگ, جنوبی کوریا نے ’ہرڈ امیونیٹی کی امید' کو بے معنی قرار دے دیا

   

   ،تصویر کا ذریعہGetty Images

   جنوبی کوریا میں طبی حکام کا کہنا ہے کہ وہ اس نتیجے پر پہنچے ہیں کہ ’کووڈ 19 کے معاملے میں ہرڈ امیونیٹی ایک خوش فہمی ہے۔‘

   ہرڈ امیونٹی سے مراد یہ خیال ہے کہ غیر متاثرہ لوگ وائرس سے متاثر لوگوں سے ملنے جلنے کے بعد قوتِ مدافعت پیدا کر لیں اور یوں آبادی کی ایک بڑی تعداد میں اس مرض کے خلاف قوتِ مدافعت پیدا ہوجائے گی۔

   کوریا میں بیماریوں پر قابو پانے کے ادارے کے ڈپٹی ڈائریکٹر کون جُن وُک کا کہنا ہے کہ انھوں نے یہ نتیجہ مقامی اور بین الاقوامی اعداد و شمار کا تجزیہ کرنے کے بعد اخذ کیا ہے۔

   جنوبی کوریا نے ملک میں انفیکشنز کی درست شرح معلوم کرنے کے لیے آبادی میں اینٹی باڈیز ٹیسٹ کرنا شروع کیا تھا۔ اس دوران 6000 افراد کے خون کی جانچ سے معلوم کیا جائے گا کہ کس نے اس وائرس کے لیے مدافعت حاصل کی۔ یہ ٹیسٹ ہر دو ماہ بعد کیے جائیں گے اور اس سال کے آخر تک مکمل ہوں گے۔

   اب تک 1500مختلف لوگوں کے ٹیسٹ سے پتا چلا ہے کہ 0.1 فیصد لوگوں میں کووڈ 19 کے خلاف اینٹی باڈیز موجود تھیں۔

   اس سے یہ بھی اشارہ ملتا ہے کہ جس وقت ملک میں 12 ہزار 800 افراد میں کورونا کی تصدیق ہوئی اس وقت تک ممکنہ طور پر50 ہزار افراد اس کا شکار ہو چکے تھے۔

3. 30 جون 2020پلازما تھیراپی کیا ہے اور پاکستان میں اس طریقے سے کووڈ 19 کے مریضوں کا علاج کیسے ہو رہا ہے؟

   

   ،تصویر کا ذریعہGetty Images

   حیدر آباد کے ایک عمر رسیدہ شخص میں کورونا وائرس کی تشخیص کے بعد ان کی حالت مسلسل خراب ہو رہی تھی۔ ڈاکٹروں نے انھیں وینٹیلیٹر پر منتقل کیا تاکہ وہ باآسانی سانس لے سکیں۔

   اس دوران ان کی ڈاکٹر بیٹی نے ہسپتال کے حکام سے گزارش کی کہ ان کے والد کا علاج ’پلازما تھیراپی' کے ذریعے کیا جائے۔ ڈاکٹروں نے ان کی درخواست قبول کر لی اور اب وہ پاکستان میں کووڈ 19 کے پہلے ایسے مریض بن گئے ہیں جن کے علاج کے لیے پلازما تھیراپی کا تجربہ کیا جا رہا ہے۔

   حیدرآباد کے لیاقت یونیورسٹی ہسپتال میں کورونا وائرس سے متعلق فوکل پرسن ڈاکٹر آفتاب نے اس کی تصدیق کرتے ہوئے کہا ہے کہ 53 سالہ اس مریض کو ایسے شخص کے خون کا پلازما منتقل کیا گیا ہے جو کورونا وائرس سے صحتیاب ہو چکا ہے۔

   اس حوالے سے ہماری نامہ نگار فرحت جاوید کی تفصیلی رپورٹ یہاں پڑھیے۔

4. 30 جون 2020بریکنگ, پنجاب میں آکسیجن گیس کے لیے حکومت کا خود پلانٹ لگانے کا فیصلہ

   

   ،تصویر کا ذریعہGetty Images

   پاکستان کے صوبہ پنجاب کے وزیراعلی عثمان بزدار نے پنجاب میں آکسیجن گیس کے لیے حکومت کا خود پلانٹ لگانے کا حکم دیا ہے۔

   وزیراعلی پنجاب عثمان بزدارنے پائلٹ پراجیکٹ کی منظوری دی دی۔

   اس پراجیکٹ کے لیے لاہور، فیصل آباد، ملتان اور راولپنڈی کے نام تجویز کیے گئے۔ تاہم انھوں لاہورمیں پائلٹ پراجیکٹ کی منظوری دی۔

   سیکرٹری پرائمری ہیلتھ کو دو ہفتے کے اندر پائلٹ پراجیکٹ کا پلان پیش کرنے کی ہدایت کی گئی ہے۔

   پنجاب حکومت سالانہ 32 کروڑ روپے مالیت کے آکسیجن سلنڈر ہسپتالوں کے لیے خریدتی ہے۔

   وزیراعلی کو بریفنگ میں بتایا گیا کہ اکسیجن گیس کا بڑا پلانٹ 80 ملین میں جبکہ درمیانہ پلانٹ 60 ملین میں لگ سکتاہے۔

   حکومت پنجاب نے بازار سے آکسیجن سلنڈر خریدنے کے بجائے خود پلانٹ لگانے کا فیصلہ کیا ہے۔

   حکومت پنجاب کے مطابق اگر پائلٹ پراجیکٹ کامیاب ہوا تودیگر ڈویژنل ہیڈ کوارٹرز پر بھی پلانٹ لگانے کی منظوری دی جائے گی۔

5. 30 جون 2020انڈیا: ہسپتال کی تلاش میں 52 سالہ شخص کی ہلاکت

   

   ،تصویر کا ذریعہGetty Images

   انڈیا کے جنوبی شہر بنگلور میں علاج کی تلاش میں 18 ہسپتالوں تک جانے اور 32 ہسپتالوں میں کالیں کرنے کے بعد بالآخر ایک 52 سالہ شخص کی ہلاکت ہو گئی ہے۔

   ان شخص کو سانس میں رکاوٹ کی شکایت تھی اور انھیں تیز بخار بھی تھا۔

   ان کے ایک رشتے دار نے اخبار ٹائمز آف انڈیا کو بتایا کہ 36 گھنٹوں تک مختلف ہسپتالوں تک جانے اور انھیں کالیں کرنے کے بعد آخرِکار ایک ہسپتال نے انھیں داخل کرنے کی ہامی بھری، تاہم اس سے پہلے کہ وہ انھیں داخل کر سکتے، ان کی ہسپتال کے دروازے پر ہی ہلاکت ہوگئی۔

   ان کا خاندان ابھی بھی ٹیسٹ کے نتائج کا انتظار کر رہا ہے۔

   ان کے رشتے دار نے بتایا: 'ہمیں نہیں معلوم کہ انھیں کووڈ 19 تھا یا نہیں، یا پھر وہ وائرس کی وجہ سے پیدا ہونے والے خوف کے ماحول کے شکار ہوئے۔'

   بنگلور میں حالیہ دنوں میں متاثرین کی تعداد میں اضافہ ہو رہا ہے جس کی وجہ سے یہ خبروں میں ہے۔ یہاں دلی، ممبئی اور چنئی کی طرح متاثرین شروع میں تیزی سے نہیں بڑھے مگر ہفتے کے اختتام پر یہاں 1000 سے زائد متاثرین سامنے آئے۔

6. 30 جون 2020امریکہ کے یوم آزادی پر لاس اینجلیس کے ساحل بند رکھنے کا فیصلہ

   

   امریکی شہر لاس اینجلس میں حکام کا کہنا ہے کہ 4 جولائی کو امریکہ کی یومِ آزادی اور اس کے ساتھ ہفتے کے اختتام کے موقع پر ساحل سمندر کو بند رکھا جائے گا تاکہ لوگوں کے ہجوم کو اکھٹا ہونے سے روکا جا سکے۔

   تین جولائی کی رات سے امریکہ کی سب سے بڑے کاؤنٹی میں تمام ساحل سمندر، کار پاکٹس ، موٹر سائیکلز کے راستے اور ساحل سمندر تک جانے والی تمام راستوں کو بند کر دیا جائے گا۔ یہ پابندی 6 جولائی کی شام تک رہے گی۔

   یہ فیصلہ پیر کو صرف ایک دن میں 2900 متاثرین سامنے آنے کے بعد کیا گیا ہے۔ یہ امریکہ میں وبا کے آغاز کے بعد سے ایک دن میں متاثرین کی سب سے زیادہ تعداد ہے۔

   امریکی محکمہ صحت کا کہنا ہے کہ ڈیٹا سے ظاہر ہوتا ہے کہ لوگوں میں کورونا کے ٹیسٹ مثبت آنے میں اضافہ ہوا ہے جس کے بعد ہسپتالوں میں مریضوں کی تعداد بھی بڑھ رہی ہے۔

   محکمہ صحت کے اندازے کے مطابق آنے والے ہفتوں میں ہسپتالوں میں آنے والے مریضوں میں بھی ریکارڈ اضافہ ہوسکتا ہے۔

   ریاست کیلیفورنیا میں بھی گذشتہ دو ہفتوں کے دوران کورونا کے متاثرین میں اضافہ ہوا ہے۔ 24 جون کو 7149 نئے انفیکشنز ریکارڈ ہوئے اور مجموعی طور پر یہاں 216000 متاثرین ہیں۔ یہ نیویارک کے بعد امریکہ کی سب سے زیادہ متاثرہ ریاست ہے۔

7. 30 جون 2020سکاٹ لینڈ: سکول کے کلینرز خود کو غیر محفوظ تصور کرنے لگے

   سکاٹ لینڈ میں سکولوں کے 1700 سے زائد کلینرز اور دیگر عملے نے سکاٹش کابینہ کی سربراہ فرسٹ منسٹر نکولا سٹرجیون کو خط میں لکھا ہے کہ وہ خود کو ملازمت پر محفوظ نہیں محسوس کر رہے، اور انھیں روزانہ خطرے میں ڈالا جا رہا ہے۔

   یہ خط سکاٹ لینڈ کی پارلیمان کو فراہم کیا جائے گا اور اس پر ان سٹاف کے دستخط ہوں گے جو خود کو ‘بھلا دیے گئے کارکن’ کہلوا رہے ہیں۔

   خط میں کہا گیا ہے کہ ‘ہم دیگر اہم کارکنان کے بچوں اور خطرے کی زد میں موجود بچوں کا خیال رکھتے رہے ہیں، انھیں کھانا کھلایا ہے، ان کا خیال رکھا ہے، ان کی صفائی کی ہے، اور یقینی بنایا ہے کہ ان کا ماحول محفوظ ہو۔ ہم نے یہ سب محبت سے کیا ہے اور اپنی صحت اور تحفظ کا کم ہی خیال رکھا ہے۔’

   خط میں کہا گیا ہے کہ انھیں بہتر ذاتی حفاظتی سامان (پی پی ای)، بہتر تنخواہ فراہم کی جائے جبکہ زیادہ مؤثر گائیڈ لائنز جاری کی جائیں۔

8. 30 جون 2020کورونا وائرس: بیماری کے خوف سے کیسے نمٹیں؟

   

   ،تصویر کا ذریعہEmma Russell

   کورونا وائرس نے دنیا کو غیر یقینی کی صورتِ حال میں ڈال دیا ہے اور اس وبا کے متعلق مسلسل خبریں بڑی بے رحم لگ سکتی ہیں۔ یہ سب لوگوں کی ذہنی صحت پر اثر انداز ہو سکتی ہے، خصوصاً ان افراد کی صحت پر جن میں پہلے ہی اضطراب پایہ جاتا ہے یا انھیں او سی ڈی ہے۔ سو ہم کس طرح اپنی ضہنی صحت کا تحفظ کر سکتے ہیں۔

   خبروں کے متعلق پرتشویش رہنا سمجھ میں آتا ہے، لیکن کئی لوگوں میں یہ پہلے سے جاری مسائل کو مزید بگاڑ سکتی ہے۔

   خود کو اس خوف سے کیسے محفوظ رکھا جائے، اس حوالے سے تفصیلی مضمون یہاں پڑھیے۔

9. 30 جون 2020دنیا کی تازہ ترین صورتحال کیا ہے؟

   

   ،تصویر کا ذریعہGetty Images

   • دنیا بھر میں کورونا وائرس سے متاثرہ افراد کی تعداد ایک کروڑ تین لاکھ سے تجاوز کر گئی ہے جبکہ اب تک اس مرض کے باعث پانچ لاکھ پانچ ہزار سے زائد افراد ہلاک ہو چکے ہیں۔
   • دنیا میں کورونا سے سب سے زیادہ متاثر ہونے والا ملک امریکہ ہے جہاں 25 لاکھ سے زائد افراد اس مرض سے متاثر ہیں جبکہ وہاں اب تک سوا لاکھ سے زیادہ لوگوں کی موت ہوئی ہے۔
   • عالمی ادارہ صحت نے خبردار کیا ہے کہ ہو سکتا ہے کہ وبا کا بدترین مرحلہ ابھی آنا ہو۔ادارے نے کہا ہے کہ اگر حکومتوں نے درست پالیسیاں نہیں اپنائیں تو کئی گنا اور لوگ اس مرض کا شکار ہو جائیں گے۔
   • امریکہ اور انڈیا کی کئی ریاستوں نے لاک ڈاؤن میں نرمی کے فیصلوں کو یا واپس لے لیا ہے یا ان پر عملدرآمد ملتوی کر دیا ہے اور اس کی وجہ کورونا وائرس متاثرین کی تعداد میں تیزی سے اضافہ بتایا جا رہا ہے۔
   • آسٹریلیا کی دو ریاستوں کوئینز لینڈ اور جنوبی آسٹریلیا نے اپنی ریاستی سرحدیں مزید چند ہفتوں کے لیے بند رکھنے کا اعلان کیا ہے۔ کوئینزلینڈ سرحدیں کھولنے پر بھی ریاست وکٹوریا کے شہریوں کے لیے اپنی سرحدیں بند رکھیں گے۔

10. 30 جون 2020انڈیا میں مقامی طور پر تیار کی گئی ویکسین کے عنقریب انسانوں پر تجربات

    

    ،تصویر کا ذریعہGetty Images

    انڈیا میں جولائی سے مقامی طور پر تیار کی گئی ایک کورونا وائرس ویکسین کے انسانی تجربات شروع کیے جائیں گے۔

    حیدرآباد میں قائم بھارت بائیوٹیک نامی فرم رضاکاروں کی ایک نامعلوم تعداد کو اگلے ماہ یہ ویکسین لگائے گی۔

    جانوروں پر کیے گئے تجربات کے مطابق یہ ویکسین محفوظ ہے اور مدافعتی نظام میں ایک مثبت ردِعمل کو فروغ دیتی ہے۔

    یہ آزمائش دنیا کے کئی حصوں میں جاری آزمائشوں میں سے ایک ہے۔

    اب تک دنیا بھر میں 120 ایسے ویکسین تجربات جاری ہیں جبکہ انڈیا کی نصف درجن کمپنیاں اس تگ و دو میں مصروف ہیں۔

    یہ انڈیا میں بنائی گئی پہلی ویکسین ہے اور اسے وائرس کی ایسی قسم سے تیار کیا گیا ہے جسے مقامی طور پر لیبارٹری میں علیحدہ کرکے کمزور کیا گیا تھا۔

    اس سے قبل یہ کمپنی ایچ ون این ون وائرس اور روٹا وائرس سمیت کئی دیگر امراض کے لیے ویکسین بنا چکی ہے۔

11. 30 جون 2020پنجاب میں کورونا کے 723 نئے کیسز

    

    پنجاب میں کورونا وائرس کے 723 نئے کیس، تعداد 75,501 ہو گئی۔

    ترجمان پرائمری اینڈ سیکنڈری ہیلتھ کے مطابق ان نئے کیسز میں لاہورمیں 301، ننکانہ 1، راولپنڈی 90، اٹک 2، چکوال 95 اورگوجرانوالہ میں 70 کیسز رپورٹ ہوئے۔

    ترجمان کے مطابق کورونا وائرس سے 46 مزید اموات کے بعد صوبے میں ہلاکتوں کی کل تعداد 1727 ہو چکی ہیں۔

    اب تک صوبے میں 493,225 ٹیسٹ کیے جا چکے ہیں۔

    صوبے میں کورونا وائرس کو شکست دے کر صحت یاب ہونے والوں کی تعداد 27,147 ہو چکی ہے۔

    ترجمان پرائمری اینڈ سکینڈری ہیلتھ کیئر کا کہنا تھا کہ کورونا وائرس کی علامات ظاہر ہونے پر فوراََ 1033 پر رابطہ کریں۔

12. 30 جون 2020آسٹریلیا: کوئینز لینڈ اور جنوبی آسٹریلیا نے ریاستی سرحدیں بند رکھنے کا اعلان کر دیا

    

    ،تصویر کا ذریعہGetty Images

    اب سے کچھ دیر قبل ہم نے آپ کو خبر دی تھی کہ امریکہ اور انڈیا کی کئی ریاستوں نے لاک ڈاؤن میں نرمی کرنے کے فیصلوں کو مؤخر کر دیا ہے۔

    اب آسٹریلیا سے یہ خبر سامنے آئی ہے کہ جنوبی آسٹریلیا اور کوئینزلینڈ کی ریاستوں نے تمام آسٹریلوی شہریوں کے لیے اپنی ریاستی سرحدیں کھولنے کے منصوبے منسوخ کر دیے ہیں کیونکہ ریاست وکٹوریا میں وبا زور پکڑ رہی ہے۔

    وکٹوریا میں گذشتہ دو ہفتوں سے روزانہ متاثرین کی یومیہ تعداد دو ہندسوں میں ریکارڈ کی جا رہی ہے۔ گذشتہ 24 گھنٹے میں یہاں 64 نئے متاثرین سامنے آئے ہیں۔

    ان نئے متاثرین کی بڑی تعداد میلبرن کے متعدد علاقوں میں موجود ہے، اور یہ تین ماہ میں آسٹریلیا کی سب سے بڑی تشویش بن چکے ہیں۔

    خدشات ہیں کہ وبا دیگر ریاستوں تک بھی پھیل سکتی ہے جہاں فی الوقت بہت کم یا صفر متاثرین ہیں۔

    آج کیے گئے اعلانات میں جنوبی آسٹریلیا نے ریاستی سرحدیں کھولنے کو 20 جولائی تک مؤخر کر دیا جبکہ کوئینز لینڈ نے ایسا 10 جولائی تک کرنے کا اعلان کیا۔ تاہم کوئینز لینڈ کا یہ بھی کہنا ہے کہ وہ وکٹوریا کے رہائشیوں کے لیے سرحدیں نہیں کھولیں گے۔

    آسٹریلیا میں اب تک 7500 سے زائد متاثرین سامنے آ چکے ہیں جبکہ 104 ہلاکتیں ہوئی ہیں۔

13. 30 جون 2020متحدہ عرب امارات نے پاکستان سے مسافروں کی آمد پر پابندی کیوں لگائی

14. 30 جون 2020جنگ سے متاثرہ افغانستان کے ہسپتالوں پر وائرس کا اضافی بوجھ

    

    افغانستان میں کورونا کے پھیلنے کے بعد دہائیوں سے جاری جنگ کے باعث پہلے سے کمزور نظام صحت مزید بدحالی کا شکار ہو رہا ہے۔

    بی بی سی کے نامہ نگار سکندر کرمانی کے مطابق ملک میں آکسیجن کی فراہمی اور دیگر وسائل کے حوالے سےخدشات کا اظہار کیا جا رہا ہے۔

    کابل میں ایک ڈاکٹر نے نے بتایا کہ جب بھی آکسیجن کے سیلنڈرز آتے ہیں تو انتہائی نگہداشت تک پہنچتے پہنچے ان کے لیے مریضوں کے خاندانوں میں اس کے لیے لڑائی ہوتی ہے۔

    ایک دوسرے ڈاکٹر نے بی بی سی کو بتایا کہ حتی کہ نجی ہسپتالوں میں عملے کے لوگ بھی اپننے رشتہ داروں کا علاج نہیں کروا پا رہے۔

    ایک ڈاکٹر نے فون کیا اور کہا کہ ’میرے ایک رشتہ دار کو سانس لینے میں دشواری کا سامنا تھا میں نے کہا کہ میں اسے بھیج رہا ہوں انہیں وہاں داخل کر لیجیے تو انھوں نے معذرت کر لی۔ تو سوچیں ایک عام آدمی کے ساتھ کیا ہوتا ہوگا۔‘

15. 30 جون 2020کورونا وائرس سے جڑی اصطلاحات کے معنی کیا ہیں؟

    

    کورونا وائرس کی عالمی وبا نے ہماری روزمرہ کی زندگی میں کئی نئے الفاظ اور اصطلاحات متعارف کرائی ہیں، چاہے بات قرنطینہ، وائرس، مدافعت یا سماجی فاصلے کی ہو۔ لیکن آخر ان سب اصطلاحات کا مطلب کیا ہے؟

    جاننے کے لیے یہاں کلک کریں

16. 30 جون 2020انڈیا میں مزید دو ریاستوں کا لاک ڈاؤن کرنے کا اعلان

    

    ،تصویر کا ذریعہGetty Images

    انڈیا اب 'ان لاک' یعنی لاک ڈاؤن کھولنے کے دوسرے مرحلے میں باضابطہ طور پر داخل ہو چکا ہے تاہم دو ریاستوں نے اعلان کیا ہے کہ وہ ایک مرتبہ پھر لاک ڈاؤن کریں گی۔

    تامل ناڈو اور مہاراشٹر کے حکام کا کہنا ہے کہ وہ 31 جولائی تک کے لیے دوبارہ لاک ڈاؤن کریں گے۔

    آسام، ناگالینڈ، جھارکھنڈ اور مغربی بنگال کی ریاستیں پہلے ہی لاک ڈاؤن اقدامات کا اعلان کر چکی ہیں۔

    انڈیا میں متاثرین کی تعداد میں تیزی سے اضافہ ہو رہا ہے، چنانچہ ریاستیں ہائی الرٹ پر ہیں۔ مقامی میڈیا کے مطابق گذشتہ ایک ہفتے کے دوران ملک میں کورونا کے ایک لاکھ نئے متاثرین سامنے آئے۔

    اس کے علاوہ نئے متاثرین کی یومیہ تعداد بھی بڑھتی جا رہی ہے اور ہر روز گذشتہ روز کے مقابلے میں زیادہ متاثرین سامنے آ رہے ہیں۔

    گذشتہ 24 گھنٹوں کے دوران انڈیا میں کورونا کے 18 ہزار نئے متاثرین سامنے آئے ہیں جس کے بعد یہاں متاثرین کی کُل تعداد پانچ لاکھ 65 ہزار سے زائد ہوگئی ہے جبکہ اب تک 16 ہزار 893 افراد اس وائرس کے سبب ہلاک ہوچکے ہیں۔

17. 30 جون 2020موت کے منھ سے معجزانہ واپسی، محمد عظیم کی کورونا کہانی

18. 30 جون 2020لاس اینجلس: تھیٹر دوبارہ کھولے جانے کا فیصلہ ملتوی

    

    ،تصویر کا ذریعہReuters

    امریکہ کے شہر لاس اینجلس کے میئر ایرک گارسیٹی نے پیر کو اعلان کیا ہے کہ شہر میں فلم تھیٹر دوبارہ کب کھلیں گے اس پر انھوں نے فیصلہ غیر معینہ مدت کے لیے ملتوی کر دیا ہے۔

    لاس اینجلس امریکہ میں فلم تھیٹرز کی سب سے بڑی مارکیٹ ہے۔

    خبر رساں ادارے روئٹرز کے مطابق ایک نیوز بریفنگ سے بات کرتے ہوئے انھوں نے کہا: 'ہم نے مزید کاروبار مثلاً فلم تھیٹر، باؤلنگ ایلیز، کھیل کے میدان، کنسرٹ ہال، تھیم پارک اور تفریح کے دیگر مقامات کھولنے کا فیصلہ ملتوی کر دیا ہے۔'

    انھوں نے اس حوالے سے کوئی تاریخ نہیں دی کہ لاس اینجلس میں فلم تھیٹر دوبارہ کب کھلیں گے۔

    تھیٹر کا کاروبار مارچ کے وسط میں شروع ہونے والے کورونا وائرس لاک ڈاؤن کی وجہ سے بربادی کا شکار ہے۔ دسیوں ہزار ملازمین کو نوکریوں سے نکالا جا چکا ہے جبکہ تھیٹر اپنا وجود برقرار رکھنے کے لیے قرض لینے پر مجبور ہیں۔

19. 30 جون 2020کورونا وائرس: جرمنی میں 498 نئے متاثرین، مزید 12 ہلاکتیں

    

    ،تصویر کا ذریعہReuters

    جرمنی میں کورونا وائرس کے 498 نئے مریض سامنے آئے ہیں جس کے بعد یہاں متاثرین کی کُل تعداد ایک لاکھ 94 ہزار 259 ہوگئی ہے۔

    خبر رساں ادارے روئٹرز نے روبرٹ کوک انسٹیٹیوٹ کے حوالے سے بتایا کہ متاثرین کی تعداد کے ساتھ ساتھ یہاں 12 مزید افراد ہلاک بھی ہوئے ہیں جس کے بعد یہاں ہلاکتیں 8973 تک پہنچ گئی ہیں۔

    یہ پیش رفت ایک ایسے وقت میں سامنے آئی ہے جب یورپ کے کئی ممالک میں لاک ڈاؤن میں نرمی کی جا رہی ہے اور عوام پر عائد پابندیوں کو بتدریج نرم کیا جا رہا ہے۔

    اس کے علاوہ یورپی یونین نے یکم جولائی سے 14 ممالک کے شہریوں کو یونین میں داخلے کی اجازت بھی دے دی ہے اور اس فہرست میں مزید ممالک کی شمولیت متوقع ہے۔

20. 30 جون 2020پاکستان میں اب تک کورونا کے متاثرین کی تعداد دو لاکھ نو ہزارسے زائد

    

    29 جون کو مجموعی پاکستان بھر میں مزید 2846 افراد میں کووڈ 19 کی تصدیق ہوئی۔ جبکہ ان 24 گھنٹوں میں 118 افراد جان کی بازی ہار گئے۔

    نیشنل کمانڈ اینڈ کنٹرول سنٹر کے مطابق ملک بھی میں پیر کے روز 20930 افراد کے ٹیسٹ کیے گئے۔

    جن میں سے سندھ میں 8464، پنجاب میں 7729، خیبر پختونخوا میں 1877، اسلام آباد میں 2180، بلوچستان میں 328، گلگت بلستستان میں 94 اور پاکستان کے زیر انتظام کشمیر میں 258 ٹیسٹ کیے گئے۔

    گلگت بلتستان میں اس وقت کوئی بھی مریض وینٹیلیٹر پر نہیں ہے۔ باقی میں اس وقت 505 مریض وینٹیلیٹرز پر ہیں۔ کووڈ 19 کے مریضوں کے لیے کل 1562 وینٹیلیٹرز مختص کیے گئے ہیں۔

    پاکستان میں اس وقت بھی کورونا کے ایکٹو کیسز کی تعداد 106530 ہے۔

    اب تک پاکستان بھر میں 209337 افراد میں وبا کی تصدیق ہو چکی ہے۔ جن میں پاکستان کے زیر انتظام کشمیر میں 1065، سندھ میں 81985، پنجاب میں 75501، خیبر پختونخوا میں 26115، اسلام آباد میں 12775، بلوچستان میں 10426، گلگت بلستستان میں 1470 کیسز شامل ہیں۔

    اب تک ملک بھر میں ہونے والی ہلاکتوں کی تعداد 4304 ہے۔ سب سے زیادہ ہلاکتیں سندھ میں 1343 اس کے بعد پنجاب میں 1727 ہیں۔

    

    ،تصویر کا ذریعہEPA