کورونا کا تیل پیدا کرنے والے ممالک پر اثر، معیشت 7.6 فیصد تک گِر سکتی ہے

دنیا میں کورونا کے مریضوں کی تعداد ایک کروڑ تین لاکھ سے تجاوز کر چکی ہے جبکہ پاکستان میں اب تک دو لاکھ بارہ ہزار سے زیادہ لوگ متاثر ہوچکے ہیں۔ جنوبی کوریا میں طبی حکام کا کہنا ہے کہ وہ اس نتیجے پر پہنچے ہیں کہ ’کووڈ 19 کے معاملے میں ہرڈ امیونیٹی ایک خوش فہمی ہے‘ جبکہ پاکستان کے صوبہ پنجاب کے وزیراعلی عثمان بزدار کی حکومت نے آکسیجن گیس کا پلانٹ لگانے کا حکم دیا ہے۔

لائیو کوریج

29 جون 2020سکاٹ لینڈ: لاک ڈاؤن میں نرمی، دکانیں اور کاروبار کھل گئے
،تصویر کا ذریعہGetty Images
سکاٹ لینڈ میں لاک ڈاؤن اقدامات میں نرمی کے بعد فیکٹریاں اور ایسی دکانیں جن تک سڑک سے رسائی آسان ہے، دوبارہ کھل رہی ہیں۔
چھوٹے پیمانے پر شادیاں اور تقریبات اب گھر کے باہر ہوسکتی ہیں اور چڑیا گھر اور سفاری پارکس دوبارہ کھل سکتے ہیں، لیکن صرف آس پاس رہنے والوں کے لیے۔
23 مارچ کو سکاٹش حکومت کی لاک ڈاؤن نافذ ہونے کے بعد یہ پہلا موقع ہے جب بہت سے سٹورز صارفین کے لیے کھلے ہوں گے۔
یہ اقدامات سکاٹش حکومت کے لاک ڈاؤن سے باہر آنے والے ’روٹ میپ‘ کے فیز ٹو کا حصہ ہیں۔ مزید پابندیاں اس ہفتے کے آخر میں ختم کی جانے والی ہیں۔
29 جون 2020سرکاری حج سکیم کے پیسے واپس کیے جائیں گے
،تصویر کا ذریعہGetty Images
پاکستان کی وزارتِ مذہبی امور جمعرات سے سرکاری حج سکیم کے تحت حاصل کی گئی فیس لوٹانی شروع کرے گی۔
ریڈیو پاکستان نے وزارت کے حوالے سے بتایا ہے کہ یہ پیسے مخصوص بینکوں کی برانچوں کے ذریعے ریفنڈ کیے جائیں گے۔
وزارت کے ترجمان نے کہا ہے کہ سرکاری سکیم کے تمام کامیاب درخواست گزاروں کو ان کے موبائل فونز پر پیغام کے ذریعے ان کے پیسوں کی واپسی کے بارے میں مطلع کیا جا رہا ہے۔
یاد رہے کہ وزارت کی جانب سے یہ فیصلہ سعودی حکومت کے اس اعلان کے بعد کیا گیا ہے کہ رواں سال سعودی عرب کے باہر سے کورونا کے باعث کسی بھی حاجی کو آنے کی اجازت نہیں دی جائے گی، اور صرف مملکت میں موجود لوگ ہی حج ادا کر سکیں گے۔
29 جون 2020کیا چمگادڑ کورونا وائرس پھیلاتے ہیں؟
سائنسدان کووڈ 19 کے نقطہ آغاز سے متعلق تحقیقات میں مصروف ہیں اور ایسے میں اس بات کا خوف بڑھ رہا ہے کہ چمگادڑ اس وبا کو پھیلا رہے ہیں۔ چمگادڑوں کی بحالی کا کام کرنے والے ان الزامات کو رد کرتے ہیں اور بتاتے ہیں کہ چمگاذڑ کس طرح انسانوں کی مدد کرتے ہیں۔
29 جون 2020بریکنگ, چین: بیجنگ کے قریب ’ہیبی‘ میں سخت لاک ڈاؤن نافذ، چار لاکھ افراد محصور
،تصویر کا ذریعہReuters
کورونا وائرس کے بڑھتے متاثرین کے پیش نظر چین نے دارالحکومت بیجنگ کے قریب صوبہ ہیبی میں سخت لاک ڈاؤن نافذ کردیا ہے۔
اس لاک ڈاؤن سے تقریباً چار لاکھ افراد متاثر ہوں گے۔
گذشتہ سال کے آخر میں کورونا انفیکشن چین سے شروع ہوا تھا ، لیکن اس کے بعد سے چین میں کووڈ 19 متاثرین کی تعداد بہت کم رہی ہے۔
لیکن انفیکشن کی ایک اور لہر کا خدشہ ظاہر کیا جا رہا ہے اور حکومت کچھ نئے متاثرین کو بہت سنجیدگی سے لے رہی ہے۔
ہیبی میں کیا ہو رہا ہے؟
اتوار کے روز عہدیداروں نے اعلان کیا کہ اینسائن کاؤنٹی کو مکمل طور پر لاک ڈاؤن کر لیا گیا ہے اور یہاں ہر چیز پر قابو پالیا جائے گا۔ صرف ضروری خدمات سے وابستہ افراد کو گھر سے باہر جانے کی اجازت ہوگی، جبکہ صرف ایک شخص دن میں باہر خریداری کرنے جا سکے گا۔
کسی بھی عمارت ،کمیونٹی اور گاؤں میں کسی بھی بیرونی شخص کو داخل ہونے کی اجازت نہیں ہوگی۔
عہدیداروں نے متنبہ کیا ہے کہ اگر قوانین کی خلاف ورزی ہوئی تو پولیس انھیں سزا دے گی۔ اینسائن دارالحکومت بیجنگ سے 150 کلومیٹر جنوب میں واقع ہے۔
بیجنگ میں دو ہفتے قبل کورونا کے نئے مریض رپورٹ ہونا شروع ہونے کے بعد اینسائن کاؤنٹی میں بھی 18متاثرین رپورٹ ہوئے ہیں۔
چین کے دیگر شہروں کے مقابلے میں اس علاقے میں زیادہ بھیڑ نہیں ہے۔ لہذا مقامی ماہرین صحت کو امید ہے کہ یہاں انفیکشن پھیلنے پر قابو پایا جاسکتا ہے۔
29 جون 2020گھانا میں طبی عملے کے کارکنان کے لیے خصوصی پیکج میں توسیع, تھامس ناڈی، بی بی سی نیوز
،تصویر کا ذریعہReuters
گھانا کے صدر نانا اکوفو اڈو نے طبی کارکنان کے لیے فوائد کے پیکج میں تین ماہ کی توسیع کا اعلان کر دیا ہے۔
ان کی بنیادی تنخواہ میں 50 فیصد اضافہ قائم رہے گا اور وہ جولائی، اگست اور ستمبر کے مہینوں میں انکم ٹیکس ادا نہیں کریں گے۔
اس پیکج کا اعلان ابتدائی طور پر تین ماہ پہلے کیا گیا تھا جب ملک میں کورونا وائرس کا پہلا کیس سامنے آیا تھا۔
اب تک گھانا میں 17 ہزار افراد میں وائرس کی تصدیق ہو چکی ہے جبکہ 112 لوگ اس سے ہلاک ہو چکے ہیں۔
یہاں پر اب تک دو لاکھ 94 ہزار 867 ٹیسٹ کیے گئے ہیں جو کہ برِاعظم کی سب سے بڑی تعداد ہے۔
29 جون 2020راولپنڈی کے مزید آٹھ علاقوں کو سیل کرنے کا فیصلہ
راولپنڈی کے حکام نے کورونا وائرس کے پھیلاؤ پر قابو پانے کے لیے شہر کے مزید آٹھ علاقوں کو سیل کرنے کا فیصلہ کیا ہے۔
ان علاقوں میں 30 جون سے دس جولائی تک لاک ڈاؤن رہے گا۔
X پوسٹ نظرانداز کریں
X کا مواد دکھانے کی اجازت دی جائے؟?
اس تحریر میں ایسا مواد ہے جو X کی جانب سے دیا گیا ہے۔ کسی بھی چیز کے لوڈ ہونے سے قبل ہم آپ سے اجازت چاہتے ہیں کیونکہ یہ ممکن ہے کہ وہ کوئی مخصوص کوکیز یا ٹیکنالوجیز کا استعمال کر رہے ہوں۔ آپ اسے تسلیم کرنے سے پہلے X ککی پالیسی اور پرائیویسی پالیسی پڑھنا چاہیں گے۔ اس مواد کو دیکھنے کے لیے ’تسلیم کریں، جاری رکھیں‘ پر کلک کریں۔
تنبیہ: بی بی سی دیگر ویب سائٹس کے مواد کی ذمہ دار نہیں ہے۔
X پوسٹ کا اختتام
29 جون 2020کورونا وائرس لاک ڈاؤن: فلپائن میں 214،000 زائد بچے پیدا ہونے کا خدشہ
،تصویر کا ذریعہGetty Images
فلپائن میں کورونا وائرس پر قابو پانے کے لیے سختی سے نافذ کیے گئے لاک ڈاون سے خاندانی منصوبہ بندی کی خدمات تک رسائی میں خلل پڑا ہے اور اس سے ملک میں دو دہائیوں کے دوران سب سے زیادہ بچے پیدا ہونے کا خدشہ ظاہر کیا جا رہا ہے۔
ہیلتھ ورکرز کے مطابق مارچ میں عائد کی جانے والی پابندیوں سے مریضوں اور طبی عملے دونوں کو کئی مہینوں تک کلینک تک جانے سے روک دیا گیا تھا اور اس کی وجہ سے بعض علاقوں میں کونڈم اور دیگر مانع حمل کی کمی ہو چکی ہے۔
فلپائن کی فیملی پلاننگ آرگنائزیشن کے ایگزیکٹو ڈائریکٹر نانڈی سینک نے کہا ہے کہ اگرچہ لاک ڈاؤن میں تمام شعبوں پر منفی اثر پڑا ہے لیکن اس کے باوجود ان کا عملہ کام جاری رکھے ہوئے ہے۔ انہوں نے مزید کہا کہ سرکاری سہولیات کھلی رہیں، لیکن درحقیقت ان تک رسائی ممکن نہ تھی۔
اس کیتھولک اکثریتی ملک میں 35،400 سے زیادہ کورونا وائرس متاثرین رپورٹ ہوئے ہیں اور سب سے زیادہ متاثرہ علاقہ میٹرو منیلا ہے۔
ملک میں مجموعی طور پر 1244 اموات ہو چکی ہیں۔
29 جون 2020انڈیا: گذشتہ 24 گھنٹوں میں 19،459 نئے متاثرین، مزید 380 اموات
،تصویر کا ذریعہReuters
انڈیا میں گذشتہ 24 گھنٹوں کے دوران کورونا وائرس کے 19،459 نئے مریض رپورٹ ہوئے جبکہ مزید 380 اموات ہوئی ہیں۔
سرکاری اعدادوشمار کے مطابق انڈیا میں متاثرین کی کل تعداد 5،48،318 ہوچکی ہے اور اس وائرس سے مرنے والوں کی کل تعداد 16،475 ہوگئی ہے۔
مہاراشٹرا ریاست میں پچھلے 24 گھنٹوں کے دوران سب سے زیادہ 5493 نئے مریض رپورٹ ہوئے ہیں۔
دہلی میں 2889 اور تامل ناڈو میں 3940 نئے مریضوں کی تصدیق کی گئی ہے۔
سرکاری اعدادوشمار کے مطابق کل متاثرین میں سے 58.67 فیصد یعنی 321،723 افراد صحتیاب ہوئے ہیں اور ملک میں فعال کیسز کی تعداد 210،120 ہے۔
انڈیا میں اب تک کورونا وائرس سے 16،475 اموات ہوئیں ہیں۔
29 جون 2020من پسند کی ادویات کو بازار سے لے کر کھانے کے کیا نقصانات ہیں؟
کورونا وائرس کی وبا پھیلنے کے بعد ہر ایک کی نظر طبی تحقیق کی جانب ہے کہ کب اس بیماری کا علاج دریافت ہوگا۔ لیکن جب بھی مثبت نتائج کے بعد کسی نئی دوائی کا نام سامنے آتا ہے تو پاکستان میں اس کی قلت یا پھر قیمت میں فوری اضافہ ہو جاتا ہے۔
خود سے اپنی من پسند کی ادویات کو بازار سے لے کر کھانے کے کیا نقصانات ہیں، یہ بتا رہی ہیں ڈاکٹر تمکنت منصور اس وی لاگ میں۔۔۔
29 جون 2020’ٹوکیو اولمپکس کو دوبارہ مؤخر کرنا ممکن نہیں ہوگا‘
،تصویر کا ذریعہReuters
جاپان اور بین الاقوامی اولمپکس کمیٹی کے حکام نے خبردار کیا ہے کہ اولمپکس کو دوبارہ ملتوی کرنا ممکن نہیں ہوگا اور ایک سال طویل تاخیر کی وجہ سے بھی زبردست مالی اور انتظامی بوجھ کا سامنا کرنا پڑا ہے۔
خبر رساں ادارے اے ایف پی کے مطابق 5 جولائی کے لیے طے شدہ ٹوکیو کی گورنری کے انتخابات سے پہلے ایک رائے شماری میں معلوم ہوا کہ موجودہ گورنر یوریکو کوئیکے اپنے مخالفین کی بہ نسبت کافی مارجن سے آگے ہیں۔
کوئیکے خود بھی ان کھیلوں کی تیاری میں مصروف رہی ہیں اور وہ گذشتہ اولمپکس کے بعد برازیل کے دارالحکومت ریو ڈی جنیرو بھی گئی تھیں تاکہ اولمپکس میزبانی کی منتقلی کی تقریب میں شرکت کریں۔
رواں ماہ کے اوائل میں انھوں نے اے ایف پی کو بتایا تھا کہ مؤخر کیے جانے والے اولمپکس کورونا کے وبا کے باوجود محفوظ ہوں گے۔
انھوں نے پہلی بار مؤخر ہونے والے کھیلوں کے انعقاد کو یقینی بنانے کے لیے '120 فیصد' کوششوں کا وعدہ کیا تھا۔
،تصویر کا ذریعہReuters
29 جون 2020کورونا وائرس: سب سے زیادہ اموات کن ممالک میں ہوئیں؟
،تصویر کا ذریعہReuters
دنیا بھر میں کورونا وائرس سے ہونے والی اموات کی تعداد پانچ لاکھ سے تجاوز کر چکی ہے۔
آئے آپ کو بتاتے ہیں کہ کن ممالک میں سب سے زیادہ اموات ہوئی ہیں:
- امریکہ :128,400
- برازیل :57,174
- برطانیہ :43,550
- اٹلی :34,738
- فرانس :29,778
- سپین :28,343
- میکسیکو :26,381
- انڈیا :16,487
- ایران :10,508
- بیلجیئیم :9732
- پیرو :9135
- روس :9073
- جرمنی :9029
- کینیڈا :8522
- نیدرلینڈز :6105
29 جون 2020آسٹریلیا کی ریاست وکٹوریا میں متاثرین بڑھنے لگے، حکام تشویش میں مبتلا
،تصویر کا ذریعہGetty Images
جنوبی آسٹریلیا کی ریاست وکٹوریا میں گذشتہ 24 گھنٹوں کے دوران کورونا وائرس کے 75 نئے متاثرین سامنے آئے ہیں۔ ریاست کے چیف میڈیکل افسر بریٹ سٹن نے اسے 'انتہائی تشویشناک' قرار دیا ہے۔
ریاست میں پہلے ہی تیز تر ٹیسٹنگ جاری ہے مگر سٹن کا کہنا ہے کہ علاقائی سطح پر لاک ڈاؤن کے ذریعے سماجی دوری کے اقدامات بھی نافذ کیے جا سکتے ہیں۔
انھوں نے رپورٹرز کو بتایا کہ اس صورتحال سے نمٹنے کے لیے ہمیں ہر ممکن اقدام کرنا ہوگا۔
پیر کو سامنے آنے والے متاثرین کی تعداد دو ماہ کی سب سے بڑی تعداد ہے۔
X پوسٹ نظرانداز کریں
X کا مواد دکھانے کی اجازت دی جائے؟?
اس تحریر میں ایسا مواد ہے جو X کی جانب سے دیا گیا ہے۔ کسی بھی چیز کے لوڈ ہونے سے قبل ہم آپ سے اجازت چاہتے ہیں کیونکہ یہ ممکن ہے کہ وہ کوئی مخصوص کوکیز یا ٹیکنالوجیز کا استعمال کر رہے ہوں۔ آپ اسے تسلیم کرنے سے پہلے X ککی پالیسی اور پرائیویسی پالیسی پڑھنا چاہیں گے۔ اس مواد کو دیکھنے کے لیے ’تسلیم کریں، جاری رکھیں‘ پر کلک کریں۔
تنبیہ: بی بی سی دیگر ویب سائٹس کے مواد کی ذمہ دار نہیں ہے۔
X پوسٹ کا اختتام
29 جون 2020کورونا وائرس: ڈیکسامیتھازون زندگی بچانے والی پہلی دوا ثابت ہوگئی
کورونا وائرس سے شدید بیمار مریضوں کی زندگی ایک سستی اور وسیع پیمانے پر دستیاب دوا سے بچائی جا سکتی ہے۔
برطانیہ میں ماہرین نے اس دوا کو کتنا مفید قرار دیا ہے؟ اس دوا کے بارے میں مزید تفصیلات بتا رہی ہیں ہدیٰ اکرام ہمارے ساتھی موسیٰ یاوری کی اس پوڈکاسٹ میں
29 جون 2020کوریا میں 42 نئے متاثرین سامنے آ گئے، سماجی دوری کا نیا منصوبہ
،تصویر کا ذریعہReuters
کوریا سینٹرز فار ڈزیز کنٹرول (کے سی ڈی سی) نے جنوبی کوریا میں کورونا وائرس کے 42 نئے متاثرین سامنے آنے کی تصدیق کی ہے جن میں سے 30 مقامی منتقلی کے ہیں۔
یہ تعداد ہفتے کے اختتام پر رپورٹ کی گئی تعداد سے کم ہے مگر یونہاپ نیوز ایجنسی کے مطابق جنوبی کوریائی حکام مرض کے مسلسل سامنے آنے والے کلسٹرز کے بارے میں تشویش کے شکار ہیں خاص طور پر جن کا تعلق گرجا گھروں سے ہے۔
اتوار کو جنوبی کوریا نے تین سطحی سماجی دوری پروگرام کا اعلان کیا۔ ملک اس وقت پہلی اور سب سے نچلی سطح پر ہے۔ اگر 14 دن تک متاثرین کی تعداد 50 سے بڑھی رہی تو اسے دوسری سطح پر لے جایا جائے گا۔
29 جون 2020پاکستان میں گذشتہ 24 گھنٹوں کے دوران 3557 نئے متاثرین سامنے آئے، 49 مزید ہلاکتیں, متاثرین: 206,512 ، ہلاکتیں: 4167 ، صحتیاب: 95,407
پاکستان میں حکام نے مطلع کیا ہے کہ یہاں گذشتہ 24 گھنٹوں کے دوران 23 ہزار نو ٹیسٹ کیے گئے جن میں سے 3557 افراد میں کورونا وائرس پایا گیا، جس کے بعد ملک میں متاثرین کی مجموعی تعداد دو لاکھ چھ ہزار 512 ہوگئی ہے۔
نیشنل کمانڈ اینڈ آپریشن سینٹر کے جاری کردہ اعداد و شمار کے مطابق گذشتہ روز 49 مزید افراد کورونا کے باعث ہلاک ہوئے۔ یوں ملک میں ہلاک ہونے والے افراد کی تعداد 4167 ہوگئی ہے۔
اب تک سب سے زیادہ متاثرین صوبہ سندھ میں ہیں جہاں 80 ہزار 446 افراد میں اس وائرس کی تصدیق ہوئی ہے، جبکہ سب سے زیادہ اموات صوبہ پنجاب میں ہوئی ہیں جہاں 1681 افراد کی اس مرض سے جان گئی۔
پاکستان میں اب تک 95 ہزار 407 افراد اس مرض سے صحتیاب ہوئے ہیں جن میں سے سب سے زیادہ سندھ میں 44 ہزار 532 ہیں۔
حکام نے مزید بتایا ہے کہ ملک بھر میں کووڈ 19 سے متاثرہ افراد کے لیے 1562 وینٹیلیٹر مختص کیے گئے ہیں جبکہ ان میں سے صرف 512 پر ہی فی الوقت مریض زیرِ علاج ہیں۔
29 جون 2020چین میں کورونا وائرس کے 12 نئے مریضوں کی تصدیق
،تصویر کا ذریعہReuters
چین میں کورونا وائرس کے 12 نئے مریضوں کی تصدیق کی گئی ہے جن میں پانچ افراد بیرونِ ملک سے آئے ہیں۔ گذشتہ روز یہ تعداد 17 تھی۔
باقی سات متاثرین بیجنگ میں مقامی منتقلی کے ہیں۔
بیجنگ میں کورونا وائرس کی نئی لہر 11 جون کو دارالحکومت میں تھوک کے بازار سے پھیلی۔ جس کے بعد سے 20 ملین آبادی والے اس شہر کے ایک تہائی افراد کے ٹیسٹ کیے گئے ہیں۔
29 جون 2020لاک ڈاؤن کے ذہنی صحت پر منفی اثرات اور ان کا حل
کورونا کے خلاف جاری جنگ میں سماجی دوری اور سیلف آئسولیشن واحد ہتھیار ہیں جنھیں نافذ کرنے کے لیے دنیا کے اکثر ملکوں میں لاک ڈاؤن کیا جا رہا ہے۔لیکن لاک ڈاؤن ہماری ذہنی صحت پر کس طرح اثر انداز ہو سکتا ہے اور اس سے پیدا ہونے والے نفسیاتی مسائل سے کیسے نمٹا جائے، جانیے ماہرِ نفسیات عطیہ نقوی سے ہمارے ساتھی کریم الاسلام کی اس ڈیجیٹل ویڈیو میں۔
29 جون 2020امریکہ: ٹیکساس کے گورنر نے کورونا کے 'تیز اور خطرناک موڑ' سے خبردار کر دیا
،تصویر کا ذریعہGetty Images
امریکی ریاست ٹیکساس کے گورنر گریگ ایبٹ نے خبردار کیا ہے کہ ریاست میں کورونا وائرس نے ایک 'تیز اور انتہائی خطرناک موڑ' لیا ہے۔
انھوں نے اتوار کو کہا کہ 'صرف گذشتہ چند ہفتوں کے دوران متاثرین کی یومیہ تعداد اوسطاً 2000 سے بڑھ کر 5000 سے زائد ہوگئی ہے۔
لاک ڈاؤن میں نرمی کے بعد کئی جنوبی اور مغربی ریاستوں میں متاثرین کی تعداد میں زبردست اضافہ دیکھنے میں آ رہا ہے۔
امریکہ میں اب متاثرین کی تعداد 25 لاکھ سے تجاوز کر چکی ہے۔
کووڈ 19 سے اب تک یہاں ایک لاکھ 25 ہزار سے زائد لوگ ہلاک ہو چکے ہیں جو کہ کسی بھی دوسرے ملک سے زیادہ ہے۔
29 جون 2020کورونا وائرس سے بچ جانے والوں کو ’پی ٹی ایس ڈی کا خطرہ‘, نک ٹریگل، نمائندہ صحت
ڈاکٹروں کا کہنا ہے کہ کورونا وائرس کا شکار جو افراد شدید بیماری کی حالت میں ہسپتالوں میں زیرِ علاج تھے، انھیں فوری طور پر پوسٹ ٹرامیٹک سٹریس ڈس آرڈر کے لیے معائنہ کروانے کی ضرورت ہے۔
کووڈ ٹروما رسپانس ورکنگ گروپ، جس کی سربراہی یونیورسٹی کالج لندن نے کی تھی اور اس میں جنوب مشرقی انگلینڈ کے ماہرین شامل تھے، کا کہنا ہے کہ ایسے مریض جنھیں انتہائی نگہداشت میں رکھا گیا تھا انھیں زیادہ خطرہ ہے۔
ماہرین کے مطابق ان افراد کا کم از کم ایک سال تک باقاعدہ چیک اپ ہونا چاہیے۔
ماہرین کا کہنا ہے کہ ان میں سے ہزاروں افراد شدید بیمار تھے اس لیے انھیں پی ٹی ایس ڈی کے خطرے کا سامنا کرنا پڑ سکتا تھا۔
گروپ کی جانب سے کی گئی تحقیق میں بتایا گیا ہے کہ ماضی میں متعدی بیماری کے دوران شدید بیماری کا سامنا کرنے والے تقریباً 30 فیصد مریضوں میں پی ٹی ایس ڈی کی علامات پائی گئیں اس کے علاوہ انھیں ڈپریشن اور اضطراب کا بھی سامنا رہا۔
29 جون 2020ایتھیوپیا: 100 سال سے زائد عمر کے شخص کی کورونا سے 'حیران کُن' بحالی
،تصویر کا ذریعہHANA ATSBEHA
ایتھیوپیا میں کورونا وائرس سے ایک ایسے متاثرہ شخص صحتیاب ہوئے ہیں جن کی عمر کم از کم 100 سال بتائی جا رہی ہے۔
ان کا علاج کرنے والے ڈاکٹروں میں سے ایک کا کہنا ہے کہ ان کی صحتیابی 'حیران کُن' تھی۔
ابا تیلاہون وولڈیمایکل کے خاندان کا کہنا ہے کہ ان کی عمر 114 سال ہے جس سے وہ دنیا کے معمر ترین شخص قرار پائیں گے تاہم ان کی عمر کی تصدیق کے لیے کوئی سندِ پیدائش موجود نہیں ہے۔
یاد رہے کہ 80 سال سے زائد عمر کے افراد اگر کورونا کے شکار ہوجائیں تو انھیں سب سے زیادہ خطرے کی زد میں تصور کیا جاتا ہے۔
ابا تیلاہون ایک آرتھوڈوکس مسیحی راہب ہیں اور اب ان کے پوتے ان کی گھر پر ہی دیکھ بھال کر رہے ہیں۔
انھوں نے بی بی سی کو بتایا: 'جب میں ہسپتال میں تھا تو خدا سے اپنی صحت کے لیے دعا مانگ رہا تھا۔ میں رو رہا تھا اور خدا سے دعا کر رہا تھا کہ پورا ملک دوبارہ صحتیاب ہوجائے۔'
ڈاکٹر ہیلوف اباتے نے بی بی سی کے پروگرام نیوز ڈے کو بتایا کہ ابا تیلاہون دارالحکومت عدیس ابابا میں اپنے محلے میں ایک سکریننگ کے دوران وائرس سے متاثر پائے گئے اور انھیں علامات ظاہر ہونے سے قبل ہی ہسپتال میں داخل کر لیا گیا تھا۔
انھوں نے کہا کہ اس سے میڈیکل ٹیموں کو ان کے علاج کی پیشگی تیاری کرنے اور اُن کی صورتحال کی قریبی نگرانی کرنے کا موقع مل گیا تھا۔