کووڈ کی تمام اقسام سے بچاؤ کے لیے منظور شدہ ویکسینز موثر: عالمی ادارہ صحت

لائیو کوریج

1. 18 مئ 2021بریکنگ, انڈیا کے صف اول کے وائرولوجسٹ شاہد جمیل کے استعفے کی وجہ کیا مودی حکومت پر تنقید تھی؟

   انڈیا کے سینیئر وائرولوجسٹ ڈاکٹر شاہد جمیل نے کورونا وائرس کی مختلف اقسام کا پتہ لگانے کے لیے سائنسی مشیروں کے سرکاری فورم 'انڈین سارس-سی او سی ٹو 2 جینومکس کونسورٹیا' (انساکوگ) کے صدر کے عہدے سے استعفی دے دیا ہے۔

   ڈاکٹر شاہد جمیل نے نیوز ایجنسی روئٹرز سے اپنے استعفیٰ کی تصدیق کی ہے لیکن انھوں نے واضح طور پر اس کی وجہ نہیں بتائی ہے۔

   ڈاکٹر شاہد جمیل نے کہا: 'میں وجوہات بتانے کے لیے پابند نہیں ہوں۔'

   ڈاکٹر جمیل نے روئٹرز کو یہ ضرور بتایا کہ مختلف اتھارٹی شواہد پر اس طرح توجہ نہیں دے رہے ہیں جو ان کی پالیسی رہی ہے۔

   تاہم مبصرین کا خیال ہے کہ نیویارک ٹائمز میں مضمون کی اشاعت کے بعد 'حکومتی دباؤ' ان کے استعفے کا سبب ہو سکتا ہے۔

   انساکوگ کی نگرانی کرنے والے بائیوٹیکنالوجی شعبے کے سیکریٹری رینو سوروپ نے ان کے استعفے پر کوئی تبصرہ نہیں کیا ہے۔

   روئٹرز نے ان کے استعفے پر مرکزی وزیر صحت ڈاکٹر ہرش وردھن سے بھی رابطہ کیا لیکن انھوں نے بھی کوئی جواب نہیں دیا۔

   اسی دوران انساکوگ کے ایک رکن نے روئٹرز کو بتایا کہ وہ حکومت اور جمیل کے مابین کسی براہ راست اختلاف رائے سے آگاہ نہیں ہیں۔

   اس فورم میں ایک اعلیٰ سرکاری سائنس دان نے اپنا نام ظاہر نہ کرنے کی شرط پر نیوز ایجنسی کو بتایا کہ ان کے خیال سے جمیل کے جانے سے وائرس کی مختلف اقسام پر جاری کام پر کوئی اثر نہیں پڑے گا۔

   نیو یارک ٹائمز میں تنقید

   ڈاکٹر شاہد جمیل نے حال ہی میں معروف اخبار نیو یارک ٹائمز میں شائع ایک مضمون میں انڈیا میں کووڈ 19 کی مینجمنٹ پر سخت تبصرے کیے تھے۔

   اپنے مضمون میں انھوں نے کم جانچ، ویکسینیشن کی سست رفتاری، ویکسین کی عدم دستیابی کو اجاگر کیا اور صحت کے شعبے میں بڑے عملے کی ضرورت پر زور دیا ہے۔

   انھوں نے لکھا: 'انڈیا میں میرے سائنسداں ساتھی ان تمام طریقوں کی حمایت کرتے ہیں لیکن انھیں شواہد پر مبنی پالیسی سازی میں سخت مزاحمت کا سامنا ہے۔'

   ملک میں ڈیٹا اکٹھا کرنے میں فرق پر انھوں نے کہا: '30 اپریل کو 800انڈین سائنس دانوں نے وزیر اعظم سے اپیل کی کہ انھیں دیٹا دیے جائیں تاکہ ان کی بنیاد پر وائرس کی تحقیق، پیش گوئی اور روک تھام میں انھیں مدد مل سکے۔'

2. 18 مئ 2021کورونا کی دوسری لہر: انڈیا میں ہندو لاشیں کیوں دفن کر رہے ہیں؟

3. 17 مئ 2021مودی کی ڈاکٹروں سے بلیک فنگس انفیکشن سے متعلق آگاہی پھیلانے کی اپیل

   وزیر اعظم نریندر مودی نے پیر کو ملک بھر کے ڈاکٹروں کے ساتھ ان کے کووڈ 19 کے تجربات پر بات کی۔ اس کے علاوہ انھوں نے ڈاکٹروں سے اپیل کی کہ وہ بلیک فنگس انفیکشن سے متعلق آگاہی پھیلائیں۔

   وزیرِ اعظم مودی نے ٹویٹ میں کہا کہ ’ایسے وقت میں ہمارے ڈاکٹروں کا عزم قابل ذکر ہے۔‘

   ویڈیو کانفرنسنگ کے ذریعے ملاقات کے دوران وزیر اعظم مودی نے طبی اور نیم طبی عملے کا شکریہ ادا کیا۔

   انھوں نے کہا کہ ٹیسٹنگ، ادویات کی فراہمی اور ریکارڈ وقت میں نئے انفراسٹرکچر کی تعمیر قابلِ تعریف ہے۔ انھوں نے کہا کہ آکسیجن کی تیاری میں بہت سارے چیلنجز تھے لیکن ان کا مقابلہ کیا گیا۔

   وزیر اعظم مودی نے اس بات کی نشاندہی کی کہ فرنٹ لائن ورکرز کے ویکسینیشن پروگرام کی حکمت عملی کی وجہ سے دوسری لہر کے دوران زیادہ سے زیادہ فائدہ ہوا ہے۔

   انھوں نے بتایا کہ ملک میں صحت کے 90 فیصد کارکنوں نے اس ویکسین کی پہلی خوراک لی ہے۔ ویکسین نے زیادہ تر ڈاکٹروں کی حفاظت کو یقینی بنایا ہے۔

   انھوں نے کہا کہ ’ویکسین حفاظت کا ایک بہت بڑا ذریعہ ہے۔ مرکزی حکومت اور تمام ریاستی حکومتیں زیادہ سے زیادہ لوگوں کو تیزی سے یہ ویکسین فراہم کرنے کے لیے کوششیں کر رہی ہیں۔

   اس کے علاوہ وزیر اعظم مودی نے بلیک فنگس انفیکشن کے چیلنجز پر تبادلہ خیال کیا۔ انھوں نے کہا کہ ڈاکٹروں کو ضروری اقدامات کرنے اور اس کے بارے میں آگاہی پھیلانے کے لیے اضافی محنت کرنا ہوگی۔

   انھوں نے طبی عملے کی جسمانی صحت کے ساتھ ساتھ ذہنی صحت پر بھی زور دیا اور کہا کہ اس لڑائی میں عام شہریوں کا اعتماد ایک بڑی طاقت ہے۔

4. 17 مئ 2021فائزر، ماڈرنا کی ویکسینز کووڈ کی انڈین قسم کے خلاف موثر: تحقیق

   خبر رساں ادارے اے ایف پی کے مطابق امریکی سائنسدانوں کی ایک نئی تحقیق میں یہ بات سامنے آئی ہے کہ کووڈ 19 کی دو انڈین قسموں کے خلاف فائزر اور ماڈرنا کی ویکسینز موثر ثابت ہوسکتی ہیں۔

   نیو یارک یونیورسٹی کے گروسمین سکول آف میڈیسن اور لینگون سینٹر کی لیب پر مبنی اس تحقیق کے ابتدائی نتائج تاحال شائع نہیں کیے گئے۔

   تحقیق کے مصنف نے اے ایف پی کو بتایا کہ ’ویکسین کی اینٹی باڈیز (کورونا کی دوسری) قسموں کے خلاف کمزور ہوتی ہیں لیکن اتنی کمزور نہیں کہ اس سے ویکسین کی حفاظتی صلاحیت پر اثر پڑے۔‘

   محققین نے امریکہ میں یہ دونوں ویکسینز لگوانے والوں کے خون کے نمونے حاصل کیے جو اس ملک میں اب تک 15 کروڑ سے زیادہ افراد کو دی جاچکی ہے۔ پھر انھوں نے لیب میں اس خون میں کووڈ 19 کی انڈین اقسام (بی 1 617 اور بی 1 618) کے وائرس داخل کیے۔

   اس مادے کو لیب میں پیدا کی گئی خلیات کے ساتھ ملایا گیا تاکہ یہ دیکھا جاسکے کہ آیا وائرس انھیں متاثر کرتا ہے یا نہیں اور اس طرح محققین نے اپنے نتائج اخذ کیے۔

   خیال رہے کہ اس نوعیت کی تحقیق ہمیشہ درست پیشگوئی نہیں کرسکتی کہ اصل میں کیا ہوگا۔

5. 17 مئ 2021جعلی کورونا ٹیسٹ: 52 متاثرہ مریض دبئی اور شارجہ سے پاکستان پہنچ گئے؟, ریاض سہیل، بی بی سی اردو ڈاٹ کام، کراچی

   پاکستان کی نجی فضائی کمپنی ایئربلیو نے مبینہ طور پر کورونا وائرس سے متاثرہ 52 مریضوں کو شارجہ سے پاکستان پہنچا دیا ہے، سول ایوی ایشن کا الزام ہے کہ جعلی منفی پی سی آر ٹیسٹ کی بنیاد پر ان متاثرہ مسافروں کو پاکستان لایا گیا ہے۔

   سول ایوی ایشن کے ترجمان کا کہنا ہے کہ ایئر بلیو کی پرواز 16 مئی کو 27 پازئیٹو مسافروں کو لے کر شارجہ سے پشاور ایئرپورٹ پہنچی، جبکہ اس سے ایک ہفتہ قبل یعنی دس مئی کو پرواز پی اے 611 چوبیس کورونا پازیٹیو مسافروں کو دبئی سے پشاور لے کر پہنچی تھی۔

   ترجمان کا کہنا ہے کہ نجی ایئرلائن کی جانب سے کورونا ایس او پیز کی خلاف ورزی پر سول ایوی ایشن اٹھارتی نے 17 مئی کو دبئی سے پشاور کی پرواز کا اجازت نامہ منسوخ کر دیا ہے۔

   ترجمان کا کہنا ہے کہ مذکورہ نجی ائیر لائن، وارننگ کے باوجود کورونا ایس او پیز نظر انداز کر رہی ہے اور اس عمل سے دوسرے مسافروں کی جانوں کو بھی خطرات لاحق ہیں۔

   دریں اثنا سول ایوی ایشن کی جانب سے 16 مئی کو ’ان باؤنڈ ٹو ٹریول پاکستان آن فیک نیگیٹو پی سی آر ٹیسٹ رزلٹ‘ کے عنوان سے جاری کیے گئے مراسلہ میں کہا گیا ہے کہ ریپڈ اینٹی جن ٹیسٹ (آر اے ٹی) کے ذریعے ان متاثرہ افراد کا پتہ لگایا گیا۔

   مراسلے میں کہا گیا ہے کہ دیگر فضائی کمپنیاں ایس او پیز کی پیروی کر رہی ہیں۔

   دھوکہ دہی کے الزام میں دبئی سے پشاور کی پرواز کا اجازت نامہ منسوخ کر دیا گیا ہے۔

   ایئربلیو کے ڈپٹی ڈائریکٹر راحیل احمد نے بی بی سی سے بات کرتے ہوئے الزام عائد کیا کہ سول ایوی ایشن نے علجت میں ان پر جرمانہ عائد کیا ہے۔

   ان کا کہنا تھا کہ ایس او پیز کی پیروی کرتے ہوئے جن مسافروں نے گذشتہ 72 گھنٹوں میں پی سی آر ٹیسٹ کرائے ہوں، ان کے منفی ٹیسٹ رزلٹ دیکھنے کے بعد ہی انھیں جہاز پر سوار کیا جاتا ہے۔

   ان کا کہنا تھا کہ یہ بھی ممکن ہے کہ 72 گھنٹے میں یہ افراد وائرس سے متاثر ہوجائیں۔

   انھوں نے بتایا کہ اب وہ مبینہ متاثرہ افراد کے پی سی آر ٹیسٹ کے نتائج متعلقہ لیبارٹریوں سے بھی چیک کرا رہے ہیں کہ کہیں یہ ٹیسٹ نتائج جعلی تو نہیں۔

   ایئر بلیو کے ترجمان نے واضح کیا کہ دبئی اور شارجہ کی جن لیبارٹریوں سے ٹیسٹ کرائے جاتے ہیں وہ اعلیٰ معیار کی ہیں اور دبئی حکومت کے محکمہ صحت سے باضابطہ منظور شدہ ہیں۔

   دلچسپ بات ہے کہ ایئربلیو کا آپریشن پاکستان کے تمام بڑے ایئرپورٹس پر جاری ہے اور صرف پشاور ایئرپورٹ پر 52 مسافروں کے ٹیسٹ مثبت قرار دیے گئے ہیں۔

   ایئر بلیو کمپنی کے مالک شاہد خاقان عباسی ہیں جو سابق وزیراعظم اور مسلم لیگ نون کے سرگرم رہنما ہیں۔

6. 17 مئ 2021اپنے ملک میں ویکسین ملنے کی امید نہ ہو تو بیرون ملک جانا اخلاقی طور پر جائز ہے؟

   اینو لینزے 'برلن سٹوری' میوزیم کے ڈائریکٹر ہیں۔ وہ عراق کے علاقے کردستان کا اکثر سفر کرے ہیں جہاں کورونا انفیکشن کے کیسز بہت زیادہ ہیں۔ ان کا کہنا ہے کہ مہاجرین کی امداد کام بھی ان کے ذمے ہوتا ہے۔

   اگرچہ جرمنی میں امدادی کاموں سے وابستہ لوگوں کو ویکسین لگانے کے عمل میں ترجیح دینے کا انتظام ہے، اینو لینزے کا کہنا ہے کہ انھیں یہ ویکسین نہیں ملی کیونکہ وہ یہ کام ایک رضاکار کی حیثیت سے کرتے ہیں۔

   اینو لینزے نے وضاحت کرتے ہوئے کہا کہ ’قواعد بعض اوقات بہت ہی عجیب ہوتے ہیں۔ مجھے ویکسین نہیں ملتی تھی۔‘

   جب انھوں نے ماسکو کے لیے بکنگ کروائی تب تک ان کے 70 سالہ والد کو بھی یہ ویکسین نہیں مل سکی تھی۔

   ان کا کہنا ہے کہ جرمنی میں ویکسین دینے کی ترجیحی فہرست میں کوئی خرابی نہیں لیکن اس سے حفاظتی ٹیکوں کا عمل غیرمعمولی طور پر سست پڑجاتا ہے۔

   تاہم ویکسین حاصل کرنے میں مبینہ 'عدم توازن' کے بارے میں دنیا بھر کے لوگوں سے شکایات ہیں۔ جن کے پاس پیسہ ہے ان کے پاس یہ اختیار بھی موجود ہے کہ وہ کہیں بھی جاکر ویکسین لیں۔

   ایسے ممالک کی فہرست میں سربیا، امریکہ، متحدہ عرب امارات اور یہاں تک کہ مالدیپ جیسے ممالک کے نام بھی شامل ہیں۔

   مزید جاننے کے لیے کلک کیجیے

7. 17 مئ 2021ڈیڑھ برس میں ہم کووڈ 19 کے بارے میں مزید کیا جان پائے ہیں؟

   ابتدائی طور پر کہا گیا تھا کہ بخار اور کھانسی اس کی علامات ہیں۔ لیکن پھر جلد ہی اس بیماری میں مبتلا بہت سے لوگوں نے محسوس کیا کہ وہ اپنی قوت شامہ اور اور حسِ ذائقہ کھو رہے ہیں اور پھر اسے اس بیماری کے متعلق ڈبلیو ایچ او کی عام علامات کی فہرست میں شامل کر لیا گیا۔

   جوں جوں وبائی مرض میں اضافہ ہوتا رہا دوسری کم عام علامات بھی سامنے آئیں جن میں میں مندرجہ ذیل علامات شامل ہیں:

   • گلے کی سوزش
   • سر درد
   • درد
   • دست
   • جلد پر سرخ دانے آنا یا انگلیوں اور انگوٹھوں کے رنگ کا بدلنا
   • سرخ دیدے یا آنکھوں میں خارش

   ڈبلیو ایچ او کا کہنا ہے کہ جو لوگ بہت بیمار ہیں فوری طبی امداد حاصل کریں۔ سنگین علامات میں سانس لینے میں دشواری، قوت گویائی یا نقل و حرکت میں کمی، بے چینی یا سینے میں درد وغیرہ شامل ہیں۔

   مکمل تحریر پڑھنے کے لیے کلک کیجیے۔

8. 17 مئ 2021کورونا کی علامات کے علاج کی انڈین ساختہ دوا کی منظوری

   انڈیا نے کووڈ 19 کی علامات کے علاج کے لیے مقامی طور پر تیار کردہ دوا تقسیم کرنا شروع کردیا ہے۔

   حکام نے 2-ڈی جی نامی دوا کو منظوری دی ہے اور اسے سب سے پہلے دارالحکومت دہلی کے ہسپتالوں میں استعمال کیا جائے گا۔ حکومت کے ایک بیان کے مطابق یہ دوا کووڈ 19 سے 'متاثرہ لوگوں کے لیے انتہائی فائدہ مند ہوگی۔'

   تاہم کچھ ناقدوں نے متنبہ کیا ہے کہ اس دوا کے متعلق بہت زیادہ اعدادوشمار نہیں ہیں جس سے کووڈ کے علاج کے لیے اس کی ہنگامی طور پر منظوری کو تقویت مل سکے۔

   ڈیفنس ریسرچ اینڈ ڈویلپمنٹ آرگنائزیشن (ڈی آر ڈی او) نے دواساز کمپنی ڈاکٹر ریڈی کے تعاون سے یہ 2-ڈی آکسی-ڈی گلوکوز یعنی 2-ڈی جی نامی دوا تیار کی ہے۔ حکومت نے ایک بیان میں کہا ہے کہ 'طبی آزمائشی نتائج میں یہ ظاہر ہوا ہے کہ یہ دوا ہسپتال میں داخل مریضوں کی تیزی سے بحالی میں مدد کرتی ہے اور مشین کی مدد سے آکسیجن پر انحصار کم کرتی ہے۔'

   لیکن ماہرین صحت کا کہنا ہے کہ انسانوں پر کی جانے والی آزمائشوں میں دوا کی کارکردگی سے متعلق شائع شدہ اعداد و شمار کی کمی اس کی افادیت کے بارے میں سوالات پیدا کرتی ہے۔

   انھوں نے یہ بھی کہا کہ ڈی 2 اصل میں کینسر کے علاج کے لیے تیار کی گئی تھی اور اسی کے علاج کے لیے اس کا تجربہ بھی کیا گیا تھا لیکن طویل استعمال کے بعد بھی اس مرض کے علاج کے لیے اسے منظوری نہیں دی گئی ہے۔

   بہرحال کووڈ 19 کا فی الحال کوئی علاج نہیں ہے اور علامات کو کم کرنے کے لیے جو دوائیں استعمال کی جاتی ہیں ان کی انڈیا میں شدید قلت دیکھی جا رہی جبکہ انڈیا تباہ کن دوسری لہر کی لپیٹ میں ہے۔

9. 17 مئ 2021کورونا وائرس کی تازہ ترین صورتحال: بی بی سی اردو کی خصوصی لائیو کوریج

   بی بی سی اردو کی لائیو کوریج میں خوش آمدید۔ یہاں آپ کو کورونا وآیرس کی وبا سے متعلق اہم خبریں اور معلومات ملیں گی۔

   گذشتہ ہفتے کی اپ ڈیٹس پر نظر ڈالنے کے لیے یہاں کلک کیجیے۔

10. 24 اپريل 2020کورونا ٹیلی تھون: وزیر اعظم کی احساس ٹرانسمیشن میں مولانا طارق جمیل اور جاوید میانداد کے بیانات پر سوشل میڈیا پر بحث