Қирғизистонда яна бир аёл зўравонлик қурбони бўлгани айтилмоқда

Қирғизистоннинг биринчи хоними оилавий зўравонлик жиддий муаммога айлангани ҳақида баёнот берганидан бир кун ўтиб, мамлакат жанубида 24 ёшли аёлнинг жасади топилди.

Ўзбекистон билан чегарадаги Боткен вилоятида уч нафар фарзанднинг онаси Дилфуза Сайназарова вафот этган. Унинг жасади даладан топилган.

Яқинлари бу ҳолатни оилавий зўравонлик билан боғламоқда. Милиция марҳуманинг турмуш ўртоғини гумонланувчи сифатида қўлга олган.

Яқинларининг айтишича, Дилфуза 18 ёшида турмуш қурган ва кейинги йилларда турмуш ўртоғи ҳамда унинг қариндошлари томонидан босим остида яшаган. Улар куёвнинг рашк сабабли Дилфуза ҳамширалик ишини ташлашга мажбур бўлганини ҳам даъво қилмоқда.

Оила аъзоларига кўра, воқеадан икки кун олдин Дилфуза ота-онасининг уйига қайтиб келиб, ажрашиш истагини билдирган. Аммо қайнотаси келишмовчиликлар ҳал қилинишига ваъда бергач, у яна турмуш ўртоғининг олдига қайтган.

Марҳуманинг онаси қизининг қайнонасидан қўрққани ва телефонда ҳам эркин гаплаша олмаганини BBC журналистига айтган. Унинг сўзларига кўра, орадан бир кун ўтиб, оила аъзоларига Дилфузанинг жасади даладан топилгани ҳақида хабар берилган.

"Ўғлим синглисини олиб кетиш учун бориб, қизимнинг жасадини даладан топибди. Юз-кўзи шишиб кетган, танасида калтакланган излар бор эди, оғзи ёрилган, пешонаси жароҳатланган эди. Бўйнида бўғиш излари ҳам бор экан. Биз уни дарҳол шифохонага олиб бордик. Шифокорлар қизимиз вафот этганини айтишди", деди марҳуманинг онаси Шарофат Сайназарова.

Бироқ бу даъволарни ҳозирча мустақил манбалар орқали тасдиқлашнинг имкони бўлмади. BBC иккинчи томоннинг фикрини эшитишга тайёр.

Қирғизистон Ички ишлар вазирлиги мазкур ҳолат юзасидан жиноят иши қўзғатилганини билдирди.

Оилавий зўравонлик муаммоси

Бу воқеа Қирғизистонда оилавий зўравонлик мавзусини яна кун тартибига олиб чиқди. Расмий маълумотларга кўра, мамлакатда 2026 йилнинг январ-август ойларида 18 минг 862 та оилавий зўравонлик ҳолати қайд этилган. Бу ўтган йилнинг шу даврига нисбатан 32 фоизга кўп.

Дилфузанинг ўлимидан бир кун олдин Қирғизистоннинг биринчи хоними Айгул Жапарова жамиятни оилавий зўравонликка бефарқ бўлмасликка ва жабрланган аёллар ҳамда болаларга ўз вақтида ёрдам кўрсатишга чақирганди.

У 30 октябрда Анқарада ўтган Туркий давлатлар ташкилотининг Оила ва аёллар масалалари бўйича Олий кенгаши йиғилишида сўзга чиқиб, оилавий зўравонлик кўп ҳолларда ошкор қилинмай, яширин қолиб кетишини жиддий муаммо сифатида баҳолаган.

Жапарованинг таъкидлашича, зўравонликдан жабрланган аёл ва қизларга ҳуқуқий, психологик ҳамда ижтимоий ёрдам кўрсатиш, шунингдек давлат идоралари ва жамоат ташкилотлари ҳамкорлигини кучайтириш муҳим.

Расмий маълумотларга кўра, Қирғизистонда жорий йилнинг саккиз ойида оилавий зўравонлик билан боғлиқ ҳолатларда 26 нафар инсон ҳаётдан кўз юмган.