KALLATTIIN , Namoonni walitti bu'iinsa Mooyyaleen Keeniyaatti baqatan 50,000 ta'a - UN

Haguuggii Tamsaasa Kallattii

1. Daqiiqaa 30 duraNamichi duguuggaa sanyii Ruwaandaa keessatti hirmaachuusaa dhoksee US jiraataa ture balleessan itti murame

   

   Madda suuraa, AFP via Getty Images

   Lammiin Ruwaandaa duguuggaa sanyii biyyattii keessatti gaggeeffame keessatti hirmaachuu haaluun US jiraataa ture adabbiin yakkaa itti murame

   Manni murtii federaalaa Boostan lammii Ruwaandaa Eriik Nishimiyee duguuggaa sanyii keessatti hirmaachuu haalun baqattummaan US jiraataa ture kanarratti balleessaa kan mure yoo ta'u, bara 2019 keessa hiriyaa isaa biraa duguuggaa sanyiirratti hirmaatee turettatti himannaa dhiyaatef ragaa ta'ee dhiyaachuun jecha sobaa dubbatee sirna haqaas jallise jedhame.

   Eriik duguuggaa sanyii Ruwaandatti gaggeeffame booda gara Keeniyaatti baqachuun baqattummaan gara US deeme.

   Duguuggaa sanyii warra Tuutsii irratti raawwatame keessatti hirmaachuusaaf ragaa irratti dhiyaate keessaa, yeroo barataa yuunivarsiitii ture, kallattiin warra Tuutsii irratti haleellaa gaggeessaa akka tureedha.

   Bara 1994 Ruwaandaa keessatti duguuggaa sanyii warra Tuutsii irratti kan raawwatame yoo ta'u, guyyaa 100 keessatti haleellaa gaggeeffameen namoota 800,000 ol kan ta'antu ajjeefame.

   Namni kun yeroo koolugaltummaaf UStti iyyatu, duguuggaa sanyii keessatti hin hirmaanne jedhee sobuusaan hidhaa hanga waggaa 10 isa eeggata jedhame.

2. 29 Onkololeessa 2026Masriifi Turkiin leenjii waloo humna galaanaa taasisuufi

   

   Madda suuraa, Reuters

   Turkiifi Masriin Galaana Mediteraaniyaanii irratti yaalii waraanaa adeemsisuuf akka jedhan dhagahame.

   Biyyoonni hariiroon isaanii yeroo dheeraaf rakkoo keessa ture kunneen torban tokko booda leenjii waraanaa waloo akka taasisan Ministeerri Ittisaa Turkii dubbateera.

   Yaaliin waloo humna galaanaa biyyoota lamaanii kuni ''Friendship Sea 2026'' jedhamee moggaafameera.

   Biyyoonni lamaan gama baha Mediteraaniyaan irratti wal daangessu.

   Akka Ministeera Ittisaa Turkiitti, Turkiin faayidaa isheerratti hundaa'uun ''daangaa galaanaa'' Masrii waliin qabduurratti waliigaltee mallatteessuuf qophii ta'ullee dubbataniiru.

3. 29 Onkololeessa 2026Lakkoofsi namoota walitti bu'iinsa Mooyyaleen Keeniyaatti ce'an 50,000 ta'a - UN

   

   Madda suuraa, SM

   Walitti bu'iinsi Magaalaa Mooyyalee keessatti torban darbe mudate hordofee ummanni 50,000 ta'u gara daangaa Keeniyaatti ce'uu Dhaabbanni Biyyoota Gamtoomanii beeksise.

   Lakkoofsi kuni gaafa Kibxataa 36,000 turerraa daran dabaluu akka agarsiisu gabaasni AFP mul'isa.

   Dhaabbata Biyyoota Gamtoomaniitti qondaalli dhimma godaantotaa hordofu, UNHCR, aangawoota irraa odeeffachuun namoonni 50,000'tti tilmaamaman gara Keeniyaa ce'uu himan.

   Keeniyaatti bakka buutuun UNHRC Aadde Faaxumaa Mohaamad lakkoofsi kuni saffisaan dabaluu mala jechuun dubbachuun isaanii gabaafameera.

   Walitti bu'iinsa alaabaan Naannoo Somaalee Moyyalee keessa yeroo dhaabamu ka'e lubbuu namootaas galaafateera.

   Jiraataan Mooyyalee BBC'n gaafa Roobii dubbise gaafa Roobiis magaalattii keessa walitti bu'iinsi akka ture himaniiru.

   Ka'umsi rakkoo Mooyyaalee maali, mootummaan Itoophiyaa maaliif callise?

4. 29 Onkololeessa 2026Lammiin Somaaliyaa seeraan ala paasportii Keeniyaa qabachuun yakkamaa ta'e

   

   Madda suuraa, AFP

   Lammiin Somaaliyaa seeraan ala paasportii lammummaa Keeniyaa mul'isu qabachuufi seeraan ala Keeniyaa keessa seenuun yakkamaa ta'uu Daarektoretiin Qorannoo Yakkaa Keeniyaa beeksise.

   Namni kuni Mohaamud Mohaammad Rooble jedhama.

   Qorannoon akka mul'isutti namni kuni dokimantii sobaa dhiheessuuni paasporti lammummaa Keeniyaa mul'isu kan fudhate.

   Manni Murtii JKIA nama kana shilingii Keeniyaa 370,000 adabeera. Akka Somaaliyaatti deebifamuus mure.

5. 29 Onkololeessa 2026Ameerikaan Ministeera Ittisaa Ruwaandaarra qoqqobbii keesse

   

   Madda suuraa, Getty Images

   Ameerikaan qoqqobbii kana kan keesse Ministeerri Ittisaa Ruwaandaa garee finciltootaa M23 kan baha Rippaabliika Dimokiraatawaa Koongoo keessaa lolaa jiran deeggara jechuuni.

   Qoqqobbiin kun Ruwaandaan loltoota ishee naannichaa akka baastuufi finciltoota deeggaruu akka dhaabdu gochuuf tarkaanfii fudhatamedha jedhame.

   Ministirri Maallaqaa Ameerikaa Iskoot Baaset, "Ruwaandaan deeggarsa M23f gootu dhaabuu qabdi," jedhan.

   Ji'oota dura jaarsummaa Ameerikaatiin Rippaablikni Dimookraatawaa Koongoo fi Ruwaandaan waliigaltee nagaa mallatteessanii turan.

   Ministeerri Maallaqa Ameerikaa jedhutti, Ministeerri Ittisaa Ruwaandaa loltoonni isaa kumaatamaan lakkaawaman garee finciltoota M23 deeggaranii akka lolan ajaja dabarseera.

   Deeggarsa hidhannoowwan waraanaa, loojistikii fi leenjiis godheera jedheen.

   Gareen M23 naannolee Kaabaa fi Kibba Kiivuu kanneen albuudaan badhaadhan to'atee argama.

   Naannichi oomisha warqee fi kooltaaniin beekama.

   Akka Ameerikaan jettutti, albuudni naannolee finciltoonni to'atan irraa ba'u gabaa Ruwaandaa seena.

   Ruwaandaan albuuda ishee biratti oomishtuu ol gara alaatti ergaa akka jirtus hubatameera.

6. 29 Onkololeessa 2026"Kitaabni Ququlluun ni hayyama" jechuun paastariin haadha warraa lamaffaa waldaarratti beeksise

   

   Madda suuraa, LifeWorks Church

   Paastariin Ameerikaa, isteeta Ohaayoo tokko waldaa Kiristaanaa isaa irratti haadha warraa lamaffaa fuudhe beeksisuu hordofee miidiyaa hawaasaa fi hordoftoota amanataa biratti ijoo dubbii ta'e.

   Kana nama ajaa'ibe biraan ammoo haati warraa isaa isheen guddoon (jalqabaa) gocha kana deeggaruu isheeti.

   Hundeessaa fi Paastariin angafaa Waldaa LifeWorks kan naannoo Kiliivlaand Wiikliifitti argamuu kan ta'e Israa'el T Foord haadha warraa isaa lamaffaa maqaan ishee Shakaayilaa Foord tajaajila guyyaa Dibalataa dhiyeenya kana gaggeefamerratti fuulduratti baasee beeksiseera.

   Viidiyoo yeroo qophiin kun gaggeeffamu agarsiisuu fi oonlaayin irratti qoodameen, haati warraasaa isheen jalqabaa isa waliin paastarummaan tajaajiltu, Liidiyaa Foord waltajjiirra dhaabbattee "obboleettii koo gaa'elaa" jechuun Shakaayilaa yeroo simatti mul'ateera.

   Boodarra yeroo waldaa sana dura dhaabbattee dubbatte Shakaayilaan, ishee fi Paastar Foord dhoksaadhaan waggoota sadan darban wal fuudhanii akka jiran ifa goote.

   Kitaaba Qulqulluun deeggaruu fi qeeqa mudate

   Erga kun waldaa irratti beeksifamee, Paastar Foord gaa'ela kana sirrii ta'uu isaa amansiisuuf jecha miidiyaa hawaasaarra baaseera. Paastar Foord, namni tokko haadha manaa tokko qofa haa qabaatu kan jedhu ilaalcha namni uumedha malee, ulaagaa Kitaaba Qulqulluu miti jechuun ibse.

   Seera Bahuu 21:10 dabalatee Kitaaba Qulqulluu kutaa Kakuu Moofaa keessaa luqqaasii eeruun, akka caaffata qulqulluutti namni tokko haadha warraa baayyee qabaachuun ni hayyamama jedhe.

   "Akka hawaasatti namni tokko haadha warraa tokko qofa qabaachuu danda'a jennee akka amanutti barsiifamne. Kun ammoo barsiisa Kitaaba Qulqulluu waliin hin deemu," jedhe Foord viidiyoo dubbii falmii kaase kanaaf deebii kennuuf oonlaayiniirratti maxxanseen.

   "Dhugaan kun namoota baayyee akka hin gammchiifne nan beeka, gaggeessitoonni baayyeenis kanarratti mariyachuu ni baqatu. Haata'u malee, gaheen koo nama gammachiisuu miti, waan jiru hordofuudha malee."

   Foord ejjennoon isaa kun hordoftoonni amantaa akka waldaa Kiristaanichaa gadhiisanii bahan gochuu danda'u akka hubatu himuun, murtuu fudhate kanaan wal qabatee hordoftoota amantaa akka dhabuu danda'us beekee of qopheesseera jedheera.

   Deebii ummataa fi dhimmoota seeraa

   Kana beeksisuun miidiyaa hawaasaa irratti yaada wal makaa keessumsiiseera. Hayyoonni Kiristaanaa fi qeeqxonni akka Foord caaffata qulqulluu itti hiike mormaniiru. Kana ammoo barsiisa Macaafa Qulqulluu Kakuu Haaraa Ximootiwoos 1ffaa 3:2 irra jiru kan gaggeessaan waldaa Kiristaanaa "abbaa warraa haadha warraa tokkoo qofa" ta'uu qaba jedhu eeruun ture kan falman.

   Seera qabeessummaa gaa'ela akkasii kana ilaalchisees gaaffileen ka'aniiru. Seerri Isteetii Ohaayoo namni seeraan gaa'elaan nama waliin jiru tokko nama biraa waliin gaa'ela ijaarrachuu ni dhorka.

   Haata'u malee, gaa'el lamaffaa Paastar Foord seeraan aanga'oota biratti ykn waliigaltee karaa amanataa waldaa keessatti galmaa'ee sartifikeetii kan qabu ta'uu fi hin galmaa'iin jiraachuu wan ifa ta'e hin jiru.

   Miidiyaa hwaasaa irratti namoonni gariin taatee kana waan addaa akka ta'etti, keessumaa akkaataa haatiwarraa isheen angafaa itti ishee lamaffaa waltajjiirratti itti simatte ilaaluun ajaa'ibsiifachaa jiru.

   Kanneen biroo ammoo Foord Kitaaba Qulqulluu akka fedhii dhuunfaa isaatiif ta'utti hiikkateera jechuun qeeqaa jiru.

   Odeeffannoo kana waliin deeman biroo:

   Paasterii dureessa ilaalcha dubartootaaf qabuun hedduu qeeqamu

   Haadha manaa tokko abbootii warraa lama: Sirna gaa'ilaa falmii kaase

7. 29 Onkololeessa 2026Carraan waraana haaraa Baha Giddugaleessaa keessatti dhalachuu jira jechuun Omaan akeekkachiifte

   

   Madda suuraa, Getty Images

   Ministirri Dhimma Alaa Omaan, Badiir Busaa'idii, carraan waraanni biraa Baha Giddugaleessaa keessatti dhalachuu jiraachuu mala jechuun akeekkachiise.

   Buufata TV Biriteen Chaanaal 4 irratti dubbii dubbateen, biyyoonni Galoo Galaanaa dhimmoota nageenyaa Baha Giddugaleessaa keessatti gahee adda durummaa bahachuu itti fufuu qabu jedhe Busaa'idiin.

   Naannoo Galoo Galaanaa Peershiyaa keessatti sirini nageenyaa haaraa akka uumamuuf waamicha kan godhe Ministirri Dhimma Alaa Omaan, biyyoonni naannicha keessa jiran humnaa ol Yunaayitid Isteetis irratti hundaa'uurra nageenya ofii isaanii eegachuurratti jabaachuu qabu jedheera.

   Waraana dhiyeenya kanaan dura, Omaan Iraan fi Yunaayitid Araarsuuf yaalaa turte.

   Dhiyeenya kana Ministeerri Dhimma Alaa Iraan dhiibbaawwan inni naannoo fi daldala addunyaa irratti qabaatu dabalatee waraanni haaraan ykn haleellaa Israa'el Iraan irratti raawwattu rakkoo hamaa biraa uumuu danda'a jedhee ture.

8. 29 Onkololeessa 2026Nataaniyaahuun paartileen Arabaa filannoo Israa'el hatan jechuun himate

   

   Madda suuraa, Reuters

   Likud paartiin Ministira Muummee Israa'el Benjaamiin Netaaniyaahuu, paartilee Arabaa biyyattii karaa gubboo, doorsisaa, hokkaraa fi filattoota waliin dha'uutiin filannoo hataniiru jechuun himate.

   Ibsa baaseen Likud paartiin akka jedhetti, ragaalee dhibbaan lakkaa'aman poolisii fi, ejensii nageenya biyya keessaa Israa'el, Shiin Bet'f, akkasumas aanga'oota filannoof dhiyeesseera.

   "Filannoon biyya Israa'el [kessatti gaggeeffame] paartilee Arabaa kan shororkeessummaa fi biyya Yihudootaa dhabamsiisuu deeggaruun hatameera," jedhe Netaaniyaahuun.

   Itti dabaluun, paartiin Arabaa kun filattoota baafachuuf doorsisa, gubboo, hokkaraa, dokumantiiwwan sobaa fi sagantaawwan dhorkaman gargaarameera jechuun himate Netaaniyaahuun.

   Haata'u malee, himannaawwan kunneen Likud paartiirraa kan dhiyaatan yoo ta'an, aanga'oota dhimmi ilaallatuum ammatti hin mirkanaa'iin jiru.

   Israa'el keessatti filannoon gaggeeffamee booda sagaleen lakkaa'amaa jira. Haata'u malee, morkattoonni ciccimoo lamaan mootummaa hundeessu jedhamanii eegaman teessummaa caalmaa paarlaamaa ijaaruuf isaan dandeeessisu hin arganne.

   Filannoo Israa'el miilanaa kanarratti, ummanni bahee filate %77 ol ta'uun seenaa keessatti isa guddaadha jedhameera, haata'u malee filannoon kun akkuma eegame danqaa siyaasaa uumeera.

   Bu'aan duraa akka akeekutti, paartileen Arabaan durfamu teessuu paarlaamaa 19 kan mo'ate yoo ta'u, kun ammoo garee lamaan jajjaboo wal morkatan sagalee gahaa argatanii mootummaa hundeessuu keessatti gahee murteessaa akka qabaatu isa taasisa.

   Odeeffannoo dabalataa dhimma kanarratti:

   Gaadii Ayizankoot: Qondaalli waraanaa buleessi filannoo Israa'eliin Netaaniyaahuu kokkee qabaa jiru eenyu?

   Filannoon Israa'elii fi US dhiibbaa idil-addunyaa akkamii qabaata?

9. 28 Onkololeessa 2026TPLF janaraala isaa harka kennatan ''gantummaan'' himate

   

   Madda suuraa, DW/fb

   Dhaabi TPLF ajajaa olaanaa isaa keessaa tokko kan ta'aniifi Wiixata Raayyaa Ittisa Biyyaatti harka kan kennatan M/Janaraal Yohaannis W/Goorgisiin ''gantummaan'' himate.

   Dhaabi TPLF ibsa baaseen ajajaan kuni lola tibbana tureen ''gamaaggamaafi waan hordofsiisu hubachuun'' walgahiirraa hafuu kan eere TPLF, ''diina waliin hariiroo tolfataniiru'' jechuun himateera.

   Jeneraal Yohaannis maqaa Joon Medid jedhamuun kan beekaman yoo ta'u miseensa Ajaja Giddugaleessaa TPLF fi ajajaa waraanaa Kibba Tigraay turan.

   Akka maddeen BBC jedhanitti, Jeneraal Yohaannis, eegdota isaaniifi ajajoota waraanaa sadarkaa Koloneel irra jiran torba dabalatee loltoota biroo waliin Godina Giddugaleessa Tigraay, Aanaa Raamaa, naannoo Qushee Simret jedhamutti humnoota mootummaa Itoophiyaa fi michoota isaaniin marfamuun harka kennachuuf dirqaman.

   Haa ta'u malee, Mootummaan Itoophiyaa hanga ammaatti dhimma kanaa irratti ibsi keenne hin jiru.

   Ajajaan Humnoota Nageenyaa Tigraay Meejar Janaraal Gabraigzaaber Bayyanaa (Waddi Anxiruu jedhamuunis beekamu) garuu Janaraal Yohaannis harka kennachuu isaanii BBC'f mirkaneessaniiru.

   ''Bilbilaan itti dubbadheera. Hiriyyaafi ajajaakoo waan tureef isatti hin qabamne. Lubbuun ooluun isaa gaarii ta'uufi wanti guddaan wal arguu isaanii'' akka ta'e himan.

   Oduun harka kennachuu Jeneraal Yohaannis yoo mirkanaa'e, kun waraana Tigraay keessatti tarkaanfii guddaa ta'uu akka danda'u xinxaltootni kan ibsaa jiran.

   'Bilbileeraaf' - Jeneraalli beekamaan TPLF tibbana harka kennate eenyu?

10. 28 Onkololeessa 2026Jeettiiwwan waraanaa Su-35 Itoophiyaan Raashiyaarraa fudhatte kan akkamiiti?

    

    Madda suuraa, Abiy Ahmed/ Facebook

    Itoophiyaan jeettiiwwan waraanaa ammayyaa Su-35 jedhaman kudha lama Raashiyaa irraa fudhachuu Ministirri Muummee Abiy Ahimad beeksisan.

    Gabaasa guutuu asii dubbisaa.

11. 28 Onkololeessa 2026Ispeen keessatti baaburri walitti bu'uun xiqqaatu namoonni 64 du'an

    

    Madda suuraa, EPA

    Ispeen walakkaatti baaburri saffisa guddaa qabu baabura biraa dhaabbatee turetti bu'uun yoo xiqqaate namoota 64 ajjeesuu aangawoonni beeksisaniiru.

    Mootummaan bulchiinsa naannoo Castilla-La Mancha AFP-tti akka himetti, lakkoofsi namoota du'anii 30 gaheera.

    Akka Tajaajilli Daandii Baaburaa Ispeen (ADIF) jedhutti, balaan kun Roobii ganama bulchiinsa Toleedoo keessatti uumame.

    Kanaanis, tajaajilli baaburaa Maadrid, Siyuudaad Riyaal fi Andaluusiyaa gidduu jiru addaan citeera.

    Eshtar Paadillaa, dubbii himtuun mootummaa kan kutaa bulchiinsa Castilla-La Mancha, Miidiyaa TVE-tti akka himtetti, balaan kun baabura saffisa guddaa qaban lamaan kallattii tokkoon Maadriid irraa gara Siiviyaa deemaa turan gidduutti kan uumame yoo ta'u, inni tokko otuu inni kaan dhaabbatee jiruu duubaan rukutee furgoowwan isaa lama daandii baasuun mudate.

    Sababni balaa kanaa hamma yoonaatti akka hin beekamne akka isheen ibsitetti.

    Paadillaan imaltoonni 397 baabura kubbaaniyaa RENFE keessa kan turan yoo ta'u, 147 kan kaampaanii IRYO keessa turan.

12. 28 Onkololeessa 2026Netaaniyaahuu moo morkattota isaa? Bu'aan sagalee filannoo Israa'el maal agarsiisa?

    

    Madda suuraa, Getty Images

    Filannoo waliigalaa Israa'elitti kaleessa gaggeeffameen, hanga yoonatti lakkoofsi sagalee erga buufataaleen filannoo cufamanii booda argame akka agarsiisutti filannoo murteessaa kana irratti ammatti injifataan ifa taane.

    Tilmaama jiruun garuu yeroo dheeraaf Ministira Muummee kan turan Beeniyaamin Netaaniyaahuu fi morkataana isaa hogganaan waraanaa duraanii Gaadii Ayizankoot teessoo gahaa mootummaa ijaaruu isaan dandeessisu argachuun isaanii waan hin oolle fakkaata.

    Sagalee hanaga yoonatti lakaa'amen garuu qaamni mootummaa ijaaruuf teessoo gahaa argata jedhamee hin jiru.

    Buufatni TV biyya keessaa lama paartiin Yashar kan Gaadii Ayizankoo fi paartileen mormitootaa sadii kanneen deeggartoota Yihudoota gurguddoo qaban kanneen gamtaa siyaasaa isaa kan "Garee Jijjiiramaa" jedhamu keessatti hiriiran, jedhamu ijaaran teessoo 120 paarlaamaa Israa'el Kenesset keessaa 51 argatu jedhamee tilmaamameera.

    Paartileen Arabaa gahee akkami qabu?

13. 28 Onkololeessa 2026Filannoo Israa'eliin eenyu dursaa jira?

    

    Madda suuraa, Getty Images

    Filannoo Israa'elitti gaggeeffameen sagalee %60 lakkaa'ameen morkattoonni lamaan MM Benjaamin Netaaniyaahuu fi Gaadii Ayiskoot akka malee walitti dhiyoo jiru.

    Neetiwoorkiin oduu Israa'el Kan News, Chaanaal 12 fi CHaanaal 13 abbaa mo'atu raaganii akka gabaasanitti teessuma 55 Netaaniyaahuuf, 49 ammoo Gaadii Ayiskootiif kennaniiru.

    Paartiin mo'atu 'Knesset' [Caffee] keessatti yoo xiqqaate teessoo 61 argachuu isa gaafata.

    Lakkoofsi ummata Kibxata filachuuf bahe waggoota kurnan dhiyoo asitti isa ol aanaadha jedhameera.

    Akka ragaan Koree Komishinii Filannoo Biyyaalessaa agarsiisutti, sa'aatii buufataaleen filannoo cufamanitti kan gamaa'an keessaa %77.7 sagalee kan kennan yoo ta'u kun ammoo erga bara 1999 as isa guddaadha jedhameera.

14. 28 Onkololeessa 2026ASHAMAA!

    Akkam jirtu hordoftoota keenyaa?

    Toora odeeffannoo kallattiin isin biraan geenyu jalqabneerra.

    Filannoo Israa'el keessatti gaggeeffamaa jiruufi odeessaalee idil-addunya biraa isin biraan geenya.

    NU hordofaa!