ሩሲያ ኢትዮጵያ እና ኤርትራን ለማሸማገል ፈቃደኛ መሆኗን አስታወቀች

የቀጥታ ሽፋን

1. 15 ጥቅምት 2026በፓኪስታን የትምህርት ቤት ጣሪያ ተደርምሶ ቢያንስ 28 ተማሪዎችና አንድ መምህር ሞቱ

   በፓኪስታን ፔሽዋር ከተማ የሚገኝ ትምህርት ቤት ጣሪያ ተደርምሶ ቢያንስ 28 ተማሪዎች እና አንድ መምህር ሲሞቱ፣ 20 ሰዎች ጉዳት እንደደረሰባቸው የሆስፒታል ባለሥልጣናት ተናገሩ።

   የአደጋው የመጀመሪያ ደረጃ ሪፖርቶች እንደሚያመለክቱት አደጋው ሲደርስ ተማሪዎች ክፍል ውስጥ ነበሩ።

   በሥፍራው ያሉ የነፍስ አድን ሰራተኞችም ፍርስራሽ የተጫናቸው ሌሎች ሰዎች ካሉ እየፈለጉ ነው።

   አደጋውን ተከትሎ የትምህርት ቤቱ ባለቤት መታሰራቸውን ፖሊስ የገለጸ ሲሆን ምርምራ እየተካሄደ ነው።

   ጠቅላይ ሚኒስትር ሸህባዝ ሻሪፍ በሰጡት መግለጫ በደረሰው ጉዳት ጥልቅ ሀዘን እንደተሰማቸው ገልጸው፤ ለተጎጂ ቤተሰቦች መፅናናትን ተመኝተዋል።

   በፓኪስታን የጣሪያ እና የሕንጻ መደርመስ አደጋ የተለመደ ነው።

   እንዲህ ዓይነት አደጋዎች የሚያጋጥሙት ሕንጻዎች የደኅንነት ደረጃቸውን ባለመጠበቃቸው እና ጥራት የሌለው የግንባታ ቁሳቁሶችን ስለሚጠቀሙ ነው።

   ያለፈው ሰኔ ወር ላይ በላሆር ከተማ የአንድ የትምህርት ማዕከል ጣሪያ ፈርሶ ከ12 በላይ ሕፃናት ሞተዋል።

   እአአ በ2025 እንዲሁ በካራቺ አካባቢ ባለአምስት ወለል ሕንጻ ተደርምሶ 27 ሰዎች ሲሞቱ 10 ሰዎች ጉዳት ደርሶባቸዋል።

2. 15 ጥቅምት 2026የትራምፕ አስተዳደር በሩሲያ የነዳጅ ጫኝ መርከቦች ላይ የተጣለውን ማዕቀብ ለማላላት እያሰበ መሆኑ ተዘገበ

   የፕሬዚደንት ዶናልድ ትራምፕ አስተዳደር ‘ሻዶው ፍሊት’ በመባል በሚታወቁት የነዳጅ ዘይት እና ናፍጣ ምርቶችን በሚያጓጉዙ መርከቦች ላይ የተጣለውን ማዕቀብ ለማላላት እያጤነ መሆኑን ሮይተርስ ዘገበ።

   እነዚህ ነዳጅ ጫኝ መርከቦች እንደ ሩሲያ እና ኢራን ካሉ ማዕቀብ ከተጣለባቸው አገራት በምስጢር ነዳጅ የሚያጓጉዙ ናቸው።

   አብዛኞቹ እነዚህ መርከቦች ንብረትነታቸው የማን እንደሆነ እና የመድን ዋስትና የቱ ኩባንያ እንደሰጣቸው አይታወቅም።

   ሮይተርስ አንድ ስማቸው ያልተጠቀሰ የአሜሪካ ባለሥልጣንን ጠቅሶ እንደዘገበው አስተዳደሩ አሁን ላይ ማዕቀቡን ለማላላት እያሰበ ያለው በዓለም ላይ ያጋጠመውን ያልተጠበቀ የነዳጅ ዋጋ ንረትን ለመቀነስ እና አቅርቦቱን ለማሻሻል ነው።

   በመሆኑም አስተዳደሩ ማዕቀብ የተጣለባቸው መርከቦች ነዳጅ እንዲያጓጉዙ ለመፍቀድ እያሰበ መሆኑን ባለሥልጣኑ ተናግረዋል።

   የአሜሪካ የኢነርጂ ኃላፊ ክሪስ ራይትም በሳዑዲ አረቢያ ለተካሄደው የዓለም የፔትሮሊየም ጉባኤ በላኩት እና በማኅበራዊ ሚዲያ ላይ በተጋራ የቪዲዮ መልዕክት የአሜሪካ መንግሥት 'በሻዶው ፍሊት' ላይ የጣለውን ማዕቀብ ለማላላት እየተወያየ መሆኑን ገልጸዋል።

   የአሜሪካው ፕሬዚደንት ትራምፕ ከቀናት በፊት በሩሲያ ላይ ናፍጣ ላይ የጣሉትን ማዕቀብ በጊዜያዊነት አንስተዋል።

   ውሳኔያቸው ከዩክሬን ፕሬዚደንት ቮሎድሚር ዜሌንስኪ፣ ከአውሮፓ አገራት እና ከአንዳንድ የትራምፕ ሪፐብሊካን ፓርቲ አባላት ትችት ገጥሞታል።

3. 15 ጥቅምት 2026ለ12 ዓመታት የተጓተተው ከቻይና ወደ ሰሜን ኮሪያ የሚወስደው ድልድይ ተከፈተ

   በቻይና እና ሰሜን ኮሪያ መካከል ያለው የንግድ ግንኙነት መሻሻሉን ተከትሎ ሁለቱን አገራት የሚያገናኘው ድልድይ መከፈቱ ተገለጸ።

   በኒውክሌር መሣሪያ ምክንያት ዓለም አቀፍ ማዕቀቦች የተጣሉባት ሰሜን ኮሪያ ዋነኛ የንግድ አጋሯ ቻይና ሆናለች።

   3 ኪሎሜትር የሚረዝመው ድልድይ ዋነኛ የንግድ መስመር እንደሚሆንም ይጠበቃል።

   በሁለቱ አገራት መካከል ያለው ግንኙነት ሲቀዛቀዝ በአውሮፓውያኑ 2014 ሰሜን ኮሪያ የመንገዱን ግንባታ አቋርጣለች።

   የቻይና የውጭ ጉዳይ ሚኒስቴር ቃል አቀባይ ማኦ ኒንግ “ትስስር ለመፍጠር ጠቃሚ ነው። ንግድን እንዲሁም የሕዝብ ለሕዝብ ግንኙነትን ያሻሽላል” ሲሉ የድልድዩ መከፈት የሚኖረውን ጠቀሜታ ገልጸዋል።

   ባለፈው ዓመት በሁለቱ አገራት መካከል የነበረው የንግድ ልውውጥ 2.7 ቢሊዮን ዶላር ደርሷል።

   በሀንኩክ ዩኒቨርስቲ የቻይና የውጭ ጉዳዮች አጥኚ ካን ዩን-ዮንግ እንደሚሉት ግን የተባበሩት መንግሥታት በሰሜን ኮሪያ ላይ በጣለው ማዕቀብ መሠረት ድንበር አካባቢ ንግድ ሊከናወን የሚችልበት ዕድል ጠባብ ነው።

4. 15 ጥቅምት 2026አሜሪካ እና ኢራን በሆርሙዝ ወሽመጥ ማዳበሪያ እንዲያልፍ እንዲስማሙ ተመድ አሳሰበ

   አሜሪካ እና ኢራን በቀጣይ ሳምንታት በሆርሙዝ ወሽመጥ በኩል ማዳበሪያ እንዲያልፍ ካልተስማሙ የአፍሪካ እና እስያ የምግብ ደኅንነት አደጋ ውስጥ እንደሚገባ የተባበሩት መንግሥታት አስጠነቀቀ።

   ተመድ በሆርሙዝ ወሽመጥ በኩል ማዳበሪያ እንዲያለፍ የሚያመቻች ቡድን አዋቅሯል።

   የተባበሩት መንግሥታት ምክትል ዋና ጸሐፊ ሞሪራ ደ ሲልቫ እንደተናገሩት፤ ቡድኑ በሆርሙዝ ወሽመጥ በኩል ማዳበሪያ ማለፍ የሚችልበትን መንገድ ቀይሷል። አሜሪካ እና ኢራን ስምምነት ላይ ከደረሱ ከ7 እስከ 10 ባለው ቀን ውስጥ እንደሚተገበርም ገልጸዋል።

   ነገ የዓለም የምግብ ቀን ሲሆን፤ ምክትል ዋና ጸሐፊው በባንኮክ የሚካሄደውን የዓለም አቀፉ ገንዘብ ተቋም እና የዓለም ባንክ ዓመታዊ ውይይት እየታደሙ ይገኛሉ።

   በሰጡት ቃል ምልልስም “በቀጣይ ጥቂት ሳምንታት ውስጥ የግድ ስምምነት ላይ መደረስ አለበት። ካልሆነ ግን ሰብል የሚዘራበት ወቅት ያልፋል” ብለዋል።

   ሮይተርስ የዜና ወኪል ያነጋገራቸው የአሜሪካ የውጭ ጉዳይ ሚኒስቴር ቃል አቀባይ እንደገለጹት፤ የአሜሪካ ጦር በሆርሙዝ ወሽመጥ በኩል በሺህዎች የሚቆጠሩ መርከቦች እንዲያልፉ አግዟል።

   “ኢራን በሆርሙዝ ወሽመጥ ያለውን የመንቀሳቀስ ነጻነት ለማሰናክለ የምታደርገውን ጥረት ለማክሸፍ እርምጃ መውሰዳችንን እንቀጥላለን” ሲሉም ተናግረዋል።

   ባንኮክ ከሚገኘው የኢራን ኤምባሲ ምላሽ ለማግኘት የተደረገው ጥረት አልተሳካም።

5. 15 ጥቅምት 2026ኬንያ በኢቦላ ቫይረስ የተያዘ ሁለተኛው ግለሰብ መገኘቱን አረጋገጠች

   ኬንያ መነሻው ከዲሞክራቲክ ሪፐብሊክ ኦፍ ኮንጎ የሆነ አንድ ነጋዴ በኢቦላ ቫይረስ መሞቱ ከተረጋገጠ ከ10 ቀናት በኋላ ሁለተኛውን በቫይረሱ የተያዘ ሰው አገኘች።

   አሁን በቫይረሱ መያዙ የተረጋገጠው የ39 ዓመቱ ግለሰብ በቫይረሱ ከሞተው ግለሰብ ጋር የቅርብ ዘመድ ሲሆን በለይቶ ማቆያ ውስጥ እንደነበር የኬንያ ጤና ሚኒስቴር ገልጿል።

   ሁለቱም በበሽታው የተያዙ ሰዎች ንክኪ ያላቸው እንደሆነ የገለጸው ሚኒስቴሩ፣ እስካሁን ድረስ ቫይረሱ ወደ ማኅበረሰቡ መሰራጨቱን የሚያሳይ መረጃ እንደሌለ ገልጿል።

   ሆኖም ማኅበረሰቡ እንዲረጋጋ፤ ነገር ግን ጥንቃቄ እንዲያደርግ ሚኒስቴሩ አሳስቧል።

   መጀመሪያ በቫይረሱ የተያዘው የ40 ዓመቱ ኬንያዊ ህመም አጋጥሞት ናይሮቢ የሚገኝ ሆስፒታል ከገባ በኋላ ነበር ሕይወቱ ያለፈው።

   ከአውሮፕላን ማረፊያ ተቀብሎ ወደ ሆስፒታል የወሰደውም አሁን በቫይረሱ መያዙ የተረጋገጠው ግለሰብ ነበር።

   ግለሰቡ ወደ ዲሞክራቲክ ሪፐብሊክ ኮንጎ ተጉዞ የነበረ ሲሆን ምንም ምልክት ሳያሳይ ነበር በኡጋንዳ አድርጎ ወደ ኬንያ የገባው።

   የኢቦላ ቫይረስ ህመም ለማስከተል ከሁለት እስከ 21 ቀናት ድረስ ይወስዳል። ይህ ማለት አንድ በቫይረሱ የተያዘ ሰው ለበርካታ ሳምንታት ምልክት ሳያሳይ ሊቆይ ይችላል ማለት ነው።

   በመሆኑም ቀድሞ በሽታውን መለየት የመዳን እድል እንዲኖር እና ቫይረሱ ወደ ሌሎች ሰዎች እንዳይዛመት ያደርጋል።

   ግለሰቡ ሕይወቱ ካለፈ በኋላ ከእርሱ ጋር ንክኪ ያላቸው 128 ሰዎች ተለይተዋል።

   ከማክሰኞ ዕለት ወዲህ 113 የሚሆኑት መገኘታቸውን የጤና ሚኒስቴር አስታውቋል። ከእነዚህ መካከል 108 የሚሆኑት በኬንያ በለይቶ ማቆያ ውስጥ የሚገኙ ሲሆን ቀሪዎቹ እየተፈለጉ ነው።

   በዲሞክራቲክ ሪፐብሊክ ኮንጎ በዚህ ዓመት ብቻ ከ4000 በላይ ሰዎች በኢቦላ ቫይረስ ሞተዋል። ይህም እስካሁን ከተቀሰቀሱ ከባድ ወረርሽኞች ውስጥ ሁለተኛው ገዳይ አድርጎታል።

6. 14 ጥቅምት 2026በአንድ ጊዜ በአምስት የመንግሥት መሥሪያ ቤቶች በመሥራት 350 ሺህ ፓውንድ ያገኘው ግለሰብ በማጭበርበር ተከሰሰ

   በዩናይትድ ኪንግደም በአምስት የመንግሥት መሥሪያ ቤቶች በመሥራት 350 ሺህ ፓውንድ ያገኘው ግለሰብ ፍርድ ቤት ቀረበ።

   ካሺም ቾውድሀሪ የተባለው ግለሰብ “ታምሜያለሁ” ብሎ ከአንዱ መሥሪያ ቤት ቀርቶ ወደ ሌላኛው በመሄድ እና “ከቤት ሆኜ ልሥራ” በሚል በማጭበርበር ተከስሶ ፍርድ ቤት ቀርቧል።

   ከአውሮፓውያኑ ጥር 2020 እስከ መስከረም 2023 ባሉት ዓመታት ለአምስት የመንግሥት መሥሪያ ቤቶች ሠርቷል።

   በሳውዝሀውክ ክራውን ፍርድ ቤት የቀረበው ካሺም፤ ከአለቃው ጋር በቪድዮ ሲነጋገር የታመመ ለመምሰል ነጭ መዋዋቢያ (ሜክ አፕ) ተቀብቶ ነበር ተብሏል። ሆኖም መዋዋቢያው ከፊቱ ላይ ለቅቋል።

   በምሥራቅ ለንደን የሚኖረው የ55 ዓመቱ ግለሰብ ዘጠኝ የማጭበርበር ክሶች ቢቀርቡበትም ጥፋተኛ አለመሆኑን ገልጿል።

   በውሸት ገንዘብ ለማግኘት ሞክሯል መባሉንም አስተባብሏል።

   ሆኖም ግን ሥራ ሲያመለክት ራሱን “በሐሰተኛ መንገድ ማቅረቡ” በፍርድ ቤት ተገልጿል።

   በዩኬ የአገር ውስጥ ጉዳይ መሥሪያ ቤት፣ የአካባቢ ጥበቃ መሥሪያ ቤት፣ የምግብ እና የገጠር ጉዳዮች መሥሪያ ቤት፣ የጤና ደኅንነት መሥሪያ ቤት እና የጤና እና ማኅበራዊ ጥበቃ መሥሪያ ቤቶች በተመሳሳይ ወቅት ሠርቷል። በመሥሪያ ቤቶቹ እንደ ሙሉ ጊዜ ተቀጣሪ ሲከፈለው እንደነበር በፍርድ ቤቱ ተገልጿል።

7. 14 ጥቅምት 2026በቱርክ 4,700 ዓመት ያስቆጠረ የመርከብ ስብርባሪ ተገኘ

   በዓለም ታሪክ ረዥም ዕድሜ ያለው የመርከብ ስብርባሪ በቱርክ ባሕር ዳርቻ መገኘቱን የቅሪተ አካል ተመራማሪዎች አስታወቁ።

   የመርከብ ስብርባሪው ከ4,400 እስከ 4,700 ዓመታት ያስቆጠረ እንደሆነ ተገልጿል።

   በነሐስ ዘመን (ብሮንዝ ኤጅ) መርከቡ እንደተሰባበረ ይታመናል። ይህ ዘመን ፒራሚዶች የተገነቡበት ነው።

   የመርከቡ እንጨታማ ክፍል ዘመን ተሻግሮ ባይተርፍም በሸክላ የተሠሩ እቃ ማስቀመጫ ማሰሮዎች ባሕር ወለል ላይ ተገኝተዋል።

   መርከቡ 10 ሜትር ርዝመት እንደነበረው የቅሪተ አካል ተመራማሪዎች ተናግረዋል።

   መርከቡ በሜድትራኒያን ባሕር ላይ የሚንቀሳቀስ የንግድ መርከብ ነበር።

   በቱርክ የአክዴንዝ ዩኒቨርስቲ ባለሙያ ፕ/ር ሀካን ኦኒዝ “የመርከቡ ስብርባሪ ከባሕር በታች የተገኘ ጊዜ ጠቋሚ ነው” ሲሉ ገልጸውታል።

   በዚያን ዘመን በባሕር መጓዝ አደገኛ ነበር። በተለይም ኬኮቫ ደሴት አካባቢ ባለው ጠንካራ ንፋስ ምክንያት መርከቦች ጉዳት ይደርስባቸው ነበር።

   አሰሳ በተካሄደበት አካባቢ በመቶዎች የሚቆጠሩ መርከቦች ስብርባሪዎች ተገኝተዋል።

8. 14 ጥቅምት 2026ኢራን በሆርሙዝ ወሽመጥ የምታልፍ መርከብ በፈንጂ ተመትታ መስመጧን አስታወቀች

   በሆርሙዝ ወሽመጥ ላይ ስትንቀሳቀስ የነበረች የጭነት መርከብ በፈንጂ ተመትታ መስመጧን የኢራን አብዮታዊ ዘብ ባሕር ኃይል አስታወቀ።

   ባለፈው ዓመት የካቲት ወር ላይ የኢራን ጦርነት ከተጀመረ ወዲህ ቴህራን መርከብ መስመጡን ስትናገር ይህ የመጀመርያዋ ነው።

   የመርከቧ ሠራተኞች ስላሉበት ሁኔታ የታወቀ ነገር የለም። የኢራን ብሔራዊ ቴሌቪዥን አብዮታዊ ዘቡን ጠቅሶ መርከቧ ረቡዕ ማለዳ እየቀዘፈች የነበረው ሕገ ወጥ እና አደገኛ በሚባል መስመር ላይ እንደነበር ዘግቧል።

   መርከቧ መጀመርያ በእሳት መያያዟ የተገለጸ ሲሆን 2 ሺህ 500 ኮንቴነሮችን መጫኗ ተገልጿል። ኢራን በተደጋጋሚ ያለ እርሷ ፈቃድ መርከቦች በወሽመጡ እንዳያቋርጡ አስጠንቅቃለች።

   የአሜሪካ ጦር በኦማን የባሕር ክልል በሚገኘው የወሽመጡ አካል መርከቦች እንዲያልፉ ከለላ ይሰጣል። ስለ መርከቧ መስመጥ በገለልተኛ ወገን የተረጋገጠ መረጃ የለም።

9. 14 ጥቅምት 2026በጀርመን አንዲት ታዳጊን አላግባብ ጎንትሏል የተባለ ሮቦት በፖሊስ ተያዘ

   የጀርመን ፖሊስ ሮቦት ተጠቅመው በ16 ዓመቷ ታዳጊ ላይ ተገቢ ያልሆነ ድርጊት ፈጽመዋል በተባሉ ሁለት ታዳጊ ወጣቶች ላይ ምርመራ ጀመረ።

   የኮሎኝ ፖሊስ፣ የታዳጊዋን መቀመጫ አላግባብ ነክቷል የተባለውን ቀይ እና ወርቃማ ቀለም ያለው ሮቦት ወርሷል። ታዳጊዋ በድርጊቱ ተረብሻ በመጮህ ከቦታው መሸሿ ተገልጿል።

   የኖርዝራይን ዌስትፋሊያ ፖሊስ፣ የ16 ዓመቱ የሮቦቱ ባለቤት እና የ19 ዓመት ጓደኛው ክስተቱን በማኅበራዊ ሚዲያ በቀጥታ እያስተላለፉ አስተያየት ሲሰጡበት እንደነበር ይታመናል ብሏል።

   ፖሊስ በፌስቡክ ባወጣው መግለጫ፣ 120 ሴንቲ ሜትር ቁመት ያለው ሮቦቱ ቅዳሜ ዕለት እኩለ ሌሊት አካባቢ ታዳጊዋ ከጓደኞቿ ጋር ሳለች ከኋላዋ እንደቀረባት ገልጿል።

   ክስተቱ የተፈፀመው ልጃገረዷ በከተማው መሀል አካባቢ በሚገኝ ፈጣን ምግብ ቤት ፊት ቆማ ሳለች እንደሆነ የፖሊስ መረጃ ያመለክታል።

   የድንገተኛ ጊዜ አገልግሎት ስለጉዳዩ መረጃ ከደረሰው በኋላ፣ በምርመራ ላይ ያሉት ሁለቱ ወጣቶች ብዙም ሳይቆይ በአቅራቢያው ተገኝተዋል። ሮቦቱም በባለቤቱ መኪና የኋላ ክፍል መገኘቱን ፖሊስ ተናግሯል።

   ፖሊስ ያወጣው ፎቶ ሮቦቱ ጥቁር ጺም፣ ወርቃማ ቀለም ያለው ሰንሰለት እና ነጭ ልብስ ለብሶ ያሳያል።

   ፖሊስ ከሮቦቱ ጋር የተጠርጣሪዎቹን ሁለት ሞባይል ስልኮችም የያዘ ሲሆን በክስተቱ ወቅት ሆን ብለው የሮቦቱን እንቅስቃሴ እየተቆጣጠሩ እንደነበር ለማጣራት ምርመራ እያደረገ ነው።

   ፖሊስ አስከትሎ በፌስቡክ ገጹ ባስተላለፈው መልዕክት፣ ጉዳዩን በተመለከተ በማኅበራዊ ሚዲያ የሚሰጡ አንዳንድ አስተያየቶች “ወሰን የሚያልፉ እና በከፋ ሁኔታም የወንጀል ድርጊት ሊሆኑ የሚችሉ” መሆናቸውን አስጠንቅቋል።

10. 14 ጥቅምት 2026የሩሲያ ጥቃት 600 ሺህ ዩክሬናውያንን ከኤሌክትሪክ ኃይል ውጭ ማድረጉን ዜሌንስኪ ተናገሩ

    ሩሲያ ምሽቱን በፈፀመችው የሚሳዔል እና የድሮን ጥቃት ምክንያት፣ በመላው ዩክሬን ቢያንስ 600 ሺህ ሰዎች ከኤሌክትሪክ ውጭ መሆናቸውን ፕሬዝዳንት ቮሎዲሚር ዜሌንስኪ ገለፁ።

    ዜሌንስኪ፣ በኪየቭ እና በዋና ከተማዋ ዙሪያ እንዲሁም በሰሜን ምሥራቃዊቷ ካርኪቭ ከተማ “ወሳኝ” የኃይል መሠረተ ልማቶች በጥቃቱ መመታታቸውን ገልፀዋል።

    ይህ ጥቃት የተፈፀመው የአሜሪካው ፕሬዝዳንት ዶናልድ ትራምፕ እሁድ ዕለት፣ በሩሲያ እና በዩክሬን መካከል “የኃይል መሠረተ ልማቶችን የሚመለከት የተኩስ አቁም” ተግባራዊ ሆኗል ካሉ በኋላ ነው።

    በኪየቭ ቢያንስ ሦስት ሰዎች ሲገደሉ 21 ሰዎች መጎዳታቸውን የዩክሬን መንግሥት የአደጋ ጊዜ አገልግሎት ገልጿል።

    የሩሲያ መከላከያ ሚኒስቴር በበኩሉ፣ ሌሊቱን የተፈፀመው “መጠነ ሰፊ” ጥቃት በኪየቭ እና በካርኪቭ ክልሎች የሚገኙ የዩክሬን ጦር የሚጠቀማቸው የመገናኛ እና የኃይል ተቋማት ላይ ያነጣጠረ እንደነበር አስታውቋል።

    ሚኒስቴሩ አያይዞም፣ ዋና ከተማዋን ሞስኮ እና ሩሲያ በአውሮፓውያኑ 2014 በኃይል የያዘችውን ደቡባዊው የዩክሬን ባሕረ ሰላጤ ክሬሚያን ጨምሮ፣ በተለያዩ የሩሲያ ክልሎች ሌሊቱን 902 የዩክሬን ድሮኖች ተመትተው መጣላቸውን ገልጿል።

    የዩክሬን አየር ኃይል ደግሞ ሩሲያ ሌሊቱን ለፈፀመችው ጥቃት 39 ባለስቲክ እና ክሩዝ ሚሳዔሎችን እንዲሁም 128 ድሮኖችን ተጠቅማለች ብሏል። ከእነዚህም አራት ሚሳዔሎች እና 115 ድሮኖች መትቶ መጣሉን ገልጸዋል።

    ትራምፕ እሁድ ዕለት በማኅበራዊ ሚዲያ ባሰፈሩት ጽሑፍ፣ “በሩሲያ እና በዩክሬን ጦርነት ውስጥ የኃይል መሠረተ ልማቶችን የሚመለከት የተኩስ አቁም ከአሁን ጀምሮ ተግባራዊ ሆኗል። ሁለቱም ወገኖች ተስማምተዋል። ስምምነቱን አትጣሱ!” ብለው ነበር።

    ይህን ተከትሎ ፕሬዝዳንት ዜሌንስኪ፣ ሞስኮ ተመሳሳይ እርምጃ የምትወስድ ከሆነ፣ ዩክሬን በሩሲያ የነዳጅ ማጣሪያዎች እና ሌሎች የኃይል ተቋማት ላይ የምትፈፅመውን ጥቃት ለማቆም ዝግጁ መሆኗን በተደጋጋሚ ተናግረዋል።

    ነገር ግን የሩሲያ የውጭ ጉዳይ ሚኒስትር ሰርጌ ላቭሮቭ፣ ዩክሬን የተኩስ አቁም የሚያስገኘው “የእፎይታ ጊዜ” እንደማይገባት ተናግረዋል።

    ማንኛውም የተኩስ አቁም ተግባራዊ በሚሆንበት ጊዜ፣ አውሮፓ ዩክሬን ጦርነቱን እንድትቀጥል “ተጨማሪ መሣሪያዎችን በብዛት ማቅረብ” እንደሚችል አክለዋል።

    የሩሲያው ፕሬዝዳንት ቭላድሚር ፑቲን በዩክሬን ላይ መጠነ ሰፊ ወረራ የጀመሩት እአአ በ2022 ሲሆን በአሁኑ ወቅት ሞስኮ 20 በመቶ የሚሆነውን የዩክሬንን ግዛት ተቆጣጥራለች።

11. 14 ጥቅምት 2026ሳዑዲ አረቢያ ስደተኛው በፌስቡክ ገጹ ላይ በሰጠው አስተያየት የተነሳ የተጣለበትን የሞት ፍርድ ሰረዘች

    የሳዑዲ አረቢያ ጠቅላይ ፍርድ ቤት በፌስቡክ ላይ በሰጠው አስተያየት ምክንያት ሞት የተፈረደበትን ሲሪ ላንካዊ ስደተኛ ቅጣት መሰረዙን የሲሪ ላንካ ውጭ ጉዳይ ምክትል ሚኒስትር አሩን ሄማቻንድራ አስታወቁ።

    የሳዑዲ ይግባኝ ሰሚ ፍርድ ቤት የ27 ዓመቱ አኖጃን ሲቫራሳ በመስከረም ወር በፌስቡክ ገጹ ላይ በሰጠው አስተያየት ላይ እስልምናን እና ነቢዩ መሐመድን ተሳድቧል በሚል የሞት ፍርድ ፈርዶበታል።

    የፍርድ ውሳኔው በሲሪ ላንካ ከፍተኛ ድንጋጤ ፈጥሮ የነበረ ሲሆን ምህረት እንዲደረግለት ዲፕሎማሲያዊ ጥረቶች እንዲጀመሩም ምክንያት ሆኗል።

    የሳዑዲ አረቢያ ከፍተኛ ፍርድ ቤት ረቡዕ ዕለት ፍርዱን ማንሳቱን ሄማቻንድራ በፌስቡክ ገጻቸው ላይ አስፍረዋል። ምክትል ሚኒስትሩ በልጥፋቸው ላይ የሁለቱ አገራት ባለሥልጣናት እና የሕግ ቡድኖች ላደረጉት ጥረት ምስጋናቸውን አቅርበዋል።

    በሰኔ ወር መጨረሻ ላይ አንድ ወጣት የሂንዱ ምዕመናንን የሚከተል ውሻን ሲማታ የሚያሳይ ተንቀሳቃሽ ምስል በማኅበራዊ ሚዲያ ላይ በስፋት ተጋርቶ የሃይማኖት ክርክር አስነስቷል።

    በማኅበራዊ ሚዲያ ላይ በነበረው ውይይት ወቅት አንድ ግለሰብ የሂንዱ አምላክን የሚያንቋሽሽ አስተያየት በመለጠፉ፣ ሲቫራሳ ነቢዩ ሙሐመድን በታሚል ቋንቋ እንዲሰድብ ምክንያት ሆኗል።

    ሲቫራሳ አስተያየቱን ወዲያውኑ ሰርዞ የይቅርታ ቪዲዮ ቢለጥፍም፣ ልጥፉን ስክሪን ሾት ያነሱ ሰዎች ቀጣሪዎቹ ጉዳዩን እንዲመለከቱ እና የሳዑዲ ባለሥልጣናት በሐምሌ ወር በቁጥጥር ሥር እንዲያውሉት አድርገዋል።

    ሲቫርሳ ላይ የቀረበው ክስ ከዚህ በኋላ በሌላ የሕግ ሂደት ስለመታየቱ ወይንም በእስር ላይ ስለመቆየቱ የተገለጸ ነገር የለም። ግለሰቡ መጀመሪያ ላይ በአል-አህሳ የወንጀል ፍርድ ቤት የአምስት ዓመት እስራት እንዲሁም ሦስት ሚሊዮን የሳዑዲ ሪያል ቅጣት ተፈርዶበታል።

    የሲቫራሳ ጉዳይን በተመለከተ ከሳዑዲ አረቢያ ጋር በነበረው ድርድር ላይ የተሳተፉት የሲሪ ላንካ የሕግ አውጪ ፋይዘር ሙስጠፋ፣ ሳዑዲ አረቢያ የሞት ፍርዱን መሻሯን ለቢቢሲ አረጋግጠዋል።

    የሲቫራሳ ቤተሰቦች እንደ አውሮፓውያን አቆጣጠር ከመስከረም 28 ጀምሮ ከእርሱ ጋር ቀጥተኛ ግንኙነት እንዳልነበራቸው ተናግረዋል። ዓለም አቀፍ የመብት ተሟጋች ቡድኖችም ሳዑዲ የሞት ፍርዷን እንድታነሳ ጥሪ አቅርበዋል።

    ማክሰኞ ዕለት የሂዩማን ራይትስ ዎች ከፍተኛ ተመራማሪ ጆይ ሺአ "የሳዑዲ ባለሥልጣናት በተለይም ተጋላጭ በሆኑ ስደተኞች ላይ፣ ከንግግር ጋር በተያያዙ ጥፋቶች ላይ ያልተለመዱ የቅጣት ፍርዶችን ለመስጠት የሚጠቀሙባቸውን አላግባብ የሚተላለፉ ሕጎች ማቆም አለባቸው" ሲሉ ተናግረዋል።

12. 14 ጥቅምት 2026ፕሬዝዳንት ትራምፕ እና ጠቅላይ ሚኒስትር ኔታኒያሁ በኢራን ላይ ግዙፍ ጥቃት ለመክፈት ተነጋገሩ

    የአሜሪካው ፕሬዝዳንት ዶናልድ ትራምፕ እና የእስራኤል ጠቅላይ ሚኒስትር ቤኒያሚን ኔታኒያሁ በሁለቱም አገራት ከሚጠብቁ ምርጫዎች በፊት በኢራን ላይ ግዙፍ እና አዲስ ዘመቻ ለመክፈት መነጋገራቸውን አክሲዮስ ዘገበ።

    ሁለት የአሜሪካ ባለሥልጣናት እና አንድ ስለ ውይይቱ የሚያውቁ ምንጮችን የጠቀሰው አክሲዮስ የመሪዎቹ ንግግር የተደረገው ትራምፕ የአጋማሽ ዘመን የአሜሪካ ምርጫ ከመካሄዱ በፊት ኢራን ላይ ጥቃት እንደማይፅሙ ከመናገራቸው በፊት ነው።

    ኔታኒያሁ የእስራኤል የደኅንነት መረጃ ኢራን የኒውክሌር መርሃ ግብሯን ዳግም ለመገንባት እየሰራች እንደሆነ መጠቆሙን እንዳነሱ አንድ ምንጭ ገልፀዋል።

    የዋይት ሐውስ ባለሥልጣን ሁለቱ መሪዎች ጦርነቱን ዳግም ለመጀመር ተነጋግረዋል መባሉን “ውሸት” ብለውታል።

    ለዚህም የጠቀሱት ትራምፕ በኅዳር ከሚደረገው ምርጫ በፊት ጥቃት መፈፀሙን ውድቅ ማድረጋቸውን ነው።

    የሁለቱም አገራት ወታደሮች በተጠንቀቅ ሲሆኑ ትራምፕ አቋማቸውን ከቀየሩ በሚል ዝግጅታቸውን እያጠናቀቁ እንደሆነም ምንጩ ተናግረዋል።

    አንድ የአሜሪካ ባለሥልጣን የትራምፕን አቋም ወላዋይ አድርገው የገለፁ ሲሆን፤ ምንም ቃል ሳይገቡ ኔታኒያሁ እንዲዘጋጁ እንደነገሯቸው ጠቁመዋል።

    እንደ ዘገባው ከሆነ ምንም እንኳ አብዛኞቹ አማካሪዎች ማዕቀብ እና ምጣኔ ሀብታዊ ጫናው እንዲቀጥል ፍላጎት ቢኖራቸውም የአሜሪካ መከላከያ ሚኒስትር ፒት ሄግሴት እና የአሜሪካ ማዕከላዊ ዕዝ መሪዎች ዳግም ጥቃት ለመጀመር ከፍተኛ ድጋፍ አሳይተዋል።

    የእስራኤል ጦር አዛዥ ሌተናንት ጀነራል እያል ዛሚር ለአሜሪካ ኃይሎች አዛዥ ጀነራል ዳን ኬን በሦስት ሣምንታት ውስጥ ግጭቱ ቢቀሰቀስ የእስራኤልን ምርጫ ሊያራዝም እንደሚችል መናገራቸው ተዘግቧል።

    የኳታር አሸማጋዮች አሜሪካ በቅርቡ ባቀረበችውን ግብረ መልስ ሰነድ ዙሪያ የኢራንን ምላሽ እየጠቁ መሆኑንም የአክሲዮስ ዘገባ አክሏል።

13. 14 ጥቅምት 2026ሁቲዎች በሳዑዲ የነዳጅ ኩባንያ አስተዳደር ሕንጻ ላይ በፈጸሙት ጥቃት በእሳት መያያዙ ተገለጸ

    የሳዑዲ አረቢያ የኢነርጂ ሚኒስቴር በአገሪቱ ምሥራቃዊ ግዛት የሚገኘው ከዓለም ትላልቅ የነዳጅ ተቋማት አንዱ የሆነው የአራምኮ (Aramco) የአስተዳደር ሕንጻ ላይ ማክሰኞ ዕለት ጥቃት ተፈጽሞ መለስተኛ የእሳት አደጋ መከሰቱን አስታወቀ። ሚኒስቴሩ በሰው ላይ ምንም ዓይነት ጉዳት አለመድረሱን ገልጿል።

    ይህ ጥቃት የተፈጸመው፣ በኢራን የሚደገፉት የሁቲ ታጣቂዎች እና የሳዑዲ ጥምረት ማክሰኞ ምሽት የተኩስ ልውውጥ ባደረጉበት ወቅት ነው። ይህ ግጭት እየሰፋ የመጣውን የመካከለኛው ምሥራቅ ቀውስ ወደ አዲስ ምዕራፍ ያሸጋገረ ነው።

    ጥቃቱ ከመፈጸሙ በፊት የሳዑዲ ጦር ዋና የነዳጅ አምራች ወደሆነው የአገሪቱ ምሥራቃዊ ግዛት እና ወደ ዋና ከተማዋ ሪያድ ሚሳዔሎች መተኮሳቸውን የሚገልጹ ተከታታይ ማስጠንቀቂያዎችን ለነዋሪዎች ተልኳል።

    የሳዑዲ አረቢያ ሲቪል መከላከያ እንዳስታወቀው በአየር ላይ ሳሉ እንዲከሽፉ የተደረጉ ሁለት የሁቲ ሚሳይሎች ስብርባሪዎች በሪያድ በሚገኙ የመኖሪያ አካባቢዎች ላይ ወድቀው አራት ሰዎች ሲቆስሉ 15 ቤቶች ጉዳት ደርሶባቸዋል።

    በሳዑዲ አረቢያ የሚመራውና በየመን የሚንቀሳቀሰው ጥምር ኃይል፣ በሁቲ አማፅያን ቁጥጥር ስር በሚገኘው የየመን ዋና ከተማ ላይ ማክሰኞ ዕለት አዲስ የአየር ጥቃት መፈጸሙን፣ በሁቲ ቁጥጥር ስር የሚገኘው 'አል-ማሲራህ' የተሰኘው መገናኛ ብዙኃን እና የአካባቢው ነዋሪዎች ገልጸዋል።

    ጥቃቱ የተፈጸመው የጥምር ጦሩ ቃል አቀባይ ነዋሪዎች ለደህንነታቸው ሲሉ አካባቢውን ለቅቀው እንዲወጡ ጥሪ ካቀረቡ በኋላ ነው።

    ጥምረቱ በከተማዋ ምዕራባዊ ክፍል የሚገኘውን የሱባሃ የነዳጅ ማከማቻ ጣቢያ ካጠቃ ከጥቂት ሰዓታት በኋላ በሰነዓ ውስጥ ከባድ ፍንዳታዎች እንደተሰሙ የዐይን እማኞች ገልጸዋል።

    ባልተለመደ ሁኔታ ከዚህ ቀደም ባወጣው መግለጫ፣ ጥምረቱ በሁቲዎች ቁጥጥር ስር ባለችው ዋና ከተማ የሚኖሩ ሰላማዊ ዜጎች፣ ሊኖር ከሚችል ጥቃት አስቀድመው ዋና ከተማዋን፣ የየመን ነዳጅ ኩባንያ እና በአቅራቢያው የሚገኙ የማከማቻ ቦታዎችን ለቅቀው እንዲወጡ ጥሪ አቅርቦ ነበር።

    የጥምረቱ ቃል አቀባይ ሜጀር ጄኔራል ቱርኪ አል-ማሊኪ፣ ሁቲዎች ተቋሙን እና በስሩ የሚገኙትን የነዳጅ ማከማቻዎች ለሚሳዔል እና ለድሮን ማከማቻ እየተጠቀሙበት ነው ሲሉ ከስሰዋል።

    የሁቲ ባለሥልጣናት ጥቃቱ እንደሚፈጸም አስቀድመው የሚያውቁ ይመስላል። የነዳጅ ኩባንያው፣ የማከማቻ ተቋማቱ ባዶ መሆናቸውን እና የሳዑዲ ጥቃት በነዳጅ ክምችቱ ወይም ለነዋሪዎች በሚደርሰው አቅርቦት ላይ ምንም ዓይነት ተጽዕኖ እንደማያሳድር ገልጿል።

    ሆኖም፣ የዓይን ምስክሮች የነዳጅ እጥረት ይፈጠራል በሚል ስጋት በአንዳንድ የነዳጅ ማደያዎች ላይ ተሽከርካሪዎች ረዥም ሰልፍ ይዘው መታየታቸውን ተናግረዋል።

    ማስጠንቀቂያው በተሰጠ በአጭር ሰዓት ውስጥ የሁቲ ጦር ቃል አቀባይ ብርጋዴር ጄነራል ያህያ ሳሬ በቴሌግራም ገጻቸው ላይ በሰነዓ ላይ የሚፈጸም ጥቃት በሳዑዲ ዋና መዲና ሪያድ ላይ “ከባድ እና ሕመም የሚያስከትል” ምላሽ ይሰጣል ብለዋል።

14. 13 ጥቅምት 2026ቱርክ ከሁቲዎች ጋር ከምትፋለመው ሳዑዲ አረቢያ ጎን እንደምትቆም አስታወቀች

    ቱርክ ከየመን ሁቲ ታጣቂዎች ጋር እየተፋለመች ካለችው ሳዑዲ አረቢያ ጎን እንደምትቆም አስታወቀች።

    የቱርክ ፕሬዚደንት ሬሲብ ታይብ ኤርዶዋን ከሳዑዲው ልዑል አልጋ ወራሽ መሐመድ ቢን ሳልማን ጋር ማክሰኞ ዕለት ባደረጉት የስልክ ውይይት አገራቸው ከሳዑዲ ጎን እንደምትቆም ገልጸዋል።

    ፕሬዚደንቱ ይህን ያሉት ሳዑዲ በየመን ሁቲዎች የሚፈፀምባት ጥቃት በበረታበት ወቅት ነው።

    የኤርዶዋን ጽሕፈት ቤት እንዳለው በስልክ ውይይታቸው ሁቲዎች የሚፈፅሙትን ጥቃት በጥብቅ ያወገዙ ሲሆን "ፈተናውን እንደሚያልፉት" ለሳዑዲው ልዑል ነግረዋቸዋል።

    የሰሜን አትላንቲክ የጦር ቃልኪዳን ድርጅት (ኔቶ) አባል የሆነችው ቱርክ፣ የኒውክሌር ኃይል ያላት ፓኪስታን እና ሳዑዲ አረቢያ ነሐሴ ወር ላይ የጋራ የመከላከያ ስምምነት ተፈራርመዋል።

    የጋራ የመከላከያ ስምምነቱ "ማንኛውንም የጥቃት እርምጃ ለመከላከል የሚያችል የጋራ የመከላከል አቅምን የማጠናከር” ዓላማ ያለው ነው።

    በስምምነቱ መሠረት በአንዳቸው ላይ የሚፈፀም ጥቃት በሌላኛቸው ላይ እንደተፈፀመ ይቆጠራል።

15. 13 ጥቅምት 2026ኢራን የምድር ጥቃት ልትፈፅም እንደምትችል የቀጣናውን አገራት ማስጠንቀቋ ተዘገበ

    ኢራን የመከላከያ አቅሟን እያጠናከረች፣ ደጋፊዎቿን እያነቃነቀች እና በአሜሪካ እና በፋርስ ሰላጤ በሚገኙ አጋሮቿ ላይ መጠነ ሰፊ እና ከባድ ምላሽ ለመስጠት እያስፈራራች መሆኑን በጉዳዩ ላይ መረጃ ያላቸውን ምንጮች ጠቅሶ ዎል ስትሪት ጆርናል ዘገበ።

    እንደ ዘገባው ከሆነ ቴህራን በአሜሪካ ከሚካሄደው የአጋማሽ ምርጫ በኋላ ለሚሰነዘርባት ጥቃት እራሷን እያዘጋጀች ሲሆን ጥቃቶችን ለመመከትም እየሞከረች ነው። የአሜሪካ የአጋማሽ ዘመን ምርጫ በዚህ ወር መጨረሻ ላይ ይካሄዳል።

    የኢራን ባለሥልጣናት በይፋዊ መግለጫ እንዲሁም ከክልል ባለሥልጣናት ጋር ባደረጉት ውይይትም አሜሪካ አዲስ ጥቃት ከከፈተች በመካከለኛው ምሥራቅ ያለው ውጥረት የበለጠ እንደሚባባስ አስጠንቅቀዋል።

    ዎል ስትሪት ጆርናል በዘገባው ኢራን የኒውክሌር መሠረተ ልማቶችን፣ የድንበር አካባቢዎችን እና ምስጢራዊ ቦታዎችን ጨምሮ ቁልፍ የሆኑ ቦታዎች የበለጠ ጥቃት እንዲቋቋሙ እያጠናከረች መሆኑን የሳተላይት ምስሎች ያሳያሉ ብሏል።

    ዘገባው ነዋሪዎችን ለአዲስ ጦርነት እያዘጋጀች እንደሆነም ገልጿል።

    የኢራናውያኑ ማስፈራሪያ በአሜሪካ ማዕቀብ እና በጦርነቱ ምክንያት ቀውስ ውስጥ የገባው የአገሪቷ ኢኮኖሚያዊ ሁኔታ "ትኩረት እንዳያገኝ የማድረግ ሙከራ" ሊሆን እንደሚችል ዘገባው ጠቅሷል።

    የኢራን ጠቅላይ ብሔራዊ የደኅንነት ምክር ቤት ጸሐፊ ሞህስን ሬዜም እሁድ ዕለት አሜሪካ በድጋሚ ጥቃት ከሰነዘረች የኢራን ጦር በመካከለኛው ምሥራቅ የሚገኙ "የመረጃ ማዕከላትን፣ ኬብሎችን እና የሰው ሰራሽ አስተውሎት( ኤአይ) መሠረተ ልማቶችን" ኢላማ እንደሚያደርግ አስጠንቅቀዋል።

16. 13 ጥቅምት 2026አትሌት ኃይሌ ገ/ሥላሴ በፎርብስ አፍሪካ የተምሳሌቶች ዝርዝር ውስጥ ተካተተ

    ታዋቂው ኢትዮጵያዊ አትሌት እና የንግድ ሰው ኃይሌ ገ/ሥላሴ በፎርብስ አፍሪካ አርአያ ከሆኑ ግለሰቦች ዝርዝር ውስጥ ተካተተ።

    ፎርብስ አፍሪካ የተመሠረተበትን 15ኛ ዓመት ምክንያት በማድረግ ባወጣው አፍሪካዊ ተምሳሌቶች ዝርዝር ውስጥ ሃሳባቸው፣ ፈጠራቸው፣ ድምጻቸው ያለፈውን፣ የአሁኑን እና የወደፊቱን አፍሪካ በመቅረጽ ረገድ አርአያ ናቸው ያላቸውን 15 ግለሰቦች ይፋ አድርጓል።

    እነዚህ ግለሰቦች በንግዱ፣ በፖለቲካ፣ በስፖርት፣ በሥነ ጽሑፍ፣ በፊልም፣ በኮሜዲ እንዲሁም በሌሎች ዘርፎች አስተዋፅኦ ያደረጉ ናቸው።

    በዝርዝሩ ውስጥ ከተካተቱት ውስጥ የቀድሞ የላይቤሪያ ፕሬዚደንት ኤለን ጆንሰን ሰርሊፍ፣ ናይጄሪያዊው ቢሊየነር አሊኮ ዳንጎቴ፣ የሥነ ጽሑፍ ሎሬት ታንዛኒያዊው አብዱራዛቅ ጉርናህ፣ ደቡብ አፍሪካዊው ኮሜዲያን ትሬቨር ኖዋ፣ ኮትዲቯራዊው የቀድሞ የእግር ኳስ ኮከብ ዲዲዬ ድሮግባ እና ኬንያዊ -ሜክሲኳዊቷ ሉፒታ ኒዮንግኦ ይገኙበታል።

    አትሌት ኃይሌ በአትሌቲክሱ ዘርፍ ካበረከተው አስተዋጽኦ እና ለአገሩ ካስገኘው ድል በተጨማሪ ‘ኃይሌ እና አለም ኢንተርናሽናል ኃ/ተ/የግል ማኅበር’ አቋቁሞ ኢትዮጵያ ውስጥ ኢንቨስት እያደረገ ይገኛል።

    እስካሁን በተሰማራባቸው በ11 ሆቴሎች፣ በመኪና ማምረቻ፣ በሪልስቴት፣ በግብርና እና በሌሎች ዘርፎች ከ5 ሺህ በላይ ለሆኑ ዜጎች የሥራ እድል ፈጥሯል።

    “በጥቂት ዓመታት ውስጥ በአፍሪካ ትላልቅ ከሆኑ ኩባንያዎች አንዱ እንሆናለን” ሲልም ግቡን ለፎርብስ አጋርቷል።

    “አፍሪካ አልተነካችም፤ ትልቅ እድል አለ” ያለው ኃይሌ፣ አፍሪካውያን አትሌቶች በአገራቸው ላይ መዋዕለ ንዋያቸውን እንዲያፈሱም በማበረታታት ይታወቃል።

    “ አፍሪካ ብዙ ክህሎት ያላቸው ሰዎች ያስፈልጓታል. . . ይህ በጣም ወሳኝ ነው። ወደፊት የሰው ኃይል አቅማችን ፍሬያማ ስለሚሆን ብዙ አፍሪካዊያን የንግድ ሰዎች ይኖራሉ ብዬ አምናለሁ” ሲልም ተስፋውን ገልጿል።

17. 13 ጥቅምት 2026ሳዑዲ አረቢያ ከሪያዱ ጥቃት በኋላ የአየር ጥቃት መከላከያዋን ብቃት መመርመር ጀመረች

    ሳዑዲ አረቢያ የሰዎች ሕይወት ካለፈበት የሪያድ አውሮፕላን ማረፊያ ጥቃት በኋላ የአየር ጥቃት መከላከያዋን ብቃት ለማረጋገጥ ምርመራ መጀመሯን ሪፖርቶች አመለከቱ።

    ምርመራው በየመን ሁቲዎች የሚተኮሱ ሚሳኤሎችን እና ድሮኖችን የአየር ጥቃት መከላከያ ሥርዓቷ እንዴት ማክሸፍ እንዳልቻለ ለማወቅ ያለመ ነው።

    የየመን ሁቲዎች በቅርብ ቀናት ውስጥ በሪያድ አውሮፕላን ማረፊያ ላይ ሦስት ጥቃቶችን ፈጽመዋል። ቅዳሜ ዕለት በፈፀሙት የሚሳኤል ጥቃት ብቻ 13 ሰዎች ተገድለዋል።

    አሶሽየትድ ፕረስ ሁለት የአካባቢውን ባለሥልጣናት ጠቅሶ እንደዘገበው የምርመራው የመጀመሪያ ደረጃ ውጤት ሁቲዎች የአየር ጥቃት መከላከያ ሥርዓቱን አልፎ አውሮፕላን ማረፊያውን ለመምታት ለክሩዝ እና ባልስቲክ ሚሳኤሎች መንገድ ለመክፈት በቅድሚያ በርካታ ድሮኖችን ተኩሰዋል።

    ከእነዚህ ባለሥልጣናት መካከል አንዱ እንደተናገሩት አሁን አገሪቷ የከፈተችው ምርመራ ሌላኛው ግብ የአየር መከላከያ ሥርዓቷ ለምን ቅድመ ማስጠንቀቂያ እንደማይሰጥ ማወቅ ነው።

    የሁቲዎችን ጥቃት ተከትሎ በሳዑዲ መዲና የሚገኘው ዓለም አቀፍ አውሮፕላን ማረፊያ ቢያንስ እስከ መጪው ቅዳሜ ድረስ የተዘጋ ሲሆን አየር መንገዶችም ወደ ሪያድ የሚያደርጓቸውን በረራዎች ሰርዘዋል።

18. 13 ጥቅምት 2026የቀድሞው የኮንጎ ፕሬዝዳንት ጆሴፍ ካቢላ መንግሥትን ለመጣል የሚታገለው የአማጺያን ጥምረት መሪ ሆኑ

    የቀድሞው የኮንጎ ፕሬዝዳንት ጆሴፍ ካቢላ መንግሥትን ለመጣል የሚታገለው የአማጺ ቡድኖች ጥምረት መሪ ሆኑ።

    ‘ዘ ፍሮንት ፎር ዘ ሪፎርሜሽን ኦፍ ዘ ኔሽን’ የተባለው የአማጺያን ጥምረት በዲሞክራቲክ ሪፐብሊክ ኮንጎ “አምባገነናዊ አገዛዝን” ለማስወገድ እንደሚታገል አስታውቋል።

    የቀድሞው ፕሬዝዳንት ከዓመት በፊት በሌሉበት የሞት ፍርድ የተላለፈባቸው ሲሆን፤ የአማጺያኑ መሪ መሆናቸው በትጥቅ ትግሉ የነበራቸውን ሚና የሚያሳይ ነው።

    ከዚህ ቀደም ከኤም23 አማጺያን ጋር ግንኙነት እንደሌላቸው ሲናገሩ ነበር።

    የኮንጎ መንግሥት እስካሁን በጉዳዩ ላይ አስተያየት አልሰጠም።

    አማጺያኑ ጥምረታቸውን ይፋ ያደረጉት ጎማ በሚገኘው የካቢላ መኖሪያ ቤት ነው።

    ካለፈው ዓመት ጀምሮ የኮንጎ ትልቋ ከተማ የሆነችው ጎማ በኤም23 ሥር ትገኛለች።

    የታጣቂ ቡድኑ መሪ ሱልታኒ ማኬንጋ፣ ከካቢላ አራት ምክትሎች አንዱ ሆነው ያገለግላሉ።

    የታጣቂ ቡድኑ አጋር ኤኤፍሲ-ኤም23 የተባለው አማጺያን ቡድን ሦስት አባላትም ምክትሎቻቸው ይሆናሉ። ይህ ቡድን በማዕድን የበለጸገውን ምሥራቃዊ ኮንጎ ተቆጣጥሮ የሚገኝ ነው።

19. 13 ጥቅምት 2026በእንግሊዝ እና ዌልስ የእስር ቤቶች መጨናነቅን ለማቅለል እስረኞች ሊለቀቁ ነው

    በእንግሊዝ እና በዌልስ ያሉ እስር ቤቶች በገጠማቸው የእስረኞች መጨናነቅ ምክንያት የታሳሪዎችን ቁጥር ለመቀነስ እስረኞችን ሊለቁ ነው።

    እስር ቤቶች መያዝ ከሚችሉት እስረኞች በላይ ስላሏቸው ጫናውን ለመቀነስ መንግሥት ባወጣው ዕቅድ መሠረት አሁን ለሁለተኛ ጊዜ 650 ገደማ እስረኞች የእስር ጊዜያቸውን ሳይጨርሱ እንደሚፈቱ ተነግሯል።

    አሁን ከሚለቀቁት እስረኞች መካከል እስከ ሁለት ዓመት ተኩል ድረስ የእስር ቅጣት የተፈረደባቸው ወንጀለኞችም ይካተታሉ ተብሏል።

    በአዲሱ ደንብ መሠረት፣ ቀደም ሲል እስረኞች የቅጣታቸውን ግማሽ ከፈጸሙ በኋላ የመፈታት ዕድል የነበራቸው ሲሆን፣ አሁን ግን ከቅጣታቸው አንድ ሦስተኛውን ብቻ ካጠናቀቁ ነጻ እንዲወጡ ይደረጋል።

    ይህ ሁለተኛው ዙር የተፈረደባቸውን ጊዜ ሳይጨርሱ እስረኞችን ቀድሞ የመልቀቅ ውሳኔ ከሁለት ሳምንት በፊት የተደረገውን የመጀመሪያ ዙር ወደ 700 የሚጠጉ እስረኞች የተለቀቁበትን የተከተለ ነው።

    በመጀመሪያው ዙር እስረኞችን የመልቀቅ ውሳኔ ነጻ ከወጡት እስረኞች ውስጥ ከ19 ወራት በታች የእስር ጊዜ የተፈረደባቸው ተካትተዋል።

    ዛሬው ማክሰኞ ጥምት 3/2019 ዓ.ም. በሚደረገው የሁለተኛ ዙር እስረኞችን የመልቀቅ ሂደት ረዘም ያለ እስር የተፈረደባቸው ወንጀለኞችን የመልቀቅ ሂደት የሚጀምር ሲሆን፣ ይህም እስከ መጪው ሰኔ ድረስ ከ12 ዓመት በላይ ቅጣት የተፈረደባቸውንም ያካትታል።

    በተለምዶ በአመክሮ ከእስር የሚለቀቁት ወንጀለኞች የቅጣታቸውን ቀሪ ጊዜ በማኅበረሰቡ ውስጥ ሲያሳልፉ፣ የኤሌክትሮኒክ መከታተያ እንዲታሰሩ እና ሌሎች የክትትል ሁኔታዎችን እንዲከተሉ ይጠበቅባቸዋል።

20. 13 ጥቅምት 2026አሜሪካ በቬንዝዌላ በቢሊዮኖች ዶላር የሚቆጠር ገንዘብ በሕገ ወጥ መንገድ በማዘዋወር የተከሰሰን ግለሰብ ያዘች

    ከቬንዝዌላ መንግሥት በሕገ ወጥ መንገድ የተገኘ ከ2 ቢሊዮን ዶላር በላይ በማዘዋወር የተጠረጠረ ኮሎምቢያዊ ዜጋ በአሜሪካ መያዙ ተገለፀ።

    የአሜሪካ ፍትሕ ሚኒስቴር፣ የ62 ዓመቱ አልቫሮ ፑሊዶ እሑድ ዕለት በአገር ውስጥ ደኅንነት የጋራ ግብረ ኃይል በቁጥጥር ሥር መዋሉን አስታውቋል። ሆኖም ግለሰቡ እንዴት በቁጥጥር ሥር እንደዋለ ተጨማሪ ዝርዝር አልተሰጠም።

    ፑሊዶ በመንግሥት ባለቤትነት የሚተዳደረው የነዳጅ ኩባንያ ፒዲቪኤስኤ የሚያገኘውን ትርፍ በራሱ መንገድ አዙሮ በማውጣት ተከሶ ከመጋቢት 2023 ጀምሮ በቬንዝዌላ በእስር ላይ ነበረ።

    የአሜሪካ የአደንዛዥ ዕፅ ቁጥጥር አስተዳደር እና የውጭ ጉዳይ ሚኒስቴር ግለሰቡን በቁጥጥር ሥር ለማዋል ያለበትን ለሚጠቁም የ10 ሚሊዮን ዶላር ሽልማት አቅርበው ነበር።

    የአሜሪካ ዐቃቤ ሕግ ቢሮ ባወጣው መግለጫ፣ ፑሊዶ ማክሰኞ ፍርድ ቤት እንደሚቀርብ አስታውቋል።

    ፑሊዶ በቁጥጥር ሥር የዋለው፣ ከቬኔዙዌላ መንግሥት ጋር የቅርብ ግንኙነት ያለው ሌላ ኮሎምቢያዊ ነጋዴ አሌክስ ሳብ በሕገ ወጥ የገንዘብ ዝውውር በአሜሪካ ፍርድ ቤት ተከሶ ጥፋተኛ መሆኑን ካመነ ከሁለት ወራት በኋላ ነው።

    ፑሊዶ “ከቬንዝዌላ መንግሥት የሙስና ድርጊት ጋር የተገናኘ ከ2 ቢሊዮን ዶላር በላይ ገንዘብ በሕገ ወጥ መንገድ አዘዋውሯል” የሚል ክስ እንደቀረበበት የአሜሪካ ዐቃቤ ሕግ ቢሮ ገልጿል።

    በተጨማሪም፣ ፑሊዶና ሌሎች አራት ተከሳሾች ለምስኪን ቬንዝዌላውያን ምግብና መድኃኒት የማቅረብ ውል ለማግኘት ለአገሪቱ መንግሥት ባለሥልጣናት ጉቦ ሰጥተዋል ተብለው መከሰሳቸውም ተጠቅሷል።