Cryfder y canolwyr: Saith newid i Gymru ar gyfer gêm Japan
Max Llewellyn ac Eddie James fydd yn dechrau fel canolwyr yn erbyn Japan ddydd Sadwrn
- Cyhoeddwyd
Mae tîm Cymru ar gyfer y gêm yn erbyn Japan ym Mhencampwriaeth y Cenhedloedd ddydd Sadwrn wedi ei gyhoeddi.
Max Llewellyn ac Eddie James sydd wedi eu dewis fel canolwyr, gyda Steve Tandy yn gobeithio y bydd grym corfforol y ddau helpu creu bylchau yn amddiffyn yr ymwelwyr.
Ymhlith y saith newid i'r tîm gollodd yn erbyn De Affrica yn y gystadleuaeth hon ym mis Gorffennaf, fe fydd Sam Costelow yn dechrau fel maswr yn lle Dan Edwards tra bod Tomos Williams yn parhau yn safle'r mewnwr.
Bydd Louis Rees-Zammit a Josh Adams yn dechrau ar yr esgyll gyda Blair Murray wedi ei ddewis fel cefnwr.
Cadeirydd newydd URC am 'adolygu'r cynllun' i dorri rhanbarth
- Cyhoeddwyd26 Hydref
Colledion Undeb Rygbi Cymru wedi cynyddu i £18m
- Cyhoeddwyd22 Hydref
Dewi Lake a Jac Morgan yn Cymreigio Caerloyw
- Cyhoeddwyd22 Medi
Archie Griffin a Nicky Smith fydd yn dechrau yn y rheng flaen gyda'r capten Dewi Lake.
Mae Dafydd Jenkins wedi gwella o anaf diweddar i'w ben-glin a fo fydd yn yr ail-reng gyda Ben Carter.
Alex Mann, Jac Morgan ac Aaron Wainwright sydd wedi eu dewis yn y rheng ôl.
Fe ddechreuodd ymgyrch Cymru ym Mhencampwriaeth y Cenhedloedd ym mis Gorffennaf gyda buddugoliaeth yn erbyn Fiji, cyn iddyn nhw golli yn erbyn Ariannin a De Affrica.
Wedi'r gêm yn erbyn Japan brynhawn Sadwrn, fe fydd Cymru yn croesawu Seland Newydd ac Awstralia i Gaerdydd cyn teithio i Twickenham ar gyfer y gemau ail gyfle ddiwedd y mis.
Dywedodd Steve Tandy ei fod yn falch o weld bod "mwy o gystadleuaeth o fewn y garfan erbyn hyn".
"Ry'n ni gyd yn edrych ymlaen yn fawr at chwarae gartref unwaith eto ac mae pawb yn awyddus iawn i osod ein stamp ar y gêm ddydd Sadwrn a dechrau'r cymal nesaf yma o Bencampwriaeth y Cenhedloedd yn gryf."
Tîm Cymru i wynebu Japan
Blair Murray; Louis Rees-Zammit, Eddie James, Max Llewellyn, Josh Adams, Sam Costelow, Tomos Williams; Nicky Smith, Dewi Lake (Capten), Archie Griffin, Dafydd Jenkins, Ben Carter; Alex Mann, Jac Morgan, Aaron Wainwright
Eilyddion: Ryan Elias, Rhys Carré,Tomas Francis, Teddy Williams, James Botham, Reuben Morgan-Williams, Dan Edwards, Louie Hennessey
Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.
Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.
Lawrlwythwch yr ap am y diweddaraf o Gymru ar eich dyfais symudol.