RD Congo: Abanduye Ebola barenze 11,000 mu gihe abategetsi batangaje abandi bantu 52 banduye

Abantu 11,000 ni bo bamaze kwemezwa ko banduye Ebola mu cyorezo cyadutse ku nshuro ya 17 muri Repubulika ya Demokarasi ya Congo (RDC), nkuko bikubiye mu mibare mishya yatangajwe n'abategetsi bo mu rwego rw'ubuvuzi muri icyo gihugu.

Raporo ikubiyemo iyo mibare ivuga ko ubu abantu 11,042 bamaze kwemezwa ko banduye Ebola, mu gihe abantu 5,387 bemejwe ko bishwe na yo kuva itangajwe ku itariki ya 15 Gicurasi (5) uyu mwaka.

Muri iyo raporo nshya yo kugeza ku itariki ya 9 Ugushyingo (11) uyu mwaka, abategetsi bemeje ko abantu bashya 52 banduye Ebola naho abandi bantu bashya 33 irabica.

Abo bantu bashya banduye Ebola bagaragaye mu ntara za Ituri, Kivu ya Ruguru na Haut-Uélé.

Abategetsi bo mu rwego rw'ubuvuzi bavuga ko intara ya Ituri ikiri izingiro ry'iki cyorezo, ikaba yihariye hafi 70% by'abantu bose bamaze kwemezwa ko banduye ku rwego rw'igihugu.

Intara ya Kivu ya Ruguru ni yo iza ku mwanya wa kabiri mu kwibasirwa cyane n'iki cyorezo ndetse ikomeje kugira igipimo cy'abicwa na Ebola kiruta igipimo rusange cyo ku rwego rw'igihugu.

Iyi mibare mishya inagaragaza ingorane zikomeje kubaho mu guhangana n'iki cyorezo. 79.7% by'abantu bamenyekanye ko bahuye n'abanduye ni bo bonyine bashoboye gukurikiranwa neza kugeza icyo gihe iyo mibare yatangarijwe.

Icyo gipimo kiri munsi y'intego ya 95% – yo gukurikirana neza abagize aho bahurira n'abanduye – ifatwa ko ari ngombwa kugira ngo uruhererekane rw'ubwandu rushobore guhagarikwa.

Abategetsi banatangaje ko umutekano mucye wabangamiye ibikorwa byo guhangana na Ebola, ugatinza ibikorwa byo guhemba bamwe mu bakozi bakorera aho iki cyorezo cyiganje ndetse ahantu henshi hakaba harabayeho ibikorwa byo kurwanya ingamba zo gupima Ebola.

Abategetsi bo mu rwego rw'ubuvuzi bavuga ko amakuru atari ukuri ayobya akomeje gukwirakwira hamwe na hamwe mu baturage, ibyo bigatuma ibikorwa byo kumenya abanduye bigorana ndetse ibyo bikanabangamira ibikorwa byo gushishikariza abantu kujya kwivuza hakiri kare.

Nubwo hari izo ngorane, nta karere k'ubuzima gashya katangaje umurwayi wa mbere wa Ebola muri iki gihe cy'itangazwa ry'imibare mishya. Abarwayi 39 basezerewe mu bitaro nyuma yuko bakize, bituma umubare wose hamwe w'abamaze gukira Ebola uba abantu 2,990. Ibikorwa byo gukingira no kugenzura Ebola birakomeje mu ntara irangwamo.