ગુજરાત પેટાચૂંટણી : કૉંગ્રેસના ઉમેદવારો જાહેર, મહાનગરપાલિકાઓની ચૂંટણી ત્રણ મહિના માટે મોકૂફ

ગુજરાતની વિધાનસભાની પેટાચૂંટણી માટે ભાજપ બાદ કૉંગ્રેસે પાંચ બેઠક માટે તેમના ઉમેદવારોની જાહેરાત કરી છે.

ઉલ્લેખનીય છે કે આ અગાઉ ભાજપ દ્વારા આઠ પૈકી સાત બેઠકો માટે ઉમેદવારોનાં નામોની જાહેરાત કરાઈ હતી.

અબડાસા વિધાનસભા બેઠક પરથી ડૉ. શાંતિલાલ સંઘાણી, મોરબીથી જયંતિલાલ પટેલ, ધારી બેઠક પરથી સુરેશ કોટડિયા, ગઢડા બેઠક પરથી મોહનભાઈ સોલંકી અને કરજણ બેઠક પરથી કિરીટસિંહ જાડેજાનાં નામોની જાહેરાત કરવામાં આવી છે.

સોમવારે કૉંગ્રેસના નેતા મુકુલ વાસનિક દ્વારા નામોની યાદી જાહેર કરાઈ હતી.

સ્થાનિક સ્વરાજ્ય સંસ્થાઓની ચૂંટણી ત્રણ મહિના માટે મોકૂફ

આ સાથે જ રાજ્યની સ્થાનિક સ્વરાજ્યની સંસ્થાઓની યોજાનારી ચૂંટણીને ત્રણ મહિના માટે મુલતવી કરવાનો નિર્ણય લેવામાં આવ્યો છે.

નવેમ્બર 2020માં 6 મહાનગરપાલિકા, 55 નગરપાલિકા, 31 જિલ્લા પંચાયત અને 231 તાલુકા પંચાયતની ચૂંટણી યોજાવવાની હતી.

જોકે ગુજરાત રાજ્યના ચૂંટણી આયોગના સચિવ મહેશ જોશી દ્વારા જાહેર કરાયેલી અખબારી યાદી અનુસાર આ ચૂંટણીને કોવિડ-19ની મહામારીને ધ્યાને રાખીને મુલતવી રાખવામાં આવી છે.

આ યાદીમાં ઉલ્લેખ કરાયો છે કે ત્રણ માસ બાદ મહામારીની સ્થિતિની સમીક્ષા કર્યા બાદ આયોજન અંગે નિર્ણય કરવામાં આવશે.

ભાજપે કોને આપી છે ટિકિટ?

અબડાસા બેઠકમાં પ્રદ્યુમ્નસિંહ જાડેજાની ટિકિટ આપવામાં આવી છે, મોરબી બેઠક પર બ્રજેશ મેરજાની પસંદગી કરવામાં આવી છે.

ધારી બેઠકમાં પક્ષે જે. બી. કાકડિયા પર પસંદગી ઉતારી છે, જ્યારે ગઢડા બેઠકની પેટાચૂંટણીમાં પૂર્વ કૅબિનેટ મંત્રી આત્મારામ પરમાર ભાજપની ટિકિટ પર ચૂંટણી લડશે.

કરજણ બેઠક માટે અક્ષય પટેલનું નામ જાહેર કરવામાં આવ્યું છે. ડાંગ બેઠક માટે વિજય પટેલ અને કપરાડા બેઠક માટે જીતુભાઈ ચૌધરીની પસંદગી કરવામાં આવી છે.

ભાજપે હજી સુધી લીમડી બેઠકના ઉમેદવારની જાહેરાત કરી નથી.

આઠ બેઠકો પૈકી બે બેઠકો અનુસૂચિત જનજાતિ માટે અને એક બેઠક અનુસૂચિત જાતિ માટે અનામત છે. અબડાસા, લીમડી, ગઢડા, ડાંગ, મોરબી, કપરાડા, ધારી અને કરજણની બેઠકો કૉંગ્રેસના ધારાસભ્યોના રાજીનામાને કારણે ખાલી પડી હતી.

તમે અમનેફેસબુક, ઇન્સ્ટાગ્રામ, યૂટ્યૂબ અને ટ્વિટર પર ફોલો કરી શકો છો