ભારતમાં આગામી ચોમાસું કેવું રહેશે, કયા મહિનામાં પડશે વધુ વરસાદ?
ખાનગી હવામાન એજન્સી સ્કાયમેટે આગામી 2022ના ચોમાસાને લઈને તેનું પૂર્વાનુમાન જાહેર કર્યું છે. જેમાં તેમણે આ વર્ષે ચોમાસું સામાન્ય રહેવાની સંભાવના વ્યક્ત કરી છે. એટલે કે દેશમાં સારો વરસાદ થવાની સંભાવના છે.
ગુજરાત સહિત દેશભરમાં આગામી ચોમાસાને લઈને ખાનગી હવામાન એજન્સી સ્કાયમેટે પોતાનું પૂર્વાનુમાન જાહેર કર્યું છે.
ઇમેજ સ્રોત, Getty Images
સાથે જ ચોમાસાની શરૂઆત સારી રહેવાની શક્યતા વ્યક્ત કરવામાં આવી છે. સ્કાયમેટના પૂર્વાનુમાન અનુસાર જૂન મહિનામાં લાંબાગાળાની સરેરાશ કરતાં વધારે વરસાદ પડવાની સંભાવના છે.
ગુજરાતમાં ચોમાસામાં સરેરાશ કરતાં ઓછો વરસાદ થવાની તથા પંજાબ, ઉત્તર પ્રદેશ, મધ્ય પ્રદેશ, હરિયાણા તથા મહારાષ્ટ્રમાં સરેરાશ કરતાં વધારે વરસાદ થવાની સંભાવના છે.
સ્કાયમેટના ચોમાસાના ચાર મહિના, જૂન, જુલાઈ, ઑગસ્ટ અને સપ્ટેમ્બરના સરેરાશ 880.6 મિલિમિટર વરસાદના સંદર્ભમાં 2022માં 98% વરસાદ થવાની સંભાવના છે. જેમાં એરર માર્જિન પ્લસ-માઇનસ પાંચ ટકા છે. એટલે કે પૂર્વાનુમાનથી પાંચ ટકા વધારો ઘટાડો થઈ શકે છે.
દેશમાં લાંબાગાળાની સરેરાશનો 96થી 104 ટકા વરસાદ થાય તો તેને સામાન્ય ચોમાસું ગણવામાં આવે છે.
દેશમાં ક્યાં વધારે અને ક્યાં ઓછા વરસાદનું અનુમાન?
ઇમેજ સ્રોત, Getty Images
સ્કાયમેટનું કહેવું છે કે ભૌગોલિક જોખમોના સંદર્ભે જોતાં અનુમાન છે કે ગુજરાત અને રાજસ્થાનની સાથે સાથે પૂર્વોત્તરનાં રાજ્યો નાગાલૅન્ડ, મિઝોરમ અને ત્રિપુરામાં સમગ્ર ચોમાસા દરમિયાન ઓછો વરસાદ થવાનો ખતરો છે.
એ સિવાય કેરળ અને ઉત્તર કર્ણાટકના વિસ્તારોમાં જુલાઈ અને ઑગસ્ટ જેવા ચોમાસાના મુખ્ય મહિનાઓમાં વરસાદ ઘટ રહેવાની સંભવાના છે. એટલે કે આ ગાળા દરમિયાન અહીં ઓછો વરસાદ થવાની સંભવાના છે.
End of સૌથી વધારે વંચાયેલા સમાચાર
બીજી તરફ પંજાબ, હરિયાણા, ઉત્તર પ્રદેશ તથા ઉત્તર ભારતના કૃષિ વિસ્તારો, મહારાષ્ટ્ર અને મધ્ય પ્રદેશના વરસાદ આધારિત વિસ્તારોમાં સામાન્યથી વધારે વરસાદ થવાની સંભાવના છે.
સ્કાયમેટનું અનુમાન છે કે ચોમાસાની શરૂઆત ધમાકેદાર થશે એટલે કે ચોમાસાના શરૂઆતાના ગાળામાં તેના બીજા ગાળા કરતાં વધારે વરસાદ થશે.
અચાનક અને અતિભારે વરસાદની સંભાવના
ઇમેજ સ્રોત, Getty Images
સ્કાયમેટના સીઈઓ યોગેશ પાટીલ અનુસાર આ વર્ષે દક્ષિણ-પશ્ચિમના ચોમાસા પર અલ નિનોની અસર નહીં પડે. સામાન્ય રીતે અલ નિનો ભારતના દક્ષિણ-પશ્ચિમના ચોમાસાને પ્રભાવિત કરતું હોય છે.
તેમનું કહેવું છે કે છેલ્લાં બે ચોમાસાં લા નિનાની ઘટનાઓથી પ્રેરિત રહ્યાં છે. આ વર્ષે પણ લા નિનાની અસર રહેશે. જેથી ચોમાસું સામાન્ય રહેવાની સંભાવના છે.
તેમના જણાવ્યાનુસાર ચોમાસાના વ્યવહારને જોતાં અચાનક અને તીવ્ર વરસાદ થવાની શક્યતા દેખાઈ રહી છે. જે અસામાન્ય રીતે લાંબા સમયના દુષ્કાળની વચ્ચે થાય છે.
કયા મહિનામાં કેટલો વરસાદ પડશે?
ઇમેજ સ્રોત, Getty Images
દેશમાં છેલ્લાં બે ચોમાસાં સારાં રહ્યાં છે અને ત્રીજું ચોમાસું સારું રહેવાનું અનુમાન સ્કાયમેટ દ્વારા કરવામાં આવ્યું છે. જોકે, ગુજરાતમાં વરસાદની ઘટ રહે તેવી સંભાવના વ્યક્ત કરી છે.
ચોમાસાની શરૂઆતના મહિનામાં સરેરાશ વધારે વરસાદ થવાની સંભાવના છે, જ્યારે અંતિમ મહિનાઓમાં વરસાદ ઓછો પડવાની શક્યતા છે.
જોકે, ચાર મહિનાનાની લાંબાગાળાની સરેરાશ પ્રમાણે સારો વરસાદ પડે તેવી સંભાવના વ્યક્ત કરવામાં આવી છે.
સ્કાયમેટ અનુસાર જૂન મહિનામાં લાંબાગાળાની સરેરાશ પ્રમાણે 107 ટકા વરસાદ થવાની સંભવાના છે. જુલાઈમાં 100 ટકા, ઑગસ્ટમાં 95 ટકા અને સપ્ટેમ્બરમાં લાંબાગાળાની સરેરાશ પ્રમાણે 90 ટકા વરસાદ થવાની સંભવાના છે.
આ લેખમાં Google YouTube દ્વારા પૂરું પાડવામાં આવેલું કન્ટેન્ટ છે. કંઈ પણ લોડ થાય તે પહેલાં અમે તમારી મંજૂરી માટે પૂછીએ છીએ કારણ કે તેઓ કૂકીઝ અને અન્ય તકનીકોનો ઉપયોગ કરી શકે છે. તમે સ્વીકારતા પહેલાં Google YouTube કૂકીઝ નીતિ અને ગોપનીયતાની નીતિ વાંચી શકો છો. આ સામગ્રી જોવા માટે 'સ્વીકારો અને ચાલુ રાખો'ના વિકલ્પને પસંદ કરો.
YouTube કન્ટેન્ટ પૂર્ણ
તમે અમને ફેસબુક, ઇન્સ્ટાગ્રામ, યૂટ્યૂબ અને ટ્વિટર પર ફોલો કરી શકો છો
