Kana amfani da shafin BBC mai bayyana rubutu kawai (babu hoto) domin rage cin data. Idan ana so a ga hotuna da bidiyo sai a koma babban shafinmu.
Wannan shafi ne da ke kawo muku labaran wasannin kai tsaye a BBC Hausa daga 11 zuwa 18 ga watan Oktoban 2026.
Muhammad Annur Muhammad
Wannan kwarewa aka nuna daga Lamine Yamal, wanda ya kirkiri sarari da kansa domin daga ƙwallon zuwa raga.
Ya aika da wata ƙwallo mai ban mamaki ta wajen bayan ƙafar sa zuwa ga Anthony Gordon a daidai turke na na biyu.
Sai dai duk da samun dama mai kyau, ɗan wasan na Ingila ya kasa cin kwallo, inda bugun da ya yi ya kauce wa inda aka nufa.
Kusan ba zai yiwu a hana wannan kungiyar Barcelona zura kwallo ba, kuma hakan ne ta sake nunawa yayin da ta yi wa magoya bayan gida shiru kafin a tafi hutun rabin lokaci.
An yi wa Lamine Yamal keta a bakin akwatin fanareti, amma ana buga kwallon sai ta je João Cancelo.
Ba tare da bata lokaci ba, Cancelo ya buga da karfi zuwa cikin raga.
Yanzu wasan ya koma kunnen doki da ci 1-1, bayan da Galatasaray ta fara samun jagora tun farko.
Viking na cikin farin ciki matuka a halin yanzu. Shin za a iya yarda da abin da ke faruwa?
Matsalolin tsaron baya a Bayern Munich sun sake bayyana, amma hakan ba zai damu Viking ba ko kadan.
Peter Christiansen ya nuna kwarewa da natsuwa, inda ya zura kwallo ta biyu ta wuce mai tsaron raga Jonas Urbig.
Yanzu Viking na jagorantar wasan da ci 2-0, sakamakon da kaɗan ne suka yi hasashensa kafin a fara wannan karawa. Bayern Munich na fuskantar babban aiki idan tana son dawowa cikin wasan.
Murna ta barke a Turkiyya yayin da Galatasaray ta samu shiga gaban Barcelona!
An kai wani gagarumin hari cikin sauri, inda Anthony Gordon ya nemi a ba shi bugun fanareti amma 'yan wasan Galatasaray suka ci gaba da karawar.
Daga nan ne Rafael Leão ya wuce Eric Garcia, kafin ya miƙa ƙwallon ga Aleksey Batrakov.
Batrakov ya ƙarasa kwallon cikin nutsuwa zuwa kusurwar ƙasa ta raga, inda ya bai wa Galatasaray jagoraci da ci 1-0.
Lille ta jefa kwallo a ragar Arsenal ta hannun Ayase Ueda, amma nan take alkali mai daga tuta yana nuna cewa an yi satar gida.
An soke kwallon nan take, amma jami'an VAR suna duba lamarin domin tabbatar da ko hukuncin ya yi daidai.
A halin yanzu dai wasan na ci gaba da kasancewa babu ci tsakanin Arsenal da Lille.
Tun bayan da Hansi Flick ya karbi ragamar horar da Barcelona, kungiyar ta zura kwallaye 80 a wasanni 27 a gasar Champions League.
Wannan na nufin tana cin kwallaye kusan 2.96 a kowane wasa, wanda shi ne mafi girman matsakaicin yawan zura kwallaye a raga da kowace kungiya ta taba samu karkashin koci guda bayan akalla wasa 20 a gasar tun daga kakar 1992/93.
Saboda haka, ana sa ran za a ga kwallaye masu yawa a wannan karawa tsakanin Galatasaray da Barcelona.
To, wannan na iya zama babban abin mamaki idan har sakamakon ya ci gaba aka tashi haka!
An yi bugun kusurwa zuwa cikin akwatin fanareti, inda Gianni Stensness ya yi tsalle ya wuce kowa ya buga ƙwallon da kai ta wuce Jonas Urbig zuwa cikin raga.
Wannan ita ce ƙwallo mafi sauri da aka ci a gasar bana, bayan da aka zura ta cikin daƙiƙa 71 kacal da fara wasan. Sai dai daga baya Atletico Madrid ta karya wannan tarihi lokacin da ta ci wa Manchester United ƙwallo cikin daƙiƙa 47 da fara wasan a ranar Talata.
Bayern Munich yanzu tana fuskantar kalubale tun da wuri a wasan bayan Viking ta samu gagarumar fara wasa a gaban magoya bayanta.
Atletico Madrid ta fara da cin Manchester United kwallo a cikin dakika 47.
Manchester United ta tsinci kanta a baya tun kafin a cika minti daya da fara wasan.
Cikin dakika 47 kacal da fara karawar, Atletico Madrid ta samu ta shiga gaba bayan kuskuren tsaron baya daga baƙin.
Álex Baena ne ya karɓi ƙwallon daga nan ya kutsa cikin akwatin bugun fanareti kafin ya miƙa wa Pablo Barrios, wanda bugu ta wuce ƙarƙashin Ayden Heaven kafin ta shiga raga.
Wannan mummunar farawa ce ga Manchester United, wadda ta samu kanta da kwallo daya a raga a hannun Atletico Madrid tun farkon wasan.
A karshen kakar 2024/25, kocin Liverpool na wancan lokaci Arne Slot ya yi tattaki zuwa kudancin Faransa domin ganawa da Rayan Cherki, wanda ke cikin jerin 'yan wasan da Liverpool ke son dauka domin karfafa bangaren kai hare-harenta.
Sai dai babban burin Liverpool a lokacin shi ne Florian Wirtz, wanda kuma Bayern Munich da Manchester City suke nema. Lokacin da Wirtz ya bayyana cewa yana son komawa Anfield, sai Liverpool ta kammala cinikin da ya kai fam miliyan 116 ya zama daga cikin masu tsada da ta saya a tarihi.
A lokacin, zuwan Wirtz ya kasance kamar babbar nasara ga Liverpool, amma sama da shekara guda bayan haka har yanzu dan wasan na Jamus bai taka rawar da aka sa rai zai yi ba.
Wirtz ya ci kwallaye bakwai da bayar da 11 aka zura a raga a wasa 56 da ya buga wa Liverpool. Amma a kakar da ta gabata bai taka rawa kai tsaye a zura ko bayar da kwallo a zura a raga a ba a cikin manyan karawa goma a Premier League.
A bana kuma, ya fara dukkan wasannin Liverpool a Premier League da Champions League, amma ya bayar da kwallo aka zura a raga a wasa bakwai.
An sake ganin matsalolinsa a wasan da Liverpool ta sha kashi a hannun Manchester City, inda sabon kocin Reds Andoni Iraola ya cire shi a minti na 66 ya maye gurbinsa da Trey Nyoni, bayan da aka kori Ryan Gravenberch a fafatawar.
Abin da ya kara jawo hankali shi ne cewa Cherki, wanda ya koma Manchester City daga Lyon a kan fam miliyan 30 a watan Yunin 2025, ya zura kwallo mai kayatarwa a wasan da City ta ci Liverpool 3-0 a Anfield.
Duk da cewa Cherki ya kai kasa da kashi daya bisa uku na kudin da Liverpool ta kashe wajen sayen Wirtz, ya riga ya ci kwallaye 16 tare da bayar da 18 aka zura a raga a wasanni 65 da ya buga wa City.
Har ila yau, dan wasan na Faransa ya nuna yana iya sauya akalar manyan wasanni, wani abu da magoya bayan Liverpool ke ganin Wirtz bai nuna sosai ba har yanzu.
Shugaban Kwamitin Kula da Harkokin Kwallon Kafa Mai Zaman Kansaa na Ingila (IFR), David Kogan, ya ce zai yi murabus idan har ya fuskanci wani matsin lamba daga 'yan siyasa dangane da makomar Manchester City.
A matsayinsa na shugaban Independent Football Regulator (IFR), Kogan yana da ikon tantance ko masu kungiyar da manyan jami'ansu sun dace da ci gaba da gudanar da jagorancinta.
Bayan da wani kwamiti mai zaman kansa ya yanke cewa Manchester City ta karya dokokin kuɗi na Premier League, hukumar sa ido zai ta iya yanke shawarar ko tilastawa masu kungiyar ɗin sayar da City.
A watan da ya gabata, Firayim Minista Andy Burnham ya fuskanci suka bayan ya bayyana cewa zai kasance "matuƙar cikin damuwa" idan masu kungiyar Manchester City daga Abu Dhabi suka yanke shawarar sayar da kungiyar.
Wani kwamiti mai zaman kansa ya gano cewa Manchester City ta karya dokoki a cikin wani lokaci a shekaru tara tsakanin 2009 zuwa 2018 ta hanyar ƙirƙirar kwangilolin kasuwanci na bogi domin karkatar da sama da fam miliyan 830 cikin sirri zuwa ayyukan harkokin kwallon kafarta.
Sai dai Manchester City ta dage cewa ba ta da laifi, kuma ta daukaka ƙara kan hukuncin.
Ranar Talata 13 ga watan Oktoba
Ranar Laraba 14 ga watan Oktoba
An shiga damuwa kan lafiyar mai tsaron bayan tawagar Ecuador, Piero Hincapie, bayan da aka dauke shi bayan kammala atisayen shirya fuskantar Lille a Champions League.
Har yanzu ba a tabbatar da girman raunin da Hincapie ya samu ba, amma an gan shi yana rike da idon kafarsa na dama yayin da golan kungiyar, Illan Meslier, ke taimaka masa fita daga fili.
Hincapie ya koma kungiyar a matsayin cikakken dan wasa a wannan bazarar, bayan ya shafe kakar da ta gabata a wasannin aro daga Bayer Leverkusen.
Tun farkon kakar wasa ta bana, mai tsaron bayan ya sha fama da matsalolin raunin tsoka, kuma yanzu yana jiran sakamakon gwaje-gwaje domin a tantance ko zai sake shafe wani lokaci yana jinya.
A gefe guda kuma, kocin Arsenal Mikel Arteta ya bayyana cewa dan wasan tsakiyar kungiyar, Martin Zubimendi, shi ma ya samu rauni ne a lokacin atisaye.
Sai dai har yanzu ba a bayyana cikakken bayani game da irin raunin da Zubimendi ya samu ko kuma tsawon lokacin da zai yi ba tare da buga wasa ba.
Wannan na nufin Arsenal na fuskantar fargabar rasa wasu muhimman 'yan wasa gabanin wasan Champions League da Lille da kuma sauran muhimman wasannin da ke tafe.
Kocin Manchester City, Enzo Maresca, ya fara jan ragamar kungiyar Etihad da rashin nasara 3-0 a hannun Arsenal Community Shield kan fara kakar bana, amma tun daga wannan lokaci ya jagoranci City zuwa nasara takwas a jere a dukkan fafatawa har da shida a Premier League.
City yanzu tana jan ragamar teburin Premier League da tazarar maki uku a saman Arsenal mai rike da kofin gasar, bayan da ta lashe wasanninta shida na farko a jere.
Baya ga haka, kungiyar ta kai zagayen 'yan 16 a gasar Carabao Cup bayan nasara da ta samu a gida a kan Norwich City mai buga Championship.
Haka kuma, Manchester City tana matsayi na takwas a teburin gasar Champions League bayan da ta doke Porto da ci 2-0 a wasan farko a cikin rukuni.
Wannan fara kakar da hawa kan ganiya ya kara karfafa matsayin Maresca a matsayin magajin Pep Guardiola, yayin da City ke ci gaba da nuna karfinta duk da kalubalen da take fuskanta kan tumarta da ake yi.
Mai tsaron bayan Arsenal, Gabriel, ya bayyana cewa a shirye yake ya sake daukar nauyin bugun fenariti a gasar Champions League, duk da cewa ya kasa cin kwallon da ta kai Arsenal ta yi rashin nasara a wasan karshe a kakar da aka kammala da Paris St Germain.
Burin Arsenal na lashe kofin zakarun Turai karo na farko a tarihinta ya rushe ne bayan Gabriel ya buga fenaritin da ya tashi sama ta yi waje, bayan kammala wasa da Paris Saint-Germain (PSG) da ci 1-1.
Sai dai, yayin da yake magana gabanin wasan da Arsenal za ta karbi bakuncin Lille, Gabriel ya ce abin da ya faru a Budapest bai sa ya ji tsoron sake daukar wannan nauyi ba.
Arsenal ta kai wasan karshe a Champions League a karon farko cikin shekaru 20 a kakar da ta gabata, amma ta kasa lashe kofin bayan rashin nasara a hannun PSG.
A kakar bana kuma, kungiyar ta fara kamfen din da nasarar 1-0 a gidan Napoli.
Kungiyar Mikel Arteta za ta karbi bakuncin Lille a filin Emirates Stadium ranar Talata, kafin ta ziyarci Bayern Munich a mako mai zuwa a wani wasan da ake sa ran zai dauki hankali.
Ana kallon Arsenal a matsayin daya daga cikin kungiyoyin da ke da karfin lashe gasar ta bana.
Gabriel mai shekara 28 ya ce kungiyar na cike da karsashi da kwarin gwiwa.
Za a saurari daukaka karar da Manchester City ta shigar ne a wani zaman sirri gaban sabon kwamitin bincike mai zaman kansa da ya kunshi mutane uku, wadanda dukkansu kwararru ne a fannin shari'a.
A karkashin wani sashe na dokokin Premier League, an tanadi cewa ya kamata a kammala sauraron daukaka kara cikin makonni 12 daga ranar da aka fara sauraronta, sannan a sanar da hukunci cikin kwanaki 30 bayan kammala aikin.
Idan aka kirga daga ranar 1 ga Oktoba, ranar da Manchester City ta ce ta shigar da daukaka karar, cikar makonni 12 zai kasance ne a ranar 24 ga Disamba.
Sai dai kuma dokokin sun ba da damar tsawaita wannan wa'adi idan an ga akwai bukatar hakan. Saboda haka, har yanzu ba a san takamaiman lokacin da za a kammala dukkan tsarin ba.
An saka wannan tanadi cikin kundin dokokin Premier League ne a wannan bazarar da ta gabata.
Abubuwan da suka faru a irin wadannan shari'o'i a baya sun nuna cewa duk wani hukunci da za a dauka kan Manchester City zai fi yiwuwa ya jira sai an kammala daukaka karar. Sai dai babu tabbacin cewa haka ne zai faru a wannan karon.
Haka kuma, akwai yiwuwar bayan an yanke hukunci kan daukaka karar a sake samun wata sabuwar daukaka kara dangane da duk wani hukunci da aka kakabawa kungiyar din.
Wannan na nufin cewa batun na iya daukar lokaci mai tsawo kafin a samu hukunci na karshe game da makomar Manchester City da duk wani matakin ladabtarwa da za a dauka a kanta.
Magoya bayan Manchester City sun mayar da martani ga magoyan Liverpool a Anfield ta hanyar daga tutoci da sakonnin goyon baya ga kungiyarsu.
A yayin wasan, wasu magoya bayan City sun rika daga ayaba a matsayin nuna rashin amincewa da abin da magoya masu masaukin baki suke yi musu, tare da daga manyan tutoci dauke da sakonni daban-daban.
Daga cikin sakonnin da aka gani akwai:
"Mun yarda da Khaldoon"
wato nuna cikakken goyon baya ga shugaban kungiyar, Khaldoon Al Mubarak.
Sauran sakonnin sun hada da:
"Ba mu da laifi"
Wannan sako na nuni ne ga tarihin Manchester City da hawan da ta yi daga matakan baya na kwallon kafa zuwa zama daya daga cikin manyan kungiyoyin duniya, tun bayan da ta lashe wasan neman zuwa babbar rukunin gasar a shekarar 1999.
Martanin magoya bayan City ya zo ne bayan da magoya bayan Liverpool suka cika Anfield da sakonnin suka da zarge-zargen da suka shafi tuhumar da aka samu City din da laifin karya wasu dokokin kudi na Premier League.
Lamarin ya kara zafafa yanayin wasan, wanda ya kasance cike da hayaniya da musayar sakonni tsakanin magoya bayan kungiyoyin biyu, kafin daga bisani Manchester City ta yi nasara da ci 3-0.