Ụgbọ mmanụ efuola n'oke osimiri mba Bene

Enwebeghị ozi ọbụla e nwetara n'aka ụgbọ, 'Marine Express' nke e debara aha ya n' obodo Panama kemgbe ụbọchị Tọọsde.

Ihe ndapụta na-eme mgbe orubeghị otu ọnwa aka ndị ohi oke osimiri kpara ụgbọmmiri na mpaghara ahụ.

Otu mba uwa na-ahụ maka njem ụgbọmmiri a kpọrọ 'The International Maritime Bureau' na bekee kwuru na ndị agha mmiri mba Bene na-achọ ụgbọ 'Marine Express' nke bu mmanụ dị tọnụ puku iri na atọ, narị ise.

N'ọnwa Jenuwarị, aka ndị omekome kpara otu ụgbọmmiri ma jide ya abalị isii ganye mgbe a kwụrụ ha ụgwọ isi.

Mịnịsta India na-ahụ maka ihe na-eme na mba ndị ọzọ Sushma Swaraj kwuru na gọọmenti Ịndia na nke Naijiria na Bene bụ ndị ọchịchị nọ na mpaghara ebe ihe a mere na-arụkọ iji chọta ụgbọmmiri ahụ.

Ọ bụ ụlọọrụ dị na mba Hong-Kong akpọrọ, 'Anglo-Eastern' na-elekọta ụgbọmmanụ ahụ na-efu efu.

Onye ntaakụkọ BBC bụ Will Ross kwuru na oke osimiri dịkachasị egwu bụ nke mba Somalia mana kemgbe e jiri zipụcha ụgbọ agha mba ụwa n'oke osimiri a, ka ihe bịara dịtụ mma.