Mgbọtọ, mperete, ikporo na ihe olụndị dị iche iche na-akpọ nwagbọghọ n'ala Igbo

Agbọghọ bụ nwata nwaanyị tozuorola ihe e ji nwaanyị eme mana ọ lụbeghị di.

Ọtụtụ obodo dị iche iche n'ala Igbo nwere ihe ha na-akpọ nwagbọghọ dịka olundị ha siri dị.

Akụkọ a ga-eleba anya n'ihe ụfọdụ obodo ndị a na-akpọ 'nwagbọghọ' nakwa ihe mere ha jiri akpọ ya.

Ihe obodo ndị a na-akpọ nwata nwaanyị alubeghị di

Arochukwu: Arochukwu bụ otu n'ime obodo ndị dị n'Abia steeti, ihe gbasara omenala na-amasị ha nke ukwuu.

Dịka otu okenye Arochukwu bụ Santos Okereke gwara BBC Igbo na ndị Arochukwu na ihe ha na-akpọ agbọghọ bụ 'Mpetere'.

O kwuru "Mpetere pụtara nwagbọghọ mara mma."

"Mpetere dịka okwu e ji amanyere azụ asa, etu e si akpọ nwaaanyị mara mma 'asa'.

"Mpetere bụ azụ na-eji ugwu na ngala aga".

Owere: Ndị Owere na-akpọ agbọghọ, 'mgbọtọ' ya bụ onye na-agba ọtọ dịka Maazị Chigozie Nnabuihe na-akụzi asụsụ Igbo na Mahadum Lagos si kwuo.

Nnabuihe kwụrụ sị, "Ụmụ aghọghọ anaghị eyi akwa, ha na-eji jigida eyichi ahụ."

Oge gboo, nwata nwaanyị na-agbagide ọtọ ruo oge ọ lụrụ di.

Onịcha: Ndị Ọnịcha dị n'Anambra steeti na-akpọ ya 'okporo' maọbụ 'ikporo'.

Nnabuihe kọwara sị, "Ndị e ji olu ha dee Akwụkwọ Nso; ndị Obosi na ndị Ọnịcha na-akpo agbọghọ 'okporo'."

Ika: Ndị Ịka na Delta steeti na-agba ya 'okposho' (Ịka).

Ndị Enuanị na-akpo ya 'okpoho'.

"Ị gafee Osimiri Niger, ndị Enuanị na-akpo ya 'okpoho'.

Izzi/Ikwo : Dịka nwa afọ mpaghara ahụ bụ Chinyere Moses si kwuo, ndị Izzi dị n' Ebonyi steeti na-akpọ agbọghọ, 'nwangboko'.

Ọ bụghị naanị ha, ndị Ikwo na-akpọkwa agbọghọ 'nwamgboko'.

Ebonyi: Ndị Ebonyi steeti na-akpọ agbọghọ "ogeri''.

Dịka Nwabuihe si kwuo, "Ndị Ebonyị, mpaghara Afikpo, Ohafia na-akpọ nwagbọghọ 'Ogeri'."