Anthony Joshua vs Pulev: Anthony Joshua akụpụla Kubrat Pulev ọkwụrụ n'anya

Mkpuchi Na Eme Ozugbo

1. 29 Ọktọba 2020Eji m anya hụ ntị n'aka Coronavirus izuụka abụọ gara aga- Toke Makinwa, 'Ibute ọrịa coronavirus n'enweghị di atọghị m ọchị'

   Onye ọrụ redio a ma ama bụ Toke Makinwa ekwupụtala ihe ọ gabigara dịka ọrịa coronaviris tiri ya ịgba izuụka abụọ gara.

   " Amaghị ebe m siri bute coronavirus."

   "Eso m mee ngagharịiwe EndSARS mana nke abụghị na m na-ekwu na ọ bụ ebe m si nweta ọrịa a."

   O kwuru na ya nwere njirimara ọrịa ịba mana egwu mere ya ka ya kpọọ onye ọrụ NCDC ha bịa nnyocha ahụ mana ha ahụghị coronavirus.

   O kwuru na ya ṅụrụ ogwụ ịba mana ka abalị atọ ya ṅụchara ọgwụ ịba ahụ, ahụmgbu na njibi ahụ bịara karịa nke mere ya ji nweekwa nnyocha ọzọ nke gosiri na ya nwere ọrịa coronavirus.

   O kwuru na mgbe ya na-agabiga ihe ahụ, na ihe kachasị ya njọ bụ oke echiche n'ihi na ya na-atụ egwu ọnwụ.

   O kwuru na ibute ọrịa coronavirus n'enweghị di atọghị ọchị.

   Toke kpọrọ ụmụ Naijiria oku ka ha kee nkwụcha ọkachasị ugbua ọrịa cornavirus bidokwara ikesa ọzọ.

2. 29 Ọktọba 2020Akụnaụba Naịjirịa agaghị ebunwu coronavirus ma ọ kpawa ike ebe a ọzọ - Buhari

   Onyeisiala Naịjiria bụ Muhammadu Buhari adọọla ndị mmadụ aka na ntị sị ka ha gbaa mbọ hụ na ọrịa ozuruụwaọnụ bụ Covid-19 amalitekwaghị ịkpa ike ọzọ na Naịjiria.

   N'ozi o zipuru na Twitter, o kwuru na akụnaụba mba Naịjiria a akachabeghi aka ibunwu mmechi obodo ọzọ ma ọ bụrụ na ọrịa a malite inye nsogbu ọzọ etu o si na mba dị iche iche ugbua.

3. 29 Ọktọba 2020Ọma mma amagbuole mmadụ na Frans maka egbe ọnụ okpukperechị Alakụba

   Ozi na-eru anyị ntị n'ụtụtụ a bụ na onye ọma mma amagbuole otu onye ma merukwa ọtụtụ mmadụ ahụ na Nice dị na mba Frans.

   Onyeisioche okpuruọchịchị ebe ya bụ ihe mere bụ Christian Estrosi sị na-ejidere otu onye ana enyonyo maka mpụ a.

4. 29 Ọktọba 2020Etu ihe mberede okporoụzọ si taa isi ụmụakwụkwọ n'Awgu

   Ihe mberede okporoụzọ mere na njikọ ụzọ nkwọ dị n'obodo Awgu, Enugwu Steetị ataala isi ọtụtụ ụmụakwụkwọ ọtakara na praịmarị.

   Nke a mere mgbe ụmụakwụkwọ Holy Family nke ụka katọlik dị n'Awgu si ụlọakwụkwọ na-alọta ka otu ụgbọala ukwu kụrụ ụgbọala 'bus' bu ụmụakwụkwọ a.

   Anya hụrụ ka o ji mee bụ Nwabueze Nwonwu sị na o mere n'ebe elekere anọ nke ehihie ụbọchị Wenesde, 28 Ọktoba, 2020.

   Ọ sị na ụgbọala 'bus' ahụ bu ụmụkwụkwọ ruru iri abụọ ebe ihe ruru mmadụ atọ n'ime ha nwụrụ pịị 'ihe mberede a, ebe ọtụtụ ndị merụrụ ahụ.

5. 29 Ọktọba 2020Gọvanọ Wike amachiela Ipob kpam kpam na Rivas Steetị

   Gọvanọ Nyem Wike nke Rivas Steetị etinyela aka n'akwụkwọ iwu machiri ndị 'Indigenous People of Biafra' (IPOB) kpam kpam na steetị ahụ.

   O kwuru nke a na Wenesde dịka ọ na-agbasaozi ma sị na steetị ya bụ nke agbụrụ niile.

   "Anyị nwere ihe niile megide atụmatụ na omume otu Ipob bụ ndị a kpọrọ otu na-eyi ndụ egwu na Rivas Steetị, ka o kwuru.

   "Ihe a bụ otu gọọmentị Naịjirịa nakwa nke mpaghara ọwụwanyanwụ machirila ọrụ, atụmatụ nakwa ọrụ ha dịka otu na-eyi ndụ egwu.

   "Ya mere m ji tinye aka n'akwụkwọ iwu ga-ahụ na a machiri atụmatụ Ipob kpam kpam na Rivas Steetị, o nweghi ihe ga-egbochi anyị ịhụ na e mere iwu."

   N'otu aka ahụ gọvanọ Wike buliri mmachi onye apụla n'ezi o tinyere na ụfọdụ mpaghara steetị ahụ gụnyere Mile 1,Mile 2, Ilabuchi, Ikokwu na ebe ndị ọzọ.

   Ọ sị na mmachi ka dị n'okpuruọchịchị Oyigbo ebe ahịa Ikokwu ka mechiri emechi.

   Gọvanọ Wike kwukwara na ọ machiela iji ọgbatumtum 'keke Napep' eme njem n'okporoụzọ ndị gbapụtara ihe na steetị ahụ.

6. 29 Ọktọba 2020Igbo ndị ọma unu abọọla chi?

   Ekele ọma ka anyị ji anabata unu n'ụbọchị taa.

7. 28 Ọktọba 2020Nkeji Coronavirus

8. 28 Ọktọba 2020Amerịka ajụla ịkwado Ngozi Okonjo-Iweala maka ọkwa onyeisi WTO

   Ọtụtụ akụkọ na-ekwu na a họpụtala Ngozi Okonjo-Iweala dịka onyeisi otu 'World Trade Organisation', nmana nke a abụchaghị eziokwu.

   Mba Amerịka ekweghị enye Okonjo-Iweala nkwado maka ya bụ ọkwa, kama ha kwadoro onye ya na ya na-azọ ya bụ Yoo Myung-hee onye Saut Korea.

   Dịka iwu WTO si dị, mba niile so n'otu ahụ ga-akwadorịrị otu onye tupu onye ahụ abụrụ onyeisi, ma ọ bụghị otu a, mara na a ga-emezi ntuliaka iji họpụta onyeisi.

   Ha dị mba otu narị na iri isii na anọ (164) mebere otu WTO, mana naanị Amerịka jụrụ ịkwado Okonjo-Iweala.

   Ọ bụrụ Okonjo-Iweala nwetara nkwado nke mba Amerịka taa, a gaara akpọpụta aha ya dịka onyeisi ọhụrụ nke WTO.

   Mana ka ọ dị ugbua, a ga-echezi ruo mgbe WTO ga-enwe ọgbakọ n'ụbọchị itoolu nke ọnwa Nọvemba iji mara onye ga-emeri ntuliaka ahụ.

   Lee etu onye ntaakụkọ BBC bụ Andrew Walker si kọwaa ya:

9. 28 Ọktọba 2020Ọkụkọ egbuola onye uweojii ebe ọ na-ebụso ndị na-ehibe ọgụ ọkụkọ agha

   Ọkụkọ atụgbuola onye uweojii nọ na mba Philippine ebe ọ na-alụso ndị na-ehibe ọgụ ọkụkọ na ọkụkọ n'obodo Samar.

   Ọkụkọ ahụ ji ihe dịka mma na-ebe ebe a na-amakwụye n'ụkwụ ọkụkọ na-anụ ọgụ wee chawa akwara ọbara dị na mpata ụkwụ uweojii Christine Bolok.

   Nke a mere ka ebuga ya ụlọọgwụ mana ọ nwụrụ tupu e ruo ụlọọgwụ.

   A machiri ọgụ ọkụkọ na ọkụkọ n'obodo ahụ kamgbe ọrịa coronavirus dapụtachara na mba ahụ.

   Tupu coronavirus adapụta, a na-ekwe ka ọgụ ọkụkọ gaa n'ihu na mba ahụ n'ikpo ọgụ iwu kwadoro ụbọchị ụka nakwa oge ezumike dịka ụlọọrụ mgbaza ozi "Philippine News Agency(PNA) si depụta.

   Onyeisi ndị uweojii n'obodo ahụ bụ Colonel Arnel Apud kwuru na nke a bụ oge mbụ n'ime ọrụ uweojii ruru ruo afọ 25 ọ na-ahụ udiri ajọ chi a ịdakwasa onye ọrụ ya.

10. 28 Ọktọba 2020Ka ụkọchukwu onye Anglican si bụrụ onyeisiala mba

    Ọ bụghịzi akụkọ na ụkọchukwu Wavel Ramkalawan meriri ntụliaka mba Seychelles nke afọ 2020.

    E duru ya n'ihi ọrụ oche onyeisiala n'ụbọchị iri abụọ na asatọ nke ọnwa Oktoba, 2020.

    Dịka onye ụkọchukwu ọ bụ, ozi onyeisiala Ramkalawan bụkarị maka udo, nnagide, na arịrịọ ka ndị mba Seychelles jịkọta aka ọnụ maka idi n'otu mba ahụ nakwa ịkwụsị adighị n'otu esemokwu were ọtụ afọ ndọrọndọrọ ọchịchị butere.

    Mmeri ụkọchukwu a tụrụ n'anya makana ọ bụ otu pati na-achị mba ahụ kamgbe afọ 1977.

    Nke a bụkwa ugboro isii ọ na-pụta azọ ọkwa onyeisiala, ije ọ malitere kamgbe afọ 1998.

    Gọọmenti di iche iche akatọọla ya maka ụfọdụ ihe ọ na-ekwu n'ebe o na-enye okwuchukwu n'ụlọụka ya.

    N'agbanyeghị ihe ndị a niile, ụkọchukwu Ramkalawan kwuru na otu ihe na-edu ya n'ugboro ise o na-enweteghị oche onyeisiala bụ okwu Nelson Mandela(onye na-ekwuchitere ndị mmadụ ọnụ ha) nwụrụlanụ, " Onye mmeri bụ onye na-arọ nrọ na anaghịọ awụsa ọwa ya."

11. 28 Ọktọba 2020Juventus na Barcelona ga-akwata ya n'abalịa

    N’egwuregwu, Juventus na Barcelona ga-ama okaibe na asọmpi nke Champions League na-elekere asatọ nke abalịa.

12. 28 Ọktọba 2020Etu ndị amaghị ama si gbuo nwaanyị dị ime n'Ezinifite ka o si ahịa na-alọta.

    Ụmụada Uga dị n'Anambra Steetị eburula ngagharịiwe na mkpesa gaa n'Ezinifite maka ada nwaanyị dị ime e gburu ka o si ahịa na-alọta.

    A sị na nke a mere na Satọde ụbọchị iri abụọ na anọ nke ọnwa Ọktoba, 2020.

    Nwaanyị a bụ onye Uga, a lụrụ n'Ezinifite dị ime ọnwa atọ mgbe ndị a maghị ndị ga bụ gburu ya.

    Nke a mere ndị ada ibe ya ji si n'Uga bịa mgbaru n'Ezinifte ebe a lụrụ ya.

    Mbọ BBC Igbo gbara inwete ozi n'aka ndị uweojii banyere nke a amịtaghị mkpụrụ.

    Ọnụ na-ekwuru ndị uweojii n'Anambra bụ Haruna Mohammed azaghị ekwentị ya.

13. 28 Ọktọba 2020A na-achọ nwaanyi tufuru nwa ya n'ọdọugbọelu dị na Qatar

    N’ofesi, gọọmenti mba Qatar sị na ha ga-etinye anya na ya bụ nyocha emere ịchọpụta nwaanyị tufuru nwaọhụrụ ya n’ikpo ahịhịa n’odougboelu dị na Doha ụbọchị abụọ nke ọnwa Ọktoba.

    Dịka ọtụtụ na-agbarụ ihu maka ya bụ nyocha, ndị ọrụ ọdọugboelu ahụ sị na-ebumnaobi ha bụ ka ha chọpụta nwaanyị kpara ya bụ arụ.

    Ha kpọbara ụmụnwaanyị niile nọ na ụgbọelụ iri n'otu ebe ịme nyocha ka ha mara onye mụrụ ya bụ nwa.

    Ndị ọrụ ahụ rịọkwara mgbaghara maka ya bụ ihe ha mere mana na-ekwu na ha ebughị n'obi ịkpasụ ndị mmadụ iwe.

    Ndị gọọmentị ha sị na ha ga-eme nyocha ịmata ka ndị ahụ siri mee ya bụ nyocha.

    Ụgbọelụ ahụ si Qatar aga Australia.

14. 28 Ọktọba 2020Mpụtara ule Waec agaghịzị apụta taa

    Ndị ọrụ West African Examinations Council ekwuola na ya bụ mpụtara ụleakwụkwọ kwesiri ịpụta taa agaghịzị apụta maka ọgbatauhie so ngagharịiwe emere na Naịjirịa.

    Waec sị na ọ bụzị n’izuụka na-abịanụ ka ya bụ mpụtara ga-apụzi.

15. 28 Ọktọba 2020Josep Maria Bartomeu agbaala arụkwaghịm na Barcelona

    Onyeisi Barcelona bụ Josep Maria Bartemeu agbaala arụkwaghịm ka ndị nkwado ha kwanyere ya ọkụ n’ike ka ọ pụọ agbanyeghị na ọ nabatala isonye na European Super league.

    Oteela ndị nsonso Barcelona chọwara ka Bartomeu pụọrọ ha kemgbe ya na Lionel Messi malitere ịnwe nsogbu.

    Bartomeu banyere Barcelona kemgbe afọ 2014 dịka onyeisi ha ridara ụbọchị Tuzde ya na ndị isiọrụ ndị ọzọ.

    N'okwu ikpeazụ ya, Bartomeu sị na Barca amalitela ịkwado maka Super league tupu ọ pụọ bụ nke ọ sị na ọ ga-enyere ha aka ịkpata ego n'ọdị n'ihu.

    N'izu gara aga ka BBC kwuru na amụma na-aga n'ihu maka ịmalite Lig ọzọ akpọrọ Super League ndị otu egwubọolụ nwere agba n'Uropu ga-eso gbaa bụ nke a ga-etinye ijeri pound anọ na ụma isii.

    Cristiano Ronaldo agaghị eso Juventus gbasị Barcelona bọọlụ na Champions League taa makana ọ ka bu coronavirus.

16. 28 Ọktọba 2020Ndị ekperima abanyela ọrụ izu ohi site na ngagharịiwe a na-eme na Philadelphia

    Ndị uweojii Steeti Philadelphia dị n'Amerịka ekwuola na ndị ekperịma abanyela ọrụ izụ ngwahịa ndị mmadụ nke abalị abụọ site na ogbugbu ndị otu ha gburu nwaokorobia onyeisi ojii.

    Ha sị na a agbagburu Walter Wallace maka na ọ jụrụ ịtọgbọ mma o ji n'aka mgbe ha bịara ijide ya.

    Ndị ụmụnna Wallece sị na isi adịchaghị ya bụ nwaadị gbara afọ iri abụọ na asaa mma.

    N'abalị Tuzde ka ndị uweojii dọrọ ndị ogbe Port Richmond aka na ntị ka ha chaa n'ụzọ maka ndị ekperima banyere ọrụ izu ngwaahịa ndị mmadụ.

    Ndị ọrụ gbata gbata dọkwara ndị mmadụ aka na ntị ka ha baa ụlọ maka ya bụ ọgbaaghara si ngagharịiwe banye ihe ọzọ.

17. 28 Ọktọba 2020Buhari ahọpụtagharịala Mahmood Yakubu dịka onyeisi INEC ruo afọ ise ọzọ

    Onyeisiala Muhammadu Buhari ahọpụtagharịala Mahmood Yakubu dịka onyeisi ụlọọrụ 'Independent National Electoral Commission (INEC) ruo afọ ise ọzọ.

    Onye ndụmọdụ pụrụiche Buhari na mgbasaozi bụ Femi Adesina wepụtara ozi a ma sị na nke a ga-abụ agba nke ikpeazụ Yakubu ga-eji ọkwa a n'ozi e zigara onyeisi ndị Sịnetị bụ Ahmad Lawan.

    Ọ sị na na nhọpụta a dị n'usoro iwu na-achị Naịjirịa nke afọ 1999 dịka a ghazigharịrị.

    Mana ọ sị na ọ dizi n'aka ndị ụlọomeiwu ukwu ịnabata nhọpụtagharị Yakubu.

    Onyeisiala Buhari họpụtara Yakubu n'ọkwa n'ọnwa Nọvemba afọ 2015, n'ime ọnwa isii o merichara ntulaiaka onyeisiala.

    Kamgbe Yakubu naara Attahiru Jega ọkwa onyeisi Inec, ọ haziela ọtụtụ ntuliaka na Naịjirịa gụnyere ntuliaka ukwu n'afọ 2019 e ji họpụtagharịa Onyeisiala Buhari.

18. 28 Ọktọba 2020Unu abọọla chi eee!

    Anyị ụkpa ekele anabata unu n'ụtụtụ taa.

    Biko a hapụkwala isonye n'ọgbakọ anyị www.bbc.com/igbo maka akụkọ ndị hiri odo.

19. 27 Ọktọba 2020Ụlọikpe na Legọs atọhapụla ụmụnwoke 47 eboro ebubo ịdịna onwe ha

    Ọkaikpe Rilwan Aikawa atụhapụla ikpe na-ebo ụmụ nwoke iri anọ na asaa ebubo na ha na-edina onwe ha.

    Aikawa kwuru na ndị gbara ha ya bụ ikpe esoghi usoro kwesiri ekwesị.

    Ndị gbara ha ikpe abịaghị ụlọukpi maka ya bu ikpe ma ha akpotaghị ndị aka ebe.

    Anwuchiri mmadụ iri anọ na asaa a maka ebubo na ha chọrọ ibanye otu ụmụ nwoke na-edina onwe ha kama ụmu nwoke a kwuru na ọ bu ihe mmemme ncheta ọmụmụ ka ha bịara.

20. 27 Ọktọba 2020Ọ bụ ndị Ipob wakporo Ebonyi ụbọchị Monde- Umahi, Aga m eti ndị e mebiri ihe ha aka n'obi- Umahi

    Gọvanọ Ebonyi steeti bụ Dave Umahi eboola ndị otu Ipob na steeti ahụ ebubo ibute ọgbaghara mere na steeti ahụ ụbọchị Monde, abali 26 nke ọnwa Oktoba, afọ 2020.

    Umahi kwuru nke a n'ozi ọ gbasara n'ikuku ụbọchị Tuzde kwuru na ọ bụ ndị butere ọgbaghara n'Ebonyi si n'otu obodo dị n'otu otu okpuru ọchịchị dị na steeti ahụ n'aha ndị Ipob.

    "Na Monde,abalị 2o Oktoba , ndị wakporo Ebonyi mebie ihe si ebe ọzọ.

    "Ụnyahụ bụ Tuzde, 26 Oktoba, ndị bịara bụ ndị Ebonyi si otu obodo n'otu okpuru ọchịchị n'aha ndị Ipob."

    Ọ rịọrọ ndị Ebonyi mgbaghara maka mkpamkpa ndị omwekome na ndị agboro kpara na steeti ahụ ma tie ndị ọrụ nchekwa na nddị mmadụ tụnyere ndụ ha n'ọgbaghara ahụ.

    O kwere nkwa iti ezinaụlọ ndị agboro merụrụ ahụ maọbụ gbuo n'oge ọgbaghara so ngaghariiwe EndSARS na steeti ahụ.