Wasiir ka tirsan xukuumadda Trump oo loo raray xero ciidan cabsi laga qabo in Iiraan ay weerarto. Yaa kale oo xeryaha ciidanka hore loogu raray?

Xoghayaha Maaliyadda Mareykanka Scott Bessent ayaa laga raray gurigiisa Washington DC, waxaana loo wareejiyay saldhig milatari ka dib markii hanjabaado lala xiriirinayo Iiraan oo noloshiisa ku saabsan ay soo gaareen, sida ay sheegayaan warbaahinta Mareykanka.

CBS, oo ah bah wadaagta BBC-da ee Mareykanka, ayaa sheegtay in guuritaanka uu yimid ka dib markii sawir laga qaaday guriga Bessent lagu daabacay Wall Street Journal.

Bessent ayaa hormuud ka ahaa dadaallada lagu go'doominayo Iiraan dhaqaale ahaan iyada oo loo marayo cunaqabatayn iyo xayiraad dhaqaale oo ballaaran.

In kasta oo ujeeddada saxda ah ee hanjabaadaha ka dhanka ah Bessent aysan weli caddayn, haddana sirdoonka Mareykanka ayaa ka digay in Iiraan ay "si weyn u kordhisay" dadaallada lagu bartilmaameedsanayo dadka Mareykanka ah, oo ay ku jiraan saraakiisha Mareykanka.

"Ka dib markii Wall Street Journal uu daabacay maqaal muujinaya sawir online ah oo muujinaya goobta guriga xoghayaha inuu ku yaallo Georgetown juquraafi ahaan, walaacyada amnigu waxay bilaabeen inay kordhaan" ilo wareed ayaa sidaa u sheegay CBS.

Georgetown waa qayb dadka ladan ay degaan oo ka tirsan Washington, taas oo hoy u ah tiro ka mid ah saraakiisha dowladda iyo dadka caanka ah.

Walaacaas amniga, sida ilo wareedku sheegay, ayaa ku kalliftay mas'uuliyiinta inay Bessent u raraan saldhig milatari oo ku yaal aagga.

Bayaan uu soo saaray afhayeenka Waaxda Maaliyadda ayaa lagu sheegay oo keliya in Bessent "aysan ka hor istaagi doonin shaqadiisa" hanjabaadaha isla markaana ay "ka go'an tahay" dadaalka Mareykanka ee lagu cadaadinayo dhaqaalaha Iiraan.

BBC-du waxay la xiriirtay Aqalka Cad si ay uga hesho faahfaahin dheeraad ah oo ku saabsan arrintan.

Bishii Sebtembar, Agaasimaha Sirdoonka Qaranka Jay Clayton ayaa ka digay in Iiraan ay "si weyn u kordhisay" dadaallada ay ku beegsanayso muwaadiniinta Mareykanka.

Wargeyska The New York Times ayaa wariyay in dadaallada Iiraan ay ka mid yihiin beegsiga mas'uuliyiin Mareykan ah, ha ahaadaan kuwo xilka haya ama kuwii hore u soo qabtay xilal. Il wareed ayaa wargeyska u sheegay in arrintani ay "gaartay heer aad u horumarsan".

Mas'uuliyiin kale oo Mareykan ah oo la sheegay inay ku jiraan liiska bartilmaameedyada Iiraan waxaa ka mid ah Xoghayihii hore ee Arrimaha Dibadda Mike Pompeo, La-taliyihii hore ee Amniga Qaranka John Bolton, iyo Mark Milley, oo ahaa Taliyihii hore ee Taliyayaasha Ciidamada Qalabka Sida ee Mareykanka.

Kooxaha amniga ee ilaalinayay Milley iyo Bolton ayaa laga qaaday xilligii maamulka Trump, wax yar ka dib markii uu xilka dib u qabtay sannadkii hore.

Bessent waa mid ka mid ah dhowr mas'uul oo ka tirsan maamulka kuwaas oo ku nool xeryaha ciidamada. Madaxa cusub ee shaqaalaha Aqalka Cad, Stephen Miller, ayaa loo raray xero ciidan dabayaaqadii 2025-kii, ka hor inta uusan bilaaban khilaafka Iiraan.

Xoghayaha Difaaca Pete Hegseth iyo Xoghayaha Arrimaha Dibadda Marco Rubio ayaa labaduba ku nool xeryaha ciidamada; sidoo kale waxaa xeryahaas ku noolaa Xeer ilaaliyihii hore Pam Bondi iyo madaxii hore ee sirdoonka Tulsi Gabbard.

Mareykanka iyo Israa'iil ayaa bishii Febraayo qaaday olole duqeymo cirka ah oo ka dhan ah Iiraan, taas oo sababtay dhimashada hoggaamiyihii dalkaas. Tallaabadaas ayaa keentay in maamulka Tehran uu aargoosi sameeyo, isagoo weerarro ku qaaday xulafada Mareykanka ee gobolka, isla markaana si dhab ah u xiray marinka Hormuz (Strait of Hormuz) oo ah marin ay soo maraan qiyaastii shan meelood meel (1/5) saliidda iyo gaaska adduunka.

Bishii Juun, Mareykanka iyo Iiraan waxay gaareen heshiis hordhac ah oo lagu soo afjarayo dagaalka iyo dib u furista marin biyoodka, laakiin wuu burburay toddobaadyo gudahood ka dib markii weeraradii Iiraan ee maraakiibta ay dib u bilaabeen, Mareykankuna uu dib u soo celiyay xayiraaddii lagu bartilmaameedsanayay dekedaha Iiraan.