Moja kwa moja , Marekani yafungua anga baada ya kusitisha safari za ndege nchini kote

Moja kwa moja

Na Asha Juma

1. Dakika 53 zilizopitaKifo cha De Miguel Uwanjani: Kipa Owono afungiwa mechi 12

   Kipa wa klabu ya FC Andorra, Jesus Owono, amefungiwa kucheza mechi 12 na kamati ya nidhamu ya Shirikisho la Soka la Hispania kufuatia tukio la kugongana na mshambuliaji wa Tenerife, Jesus de Miguel, ambaye baadaye alifariki dunia.

   Owono, mwenye umri wa miaka 25, alioneshwa kadi nyekundu baada ya kugongana na De Miguel katika dakika za mwisho za mchezo wa ligi daraja la pili nchini Hispania kati ya timu hizo mbili, Novemba 2.

   De Miguel, mwenye umri wa miaka 30, alifariki dunia siku iliyofuata.

   Katika taarifa yake, kamati ya nidhamu imesema ililazimika kufanya uamuzi kwa kuzingatia maelezo yaliyoandikwa rasmi na mwamuzi wa mchezo.

   Ripoti ya mwamuzi ilieleza kuwa Owono alioneshwa kadi nyekundu kwa kumpiga mpinzani wake kifuani kwa kutumia mguu kwa nguvu kupita kiasi wakati mpira ukiwa unaendelea kuchezwa.

   Kamati hiyo imeongeza kuwa kutokana na aina ya kitendo kilichofanyika pamoja na mazingira ya tukio hilo, adhabu ya juu kabisa ya kufungiwa mechi 12 imeonekana kuwa inastahili.

   Aidha, shirikisho hilo limeamua mchezo huo ambao ulisimamishwa dakika saba ndani ya muda wa nyongeza hautarudiwa.

   Wakati tukio hilo linatokea, timu hizo zilikuwa zikitoshana nguvu kwa mabao 2-2.

   Shirikisho limesema matokeo hayo yatabaki kuwa rasmi, likieleza kuwa huo ndio uamuzi unaoheshimu zaidi mazingira ya kipekee na ya kusikitisha yaliyotokea.

   Owono bado hajafanya uamuzi kuhusu kurejea uwanjani

   Kupitia taarifa iliyotolewa Novemba 4 kwa niaba yake na klabu ya FC Andorra, Owono alisema anapitia siku ngumu zaidi maishani mwake na anahisi maumivu makubwa kutokana na kifo cha De Miguel.

   Kwa upande wake, kocha wa FC Andorra, Carles Manso, amesema kipa huyo ambaye ni raia wa Equatorial Guinea bado hajafanya uamuzi kuhusu kurejea kucheza soka kufuatia tukio hilo.

   Manso amesema kwa sasa Owono yuko pamoja na familia yake na amepewa uhuru wa kufanya uamuzi wowote kuhusu mustakabali wake wa soka.

   Kocha huyo amesema klabu itampa kila aina ya msaada na kuwa karibu naye katika kipindi hiki kigumu.

   Ameongeza kuwa Owono atapewa nafasi ya kuamua kama anataka kurejea uwanjani, lini anataka kufanya hivyo, au kama hataki kuendelea tena na soka.

   Amesisitiza kuwa uamuzi huo utategemea wakati ambao Owono atajihisi yuko tayari kufanya hivyo.

   Soma Zaidi Hapa:

   Wachezaji 5 ambao soka limekatisha uhai wao

   Mshambuliaji wa Tenerife Miguel afariki baada ya kuumia kichwa uwanjani

2. Saa 1 iliyopitaMicrosoft yaomba radhi baada ya hitilafu ya kimataifa kuvuruga huduma zake

   Kampuni ya teknolojia ya Microsoft imeomba radhi kufuatia hitilafu kubwa iliyozikumba huduma zake, zikiwemo Outlook na Teams, na kusababisha usumbufu kwa watumiaji katika maeneo mbalimbali duniani.

   Kufikia Ijumaa alasiri, huduma nyingi zilikuwa zimeanza kurejea katika hali ya kawaida, takribani saa 24 baada ya hitilafu hiyo kuanza.

   Microsoft imesema inapiga hatua za kutia moyo katika kurejesha huduma zake, ingawa bado haijabainisha ni lini mifumo yote itakuwa imerejea kikamilifu.

   Hitilafu hiyo iliathiri zaidi ya nchi 70 duniani, na kuvuruga shughuli mbalimbali zikiwemo za kibiashara, huduma za serikali na matumizi binafsi.

   Zaidi ya watu milioni 430 duniani kote wanatumia huduma zilizoathiriwa na hitilafu hiyo.

   Microsoft imesema tatizo hilo lilitokana na hitilafu ya kiufundi iliyojitokeza wakati wa kuboresha uwezo wa mtandao wake ili kuhudumia mahitaji makubwa ya watumiaji.

   Kampuni hiyo imesisitiza kuwa tatizo hilo halikusababishwa na mashambulizi ya kimtandao wala mifumo ya akili bandia (AI).

   Wataalamu wa teknolojia wamesema tukio hilo ni ukumbusho mkubwa wa namna biashara na huduma muhimu duniani zinavyotegemea kwa kiwango kikubwa kampuni chache kubwa za teknolojia.

   Serikali na huduma muhimu zakumbwa na athari

   Watumiaji walianza kuripoti changamoto za kufikia huduma za Microsoft 365 siku ya Alhamisi.

   Kufikia Ijumaa, athari za hitilafu hiyo zilikuwa zimeenea na kuathiri taasisi mbalimbali, zikiwemo serikali ya Japan, Mahakama Kuu ya Ufilipino na shirika la ujasusi la Australia.

   Vilevile, huduma za usafiri wa treni, hospitali na mahakama katika maeneo ya Amerika Kaskazini ziliripotiwa kukumbwa na changamoto.

   Microsoft imesema ilirejesha huduma zake hatua kwa hatua kutokana na ukubwa wa tatizo hilo, ili kuhakikisha mifumo inabaki imara baada ya kurejea katika matumizi.

   Msemaji wa Microsoft amesema: “Tunawaomba radhi sana wateja na washirika wetu kutokana na usumbufu uliosababishwa na tukio hili.”

   Ameongeza kuwa kampuni hiyo inatambua imani ambayo wateja wameiweka katika huduma zake na inachukulia jukumu hilo kwa uzito mkubwa.

   Wataalamu waonya kuhusu utegemezi wa teknolojia

   Wataalamu wamesema licha ya baadhi ya wafanyakazi kufurahia kukosa huduma za barua pepe kwa siku hiyo, tukio hilo limeonesha jinsi taasisi nyingi zinavyotegemea mifumo ya huduma za teknolojia inayotolewa kupitia mtandao (cloud-based services).

   Rob Demain, mtendaji mkuu wa kampuni ya usalama wa mtandao ya e2e-assure, amesema hitilafu hiyo ni ukumbusho mkubwa wa utegemezi wa dunia kwa kampuni chache kubwa zinazotoa huduma za teknolojia.

   Kwa upande wake, Matt Saunders, afisa mkuu wa teknolojia katika eneo la utekelezaji wa kampuni ya ushauri wa teknolojia ya Adaptavist, amesema itakuwa changamoto kwa taasisi kujikinga kikamilifu dhidi ya matatizo kama hayo.

   Amesema mikakati ya kawaida ya kukabiliana na majanga ya mifumo ya TEHAMA inapendekeza kampuni kutumia huduma mbadala ili kuhakikisha shughuli zinaendelea iwapo mfumo mmoja utashindwa kufanya kazi.

   Hata hivyo, amesema katika mazingira halisi ni vigumu kwa biashara nyingi kufanya kazi bila kutumia mifumo muhimu kama Microsoft.

   Saunders amesisitiza kuwa baada ya tukio hilo, taasisi zinapaswa kuwa na mipango madhubuti ya kuendelea na shughuli zao hata pale huduma hizo za teknolojia zinapopatikana na hitilafu.

   Soma Zaidi Hapa:

   Hitilafu ya Microsoft yaathiri mamilioni ya watu wanaotumia Microsoft 365

   PHP ni nini, kwa nini ilisababisha taharuki ya usalama wa mtandao duniani?

   Jiji linaloendeshwa na Akili Mnemba na wasiwasi unaolizunguka

3. Saa 2 zilizopitaMarekani yafungua anga baada ya kusitisha safari za ndege nchini kote

   Vyombo vya habari vya Marekani vinaripoti kuwa marufuku ya safari za ndege nchini kote imeondolewa.

   Takribani saa nne baada ya safari za ndege kusimamishwa, mamlaka zimeruhusu ndege kurejea angani na kuendelea na safari zake.

   Waziri wa Uchukuzi wa Marekani, Sean Duffy, amethibitisha kuwa anga la nchi hiyo limefunguliwa tena.

   “Vituo vyetu vya udhibiti wa safari za ndege pamoja na mifumo yetu ya mawasiliano sasa vinafanya kazi. Saa 8:15 usiku kwa saa za Mashariki mwa Marekani, tulifungua tena anga,” amesema Duffy.

   Hata hivyo, amesema kurejea kwa shughuli za usafiri wa anga katika hali ya kawaida kutategemea upatikanaji wa rasilimali zinazohitajika.

   Duffy ameeleza kuwa itachukua muda kurekebisha athari zilizosababishwa na hitilafu hiyo.

   Amesema tukio hilo limesababisha athari katika ratiba za safari za ndege, huku mamlaka zikifuatilia safari zilizopangwa kufanyika mwishoni mwa wiki ili kuhakikisha shughuli zinarejea katika hali ya kawaida.

   Kutokana na hali hiyo, ucheleweshaji wa safari unatarajiwa kuendelea kwa siku kadhaa, huku baadhi ya abiria wakiendelea kukwama katika viwanja vya ndege.

   Duffy: Mfumo wa Marekani wa kudhibiti safari za ndege ni wa zamani sana

   Akielezea chanzo cha tatizo hilo, Duffy amesema kuwa saa 3:36 alasiri kwa saa za eneo husika, mifumo ya rada na mawasiliano katika vituo vya udhibiti wa safari za ndege nchini kote ilianza kukumbwa na hitilafu.

   Baada ya mifumo ya mawasiliano kuanza kupokea taarifa zisizolingana kutokana na hitilafu katika vifaa vya kusambaza data (routers), Shirika la Usafiri wa Anga la Marekani (FAA) lilitoa amri ya kusimamisha safari za ndege nchini kote.

   Duffy aliwaambia waandishi wa habari kuwa Marekani inatumia mfumo wa zamani sana wa kudhibiti safari za ndege.

   Alifafanua kuwa vifaa hivyo vililemewa na kiasi kikubwa cha data, hali iliyosababisha kutokuwepo kwa uthabiti na usahihi wa taarifa zilizokuwa zikipokelewa.

   Aidha, amesisitiza umuhimu wa Bunge la Marekani kutoa fedha za kutosha kwa ajili ya kuboresha mfumo huo na kujenga mfumo wa kisasa wa kudhibiti safari za ndege.

   Pia unweza kusoma:

   Ni nani anayevuruga safari za ndege barani Ulaya kwa kutoa vitisho vya mabomu?

   Jinsi kunguni alivyosababisha kusimamishwa kwa safari za ndege za kimataifa

   Uhandisi mgumu unaotumika kutengeneza vioo vya ndege

4. Saa 2 zilizopitaHujambo na karibu katika matangazo yetu mubashara.