தமிழக சட்டப்பேரவை துணைத்தலைவர் தாக்கியதாக புகார் - வைரல் காணொளியின் பின்னணி

"நான் எதற்காக வந்திருக்கிறேன் என்று கூட அவர் கேட்கவில்லை. திடீரென கட்டை மற்றும் இரும்பு போன்ற பொருள்களால் என்னைத் தாக்கினார். அவருடன் இருந்த நபரும் என்னை அடித்தார். இப்படியொரு தாக்குதலை நான் எதிர்பார்க்கவில்லை" என்கிறார், கார்த்திக் குமார்.

திருச்சி துறையூர் தொகுதி எம்.எல்.ஏவும் சட்டப்பேரவைத் துணைத் தலைவருமான ரவிசங்கர் மீது தான் இப்படியொரு குற்றச்சாட்டை அவர் முன்வைத்துள்ளார்.

தொகுதியில் நிலவும் குடிநீர் பிரச்னை தொடர்பாகப் பேசச் சென்றபோது தன் மீது தாக்குதல் நடத்தப்பட்டதாக, பிபிசி தமிழிடம் கார்த்திக்குமார் கூறினார்.

பேரவைத் துணைத் தலைவர் மீதான குற்றச்சாட்டுகள் குறித்து விசாரணை நடத்தப்பட்டு வருவதாக, அமைச்சர் ராஜ்மோகன் தெரிவித்துள்ளார்.

" 'எந்த ஊரு நீ?' எனக் கேட்டு அடித்தார்"

திருச்சி துறையூர் தொகுதியைச் சேர்ந்த கார்த்திக்குமார் என்பவர் கடந்த ஞாயிற்றுக்கிழமை வெளியிட்ட காணொளி ஒன்று சமூக வலைதளங்களில் பரவியது. இவர் சமூக ஆர்வலராகவும் பத்திரிகை ஒன்றில் புகைப்படக் கலைஞராகவும் பணியாற்றி வருகிறார்.

அவர் வெளியிட்ட காணொளியில், 'எந்த ஊரு நீ?' எனக் கேட்டு சிலர் தாக்குவதும் அதற்கு, 'நான் துறையூர் சட்டமன்றத் தொகுதி தான்... உங்களுக்குப் பத்து முறை போன் செய்தேன்' எனக் கூறுவதாகவும் காட்சிகள் இடம்பெற்றிருந்தன.

இந்தச் சம்பவத்துக்குப் பிறகு மண்ணச்சநல்லூர் அரசு ஆஸ்பத்திரியில் இருந்து காணொளி ஒன்றை வெளியிட்ட கார்த்திக்குமார், " 90 நாட்களாக என்னுடைய வார்டில் குடிநீர் பிரச்னை நீடிக்கிறது. இதுகுறித்து எம்.எல்.ஏ அலுவலகத்தில் மனு கொடுத்தேன்" எனக் கூறியுள்ளார்.

எட்டாம் தேதி மாலை பேரவைத் துணைத் தலைவர் வீட்டின் வழியாக சென்றபோது அவரது அரசு வாகனம் இருந்ததால், அடிப்படை பிரச்னைகளைப் பற்றிக் கேட்பதற்காக சென்றதாகவும் அப்போது தாக்குதலுக்கு ஆளானதாகவும் தெரிவித்துள்ளார்.

பேரவைத் துணைத் தலைவர் தாக்கியதாகக் கூறப்படும் காணொளி ஊடகங்களில் வெளியான நிலையில், திங்கள்கிழமை கார்த்திக் குமார் பேசும் மற்றொரு காணொளி வெளியானது.

அதில், ' அவ்வாறு எதுவும் நடக்கவில்லை. சமூக வலைதளங்களில் தவறாக சித்தரிக்கின்றனர். இதனை யாரும் நம்ப வேண்டாம்' எனக் கூறியிருந்தார். இதனால், 'தாக்குதல் நடந்ததா?' என்ற கேள்வி எழுந்தது.

இந்தநிலையில், கடந்த 9ஆம் தேதி விரிவான விளக்கம் ஒன்றை ஊடகங்களுக்கு கார்த்திக் குமார் அளித்துள்ளார். அதில், "என்னுடைய வார்டில் உள்ள அடிப்படை பிரச்னைகள் குறித்து நகராட்சி அதிகாரிகளிடம் மனு கொடுத்தேன். எந்த நடவடிக்கையும் எடுக்கப்படவில்லை. எம்.எல்.ஏ அலுவலகத்தில் மனு கொடுத்தும் பதில் இல்லை" எனக் கூறியுள்ளார்.

'நான் பேசியதை 7 டேக் வரை எடுத்தனர்'

"தீபாவளியன்று அமாவாசை தினம் என்பதால் கோவிலுக்குச் சென்று கொண்டிருந்தேன். அப்போது பேரவை துணைத் தலைவர் வீட்டில் அரசு வாகனம் நின்றிருந்ததால் அவரை நேரில் பார்த்துப் பேசலாம் எனச் சென்றேன்" என்கிறார் அவர்.

ஆனால், தனது வாகனத்தின் சாவியைப் பிடுங்கிவிட்டு கடுமையாக தாக்கியதாகவும் எந்தக் கேள்வியும் கேட்காமல் அடித்ததாகவும் அவர் கூறியுள்ளார். இந்தத் தாக்குதலில் காயம் ஏற்பட்டதால் அரசு மருத்துவமனையில் சிகிச்சைக்காக கார்த்திக் குமார் சென்றுள்ளார்.

"அங்கு பணியில் இருந்த அரசு மருத்துவரிடம், 'எம்.எல்.ஏ ரவிசங்கர் அடித்துவிட்டார்' எனக் கூறினேன். அவரோ, அடையாளம் தெரியாத நபர்கள் அடித்துவிட்டதாகக் குறிப்பு எழுதினார். இதன்பிறகு காவல் ஆய்வாளர் கிருபாநிதி அங்கு வந்தார்" எனக் கூறுகிறார் கார்த்திக் குமார்.

அவர் தன்னை வலுக்கட்டாயமாக பேரவைத் துணைத் தலைவர் வீட்டுக்குக் கூட்டிச் சென்றதாகவும் அங்கு தாக்குதல் சம்பவமே நடக்கவில்லை எனப் பேச வைத்து வீடியோ எடுத்தாகவும் கூறியுள்ளார்.

"இவ்வாறு பேசாவிட்டால் என் குடும்பத்தைக் கொன்றுவிடுவதாக ரவிசங்கர் மிரட்டினார். என் உயிரைக் காப்பாற்றிக் கொள்வதற்காக அவ்வாறு பேசினேன். அப்போது காவல் ஆய்வாளர் கிருபாநிதியும் இருந்தார். நான் பேசியதை சுமார் ஏழு டேக் வரை எடுத்தனர்" என்று கார்த்திக்குமார் தெரிவித்துள்ளார்

அரசியல் தலைவர்கள் கண்டனம்

"பேரவைத் துணைத் தலைவரை சந்தித்து கோரிக்கையைத் தெரிவிக்கச் சென்றவர் தாக்கப்பட்டதாகவும் மிரட்டப்பட்டதாகவும் வெளிவரும் செய்திகள் கவலை அளிக்கின்றன" என, மா.கம்யூனிஸ்ட் கட்சியின் மாநில செயலாளர் பெ.சண்முகம் தெரிவித்துள்ளார்.

"பேரவை துணைத் தலைவர் அவ்வாறு நடந்து கொண்டிருந்தால் கண்டிக்கத்தக்கது. அவர் மீது உரிய நடவடிக்கை எடுக்கப்பட வேண்டும். இதற்குத் துணை போன காவல் ஆய்வாளரும் நடவடிக்கைக்கு உள்ளாக்கப்பட வேண்டும்" எனவும் பெ.சண்முகம் கூறியுள்ளார்.

இந்தக் காணொளிகள் அரசியல்ரீதியாக விவாதப் பொருளாக மாறின. காணொளியை தனது எக்ஸ் பக்கத்தில் பதிவிட்டுள்ள தமிழ்நாடு பா.ஜ.க தலைவர் நயினார் நாகேந்திரன், 'யாரை என்ன வேண்டுமானாலும் செய்யலாம் என்ற ஆணவம் த.வெ.கவினருக்கு எப்படி வந்தது?' எனக் கேள்வியெழுப்பியுள்ளார்.

'பொதுவெளியில் வன்முறை மற்றும் கொலை மிரட்டலில் ஈடுபடும் ரவிசங்கர், பேரவைத் துணைத் தலைவராக சட்டப்பேரவையில் எப்படி நீதியை நிலைநாட்டுவார்?' எனவும் அவர் பதிவிட்டுள்ளார்.

தே.மு.தி.க பொதுச்செயலாளர் பிரேமலதா விஜயகாந்த் வெளியிட்டுள்ள அறிக்கையில், 'கோரிக்கையுடன் சென்ற ஒருவர், சட்டப்பேரவை துணைத் தலைவரால் தாக்கப்பட்டதாகவும் அதனைத் தொடர்ந்து மிரட்டப்பட்டு காணொளி வெளியிட வைக்கப்பட்டதாகவும் முன்வைக்கப்படும் குற்றச்சாட்டுகள் மிகவும் கண்டனத்துக்குரியவை' எனக் கூறியுள்ளார்.

'மக்களால் தேர்ந்தெடுக்கப்பட்ட மக்கள் பிரதிநிதிகளாக இருப்பவர்கள், பொதுமக்களின் குறைகளைக் கேட்டு அவர்களுக்குத் தீர்வு காண வேண்டுமே தவிர, அதிகாரத்தைப் பயன்படுத்தி அச்சுறுத்தும் வகையில் செயல்படுவதாகக் குற்றச்சாட்டுகள் எழுவது ஜனநாயகத்துக்கு அழகல்ல' எனவும் அவர் தெரிவித்துள்ளார்.

'இந்த விவகாரத்தில் தமிழ்நாடு அரசு மௌனம் காக்காமல், உடனடியாகத் தலையிட்டு, சம்பந்தப்பட்ட நபரின் புகாரின் அடிப்படையில் பாரபட்சமற்ற விசாரணை நடத்த வேண்டும்' எனவும் பிரேமலதா விஜயகாந்த் வலியுறுத்தியுள்ளார்.

தீபாவளி நாளில் சென்றது ஏன்?

"தீபாவளி நாளில் துணைத் தலைவர் வீட்டுக்குச் சென்றது ஏன்?" என கார்த்திக் குமாரிடம் பிபிசி தமிழ் கேட்டது. "அமாவாசை நாளில் கோவிலுக்குச் செல்வதை வழக்கமாக வைத்திருக்கிறேன். கோவிலுக்குச் செல்லும் வழியில் ரவிசங்கரின் வீடு உள்ளது. அந்தப் பகுதி வழியாக அன்று மாலை சுமார் 6.30 மணியளவில் சென்றேன்" என்கிறார்.

"வீட்டில் ரவிசங்கரின் அரசு வாகனம் நின்று கொண்டிருந்தது. அவர் வீட்டில் இருப்பதால் நேரில் கோரிக்கையை முன்வைக்கலாம் எனச் சென்றேன். அவரை அழைத்தேன். வெளியில் வந்த அவர், என்னவென்று விசாரிக்காமல் வந்து தாக்குதல் நடத்தத் தொடங்கிவிட்டார்" என்கிறார் கார்த்திக் குமார்.

தொடர்ந்து பேசிய அவர், "நான் எதற்காக வந்திருக்கிறேன் என்று கூட அவர் கேட்கவில்லை. கட்டை மற்றும் இரும்பால் தாக்கினார். அவருடன் இருந்த நபரும் என்னைத் தாக்கினார். தலை, பின்பக்கம், கை விரல் என வலி அதிகமாக இருந்ததால் அரசு ஆஸ்பத்திரியில் சிகிச்சைக்காக சேர்ந்தேன்" எனக் கூறுகிறார்.

'காவல் ஆய்வாளர் மிரட்டினார்'

தான் தாக்கப்பட்டது தொடர்பான காணொளியை வெளியிட்ட பிறகு மண்ணச்சநல்லூர் காவல் ஆய்வாளர் கிருபாநிதி ஆஸ்பத்திரிக்கு வந்ததாகக் கூறும் கார்த்திக் குமார், 'எம்.எல்.ஏ சொல்வதைக் கேட்காவிட்டால் குண்டர் சட்டத்தில் அடைப்பேன் என காவல் ஆய்வாளர் மிரட்டினார்" என்கிறார்.

அதன்பிறகு இரவு சுமார் 11.30 மணியளவில் பேரவைத் துணை தலைவர் வீட்டுக்கு தன்னைக் கூட்டிச் சென்று, அவ்வாறு எதுவும் நடக்கவில்லை எனப் பேசுமாறு கூறி வீடியோ ஒன்றை எடுத்ததாகவும் அவர் குறிப்பிட்டார்.

அப்போதும் தன்னை ரவிசங்கர் மிரட்டியதாகக் கூறும் கார்த்திக் குமார், "அங்கு நான் பேசுவதற்கு முன்னதாக, 'என்னைப் பற்றி தெரியுமா.. நான் நினைத்தால் குடும்பத்தையே ஒன்றுமில்லாமல் ஆக்கிவிடுவேன்' என மிரட்டினார். தொடர்ந்து அவதூறான வார்த்தைகளால் என்னைத் திட்டினார்" என்கிறார்.

"இதனால் பயந்து அவர்கள் கூறியபடி வீடியோவை பேசிக் கொடுத்தேன். இந்த வீடியோவை அவர்கள் வெளியிட்டனர். இதனை பார்த்த என்னுடைய உறவினர்கள், நான் பணம் வாங்கிக் கொண்டு பேசியதாக விமர்சித்தனர். இதனால் மிகுந்த மனவேதனையோடு நடந்த சம்பவங்களை ஊடகங்களை அழைத்து விவரித்தேன்" எனவும் அவர் தெரிவித்தார்.

'எந்த உண்மையும் இல்லை' - காவல் ஆய்வாளர்

ஆனால், இந்தக் குற்றச்சாட்டுகளை முழுமையாக மறுக்கிறார் மண்ணச்சநல்லூர் காவல் நிலைய ஆய்வாளர் கிருபாநிதி.

பிபிசி தமிழிடம் பேசிய அவர், "நான் கார்த்திக் குமாரை மிரட்டியதாகக் கூறுவதில் எந்த உண்மையும் இல்லை. அவர் பேசுவதில் நிறைய முரண்பாடுகள் உள்ளன. அவர் மதுபோதையில் அங்கு சென்றுள்ளார். மக்கள் பிரச்னைக்காக செல்லவில்லை" என்றார். கார்த்திக் குமார் சென்றபோது பேரவை துணைத் தலைவர் உறங்கிக் கொண்டிருந்ததாகவும் காவல் ஆய்வாளர் கிருபாநிதி கூறினார்.

சம்பவம் நடந்த நாளில் பேரவைத் துணைத் தலைவருக்கு கார்த்திக் குமார் பலமுறை மிஸ்டுகால்களை கொடுத்துள்ளதாகக் கூறிய அவர், "மக்கள் பிரச்னைக்காக செல்லும் நபர் இத்தனை முறை ஏன் அழைக்க வேண்டும்?" எனக் கேள்வி எழுப்பினார்.

"தற்போது வரை காவல் நிலையத்தில் கார்த்திக் குமார் தரப்பில் புகார் மனு எதுவும் தரவில்லை. 'புகார் கொடுக்க விரும்பவில்லை' என அவரே எழுதியும் கொடுத்துள்ளார். தாக்குதல் நடக்கவில்லை என அவர் பேசும் வீடியோ எடுக்கப்படும் போது நான் அவ்விடத்தில் இல்லை" எனவும் காவல் ஆய்வாளர் கிருபாநிதி விளக்கம் அளித்தார்.

மதுபோதையில் இருந்ததாக காவல் ஆய்வாளர் சுமத்தும் குற்றச்சாட்டுகளை கார்த்திக் குமார் மறுக்கிறார். "நான் மதுபோதையில் இருந்திருந்தால் அரசு ஆஸ்பத்திரியில் சிகிச்சையின் போது மருந்து கொடுப்பதற்கு வாய்ப்பில்லை. பிரச்னையை திசைதிருப்புவதற்காக இவ்வாறு கூறுகின்றனர்" என்கிறார்.

அமைச்சர் ராஜ்மோகன் கூறியது என்ன?

செவ்வாய்க்கிழமை தமிழக பள்ளிக்கல்வித் துறை அமைச்சர் ராஜ்மோகனிடம் செய்தியாளர்கள் இதுதொடர்பாக கேள்வியெழுப்பினர்.

"துறையூர் விவகாரத்தைப் பொறுத்தவரை தவெக தலைமை ஒழுங்கு நடவடிக்கைக் குழுவில் கட்சியின் பொதுச்செயலாளர் உள்பட பலர் உள்ளனர். அக்குழுவுக்கு இந்த விவகாரம் பரிந்துரை செய்யப்பட்டுள்ளது" எனக் கூறியுள்ளார்.

"முதலமைச்சர் ஆட்சியில் எம்.எல்.ஏ, அமைச்சர், துணைத் தலைவர் என யாராக இருந்தாலும் சட்டம் தன் கடமையைச் செய்யும். நீதியை நிலைநாட்டுவதற்கு கட்சி பாரபட்சம் என எதுவும் இல்லை" எனவும் அமைச்சர் ராஜ்மோகன் தெரிவித்துள்ளார்.

சட்டப்பேரவைத் துணைத் தலைவரும் துறையூர் எம்.எல்.ஏவுமான ரவிசங்கரை தொடர்பு கொள்ள பிபிசி தமிழ் பலமுறை முயன்றும் இந்த கட்டுரை வெளியாகும் வரையிலும் அந்த முயற்சி பலன் தரவில்லை. அவர் தரப்பில் விளக்கம் தரப்படும் பட்சத்தில் இந்தக் கட்டுரையில் அது பின்னர் சேர்க்கப்படும்.

ஆண்ட்ராய்டு சாதனங்களுக்கான பிபிசி செயலியை கூகுள் பிளேயிலிருந்து பதிவிறக்கம் செய்ய இங்கே கிளிக் செய்யவும்.

ஐஃபோன் மற்றும் ஐபேடுக்கான பிபிசி செயலியை ஆப் ஸ்டோரிலிருந்து பதிவிறக்கம் செய்ய இங்கே கிளிக் செய்யவும்.

கவனிக்கவும்: இந்தச் செயலி பிரிட்டனிலும் அமெரிக்காவிலும் கிடைக்காது. இதில் ஆங்கில மொழிப் பதிப்பு இல்லை.

- இது, பிபிசிக்காக கலெக்டிவ் நியூஸ்ரூம் வெளியீடு