'பாதுகாப்புக்கு செலவிடாமல் நடனம், விளையாட்டுக்கு பல பில்லியன் டாலர் ஏன்?' - ஹூத்தி தாக்குதல்களுக்கு மத்தியில் செளதி இளவரசருக்கு எதிராக கேள்விகள்

செளதி அரேபியாவின் விமான நிலையங்கள் மற்றும் எரிசக்தி உள்கட்டமைப்புகள் மீது ஹூத்திகள் நடத்தும் தாக்குதல்கள், அந்நாட்டின் தலைமைக்குப் பெரும் சவாலாக அமைந்துள்ளன.

இந்தத் தாக்குதல்கள், பட்டத்து இளவரசர் முகமது பின் சல்மானின் முக்கியத் திட்டமான 'விஷன் 2030'-க்கும் பாதிப்பை ஏற்படுத்தக்கூடும். எண்ணெய் வளத்தை மட்டுமே சார்ந்திருப்பதைக் குறைத்து, முதலீடு, சுற்றுலா, பொழுதுபோக்கு ஆகிய துறைகளில் உலகின் முக்கிய மையமாக செளதி அரேபியாவை மாற்றுவதே இந்தத் திட்டத்தின் நோக்கம்.

ஆனால், தொடர்ந்து நடைபெறும் தாக்குதல்கள், நிலையான மற்றும் பாதுகாப்பான நாடு என்ற செளதி அரேபியாவின் பெயருக்குப் பாதிப்பை ஏற்படுத்தக்கூடும்.

செளதி அரசாங்கத்தின் எதிர்ப்பாளர்கள், அந்நாட்டின் உண்மையான அதிகார மையமாகக் கருதப்படும் முகமது பின் சல்மான், தனது ஆட்சிக்காலத்தின் மிகப் பெரிய நெருக்கடிகளில் ஒன்றை எதிர்கொண்டுள்ளதாகக் கூறுகின்றனர்.

செளதி அரசாங்கத்தின் எதிர்ப்பாளர்கள் யார்?

செளதி அரேபியாவில் அரசியல் கட்சிகளுக்குத் தடை விதிக்கப்பட்டுள்ளது. அரசியல் எதிர்ப்புகளையும் அந்நாட்டு அரசு பொறுத்துக்கொள்வதில்லை.

இதனால், செளதி அரசாங்கத்தை எதிர்ப்பவர்களில் பெரும்பாலானோர் வெளிநாடுகளில் செயல்பட்டு வருகின்றனர்.

அவர்களில் சுன்னி இஸ்லாமியக் கருத்துகளைக் கொண்ட அரசியல் எதிர்ப்பாளர்கள், தாராளவாத மற்றும் ஜனநாயக ஆதரவு சீர்திருத்தவாதிகள், ஷியா பிரிவினரின் உரிமைகளுக்காகக் குரல் கொடுப்பவர்கள், சுயாதீன விமர்சகர்கள் ஆகியோர் அடங்குவர்.

இவர்களில் பல்வேறு கருத்துகளையும் பின்னணிகளையும் கொண்ட செயற்பாட்டாளர்களை உள்ளடக்கிய 'நேஷனல் அசெம்ப்ளி பார்ட்டி', ஒழுங்கமைக்கப்பட்ட எதிர்ப்பு அமைப்புகளில் ஒன்றாகும்.

செளதி அரசாங்கத்தை எதிர்ப்பவர்களால் சில ஊடகங்களும் நடத்தப்படுகின்றன.

அல்-இஸ்லா, நபா போன்றவை அவற்றில் அடங்கும். இவற்றின் காணொளிகளை யூடியூபில் லட்சக்கணக்கானோர் பார்க்கின்றனர்.

'பொறுப்பற்ற முடிவுகளை எடுப்பதை நிறுத்துங்கள்

அக்டோபர் மாதத்தில் செளதி அரேபியா மீது ஹூத்திகள் நடத்திய தாக்குதல்கள் தீவிரமடைந்ததைத் தொடர்ந்து, வெளிநாடுகளில் வசிக்கும் செளதி அரசாங்கத்தின் எதிர்ப்பாளர்கள், இந்தப் போர் கையாளப்படும் விதம் குறித்து கேள்வி எழுப்பினர்.

இந்தப் போர், முன்பைவிட செளதி அரேபியாவைப் பாதுகாப்பற்ற நாடாக மாற்றியிருப்பதாக அவர்கள் விமர்சித்தனர்.

மனித உரிமைச் செயற்பாட்டாளரும் ஜனநாயக ஆதரவாளருமான யஹ்யா அசிரி, ஏமன் போரில் செளதி அரசாங்கத்தின் பங்கைக் கடுமையாக விமர்சித்தார்.

அதேநேரத்தில், செளதி அரேபிய மக்களுக்கும் அந்நாட்டின் வளங்கள் மற்றும் உள்கட்டமைப்புகளுக்கும் எந்தப் பாதிப்பும் ஏற்படக்கூடாது என்றும் அவர் வலியுறுத்தினார்.

அனைத்துத் தரப்பினரும் பொதுமக்களைக் கொல்வதற்கு அசிரி கண்டனம் தெரிவித்தார். ரியாத்தில் நடந்த உயிரிழப்புகளையும், ஏமனில் முற்றுகைக்கு உள்ளான தைஸ் நகரம் மற்றும் ஹூத்திகளின் கட்டுப்பாட்டில் உள்ள சனா, ஹுதைதா நகரங்களில் நிகழ்ந்த உயிரிழப்புகளையும் அவர் சுட்டிக்காட்டினார்.

அவர் சார்ந்துள்ள நேஷனல் அசெம்ப்ளி பார்ட்டி, போரை முடிவுக்குக் கொண்டுவர வேண்டும் என்று கோரிக்கை விடுத்தது.

"அனைவரின் உயிரையும் ஆபத்தில் ஆழ்த்தியுள்ள இதுபோன்ற பொறுப்பற்ற முடிவுகளை எடுப்பதை செளதி தலைமை நிறுத்த வேண்டும்" என்று அந்தக் கட்சி வலியுறுத்தியது.

ஷியா சமூகத்தைச் சேர்ந்த அரசாங்க எதிர்ப்பாளரான அலி அல்-அஹ்மத்தும், போரை முடிவுக்குக் கொண்டுவருமாறு முகமது பின் சல்மானிடம் வேண்டுகோள் விடுத்தார்.

"இந்தப் போரை முடிவுக்குக் கொண்டு வாருங்கள், ஓர் உடன்பாட்டை எட்டுங்கள், உயிர்களைக் காப்பாற்றுங்கள்" என்று அவர் கூறினார்.

"இந்த நாடகத்தை நிறுத்துங்கள். போதும், இனியும் வேண்டாம். முற்றிலும் நம்பிக்கையிழந்தவர்கள்தான் உங்கள் பொய்களை நம்புவார்கள்" என்று எழுத்தாளரும் ஷியா செயற்பாட்டாளருமான ஃபுவாத் இப்ராஹிம் எக்ஸ் தளத்தில் பதிவிட்டார்.

அமெரிக்காவின் ஆதரவு, மெக்கா ஒப்பந்தம் குறித்து கேள்விகள்

இந்தப் போரில் அமெரிக்காவிடமிருந்து செளதி அரேபியாவுக்குக் கிடைத்து வரும் ஆதரவு போதுமானதாக இல்லை என்று செளதி அரசாங்கத்தின் எதிர்ப்பாளர்கள் விமர்சித்துள்ளனர்.

துருக்கி மற்றும் பாகிஸ்தானுடன் செளதி அரேபியா மேற்கொண்டுள்ள மெக்கா ஒப்பந்தத்தின் வரம்புகள் குறித்தும் அவர்கள் கேள்வி எழுப்பியுள்ளனர்.

நேட்டோ போன்ற பாதுகாப்புக் கூட்டணியாக இந்த ஒப்பந்தம் முன்வைக்கப்பட்டது. ஆனால், துருக்கியும் பாகிஸ்தானும் இதுவரை செளதி அரேபியாவுக்கு குறிப்பிடத்தக்க உதவிகளை வழங்கவில்லை என்று எதிர்ப்பாளர்கள் கூறுகின்றனர்.

முகமது பின் சல்மானை எதிர்க்கும் 'சவுத் அல்-நாஸ்' என்ற இணையதளம், இந்த ஒப்பந்தத்தை வெறும் 'வெளிக்காட்டல்' என்று விமர்சித்தது.

'பாதுகாப்புக்குப் பதிலாகப் பிரம்மாண்ட நிகழ்ச்சிகளுக்குச் செலவிடுவது'

சண்டை தீவிரமடைந்துவரும் நிலையில், முகமது பின் சல்மானின் உள்நாட்டுக் கொள்கை முன்னுரிமைகள் குறித்த கேள்விகளும் அதிகரித்துள்ளன.

பொழுதுபோக்கு மற்றும் பிரமாண்ட வளர்ச்சித் திட்டங்களுக்காகப் பெரும் தொகை செலவிடப்பட்டதாகவும், அதற்கான விலையை நாட்டின் பாதுகாப்பு பலவீனமடைந்ததன் மூலம் செலுத்த வேண்டிய நிலை ஏற்பட்டுள்ளதாகவும் எதிர்ப்பாளர்கள் கூறுகின்றனர்.

முகமது பின் சல்மானிடம் விளக்கம் கேட்பவர்களின் எண்ணிக்கையும் சமூக ஊடகங்களில் அதிகரித்துள்ளது.

'விஷன் 2030' திட்டத்துக்காக அவர் பல பில்லியன் டாலர்களை முதலீடு செய்தார்; ஆனால், நாட்டைப் பாதுகாக்கத் தவறிவிட்டார் என்று சில விமர்சகர்கள் கூறுகின்றனர்.

மனித உரிமைகள் அமைப்பான 'சனத்' அமைப்பின் தலைவர் சயீத் பின் நாசர் அல்-கம்தி, அக்டோபர் 11 அன்று எக்ஸ் தளத்தில் வெளியிட்ட பதிவில், முகமது பின் சல்மான்தான் ஏமன் போரைத் தொடங்கி, ஒட்டுமொத்த நாட்டையும் அதில் ஈடுபடுத்தியதாகக் குறிப்பிட்டார்.

அல்-கம்தி பிரிட்டனில் அரசியல் புகலிடம் கோரியுள்ளதாகச் செய்திகள் தெரிவிக்கின்றன.

"அதன்பிறகு, 2022-ஆம் ஆண்டில் ஹூத்திகளுடன் போர் நிறுத்த ஒப்பந்தத்தில் கையெழுத்திட்டுவிட்டு, பொழுதுபோக்கு நிகழ்ச்சிகள், நடன விருந்துகள், கற்பனையான திட்டங்கள் என அவர் கவனம் செலுத்தினார். அதேவேளையில், ஹூத்திகள் நீண்டகாலப் போருக்குத் தயாராகிக் கொண்டிருந்தனர்" என்று அவர் பதிவிட்டார்.

செளதி அரேபியாவில் கலாசார நிகழ்ச்சிகள், விளையாட்டுப் போட்டிகள், இசை நிகழ்ச்சிகள் ஆகியவற்றின் எண்ணிக்கை அதிகரித்து வருவதையும் பிற விமர்சகர்கள் சுட்டிக்காட்டியுள்ளனர். இதுபோன்ற நிகழ்ச்சிகள் ஏற்கெனவே பலமுறை சர்ச்சையை ஏற்படுத்தியுள்ளன.

இந்த நிகழ்ச்சிகள் இஸ்லாமிய விழுமியங்களுக்கு எதிரானவை என்று அப்பகுதியைச் சேர்ந்த சில சமூக ஊடகப் பயனர்கள் கூறினர்.

தேசிய பாதுகாப்புக்கு முன்னுரிமை அளிப்பதற்குப் பதிலாக, 'கலாசார நிகழ்ச்சிகளுக்கு' அரசு ஏன் அதிக முக்கியத்துவம் அளிக்கிறது என்றும் அவர்கள் கேள்வி எழுப்பினர்.

செளதி அரசின் எதிர்ப்புக் குழுவான 'செளதி பாஸ்', அந்நாட்டு அரசு "பாட்டுக்கும் நடனத்துக்கும் நாட்டின் கதவுகளைத் திறந்துவிட்டுள்ள நிலையில்", செளதி குடிமக்கள் "அச்சத்தில் வாழ்ந்து வருகின்றனர்" என்று கூறியது.

'இந்த நிகழ்ச்சிகள் நிறுத்தப்பட வேண்டும்'

'டுவர்ட்ஸ் ஃப்ரீடம்' என்ற பெயரிலான எக்ஸ் பக்கத்தில், இசை நிகழ்ச்சி ஒன்றின் காணொளி பகிரப்பட்டது. இந்தப் பக்கத்தை 12 லட்சம் பேர் பின்தொடர்கின்றனர்.

அந்தக் காணொளியில் சில பெண்கள் நடனமாடுவது இடம்பெற்றிருந்தது.

"ஹூத்திகளை எதிர்கொள்வதில் நீங்கள் உண்மையிலேயே தீவிரமாக இருந்தால், இதுபோன்ற நிகழ்ச்சிகள் நிறுத்தப்பட வேண்டும்" என்று அந்தப் பக்கம் பதிவிட்டது.

செளதி அரசாங்கத்தை எதிர்க்கும் பத்திரிகையாளர் துர்கி அல்-ஷல்ஹூப், எக்ஸ் தளத்தில் தன்னைப் பின்தொடரும் 17 லட்சம் பேரிடம், "செளதி அரேபியா உண்மையான ராணுவ சவாலை எதிர்கொண்டவுடன், பாதுகாப்புத் துறை தொடர்பான வாக்குறுதிகள் காணாமல் போய்விட்டன" என்று கூறினார்.

"இந்தத் துறைக்காக ஒதுக்கப்பட்ட பல பில்லியன் டாலர்கள் எங்கே சென்றன?" என்றும் அவர் கேள்வி எழுப்பினார்.

பாதுகாப்பு அமைப்பின் தோல்வி என்று அரசாங்க எதிர்ப்பாளர்கள் கூறும் இந்தச் சம்பவங்கள், செளதி அரசாங்கத்தைப் பதவியிலிருந்து அகற்ற வேண்டும் என்ற கோரிக்கையைச் சிலர் மேலும் தீவிரப்படுத்தக் காரணமாகியுள்ளன.

'இந்தப் போரால் இஸ்ரேல் பயனடைந்துள்ளது'

ஹூத்திகளுக்கு எதிரான செளதி அரேபியாவின் போரால் இஸ்ரேல் பயனடைந்துள்ளதாக அந்நாட்டு அரசாங்கத்தின் எதிர்ப்பாளர்களில் சிலர் கூறுகின்றனர்.

அமெரிக்க அதிபர் டொனால்ட் டிரம்ப், அக்டோபர் 16 அன்று, இஸ்ரேலின் உதவியைப் பெறுவதில் செளதி அரேபியா "மிகவும் மகிழ்ச்சியாக" இருப்பதாகக் கூறினார். இரு நாடுகளுக்கும் இடையே உறவுகளை இயல்பாக்குவதற்கான சாத்தியம் குறித்த பேச்சுகள் "இதுவரை இல்லாத அளவுக்கு அதிகமாக நடைபெற்று வருகின்றன" என்றும் அவர் தெரிவித்தார்.

அமெரிக்காவில் வசிக்கும் ஆய்வாளரும் நேஷனல் அசெம்ப்ளி பார்ட்டி உறுப்பினருமான அப்துல்லா அல்-ஓடா, "உறவுகளை இயல்பாக்குவது துரோகம்" என்ற ஹேஷ்டேக்குடன் அந்தக் காணொளியை எக்ஸ் தளத்தில் பகிர்ந்தார்.

இந்தப் போரில் அமெரிக்கா எந்தப் பங்கையும் வகிப்பதை அவர் எதிர்த்தார்.

இந்தப் போருக்கான 'விலையை' செளதி அரேபிய மக்களும் அந்நாட்டின் உள்கட்டமைப்புகளும் செலுத்தி வருவதாக அல்-ஓடா கூறினார்.

செளதி அரேபியா நடன நிகழ்ச்சிகளுக்கும் கால்பந்து மைதானங்களுக்கும் பல பில்லியன் டாலர்களைச் செலவிட்டதாக அல்-கம்தி எக்ஸ் தளத்தில் பதிவிட்டார். ஹூத்திகளின் தாக்குதல்கள் தொடங்கியபோது இஸ்ரேலின் உதவியை நாட வேண்டிய நிலை ஏற்பட்டதற்கு இதுவே காரணம் என்றும் அவர் கூறினார்.

அக்டோபர் 11 அன்று வெளியிட்ட பதிவில், "போரைத் தூண்டுபவர்கள்" பிராந்தியத்தின் நிலைத்தன்மையைச் சீர்குலைத்து, "இஸ்ரேலை வலுப்படுத்துவார்கள்" என்றும் யஹ்யா அசிரி குறிப்பிட்டார்.

'செளதி லீக்ஸ்' என்ற இணையதளமும் செளதி அரேபியாவுக்கும் இஸ்ரேலுக்கும் இடையிலான உறவு நெருக்கமடைவதற்கான சாத்தியம் குறித்துப் பேசியுள்ளது.

ஏமனில் ஹூத்திகளுக்கு எதிராக அண்மையில் நடத்தப்பட்ட நடவடிக்கையிலும் இஸ்ரேல் ஈடுபட்டிருந்ததாக அந்த இணையதளம் கூறியுள்ளது.

'விஷன் 2030' திட்டத்துக்கு இதனால் என்ன தாக்கம் ஏற்படக்கூடும்?

2030-ஆம் ஆண்டு நெருங்கும் நிலையில், முகமது பின் சல்மானின் பொருளாதாரத் திட்டத்துக்கு முன்னால் பல முக்கியத் தடைகள் தென்படுகின்றன.

எண்ணெய் வளத்தைச் சார்ந்திருக்கும் செளதி அரேபியாவின் பொருளாதாரத்தை மாற்றியமைப்பதே 'விஷன் 2030' திட்டத்தின் முக்கிய நோக்கமாகும்.

இந்தத் திட்டம் வெற்றிபெற, நாட்டில் நிலைத்தன்மை நிலவுவதும் முதலீட்டாளர்களின் நம்பிக்கையைப் பெறுவதும் அவசியம் என்று செளதி அரசாங்கத்தின் எதிர்ப்பாளர்கள் கூறுகின்றனர். ஆனால், பிராந்தியத்தில் தொடர்ந்து நடைபெறும் போர் இந்த இரண்டின் மீதும் கேள்விகளை எழுப்பியுள்ளது.

செளதி அரேபியாவைச் சேர்ந்த பிரிட்டன் பேராசிரியர் மதாவி அல்-ரஷீத், 'விஷன் 2030' திட்டத்தை மேற்கத்திய ஆய்வாளர்கள் பாராட்டி வந்ததாகவும், ஆனால் செளதியின் பொருளாதாரக் கனவு இப்போது கடந்தகாலக் கனவாகிவிட்டதாகவும் எக்ஸ் தளத்தில் பதிவிட்டார்.

லண்டனில் வசிக்கும் 'அரேபியாவில் இஸ்லாமிய சீர்திருத்த இயக்கம்' அமைப்பின் தலைவர் மற்றும் அல்-இஸ்லா ஊடகத்தின் நிகழ்ச்சித் தொகுப்பாளரான சஅத் அல்-ஃபகீஹ், மேற்கத்திய ஊடகங்கள் இப்போது செளதி தலைமையைப் பார்த்து "கிண்டல் செய்கின்றன" என்று கூறினார்.

எதிர்ப்பாளர்கள் மீதான கட்டுப்பாடுகள் அதிகரிப்பதாகக் குற்றச்சாட்டு

சமீபத்திய பதற்றங்களுக்கு மத்தியில், செளதி அரேபியாவில் அரசாங்கத்தை விமர்சிக்கும் சிலரின் சமூக ஊடகக் கணக்குகள் முடக்கப்பட்டுள்ளதாகவும் செய்திகள் வெளியாகியுள்ளன.

'தி கார்டியன்' நாளிதழின் செய்தியின்படி, கடந்த ஆகஸ்ட் மாதத்தில் செளதி அரசாங்கத்தை எதிர்க்கும் 60-க்கும் மேற்பட்டோரின் எக்ஸ் கணக்குகள் முடக்கப்பட்டன.

இதற்கு முன்னதாக, மே மாதத்தில், இரான் போர் குறித்த செய்திகளை வெளியிடுவதற்கு விதிக்கப்பட்டுள்ள கட்டுப்பாடுகளை நீக்குமாறு வளைகுடா நாடுகளின் அரசுகளிடம் பத்திரிகையாளர்களைப் பாதுகாக்கும் குழு வலியுறுத்தியது.

செளதி அரேபியாவில், "முக்கியத்துவம் வாய்ந்த அரசியல் விவகாரங்கள் குறித்து செய்தி வெளியிடுவது தேசியப் பாதுகாப்புக்கு எதிரான குற்றமாகக் கருதப்படுகிறது" என்று அந்த அமைப்பு தெரிவித்தது.

அதே மாதத்தில், பிரிட்டனைத் தளமாகக் கொண்டு செயல்படும் மனித உரிமைகள் அமைப்பான சனத், அரசாங்க எதிர்ப்புக் குழுக்களின் டிக்டாக், ஸ்னாப்சாட் மற்றும் மீட்டியர் கணக்குகளை செளதி அதிகாரிகள் முடக்கியுள்ளதாகக் கூறியது.

இந்தக் கட்டுப்பாடுகளை எக்ஸ் தளத்துக்கும் விரிவுபடுத்த அதிகாரிகள் முயற்சிப்பதாக அந்த அமைப்பு குற்றம்சாட்டியது.

அக்டோபரில் ஹூத்திகள் செளதி அரேபியாவின் உள்கட்டமைப்புகள் மீது தாக்குதல் நடத்திய நிலையில், பிரிட்டனில் வசிக்கும் அரசாங்க எதிர்ப்புச் செயற்பாட்டாளரும் நகைச்சுவைக் கலைஞருமான கானிம் அல்-தோசரி, தனது எக்ஸ் கணக்கை செளதி அரசு முடக்கியதாகக் குற்றம்சாட்டினார்.

கிங் காலித் சர்வதேச விமான நிலையம் மீது ஹூத்திகள் நடத்திய தாக்குதலில் பாதிக்கப்பட்டவர்கள் குறித்து தான் பதிவிட்டதாகவும், அதற்குப் பிறகு தனது கணக்கு முடக்கப்பட்டதாகவும் அவர் கூறினார்.

"ஆனாலும், ஹூத்திகளின் ஏவுகணைகளையும் ஆளில்லா விமானங்களையும் செளதி அரேபியாவால் தடுக்க முடியவில்லை" என்று அவர் கிண்டலாகக் குறிப்பிட்டார்.

- இது, பிபிசிக்காக கலெக்டிவ் நியூஸ்ரூம் வெளியீடு