சென்னையில் தீபாவளிக்கு பின்பும் காற்று மாசு நீடிப்பது ஏன்? வானிலையின் பங்கு குறித்து நிபுணர்கள் விளக்கம்
பட மூலாதாரம், Getty Images
சென்னையில் தீபாவளி பண்டிகையையொட்டி காற்று மாசு அதிகமாக பதிவாகியிருந்தது. பட்டாசு வெடித்ததன் புகையோடு, குளிரான வானிலையும் இணைந்து நிலைமையை மோசமாக்கியுள்ளன. இதன் காரணமாக தீபாவளி முடிந்த மறு நாள் காலையிலும் சில பகுதிகளில் காற்றின் தரம் குறைவாகவே இருந்தது.
தீபாவளி நாளான ஞாயிற்றுகிழமை அதிகாலை முதலே மழை பெய்தது. மழை காரணமாக பட்டாசு வெடிப்பது சில மணி நேரங்கள் நிறுத்தப்பட்டாலும், மழை விட்டதும் மீண்டும் பட்டாசு வெடிப்பது தொடங்கியது.
சென்னையில் ஞாயிற்றுகிழமை படிப்படியாக உயர்ந்த காற்று மாசின் அளவு, மாலையில் பட்டாசு அதிக அளவில் வெடிக்க தொடங்கிய போது, மத்திய மாசு கட்டுப்பாட்டு வாரிய தரவுகள்படி , பல இடங்களில் 500 என்ற அளவை தாண்டியது (மத்திய மாசு கட்டுப்பாட்டு வாரியத்தின் காற்று தர குறியீடு 500 என்ற அதிகபட்ச அளவை கொண்டுள்ளது).
காற்று தர குறியீட்டின் அளவு 50க்கு உள்ளாக இருந்தால் காற்றின் தரம் நன்றாக இருக்கிறது என்று கணிக்கப்படுகிறது. இந்த குறியீட்டின் அளவு அதிகரிக்க, அதிகரிக்க காற்றின் தரம் குறைந்து மாசு அதிகரித்துள்ளது என்று அர்த்தம்.
சென்னையில் தீபாவளி நாளன்று இரவு 9 மணியளவில் காற்று தரக் குறியீடு ஆயிரத்தை தாண்டியதாக இருந்ததாக தனியார் மாசு கண்காணிப்பு தரவுகள் தெரிவித்தன.
புகை மூட்டம் காரணமாக 20க்கும் மேற்பட்ட விமானங்கள் திட்டமிட்ட நேரத்தில் இயக்கப்படவில்லை.
பட மூலாதாரம், Getty Images
காற்று மாசு அதிகரிக்க பட்டாசு அதிக அளவில் வெடிக்கப்பட்டதே முதல் காரணம். எனினும் குளிரான வானிலை நிலவியது நிலைமையை மேலும் மோசமாக்கியுள்ளது என நிபுணர்கள் கூறுகின்றனர்.
குளிரான வானிலையில் புகை நீண்ட நேரம் காற்றில் தங்கி நிற்கும். இதற்கு முக்கிய காரணம், அப்போது நிலத்துக்கு அருகிலுள்ள காற்று அடுக்குகள் மிகவும் அமைதியாகவும் நிலைத்ததாகவும் இருப்பதுதான். இந்த நிலை உருவானால், வாகனங்கள், தொழிற்சாலைகள் அல்லது தீயினால் வெளியேறும் புகை மேலே எழ முடியாமல் தரைக்கு அருகிலேயே சிக்கிக் கொள்கிறது. மூடுபனியில் உள்ள சிறிய நீர்த்துளிகளுடன் புகைத் துகள்கள் கலந்து, காற்று இன்னும் மாசடையும்.
மாறாக, காற்று பலமாக வீசும் சூழலில் புகை ஓர் இடத்தில் குவிய முடியாது.
"காற்றின் ஓட்டம் புகையை அதன் மூல இடத்திலிருந்து வேகமாக வேறு பகுதிகளுக்கு எடுத்துச் செல்கிறது. அதே நேரத்தில், மேலேயும் கீழேயும் உள்ள காற்று அடுக்குகள் ஒன்றுடன் ஒன்று கலப்பதால் புகையின் அடர்த்தி குறைகிறது" என்று பூவுலகின் நண்பர்கள் அமைப்பைச் சேர்ந்த சுந்தரராஜன் கூறுகிறார்.
எளிமையாகச் சொன்னால், மூடுபனி மற்றும் அமைதியான வானிலை புகையை "பிடித்து வைத்துக்கொள்ளும்". ஆனால் காற்றோட்டம் அதிகமாக இருக்கும் சூழல் புகையை "பரவச் செய்து மங்கச் செய்யும்".
பட மூலாதாரம், Getty Images
தமிழ்நாடு மாசு கட்டுப்பாடு வாரிய தரவுகளின்படி சென்னை மணலியில் காற்றின் தர குறியீடு 247ஆக, தீபாவளிக்கு மறுநாள் மாலை 4 மணி நிலவரப்படி பதிவாகியுள்ளது. அரும்பாக்கத்தில் 215, கொடுங்கையூரில் 198, ராயபுரத்தில் 173, வேளச்சேரியில் 172, பெருங்குடியில் 170, எனவும் காற்றின் தர குறியீடு பதிவாகியிருந்தது.
வடக்கு திசை காற்று வீசியதால், சென்னையில் புகை ஒரே பகுதியில் குவிய தொடங்கியது என்கிறார் தனியார் வானிலை ஆய்வாளர் ஶ்ரீகாந்த்.
"வடக்கு திசை காற்று வீசும் போது, அது நிலத்தின் உட்புற பகுதிகளை நோக்கி வீசாது. எனவே, சென்னை பகுதியிலேயே காற்று மாசு குவிந்திருப்பதற்கு இது உதவியாக இருந்தது. மேலும் வெப்பநிலை புரட்டமும் (Temperature Inversion) இதற்கு காரணமாக அமைந்திருக்கலாம். தரைக்கு அருகில் குளிர்ந்த காற்றும் அதற்கு மேலே வெப்பமான காற்றும் இருப்பது வெப்பநிலை புரட்டம் எனப்படும். இப்படியான நிலையில் காற்று மாசு அதே இடத்தில் தங்கிவிடும். டெல்லியில் காற்று மாசு அதிகரிக்க இதுவே காரணமாகும்" என்கிறார் ஶ்ரீகாந்த்.
பட மூலாதாரம், Getty Images
வானிலை ஆய்வு மையம் திங்கள்கிழமை வெளியிட்டுள்ள அறிக்கையின்படி, தீபாவளியன்று காலை 8.30 மணி முதல் மறு நாள் காலை 8.30 மணியளவிலான 24 மணி நேரத்தில், சென்னையில் அதிகபட்சமாக 28.3 டிகிரி செல்சியஸ் பதிவாகியிருந்தது.
இது வழக்கமான வெப்பநிலையை விட இரண்டு டிகிரி செல்சியஸ் குறைவாகும். அடுத்த இரண்டு நாட்களுக்கு, சென்னையில் அதிகபட்ச வெப்ப நிலை 32-33டிகிரி செல்சியஸாகவும், குறைந்தபட்ச வெப்பநிலை 24-25டிகிரி செல்சியஸாகவும் இருக்கும் என்று தெரிவித்துள்ளது.
மேலும், சென்னை மற்றும் அதையொட்டியுள்ள பகுதிகளில் வானம் மேக மூட்டத்துடன் காணப்படும் என்றும், நகரின் சில இடங்களில் லேசான மழை பெய்ய வாய்ப்புண்டு என்றும் தெரிவிக்கப்பட்டுள்ளது.
"அடுத்த இரண்டு மூன்று நாட்களுக்கு வடக்கு திசை காற்றே வீசக்கூடும். அதன் பிறகே கிழக்கு திசை காற்று வீச தொடங்கும். வட திசை காற்று வீசும் என்பதால் காற்றின் தரக் குறியீடு மோசமாக இருக்கவே வாய்ப்புள்ளது. பொதுவாக வடக்கு திசை காற்று வீசும் போது, காற்று மாசு அதிகமாக இருக்கும்." என்கிறார் அவர்.
- இது, பிபிசிக்காக கலெக்டிவ் நியூஸ்ரூம் வெளியீடு
