உணவுக் கழிவுகளை 97% குறைத்த தென் கொரியா: நூதன முயற்சியால் சாதித்தது எப்படி? உலக நாடுகள் கற்றுக் கொள்ள வேண்டியது என்ன?

தென் கொரியா, குப்பை மேடுகளுக்குச் செல்லும் வீட்டு உணவு வீணடிப்பை 97%இல் இருந்து கிட்டத்தட்ட பூஜ்ஜியமாக குறைத்துள்ளது. நியூயார்க் நகரமும் தற்போது எஞ்சிய உணவுகளை அதே வழியில் அனுப்பத் தொடங்கியுள்ளது.

தென் கொரியாவின் சியோலில் உள்ள யோயிடோவில் ஒரு சனிக்கிழமை பிற்பகலில், சுங்ஹவான் ஹாங் தனது வாராந்திர காய்கறி குப்பை, பழத்தோல்கள், மீதமான சாதம் ஆகியவற்றைச் சேகரித்துத் தனது குடியிருப்பு வளாகத்தில் உள்ள உணவு வீணடிப்பு அகற்றும் பிரிவை நோக்கிக் கீழே செல்கிறார். அவர் தனது கார்டை ஸ்கேனரில் தட்டுகிறார், மூடி திறக்கிறது, எஞ்சிய உணவுகளின் எடை திரையில் காட்டப்படுகிறது, மேலும் அதற்கான கட்டணம் அவரது வீட்டுப் பராமரிப்புக் கணக்கில் சேர்க்கப்படுகிறது.

இந்த நடவடிக்கை முடிவடைய ஒரு நிமிடத்திற்கும் குறைவாகவே ஆகிறது. ஆனால் இதன் பின்னணியில் உலகின் மிகவும் லட்சியமிக்க கழிவு மேலாண்மை பரிசோதனைகளில் ஒன்று உள்ளது. வீடுகளில் உணவு வீணாவதைத் தடுக்கும் முயற்சியில் தென் கொரியா உலகின் பிற நாடுகளைவிட வெகுதூரம் முன்னேறி வெற்றி பெற்றுள்ளது. இன்று, அமெரிக்கா, தென் கொரியாவின் வெற்றியைப் பின்பற்றுவதற்கான முதல் அடியை எடுத்து வருகிறது.

உணவு வீணாவது என்பது உலகளாவிய பிரச்னை. அமெரிக்காவில், நான்கு பேரைக் கொண்ட ஒரு குடும்பம் வாரத்திற்கு சுமார் 56 அமெரிக்க டாலர்கள் மதிப்பிலான உணவை வீணடிக்கிறது. உலகளவில், ஆண்டுதோறும் ஒரு பில்லியனுக்கும் அதிகமான டன் உணவு வீணாகிறது, இது புவி வெப்பமயமாதலை உண்டாக்கும் உலகளாவிய பசுமை இல்ல வாயு உமிழ்வுகளில் 10% பங்களிக்கிறது.

தென் கொரியாவின் 30 ஆண்டுக்கால கழிவு மேலாண்மை முயற்சிகள்

இருபதாம் நூற்றாண்டில் அதிவேக நகரமயமாக்கலால் ஏற்பட்ட கழிவு நெருக்கடியே தென் கொரியாவின் இந்தத் தீர்வுக்குக் காரணமானது. உணவுப் பொருட்கள் பொதுவான கழிவுகளுடன் தூக்கி எறியப்பட்ட இடங்களில், குப்பை மேடுகள் மற்றும் சுகாதாரப் பிரச்னைகள் அதிகளவில் இருந்தன.

கடந்த 1990களில் இருந்து நாட்டின் உணவுக் கழிவு மேலாண்மையில் செய்யப்பட்ட மாற்றங்களின் கூட்டு விளைவு குறிப்பிடத்தக்கதாக உள்ளது. 1996இல் வெறும் 2.6% ஆக இருந்த தென் கொரியாவின் உணவுக் கழிவு மறுசுழற்சி விகிதம், 2023 இல் கிட்டத்தட்ட 97% ஆக உயர்ந்தது.

குடிமக்களுக்கு மிகவும் வெளிப்படையாகத் தெரிந்த மாற்றங்களில் ஒன்று, ஹாங் தனது வாராந்திர உணவுப் பொருட்களுக்காகப் பயன்படுத்தும் ரேடியோ-ஃப்ரிக்வென்சி ஐடென்டிஃபிகேஷன் ஸ்கேனர்கள் பொருத்தப்பட்ட ஸ்மார்ட் குப்பைத் தொட்டிகளாகும். 2025ஆம் ஆண்டுக்கான அரசாங்கத் தரவுகள், நாடு முழுவதும் 1,51,934 ஸ்மார்ட் தொட்டிகள் பயன்பாட்டில் உள்ளதாகவும், இவை 8.61 மில்லியனுக்கும் அதிகமான குடும்பங்களுக்குச் சேவை செய்வதாகவும் காட்டுகின்றன.

"என் வீட்டில் வீணாகும் உணவுக் கழிவுகளின் எடையையும் அதற்கான செலவையும் பார்க்கும்போது, ​​நான் எவ்வளவு உணவை வீணடிக்கிறேன் என்பது குறித்து எனக்கு அதிக விழிப்புணர்வு ஏற்பட்டது" என்று ஹாங் கூறுகிறார்.

குப்பை மேடுகளுக்குச் செல்லும் உணவால் ஏற்படும் வாயு உமிழ்வைக் குறைப்பது மட்டுமின்றி, இந்த எஞ்சிய உணவுகள் ஆற்றல் ஆதாரமாக மாறி புதைபடிவ எரிபொருட்களின் தேவையைக் குறைக்க உதவுகின்றன.

தென் கொரியா உணவக் கழிவுகளை எவ்வாறு கையாள்கிறது?

ஹாங் மற்றும் அவரைப் போன்ற லட்சக்கணக்கான மக்களின் உணவுக் கழிவுகள் மற்றும் பிற சமையலறைக் கழிவுகள், அவற்றை மின்சாரமாக மாற்றும் நிலையங்களுக்கு அனுப்பப்படுகின்றன.

குப்பைமேடுகளில் கொட்டுவதைவிட இது காலநிலைக்கு உகந்த ஒரு தீர்வாகும். கரிமக் கழிவுகள் குப்பை மேடுகளில் புதைக்கப்படும்போது, அவை ஆக்சிஜன் இன்றி சிதைந்து மீத்தேன் வாயுவை வெளியிடுகின்றன. இந்த மீத்தேன், 20 ஆண்டுக் காலத்தில் கரிம வாயுவைவிட 80 மடங்கு அதிக வெப்பத்தைத் தக்கவைக்கும் திறன் கொண்ட ஒரு பசுமை இல்ல வாயுவாகும். மேலும், இந்தக் கழிவுகள் 'லீச்சேட்' எனப்படும் அடர் நிறமுள்ள, நச்சுத்தன்மை வாய்ந்த திரவத்தையும் வெளியிடுகின்றன. இது மண்ணில் ஊடுருவி நிலத்தடி நீரை மாசுபடுத்தக்கூடும்.

உணவுக் கழிவுகள் உயிரியல் உலைக்கு அனுப்பப்படும்போது, ​​இந்த மீத்தேன் வாயுவைச் சேகரித்து எரிபொருளாகப் பயன்படுத்த முடியும். இதன் விளைவாக காலநிலை மாற்றத்தை ஏற்படுத்தும் கார்பன் டை ஆக்சைட் உருவானாலும், அதிக வீரியம் கொண்ட மீத்தேன் வளிமண்டலத்தில் கலப்பது தடுக்கப்படுகிறது.

மத்திய தென் கொரியாவில் உள்ள டேஜியோன் பயோ எனர்ஜி மையம், தனக்குக் கிடைக்கும் கழிவுகளில் 70-75% அளவை ஆற்றலாக மாற்றுகிறது. இது சுமார் 6,000 தென் கொரிய குடும்பங்களின் அன்றாடத் தேவையைப் பூர்த்தி செய்யக்கூடிய மின்சாரத்தை உற்பத்தி செய்கிறது. தென் கொரியா முழுவதும் இதுபோன்ற 340க்கும் மேற்பட்ட நிலையங்கள் உள்ளன.

இந்த ஆலைகளில் இருந்து உற்பத்தி செய்யப்படும் ஆற்றல், புதைபடிவ எரிபொருட்களின் தேவையைக் குறைக்கிறது. 2024ஆம் ஆண்டில், 2026ஆம் ஆண்டுக்குள் தோராயமாக 230 பில்லியன் கொரிய வோன் (170 மில்லியன் அமெரிக்க டாலர்) மதிப்பிலான புதைபடிவ எரிபொருட்களை மாற்றீடு செய்ய அரசாங்கம் இலக்கு வைத்திருந்தது.

இருப்பினும், இன்னும் சவால்கள் உள்ளன. இம்முறையைச் செயல்படுத்துவதற்கான செலவு மிக அதிகம். வீட்டுக் கழிவு மேலாண்மைக்கான கட்டணங்கள் செயல்பாட்டுச் செலவுகளுக்குப் பங்களித்தாலும், உணவுக் கழிவுகள் உள்பட நகராட்சி சார்ந்த கழிவுகளை நிர்வகிக்க அரசாங்கம் 600 பில்லியன் கொரிய வான் (430 மில்லியன் அமெரிக்க டாலர்) தொகைக்கும் அதிகமாகச் செலவிடுகிறது.

"உணவுக் கழிவு மறுசுழற்சியில் தென்கொரியா குறிப்பிடத்தக்க முன்னேற்றம் கண்டுள்ளது, ஆனால் நாம் இப்போது முக்கியமான கட்டத்தில் இருக்கிறோம். புதிய தொழில்நுட்பங்களும் கொள்கைகளும் இந்த முன்னேற்றத்தை மேலும் முன்னெடுத்துச் செல்ல உதவுகின்றன," என்கிறார் கொரிய சுற்றுச்சூழல் நிறுவனத்தின் மூத்த ஆராய்ச்சி ஆய்வாளர் முன்சோல் ஜூ.

நியூயார்க் எதிர்கொள்ளும் சவால்கள்

தென்கொரியாவை முன்மாதிரியாகக் கொண்டு, நியூயார்க் நகரில் 2024 அக்டோபரில் குடியிருப்பாளர்கள் உணவுக் கழிவுகளைத் தனித் தனியாகப் பிரிப்பதைக் கட்டாயமாக்கியது. குடியிருப்பாளர்கள் உணவுக் கழிவுகளை அதற்கென ஒதுக்கப்பட்ட தொட்டியிலோ அல்லது மூடி பாதுகாப்பாகப் பொருத்தப்பட்ட, அடையாளக் குறியிடப்பட்ட கொள்கலனிலோ தனியாகப் பிரித்து வைக்க வேண்டும். அவற்றை மறுசுழற்சிக்கான பொருட்களுடன் சேர்த்து, சாலையோரக் கழிவு சேகரிப்புக்காக வெளியே வைக்க வேண்டும்.

இந்தத் திட்டம் கிட்டத்தட்ட 3.4 மில்லியன் வீடுகளை உள்ளடக்கியுள்ளது. இது அமெரிக்காவின் மிகப் பெரிய கரிமக் கழிவு மீட்பு முயற்சி. ஆனால், பல குடியிருப்பாளர்கள் உணவுக் கழிவுகளைத் தொடர்ந்து பிரிக்காததால், விதிமுறைகளைப் பின்பற்றுவது சவாலாக உள்ளது.

ஸ்மார்ட் கம்போஸ்டிங் தொட்டிகள் என்பது நியூயார்க் நகரவாசிகள் 24 மணிநேரமும் உணவு மற்றும் தாவரக் கழிவுகளைக் கொண்டு வந்து உரமாக்கவும் மறுபயன்பாட்டிற்கானதாக மாற்றுவதற்குமான இடங்களாகும்.

கட்டாயமாக்கப்பட்ட 'வீட்டு உணவுக் கழிவு சேகரிப்பு மற்றும் உரமாக்கும் திட்டத்தைத்' தவிர, உணவு உரமாக்கலை மேலும் சுலபமாக்குவதற்காக நியூயார்க் நகரம் ஐந்து மண்டலங்கள் முழுவதும் 400க்கும் மேற்பட்ட ஸ்மார்ட் உரமாக்கல் தொட்டிகளை அமைத்துள்ளது. வீடுகளில் இருந்து வாரந்தோறும் சேகரிக்கப்படும் பிரத்யேக தொட்டிகளைப் போலன்றி, சூரிய சக்தியில் இயங்கும் இந்தத் தொட்டிகளை மொபைல் செயலி மூலம் 24 மணிநேரமும் இலவசமாகப் பயன்படுத்த முடியும்.

"இந்தத் தொட்டிகள் இருப்பது எனக்கு மிகவும் பிடித்திருக்கிறது. ஏனென்றால் இது உரமாக்குதலை மிகவும் வசதியானதாக மாற்றுகிறது," என்கிறார் மேன்ஹேட்டனின் ஈஸ்ட் வில்லேஜில் வசிக்கும் கிரேஸ் ஃபூ.

இருப்பினும், இந்தத் தொட்டிகளைப் பயன்படுத்துவதில் சில நடைமுறைச் சவால்களும் உள்ளன. "உணவுக் கழிவுகள் இருப்பதால் எங்கள் அடுக்குமாடிக் குடியிருப்புக்கு அருகில் எலிகள் மிக அதிகமாக வந்துவிட்டன. எனவே, நாங்கள் எங்கள் தொட்டியைக் கட்டடத்திற்குள் நகர்த்த வேண்டியதாயிற்று. அடிக்கடி கழிவுகளைச் சுத்தம் செய்தால் உதவியாக இருக்கும்," என்கிறார் ஃபூ.

கடந்த 2025ஆம் ஆண்டில், நியூயார்க் நகர சுகாதாரத் துறை, அந்நகரின் குடியிருப்புப் பகுதிகளில் இருந்து உருவாகும் சுமார் 140,000 டன் மக்கும் கழிவுகளைக் கையாண்டது. இது, வீடுகளில் ஆண்டுதோறும் உருவாகும் ஏறத்தாழ 1.5 மில்லியன் டன் கழிவுகளில் ஏறக்குறைய 9%. இது முந்தைய ஆண்டுகளைவிட கணிசமான உயர்வு, ஆனால் தென் கொரியாவின் 97% என்ற இலக்கை அடைய நியூயார்க் இன்னும் நீண்ட தூரம் செல்ல வேண்டியுள்ளது.

சேகரிக்கப்பட்ட வீட்டு உணவுக் கழிவுகள், மாவட்டத்தில் உள்ள இரு இடங்களில் ஒன்றுக்கு அனுப்பப்படுகின்றன. அவை ஸ்டேட்டன் தீவு கம்போஸ்ட் மையத்திற்குக் கொண்டு செல்லப்பட்டு உரமாக்கப்படுகின்றன. மீதமுள்ளவை ப்ரூக்ளினில் உள்ள நியூடவுன் க்ரீக் கழிவுநீர் வள மீட்பு மையத்தில் கழிவுநீர் சேற்றுடன் சேர்த்து செரிக்கும் செயல்முறைக்கு உட்படுத்தப்பட்டு, உயிரி வாயு மற்றும் உயிரி திடப் பொருட்கள் உற்பத்தி செய்யப்படுகின்றன.

நியூயார்க் நகரவாசிகளில் சுமார் 70% பேர் அடுக்குமாடி குடியிருப்புகளில் வசிப்பதால், தென் கொரியாவின் அணுகுமுறை இங்கு சாத்தியப்படக்கூடிய ஒன்று என்கிறார் கொலம்பியா காலநிலை பள்ளியின் நிலைத்தன்மை மேலாண்மை திட்டத்தின் இயக்குநர் ஸ்டீவன் கோஹன்.

"தென் கொரியாவின் ஆர்.எஃப்.ஐ.டி தொட்டிகள் குடிமக்களில் ஒவ்வொருவரையும் தங்கள் சொந்த கரிமக் கழிவுகளுக்கு நேரடியாகப் பொறுப்பேற்கச் செய்யக்கூடும். ஒரு வட்டப் பொருளாதாரத்தில், கரிமக் கழிவுகள் தனித் தனியாகப் பிரிக்கப்பட்டு, மறுசுழற்சி செய்யப்பட்டு, ஆற்றலாக மீண்டும் பயன்படுத்தப்பட வேண்டும்," என்கிறார் கோஹன்.

உணவுக் கழிவு மேலாண்மையில் நியூயார்க் இன்னும் மிகவும் நீண்ட தூரம் செல்ல வேண்டியுள்ளது. "இந்த நகரத்தில் உள்ள பெரும்பாலான மக்கள் இன்னும் தங்கள் வீட்டுக் குப்பையை மக்கும் கழிவு மற்றும் மக்காத கழிவு என முறையாகப் பிரிப்பதில்லை என்பதே பிரச்னை" என்று கூறும் கோஹன், உணவுக் கழிவு மறுசுழற்சியின் முக்கியத்துவம் தொடர்பான சிறந்த விழிப்புணர்வும், அதற்கான ஊக்குவிப்புகளும் மக்களின் பங்களிப்பை அதிகரிக்கும் என்றும் கூறுகிறார்.

சியோலின் யோயிடோவில், தனது காலியான உணவுக் கழிவுத் தொட்டியை எடுத்துக்கொண்டு தனது அடுக்குமாடி குடியிருப்புக்குத் திரும்புகிறார் ஹாங். கழிவு அகற்றும் பிரிவின் திரை ஏற்கெனவே இருண்டுவிட்டது. இது அவர்களின் அன்றாடச் செயல்களில் ஒன்றாக மாறியுள்ளது.

"உணவுக் கழிவுகளைக் கட்டுப்படுத்துவது நம் அனைவரின் கூட்டுப் பொறுப்பு" என்கிறார் ஹாங்.

- இது, பிபிசிக்காக கலெக்டிவ் நியூஸ்ரூம் வெளியீடு