பிரதமர் பதவியை ஏற்க மறுத்தது ஏன்? ராகுல் கோபப்பட்டது ஏன்? சுயசரிதையில் சோனியா காந்தி பதில்

காங்கிரஸ் மூத்த தலைவர் சோனியா காந்தி, தனது சுய சரிதைப் புத்தகமான 'உரிமை உணர்வு: அன்பின் ஒரு பயணம்' (Belonging: A Journey of Love) குறித்து எக்ஸ் சமூக ஊடகத் தளத்தில் பதிவு ஒன்றை வெளியிட்டுள்ளார்.

அதில், "திடீரென என் மனதில் எஞ்சியிருந்த சந்தேகங்கள் அனைத்தும் மறைந்துவிட்டன. 'சோனியா, உனக்கு நீயே நேர்மையாக இரு. இது உனக்கு எப்போதுமே தெரியும். இதை விட்டுவிடு' என்று எனக்கு நானே சொல்லிக்கொண்டதை உணர்ந்தேன்" என்று குறிப்பிட்டுள்ளார்.

தனது வாழ்க்கையில் நடந்த பல்வேறு சம்பவங்களை சோனியா காந்தி தனது புத்தகத்தில் நினைவுகூர்ந்துள்ளார். அவை தற்போது அதிகம் விவாதிக்கப்பட்டு வருகின்றன.

2004ஆம் ஆண்டு மன்மோகன் சிங் பிரதமராகப் பதவியேற்றது இந்திய அரசியலில் முக்கியத் திருப்பமாக அமைந்தது.

அப்போது காங்கிரஸ் கட்சியை வழிநடத்தி வந்த சோனியா காந்தி, நாட்டின் பிரதமராகப் பதவியேற்கக்கூடும் என்ற பேச்சும் எழுந்தது.

அந்தக் காலகட்டத்தில் காங்கிரஸ் தொண்டர்கள் பலரும் சோனியா காந்தி பிரதமராக வேண்டும் என்று விரும்பினர். மறுபுறம், தேர்தலில் ஆட்சியை இழந்த பாஜகவும் அதன் தலைவர்கள் பலரும் சோனியா காந்தி பிரதமராவதற்கு எதிர்ப்பு தெரிவித்தனர்.

பிரதமர் பதவியை நிராகரித்த பிறகு, தனது மனசாட்சியின் குரலுக்குக் கட்டுப்பட்டே இந்த முடிவை எடுத்ததாக சோனியா காந்தி தெரிவித்திருந்தார்.

இருப்பினும், மன்மோகன் சிங் பிரதமரான பிறகும்கூட, ஐக்கிய முற்போக்குக் கூட்டணி அரசு டெல்லியில் உள்ள சோனியா காந்தியின் இல்லமான 10 ஜன்பத்திலிருந்துதான் இயக்கப்படுவதாக பாஜக மற்றும் அப்போதைய எதிர்க்கட்சித் தலைவர்கள் பலரும் தொடர்ந்து குற்றம்சாட்டி வந்தனர்.

மன்மோகன் சிங் தலைமையிலான ஐக்கிய முற்போக்குக் கூட்டணி ஆட்சிக் காலத்தில், அந்தக் கூட்டணியின் தலைவராக சோனியா காந்தி இருந்தார்.

அந்தக் காலகட்டத்தில் சமூக மற்றும் பொருளாதார வளர்ச்சித் திட்டங்கள், கொள்கைகள் தொடர்பாக அரசுக்கு ஆலோசனை வழங்க தேசிய ஆலோசனைக் குழுவும் அமைக்கப்பட்டது. அந்தக் குழுவின் தலைவராகவும் சோனியா காந்தி செயல்பட்டார்.

ஆனால், அரசின் செயல்பாடுகளில் தாம் தலையிட்டதாகக் கூறப்படும் குற்றச்சாட்டுகளை சோனியா காந்தி திட்டவட்டமாக மறுத்துள்ளார்.

ஆங்கில நாளிதழான 'ஹிந்துஸ்தான் டைம்ஸ்' வெளியிட்ட செய்தியின்படி, தனது சுயசரிதைப் புத்தகத்தில் அப்போதைய அதிகாரப் பகிர்வு தொடர்பான பல்வேறு விவரங்களை சோனியா காந்தி குறிப்பிட்டுள்ளார்.

அரசின் கோப்புகள் எதுவும் தன்னிடம் காட்டப்பட்டதில்லை என்றும் அவர் தெரிவித்துள்ளார்.

'அரசு கோப்புகளை கேட்டதாக கூறப்படும் குற்றச்சாட்டுகள் பொய்'

ஹிந்துஸ்தான் டைம்ஸ் செய்தியின்படி, ஐக்கிய முற்போக்குக் கூட்டணி ஆட்சிக் காலத்தில் அதிகாரப் பகிர்வு தெளிவாக இருந்ததாக சோனியா காந்தி தனது சுயசரிதையில் குறிப்பிட்டுள்ளார். மன்மோகன் சிங் அரசை வழிநடத்தியதாகவும், தான் காங்கிரஸ் கட்சியை வழிநடத்தியதாகவும் அவர் தெரிவித்துள்ளார்.

ஐக்கிய முற்போக்குக் கூட்டணி ஆட்சிக் காலத்தில் அரசின் கோப்புகள் எதுவும் தன்னிடம் காட்டப்படவில்லை என்று காங்கிரஸ் நாடாளுமன்றக் கட்சித் தலைவர் சோனியா காந்தி, தனது புத்தகத்தில் குறிப்பிட்டுள்ளார்.

பல ஆண்டுகளாகக் கட்சிக்காகப் பணியாற்றியவர்களின் நலன்கள் கவனத்தில் கொள்ளப்பட வேண்டும் என்பதற்காகவே, அரசு அமைப்பது தொடர்பாகத் தனது ஆலோசனைகளை வழங்கியதாக அவர் தெரிவித்துள்ளார்.

ஆனால், பிரதமர் அலுவலகத்திலிருந்து அரசுக் கோப்புகளைத் தான் கேட்டுப் பெற்றதாகக் கூறப்படும் குற்றச்சாட்டுகள் 'உள்நோக்கம் கொண்டவை, முற்றிலும் பொய்யானவை' என்று அவர் மறுத்துள்ளார்.

2004ஆம் ஆண்டு மக்களவைத் தேர்தல் முடிவுகள் வெளியாவதற்குச் சில மாதங்களுக்கு முன்பே, பிரதமராகப் பதவியேற்கப் போவதில்லை என்று தனது பிள்ளைகளான ராகுல் காந்தி மற்றும் பிரியங்கா காந்தி வதேராவுடன் சேர்ந்து முடிவெடுத்ததாகவும் சோனியா காந்தி தனது புத்தகத்தில் தெரிவித்துள்ளார்.

பாதுகாப்பு குறித்த அச்சம் காரணமாகவே அவர்கள் இருவரும் இந்த முடிவை வலியுறுத்தியதாகவும் அவர் குறிப்பிட்டுள்ளார்.

இந்தியன் எக்ஸ்பிரஸ் ஆங்கில நாளிதழில் வெளியான சோனியா காந்தியின் புத்தகப் பகுதியின்படி, "தேர்தலுக்குச் சில மாதங்களுக்கு முன்பு, நான் பிரதமராவது குறித்து எனது பிள்ளைகளுடன் பேசினேன். எங்கள் கட்சி தேர்தலில் வெற்றி பெற்றால் பிரதமர் பதவியை ஏற்றுக்கொள்வேனா என்று அவர்களில் ஒருவர் என்னிடம் நேரடியாகக் கேட்டார். 'நிச்சயமாக இல்லை' என்று நான் பதிலளித்தேன். கிட்டத்தட்ட கோபத்துடனேயே அந்தப் பதிலை அளித்தேன். 'உறுதியாகச் சொல்கிறீர்களா?' என்று அவர்கள் மீண்டும் கேட்டனர். 'எனது முடிவில் நான் மிகவும் தெளிவாக இருக்கிறேன்' என்று உறுதியாகக் கூறினேன்.

நான் பிரதமராக வேண்டும் என்று ராகுலும் பிரியங்காவும் விரும்பவில்லை. அவர்கள் தங்களது பாட்டி படுகொலை செய்யப்பட்டதாலும், தந்தை கொடூரமாகக் கொல்லப்பட்டதாலும் ஏற்பட்ட மன அதிர்ச்சியை அனுபவித்திருந்தனர். அவர்களைப் பொறுத்தவரை, பிரதமர் பதவியை ஏற்பது என்பது ஆபத்து அதிகரிப்பதுடன் நேரடியாகத் தொடர்புடையதாக இருந்தது. எனது பதிலைக் கேட்டதும் அவர்கள் நிம்மதியடைந்தனர். நானும் மனதளவில் நிம்மதியாக உணர்ந்தேன். ஏனெனில், பிரதமர் பதவி குறித்த எனது நிலைப்பாட்டை முதல்முறையாக வெளிப்படையாகத் தெரிவித்திருந்தேன்." என்று அவர் குறிப்பிட்டுள்ளார்.

சோனியா காந்தி தனது புத்தகத்தில், "தேர்தல் பிரசாரம் முழுவதும், பிரதமர் யார் என்று என்னிடம் பொதுவெளியில் கேள்வி எழுப்பப்பட்ட போதெல்லாம், திட்டவட்டமான பதிலை அளிக்கவில்லை. முந்தைய காங்கிரஸ் அரசுகளின் பாரம்பரியத்தை முன்னெடுத்துச் செல்லக்கூடியவர், அரசு நிர்வாகத்தில் நீண்ட அனுபவமும் குறைசொல்ல முடியாத நேர்மையும் கொண்டவராக இருக்க வேண்டும் என்பதை மட்டும் எனது மனதில் ஆழமாக உணர்ந்திருந்தேன்." என்று குறிப்பிட்டுள்ளதாக இந்தியன் எக்ஸ்பிரஸ் செய்தி வெளியிட்டுள்ளது.

2004 மக்களவைத் தேர்தல் முடிவுகளுக்குப் பிறகு நடந்தது என்ன?

ஹிந்துஸ்தான் டைம்ஸ் செய்தியின்படி, 2003ஆம் ஆண்டு ஜூலை மாதம் சிம்லாவில் நடைபெற்ற காங்கிரஸ் கட்சியின் கூட்டத்தில் நிலவிய பதற்றமான சூழல் குறித்தும் சோனியா காந்தி தனது புத்தகத்தில் எழுதியுள்ளார்.

அந்த நேரத்தில் மற்ற கட்சிகளுடன் கூட்டணி அமைப்பது தொடர்பாக காங்கிரசுக்குள் கருத்து வேறுபாடுகள் நிலவின. இதுதொடர்பான விவாதங்களில் தாம் ஒதுக்கிவைக்கப்பட்டதாக சோனியா காந்தி குறிப்பிட்டுள்ளார்.

"அவர்கள் என்ன விவாதித்துக் கொண்டிருக்கிறார்கள் என்று கேட்டேன். சிறிது தயக்கத்துக்குப் பிறகு, தேர்தலில் கட்சியை யார் வழிநடத்துவது என்பது குறித்து விவாதிப்பதாகப் பதில் கிடைத்தது" என்று அவர் எழுதியுள்ளார்.

தனது கட்சியைச் சேர்ந்தவர்களே தம்மை வெளியாளாகக் கருதியது அதிர்ச்சியையும் வேதனையையும் ஏற்படுத்தியதாக சோனியா காந்தி குறிப்பிட்டுள்ளார்.

காங்கிரஸ் தலைவராகத் தாமே தேர்தல் பிரசாரத்தை வழிநடத்துவதாக அவர்களுக்குத் தெரிவித்ததாகவும் அவர் கூறியுள்ளார்.

சோனியா காந்தியின் தலைமையில் 2004ஆம் ஆண்டு மக்களவைத் தேர்தலை எதிர்கொண்ட காங்கிரஸ் கட்சி, பாஜகவுக்குப் பெரும் பின்னடைவை ஏற்படுத்தியது.

அந்தத் தேர்தலில் பாஜக தலைமையிலான தேசிய ஜனநாயகக் கூட்டணி தோல்வியடைந்தது. ஆட்சியை இழக்கும் அளவுக்கான தேர்தல் முடிவை பாஜக எதிர்பார்க்கவில்லை.

அப்போது ஆட்சியில் இருந்த தேசிய ஜனநாயகக் கூட்டணி அரசு, 'இந்தியா ஒளிர்கிறது' என்பது போன்ற முழக்கங்களை முன்வைத்திருந்தது.

இந்த முழக்கங்களுக்கு மத்தியில், மக்களவைத் தேர்தலைத் திட்டமிட்ட காலத்திற்கு ஏறக்குறைய ஆறு மாதங்களுக்கு முன்பே நடத்த பாஜக முடிவு செய்தது.

ஆனால், பாஜகவின் இந்த உத்தி முற்றிலும் தோல்வியடைந்தது.

இதையடுத்து, காங்கிரஸ் கட்சிக்கும் அதன் தலைவர் சோனியா காந்திக்கும் புதிய சவால் உருவானது.

'சோனியா காந்தி வெளிநாட்டில் பிறந்தவர்' என்பதை பாஜக தொடர்ந்து பிரச்னையாக எழுப்பி வந்த நிலையில், அவர் காங்கிரஸ் தலைமையை ஏற்ற பிறகு முதல்முறையாக மத்தியில் ஆட்சி அமைக்கும் வாய்ப்பை அந்தக் கட்சி நெருங்கியிருந்தது.

2004ஆம் ஆண்டு மக்களவைத் தேர்தல் முடிவுகள் வெளியான பிறகு நிலவிய சூழல் குறித்து சோனியா காந்தி தனது புத்தகத்தில் எழுதியுள்ளதாக இந்தியன் எக்ஸ்பிரஸ் செய்தி வெளியிட்டுள்ளது.

அதன்படி, "அப்போது நான் குழப்பத்தில் இருந்தேன். பிரதமர் பதவியை நான் நிராகரித்தால் வேதனையும் ஏமாற்றமும் அடையக்கூடிய கட்சித் தொண்டர்களைப் பற்றியும், எங்களுக்கு வாக்களித்த மக்களைப் பற்றியும் சிந்தித்தேன். எனது உணர்வுகள் ஒவ்வொரு நொடியும் மாறிக்கொண்டிருந்தன. ஒரு நிமிடம் எனது முடிவில் தெளிவாக இருந்தேன். அடுத்த நிமிடமே குழப்பமடைந்தேன்." என்று சோனியா காந்தி குறிப்பிட்டுள்ளார்.

கூட்டணிக் கட்சித் தலைவர்களுடன் நடைபெற்ற சந்திப்பு குறித்தும் அவர் விவரித்துள்ளார்.

"கூட்டணிக் கட்சித் தலைவர்களுடன் சந்திப்பு ஒன்றுக்கு ஏற்பாடு செய்யப்பட்டிருந்தது. மறுநாள் பிற்பகல் அவர்கள் எனது வீட்டுக்கு வரவிருந்தனர். என்னைச் சம்மதிக்க வைப்பதாக எனது கட்சித் தலைவர்களிடம் அவர்கள் உறுதியளித்திருந்தனர். மறுநாள், எனது வீட்டின் கடைசிப் பகுதியில் உள்ள ராஜீவின் ஆலோசனைக் கூட்ட அறையில் கூட்டணிக் கட்சித் தலைவர்கள் சிலருடன் சந்திப்பு நடைபெற்றது. அவர்கள் தங்களது கோரிக்கையை ஏற்றுக்கொள்ளுமாறு என்னை வலியுறுத்தினர். ஆலோசனை முடிவடைந்ததும், எனது தைரியத்தைத் திரட்டிக்கொண்டு எனது முடிவைத் தெரிவித்தேன்."

அதன் பிறகு நடந்த சம்பவங்களையும் சோனியா காந்தி தனது புத்தகத்தில் விவரித்துள்ளார்.

"அவர்கள் மத்தியில் சலசலப்பு ஏற்பட்டது. அவர்கள் எழுந்து என்னை நோக்கி வந்தனர். நானும் எழுந்து நின்றேன். அவர்கள் என்னைச் சுற்றி நின்றுகொண்டனர். 'இதை நாங்கள் ஏற்றுக்கொள்ள மாட்டோம்' என்று அவர்களில் ஒருவர் கூறினார்.

'மேடம், நீங்கள் இந்த முடிவை எடுக்க முடியாது' என்று மற்றொருவர் தெரிவித்தார். அவர்களின் பேச்சு மிகவும் கடுமையாகவும், ஏறக்குறைய ஆக்ரோஷமாகவும் இருந்தது. 'உங்கள் மறுப்பை நாங்கள் ஏற்றுக்கொள்ள மாட்டோம்' என்று அவர்கள் கூறினர். நான் அதிர்ச்சியடைந்தேன். என்னை மீறி நிர்பந்திக்கப்படுவதாக உணர்ந்தேன். 'சரி' என்று மிகவும் மெதுவாக முணுமுணுத்தேன்.

நான் பேசி முடிப்பதற்குக்கூட அங்கிருந்த தலைவர்கள் காத்திருக்கவில்லை. ஒவ்வொருவராக எனக்கு வாழ்த்து தெரிவிக்கத் தொடங்கினர். "அவர் சம்மதித்துவிட்டார், அவர் சம்மதித்துவிட்டார் என்று ஒருவர் கூறினார். நான் எதுவும் பேச முடியாமல், அதிர்ச்சியில் உறைந்தபடி அங்கேயே நின்றுகொண்டிருந்தேன். திருப்தியடைந்த தலைவர்கள் அங்கிருந்து வெளியேறினர்" என்று சோனியா காந்தி எழுதியுள்ளார்.

இதற்குப் பிறகு ராகுல் காந்தியும் பிரியங்கா காந்தியும் எவ்வாறு எதிர்வினையாற்றினர் என்பதையும் சோனியா காந்தி தனது புத்தகத்தில் குறிப்பிட்டுள்ளதாக இந்தியன் எக்ஸ்பிரஸ் செய்தி வெளியிட்டுள்ளது.

"நீங்கள் சம்மதித்துவிட்டீர்களா?" என்று ராகுல் கோபமாகக் கேட்டார்.

"அவர்கள் நான் சொல்வதைக் கேட்கவில்லை. எனக்கு இதில் விருப்பமில்லை. அது உனக்கும் தெரியும். அவர்கள் என்னை நிர்பந்தித்தார்கள்" என்று நான் பதிலளித்தேன்."நிர்பந்தித்தார்களா? உங்களை நிர்பந்தித்தார்களா? அப்படியானால் எங்களைப் பற்றி யோசிக்கவில்லையா?" என்று அவர் கேட்டார். பின்னர் கோபத்துடன் அங்கிருந்து சென்றுவிட்டார்.

அப்போது பிரியங்கா என்னிடம், "அம்மா, இந்த விஷயத்தில் நீங்கள் எப்போதுமே தெளிவாக இருந்திருக்கிறீர்கள். நிர்பந்தத்திற்கு அடிபணிய வேண்டாம். நீங்கள் ஏற்கெனவே எடுத்த முடிவின்படியே செயல்படுங்கள்" என்று கூறினார். அவரது கண்கள் சிவந்திருந்தன. எனக்கும் அழுகை வந்தது" என்று சோனியா காந்தி எழுதியுள்ளார்.

தனது முடிவால் ஏற்படக்கூடிய விளைவுகள் குறித்தும் சோனியா காந்தி தனது புத்தகத்தில் குறிப்பிட்டுள்ளார்.

"நான் எடுக்கும் முடிவு எனது கட்சிக்கு மட்டுமின்றி, ஒட்டுமொத்த இந்தியாவுக்கும் நீண்டகால விளைவுகளை ஏற்படுத்தக்கூடும் என்ற எண்ணம் தொடர்ந்து எனக்குள் எழுந்துகொண்டிருந்தது. பிளவுபடுத்தும் அரசியலிலிருந்து இந்தியாவை விலக்கி வைக்க, வலுவான மற்றும் திறமையான அரசு நமக்குத் தேவைப்பட்டது. எல்லாவற்றையும்விட நாட்டின் வளர்ச்சியும் முன்னேற்றமுமே நமக்கு மிகவும் அவசியமாக இருந்தன.

ஆர்எஸ்எஸ் மற்றும் அதன் தீவிரப் போக்குடைய பல்வேறு பிரிவுகளின் ஆதரவுடன் செயல்படும் பாஜக ஆட்சிக்கு வந்தால், சமூகங்களுக்கு இடையே மோதல்களைத் தூண்டி, அரசியலமைப்பைச் சீர்குலைக்கும் என்ற நம்பிக்கையுடனேயே நான் அரசியலில் நுழைந்தேன்."

பிரதமர் பதவியை ஏற்பதால் ஏற்படக்கூடிய அரசியல் விளைவுகள் குறித்தும் சோனியா காந்தி எழுதியுள்ளார்.

"நான் பிரதமர் பதவியை ஏற்றுக்கொண்டால், அவர்கள் எழுப்பிக் கொண்டிருந்த எதிர்ப்புகளும் தேர்தல் பிரசாரத்தின்போது மேற்கொண்ட பரப்புரைகளும் ஓயப் போவதில்லை என்பதை நன்கு அறிந்திருந்தேன்.

பாஜகவும் அதன் கூட்டணிக் கட்சிகளும் எனது 'வெளிநாட்டுப் பிறப்பை' நிச்சயமாக ஒரு பிரச்னையாக எழுப்பும். அவர்கள் மக்களின் உணர்வுகளைத் தூண்டிவிட்டு, பெரும் குழப்பத்தை ஏற்படுத்துவார்கள். அது கடந்த காலத்திலும் வருங்காலத்திலும் நாட்டில் நடைபெறக்கூடிய அனைத்து நல்ல விஷயங்களையும் பின்னுக்குத் தள்ளிவிடும். நான் நேசிக்கும் எனது நாட்டுக்குப் பாதிப்பை ஏற்படுத்தக்கூடும் என்று தெரிந்தும், பிரதமர் பதவியை ஏற்க நான் எப்படி சம்மதிக்க முடியும்? இல்லை, ஒருபோதும் முடியாது" என்று சோனியா காந்தி குறிப்பிட்டுள்ளார்.

பிரணாப் முகர்ஜி குறித்து சோனியா காந்தி என்ன எழுதியுள்ளார்?

ஐக்கிய முற்போக்குக் கூட்டணி அமைச்சரவையில் மிகவும் மூத்த அமைச்சராக இருந்தபோதிலும், பிரணாப் முகர்ஜியை பிரதமராக்க காந்தி குடும்பத்தினர் தயக்கம் காட்டியதாக முன்னாள் குடியரசுத் தலைவர் பிரணாப் முகர்ஜியும் அவரது மகள் ஷர்மிஷ்டா முகர்ஜியும் ஏற்கெனவே கூறியுள்ளனர்.

ஹிந்துஸ்தான் டைம்ஸ் செய்தியின்படி, ஐக்கிய முற்போக்குக் கூட்டணி மீண்டும் ஆட்சிக்கு வந்து ஓராண்டுக்குப் பிறகு, 2010ஆம் ஆண்டில் பிரதமரை மாற்றுவது குறித்து பிரணாப் முகர்ஜி தன்னிடம் யோசனை தெரிவித்ததாக சோனியா காந்தி தனது புத்தகத்தில் குறிப்பிட்டுள்ளார்.

"அரசின் தலைமையில் மாற்றம் ஏற்படுத்த வேண்டிய நேரம் வந்திருக்கலாம் என்று அவர் கூறியது என்னை ஆச்சரியப்படுத்தியது. நீண்ட காலமாக பிரதமராக வேண்டும் என்ற அவரது விருப்பத்தை வெளிப்படுத்தும் விதமாக அந்த யோசனையை நான் புரிந்துகொண்டேன். நான் மெதுவாகப் பேச்சின் தலைப்பை மாற்றினேன். இதனால் அவர் ஏமாற்றமடைந்திருக்கலாம். இருப்பினும், என் மீது அவருக்கு மனக்கசப்பு இருப்பதாக ஒருபோதும் என்னை உணரச் செய்ததில்லை" என்று சோனியா காந்தி தனது புத்தகத்தில் எழுதியுள்ளார்.

- இது, பிபிசிக்காக கலெக்டிவ் நியூஸ்ரூம் வெளியீடு