மைக்ரோசாஃப்டின் எந்தெந்த சேவைகளில் பாதிப்பு? பிரச்னையை சரிசெய்ய நிறுவனம் போராட்டம்

பல்லாயிரக்கணக்கான பயனர்களைப் பாதித்துள்ளதாகக் கூறப்படும் உலகளாவிய சேவை முடக்கத்தைச் சரிசெய்ய மைக்ரோசாஃப்ட் நிறுவனம் போராடி வருகிறது.

மைக்ரோசாஃப்ட் டீம்ஸ், அவுட்லுக் மற்றும் செயற்கை நுண்ணறிவு மென்பொருளான கோபைலட் உள்ளிட்ட சேவைகள் "இணைப்புச் சிக்கல்களால்" பாதிக்கப்பட்டுள்ளன. இந்தச் சேவை முடக்கம் சைபர் தாக்குதலால் ஏற்பட்டிருக்க வாய்ப்பில்லை என மைக்ரோசாஃப்ட் தெரிவித்துள்ளது.

74 நாடுகளில் உள்ள பயனர்களை இந்தச் சேவை முடக்கம் பாதித்துள்ளதாகவும், எட்டு மணி நேரத்துக்கும் மேலாகத் தொடர்ந்து வருவதாகவும் சேவைகளைக் கண்காணிக்கும் இணையதளம் தெரிவித்துள்ளது.

சிக்கலைச் சரிசெய்வதற்கான முயற்சிகள் "எதிர்பார்த்தபடி நடைபெறவில்லை" என மைக்ரோசாஃப்ட் தெரிவித்துள்ளது. முன்னதாக, "தங்கள் குழு சாதகமான முடிவுகளைக் கண்டு வருவதாக" அந்நிறுவனம் கூறியிருந்தது.

இது சைபர் தாக்குதல் இல்லையென்றால், "நம்ப முடியாத அளவிலான திறமையின்மை" என்று தொழில்நுட்ப நிபுணர் ஒருவர் பிபிசியிடம் தெரிவித்துள்ளார்.

43 கோடிக்கும் அதிகமானோர் மைக்ரோசாஃப்ட் 365 செயலிகளைப் பயன்படுத்துகின்றனர்.

இது இணையவழித் தாக்குதல் இல்லை என்றால், இது 'நம்பமுடியாத திறமையின்மை' - நிபுணர்

சைபர் தாக்குதலால் இந்தச் சேவை முடக்கம் ஏற்பட்டிருக்க வாய்ப்பில்லை என, மைக்ரோசாஃப்ட் நிறுவனம் தெரிவித்துள்ளது.

ஆனால், அப்படியென்றால், இந்தப் பிரச்னை "நம்ப முடியாத அளவிலான திறமையின்மையால்" ஏற்பட்டிருக்க வேண்டும். இந்தச் சிக்கல் தொடர்ந்து நீடித்தால், பொருளாதார ரீதியாகப் பல மில்லியன் டாலர்கள் இழப்பு ஏற்படக்கூடும் என, நியூசிலாந்தைச் சேர்ந்த ஆலோசனை நிறுவனமான கொரில்லா டெக்னாலஜியின் பால் ஸ்பெயின் தெரிவித்துள்ளார்.

மின்னஞ்சல் மற்றும் பிற சேவைகள் முடங்கியுள்ளதால், நிறுவனங்கள் நடைமுறையில் "ஒரு வேலை நாளையே இழந்துவிட்டன". இதனால் பயனர்கள் "விரக்தியடைந்துள்ளனர்" என்றும் அவர் கூறினார்.

"இது சைபர் தாக்குதல் என மைக்ரோசாஃப்ட் கருதவில்லை" - ஆஸ்திரேலிய அமைச்சர்

ஆஸ்திரேலியாவின் உள்துறை மற்றும் இணையப் பாதுகாப்புத் துறை அமைச்சர் டோனி பர்க், அந்நாட்டில் உள்ள மைக்ரோசாஃப்ட் அதிகாரிகளுடன் பேசியதாகவும், அவர்கள் "இது சைபர் தாக்குதல் சம்பவம் என்று கருதவில்லை" என்றும் தெரிவித்துள்ளார்.

"கிரௌட்ஸ்ட்ரைக் சம்பவத்தின்போது நாம் பார்த்ததைப் போன்ற ஒரு சூழலையே தற்போது அவர்கள் எதிர்கொள்வதாக நம்புகின்றனர். அதாவது, ஓர் அப்டேட்டில் ஏற்பட்ட கோளாறை அவர்கள் கையாள்வதாகத் தெரிகிறது," என்று இன்று முன்னதாகச் செய்தியாளர்களிடம் பர்க் கூறினார்.

இன்றைய சேவை முடக்கத்தின் தாக்கம் " மின்னஞ்சல் அமைப்புகளைப் பெரிதும் பாதித்துள்ளது" என்றும் பர்க் தெரிவித்தார்.

"கிரௌட்ஸ்ட்ரைக் சம்பவத்தின்போது, அதன் தொடர்ச்சியாகப் பல்வேறு பாதிப்புகள் ஏற்பட்டன. பல்வேறு தயாரிப்புகளின் செயல்பாடுகளும் பாதிக்கப்பட்டன" என்றும் அவர் குறிப்பிட்டார்.

அமெரிக்க இணையப் பாதுகாப்பு நிறுவனமான கிரௌட்ஸ்ட்ரைக், 2024ஆம் ஆண்டு ஜூலை மாதம் தவறான மென்பொருள் அப்டேட்டை வெளியிட்டதைத் தொடர்ந்து, விண்டோஸ் இயங்குதளத்தில் செயல்படும் கணினிகள் முடங்கின. இதனால் உலகம் முழுவதும் மில்லியன் கணக்கான மக்கள் பாதிக்கப்பட்டனர்.

"செயலிழப்புக்கான சரிசெய்தல் நடவடிக்கைகள் எதிர்பார்த்தபடி நடைபெறவில்லை" - மைக்ரோசாஃப்ட்

சேவைகளை மேம்படுத்தவும், முடக்கத்தைச் சரிசெய்யவும் மேற்கொள்ளப்பட்ட மாற்றங்கள் "எதிர்பார்த்தபடி நடைபெறவில்லை" என்று மைக்ரோசாஃப்ட் தனது சமீபத்திய அறிவிப்பில் தெரிவித்துள்ளது.

தனது அமைப்புகளுக்கு அதிகச் சுமையை ஏற்படுத்தாமல், கூடுதல் பயனர்களைத் தளங்களுடன் இணைக்க அனுமதிக்கும் வகையில், இந்தப் பிரச்னையைச் சரிசெய்வதற்கான பிற வழிகளையும் நிறுவனம் சோதித்து வருகிறது.

முன்னதாக, மீண்டும் செயல்படத் தொடங்கிய சேவைகளுக்கு அதிக அளவில் பயன்பாட்டுத் தேவை ஏற்படும்போது, அவை மீண்டும் பதிலளிக்காமல் போகக்கூடும் என்றும் மைக்ரோசாஃப்ட் எச்சரித்திருந்தது.

மைக்ரோசாஃப்டைப் பயன்படுத்தும் மற்ற முக்கிய தொழில்நுட்பத் தளங்களும் பாதிப்பு

பிற தொழில்நுட்பச் சேவைகளுடன் ஒருங்கிணைக்கப்பட்ட பல்வேறு தளங்களை மைக்ரோசாஃப்ட் கொண்டுள்ளது. இதனால், இந்தச் சேவை முடக்கத்தால் வேறு சில முக்கியத் தொழில்நுட்பத் தளங்களும் பாதிக்கப்பட்டுள்ளன.

செயற்கை நுண்ணறிவுத் தொழில்நுட்ப நிறுவனமான ஓபன்ஏஐ, மைக்ரோசாஃப்ட் சேவைகளுடனான தனது இணைப்புகளில் ஏற்பட்டுள்ள சிக்கல் குறித்து விசாரித்து வருவதாகவும், அதன் காரணமாக சில கருவிகள் எதிர்பார்த்தபடி செயல்படவில்லை என்றும் தெரிவித்துள்ளது.

மைக்ரோசாஃப்ட் 365 சேவைகளுடனான தனது இணைப்புகளையும் பாதிக்கும் ஒரு சிக்கலைக் கண்டறிந்துள்ளதாக, ஆந்த்ரோபிக் நிறுவனமும் தெரிவித்துள்ளது.

இந்த சேவை முடக்கம் எவ்வளவு பெரியது?

சேவை முடக்கம் சுமார் ஒரு மணி நேரத்துக்குள் 74 நாடுகளுக்குப் பரவியதாக, சேவைகளின் செயல்பாடுகளைக் கண்காணிக்கும் டவுன்டிடெக்டர் இணையதளம் தெரிவித்துள்ளது.

வியாழக்கிழமை 18:00 ஜிஎம்டி மணியளவில், அவுட்லுக் சேவையில் ஏற்பட்ட சிக்கல்கள் குறித்து உலகளவில் பதிவான புகார்கள் கிட்டத்தட்ட 1.4 லட்சத்தை எட்டின. இது வழக்கமான அளவைவிட 2,000 மடங்குக்கும் அதிகமாகும்.

இந்தப் பிரச்னை குறைந்தது எட்டு மணி நேரத்துக்கும் மேலாக நீடித்து வருவதாக, டவுன்டிடெக்டர் தெரிவித்துள்ளது. வியாழக்கிழமை 16:15 ஜிஎம்டி மணிக்குச் சற்றுப் பிறகு இந்தச் சிக்கல்கள் முதன்முதலில் கண்டறியப்பட்டதாகவும் அந்த இணையதளம் கூறியுள்ளது.

தற்போது 28,000-க்கும் அதிகமான பயனர்கள் இந்தச் சேவை முடக்கத்தால் பாதிக்கப்பட்டுள்ளதாக டவுன்டிடெக்டர் தெரிவித்துள்ளது. அதேவேளையில், சிக்கலைச் சரிசெய்வதற்கான முயற்சிகளில் "சாதகமான முடிவுகள்" கிடைத்து வருவதாக மைக்ரோசாஃப்ட் கூறியுள்ளது.

எக்செல் மூலம் மின்னஞ்சல் அனுப்ப வேண்டிய நேரமா? சமூக ஊடகங்களில் குவிந்து வரும் நகைச்சுவைகள்

பாதிக்கப்பட்ட பயனர்கள், மைக்ரோசாஃப்ட் சேவை முடக்கத்தைக் கிண்டல் செய்யும் வகையிலும், தங்கள் வாழ்க்கை, குறிப்பாக அலுவலக வாழ்க்கை குறித்து நகைச்சுவையாகக் கருத்துத் தெரிவிக்கும் வகையிலும் மீம்ஸ்களைப் பகிர்ந்து வருகின்றனர்.

2002ஆம் ஆண்டு வெளியான நெல்லி மற்றும் கெல்லி ரோலண்டின் வெற்றிப் பாடலான 'டிலெமா'வில் இடம்பெற்ற ஒரு காட்சி சமூக ஊடகங்களில் மீண்டும் மீண்டும் பகிரப்பட்டு வருகிறது.

அந்தக் காட்சியில், கெல்லி ரோலண்ட் ஒரு விரிதாளில் (Spreadsheet) செய்திகளைத் தட்டச்சு செய்வார்.

"அவுட்லுக் செயல்படாத நிலையில், கெல்லி ரோலண்டைப் போல நாமும் எக்செல் மூலம் மின்னஞ்சல்களை அனுப்பத் தொடங்க வேண்டிய நேரம் வந்துவிட்டது" என்று எக்ஸ் தளப் பயனர் ஒருவர் பதிவிட்டுள்ளார்.

இந்தப் பதிவுக்கு எழுதப்பட்ட நேரத்தில் 23,000 பேர் விருப்பம் தெரிவித்திருந்தனர். மேலும், கிட்டத்தட்ட 3,000 முறை இது மறுபகிர்வு செய்யப்பட்டிருந்தது.

அமெரிக்காவைச் சேர்ந்த ரியல் எஸ்டேட் நிறுவனமான சர்மான்ட், இன்ஸ்டாகிராமில், "இன்றைய தினம் போன்ற நாட்கள், உங்கள் முழு வேலையும் மின்னஞ்சல்களை அனுப்புவது மட்டும்தான் என்பதை நினைவூட்டுகின்றன" என்று நகைச்சுவையாகப் பதிவிட்டுள்ளது.

நம்பிக்கையளிக்கும் ஒரு கருத்தும் வெளியாகியுள்ளது.

"அவுட்லுக் மீண்டும் செயல்படத் தொடங்கவில்லை என்றால், இந்த வாரத்தின் மீதமுள்ள நாட்களுக்கு விடுமுறை எடுத்துக்கொள்ள நமக்கு சட்டப்பூர்வமாக அனுமதி உண்டா?" என்று ஒரு பயனர் பதிவிட்டுள்ளார்.

மைக்ரோசாஃப்டின் எந்தெந்த சேவைகள் பாதிக்கப்பட்டுள்ளன?

இந்தச் சேவை முடக்கத்தால் பாதிக்கப்பட்ட பயனர்களால் மைக்ரோசாஃப்ட் 365 செயலிகளில் சிலவற்றுடன் இணைக்க முடியாமல் போகலாம்.

குறிப்பாக, அவுட்லுக் மின்னஞ்சல் செயலியையும் உள்ளடக்கிய மைக்ரோசாஃப்டின் எக்ஸ்சேஞ்ச் ஆன்லைன் சேவை, பல வாடிக்கையாளர்களுக்குப் பாதிக்கப்பட்டுள்ளது.

மேலும், தங்களது கேலண்டர் செயலிகளில் உள்ள சில கோப்புகள் அல்லது விவரங்களையும் பயனர்களால் பார்க்க முடியாமல் போகலாம் என மைக்ரோசாஃப்ட் தெரிவித்துள்ளது.

அந்நிறுவனத்தின் செயற்கை நுண்ணறிவுத் தளமான கோபைலட்டும் பாதிக்கப்பட்டுள்ளது.

அதேவேளையில், குறுஞ்செய்தி அனுப்புதல் மற்றும் இணையவழிக் கூட்டங்கள் ஆகிய சேவைகள் பெரும்பாலும் வழக்கம்போலச் செயல்படுவதாக மைக்ரோசாஃப்ட் தெரிவித்துள்ளது. இந்தச் சிக்கல்களைச் சரிசெய்யத் தீவிரமாக முயன்று வருவதாகவும் அந்நிறுவனம் கூறியுள்ளது.

'நேர்மறையான முடிவுகள் காணப்படுகின்றன'

மைக்ரோசாஃப்ட் செயலிகளில் ஏற்பட்டுள்ள உலகளாவிய சேவை முடக்கத்தைச் சரிசெய்யத் தீவிரமாக முயன்று வருவதாக அந்நிறுவனம் தெரிவித்துள்ளது.

எக்ஸ் தளத்தில் வெளியிட்டுள்ள சமீபத்திய அறிவிப்பில், பாதிக்கப்பட்ட சேவைகளை மீண்டும் செயல்பாட்டுக்குக் கொண்டுவருவதற்கான முயற்சிகளில் தங்கள் குழு "சாதகமான முடிவுகளைக் கண்டு வருவதாகவும்", அவற்றின் செயல்பாடுகளைத் தொடர்ந்து கண்காணித்து வருவதாகவும் மைக்ரோசாஃப்ட் கூறியுள்ளது.

அதிக அளவிலான பயன்பாட்டுத் தேவை ஏற்படும்போது சில சேவைகள் மீண்டும் பதிலளிக்காமல் போகக்கூடும் என்றும், இந்தப் பிரச்னையைத் தூண்டும் காரணம் என்ன என்பதை ஆய்வு செய்து வருவதாகவும் நிறுவனம் முன்னதாகத் தெரிவித்திருந்தது.

'அதிகரித்த சுமை' என்பதன் அர்த்தம் என்ன?

பல பிராந்தியங்களில் உள்ள தனது தொழில்நுட்பக் கட்டமைப்பில் "அதிகரித்த சுமை" ஏற்பட்டதே இந்தச் சேவை முடக்கத்துக்குக் காரணம் என மைக்ரோசாஃப்ட் தெரிவித்துள்ளது.

அதாவது, பணிக்கான கருவிகள் மற்றும் பிற செயலிகள் போன்றவற்றின் பணிகளைச் செயல்படுத்தும் சக்திவாய்ந்த கணினிகளான அதன் சர்வர்கள், வழக்கமாகக் கையாளக்கூடிய அளவைவிட அதிகப் பணிச்சுமையை எதிர்கொள்கின்றன.

பயனர்களின் பயன்பாடு அதிகரித்ததால் இந்தப் பிரச்னை ஏற்படவில்லை. மாறாக, பல சர்வர்கள் "எதிர்பாராத விதமாகச் செயல்படாமல் போனதால்", மீதமுள்ள தொழில்நுட்பக் கட்டமைப்பில் கூடுதல் சுமை ஏற்பட்டுள்ளதாக, விண்டோஸ் தயாரிப்பு நிறுவனம் எக்ஸ் தளத்தில் தெரிவித்துள்ளது.

பாதிக்கப்பட்ட சர்வர்களின் முக்கியப் பகுதி "அதிகச் சுமையால் திணறுவதே" இந்தச் சேவை முடக்கத்துக்குக் காரணம் என்றும் பின்னர் அந்நிறுவனம் குறிப்பிட்டுள்ளது.

பயனர்கள் பாதிப்பு

அமெரிக்கா, ஜப்பான், சிங்கப்பூர், பிரிட்டன் மற்றும் ஆஸ்திரேலியா உள்ளிட்ட நாடுகளில் பல்லாயிரக்கணக்கான பயனர்களைப் பாதித்துள்ளதாகக் கூறப்படும் முக்கியமான உலகளாவிய சேவை முடக்கத்தைச் சரிசெய்ய மைக்ரோசாஃப்ட் நிறுவனம் போராடி வருகிறது.

டீம்ஸ், அவுட்லுக் மற்றும் மைக்ரோசாஃப்டின் செயற்கை நுண்ணறிவு மென்பொருளான கோபைலட் உள்ளிட்ட சேவைகள் "இணைப்புச் சிக்கல்களால்" பாதிக்கப்பட்டுள்ளன.

கடந்த எட்டு மணி நேரத்துக்கும் மேலாக இந்தப் பிரச்னை நீடித்து வருகிறது. வியாழக்கிழமை 18:00 ஜிஎம்டி மணியளவில், அவுட்லுக் சேவையில் ஏற்பட்ட சிக்கல்கள் குறித்து உலகளவில் பதிவான புகார்கள் கிட்டத்தட்ட 1.4 லட்சத்தை எட்டியதாகச் சேவைகளைக் கண்காணிக்கும் டவுன்டிடெக்டர் இணையதளம் தெரிவித்துள்ளது.

- இது, பிபிசிக்காக கலெக்டிவ் நியூஸ்ரூம் வெளியீடு