மணமான ஐந்தே நாளில் விவாகரத்து: முஸ்லிமாக மதம் மாறிய பெண் கூறுவது என்ன?

திருமணமாகி ஐந்து நாட்களே ஆன நிலையில், ஜேனுக்கு அதிர்ச்சியளிக்கும் ஒரு குறுஞ்செய்தி வந்தது.

அதில், "நான் உன்னை விவாகரத்து செய்கிறேன். ஏற்கெனவே விவாகரத்து செய்துவிட்டேன்" என்று அவரது கணவர் குறிப்பிட்டிருந்தார்.

ஜேனின் அடையாளத்தைப் பாதுகாக்கும் வகையில், அவரது உண்மையான பெயரை பிபிசி வெளியிடவில்லை.

பத்து மாதங்களுக்கு முன்பு, இஸ்லாமிய திருமணத்திற்கான 'முஸ்' இணையதளம் மூலம் ஒருவரைச் சந்தித்ததாக ஜேன் தெரிவித்தார்.

அந்த நபரின் பெயர் ஆடம் என்றும், அவர் மான்செஸ்டரில் வசிப்பதாகவும் ஜேன் நினைத்தார்.

"திருமணம் நடக்கப்போகிறது என்று மகிழ்ச்சியாக இருந்தேன். ஆனால், என் வாழ்க்கையிலேயே மிக மோசமான நாட்கள் அப்போதுதான் தொடங்கின" என்று ஜேன் கூறினார்.

"இதெல்லாம் மிகவும் விசித்திரமாக இருக்கிறது. பாலியல் தேவைக்காக ஒருவர் ஏன் இப்படியெல்லாம் செய்கிறார்கள் என்று எனக்குப் புரியவில்லை" என்று அவர் கூறினார்.

சந்திப்பதற்கு முன்பு, இருவரும் ஆறு மாதங்களாக ஆன்லைனிலும் வீடியோ காலிலும் பேசி வந்ததாக ஜேன் தெரிவித்தார்.

தங்களது உறவு உண்மையானது என்று நம்பியதால், அவர் திருமணம் செய்துகொள்ளக் கேட்டபோது தனக்கு எந்தச் சந்தேகமும் வரவில்லை என்று ஜேன் பிபிசியிடம் தெரிவித்தார்.

பின்னர், ஆடம் என்பது அவரது உண்மையான பெயர் இல்லை என்றும், அவருக்கு ஏற்கெனவே திருமணமாகிவிட்டது என்றும் ஜேன் தெரிந்துகொண்டார்.

ஜேனின் அனைத்து குற்றச்சாட்டுகளையும் ஆடம் முழுமையாக மறுப்பதாக அவரது வழக்கறிஞர்கள் தெரிவித்தனர்.

ஜூன் 2ஆம் தேதி இஸ்லாம் மதத்திற்கு மாறிய ஜேன், இஸ்லாமிய முறைப்படி திருமணம் செய்துகொள்வதற்காக லன்காஷையரில் உள்ள பிரையர்ஃபீல்டுக்குச் சென்றார்.

இஸ்லாமிய விதிமுறைகளின்படி நடைபெறும் திருமணச் சடங்கு 'நிக்காஹ்' என்று அழைக்கப்படுகிறது.

ஆனால், இந்த வகை நிக்காஹ் இங்கிலாந்து மற்றும் வேல்ஸில் சட்டப்பூர்வ திருமணமாக அங்கீகரிக்கப்படுவதில்லை.

தனது சொந்த ஊரான கிளாஸ்கோவில் குடும்பத்தினர், நண்பர்கள் முன்னிலையில் திருமணம் செய்ய ஜேன் விரும்பினார். ஆனால், அதற்கு அவரது வருங்கால கணவர் மறுப்பு தெரிவித்தார்.

அப்போதே இதைச் சந்தேகித்திருக்க வேண்டும் என ஜேன் நினைக்கிறார்.

"ஸ்காட்லாந்தில், சட்டப்பூர்வ திருமணமும் நிக்காஹ்வும் ஒரே நேரத்தில் நடைபெறுகின்றன" என்று ஜேன் கூறினார்.

திருமணத்தின்போது அடையாள அட்டையைக் கேட்டதற்கு, "எனது அடையாள அட்டையை அவர் ஏன் பார்க்க வேண்டும்? திருமணம் செய்வது மிகவும் எளிதானது. அதற்கு அடையாள அட்டை தேவையில்லை" என்று தனது கணவர் கூறியதாக ஜேன் தெரிவித்தார்.

"இதனால் அவர் மிகவும் கோபமடைந்தார்" என்றும் அவர் கூறினார்.

இரண்டு இமாம்கள் சாட்சியாக இருக்க, பிரையர்ஃபீல்டில் தங்களது திருமணம் நடைபெற்றதாகவும், அதன் பிறகு இருவரும் விடுதியில் இரண்டு இரவுகள் தங்கியதாகவும் ஜேன் தெரிவித்தார்.

ஆனால், திருமணமான ஐந்தே நாட்களில் தங்களது உறவு முடிந்துவிட்டதாகக் கூறி ஜேனுக்கு ஒரு குறுஞ்செய்தி வந்தது.

தனக்குக் கிடைத்த செய்தியைப் பார்த்து அதிர்ச்சியும் குழப்பமும் அடைந்ததாக ஜேன் கூறினார். இந்தத் திருமணத்தை ஒரு "போலித் திருமணம்" என்றும் அவர் குறிப்பிட்டார்.

தனக்கு நேர்ந்தது மன ரீதியான துன்புறுத்தல் மற்றும் பாலியல் சுரண்டல் என்று ஜேன் கூறுகிறார்.

பிபிசிக்குக் கிடைத்த தகவலின்படி, அந்த நபர் மற்றொரு பெண்ணைச் சட்டப்பூர்வமாகவும், மத முறைப்படியும் திருமணம் செய்துகொண்ட நிலையில் உள்ளார்.

தனது வழக்கறிஞர்கள் மூலம் அளித்த பதிலில், இந்தக் குற்றச்சாட்டுகள் அனைத்தும் பொய்யானவை என்றும், தன்னை குறிவைத்து அவை சுமத்தப்படுவதாகவும் அந்த நபர் கூறினார். இந்த குற்றச்சாட்டுகளுக்கு எந்த ஆதாரமும் இல்லை என்றும், அவை முற்றிலும் பொய்யானவை என்றும் அவர் தெரிவித்தார்.

தனக்கு ஏற்கெனவே திருமணமானதை ஜேனிடம் அவர் மறைக்கவில்லை என்று அவரது வழக்கறிஞர்கள் பிபிசியிடம் தெரிவித்தனர்.

ஜேனைத் திருமணம் செய்தபோது தனது ஓட்டுநர் உரிமத்தைக் காட்டியதாகவும், அடையாளத்தை மறைக்கவில்லை என்றும் அவர் கூறினார்.

திருமணத்தை நடத்தி வைத்த இமாம் என்ன சொன்னார்?

ஜேனுக்கு மசூதி வழங்கிய இஸ்லாமிய திருமணச் சான்றிதழின் நகலை பிபிசி பார்த்துள்ளது. அதில் சில விவரங்கள் விடுபட்டிருந்ததுடன், தவறான தகவல்களும் இடம்பெற்றிருந்தன.

திருமணத்தை நடத்திய இமாம் முஃப்தி ஆதில் ஜமான் கூறுகையில், இருவரும் தங்களது விருப்பத்துடன் திருமணம் செய்துகொண்டதாகவும், மகிழ்ச்சியாக இருந்ததாகவும் தெரிவித்தார்.

அவர்களிடம் கூடுதல் விவரங்களைக் கேட்க வேண்டியது தனது பொறுப்பு என்று தான் கருதவில்லை என்றும் கூறினார்.

"நடந்த சம்பவம் எங்களுக்கு மிகுந்த வருத்தத்தை அளிக்கிறது" என்று அவர் பிபிசியிடம் தெரிவித்தார்.

"தொடக்கம் முதலே அனைவரிடமும் நியாயமாக நடந்துகொள்வதும், அவர்களுக்குத் தேவையான உதவிகளை வழங்குவதுமே எங்கள் நோக்கமாக இருந்தது. எங்களுக்கு நேரடியாகத் தெரிந்த விஷயங்கள் குறித்து மட்டுமே கவனம் செலுத்தினோம்" என்று அவர் கூறினார்.

அந்த நபரின் அடையாளத்தைச் சரிபார்ப்பதில் தவறு நடந்ததை இமாம் ஒப்புக்கொண்டார். ஆனால், அவர் யார் என்பதைக் கண்டறிய உதவியதாகவும் கூறினார்.

இந்த விவகாரம் குறித்து லன்காஷையர் மசூதிகள் கவுன்சிலும் கருத்து தெரிவித்தது. திருமண முறிவுக்குப் பிறகு தம்பதிகளிடையே சமரசம் ஏற்படுத்தும் பணிகளில் இந்த அமைப்பு ஈடுபட்டு வருகிறது.

திருமணத்தை நடத்துபவர்கள், அதற்கு முன்பு தேவையான விசாரணைகளை மேற்கொள்ள வேண்டிய பொறுப்பு உள்ளது என்று அந்த அமைப்பு தெரிவித்தது.

இஸ்லாம் மதத்திற்கு மாறுபவர்களுக்கு உதவும் 'நியூ பிகினிங்ஸ்' என்ற அமைப்பு, முஸ்லிம் சமூகத்தில் சிலர் மற்றவர்களை ஏமாற்றிய சம்பவங்களும் நடந்துள்ளதாகத் தெரிவித்தது.

"முஸ்லிம் சமூகத்தில் சிலர் மற்றவர்களை ஏமாற்றும் சம்பவங்கள் நடந்து வருவதை நாங்களும் அறிந்திருக்கிறோம்" என்று அந்த அமைப்பின் நிறுவனர் பிலால் பிரவுன் தெரிவித்தார்.

அவசரமாகத் திருமணம் செய்வது, குடும்பத்தினரை அதில் ஈடுபடுத்தாமல் இருப்பது போன்றவை ஏதோ தவறு நடப்பதற்கான அறிகுறிகள் என்று அவர் கூறினார்.

இதுபோன்ற சூழல்களில், இஸ்லாம் மதத்திற்கு மாறுபவர்கள் எளிதில் ஏமாற்றப்பட வாய்ப்புள்ளதாகவும் அவர் கூறினார்.

லன்காஷையர் மாகாணத்தின் முன்னாள் காவல் மற்றும் குற்றத்தடுப்பு ஆணையர் சைமா அஃப்சல் கூறுகையில், இஸ்லாமியத் திருமணங்களுக்கு சட்ட அங்கீகாரம் இல்லாதது சில பெண்களுக்குப் பிரச்னைகளை ஏற்படுத்தலாம் என்று பிபிசியிடம் தெரிவித்தார்.

"பிரிட்டனில் நிக்காஹ் சட்டப்பூர்வமாக அங்கீகரிக்கப்படாததால், ஒருவர் இரண்டு திருமணங்கள் செய்தாலும் அவர் மீது நடவடிக்கை எடுக்க முடியாது என்று பலரும் கூறுகின்றனர்" என்றார்.

"திருமண விவகாரத்தைத் தனியாக வைத்துவிட்டு, இங்கு சம்பந்தப்பட்டவர்களின் செயல்பாடுகளைப் பார்ப்போம்."

"ஒரு பெண்ணை ஏமாற்றி, தன் வழிக்குக் கொண்டு வந்து சிக்க வைப்பதுதான் இது."

"அதாவது, மோசடி." என்று அவர் கூறுகிறார்.

2018-ல் நாடாளுமன்றத்தில் சமர்ப்பிக்கப்பட்ட ஓர் ஆய்வறிக்கையின்படி, பல இஸ்லாமியத் திருமணங்கள் சட்டப்படி பதிவு செய்யப்படுவதில்லை. இதனால், சட்டப்பூர்வத் திருமணத்தின் மூலம் கிடைக்கும் உரிமைகளையும் பாதுகாப்பையும் பலர் இழக்கின்றனர்.

இந்த வழக்கு தொடர்பாக ஸ்காட்லாந்தில் எந்தவொரு செயலும் உறுதிப்படுத்தப்படவில்லை என்று ஸ்காட்லாந்து காவல்துறை தெரிவித்துள்ளது.

ஜேன் அளித்த புகார் குறித்து விசாரிக்குமாறு தங்களிடம் கேட்கப்பட்டதாக கிரேட்டர் மான்செஸ்டர் காவல்துறை உறுதிப்படுத்தியுள்ளது.

அந்த நபரைத் தனது தளத்திலிருந்து நிரந்தரமாக நீக்கிவிட்டதாக 'முஸ்' தெரிவித்துள்ளது.

"செயலியைப் பயன்படுத்துபவர்களிடம் அவர்கள் திருமணமானவர்களா என்றும், சட்டபூர்வமாகவா அல்லது வேறு முறையிலா என்றும் கேட்கிறோம்" என்று அந்நிறுவனத்தின் தலைமைச் செயல் அதிகாரி ஷாஜாத் யூனுஸ் தெரிவித்தார்.

"அவர்களுக்குத் திருமணமாகியிருந்தால், பதிவு செய்யும் போதே அவர்களைச் செயலியிலிருந்து நாங்கள் தடை செய்துவிடுவோம்."

நிறுவனத்தின் வழக்கமான சோதனையின் ஒரு பகுதியாக மின்னஞ்சல், தொலைபேசி எண், மற்றும் செல்ஃபி ஆகியவற்றைச் சரிபார்ப்பதாக அவர் கூறினார். ஆனால் அடையாளச் சரிபார்ப்பு என்பது விருப்பத்திற்குரியது கட்டாயமில்லை.

சரிபார்ப்புகள் எவை முடிக்கப்பட்டுள்ளன, எவை இன்னும் நிலுவையில் உள்ளன உள்ளிட்ட அனைத்து விவரங்களும் ப்ரொஃபைலில் இடம்பெற்றுள்ளன.

தன்னைப் போல வேறு பெண்களும் பாதிக்கப்படக் கூடாது என்பதற்காகத் தனது அனுபவத்தைப் பகிர்வதாக ஜேன் கூறினார்.

"இந்தச் சமூகத்தில் இது ஒரு பிரச்னையாக உள்ளது. என்னைப் போல மற்றொரு பெண் ஏமாறுவதைத் தடுக்க என்னால் உதவ முடிந்தால், அதுவே எனக்குப் பெரிய வெற்றி" என்று அவர் கூறினார்.

- இது, பிபிசிக்காக கலெக்டிவ் நியூஸ்ரூம் வெளியீடு