செப்டோவெர்ஸ்: இயற்கையின் இந்த நுண் உலகத்தை விஞ்ஞானிகள் ஆராய்வது ஏன்? முக்கியத்துவம் என்ன?

அணுவைவிட 100 பில்லியன் மடங்கு சிறிய அளவில் இருந்து வரும் சமிக்ஞைகளை விஞ்ஞானிகள் கண்டறிந்துள்ளனர். இயற்கையில் இதுவரை ஆராயப்பட்ட மிக நுண்ணிய அளவு இதுவாகும். மிகச் சிறிய இந்த உலகத்தைச் சில இயற்பியலாளர்கள் 'செப்டோவெர்ஸ்' என்று அழைக்கின்றனர்.

கேம்பிரிட்ஜ் பல்கலைக்கழக விஞ்ஞானிகள் தலைமையிலான ஆய்வில், ஐரோப்பிய அணு ஆராய்ச்சி அமைப்பான செர்ன் நடத்திய பரிசோதனையின் மூலம் இந்தக் கண்டுபிடிப்பு நிகழ்ந்துள்ளது.

சுவிட்சர்லாந்து - பிரான்ஸ் எல்லையில், ஜெனீவா நகருக்கு அருகே அமைந்துள்ள செர்னின் மிகப்பெரிய துகள் மோதல் கருவியில் இந்தப் பரிசோதனை நடத்தப்பட்டது.

இந்தப் பிரமாண்டக் கருவி அணுத் துகள்களை மோதச் செய்து, அவற்றின் உள்ளே என்ன இருக்கிறது என்பதைக் கண்டறிய உதவுகிறது. 40 ஆண்டுகளுக்கும் மேலான தேடலுக்குப் பிறகு கிடைத்துள்ள இந்தக் கண்டுபிடிப்பு, அணுவைவிடப் பல பில்லியன் மடங்கு சிறிய மர்மமான உலகத்தை ஆராயவும், பிரபஞ்சம் எவ்வாறு இயங்குகிறது என்பதை விளக்கும் புதிய, விரிவான கோட்பாட்டை உருவாக்கவும் விஞ்ஞானிகளுக்கு உதவக்கூடும்.

செப்டோவெர்ஸ் உலகின் கதவைத் தட்டும் விஞ்ஞானிகள்

நமது பிரபஞ்சத்தின் பெரும் பகுதியை இருண்ட பொருள் உருவாக்குகிறது. ஆனால், அதை நேரடியாகக் கண்டறிவதில் விஞ்ஞானிகள் தொடர்ந்து சவால்களைச் சந்தித்து வருகின்றனர்.

அதன் ஈர்ப்பு விளைவுகள் சாதாரணப் பொருள்களின் மீது ஏற்படுத்தும் தாக்கத்தின் அடிப்படையில், இருண்ட பொருள் இருப்பதை விஞ்ஞானிகள் அறிந்துள்ளனர். ஆனால், மற்ற வகைகளில் அது இதுவரை கண்ணுக்குப் புலப்படாத ஒன்றாகவே இருந்து வருகிறது.

இந்தப் பரிசோதனையில், அதிக ஆற்றலுடன் துகள்கள் மோதச் செய்யப்பட்டன. அந்த மோதல்களுக்குப் பிறகு வெளியேறிய பொருள்கள், அதாவது மோதலின் விளைவாக உருவான துகள்களை விஞ்ஞானிகள் ஆய்வு செய்தனர். அவற்றில் ஒன்று, அணுவைவிடச் சிறிய துணை அணுத் துகளான 'பாட்டம் குவார்க்' ஆகும். இது 'லோயர் குவார்க்' அல்லது 'பியூட்டி குவார்க்' என்றும் அழைக்கப்படுகிறது.

இந்தத் துகள் நிலையானது அல்ல. சுமார் ஒன்றரை டிரில்லியனில் ஒரு பங்கு விநாடி மட்டுமே நீடிக்கும் இது, பின்னர் சிதைந்து வேறு வகையான துகள்களாக மாறிவிடுகிறது. இவ்வளவு குறுகிய காலமே இருக்கும் இந்தத் துகள், மற்ற நுண்ணிய துகள்களுடன் எவ்வாறு வினைபுரிகிறது என்பதை ஒரு டிரில்லியனில் ஒரு பங்கு மீட்டர் அளவிலான மிக நுண்ணிய அளவில் விஞ்ஞானிகளால் கண்டறிய முடிந்தது.

இந்த அளவுகளில் துகள்கள் இருண்ட பொருளால் அதிகம் பாதிக்கப்படக்கூடும் என்று சில கோட்பாடுகள் தெரிவிக்கின்றன. அதாவது, இருண்ட பொருளின் தாக்கம் குவார்க் துகள்களின் வினைபுரிதலையும் சிதைவையும் பாதிக்கக்கூடும். எனவே, இந்த மிக நுண்ணிய உலகில் நிகழும் செயல்பாடுகளைக் கண்டறிவதன் மூலம் இருண்ட பொருளைக் கண்டுபிடிக்க விஞ்ஞானிகளுக்கு வாய்ப்பு கிடைக்கலாம்.

"இந்த அரிய வகைத் துகள்களின் சிதைவைப் பற்றி இயற்பியலாளர்கள் 1984ஆம் ஆண்டு முதலே ஆராய்ந்து வருகின்றனர். அதாவது, நான் பிறப்பதற்கு முன்பிருந்தே இதற்கான தேடல் நடந்து வருகிறது," என்று இந்த ஆய்வின் தரவுப் பகுப்பாய்வுக்குத் தலைமை தாங்கிய கேம்பிரிட்ஜ் பல்கலைக் கழகத்தைச் சேர்ந்த டாக்டர் ஹாரி கிளிஃப் தெரிவித்தார்.

இந்தத் துணை அணுத் துகள்களின் வினைபுரிதலை ஆராய்வதன் மூலம், புதிய துகள்கள் இருக்கக்கூடும் என்பதற்கான சாத்தியங்களைப் புரிந்துகொள்ள விஞ்ஞானிகளுக்கு ஒரு சிறந்த வாய்ப்பு கிடைத்துள்ளதாக அவர் விளக்கினார். "நாங்கள் இப்போது செப்டோவெர்ஸ் உலகின் கதவைத் தட்டிக் கொண்டிருக்கிறோம்," என்று அவர் பிபிசியிடம் தெரிவித்தார்.

"இப்போது நாம் செய்ய வேண்டியது அந்தக் கதவைத் திறந்து உள்ளே சென்று ஆராய்வதுதான். அங்கே என்னென்ன புதிய துகள்கள் காத்திருக்கின்றன என்பதைக் கண்டறிய வேண்டும். அதற்கு நமக்கு இன்னும் அதிகமான தரவுகள் தேவை," என்றும் ஹாரி கிளிஃப் கூறினார்.

மான்செஸ்டர் பல்கலைக் கழகத்தைச் சேர்ந்த இயற்பியல் ஆராய்ச்சியாளரும், அறிவியல் தகவல்களைப் பொது மக்களிடம் கொண்டு சேர்ப்பவருமான பேராசிரியர் பிரையன் காக்ஸ், இந்த ஆய்வுக் குழுவில் இடம்பெறாதவர். இருப்பினும், இந்த ஆய்வு முடிவை அவர் 'முக்கியமானது' என்று வர்ணித்தார்.

பிரிட்டனின் பங்களிப்பு மீதான கேள்விக்குறி

இந்தத் திட்டத்தில் பங்கேற்கும் 28 நாடுகளும், துகள் மோதல் கருவியை மேம்படுத்துவதற்காக 200 மில்லியன் அமெரிக்க டாலர்களை வழங்க ஒப்புக் கொண்டுள்ளன. இந்த மேம்பாட்டின் மூலம் அரிய வகைத் துகள்களின் சிதைவு நிகழ்வுகளைக் கண்டறியும் திறனைப் பத்து மடங்கு அதிகரிக்க முடியும். 2030களில் திட்டமிடப்பட்டுள்ள இந்தப் புதிய தொழில்நுட்ப மேம்பாடுகள், இதுபோன்ற அரிய நிகழ்வுகளை இன்னும் விரிவாக ஆராய உதவும் என்று விஞ்ஞானிகள் நம்புகின்றனர்.

"இதன் மூலம் நாம் செப்டோவெர்ஸ் உலகிற்குள் இன்னும் ஆழமாகச் சென்று, அங்கே என்ன இருக்கிறது என்பதைப் பார்க்க முடியும்," என்று ஹாரி கிளிஃப் தெரிவித்தார். ஆனால், கடந்த ஆண்டு, ஆராய்ச்சிக்கான நிதியை வழங்கும் பிரிட்டன் அரசின் அமைப்பான யூகே ரிசர்ச் அண்ட் இனோவேஷன் (யூகேஆர்ஐ), திட்டமிடப்பட்டுள்ள இந்த மேம்பாட்டுக்காக ஒதுக்கப்பட்டிருந்த தனது நிதிப் பங்களிப்பைத் திரும்பப் பெறுவதாக அறிவித்தது.

இந்த ஆய்வுக்கு கேம்பிரிட்ஜ் பல்கலைக்கழக விஞ்ஞானிகள் தலைமை தாங்கியிருந்தாலும், நிதி ஒதுக்கீட்டில் ஏற்பட்டுள்ள இந்த மாற்றங்களால் பிரிட்டனின் முழுமையான பங்கேற்பு கேள்விக்குறியாகியுள்ளது. எல்.ஹச்.சி.பி சர்வதேச ஆய்வுக் கூட்டமைப்புக்குத் தலைமை தாங்கும் பேராசிரியர் டிம் கெர்ஷன், இதுகுறித்து பிபிசியிடம் பேசுகையில், பிரிட்டன் இந்த ஆராய்ச்சியில் பங்கேற்காமல் போகும் அபாயம் இருப்பதாகத் தெரிவித்தார்.

"மிக முக்கியமான கண்டுபிடிப்புகளைச் செய்வதற்கான வாய்ப்பை இழப்பதுடன், இந்த ஆராய்ச்சியில் பிரிட்டன் பங்கேற்காமல் போகும் அபாயமும் உள்ளது," என்று அவர் கூறினார்.

பிபிசி அறிவியல் செய்தியாளர் பல்லப் கோஷ், அறிவியல் செய்தியாளர் ஜோஷ் கோல்ஷ் ஆகியோரின் தகவல்களுடன்

- இது, பிபிசிக்காக கலெக்டிவ் நியூஸ்ரூம் வெளியீடு