நெதன்யாகுவுக்கு பதிலாக ஐசென்கோட் இஸ்ரேல் பிரதமரானால் இந்தியாவுக்கு ஏற்படும் தாக்கங்கள் என்ன?

இஸ்ரேலில் புதிய அரசாங்கம் அமைப்பது தொடர்பான அரசியல் நிலவரம் தற்போது தெளிவாகியுள்ளது. பிரதமர் பெஞ்சமின் நெதன்யாகுவின் 'லிக்குட்' கட்சி தனிப்பெரும் கட்சியாக உருவெடுத்துள்ளது. இருப்பினும், அவரது தலைமையிலான கூட்டணியால் ஆட்சியமைக்கத் தேவையான 61 இடங்கள் என்ற பெரும்பான்மை இலக்கை எட்ட முடியவில்லை.

இதையடுத்து, நவம்பர் 8ஆம் தேதி, இஸ்ரேல் அதிபர் ஐசக் ஹெர்சாக், முன்னாள் ராணுவத் தளபதி காடி ஐசென்கோட்டை புதிய அரசாங்கத்தை அமைக்க அழைப்பு விடுத்தார். அவருக்கு 67 நாடாளுமன்ற உறுப்பினர்களின் ஆதரவு இருப்பதாகத் தகவல்கள் தெரிவிக்கின்றன. இது பெரும்பான்மைக்குத் தேவையான எண்ணிக்கையைவிட ஆறு இடங்கள் அதிகம்.

இஸ்ரேல், இந்தியா இடையே நீண்ட காலமாக நெருக்கமான உறவு நீடித்து வருவதால், அந்நாட்டின் அரசியல் மாற்றங்களை இந்தியாவும் உன்னிப்பாகக் கவனித்து வருகிறது. குறிப்பாக, பிரதமர் நரேந்திர மோதிக்கும், நெதன்யாகுவுக்கும் இடையே தனிப்பட்ட நட்புறவு உள்ளது. இருவரது ஆட்சிக் காலத்திலும் பாதுகாப்பு, தொழில்நுட்பம், ராணுவம் உள்ளிட்ட பல்வேறு துறைகளில் இந்தியா - இஸ்ரேல் உறவு குறிப்பிடத்தக்க அளவில் வலுப்பெற்றுள்ளது குறிப்பிடத்தக்கது.

இந்தச் சூழலில், ஐசென்கோட் புதிய அரசாங்கத்தை அமைத்தால், இந்தியா - இஸ்ரேல் உறவில் என்ன மாற்றங்கள் ஏற்படக்கூடும் என்ற கேள்வி எழுகிறது. பிரதமர் நரேந்திர மோதி தலைமையிலான இந்திய அரசு புதிய பிரதமருடனும் தற்போதுள்ள அதே அளவிலான நெருக்கத்தை ஏற்படுத்திக் கொள்ளுமா? இல்லை அதற்கு நீண்ட காலம் ஆகுமா?

மோதி, நெதன்யாகு நட்புறவு இரு நாட்டு உறவுகளில் தாக்கத்தை ஏற்படுத்துமா?

இந்தியா, இஸ்ரேல் இடையே முழுமையான தூதரக உறவுகள் 1992ஆம் ஆண்டு ஜனவரியில் தொடங்கின. இருப்பினும், 2017ஆம் ஆண்டு ஜூலையில் இந்திய பிரதமர் நரேந்திர மோதி இஸ்ரேலுக்கு பயணம் மேற்கொண்டது, இரு நாடுகளின் உறவில் முக்கியமானதொரு திருப்புமுனையாக அமைந்தது. இந்திய பிரதமர் ஒருவர் இஸ்ரேலுக்கு சென்றது அதுவே முதல்முறை.

அதன் பிறகு, பெஞ்சமின் நெதன்யாகுவுக்கும் நரேந்திர மோதிக்கும் இடையிலான தனிப்பட்ட நட்புறவும் இரு நாடுகளின் உறவில் முக்கியத்துவம் பெற்றது. 2018ஆம் ஆண்டு ஜனவரியில் நெதன்யாகு இந்தியாவுக்கு வருகை தந்தார்.

அண்மையில், 2026ஆம் ஆண்டு பிப்ரவரியில் இந்திய பிரதமர் நரேந்திர மோதி இஸ்ரேலுக்கு சென்றபோதும், இரு தலைவர்களும் மிகுந்த அன்புடனும் நெருக்கத்துடனும் சந்தித்துக்கொண்டனர்.

மோதியை தனது "நண்பரைவிட மேலானவர், ஒரு சகோதரர்" என்று நெதன்யாகு வர்ணித்தார். இஸ்ரேல் நாடாளுமன்றத்தின் சிறப்புக் கூட்டத்தில் உரையாற்றிய அவர், "உலக அரங்கில் ஒரு சிறந்த தலைவர்" நரேந்திர மோதி என்றும், சுமார் 150 கோடி மக்களைக் கொண்ட இந்தியாவை "ஒரு மாபெரும் சக்தி" என்றும் குறிப்பிட்டார்.

நெதன்யாகுவின் மற்றொரு கருத்தும் இரு தலைவர்களுக்கும் இடையிலான நெருக்கத்தை வெளிப்படுத்தியது. "இந்தியா, இஸ்ரேல் இடையிலான சகோதரத்துவத்தை மையமாகக் கொண்டு எதிர்காலத்தில், ஹாலிவுட், ஒரு திரைப்படத்தை உருவாக்கும் என்றும், அது மிகப்பெரிய வெற்றி பெறும் என்றும் நம்புகிறேன்" என்று அவர் கூறினார்.

இருப்பினும், இஸ்ரேலில் ஆட்சி மாற்றம் ஏற்பட்டாலும், இந்தியாவுடனான பாதுகாப்பு உள்ளிட்ட முக்கிய உறவுகளில் பெரிய பாதிப்பு ஏற்பட வாய்ப்பில்லை என்று நிபுணர்கள் கருதுகின்றனர். அதேவேளையில், புதிய பிரதமர் பொறுப்பேற்பது இரு நாடுகளின் தலைவர்களுக்கு இடையிலான தனிப்பட்ட நட்புறவிலும், அவர்களின் வெளியுறவுக் கொள்கை அணுகுமுறைகளிலும் மாற்றங்களை ஏற்படுத்தக்கூடும்.

ஓ.பி. ஜிண்டால் குளோபல் பல்கலைக்கழகப் பேராசிரியரும், ஜிண்டால் இஸ்ரேல் ஆய்வு மையத்தின் இயக்குநருமான கிங்வ்ராஜ் ஜங்கிட், இந்தியா - இஸ்ரேல் இடையிலான உறவுகள் தற்போது வலுவாக இருப்பதால், இஸ்ரேலில் ஆட்சி மாற்றம் ஏற்பட்டாலும் இரு நாடுகளுக்கு இடையிலான உறவில் பெரிய பாதிப்பு ஏற்படாது என்று கருதுகிறார்.

பிபிசியிடம் பேசிய அவர், "இஸ்ரேலின் அனைத்துக் கட்சிகள் மற்றும் அரசியல் தலைவர்கள் மத்தியிலும் இந்தியாவுக்கு நல்ல மதிப்பு உள்ளது. குறிப்பாக, இந்தியாவுடனான மூலோபாய மற்றும் பாதுகாப்புக் கூட்டாண்மையை இஸ்ரேலின் அனைத்துத் தரப்பினரும் முக்கியமானதாகக் கருதுகின்றனர்" எனக் கூறுகிறார்.

இருப்பினும், நெதன்யாகு பிரதமர் பதவியிலிருந்து விலகினால், இந்தியாவுடனான உறவில் தனிப்பட்ட தலைவர்களுக்கு இடையிலான நெருக்கத்தில் மாற்றங்கள் ஏற்படலாம்.

இதுகுறித்துக் கூறும் ஜங்கிட், "பிரதமர் மோதிக்கும் நெதன்யாகுவுக்கும் இடையே நெருக்கமான உறவு இருந்தது. எனவே, இஸ்ரேலில் ஆட்சி மாற்றம் ஏற்படாமல், நெதன்யாகுவே மீண்டும் பிரதமராக வேண்டும் என்று இந்திய அரசு விரும்பியிருக்கலாம். சர்வதேச அரசியலில், இரு நாட்டுத் தலைவர்களும் ஒருவருக்கொருவர் எதிர்கொள்ளும் சவால்களையும் சூழல்களையும் இயல்பாகப் புரிந்துகொள்ளும் வகையிலான தனிப்பட்ட பிணைப்புகள் அரிதானவை. இப்போது இந்தியா, ஐசென்கோட்டுடன் புதிதாக உறவை வளர்த்துக்கொள்ள வேண்டியிருக்கும்" என்றார்.

மேலும், "ஐசென்கோட்டுடன் இந்தியாவுக்கு, நெதன்யாகுவுடன் இருந்ததைப் போன்ற தனிப்பட்ட நெருக்கம் ஏற்படாமல் போகலாம். இருப்பினும், இந்தியாவுடனான அவரது உறவு, தனிப்பட்ட நட்பின் அடிப்படையில் அமையாது. மாறாக, இஸ்ரேலின் மூலோபாய நலன்களுக்கு இந்தியா எந்த அளவுக்கு முக்கியமானது என்பதன் அடிப்படையிலேயே அது அமையும்" என்றும் அவர் குறிப்பிட்டார்.

'பாதுகாப்பு ஒத்துழைப்பில் பாதிப்பு இருக்காது'

இந்தியா - இஸ்ரேல் உறவில் பாதுகாப்புத் துறை ஒத்துழைப்பே மிக முக்கியமான அம்சமாக விளங்குகிறது. ஏவுகணைத் தொழில்நுட்பம், வான் பாதுகாப்பு, டிரோன்கள், கண்காணிப்புத் தொழில்நுட்பம், பாதுகாப்புத் தளவாட உற்பத்தி உள்ளிட்ட பல்வேறு துறைகளில் இரு நாடுகளும் பல ஆண்டுகளாக இணைந்து செயல்பட்டு வருகின்றன.

இரு நாடுகளும் இணைந்து உருவாக்கிய 'பாரக்-8' வான் பாதுகாப்பு அமைப்பு, இந்த ஒத்துழைப்புக்கு ஒரு முக்கிய உதாரணம்.

'தி ஜெருசலேம் போஸ்ட்' இதழின் தகவல்படி, 2021 முதல் 2025 வரையிலான காலகட்டத்தில் இஸ்ரேலின் மொத்த ஆயுத ஏற்றுமதியில் 29% இந்தியாவுக்கு சென்றுள்ளது. இதன் மூலம், அந்தக் காலகட்டத்தில் இஸ்ரேலிய ஆயுதங்களை அதிக அளவில் வாங்கிய நாடாக இந்தியா திகழ்கிறது.

சிம்பயோசிஸ் சர்வதேச ஆய்வுகள் பள்ளியின் உதவிப் பேராசிரியர் முனைவர் ஆல்வைட் நிங்தோஜம், இந்தியா - இஸ்ரேல் பாதுகாப்பு உறவு என்பது ஆயுதங்களை வாங்குவதும் விற்பதுமாக மட்டும் நின்றுவிடவில்லை என்கிறார்.

'தி டிப்ளமேட்' இதழில் அவர் எழுதிய கட்டுரையில், 2025 நவம்பரில் எட்டப்பட்ட பாதுகாப்பு ஒப்பந்தமும், கூட்டுத் திட்டங்கள் தொடர்பாகத் தொடர்ந்து நடைபெறும் பேச்சுவார்த்தைகளும் இந்த ஒத்துழைப்பின் நீடித்த தன்மையை வெளிப்படுத்துவதாகக் குறிப்பிட்டுள்ளார். அதாவது, இந்த உறவு ஒரு குறிப்பிட்ட அரசாங்கத்தையோ அல்லது தலைவரையோ மட்டுமே சார்ந்திருக்கவில்லை என்பதே அவரது கருத்தாக உள்ளது.

இஸ்ரேலில் புதிய அரசாங்கம் அமைந்தால், சில பாதுகாப்புத் திட்டங்களின் முன்னுரிமைகள், செயல்படுத்துவதற்கான காலக்கெடு அல்லது அவற்றின் நிபந்தனைகள் மறுபரிசீலனை செய்யப்படலாம். இருப்பினும், ஒட்டுமொத்த பாதுகாப்பு ஒத்துழைப்பும் முடங்கிவிட வாய்ப்பில்லை என்று அவர் கருதுகிறார்.

பேராசிரியர் கீன்ராஜ் ஜங்கிட், இந்தியா - இஸ்ரேல் உறவு மூன்று முக்கிய அம்சங்களை அடிப்படையாகக் கொண்டிருப்பதாகக் கூறுகிறார். அவை: பாதுகாப்புத் துறை ஒத்துழைப்பு, விவசாயம் மற்றும் ஆராய்ச்சியில் தொழில்நுட்பப் பரிமாற்றம், அரசியல் மற்றும் மூலோபாய நலன்களில் இரு நாடுகளுக்கும் இடையே நிலவும் ஒத்த கருத்து ஆகியவை.

இதுகுறித்து அவர் கூறுகையில், "பாதுகாப்புத் துறையில் இந்தியாவுக்கு நவீன ராணுவத் தொழில்நுட்பமும் அதற்குத் தேவையான வளங்களும் தேவைப்படுகின்றன. மறுபுறம், இஸ்ரேலுக்கு இந்தியா மிகப்பெரிய சந்தையாகவும் முக்கியமான மூலோபாயக் கூட்டாளியாகவும் உள்ளது. இவ்வாறு இரு நாடுகளின் தேவைகளும் ஒன்றுக்கொன்று துணையாக இருக்கின்றன. அதனால்தான், அரசாங்கங்கள் மாறினாலும் இரு நாடுகளுக்கு இடையிலான இந்த ஒத்துழைப்பு தொடர்ந்து நீடிக்க வாய்ப்புள்ளது," என்றார்.

'இந்தியா கவனமாகச் செயல்பட வேண்டும்'

ஐசென்கோட், 2015 முதல் 2019 வரை இஸ்ரேலிய பாதுகாப்புப் படைகளின் தலைமைத் தளபதியாகப் பணியாற்றியவர். இரானையும், மத்திய கிழக்கில் அதற்கு ஆதரவாகச் செயல்படும் ஆயுதக் குழுக்களையும் இஸ்ரேலின் பாதுகாப்புக்கு முக்கிய அச்சுறுத்தல்களாகக் கருதும் ராணுவ வியூக நிபுணராக அவர் அறியப்படுகிறார்.

எனவே, ஐசென்கோட் பிரதமரானால், இஸ்ரேலின் பாதுகாப்பு மற்றும் ராணுவக் கொள்கைகளில் அடிப்படையான மாற்றங்கள் ஏற்படும் என்று கருத முடியாது. அதேவேளையில், நெதன்யாகுவுடன் ஒப்பிடும்போது, வெளியுறவுக் கொள்கையில் அவருக்கு வேறுபட்ட முன்னுரிமைகள் இருக்கலாம். சர்வதேச உறவுகளைக் கையாள்வதிலும் மாறுபட்ட அணுகுமுறையை அவர் பின்பற்றக்கூடும். இதனால், இந்தியா - இஸ்ரேல் உறவிலும் சில மாற்றங்கள் ஏற்பட வாய்ப்புள்ளதாக சர்வதேச விவகார நிபுணரும், ஜாமியா மிலியா இஸ்லாமியா பல்கலைக்கழகப் பேராசிரியருமான ரஷ்மி காஸி கருதுகிறார்.

பிபிசியிடம் பேசிய அவர், இரு நாடுகளுக்கும் இடையிலான உறவின் அடிப்படையான மூலோபாய நலன்கள் தொடர்ந்து ஒரே நிலையில் இருக்கக்கூடும் என்றும், அதேநேரத்தில் தூதரக உறவுகளைக் கையாளும் விதத்திலும், தலைவர்களுக்கு இடையிலான அணுகுமுறையிலும் மாற்றங்கள் ஏற்படலாம் என்றும் தெரிவித்தார்.

ரேஷ்மி காஸி கூறுகையில், "இந்தியா - இஸ்ரேல் உறவின் அடிப்படையான அம்சங்கள் தொடர்ந்து வலுவாக நீடிக்கும். இருப்பினும், தூதரக உறவுகளைக் கையாளும் விதத்தில் சில மாற்றங்கள் ஏற்படலாம். உதாரணமாக, பாலத்தீனம் மற்றும் காஸா விவகாரத்தில் இந்தியா தொடர்ந்து இரு நாட்டுத் தீர்வை ஆதரித்து வருகிறது. ஆனால், இஸ்ரேல் இந்தத் தீர்வை ஏற்கவில்லை" என்றார்.

அதேநேரத்தில், எரிசக்தி, வர்த்தகம் மற்றும் பிராந்திய இணைப்புத் திட்டங்கள் தொடர்பாக இரானுடன் இந்தியாவுக்கு பல்வேறு நலன்கள் உள்ளன. குறிப்பாக, சாபஹார் துறைமுகம் வழியாக மத்திய ஆசிய நாடுகளுடனான தனது வர்த்தக மற்றும் போக்குவரத்துத் தொடர்புகளை வலுப்படுத்த இந்தியா திட்டமிட்டுள்ளது. எனவே, இந்த விவகாரத்தில் இந்தியா மிகவும் கவனமாகச் செயல்பட வேண்டியிருக்கும் என்று ரேஷ்மி காஸி கருதுகிறார்.

"இஸ்ரேலுடனான பாதுகாப்பு ஒத்துழைப்பைத் தொடர்ந்து வலுப்படுத்தும் அதேவேளையில், இரான் உள்ளிட்ட பிற நாடுகளுடனான உறவுகளையும் பேண வேண்டும். இதற்காக, தனது வெளியுறவுக் கொள்கையில் 'மூலோபாய சுயாட்சியை' எவ்வாறு தக்கவைத்துக் கொள்வது என்பதை இந்தியா கவனமாகத் தீர்மானிக்க வேண்டும்" என்று அவர் குறிப்பிட்டார்.

இதுதவிர, பல்வேறு நாடுகளை இணைக்கும் போக்குவரத்து மற்றும் வர்த்தக வழித்தடத் திட்டங்களும், இந்தியா, இஸ்ரேல், ஐக்கிய அரபு அமீரகம் மற்றும் அமெரிக்கா ஆகிய நாடுகளை உள்ளடக்கிய I2U2 கூட்டமைப்பும் இந்த உறவில் முக்கியப் பங்கு வகிக்கின்றன.

வர்த்தக வழித்தடத் திட்டங்கள் மற்றும் ஐ2யூ2 கூட்டமைப்பு

கடந்த 2025-26 நிதியாண்டில், இந்தியா - இஸ்ரேல் இடையிலான இருதரப்பு வர்த்தகத்தின் மதிப்பு சுமார் 3.93 பில்லியன் அமெரிக்க டாலர்களாக இருந்தது. இரு நாடுகளுக்கு இடையிலான உறவு, பாதுகாப்பு மற்றும் ராணுவ ஒத்துழைப்புடன் மட்டும் நின்றுவிடவில்லை என்பதை இந்த வர்த்தக மதிப்பு எடுத்துக்காட்டுகிறது.

விவசாயம், நீர் மேலாண்மை, கடல்நீரைக் குடிநீராக்கும் தொழில்நுட்பம், செயற்கை நுண்ணறிவு, இணையப் பாதுகாப்பு உள்ளிட்ட பல்வேறு துறைகளிலும் இரு நாடுகளும் தங்களது ஒத்துழைப்பை விரிவுபடுத்தி வருகின்றன.

மேலும், 'இந்தியா - மத்திய கிழக்கு - ஐரோப்பா பொருளாதார வழித்தடம்' மற்றும் இந்தியா, இஸ்ரேல், ஐக்கிய அரபு எமிரேட்ஸ், அமெரிக்கா ஆகிய நான்கு நாடுகளை உள்ளடக்கிய 'ஐ2யூ2' கூட்டமைப்பு ஆகியவையும் வர்த்தக உறவுகளை வலுப்படுத்துவதில் முக்கியப் பங்கு வகிக்கின்றன. ஆனால், மத்திய கிழக்கில் தொடர்ந்து நிலவும் மோதல்களும் அரசியல் நிலையற்ற தன்மையும் இந்தத் திட்டங்களைச் செயல்படுத்துவதில் சவால்களை ஏற்படுத்துகின்றன.

இத்தகைய திட்டங்கள் தடையின்றி முன்னேற வேண்டுமானால், பிராந்தியத்தில் நிலவும் பதற்றங்களைக் குறைப்பது அவசியம் என்று முனைவர் நிங்தோஜாம் கூறுகிறார். இஸ்ரேலுக்கும் அதன் அண்டை நாடுகளுக்கும் இடையே மோதல்கள் தீவிரமடைந்தால், வர்த்தகம், கடல்வழிப் போக்குவரத்து மற்றும் நாடுகளுக்கு இடையிலான போக்குவரத்து இணைப்புகள் பாதிக்கப்படக்கூடும் என்றும் அவர் எச்சரிக்கிறார்.

புதிய தலைவர்களுடன் நல்லுறவை வளர்த்துக்கொள்வது ஒரு நாட்டின் வெளியுறவுக் கொள்கையின் இயல்பான பகுதி என்று ரேஷ்மி காஸி கருதுகிறார். இதுகுறித்து அவர் கூறுகையில், "பிரதமர் மோதி, நெதன்யாகு இடையிலான தனிப்பட்ட நெருக்கம் தொடர்ந்து முக்கியத்துவம் பெறும். அதேநேரத்தில், ஐசென்கோட்டுடனும் அரசியல் மற்றும் மூலோபாய விவகாரங்களில் இணக்கமான உறவை ஏற்படுத்திக் கொள்ள இந்தியா முயல வேண்டும்" என்றார்.

- இது, பிபிசிக்காக கலெக்டிவ் நியூஸ்ரூம் வெளியீடு