'பிரிந்து வாழ முடிவு': பவன் கல்யாண் - அனா கொனிடேலா பிரிவை உறுதிப்படுத்திய ஜனசேனா கட்சி வட்டாரங்கள்

ஆந்திரப் பிரதேச துணை முதலமைச்சரும் நடிகருமான பவன் கல்யாணும் அவரது மனைவி அனா கொனிடெலாவும் (அனா லெஷ்னேவா) பரஸ்பரப் புரிதலுடன் பிரிவதாக அதிகாரபூர்வமாக அறிவித்துள்ளனர்.

இதற்கு முன்பு இருவரும் விவாகரத்து செய்யப்போவதாகப் பல வதந்திகள் வெளியான நிலையில், 2026 நவம்பர் 9ஆம் தேதி இருவரும் கூட்டறிக்கை வெளியிட்டு, தங்களது 13 ஆண்டுகால திருமண வாழ்க்கையை முடிவுக்குக் கொண்டுவருவதாகத் தெரிவித்துள்ளனர்.

இந்தத் தகவலை ஜனசேனா கட்சியின் ஊடகப் பிரிவு வெளியிட்டுள்ளது. ஜனசேனா கட்சியை சேர்ந்த, பெயர் வெளியிட விரும்பாத தலைவர்கள் இதை பிபிசியிடம் உறுதிப்படுத்தினர்.

பரஸ்பர முடிவின் அடிப்படையிலேயே தாங்கள் பிரிந்து வாழத் தீர்மானித்துள்ளதாக இருவரும் அந்தக் கூட்டறிக்கையில் குறிப்பிட்டுள்ளனர்.

எனினும் கூட்டறிக்கையைத் தவிர இருவரும் தனிப்பட்ட முறையில் எந்தக் கருத்தையும் தெரிவிக்கவில்லை.

அவர்களது சமூக ஊடகப் பக்கங்களிலும் இதுகுறித்த எந்தப் பதிவும் இல்லை. பவன் கல்யாணின் அண்ணன் சிரஞ்சீவி குடும்பத்திலிருந்தும் இதுகுறித்து எந்த அறிவிப்போ எதிர்வினையோ வெளியாகவில்லை.

திருமண உறவு முடிவுக்கு வந்தாலும், இருவரும் எப்போதும் நல்ல நண்பர்களாகத் தொடர்வோம் என்று பவன் கல்யாணும் அனா கொனிடெலாவும் அந்த அறிக்கையில் தெளிவுபடுத்தியுள்ளனர்.

ஒருவருக்கொருவர் மரியாதை அளித்தும், பரஸ்பர புரிதலுடனும் பிரிந்து வாழ முடிவு செய்ததாக அவர்கள் குறிப்பிட்டுள்ளனர்.

குழந்தைகளின் மகிழ்ச்சியும் அவர்களுக்கான பொறுப்புகளுமே தங்களது முதல் முன்னுரிமை என்றும், குழந்தைகளுக்காக எப்போதும் அர்ப்பணிப்புடன் இருப்போம் என்றும் பவனும் அனாவும் அந்த அறிக்கையில் தெரிவித்துள்ளனர்.

வாழ்க்கையில் இந்த மாற்றம் நிகழும் தருணத்தில் அனைவரும் கனிவுடன் நடந்துகொண்டு, தங்களது தனிப்பட்ட வாழ்க்கைக்கான தனியுரிமையை மதிக்க வேண்டும் என்று பவனும் அனாவும் கேட்டுக்கொண்டுள்ளனர்.

மூன்று திருமணங்கள்... நான்கு குழந்தைகள்!

பவன் கல்யாண் சட்டப்படி இதுவரை மூன்று திருமணங்கள் செய்துள்ளார்.

1997-ஆம் ஆண்டு நந்தினியை பவன் கல்யாண் முதன்முதலில் திருமணம் செய்துகொண்டார். 2008-ஆம் ஆண்டு இருவரும் விவாகரத்து செய்துகொண்டனர்.

அதன்பிறகு, நடிகை ரேணு தேசாயை 2009-ஆம் ஆண்டு திருமணம் செய்துகொண்டார். ஆனால், 2012-ஆம் ஆண்டு இருவரும் பிரிந்தனர். இவர்களுக்கு அகிரா நந்தன், ஆத்யா என இரண்டு குழந்தைகள் உள்ளனர்.

அதன்பிறகு, ரஷ்யாவைச் சேர்ந்த அனாவை 2013-ஆம் ஆண்டு பவன் கல்யாண் திருமணம் செய்துகொண்டார். இந்தத் தம்பதிக்கு இரண்டு குழந்தைகள் உள்ளனர்.

மொத்தத்தில் பவன் கல்யாணுக்கு நான்கு குழந்தைகள் உள்ளனர்.

திடீர் முடிவு

பவன் கல்யாணும் அனா கொனிடெலாவும் பிரியப்போவதாக எந்த அறிகுறியும் அண்மைக்காலத்தில் தென்படவில்லை. அது தொடர்பான வதந்திகளும் சமீபத்தில் வெளியாகவில்லை.

மனைவி என்ற முறையில் பல்வேறு அதிகாரப்பூர்வ நிகழ்ச்சிகளில் பவன் கல்யாணுடன் அனா பங்கேற்றுள்ளார்.

சட்டமன்ற உறுப்பினராக வெற்றிபெற்று துணை முதல்வரான நேரத்தில், பிரதமர் நரேந்திர மோதியைச் சந்திக்கச் சென்றபோதும் பவன் தனது மனைவியை உடன் அழைத்துச் சென்றார்.

ஆகஸ்ட் 15 சுதந்திர தினக் கொண்டாட்டங்களிலும் அனா தனது கணவருடன் பங்கேற்றார். அந்த நிகழ்ச்சி முழுவதும் அவர் பவன் கல்யாணுடன் இருந்தார்.

அண்மையில்கூட திருப்பதிக்குப் படிக்கட்டுப் பாதை வழியாகச் சென்று அனா முடி காணிக்கை செலுத்தினார்.

ஆனால், இவ்வாறு திடீரென இருவரும் பிரிந்து வாழப்போவதாக அறிவித்திருப்பது திரையுலகிலும் அரசியல் வட்டாரங்களிலும் விவாதத்தை ஏற்படுத்தியுள்ளது.

- இது, பிபிசிக்காக கலெக்டிவ் நியூஸ்ரூம் வெளியீடு