வங்கதேசத்தின் 'குடிசைப் பகுதிகளை' டெல்லி எனக் கூறிய சீன வீடியோக்கள் - இந்தியா அதிருப்தி

வங்கதேசத் தலைநகர் டாக்காவில் உள்ள ஏழை மக்கள் வசிக்கும் குடியிருப்புப் பகுதிகளில் காணொளிகளைப் பதிவு செய்து, அவற்றை இந்திய தலைநகர் புதுடெல்லி என்று கூறிய சம்பவம் வெளியாகியுள்ளது.

சீன நாட்டவர்கள் அடங்கிய ஒரு குழு டாக்காவின் பல்வேறு பகுதிகளுக்குச் சென்று, அங்குள்ள வாழ்க்கை முறையையும் அடிப்படை வசதிகளையும் இந்தியாவுடையவை என்று கூறி, சீன சமூக ஊடகத் தளங்களில் நேரலையாக ஒளிபரப்பி வந்ததாகக் குற்றம் சாட்டப்படுகிறது.

இதற்கு எதிர்வினையாக இந்தியா தனது அதிருப்தியைத் தெரிவித்துள்ளது. வெளியுறவு அமைச்சகம் இதை 'பொய்யான கருத்துருவாக்கத்தைப் பரப்பும்' முயற்சி என்று கூறியுள்ளது. எனினும், இந்த விவகாரத்தில் சீனாவிடம் இருந்து இதுவரை எந்த எதிர்வினையும் வரவில்லை.

"இது தொடர்பான ஊடக செய்திகளை நாங்கள் பார்த்தோம். எந்தவொரு நாட்டையும் திரித்துக் காட்ட முயலும் இத்தகைய முயற்சிகள் துரதிர்ஷ்டவசமானவை," என இந்திய வெளியுறவு அமைச்சக செய்தித் தொடர்பாளர் ரன்தீர் ஜெய்ஸ்வால் செவ்வாய்க்கிழமை கூறினார்.

"டாக்காவின் சில பகுதிகளை டெல்லி என்று காட்ட வெளிநாட்டு சக்திகள் மேற்கொள்ளும் முயற்சி பொய்யான கருத்துருவாக்கத்தை ஊக்குவிக்கிறது. இது அவ்வாறு செய்பவர்களின் நம்பகத்தன்மையை, அவர்களுக்குப் பின்னால் இருப்பவர்களின் நம்பகத்தன்மையை மட்டுமே பலவீனப்படுத்துகிறது. அத்தகையவர்கள் மீது நடவடிக்கை எடுக்குமாறு சம்பந்தப்பட்ட அதிகாரிகளை நான் கேட்டுக்கொள்வேன்," என்று அவர் கூறினார்.

வங்கதேச நாளிதழ் வெளியிட்ட செய்தி கூறுவது என்ன?

வங்கதேச நாளிதழான பிரதம் ஆலோவின் செய்தி ஒன்றில், டாக்காவில் சீன நாட்டவர்கள் அடங்கிய ஒரு குழு ஏழை மக்கள் வசிக்கும் பகுதிகளைப் படம்பிடித்து வந்ததாகக் கூறப்பட்டுள்ளது. இவர்கள் அந்த காணொளிகளை சீன சமூக ஊடக தளங்களான டூயின் மற்றும் வீசாட்டில் ஒளிபரப்பி வந்தனர்.

காணொளிகளில் டாக்காவின் பகுதிகளை புது டெல்லி என்று கூறி, 'இந்தியாவின் வறுமை மற்றும் மோசமான அடிப்படை வசதிகள்' குறித்த சித்திரத்தை அவர்கள் முன்வைத்ததாக அந்தச் செய்தியில் கூறப்பட்டுள்ளது.

டாக்காவின் உத்தரா பகுதியில் உள்ள 12வது செக்டார், டெக்பாரா ஆகிய இடங்களின் குறுகிய தெருக்களுக்குச் சென்று சீனக் குழுக்கள் காணொளிகளைப் பதிவு செய்ததாக அந்தச் செய்தி கூறுகிறது. குறைந்த வருமானம் கொண்ட குடும்பங்கள் வசிக்கும் இந்தப் பகுதிகளில், தகரக் கூரைகளைக் கொண்ட பல வீடுகள் உள்ளன.

"இது போன்ற வீடியோக்களை எடுக்கும் 150க்கும் மேற்பட்ட சீன நாட்டவர்கள் அந்தப் பகுதியின் சாலைகளிலும் குறுகிய தெருக்களிலும் சுற்றித் திரிவதைக் காணலாம் என்று உள்ளூர் மக்கள் கூறுகின்றனர். இருப்பினும், இந்த வீடியோக்கள் எந்தத் தளங்களில் பதிவேற்றப்படுகின்றன, அவற்றில் என்ன பேசப்படுகிறது என்பது மக்களுக்குத் தெரியவில்லை. உள்ளூர் காவல்துறையும் இவர்களின் செயல்பாடுகளைக் கண்காணிக்கவில்லை."

"தொடக்கத்தில் காலை முதல் இரவு வரை தொடர்ந்து நேரலை ஒளிபரப்பு செய்த இவர்களைப் பார்க்க உள்ளூர்வாசிகளுக்கு ஆர்வம் இருந்தது, ஆனால் இப்போது இதே செயல்பாடுகள் அவர்களுக்குத் தொந்தரவையும் அதிருப்தியையும் ஏற்படுத்தும் காரணமாக மாறிவிட்டன" என அந்தச் செய்தியில் கூறப்பட்டுள்ளது.

டாக்காவை புதுடெல்லி என்று கூறிய பெண்; வீடுகள் அழுக்காக இருப்பதாக விமர்சனம்

இந்தச் சம்பவம் தொடர்பாக மியாமியான் என்ற சீனப் பெண் ஒருவரைப் பற்றியும் பிரதம் ஆலோ செய்தியில் குறிப்பிடப்பட்டுள்ளது. சீனாவின் சிச்சுவான் மாகாணத்தைச் சேர்ந்தவர் என்று அவர் கூறியிருந்தார். நவம்பர் 1 அன்று உத்தராவின் செக்டர்-12இல் கால்வாய் அருகிலிருந்து அவர் நேரலை வீடியோ எடுத்ததாகவும், அந்தப் பகுதியை புது டெல்லி என்று கூறியதாகவும் குற்றம் சாட்டப்படுகிறது. இந்தியாவில் மக்கள் கழிவறையைப் பயன்படுத்தும் முறையையும் மியான்மியான் விவரித்தார்.

அந்த வீடியோவில் அப்பெண் அங்குள்ள வீடுகளையும் அடிப்படை வசதிகளையும் விமர்சித்தார். "இங்குள்ள வீடுகள் மிகவும் அழுக்காக உள்ளன, தகரக் கூரை வீடுகளில் மின்விசிறிகள்கூட இல்லை" என்று அவர் கூறினார். அந்தப் பகுதி பின்தங்கியதாகவும் சுகாதாரமற்றதாகவும் இருப்பதாகக் குறிப்பிட்ட அவர், சட்டம் ஒழுங்கு குறித்தும் கேள்வி எழுப்பியுள்ளார்.

டெக்பாரா பகுதியில் தேநீர் விற்பனை செய்பவர்களைக் காணொளி எடுத்துக்கொண்டிருந்த வாங் வெய் என்ற மற்றொரு சீனக் குடிமகனைப் பற்றியும் பிரதம் ஆலோ செய்தியில் குறிப்பிடப்பட்டுள்ளது.

"அவர் உள்ளூர் மக்களின் தேநீர் குறித்து அவமதிக்கும் வகையில் கருத்து தெரிவித்து, இந்தத் தேநீர் பசுவின் சிறுநீரில் தயாரிக்கப்படுகிறது என்று கூறினார். மற்றொரு தேநீர்க் கடையின் முன் நின்று, அங்கு மக்கள் குடிக்கும் தேநீர் அசுத்தமான நதிநீரில் தயாரிக்கப்பட்டதாகக் கூறினார். உள்ளூர் மக்களின் வாழ்க்கை முறையும் மிகவும் சுகாதாரமற்றதாக இருப்பதாக அவர் விவரித்தார்" என்று அந்தச் செய்தியில் கூறப்பட்டுள்ளது.

இந்தியாவில் திருமணம் செய்துகொண்டு, அந்தக் குடிசைப் பகுதிகளில் உள்ளூர் மக்களுடன் வசிப்பதாகக் கூறுவது போல வேறு சில சீன நாட்டவர்களும் இத்தகைய காணொளிகளை எடுத்ததாக அந்தச் செய்தியில் குறிப்பிடப்பட்டுள்ளது.

இந்த விவகாரம் குறித்து காவல்துறை கூறியது என்ன?

சீன நாட்டினர் அனுமதியின்றி காணொளிகளைப் பதிவு செய்தது குறித்து உள்ளூர் மக்கள் அதிருப்தி தெரிவித்துள்ளதாக பிரதம் ஆலோ செய்தி கூறுகிறது. பலமுறை தங்கள் வீடுகள், சமையலறைகள் மற்றும் தனிப்பட்ட பகுதிகளுக்குள் பதிவு செய்பவர்கள் அனுமதியின்றி நுழைந்து விடுவதாக மக்கள் குற்றம் சாட்டுகின்றனர்.

எதிர்ப்பு தெரிவித்தால் விளாகர்கள் மன்னிப்பு கேட்டுவிட்டுச் சென்றுவிடுவார்கள், ஆனால் சிறிது நேரத்திற்குப் பிறகு மீண்டும் பதிவு செய்ய வந்துவிடுவார்கள் என்று சிலர் பிரதம் ஆலோவிடம் தெரிவித்துள்ளனர். இதனால் உள்ளூர்வாசிகளிடையே அதிருப்தியும் அசௌகரியமும் அதிகரித்து வந்தது.

சில உள்ளூர் மக்கள் சீன நாட்டவர்கள் குடிசைப் பகுதிகளில் சுற்றி வீடியோ எடுக்க உதவி செய்து வந்தனர் என்பதும் பிரதம் ஆலோ செய்தியில் தெரிவிக்கப்பட்டுள்ளது. ரிது அக்தர் என்ற உள்ளூர்ப் பெண் ஒருவர், தான் சீன நாட்டவர்களுக்கு வழிகாட்டியாகப் பணியாற்றியதாகவும், அதற்காக தினமும் 700 முதல் 800 டாகா(வங்கதேச நாணயம்) பெற்றதாகவும் கூறினார். வேறு சில வங்கதேச பெண்களும் இந்தப் பணியில் அவர்களுக்கு உதவியதாகவும் அவர் தெரிவித்தார்.

இந்த நேரலை ஒளிபரப்புகள் வணிக விளம்பர நடவடிக்கைகளின் ஒரு பகுதி என்று ஃபாங்யூ என்ற நபர் குறிப்பிட்டதாக அந்தச் செய்தி தெரிவிக்கிறது.

உத்தரா மேற்கு காவல் நிலைய அதிகாரிகள், அந்தப் பகுதியில் வெளிநாட்டுக் குடிமக்கள் காணொளிகளைப் பதிவு செய்வதைப் பார்த்ததாக உறுதிப்படுத்தியுள்ளனர். எனினும், இந்தப் பதிவுகளுக்குப் பின்னால் உள்ள உண்மையான நோக்கம் இன்னும் தெளிவாகத் தெரியவில்லை என்று காவல்துறை தெரிவித்துள்ளது.

உத்தரா மேற்கு காவல் நிலையப் பொறுப்பு அதிகாரி முகமது காலித் மன்சூர் பிரதம் ஆலோ நாளிதழிடம் கூறுகையில், "அவர்கள் ஏன் இந்தக் காணொளிகளை உருவாக்குகிறார்கள் என்பது உண்மையில் எனக்குத் தெரியாது. அந்தக் காணொளிகள் எங்கு வெளியிடப்படுகின்றன என்பதும் எனக்குத் தெரியாது. எனினும், அவர்கள் இத்தகைய காணொளிகளை உருவாக்கி வருவது குறித்து மூத்த அதிகாரிகளுக்குத் தகவல் தெரிவித்துள்ளேன். இந்த விவகாரம் தொடர்பாக நடவடிக்கை எடுக்கப்பட்டு வருகிறது" என்றார்.

- இது, பிபிசிக்காக கலெக்டிவ் நியூஸ்ரூம் வெளியீடு