మీ ప్రేమ భాష ఏంటి? నిజంగా ఈ భాషకు ఒక అర్థం ఉందా?

నా ప్రేమ భాష 'ప్రశంసపూర్వక మాటలు', నా భర్తది కూడా అదే. బహుశా మా ఇద్దరి మధ్య ఉన్న కామన్ లవ్ లాంగ్వేజ్ ఇదే అనుకుంటా.

కానీ, మా ఇద్దరికీ ప్రశంసలు అందుకోవడం ఇష్టమే అయినా, అవి మా ఇద్దరికీ కొంచెం ఇబ్బందిగా అనిపిస్తాయి.

ఆన్‌లైన్‌లో 'ఒరిజినల్ లవ్ లాంగ్వేజెస్ క్విజ్‌' అనే పర్సనాలిటీ టెస్టులోపాల్గొన్నప్పుడు కూడా ఫలితం ఇదేనని తేలింది. ఈ టెస్టును అమెరికన్ పాస్టర్ గ్యారీ చాప్‌మన్ 1992లో రూపొందించారు. ప్రేమను వ్యక్తపరిచే, స్వీకరించే ఐదు రకాల పద్ధతులను మొదటిసారి ఆయన ప్రతిపాదించారు.

దీనిపై నాకు కొంత సందేహంగా ఉంది. పదేళ్ల మా వైవాహిక జీవితంలో మేం పొందిన ప్రత్యక్ష అనుభవాల కంటే, ఈ సిద్ధాంతానికే మా గురించి ఎక్కువగా ఎలా తెలుసా?

ఐదు ప్రేమ భాషలు (లవ్ లాంగ్వేజెస్) ఏంటంటే.. తమకంటూ నాణ్యమైన సమయాన్ని కేటాయించడం, పనిలో సాయం చేసుకోవడం, బహుమతులు స్వీకరించడం, ఆత్మీయ స్పర్శ, మాటల ద్వారా ప్రశంసించుకోవడం... ఇవి ఇప్పుడు గతంలో ఎన్నడూ లేనంతగా ప్రజాదరణ పొందిన భావనలుగా కనిపిస్తున్నాయి.

డేటింగ్ షోలలో పాల్గొనేవారు ఒకరినొకరు, మీ ప్రేమ భాష ఏంటి అని అడుగుతుంటారు. అలాగే డేటింగ్ యాప్‌లలో "మై లవ్ లాంగ్వేజ్ (నా ప్రేమ భాష)..." అనే వాక్యం ఒక సాధారణ ప్రాంప్ట్‌లా కనిపిస్తుంది.

లవ్ లాంగ్వేజెస్ వెబ్‌సైట్ ప్రకారం, ఈ ప్రత్యేకమైన క్విజ్‌లో పాల్గొన్న 15 కోట్ల మందికి పైగా ప్రజలలో నేను, నా భర్త కూడా ఉన్నాం.

ఇతర ప్రేమ భాషలలో కొన్నింట్లో మేం చాలా తక్కువ స్కోర్ పొందినప్పటికీ.. అవే మాకు చాలా దగ్గరగా ఉన్నట్లు, మా మనసును హత్తుకున్నట్లు అనిపించాయి.

"ఉదాహరణకు, నా భర్తతో "క్వాలిటీ టైమ్" గడపడం నాకు చాలా ఇష్టం. ఆయన నన్ను ప్రశంసించడం కంటే, మేం కలిసి చూడాల్సిన సినిమాల జాబితాను తయారు చేసి ఇస్తేనే నాకు ఆయనపై మరింత ప్రేమ కలుగుతుంది"అని అన్నారు.

అయితే, ఈ ఐదు చక్కటి లవ్ లాంగ్వేజెస్ అనే భావన ఎక్కడి నుంచి వచ్చింది? ఆధునిక డేటింగ్, వైవాహిక బంధాలకు ఇవి నిజంగా సరిపోతాయా?

'ప్రజలు ఇప్పటికీ దాని వైపు ఆకర్షితులవుతున్నారు'

అటాచ్‌మెంట్ థియరీ వంటి ఇతర రిలేషన్‌షిప్ థియరీల మాదిరిగా కాకుండా, ప్రేమ భాషల భావనకు (లవ్ లాంగ్వేజెస్ కాన్సెప్ట్‌కు) ఎలాంటి శాస్త్రీయ మూలాలు లేవు.

పారిష్‌లో నిర్వహించిన కౌన్సెలింగ్ సెషన్‌లలో అనేక జంటలను గమనించిన తర్వాత ఈ సిద్ధాంతం తనకు స్ఫురించిందని చాప్‌మన్ చెప్పారు.

తన సెషన్‌లలో లవ్ లాంగ్వేజెస్ ప్రస్తావన ఇప్పటికీ తరచూ వస్తుందని కౌన్సెలింగ్ సైకాలజిస్ట్ డాక్టర్ సారా ఎమ్మర్సన్ బీబీసీకి తెలిపారు.

"ఆ క్విజ్‌లో పాల్గొనని వారు దాదాపు ఎవరూ లేరనే చెప్పాలి" అని ఆమె అన్నారు.

"జంటలు తరచూ లవ్ లాంగ్వేజెస్ గురించి ప్రస్తావిస్తూ, 'నా భాగస్వామికి 'శారీరక స్పర్శ' ముఖ్యం, నాకు 'పనిలో సాయం చేయడం' ముఖ్యం. అందుకే, మా మధ్య పొంతన కుదరదు' అని చెబుతుంటారు" అని తెలిపారు.

" ప్రేమను వ్యక్తపరిచే మార్గాలు కేవలం ఐదు మాత్రమేనని, ప్రతి ఒక్కరూ ఏదో ఒక దానిలో కచ్చితంగా సరిపోతారని చెప్పే భావనకు పెద్దగా ఎలాంటి శాస్త్రీయత లేదని పరిశోధనలు నిరూపించాయి. అయినప్పటికీ, ప్రజలు ఇప్పటికీ ఈ భావన వైపు మొగ్గు చూపుతున్నారు. అసలు దీనికి కారణం ఏమిటో మనం ఆలోచించాల్సి ఉంది" అని అన్నారు.

కొందరికి, 'లవ్ లాంగ్వేజెస్ (ప్రేమ భాషల)' గురించి మాట్లాడటం అనేది, తమ అవసరాలను భాగస్వామికి ఎలా తెలియాలనే దానికి ఒక మార్గంగా మాత్రమే ఉండవచ్చు.

ఇది "ఒక సంబంధంలో మీకు నిజంగా ఏం నచ్చుతుంది? అలాగే, ఇతరులకు ఏం నచ్చుతుంది?" అనే అంశాల గురించి ఆలోచించడానికి ప్రజలకు సహాయపడుతుందని సైకోథెరపిస్ట్ జార్జినా స్టర్మర్ చెప్పారు.

అయితే, ఇది "చాలా పరిమితమైనది" అని, అలాగే "ప్రతి విషయాన్ని మరీ సరళీకరించి చూపే" ప్రమాదం ఉందని స్టర్మర్ హెచ్చరించారు.

దుర్వినియోగం చేసే అవకాశం

ఇటీవలి కాలంలో చాలా మంది థెరపిస్టులు కూడా ఈ సిద్ధాంతంపై విమర్శలు వ్యక్తం చేస్తున్నారు. గ్యారీ చాప్‌మన్ తన ఉదాహరణల్లో ఎక్కువగా పవిత్ర గ్రంథాలను, అసమాన సంబంధాల నమూనాలను కూడా సహజమైనవిగా చూపించారని వారు అంటున్నారు.

లవ్ లాంగ్వేజెస్ పుస్తకంలో, ఆన్ అనే ఒక మహిళకు తాను కౌన్సెలింగ్ ఇచ్చిన వృత్తాంతాన్ని చాప్‌మన్ వివరిస్తారు. ఆమెకు పెళ్లయి పది సంవత్సరాలు అయ్యింది. అయితే, ఆమె భర్త ఆమె పట్ల చాలా కోపంగా, కఠినంగా ఉండేవారు. తరచూ మాటలతో వేధిస్తూ, "నాకు నువ్వంటే అసహ్యం" అని పదేపదే చెప్పేవారు.

ఆయన లవ్ లాంగ్వేజ్ ప్రత్యేకంగా లైంగికంగా శారీరక స్పర్శపైనే ఉండేదని చాప్‌మాన్‌కు ఆన్ చెప్పారు.

తన భర్త పట్ల లైంగికంగా స్పందించడం (శృంగారంలో పాల్గొనాలనే ఆసక్తి కలగడం) తనకు చాలా కష్టంగా ఉందని ఆన్ చెప్పినప్పుడు, చాప్‌మన్ ఆమెకు ఒక సలహా ఇచ్చారు.

తన భర్తతో మరింత తరచుగా శృంగారంలో పాల్గొనేలా తనను తాను ప్రేరేపించుకోవడం కోసం, దేవునిపై తనకున్న విశ్వాసంపై ఎక్కువగా ఆధారపడాలని ఆమెకు సూచించారు.

ఈ ఉదాహరణ.. మరో ప్రమాదాన్ని ఎత్తిచూపుతుంది. అదేమిటంటే.. లవ్ లాంగ్వేజెస్‌ను ఉపయోగించి, తమ భాగస్వాములను వారికి సౌకర్యవంతంగా లేని పద్ధతుల్లో ప్రేమను చూపించేలా లేదా స్వీకరించేలా బలవంతం చేసే అవకాశం కూడా ఉంది.

"ఒక వ్యక్తి 'నా ప్రేమ భాష బహుమతులు పొందడం, అందుకే నువ్వు ఎప్పుడూ నాకు బహుమతులు ఇస్తూనే ఉండాలి' అని, లేదా 'నా ప్రేమ భాష శారీరక స్పర్శ, అందుకు నువ్వు ఎప్పుడూ నాతో శారీరక సాన్నిహిత్యం కలిగి ఉండాలి' అని అంటే, అందులో ప్రమాదం పొంచి ఉంటుంది" అని సైకోథెరపిస్ట్ జార్జినా స్టర్మర్ చెప్పారు.

దీనిపై స్పందన కోసం బీబీసీ లవ్ లాంగ్వేజెస్ టీమ్‌ను సంప్రదించింది.

'భావోద్వేగపరంగా స్పందించాలి'

ఒకరినొకరు అర్థం చేసుకోవాలంటే.. తమకు తాము మెరుగ్గా అర్థం కావాలంటే అసలు దంపతులు ఏం చేయాలి?

మీ భాగస్వామి చెప్పేది వినండి

"మీరు మాట్లాడే అవకాశం వచ్చే వరకు వేచి ఉండటమే కాకుండా, వారు ఏమి చెబుతున్నారో వినడానికి ప్రయత్నించండి. వారి ఫీలింగ్స్‌ను అర్థం చేసుకుని గుర్తించండి" అని డాక్టర్ ఎమ్మర్సన్ అన్నారు.

నిందలను తప్పించుకునేందుకు, మీ భాావాలను 'నేను' అనే పదాలను ఉపయోగించి పంచుకోండి:

"మీ సొంత భావాలకు అనుగుణంగా మీ మాటలను మలుచుకుంటే, అవతలి వ్యక్తి విమర్శించినట్లు భావించకుండా ఉండేలా.. మీరు ఏం అనుకుంటున్నారో, మీరు ఏం ఫీల్ అవుతున్నారో వ్యక్తపరిచేందుకు అది మీకు సహాయపడుతుంది. " అని జార్జినా స్టర్మర్ వివరించారు.

'నువ్వు ఇలా చేశావు' అని చెప్పడానికి బదులు 'నాకు ఇలా అనిపిస్తోంది' అని మాట్లాడాలని స్టర్మర్ అంటున్నారు.

అభిప్రాయ భేదాలు సహజమని గుర్తుంచుకోండి

"ఆరోగ్యకరమైన సంబంధాల్లో తరచుగా చర్చలు, విభేదాలు ఉంటాయి" అని స్టర్మర్ అన్నారు. "సంబంధం తెగిపోకుండా చూసుకోవడం ముఖ్యం కాదు, దానిని సరిదిద్ది, ఆ బంధాన్ని మరింత బలపరిచే మార్గాలను కనుగొనడమే అసలైన సవాలు" అని చెప్పారు.

అయితే, "కాస్త క్లిష్టమైన విషయాల గురించి చర్చించేందుకు సరైన సమయాన్ని ఎంచుకోవాలి. అంటే అర్ధరాత్రి, బయటకు వెళ్లిన భాగస్వామి ఇంటికి వచ్చినప్పుడు మాట్లాడమని కాదు" అని డాక్టర్ ఎమ్మర్సన్ తెలిపారు.

బంధాన్ని బలపరిచే ప్రయత్నాలకు స్పందించండి

మీ భాగస్వామి అనుబంధాన్ని కోరుకుంటున్నప్పుడు, అది చిన్నదైనప్పటికీ మీరు భావోద్వేగపరంగా స్పందించాలని డాక్టర్ ఎమ్మర్సన్ సూచించారు.

"ఇది కౌగిలింతను కోరడం కావచ్చు, లేదా తమ ఫోన్‌లో చూసిన ఏదో ఒక విషయాన్ని మీతో పంచుకోవడం కావచ్చు" అని చెప్పారు.

(బీబీసీ కోసం కలెక్టివ్ న్యూస్‌రూమ్ ప్రచురణ)

(బీబీసీ తెలుగును వాట్సాప్‌,  ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)