‘ఇట్లు అర్జున’ మూవీ రివ్యూ: అనశ్వర రాజన్, అనీశ్‌ల 'మూగప్రేమ' ఎలా ఉంది?

కొత్త కుర్రాడు అనీశ్ హీరోగా, మలయాళ నటి అనశ్వర రాజన్ హీరోయిన్‌గా నటించిన ‘ఇట్లు అర్జున’ థియేటర్లలోకి వచ్చింది. నాగార్జున సమర్పించిన ఈ సినిమాకు ప్రముఖ దర్శకుడు వెంకీ కుడుముల నిర్మాత. రామ్‌చరణ్, ఎన్టీఆర్ ప్రమోషన్స్‌లో పాల్గొనడంతో సినిమాపై బజ్ ఏర్పడింది.

కథ విషయానికొస్తే.. అర్జున మూగ‌వాడు. తండ్రితో క‌లిసి చిన్న‌ప్ప‌టి నుంచే దొంగ‌త‌నాలు చేస్తూ ఉంటాడు. పిల్ల‌ల జైలుకి కూడా వెళ్తాడు.

అత‌నికి పై పోర్ష‌న్‌లో ఉండే కీర్తి అంటే ఇష్టం, బాల్య ప్రేమికుడు. పెద్ద‌యిన త‌ర్వాత కూడా ఆమె కోసం త‌పిస్తూ ఉంటాడు. మూగ‌వాడు కాబ‌ట్టి ప్రేమ‌ని చెప్పుకోలేడు.

మ‌రోవైపు సిటీలో పెద్ద‌న్న(ముకేశ్ రుషి) ఒక డాన్‌. కొడుకు మునిని రాజ‌కీయాల్లోకి తీసుకురావాల‌ని ఆశ‌. వెయ్యి కోట్ల హ‌వాలా డ‌బ్బు కోసం జైస‌ల్మేర్ వెళ్తాడు ముని. అక్క‌డ పెద్ద‌న్న అనుచ‌రుడు గౌరి (క‌లైయ‌ర‌స‌న్‌) మునిని చంపేస్తాడు.

ఆ తర్వాత ఏం జరిగింది? హీరో ఇందులోకి ఎలా వస్తాడనేదే.. మిగ‌తా క‌థ‌.

కొత్తదనం ఉందా?

ఈ క‌థ‌లో చాలా స‌న్నివేశాలు ఎక్క‌డో చూసిన‌ట్టే ఉంటాయి. హీరో హీరోయ‌న్ల‌ను డ‌బ్బుల కోసం విల‌న్ గ్యాంగ్ వెంటాడటం క్ష‌ణ‌క్ష‌ణంలో చూశాం (వెంక‌టేశ్, శ్రీ‌దేవిల సినిమా). హీరోకి లోపం ఉండటం కూడా పాత‌ సినిమాలలో చూసినదే.

ఈ సినిమాలో హీరో మూగవాడు కాకపోయినా కథకు నష్టం లేదు. కొత్త కుర్రాడు డైలాగులు సరిగ్గా చెబుతాడో లేదోనని అతడిని మూగవాడిగా చూపించినట్టున్నారు. మూగ ప్రేమ సీన్లు కూడా పండలేదు. ఎక్స్‌ప్రెషన్స్ విషయంలో హీరో చాలా సాధన చేయాలి. అయితే డ్యాన్స్‌లు, ఫైట్స్ బాగా చేశాడు.

హీరోయిన్ అన‌శ్వ‌ర‌రాజన్ స్క్రీన్ ప్రెజెన్స్ చాలా బావుంది. అమాయ‌క‌పు పాత్రలో అల‌రించింది. ముకేశ్ రుషి విలనీ పాత‌దే. వెన్నెల కిశోర్ డైలాగ్, కామెడీ అక్క‌డ‌క్క‌డ న‌వ్వించింది. సీరియ‌స్ సీన్స్‌లో బ్ర‌హ్మాజీ, గెట‌ప్ శీను కామెడీ అత‌క‌లేదు.

త‌మిళ సినిమా మ‌ద్రాస్‌లో మంచి పేరు తెచ్చుకున్న క‌లైయ‌ర‌స‌న్ విల‌న్ ఎక్స్‌ప్రెష‌న్స్ బాగున్నాయి. పోలీస్ అధికారిగా వేసిన ఇలంగో కుమ‌ర‌వేలు మంచిన‌టుడు. కానీ, అత‌నికి స్కోప్ లేదు. క్యారెక్ట‌ర్ మ‌రీ గంద‌ర‌గోళంగా వుంది.

శ‌వాన్ని పోస్టుమార్టానికి పంప‌కుండా, స్టేష‌న్‌కి తెచ్చి కుర్చీలో కూర్చోపెట్టి త‌న కుట్ర‌లు, కుతంత్రాలు ఇద్ద‌రు పోలీసుల‌కు వివ‌రిస్తుంటాడు. ఆయ‌న మాట‌లు ప‌ట్టించుకోకుండా కొంతమంది పోలీసులు త‌మ ప‌ని తాము చేసుకుంటూ ఉంటారు. రియ‌లిస్టిక్ కామెడీ అంటే ఇదే.

సాంకేతికంగా ఎలా ఉంది?

త‌మ‌న్ బీజీఎం గురించి ప్రత్యేకంగా చెప్పాల్సింది. యాక్ష‌న్ సీన్స్‌ని బీజీఎం నిలబెట్టింది. రాజామ‌హాదేవ‌న్ కెమెరా పనితీరు బాగుంది. ప్రొడ‌క్ష‌న్ వ్యాల్యూస్ రిచ్‌గా వున్నాయి. మిడిల్ రేంజ్ హీరోకి పెట్టినంత ఖ‌ర్చు వుంది.

క‌మ‌ర్షియ‌ల్‌గా ఇది మంచి క‌థ‌. పేప‌ర్ మీద రాసుకున్న‌ప్పుడు చాలా బాగా అనిపించి ఉండొచ్చు. అయితే, ఎగ్జిక్యూష‌న్‌లో ద‌ర్శ‌కుడు మ‌హేశ్ ఉప్పాల‌ త‌డ‌బ‌డ్డాడు. స‌న్నివేశాలు స‌రిగా రిజిస్ట‌ర్ కాలేదు. స్క్రీన్ మీద ఏదో జ‌రుగుతూ ఉంటుంది. చూస్తూ ఉంటాం.

ప్ల‌స్ పాయింట్స్‌

1. అనశ్వ‌ర‌రాజ‌న్ స్క్రీన్ ప్రెజెన్స్‌

2. అక్క‌డ‌క్క‌డ కామెడీ

3. బీజీఎం, కెమెరా

మైన‌స్ పాయింట్స్‌

1. పాత క‌థ‌, క‌థ‌నం

(ఈ కథనంలో అభిప్రాయాలు సమీక్షకుడి వ్యక్తిగతం)

(బీబీసీ కోసం కలెక్టివ్ న్యూస్‌రూమ్ ప్రచురణ)

(బీబీసీ తెలుగును వాట్సాప్‌,  ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)