సెటిరిజన్: సోషల్ మీడియాలో వైరల్ అవుతున్న కొత్త ట్రెండ్.. మహిళలకు నిపుణుల హెచ్చరిక

మహిళల వ్యక్తిగత ఆరోగ్యానికి సంబంధించిన ఒక సలహా సోషల్ మీడియాలో వైరల్ అవుతోంది. అయితే, ఇది ప్రమాదకరమని ఆరోగ్య నిపుణులు హెచ్చరిస్తున్నారు.

అలర్జీకి వాడే సెటిరిజిన్ మాత్రను మహిళలు తమ జననాంగాల్లో పెట్టుకుంటే యోని కండరాలు బిగుతుగా మారతాయని, లైంగిక చర్య సమయంలో ఆనందం పెరుగుతుందని సోషల్ మీడియాలో పోస్టులు వచ్చాయి.

అయితే, ఈ విధంగా సెటిరిజిన్‌ను ఉపయోగించేందుకు ఎలాంటి అనుమతి లేదని, అలా వాడటం సురక్షితమా కాదా అనే విషయంపై ఎలాంటి పరీక్షలూ జరగలేదని నిపుణులు చెబుతున్నారు.

మహిళలు తమ జననాంగాల్లో సెటిరిజిన్ మాత్రలు పెట్టుకోవద్దని కెన్యా ఫార్మాస్యూటికల్ సొసైటీ హెచ్చరించింది.

సెటిరిజిన్ అనేది సాధారణంగా అలర్జీ సమస్యలకు వాడే మందు. తుమ్ములు, ముక్కు కారడం, కళ్లలో దురద, చర్మంపై దద్దుర్లు వంటి సమస్యల నుంచి ఉపశమనం పొందేందుకు దీన్ని ఉపయోగిస్తారు. ఈ మందును నోటి ద్వారా తీసుకోవడానికి మాత్రమే తయారు చేశారు.

వైరల్ ట్రెండ్ ఎలా మొదలైంది?

సెటిరిజిన్ వాడకానికి సంబంధించిన ఈ వారం ప్రారంభంలో టిక్‌టాక్‌లో పలు పోస్టులు వైరల్ కావడంతో చర్చ మొదలైంది.

ఈ మాత్రను ఉపయోగించడం వల్ల మహిళల జననాంగాల్లో తేమ తగ్గుతుందని, తద్వారా లైంగిక చర్య సమయంలో బిగుతుగా అనిపిస్తుందని ఆ పోస్టుల్లో పేర్కొన్నారు.

యాంటీహిస్టమిన్ మందుల ప్రభావంతో కొన్నిసార్లు శరీరంలో పొడిబారే లక్షణాలు కనిపిస్తాయి. అయితే, దీనివల్ల జననాంగాల్లోని కండరాలు బలపడవని నిపుణులు స్పష్టం చేస్తున్నారు.

"సెటిరిజిన్ వాడితే బిగుతు వస్తుందనేది నిజం కాదు. దీనివల్ల ఘర్షణ పెరిగి అసౌకర్యం కలగవచ్చు. సున్నితమైన అంతర్గత భాగాలకు గాయాలయ్యే ప్రమాదం కూడా ఉంది" అని కెన్యా ఫార్మాస్యూటికల్ సొసైటీ (పీఎస్‌కే) తెలిపింది.

"నోటి ద్వారా తీసుకునే మాత్రలను జననాంగాల్లో పెట్టుకోవడం సురక్షితం కాదు. సెటిరిజిన్ మాత్రలను మింగడానికి మాత్రమే తయారు చేశారు. వాటిలోని పదార్థాలను శరీరంలోని సున్నితమైన భాగాలపై ఉపయోగించడం వల్ల ఎలాంటి ప్రభావాలు ఉంటాయో పరీక్షించలేదు" అని పేర్కొంది.

వైరల్ ప్రచారంపై చర్చ

సోషల్ మీడియాలో ఈ ప్రచారం వైరల్ కావడంతో దీనిపై చర్చ మొదలైంది.

కొందరు సోషల్ మీడియా యూజర్లు ఈ విధానాన్ని ప్రోత్సహిస్తుండగా, మరికొందరు ఇలా చేయడం ఎంతవరకు సురక్షితమని ప్రశ్నిస్తున్నారు.

మరోవైపు, సెటిరిజిన్ ధర పెరిగినట్లు స్థానిక మీడియాలో కథనాలు వచ్చాయి. ముఖ్యంగా రాజధాని నైరోబీలోని కొన్ని మెడికల్ షాపుల్లో ఈ మందుకు డిమాండ్ పెరిగినట్లు వార్తలు వెలువడ్డాయి.

కెన్యాలో ఫార్మసిస్టులకు ప్రాతినిధ్యం వహించే సంస్థ పీఎస్‌కే గురువారం విడుదల చేసిన ప్రకటనలో "సెటిరిజిన్ అలర్జీకి వాడే మందు. దీన్ని నోటి ద్వారా తీసుకోవాలి. ఇతర ప్రయోజనాల కోసం ఈ మందుకు అనుమతి లేదు. అలాంటి ఉపయోగాల కోసం ఎలాంటి పరీక్షలూ జరగలేదు. ముఖ్యంగా జననాంగాల్లో వాడేందుకు అసలు అనుమతి లేదు" అని స్పష్టం చేసింది.

"ఇప్పటికే ఎవరైనా ఈ విధంగా ఉపయోగించి ఉంటే వెంటనే ఆపేయాలి. నొప్పి, రక్తస్రావం, మంట, దురద, అసాధారణ స్రావం లేదా జ్వరం వంటి లక్షణాలు కనిపిస్తే వైద్యులను సంప్రదించాలి" అని సూచించింది.

ఆరోగ్యానికి సంబంధించిన సమాచారాన్ని పంచుకునేటప్పుడు జాగ్రత్తగా ఉండాలని సోషల్ మీడియా ఇన్‌ఫ్లుయెన్సర్లు, కంటెంట్ క్రియేటర్లకు కూడా పీఎస్‌కే సూచించింది.

సరైన పరిశీలన లేకుండా చేసే ప్రచారాలు ప్రజల ఆరోగ్యాన్ని ప్రమాదంలోకి నెట్టే అవకాశం ఉందని పేర్కొంది.

ఆరోగ్య శాఖ ఆందోళన

ఈ వైరల్ ట్రెండ్‌పై కెన్యా ఆరోగ్య శాఖ ఆందోళన వ్యక్తం చేసిన ఒక రోజు తర్వాత, అక్కడి ఫార్మసిస్టుల సంఘం ఈ హెచ్చరికలు జారీ చేసింది.

సోషల్ మీడియాలో కొందరు నిపుణుల వైద్య సూచనలను తేలిగ్గా తీసుకుంటున్నారని, దాని వల్ల ఎదురయ్యే పరిణామాలను పట్టించుకోవడం లేదని ఆరోగ్య శాఖలోని సీనియర్ అధికారి ఓమా ఒలుగా అన్నారు.

మందుల అమ్మకాలు, కొనుగోళ్లపై నిఘా ఉంచేందుకు ఒక వ్యవస్థను ప్రారంభించే అంశాన్ని అధికారులు పరిశీలించవచ్చని ఆయన సూచించారు.

దీంతో ఏయే మందులను దుర్వినియోగం చేస్తున్నారో గుర్తించడం సులభమవుతుందని చెప్పారు. అయితే, అలాంటి వ్యవస్థను ప్రారంభించడంపై ఇప్పటివరకు ఎలాంటి అధికారిక నిర్ణయం తీసుకోలేదు.

మందుల డిమాండ్‌పై ఆందోళన

సెటిరిజిన్‌కు డిమాండ్, ధర పెరుగుతున్నట్లు వస్తున్న వార్తలు తమ దృష్టికి వచ్చాయని పీఎస్‌కే తెలిపింది. కొన్ని మెడికల్ షాపుల్లో ఈ మందు కొరత ఏర్పడినట్లు కూడా వార్తలు వస్తున్నాయని పేర్కొంది.

ఈ వైరల్ ట్రెండ్‌ను ఆసరాగా చేసుకుని లాభాలు పొందేందుకు ప్రయత్నించవద్దని మందుల విక్రేతలకు సూచించింది.

ఇదే విధంగా డిమాండ్ పెరుగుతూ ఉంటే, నిజంగా అలర్జీ చికిత్స కోసం సెటిరిజిన్ అవసరమైన వారికి ఈ మందు దొరకడం కష్టమవుతుందని హెచ్చరించింది.

దుర్వినియోగం అయ్యే అవకాశం ఉన్న మందులను ఉద్దేశపూర్వకంగా విక్రయించవద్దని తమ సభ్యులకు పీఎస్‌కే సూచించింది.

ఏదైనా మందును దుర్వినియోగం చేయడం వల్ల ప్రతికూల ప్రభావాలు ఎదురైతే, ఆ విషయాన్ని ఆరోగ్య అధికారులకు తెలియజేయాలని కోరింది.

సోషల్ మీడియాలో ప్రచారమయ్యే నిర్ధరణ లేని చిట్కాల కంటే నిపుణుల సూచనలకే ప్రాధాన్యత ఇవ్వాలని పీఎస్‌కే తన ప్రకటన చివర్లో పేర్కొంది.

"ఒక మందును దేని కోసం తయారు చేశారో కాకుండా, మరో ప్రయోజనం కోసం ఉపయోగించాలనుకుంటే ముందుగా ఫార్మసిస్టును సంప్రదించండి. వైద్య సలహాల కోసం సోషల్ మీడియాపై ఆధారపడవద్దు" అని సూచించింది.

(బీబీసీ కోసం కలెక్టివ్ న్యూస్‌రూమ్ ప్రచురణ)

(బీబీసీ తెలుగును వాట్సాప్‌,  ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)