మైక్రోసాఫ్ట్ సర్వర్లు డౌన్.. సర్వీసుల్లో అంతరాయం, లక్షల కంపెనీలపై ఎఫెక్ట్

మైక్రోసాఫ్ట్ సేవల్లో ప్రపంచవ్యాప్తంగా తీవ్ర అంతరాయం ఏర్పడింది. దీంతో వేలాది మంది యూజర్లు ఇబ్బందులు ఎదుర్కొంటున్నారు. భారత్ సహా అమెరికా, జపాన్, సింగపూర్, బ్రిటన్, ఆస్ట్రేలియాలాంటి దేశాల్లో ఈ సమస్య తలెత్తింది.

మైక్రోసాఫ్ట్ టీమ్స్, ఔట్‌లుక్, ఆర్టిఫిషియల్ ఇంటెలిజెన్స్ సాఫ్ట్‌వేర్ కోపైలట్ సేవలు కనెక్టివిటీ సమస్యలతో ప్రభావితమయ్యాయి. ముఖ్యంగా ఔట్‌లుక్ ఈమెయిల్ సేవలను ఉపయోగించడంలో యూజర్లు ఇబ్బందులు పడుతున్నారు.

ఈ అంతరాయం కనీసం ఎనిమిది గంటలకు పైగా కొనసాగుతున్నట్లు రిపోర్టులు వచ్చాయి. ఔట్‌లుక్ సేవల్లో సమస్యలపై ప్రపంచవ్యాప్తంగా దాదాపు 1.4 లక్షలకు పైగా ఫిర్యాదులు వచ్చాయని సేవల అంతరాయాలను పర్యవేక్షించే డౌన్‌ డిటెక్టర్ వెబ్‌సైట్ వెల్లడించింది.

గురువారం 16:15 GMT(భారత కాలమానం ప్రకారం గురువారం రాత్రి 9:45 గంటలు) తర్వాత తొలిసారిగా ఈ సమస్యలను గుర్తించినట్లు డౌన్‌డిటెక్టర్ తెలిపింది.

గంట వ్యవధిలోనే 74 దేశాలకు ఈ అంతరాయం విస్తరించిందని పేర్కొంది.

అసలు సమస్య ఏంటి?

ఈ ప్రపంచవ్యాప్త అంతరాయానికి సైబర్ దాడి కారణం కాదని మైక్రోసాఫ్ట్ ఎగ్జిక్యూటివ్ చార్లెస్ లమన్నా స్పష్టం చేశారు.

"ఈ రోజు ఏర్పడిన అంతరాయాల వల్ల మా కస్టమర్లకు కలిగిన అసౌకర్యానికి చింతిస్తున్నాం. సమస్యను పరిష్కరించేందుకు ప్రయత్నిస్తున్నాం" అని ఆయన ఎక్స్‌లో పోస్టు చేశారు.

సర్వర్ వ్యవస్థపై అనూహ్యంగా పెరిగిన లోడ్ కారణంగా ఈ అంతరాయం ఏర్పడినట్లు మైక్రోసాఫ్ట్ తెలిపింది. అయితే, వినియోగదారుల నుంచి ట్రాఫిక్ పెరగడం వల్ల ఈ సమస్య తలెత్తలేదని స్పష్టం చేసింది. కొన్ని సర్వర్లు అనుకోకుండా అందుబాటులో లేకపోవడంతో మిగతా సర్వర్లపై పనిభారం పెరిగిందని ఎక్స్‌లో వెల్లడించింది.

మరోవైపు, సేవలను పునరుద్ధరించేందుకు చేపట్టిన చర్యలూ ఆశించిన విధంగా ఫలితాలు ఇవ్వడం లేదని సంస్థ తెలిపింది. వ్యవస్థలపై అదనపు భారం పడకుండా ఎక్కువ వినియోగదారులు సేవలను ఉపయోగించుకునేలా చేసేందుకు ప్రత్యామ్నాయ మార్గాలను పరీక్షిస్తున్నట్లు తెలిపింది.

ఏయే సేవలపై ప్రభావం?

ఈ అంతరాయం కారణంగా మైక్రోసాఫ్ట్ 365లోని పలు సేవలను వినియోగదారులు ఉపయోగించలేకపోతున్నారు. ముఖ్యంగా ఔట్‌లుక్ ఈమెయిల్ సేవలను అందించే ఎక్స్ఛేంజ్ ఆన్‌లైన్ తీవ్రంగా ప్రభావితమైంది.

కొన్ని ఫైళ్లను చూడటం, క్యాలెండర్‌లోని వివరాలను యాక్సెస్ చేయడంలోనూ సమస్యలు ఎదురవుతున్నాయని మైక్రోసాఫ్ట్ తెలిపింది.

ఏఐ ప్లాట్‌ఫామ్ కోపైలట్‌పైనా ఈ ప్రభావం పడింది. అయితే, మెసేజింగ్, ఆన్‌లైన్ సమావేశాల సేవలు చాలావరకు పనిచేస్తున్నాయని కంపెనీ వెల్లడించింది.

లక్షలాది సంస్థలపై ప్రభావం

మైక్రోసాఫ్ట్ సేవలను ఇతర టెక్నాలజీ సంస్థలు కూడా తమ ప్లాట్‌ఫామ్‌లతో అనుసంధానించుకున్నాయి. దీంతో ఈ అంతరాయం ఇతర సంస్థల సేవలపైనా ప్రభావం చూపింది.

మైక్రోసాఫ్ట్ సేవలకు ఉన్న కనెక్షన్లలో సమస్య తలెత్తడంతో కొన్ని టూల్స్ సరిగ్గా పనిచేయడం లేదని ఏఐ సంస్థ ఓపెన్‌ఏఐ తెలిపింది. ఈ సమస్యను పరిశీలిస్తున్నట్లు వెల్లడించింది. మరో ఏఐ సంస్థ ఆంథ్రోపిక్ కూడా మైక్రోసాఫ్ట్ 365 సేవలతో తమ అనుసంధానంలో సమస్యను గుర్తించినట్లు తెలిపింది.

"ఈ అంతరాయం వల్ల చాలామంది తమ ఉద్యోగాలకు సంబంధించిన పనులు చేయలేకపోతున్నారు. అపాయింట్‌మెంట్ల గురించి సమాచారం ఇచ్చుకోవడం, వెరిఫికేషన్ అవసరమైన వస్తువులు కొనుగోలు చేయడం, ఖాతాలు, సేవలను సృష్టించడం లేదా యాక్సెస్ చేయడం వంటి పనులపైనా ప్రభావం పడుతుంది" అని సైబర్ సెక్యూరిటీ నిపుణుడు ట్రాయ్ హంట్ తెలిపారు.

మైక్రోసాఫ్ట్ సేవలు నిలిచిపోవడంతో సోషల్ మీడియాలో మీమ్స్, జోకులు వెల్లువెత్తుతున్నాయి. ముఖ్యంగా ఔట్‌లుక్ పనిచేయకపోవడంపై ఉద్యోగులు తమదైన శైలిలో స్పందిస్తున్నారు.

"ఇలాంటి రోజులు వచ్చినప్పుడే మన ఉద్యోగం మొత్తం ఈమెయిల్స్ పంపడమేనని గుర్తుకొస్తుంది" అని అమెరికాకు చెందిన రియల్ ఎస్టేట్ సంస్థ సుర్మాంట్ ఇన్‌స్టాగ్రామ్‌లో పోస్టు చేసింది.

మైక్రోసాఫ్ట్ వెబ్‌సైట్ ప్రకారం.. ఔట్‌లుక్, టీమ్స్ వంటి సబ్‌స్క్రిప్షన్ సేవలతో కూడిన మైక్రోసాఫ్ట్ 365 యాప్‌లను ప్రపంచవ్యాప్తంగా 43 కోట్ల మందికి పైగా ఉపయోగిస్తున్నారు. అలాగే ఫార్చ్యూన్ 500 జాబితాలోని 90 శాతానికి పైగా కంపెనీలు తమ ఏఐ చాట్‌బాట్ కోపైలట్‌ను ఉపయోగిస్తున్నాయని మైక్రోసాఫ్ట్ వెల్లడించింది.

ప్రపంచవ్యాప్తంగా 30 నుంచి 40 లక్షల కంపెనీలు మైక్రోసాఫ్ట్ 365 సేవలను ఉపయోగిస్తున్నట్లు పర్యవేక్షణ సంస్థల అంచనాలు చెబుతున్నాయి.

(బీబీసీ కోసం కలెక్టివ్ న్యూస్‌రూమ్ ప్రచురణ)

(బీబీసీ తెలుగును వాట్సాప్‌,  ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)