చలికాలంలో ఫ్లూ వ్యాక్సీన్ తీసుకోవడం మంచిదేనా? ఎవరు వేయించుకోవాలి? వైద్యులు ఏం చెబుతున్నారు?

శీతాకాలం వచ్చిందంటే శ్వాసకోశ వ్యాధుల సమస్యలు ఇబ్బంది పెడుతుంటాయి. అయితే జలుబుకు, ఇన్‌ఫ్లుయెంజాకు మధ్య తేడా తెలియకపోవడంతో ప్రజలు సమస్యలను ఎదుర్కొంటున్నారని వైద్యులు అభిప్రాయపడుతున్నారు.

వీటిలో ఇన్‌ఫ్లుయెంజా కొందరిలో తీవ్రమైన అనారోగ్యానికి దారి తీయవచ్చని హెచ్చరిస్తున్నారు. అజాగ్రత్తగా ఉంటే మాత్రం ఆసుపత్రిలో చేరి చికిత్స తీసుకోవాల్సిన పరిస్థితి కూడా రావచ్చని అంటున్నారు.

ఇలాంటి సమస్య లేకుండా ఉండేందుకు కొన్ని రకాల ఫ్లూ టీకాలు అందుబాటులో ఉన్నాయని వైద్యుల మాట. ఇన్‌ఫ్లుయెంజా వచ్చినప్పుడు వ్యాధి తీవ్రత, ఆసుపత్రిలో చేరే ప్రమాదం తగ్గేందుకు సహకరిస్తాయని పల్మనాలజిస్ట్‌లు చెబుతున్నారు.

ఇన్‌ఫ్లుయెంజా, దాని వలన వచ్చే సమస్యల నుంచి ఇన్‌ఫ్లుయెంజా టీకా రక్షణ కల్పిస్తుందని అమెరికాకు చెందిన సీడీసీ (సెంటర్స్ ఫర్ డిసీజ్ కంట్రోల్ అండ్ ప్రివెన్షన్) పేర్కొంది. అడ్వైజరీ కమిటీ ఆన్ ఇమ్యునైజేషన్ ప్రాక్టీసెస్ ప్రతి సీజన్‌కు ఇన్‌ఫ్లుయెంజా టీకా సిఫార్సులను చేస్తుందని వెల్లడించింది.

బ్రిటన్, అమెరికా ప్రభుత్వాల ప్రకటనలను బట్టి తమ దేశాల్లో కొన్ని వర్గాలకు ప్రభుత్వమే ఉచితంగా టీకా వేస్తోంది. అయితే భారత్‌లో దీనిపై ఇప్పుడిప్పుడే అవగాహన వస్తోంది.

వ్యాధినిరోధక శక్తి తక్కువగా ఉన్న చిన్నపిల్లలకు, తీవ్రమైన గుండె జబ్బులు, ఆస్తమా, షుగర్‌లాంటి దీర్ఘకాలిక వ్యాధులు ఉన్న వాళ్లకు ప్రస్తుతం ఫ్లూ వ్యాక్సీన్‌లు వేస్తామని చెబుతున్నారు విశాఖలోని ప్రముఖ పల్మనాలజిస్ట్, డాక్టర్ సురేంద్ర.

‘‘చిన్న పిల్లలతో పాటు, ఆస్తమా, ఇతర ఊపిరితిత్తుల వ్యాధులు, గుండె, కాలేయం లేదా మూత్రపిండాల సమస్యలు వంటి ఇతర అనారోగ్యాలు ఉన్న వారిలో ఫ్లూ వల్ల సమస్యలు తలెత్తి, ఆసుపత్రిలో చేరే ప్రమాదం ఎక్కువగా ఉంటుంది’’ అని యూకే హెల్త్ సెక్యూరిటీ ఏజెన్సీ (యూకేహెచ్‌ఎస్ఏ) ఆరోగ్య పరిరక్షణ కన్సల్టెంట్ డాక్టర్ ఫియోనా నీలీ బీబీసీతో చెప్పారు.

ఫ్లూ వ్యాక్సీన్ డ్రైవ్‌లు

బ్రిటన్‌లో శీతాకాలం మొదలుకాకముందే వ్యాక్సినేషన్ ప్రారంభిస్తారు.

విద్యార్థులు, గర్భిణులు, 65 ఏళ్లు దాటిన వారికి ఉచితంగా వ్యాక్సీన్ వేస్తున్నారు.

భారత్‌లో మాత్రం పెంటావాలెంట్‌ను చిన్నారులకు ఉచితంగా వేస్తున్నట్టు కేంద్ర ఆరోగ్య, కుటుంబ సంక్షేమ శాఖ వెబ్‌సైట్‌లో పేర్కొంది.

ఆరు వారాల వయసున్న చిన్నారి నుంచి ఏడాది వయసు ఉన్న చిన్నారులకు వేస్తుంటారని ఆ వివరాల్లో ఉంది.

పెంటావాలెంట్‌ను పిల్లలకు వచ్చే ఐదు తీవ్రమైన వ్యాధుల నుంచి రక్షణ కల్పించేదిగా పేర్కొన్నారు.

డిఫ్తీరియా, పెర్టుసిస్ (కోరింత దగ్గు), టెటనస్, హెపటైటిస్ బీ, హీమోఫిలస్ ఇన్‌ఫ్లుయెంజా టైప్ బీ (హిబ్) నుంచి రక్షణ కల్పిస్తుందని, ఈ వ్యాధులు నిమోనియా, మెనింజైటిస్, కాలేయ వైఫల్యం, తీవ్రమైన శ్వాసకోశ సమస్యల వంటి ప్రాణాంతకమైన ఆరోగ్య సమస్యలకు దారితీయవచ్చని ప్రభుత్వం పేర్కొంది.

ముఖ్యంగా ఐదేళ్ల లోపు వయస్సు ఉన్న పిల్లలలో ఈ ప్రమాదం ఎక్కువగా ఉంటుందని నిర్ధిష్ట షెడ్యూల్ ప్రకారం టీకా వేయించుకోవాలని ప్రభుత్వం ప్రచారం చేస్తుంది.

కొత్త వేరియంట్స్‌పై పని చేస్తుందా..

కొత్త వేరియంట్స్‌పై ఫ్లూ వ్యాక్సీన్ పని చేస్తుందా అన్న అనుమానం కొందరికి ఉంటుంది.

మారుతున్న కాలానికి అనుగుణంగా ఫ్లూ కొత్త వేరియంట్స్‌గా మారుతుంటుందని, వాటికి అనుగుణంగా, ప్రపంచ ఆరోగ్య సంస్థ సూచనల మేరకు వ్యాక్సీన్స్ అప్‌డేట్ అవుతాయని వైద్యులు చెబుతున్నారు.

ఇన్‌ఫ్లుయెంజా వైరస్‌లు నిరంతరం రూపాంతరం చెందుతాయని, నిపుణులు ఈ మార్పులను ముందుగానే అంచనా వేయవలసి ఉంటుందని వైద్యులు వెల్లడిస్తున్నారు.

దీనిపై వరల్డ్ హెల్త్ ఆర్గనైజేషన్ ఫిబ్రవరి 2026లో కీలక ప్రకటన చేసింది. 2026-27 సీజన్ కోసం ఫ్లూ వ్యాక్సీన్ జాబితాను ప్రకటించింది.

ఫ్లూ వైరస్‌లు నిరంతరం మారుతున్నందున ప్రపంచ ఆరోగ్యం సంస్థ ఏడాదికి రెండుసార్లు... ఉత్తర, దక్షిణార్థగోళాల కోసం వేర్వేరుగా వ్యాక్సీన్ జాబితాను సమీక్షిస్తుంది.

ప్రయోజనం ఏంటి..

ఫ్లూ వ్యాక్సీన్ తీసుకోవడం వల్ల ప్రయోజనాలు ఉన్నాయని వైద్య నిపుణులు అభిప్రాయపడుతున్నారు.

గుండె, ఊపిరితిత్తులకు సంబంధించిన వ్యాధులతో బాధపడేవారు వర్షాకాలం, శీతాకాలం చాలా ఇబ్బంది పడతారని డాక్టర్ సురేంద్ర చెబుతున్నారు.

అలాంటి వారు ఇన్‌ఫ్లూయెంజా బారిన పడితే ప్రాణాంతకం కావచ్చని అంటున్నారు. అందుకే ఆ పరిస్థితి రాకుండా ఉండేందుకే ఫ్లూ వ్యాక్సీన్‌ను సూచిస్తామని పేర్కొన్నారు. సాధారణ జలుబు నుంచి మాత్రం రక్షణగా ఉంటుందని చెప్పలేమంటున్నారు.

‘‘ఆస్తమా లాంటి క్రానిక్ డిసీజెస్‌తో బాధపడే వారికి ఇన్‌ఫ్లూయెంజా అటాక్ అయితే వారి వ్యాధి తీవ్రత పెరగవచ్చు. అది న్యుమోనియాకు దారి తీయవచ్చు. తర్వాత అది ఆసుపత్రిలో చేరాల్సిన పరిస్థితికి దారి తీయవచ్చు. అలాంటి పరిస్థితి రాకుండా ఉండేందుకు ముందు జాగ్రత్తగా ఫ్లూ వ్యాక్సీన్ రక్షణగా నిలుస్తుంది. చిన్న పిల్లల్లో కూడా ఇమ్యూనిటీ తక్కువగా ఉంటుంది. వారికి కూడా ఇది బాగా రక్షణ కల్పించవచ్చు

ఇన్‌ఫ్లూయెంజా నుంచి రక్షణ కోసం ఈ ఫ్లూ వ్యాక్సీన్స్‌ సూచిస్తాం. అయితే ఇవి 100 శాతం రక్షణ కల్పిస్తాయని చెప్పలేం. మిగతా వ్యాక్సీన్స్ మాదిరిగానే ఇవి కూడా పని చేస్తాయి.

ఇన్‌ఫ్లూయెంజా వల్ల వచ్చే తీవ్రమైన జ్వరం, నిమోనియా, ఊపిరితిత్తుల ఇన్ఫెక్షన్ల ప్రమాదం గణనీయంగా తగ్గుతుంది. ఫ్లూ బారిన పడి ఆసుపత్రిలో చేరాల్సిన అవసరాన్ని తగ్గిస్తుంది. దీర్ఘకాలిక వ్యాధులతో బాధపడే వారిలో ముప్పును తగ్గిస్తుంది.

చల్లని వాతావరణం వైరస్‌ల వ్యాప్తికి అనుకూలంగా ఉంటుంది. హై-రిస్క్ వర్గాల్లో ఉన్నవారు ముందస్తుగా ఫ్లూ వ్యాక్సీన్ తీసుకోవడం వల్ల తీవ్రమైన ఆరోగ్య సమస్యల నుంచి ఉపశమనం పొందవచ్చు’’ అని పల్మనాలజిస్ట్ సురేంద్ర తెలిపారు.

అధ్యయనం ఏం చెబుతుంది?

ఫ్లూతో ఆసుపత్రిలో చేరిన వారిపై జరిపిన అధ్యయనాల్లో, ఫ్లూ టీకా తీసుకున్న వారికి అనారోగ్యం తీవ్రత తక్కువగా ఉందని సీడీసీ స్టడీలో పేర్కొంది.

దీనికి సంబంధించి సమాచారాన్ని ఆ సంస్థ తన వెబ్‌సైట్‌లో ప్రచురించింది.

2018 నుంచి డేటాను పరిశీలిస్తే మరణాల సంఖ్య, ఐసీయూలో చేరిన వారి సంఖ్య 50 శాతం వరకు తగ్గిందని కూడా వెల్లడించింది.

గర్భిణులకు ఉపయోగకరమా?

గర్భధారణ సమయంలో ఫ్లూ టీకా తీసుకోవడం వల్ల ప్రసవం తర్వాత కూడా ఫ్లూ నుంచి రక్షణ లభిస్తుందని సీడీసీ పేర్కొంది.

అంతేకాకుండా పుట్టిన తర్వాత శిశువును కొన్ని నెలలపాటు ఫ్లూ నుంచి కాపాడటానికి హెల్ప్ అవుతుందని అభిప్రాయపడింది.

సైడ్ ఎఫెక్ట్స్‌...

ఫ్లూ వ్యాక్సీన్ తీసుకుంటే సాధారణంగా స్వల్ప దుష్ప్రభావాలు మాత్రమే కనిపిస్తాయని సీడీసీ పేర్కొంది.

టీకా తీసుకున్న చోట నొప్పి, ఎర్రబడడం, వాపు, కొందరికి స్వల్ప జ్వరం, కండరాల నొప్పి, వికారం, అలసటగా అనిపించవచ్చని సీడీసీ చెప్పింది.

ప్లూ టీకా తీసుకున్న తర్వాత గిలియన్-బారే సిండ్రోమ్ అనే అరుదైన నాడీ సంబంధిత రుగ్మత కలిగే ప్రమాదం స్వల్పంగా పెరిగే అవకాశం ఉందని కూడా తన వెబ్‌సైట్‌లో పేర్కొంది.

‘‘టీకా వల్ల తీవ్రమైన అలర్జీ, ఇతర తీవ్రమైన అనారోగ్య సమస్యలు లేదా మరణం సంభవించే అవకాశం చాలా తక్కువగా ఉంటుంది. ఫ్లూ టీకా వల్ల హాని కలిగిందని భావించే వ్యక్తులు వైద్యుడిని సంప్రదించి తగిన చికిత్స పొందాలి’’ అని తెలిపింది.

జాగ్రత్తలేంటి?

ఇంటర్వెన్షనల్ పల్మనాలజీస్ట్ గుత్తా లోకేశ్ దీనికి సంబంధించి కొన్ని సూచనలు చేశారు.

వ్యాక్సీన్ తీసుకున్న తర్వాత చాలామంది తమ రోజువారీ పనులను మామూలుగానే చేసుకోవచ్చని డాక్టర్ లోకేశ్ చెబుతున్నారు.

ఇంజెక్షన్ చేసిన చోట కొద్దిగా నొప్పి, లేదా శారీరకంగా కాస్త అలసట లేదా స్వల్పంగా జ్వరం రావచ్చు. ఇవి సాధారణంగా వాటంతట అవే తగ్గిపోతాయి. తగినంత విశ్రాంతి తీసుకోవడం, ఎక్కువగా ద్రవ పదార్థాలు తీసుకోవడం వల్ల ఉపశమనం పొందొచ్చని ఆయన అన్నారు.

సాధారణంగా ప్రజల్లో ఉన్న కొన్ని అనుమానాలకు ఆయన సమాధానాలు ఇచ్చారు.

ప్రశ్న: ఫ్లూ వ్యాక్సీన్ సాధారణ జలుబును కూడా నివారిస్తుందా?

జవాబు: లేదు. సాధారణ జలుబుకు అనేక ఇతర వైరస్‌లు కారణమవుతాయి. కాబట్టి ఫ్లూ వ్యాక్సీన్ సాధారణ జలుబును నివారించదు.

ప్రశ్న: ఫ్లూ వ్యాక్సీన్ ఇంజెక్షన్ రూపంలో మాత్రమే ఉంటుందా?

జవాబు: సాధారణంగా ఫ్లూ వ్యాక్సీన్‌ను ఇంజెక్షన్ రూపంలోనే ఇస్తారు. అయితే కొన్ని దేశాల్లో నిర్దిష్ట వయస్సు వర్గాల వారికి నాజల్ స్ప్రే వ్యాక్సీన్ కూడా అందుబాటులో ఉంటుంది. పోలియో వ్యాక్సీన్‌లాగా ఫ్లూ వ్యాక్సీన్‌ను సాధారణంగా నోట్లో వేసే ఓరల్ డ్రాప్స్ (చుక్క మందు) రూపంలో ఇవ్వరు.

ప్రశ్న: వ్యాక్సీన్‌ని ఎప్పుడు తీసుకోవాలి?

జవాబు: ఫ్లూ వ్యాప్తి పెరగడానికి ముందే వ్యాక్సీన్ తీసుకోవడం మంచిది. అయితే సీజన్ మొదలైన తర్వాత తీసుకున్నా, ఆ సీజన్‌లో ఫ్లూ నుంచి రక్షణ పొందే అవకాశం ఉంటుంది.

ప్రశ్న: వ్యాక్సీన్ రక్షణ ఎంతకాలం ఉంటుంది?

జవాబు: వ్యాక్సీన్ తీసుకున్న తర్వాత సుమారు రెండు వారాల్లో రక్షణ అభివృద్ధి చెందుతుంది. అయితే కాలం గడిచే కొద్దీ ఈ రక్షణ క్రమంగా తగ్గుతుంది. అలాగే వ్యాప్తి చెందే ఫ్లూ వైరస్‌లు కూడా కాలానుగుణంగా మారుతుంటాయి. అందుకే సాధారణంగా ప్రతి ఏడాది ఫ్లూ వ్యాక్సీన్ తీసుకోవాలని సిఫార్సు చేస్తారు.

(బీబీసీ కోసం కలెక్టివ్ న్యూస్‌రూమ్ ప్రచురణ)

(బీబీసీ తెలుగును వాట్సాప్‌,  ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)