‘మేం విడిపోతున్నాం’- అంటూ పవన్‌ కల్యాణ్, అనా కొణిదెల సంయుక్త ప్రకటన చేసినట్లు వెల్లడించిన జనసేన వర్గాలు

ఆంధ్రప్రదేశ్ ఉప ముఖ్యమంత్రి, నటుడు పవన్ కల్యాణ్, ఆయన భార్య అనా కొణిదెల (అనా లెజ్‌నెవా) పరస్పర అవగాహనతో విడిపోతున్నట్లు అధికారికంగా ప్రకటించినట్లు జనసేన మీడియా విభాగం వెల్లడించింది.

గతంలో వీరిద్దరి విడాకులపై అనేక వదంతులు వచ్చినప్పటికీ, వాటిని అప్పట్లో జనసేన పార్టీ ద్వారా ఆ వార్తలను ఖండించారు. తాజాగా 2026 నవంబర్ 9న వారిద్దరూ ఒక ఉమ్మడి ప్రకటన విడుదల చేస్తూ తమ 13 ఏళ్ల వివాహ బంధానికి ముగింపు పలుకుతున్నట్లు వెల్లడించారు.

ఈ విషయాన్ని జనసేన మీడియా విభాగం వెల్లడించింది. పేరు చెప్పడానికి ఇష్టపడని జనసేన పార్టీ నాయకులు దీనిని బీబీసీకి ధ్రువీకరించారు.

పరస్పర నిర్ణయంతోనే తాము దూరంగా ఉండాలని నిర్ణయించుకున్నట్లు ఉమ్మడి ప్రకటనలో వారిద్దరూ పేర్కొన్నారు.

అయితే అనా లెజ్‌నెవాతో విడిపోతున్నట్లు కేవలం ఒక సంయుక్త ప్రకటన తప్ప వ్యక్తిగతంగా ఇద్దరూ ఎలాంటి వ్యాఖ్యలు చేయలేదు. వారి సోషల్ మీడియా ఖాతాలలో కూడా ఈ ప్రస్తావన లేదు. చిరంజీవి కుటుంబం నుంచి కూడా దీని ఎలాంటి ప్రకటనగానీ, స్పందనగానీ వెలువడ లేదు.

మంచి స్నేహితులుగా...

వివాహ బంధం ముగిసినప్పటికీ, తామిద్దరం ఎప్పటికీ మంచి స్నేహితులుగానే కొనసాగుతామని ఈ ప్రకటనలో పవన్ కల్యాణ్, అనా కొణిదెల స్పష్టం చేశారు.

ఒకరిపై ఒకరు గౌరవంతో, పరస్పర అవగాహనతోనే విడిపోవాలని నిర్ణయించుకున్నామని వారు ఆ ప్రకటనలో పేర్కొన్నారు.

పిల్లల బాధ్యత

పిల్లల సంతోషం, వారి బాధ్యతలే తమకు మొదటి ప్రాధాన్యతని, పిల్లల కోసం ఎప్పుడూ అంకితభావంతో ఉంటామని పవన్, అనా ఆ ప్రకటనలో పేర్కొన్నారు.

గోప్యతకు గౌరవం

జీవితంలో ఈ మార్పు జరుగుతున్న తరుణంలో అందరూ దయతో వ్యవహరించి తమ వ్యక్తిగత గోప్యతను గౌరవించాలని పవన్, అనా కోరారు.

మూడు వివాహాలు.. నలుగురు పిల్లలు!

పవన్ కల్యాణ్‌ చట్టబద్దంగా ఇప్పటివరకు మూడు వివాహాలు చేసుకున్నారు.

1997లో నందినితో పవన్ కల్యాణ్ మొదటి వివాహం జరిగింది. 2008లో వీరిద్దరూ విడాకులు తీసుకున్నారు.

అనంతరం నటి రేణు దేశాయ్‌ను 2009లో వివాహం చేసుకున్నారు. అయితే 2012లో వీరిద్దరూ విడిపోయారు. వీరికి అకిరా నందన్, ఆద్య అనే ఇద్దరు పిల్లలు ఉన్నారు.

ఆ తర్వాత రష్యాకు చెందిన అనా లెజ్‌నెవాను 2013 సెప్టెంబర్ 30న పవన్ కల్యాణ్ వివాహం చేసుకున్నారు. ఈ దంపతులకు ఇద్దరు పిల్లలు ఉన్నారు.

మొత్తంగా పవన్ కల్యాణ్‌కు నలుగురు పిల్లలు ఉన్నారు.

హఠాత్తుగా నిర్ణయం

పవన్ కల్యాణ్ , అనా కొణిదెల విడిపోతారన్న సంకేతాలుగాని, ఆ దిశగా వదంతులు గానీ ఈ మధ్య కాలంలో ఎక్కడా వినిపించలేదు..

సతీమణి హోదాలో పలు అధికారిక కార్యక్రమాలకు పవన్ కల్యాణ్‌తోపాటు లెజ్‌నెవా హాజరయ్యారు. ఎమ్మెల్యేగా గెలిచి, డిప్యూటీ సీఎం అయిన తొలినాళ్లలో ప్రధానమంత్రి నరేంద్ర మోదీ వద్దకు భార్యతో సహా వెళ్లారు పవన్ కల్యాణ్.

ఆగస్టు 15 స్వతంత్ర దినోత్సవ వేడుకల్లో కూడా అనా లెజ్‌నెవా భర్తతో కలిసి పాల్గొన్నారు. ఆ వేడుకల ఆసాంతం అనా ఆయన వెంట ఉన్నారు.

ఇటీవలే తిరుమలకి మెట్ల మార్గంలో వెళ్లి తలనీలాలు కూడా సమర్పించారు అనా.

కానీ ఇలా హఠాత్తుగా విడిపోతున్నట్లు ప్రకటన రావడం సినీ రాజకీయ వర్గాల్లో ఒకింత చర్చనీయంగా మారింది.

(బీబీసీ కోసం కలెక్టివ్ న్యూస్‌రూమ్ ప్రచురణ)

(బీబీసీ తెలుగును వాట్సాప్‌,  ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)