'నా భార్యను మోసం చేశా': చైనా గూఢచారిగా ఆరోపణలు ఎదుర్కొంటున్న మహిళతో వివాహేతర సంబంధం పెట్టుకున్నట్లు ఒప్పుకున్న ఎన్విడియా సీఈఓ జెన్సన్ హ్వాంగ్

సీఈఓ జెన్సన్ హ్వాంగ్‌కు చైనా గూఢచారిణిగా ఆరోపణలు ఎదుర్కొంటున్న మహిళతో వివాహేతర సంబంధం ఉందన్న రిపోర్టులపై ఎన్విడియా సంస్థ స్వతంత్ర దర్యాప్తును ప్రారంభించింది.

ప్రపంచంలోనే అత్యంత విలువైన కంపెనీలలో ఒకటైన ఈ సంస్థ, తమ కంపెనీ రహస్యాలు లేదా జాతీయ భద్రతకు భంగం వాటిల్లిందని భావించడానికి తమ బోర్డుకు ఎటువంటి కారణాలూ కనిపించలేదని పేర్కొంది.

అంతేకాకుండా, హ్వాంగ్‌ను కంపెనీ సీఈఓగా కొనసాగించడానికి తాము కట్టుబడి ఉన్నామని ఆ సంస్థ తెలిపింది.

మరోవైపు, తన భార్యకు నమ్మక ద్రోహం చేశానని అంగీకరించిన జెన్సన్ హ్వాంగ్, ఇందుకు భార్యకు, పిల్లలకు క్షమాపణలు చెప్పారు.

జెన్సన్ హ్వాంగ్‌తో సన్నిహిత సంబంధాలున్న చైనా వ్యాపారవేత్త ఆలిస్ హ్వాంగ్‌ను చైనా గూఢచారిణిగా అమెరికా నిఘా అధికారులు భావిస్తున్నట్లు ‘న్యూయార్క్ టైమ్స్’ కథనం పేర్కొంది.

జరిగిన దానికి తాను పూర్తిగా బాధ్యత తీసుకుంటున్నాననీ, ఎన్విడియా ఉద్యోగులు, బోర్డు సభ్యులు, వాటాదారుల పట్ల తన బాధ్యతలను నిర్వర్తించడంలో విఫలమయ్యానని జెన్సన్ హ్వాంగ్ అన్నారు.

ప్రపంచంలోని అతిపెద్ద కంపెనీలలో ఎన్విడియా ఒకటి. వేగంగా అభివృద్ధి చెందుతున్న ఏఐ (ఆర్టిఫిషియల్ ఇంటెలిజెన్స్) టెక్నాలజీకి హార్డ్‌వేర్‌ను తయారు చేయడంలో ఈ సంస్థ కీలకమైనదిగా పరిగణిస్తారు. జెన్సన్ హ్వాంగ్ ఈ సంస్థకు గత 30 సంవత్సరాలకు పైగా నిర్వహణ బాధ్యతలు చూస్తున్నారు.

"నేను నా భార్యకు ద్రోహం చేశాను. నా చర్యలు ఆమెను, మా పిల్లలను బాధించాయి. నేను చేసిన దానికి ఎలాంటి సాకు లేదు. చాలా చింతిస్తున్నాను" అని అన్నారు.

"వార్తా కథనాలలో లేవనెత్తిన జాతీయ భద్రతా ఆందోళనలకు సంబంధించి, ఎన్విడియా బోర్డ్ ఆఫ్ డైరెక్టర్స్ ఒక స్వతంత్ర విచారణను ప్రారంభించింది. ఈ విచారణకు నా సంపూర్ణ మద్దతు ఉంటుంది. పూర్తిగా సహకరిస్తున్నాను" అని ఆయన అన్నారు.

‘‘నేను మన దేశాన్ని, కంపెనీని ప్రేమిస్తున్నా. ఎన్విడియాను పరిరక్షించడానికి, అమెరికా జాతీయ భద్రతకు సహకరించడానికి కట్టుబడి ఉన్నా. అమెరికన్ అయినందుకు గర్వపడుతున్నా’’ అని హ్వాంగ్ తెలిపారు.

సంస్థ వ్యవస్థాపకుడు, సీఈఓ కూడా అయిన జెన్సన్ హ్వాంగ్, ఒక విదేశీ గూఢచారిణిగా అనుమానిస్తున్న మహిళతో సంబంధాలపై వార్తలు వచ్చిన నేపథ్యంలో దర్యాప్తు ప్రారంభిస్తామని ఎన్విడియా డైరెక్టర్ల బోర్డు ఒక ప్రకటనలో తెలిపింది.

"అమెరికా జాతీయ, ఆర్థిక భద్రతకు బోర్డు ప్రాధాన్యత ఇస్తుంది. ఇది ఎన్విడియా, దాని వాటాదారుల ప్రయోజనాలకు అత్యంత కీలకం" అని ఆ ప్రకటన తెలిపింది.

జాతీయ భద్రత లేదా ఎన్విడియా రహస్యాలు బయటకు వెళ్లాయని నమ్మడానికి ఎలాంటి కారణాలు లేనప్పటికీ విచారణ కోసం అందుబాటులో ఉన్న సమాచారం మొత్తాన్ని బోర్డు పరిశీలిస్తుందని తెలిపింది.

విచారణ వార్తలు వెలువడినప్పటి నుంచి తాను ఎన్విడియా అధిపతితో మాట్లాడలేదని అమెరికా అధ్యక్షుడు డోనల్డ్ ట్రంప్ అన్నారు.

"అతను మంచి వ్యక్తి అని నాకు తెలుసు. కానీ ఏం జరుగుతుందో ఎవరికీ తెలియదు" అని ట్రంప్ విలేఖరులతో అన్నారు.

ఆలిస్ హువాంగ్ అనే వ్యాపారతవేత్త చైనా తరపున గూఢచర్యం చేస్తున్నారన్న అనుమానాలను నిఘా సంస్థలు డోనల్డ్ ట్రంప్‌కు సమాచారం ఇచ్చాయని అక్టోబర్ చివరలో న్యూయార్క్ టైమ్స్ కథనం రాసింది.

ఆ నిఘా సమాచారం ఆధారంగా ఇప్పుడు చర్యలు తీసుకుని ఉండాల్సిందని మీరు భావిస్తున్నారా అని ఆదివారంనాడు ట్రంప్‌ను విలేఖరులు ప్రశ్నించగా ‘‘నేను అలా అనుకోవడం లేదు. అతను ఒక గౌరవనీయుడైన వ్యక్తి అని భావిస్తున్నా" అన్నారు.

ఎన్విడియా అధిపతిని లక్ష్యంగా చేసుకుని గూఢచర్య కార్యకలాపాలు జరిగాయన్న ఆరోపణలను చైనా గతంలో తోసిపుచ్చింది. ఆ వాదనలను ‘నిరాధారమైన ఊహాగానాలు’ గా అభివర్ణించింది.

జెన్సన్ హ్వాంగ్‌తో వ్యక్తిగత సంబంధాలు ఉన్నాయని ఆరోపణలు ఎదుర్కొంటున్న ఆలిస్ హ్వాంగ్ సింగపూర్‌కు చెందిన మెగాస్పీడ్ అనే డేటా సెంటర్ సంస్థ కోసం పని చేస్తున్నారు.

ప్రస్తుతం తమ సంస్థ నాయకత్వం ఆ ఆరోపణలను తీవ్రంగా పరిగణిస్తోందని, అంతర్గత విచారణ జరిపేందుకు ఔట్ సోర్సింగ్ విధానంలో న్యాయ సలహాదారులను నియమించిందని ఆ సంస్థ గత నెలలో న్యూయార్క్ టైమ్స్‌కు తెలిపింది.

ఎన్విడియా అనేది ఆర్టిఫిషియల్ ఇంటెలిజెన్స్‌ మౌలిక సదుపాయాల రంగంలో ఒక కీలక సంస్థ. ఇది ఓపెన్ ఏఐ, మెటా వంటి ప్రముఖ ఏఐ మోడల్ డెవలపర్‌లకు చిప్‌లను అందిస్తుంది.

మైక్రోచిప్ తయారీ సంస్థ విలువ సుమారు 4.5 ట్రిలియన్ డాలర్లు. ఇది ఇప్పటివరకు ఉన్న అత్యంత విలువైన కంపెనీలలో ఒకటిగా పేరు సంపాదించింది.

న్యూయార్క్ టైమ్స్ ప్రస్తావించిన పేరు చెప్పని వర్గాల సమాచారం ప్రకారం, అమెరికా నిఘా సంస్థలు ఆలిస్ హ్వాంగ్‌ తన సంస్థను పర్యవేక్షిస్తూ చైనా ప్రభుత్వం తరపున పనిచేస్తున్నారని నిర్థరణకు వచ్చాయి.

వార్తా కథనాల ప్రకారం, ఆలిస్ హ్వాంగ్‌కు ఒక అమెరికన్ పౌరుడి మధ్య జరిగిన సంభాషణలు నిఘాలో బయటకు వచ్చాయి. ఆ తర్వాత "అన్‌మాస్కింగ్" అనే ప్రక్రియ ద్వారా ఆ పౌరుడిని జెన్సన్‌ హ్వాంగ్‌గా గుర్తించారు.

హ్వాంగ్‌ లే అనే మరో పేరు కూడా ఉన్న ఆలిస్ హ్వాంగ్, బీజింగ్‌కు ఏ సమాచారాన్ని అందించారు, దాని ప్రాధాన్యత ఎంత, లేదా ఆమె ఎప్పుడు గూఢచర్య కార్యకలాపాలు ప్రారంభించారు అనే విషయాల మీద స్పష్టత లేదు.

దీనిపై స్పందించాల్సిందిగా కోరగా దానికి హ్వాంగ్ స్పందించ లేదని న్యూయార్క్‌ టైమ్ పత్రిక వెల్లడించింది.

గతవారం కాంగ్రెస్ సభ్యులు జెన్సన్ హ్వాంగ్‌కు లేఖ రాసి పత్రికల్లో వారి మధ్య ఉన్న సంబంధం గురించి తమ ముందు హాజరై వివరణ ఇవ్వాలని కోరారు.

ఆలిస్ హ్వాంగ్‌తో ఆయనకు ఉన్న సంబంధం కారణంగా, "విదేశీ శత్రువుల గూఢచర్యానికి వ్యతిరేకంగా ఎన్విడియాలోని సెక్యూరిటీ ప్రోటోకాల్స్" గురించి మాట్లాడటానికి, ఈ నెల చివరలో హాజరు కావాలని రిపబ్లికన్ హౌస్ కమిటీకి చెందిన ముగ్గురు నాయకులు సీఈఓను కోరారు.

అమెరికాకు చెందిన సున్నితమైన టెక్నాలజీ, ఇన్ఫర్మేషన్‌ను చైనా పొందడంపై ఇటీవల వచ్చిన కథనాలు జాతీయ భద్రతాపై తీవ్రమైన సందేహాలను వ్యక్తం చేశాయి.

"పీఆర్‌సీ(చైనా) చొరబాటు, అత్యాధునిక అమెరికా టెక్నాలజీ నాలెడ్జ్‌ను యాక్సెస్ చేయడం అనే అంశం ఈ కాంగ్రెస్‌లోని మా మూడు కమిటీల దర్యాప్తులో కీలకం" అని ఆ లేఖలో పేర్కొన్నారు.

అమెరికా, చైనాల మధ్య పోటీలో ఎన్విడియా ఏఐ చిప్‌లు ప్రధాన కేంద్ర బిందువుగా ఉన్నాయి. దాని అధునాతన ఉత్పత్తులను ఎక్కడ విక్రయించవచ్చనే దానిపై వాషింగ్టన్ గతంలో నియంత్రణలు విధించింది.

ఎన్విడియా రెండో అధునాతన సెమీకండక్టర్ హెచ్ 200, అమెరికాపై చైనా టెక్నాలజీ పరిశ్రమకు ఆధిక్యతను ఇస్తుందనే ఆందోళనల కారణంగా గతంలో వాషింగ్టన్ దీన్ని నియంత్రించింది.

జనవరిలో, కొన్ని షరతులకు లోబడి చైనా వినియోగదారులకు తమ హె‌చ్200 చిప్‌లను విక్రయించడానికి ఆ కంపెనీని అనుమతిస్తామని ట్రంప్ ప్రభుత్వం తెలిపింది.

(బీబీసీ కోసం కలెక్టివ్ న్యూస్‌రూమ్ ప్రచురణ)

(బీబీసీ తెలుగును వాట్సాప్‌,  ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)