మీరు ఈ వెబ్సైట్ యొక్క టెక్స్ట్-ఓన్లీ వెర్షన్ను చూస్తున్నారు, ఇది తక్కువ డేటాను వినియోగిస్తుంది. అన్ని చిత్రాలు మరియు వీడియోలతో కూడిన వెబ్సైట్ యొక్క ప్రధాన వెర్షన్ను చూడండి.
పవన్ కల్యాణ్‌తో విడాకులు: ఎవరీ అనా లెజ్‌నెవా?
- రచయిత, గరికిపాటి ఉమాకాంత్‌
- హోదా, బీబీసీ కోసం
- ప్రచురణ
- చదివే సమయం: 5 నిమిషాలు
ఆంధ్రప్రదేశ్‌ ఉప ముఖ్యమంత్రి, నటుడు పవన్ కల్యాణ్.. ఆయన సతీమణి అనా లెజ్‌నెవా పరస్పర అవగాహనతో విడిపోతున్నట్టు సంయుక్త ప్రకటన చేశారు.
ఈ ప్రకటన జనసేన మీడియా గ్రూపులో పవన్ కల్యాణ్ వెంట ఎక్కువగా కనిపించే లక్ష్మీ వేణుగోపాల్‌ సోమవారం రాత్రి 10.46 నిమిషాలకు పోస్ట్‌ చేశారు.
ఆ తర్వాత ఒక్కసారిగా ఈ వార్త వైరల్‌ అయింది.
పవన్ కల్యాణ్ మూడో భార్యగా అన్నాలెజ్‌నెవా అందరికీ తెలుసు.
కానీ ఆమె నేపథ్యం ఏంటి? అనేది ఒక్కసారి చూద్దాం..
అన్నా లెజోనెవా 1980లో రష్యాలో జన్మించారు.
ఆమె మోడల్‌, నటిగా తన ప్రస్థానం ప్రారంభించారు.
2011లో దర్శకుడు జయంత్‌ సి పరాన్జీ దర్శకత్వంలో వచ్చిన ‘తీన్‌‌మార్‌’ సినిమా చిత్రీకరణ సమయంలో ఆమె పవన్ కల్యాణ్‌ను తొలిసారి కలిశారని చెబుతారు. ఆ సినిమాలో చిన్న పాత్రలో నటించినప్పటికీ వారి మధ్య పరిచయం ప్రేమగా మారింది.
రెండేళ్ల తర్వాత..సెప్టెంబర్‌ 30, 2013న హైదరాబాద్‌ ఎర్రగడ్డ సబ్‌ రిజిస్ట్రార్‌ కార్యాలయంలో వీరిద్దరూ వివాహం చేసుకున్నారు.
పవన్ కల్యాణ్‌కు లెజ్‌నెవా మూడో భార్య అంతకు ముందు విశాఖపట్నంకి చెందిన నందినితో 1997లో పవన్‌కి వివాహం కాగా... విభేదాల నేపథ్యంలో 2008లో విశాఖలోనే ఫ్యామిలీ కోర్టు ద్వారా విడాకులు పొందారు.
ఆ తర్వాత ‘బద్రి’ ఫేమ్‌ నటి రేణుదేశాయ్‌తో కొన్నాళ్లు సహజీవనం చేసిన పవన్ 2009లో ఆమెను వివాహం చేసుకున్నారు.
అనా లెజ్‌నెవా‌ను పెళ్లి చేసుకునే ముందు 2012లో రేణుదేశాయ్‌తో పవన్ విడాకులు పొందారు. పవన్, రేణు దేశాయ్‌కు అకిరా నందన్‌ అనే కుమారుడు, ఆద్య అనే కుమార్తె ఉన్నారు.
ఇక పవన్, అనా దంపతులకు మార్క్‌ శంకర్‌ పవనోవిచ్‌ అనే కుమారుడు, పోలేనా అంజనా పవనోవా అనే కుమార్తె ఉన్నారు. హోటల్ రంగంలో అనాకు ప్రత్యేక ఆసక్తి ఉందని, సింగపూర్‌లో ఆమెకు పలు హోటళ్లు ఉన్నాయనీ, ఆమెకు రష్యా, సింగపూర్‌లలో సుమారు రూ.1,800 కోట్ల విలువైన ఆస్తులు కూడా ఉన్నాయని ‘మనీ కంట్రోల్’ తన కథనంలో పేర్కొంది. .
సోదరుడు చిరంజీవి అసలు పేరుకు గుర్తుగా వీరికి పుట్టిన రెండో కుమారుడికే శంకర్‌ అని పేరు పెట్టారని సినీ జర్నలిస్ట్ సురేశ్ కొండేటి అన్నారు.
ఇక ఇప్పుడు పదమూడేళ్ల వివాహ బంధం తర్వాత పవన్, అనా.. పరస్పర అవగాహనతో విడిపోతున్నట్టు సంయుక్త ప్రకటన చేశారు.
మధ్యలో కూడా విడిపోతున్నట్టు ఊహాగానాలు
పవన్ కల్యాణ్ సోదరుడు నాగబాబు కుమారుడు వరుణ్‌ తేజ్‌ నిశ్చితార్థం, రామ్‌ చరణ్, ఉపాసన కుమార్తెల ఊయల వేడుకల్లో అన్నా లెజ్‌నెెవా కనిపించనప్పుడు పవన్, అనా విడిపోతున్నారనే ఊహాగానాలు వ్యాపించాయి.
2024 ఎన్నికల తర్వాత పవన్ వెంట ఎక్కువగా..
పవన్, అనా విడిపోయారన్న ఊహాగానాలకు చెక్‌ పెడుతూ 2024 ఎన్నికల్లో పవన్ కల్యాణ్ విజయం తర్వాత ఆమె ఎక్కువగా ఆయన వెంట కనిపించారు.
ఆ ఎన్నికల ఫలితాలు రాగానే పవన్ చిరంజీవి ఇంటికి వెళ్లిన సందర్భంలో కనిపించారు.
అదే రోజు ఓ సందర్భంలో పవన్ కల్యాణ్ చెప్పులను చేత్తో పట్టుకున్న దృశ్యాలు కూడా అప్పుడు వైరల్‌ అయ్యాయి.
ఇక ఏపీ ఉపముఖ్యమంత్రిగా పవన్ ప్రమాణస్వీకార కార్యక్రమానికి హాజరయ్యారు.
పవన్ కల్యాణ్ అనే నేను అని ఆయన ప్రమాణస్వీకారం చేస్తున్న టైంలో లెజ్‌నెవా ఎమోషనలైన దృశ్యాలు అప్పట్లో వైరల్‌ అయ్యాయి.
ఆ తర్వాత ఆయనతో కలిసి ప్రధాని నరేంద్ర మోదీని కలిశారు.
జూలై 2024లో, నేషనల్‌ యూనివర్శిటీ ఆఫ్‌ సింగపూర్‌ నుంచి 'మాస్టర్‌ ఆఫ్‌ ఆర్ట్స్‌' పట్టా అందుకున్నారు అనా.
గతేడాది తిరుమలకి వెళ్లి తలనీలాలు
సింగపూర్‌లోని ఓ స్కూల్లో జరిగిన అగ్ని ప్రమాదం నుంచి పవన్, అన్నాల కుమారుడు శంకర్‌ బయటపడిన తర్వాత దేవుడికి మొక్కుగా గతేడాది 2025 ఏప్రిల్‌ 13న తిరుమలకి వెళ్లి తలనీలాలు సమర్పించారు అనా.
రష్యన్‌ ఆర్థడాక్స్ క్రిస్టియన్ మతాచారాలను పాటించే అనా..తిరుమలలో నిబంధనల మేరకు డిక్లరేషన్‌ పత్రాలపై సంతకాలు చేసి సంప్రదాయ క్రతువులో పాల్గొన్నారు.
పవన్తో వివాహం అయిన తర్వాత ఆమె ఎక్కువగా భారతీయ వస్త్రధారణలోనే కనిపించేవారు.
నాలుగు నెలల కిందట కూడా పవన్ గురించి ఎమోషనల్‌ పోస్ట్‌
ఈ ఏడాది జూన్‌ 12వ తేదీన కూడా అన్న తన భర్త గురించి సోషల్‌ మీడియాలో ఎమోషనల్‌ పోస్ట్‌ చేశారు.
ఏపీలో కూటమి ప్రభుత్వం ఏర్పాటైన సందర్భంగా ఆమె ఇన్‌స్టా వేదికగా తన భర్త డిప్యూటీ సీఎం పవన్ కల్యాణ్ పిల్లలతో కలిసి దిగిన ఫోటోలను షేర్ చేస్తూ సుదీర్ఘ పోస్ట్‌ పెట్టారు.
''పవన్ కల్యాణ్ ఇప్పుడు ఏపీ డిప్యూటీ సీఎంగా ఉండొచ్చు. కానీ ఈ స్థాయికి చేరుకునేందుకు ఆయన ప్రయాణం అంత సులభంగా ఏమీ సాగలేదు. ఎన్నో ఓటములను చూశారు ప్రపంచమంతా ఆయన వ్యతిరేకంగా ఉన్నట్లు అనిపించిన రోజులు ఎన్నో ఉన్నాయి. చాలామంది ఆయన అవమానించారు, ఎగతాళి చేశారు. పవన్ బయట రాజకీయ పోరాటాలు చేస్తుంటే నేను ఇంట్లో పిల్లల కోసం ధైర్యంగా ఉండడానికి ప్రయత్నించేదాన్ని. కొన్నిసార్లు ఒంటరిగా అనిపించేది. భయపడిన రోజులు ఉన్నాయి. పవన్ విజయం నాకు భావోద్వేగభరితం. ఆయన ప్రమాణ స్వీకారం రోజు నేను కన్నీటి పర్యంతం కావడం మోదీగారు కూడా గమనించారు. అవి ఆనందబాష్పాలు" అని పేర్కొంటూ పవన్ 2024లో డిప్యూటీ సీఎంగా ప్రమాణం స్వీకారం చేసినప్పటి ఫోటోలు, వీడియోలను షేర్ చేశారు.
మార్చిలో ఇన్‌స్టాలోకి.. వారం కిందట ఆ అకౌంట్‌ క్లోజ్‌
మొదటి నుంచి సోషల్‌ మీడియాకి దూరంగా ఉండే అనా లెజ్‌నెవా ఈ ఏడాది మార్చి 25 అధికారికంగా ఇన్స్టాగ్రామ్లో ఖాతా ఓపెన్‌ చేశారు.
ఈ సందర్భంగా పవన్తో దిగిన ఒక ఫోటోను షేర్ చేసిన అనా.. ‘‘చాలా కాలం నుంచి ఇన్‌‌స్టాగ్రామ్‌‌లోకి అడుగుపెట్టాలని చూస్తున్నా. అందుకు ఇదే సరైన సమయం అనిపించింది. మెగాస్టార్‌ చిరంజీవిగారి ఆశీస్సులతో, పవన్ కల్యాణ్ సపోర్ట్‌తో మీ ముందుకు వచ్చినందుకు చాలా సంతోషంగా ఉంది’’ అని తన పోస్టులో రాశారు.
ఇన్‌‌స్టాగ్రామ్‌‌లోకి ఎంట్రీ ఇచ్చిన వెంటనే ఆమె తన కుటుంబ సభ్యులతో పాటు, ఇతర సెలబ్రిటీలను కూడా ఫాలో అయ్యారు.
అందులో మహేశ్ బాబు, నమ్రతా శిరోద్కర్‌ , సమంతా, అలియా భట్‌ వంటి స్టార్స్‌ కూడా ఉన్నారు.
ఇక పవన్ కల్యాణ్ కూడా తన భార్యకు స్వాగతం చెబుతూ ఇన్స్టాగ్రామ్లో ఒక పోస్ట్‌ పెట్టారు.
‘‘అనా లెజ్‌నెవా' కి మనస్ఫూర్తిగా ఇన్‌‌స్టాగ్రామ్‌‌లోకి స్వాగతం పలుకుతున్నా. ఈ స్పేస్‌‌లోకి వచ్చినందుకు ఆల్‌ ది బెస్ట్‌. రాబోయే రోజుల్లో నీ విలువైన ఆలోచనలను ఈ స్పేస్‌ ద్వారా ఎలా పంచుకోబోతున్నావో తెలుసుకోవాలని నాకు కూడా ఆసక్తిగా ఉంది’’ అని రాసుకొచ్చారు పవన్ కల్యాణ్.
అయితే వారం కిందట అనా లెజ్‌నెవా ఇన్‌స్టా అకౌంట్‌ను క్లోజ్‌ చేసినట్టు ఆ సోషల్‌ మీడియా ఖాతాలో కనిపిస్తోంది.
(బీబీసీ కోసం కలెక్టివ్ న్యూస్‌రూమ్ ప్రచురణ)
(బీబీసీ తెలుగును వాట్సాప్‌, ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)