ఎన్విడియా అధిపతి జెన్సన్ హువాంగ్‌తో వివాహేతర బంధంలో ఉన్నట్లు చెబుతున్న మహిళ ఎవరు?

ఆర్టిఫిషియల్ ఇంటెలిజెన్స్ పరిశ్రమలోని ఒక ప్రముఖ వ్యక్తికి, చైనాకు చెందిన ఒక గూఢచారితో సంబంధాలు ఉన్నాయని ఆరోపణలు వచ్చాయి. ఈ విషయంపై ప్రస్తుతం దర్యాప్తు జరుగుతోంది.

'ది న్యూయార్క్ టైమ్స్' కథనం ప్రకారం, ఆలిస్ హువాంగ్ అనే చైనా వ్యాపారవేత్త.. చైనా తరపున గూఢచర్యానికి పాల్పడుతున్నారని అమెరికా నిఘా అధికారులు అనుమానిస్తున్నారు.

ఎన్విడియా సీఈఓ, దాని సహ వ్యవస్థాపకుడైన జెన్సన్ హువాంగ్ ఆలిస్‌కు సన్నిహిత సంబంధం ఉందని అధికారులు భావిస్తున్నారు.

హువాంగ్‌ తన భార్యకు నమ్మకద్రోహం చేసినట్లు ఆదివారంనాడు అంగీకరించి, భార్యకు, పిల్లలకు క్షమాపణలు చెప్పారు.

ఈ కథనాలపై ఎన్విడియా ఒక స్వతంత్ర దర్యాప్తును ప్రారంభించింది. అయితే, దీనివల్ల అమెరికా జాతీయ భద్రతకు ఎలాంటి ముప్పు వాటిల్లలేదని ఆ సంస్థ పేర్కొంది.

ఈ విషయంపై ఎఫ్‌బీఐ కూడా దర్యాప్తు చేస్తోందని అధ్యక్షుడు డోనల్డ్ ట్రంప్ సోమవారం తెలిపారు. అయితే దీనిపై స్పందించాల్సిందిగా బీబీసీ కోరినప్పుడు ఎఫ్‌బీఐ వ్యాఖ్యానించడానికి నిరాకరించింది.

హ్వంగ్‌తో తాను మాట్లాడినట్లు సోమవారంనాడు ట్రంప్ వెల్లడించారు.

గూఢచర్యంలో అమెరికాను టార్గెట్‌గా చేసుకున్న చైనా ఇందుకోసం హువాంగ్‌ను పావుగా వాడుకున్నట్లు అనుమానాలు వ్యక్తమయ్యాయి.

అయితే ఈ అంశంపై ట్రంప్ విలేఖరులతో మాట్లాడారు.

''ఆమె గూఢచారి అని మీకు తెలుసా?' అని నేను ఆయన్ను అడిగాను. దానికి ఆయన 'ఆమె గూఢచారి అనే విషయం నాకు అస్సలు తెలియదు' అని బదులిచ్చాడు. నేను ఆయన్ను నమ్ముతా" అని ట్రంప్ అన్నారు.

ఆలిస్ హువాంగ్‌-జెన్సన్ హువాంగ్‌ మధ్య ఉన్న అనుబంధం ఏంటి?

ది న్యూయార్క్ టైమ్స్' నివేదిక ప్రకారం గూఢచర్యం చేసే ఉద్దేశ్యంతో చైనా అగ్రశ్రేణి గూఢచార సంస్థ ఆలిస్ హువాంగ్‌ను నియమించుకుందని అమెరికా అధికారులు భావించారు. ఆమె ప్రస్తుతం ఎక్కడ ఉన్నారో తెలియదు.

ఆలిస్ హువాంగ్‌కు జెన్సన్ హువాంగ్‌తో ఎలాంటి కుటుంబ సంబంధం లేదు. మార్చి- నవంబర్ 2023 మధ్య ఆమె సింగపూర్‌కు చెందిన డేటా సెంటర్ కంపెనీ మెగాస్పీడ్‌లో ఒక ఉన్నత పదవిని నిర్వహించారు. ఈ సంస్థ చైనాకు ఎన్విడియా చిప్‌ల రవాణాను సులభతరం చేసిందనే అనుమానం ఉండేది. అయితే, ఈ విషయంపై విచారణ జరిపి, ఆ ఆరోపణలు అవాస్తవమని తేలిందని ఎన్విడియా పేర్కొంది.

మెగాస్పీడ్‌పై గతంలో వచ్చిన ఆరోపణలపై సింగపూర్ ప్రభుత్వం విచారణ జరుపుతోంది. ఆ ఆరోపణల ప్రకారం, ఉన్నత శ్రేణి ఎన్విడియా చిప్‌లపై అమెరికా విధించిన ఎగుమతి ఆంక్షలను ఆ కంపెనీ తప్పించుకోవడానికి ప్రయత్నించింది. ఈ విషయంపై వ్యాఖ్య కోసం బీబీసీ మెగాస్పీడ్‌ను సంప్రదించింది.

గత నెలలో, ప్రస్తుత నాయకత్వం ఈ ఆరోపణలను తీవ్రంగా పరిగణించిందని, అంతర్గత విచారణ జరిపేందుకు న్యాయ సలహాదారులను నియమించిందని ఆ కంపెనీ 'ది న్యూయార్క్ టైమ్స్‌'కు తెలిపింది.

నిఘా పెట్టినప్పుడు ఆలిస్ హువాంగ్‌కు ఒక అమెరికా పౌరుడికి మధ్య సంభాషణలు జరిగినట్లు తేలింది. 'అన్‌మాస్కింగ్' అనే ప్రక్రియ ద్వారా పరిశోధించినప్పుడు ఆ వ్యక్తి జెన్సన్ హువాంగ్‌ అని గుర్తించారు.

అయితే, హువాంగ్‌ లే అనే మరో పేరు కూడా ఉన్నా ఆలిస్ హువాంగ్‌ ఎలాంటి సమాచారాన్ని సేకరించి బీజింగ్‌కు పంపారు అన్నది స్పష్టంగా తెలియలేదు. ఆమె వార్తాపత్రిక విచారణలకు స్పందించలేదు.

అమెరికా గూఢచార అధికారులు లేవనెత్తిన ఆందోళనల గురించి తమ కంపెనీకి తెలుసా అని బీబీసీ అడిగినప్పుడు, తమకు అలాంటి సమాచారం తెలియదని ఎన్విడియా ఖండించింది.

''ఒకవేళ మేం ఏదైనా నిజమైన ముప్పును ఎదుర్కొంటున్నట్లయితే, అమెరికా ప్రభుత్వం మాకు తెలియజేసి ఉండేదని భావిస్తున్నాం'' అని ఎన్విడియా ప్రతినిధి బీబీసీతో అన్నారు.

మరోవైపు ఈ గూఢచర్యం ఆరోపణలను చైనా తోసిపుచ్చింది. విదేశాంగ శాఖ ప్రతినిధి గ్వో జియాకున్ సోమవారం జరిగిన ఒక మీడియా సమావేశంలో "మేం ఇప్పటికే స్పందించాం. చైనా గూఢచర్యానికి సంబంధించిన ఈ ఆరోపణలు పూర్తిగా నిరాధారమైనవి. ఊహాగానాలపై ఆధారపడినవి. చైనా ప్రతిష్ఠను దెబ్బతీయడానికి ఉద్దేశించినవి" అని అన్నారు.

ఆలిస్ హ్వంగా చైనా కోసం గూఢచర్యం చేస్తున్నారని ఆరోపిస్తూ డోనల్డ్ ట్రంప్‌కు గత సంవత్సరమే నిఘా నివేదికలు అందాయని అక్టోబర్ చివరిలో 'ది న్యూయార్క్ టైమ్స్' కథనం రాసింది.

మరోవైపు హువాంగ్‌ గురించి అడిగినప్పుడు అమెరికా విదేశాంగ మంత్రి మార్కో రూబియో వ్యాఖ్యానించడానికి నిరాకరించారు.

జెన్సన్ హువాంగ్‌ భార్య ఎవరు?

హువాంగ్‌ 1980ల ప్రారంభంలో ఒరెగాన్ స్టేట్ యూనివర్శిటీలో తన కాబోయే భార్య లారీ మిల్స్‌ను కలిశాడు. ఆ సమయంలో, వారిద్దరూ ఎలక్ట్రికల్ ఇంజనీరింగ్ చదువుతూ ఒకే ల్యాబ్‌లో పనిచేసేవారు.

వారు ఎన్విడియాను సహ-స్థాపించడానికి సుమారు ఎనిమిది సంవత్సరాల ముందు, 1985లో వివాహం చేసుకున్నారు. వారికి మాడిసన్, స్పెన్సర్ అనే ఇద్దరు పిల్లలు ఉన్నారు.

2007లో, వారిద్దరూ జెహెచ్ అండ్ ఎల్ హువాంగ్‌ ఫౌండేషన్‌ను స్థాపించారు. ఎన్విడియా స్టాక్ ధరలో వేగవంతమైన పెరుగుదల కారణంగా, గత కొన్ని సంవత్సరాలుగా ఈ ఫౌండేషన్ ఆస్తులు గణనీయంగా పెరిగాయి. దీని విలువ 9 బిలియన్ డాలర్లకు పైగా ఉంటుందని అంచనా.

ఈ ఫౌండేషన్ ఒరెగాన్ స్టేట్ యూనివర్సిటీ, స్టాన్‌ఫోర్డ్ యూనివర్సిటీలలోని ఇంజనీరింగ్ ప్రోగ్రామ్‌లకు మిలియన్ల డాలర్లను విరాళంగా ఇచ్చింది.

హువాంగ్‌ ఎప్పుడూ తనను తాను ఒక ఫ్యామిలీ మ్యాన్‌గా చూపించుకునేందుకు ప్రయత్నించేవారని హువాంగ్‌ బయోగ్రఫీ రచయిత స్టీఫెన్ విట్ బీబీసీకి చెప్పారు.

"ఆయన తన భార్యను పొగుడుతూ ఆమె గురించి చాలా మంచి విషయాలు చెబుతారు. అయితే ఇలాంటి విషయాలు బయటపడితే ఏ కుటుంబానికైనా తీవ్రమైన బాధ కలుగుతుంది. తనను తాను ఒక కుటుంబ పెద్దగా చూపించుకోవడానికి, తన పిల్లలను తన దగ్గర ఉంచుకోవడానికి ఎంతో కృషి చేసిన వ్యక్తిపై ఆ ప్రభావం మరింత ఎక్కువగా ఉండొచ్చు'' అని స్టీఫెన్ విట్ చెప్పారు.

(లండన్‌ నుంచి టామ్ మెక్‌ఆర్థర్, సింగపూర్‌ నుంచి అయేషియా పెరీరా, టెసా వాంగ్, సిడ్నీ నుంచి హెలెన్ డేవిడ్‌సన్ అందించిన అదనపు సమాచారంతో)

(బీబీసీ కోసం కలెక్టివ్ న్యూస్‌రూమ్ ప్రచురణ)

(బీబీసీ తెలుగును వాట్సాప్‌,  ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)