మీరు ఈ వెబ్సైట్ యొక్క టెక్స్ట్-ఓన్లీ వెర్షన్ను చూస్తున్నారు, ఇది తక్కువ డేటాను వినియోగిస్తుంది. అన్ని చిత్రాలు మరియు వీడియోలతో కూడిన వెబ్సైట్ యొక్క ప్రధాన వెర్షన్ను చూడండి.
ఇజ్రాయెల్‌లో ప్రభుత్వం ఏర్పాటులో సవాళ్లు ఏంటి, ఐజెన్‌కోట్ గురించి అరబ్ మీడియా ఏం చెబుతోంది?
ఇజ్రాయెల్‌లో ప్రభుత్వం ఏర్పాటు బాధ్యతలను ఐజెన్‌కోట్‌కు అప్పగిస్తూ అధ్యక్షుడు ఐజాక్ హెర్జాగ్ తీసుకున్న నిర్ణయాన్ని నవంబర్ 7, 8న అరబ్ టెలివిజన్ చానళ్లు ప్రముఖంగా ప్రస్తావించాయి.
ఐజెన్‌కోట్ ఎదుట ఉన్న సవాళ్లు, అలాగే దేశ రాజకీయ భవిష్యత్తును నిర్ణయించడంలో అరబ్ పార్టీల పాత్రపై చానళ్లు ప్రధానంగా దృష్టి సారించాయి.
అధ్యక్షుడు హెర్జాగ్ నిర్ణయానికి అరబ్ మీడియా విస్తృత కవరేజ్ ఇచ్చింది.
ప్రముఖ అరబ్ మీడియా సంస్థలు, ఇజ్రాయెల్ పార్లమెంట్‌లోని 67 మంది సభ్యుల మద్దతు ఐజెన్‌కోట్‌కు లభించిందని ప్రత్యేకంగా ప్రస్తావించాయి.
అయితే, సంకీర్ణ ప్రభుత్వాన్ని ఏర్పాటు చేయడంలో ఐజెన్‌కోట్‌కు ఉన్న సంక్లిష్ట రాజకీయ సవాళ్లపైనే నవంబర్ 8న వచ్చిన కథనాలన్నీ దృష్టి సారించాయి.
అరబ్ పార్టీల సహాయంతో మైనారిటీ ప్రభుత్వ ఏర్పాటుకు ఉన్న అవకాశాలపై కూడా విశ్లేషణలు వెలువడ్డాయి.
రానున్న కొన్ని వారాలు పరీక్షా కాలమని మీడియా కథనాలు పేర్కొన్నాయి.
సిద్ధాంతపరమైన విభేదాలను పక్కన పెట్టి, అరబ్ పార్టీల సాయంతో తదుపరి ప్రభుత్వాన్ని ప్రతిపక్షాలు ఏర్పాటు చేస్తాయా లేదా అనేది రాబోయే వారాల్లో తేలనుంది.
అరబ్ పార్టీల ప్రభావంపై అల్ జజీరా విశ్లేషణ
కూటమి ఏర్పాటు ప్రక్రియలో అరబ్ పార్టీల ప్రభావం ఏ మేరకు ఉందనే కోణంలో ఖతార్‌కు చెందిన అల్ జజీరా చానల్ విశ్లేషించింది.
కూటమిని ఏర్పాటు చేయడానికి ఐజెన్‌కోట్‌కు 28 రోజుల సమయం ఉందని, అవసరమైతే దీనిని మరో రెండు వారాలు పొడిగించే అవకాశం ఉందని చానల్ పేర్కొంది.
అరబ్ పార్టీల బయటి మద్దతుతో మైనారిటీ ప్రభుత్వాన్ని ఏర్పాటు చేయాలని ఐజెన్‌కోట్‌ను బహిరంగంగా కోరినట్టు జాయింట్ లిస్ట్ నాయకుడు అహ్మద్ తిబీ అల్‌జజీరాతో చెప్పారు.
బెంజమిన్ నెతన్యాహు ప్రభుత్వాన్ని గద్దె దించడమే ప్రధాన లక్ష్యం కావాలని ఆయన అన్నారు.
ఐజెన్‌కోట్ ముందున్న సవాలు కష్టమే అయినప్పటికీ, అందుకు "రాజకీయ ధైర్యం" అవసరమని తిబీ అభిప్రాయపడ్డారు.
ఐజెన్‌కోట్‌కు అరబ్ పార్టీల మద్దతు
నెతన్యాహు వ్యతిరేక కూటమి ఏర్పాటుకు తాము సిద్ధంగా ఉన్నామంటూ అరబ్ రాజకీయ పార్టీలు ఇస్తున్న సంకేతాలపై సౌదీ అరేబియా ఆర్థిక సహాయంతో నడిచే అల్ అరేబియా చానల్ ప్రత్యేక కథనాలను ప్రసారం చేసింది.
ఎలాంటి అధికారిక కూటమి ఒప్పందం లేకపోయినా ఐజెన్‌కోట్ నేతృత్వంలోని ప్రభుత్వానికి మద్దతు ఇవ్వడానికి మన్సూర్ అబ్బాస్ నాయకత్వంలోని యునైటెడ్ అరబ్ లిస్ట్ సిద్ధంగా ఉందని ఆ చానల్ పేర్కొంది.
అబ్బాస్ ఇప్పటికే ఐజెన్‌కోట్, ప్రతిపక్ష నాయకుడు యాయీర్ లాపిడ్‌లతో చర్చలు జరిపినట్లు తమ వద్ద సమాచారం ఉందని పేర్కొంది.
రాజకీయ మార్పును కోరుకుంటున్న అరబ్ ఓటర్ల ఆకాంక్షలకు అనుగుణంగా నిర్ణయం తీసుకోవాలని ఆ పార్టీ భావిస్తోంది.
ఐజెన్‌కోట్‌కు మైనారిటీ ప్రభుత్వాన్ని ఏర్పాటు చేయడమే అత్యంత సాధ్యమయ్యే మార్గమని ఇజ్రాయెల్ వ్యవహారాల విశ్లేషకుడు ఇస్మత్ మన్సూర్ ఈ చానల్‌తో చెప్పారు.
నెతన్యాహును అధికారం నుంచి తొలగించాలనే ఒకే ఒక్క అంశంపై ఏకమైన పార్టీలతో ఇలాంటి ప్రభుత్వాన్ని ఏర్పాటు చేయవచ్చని ఆయన వివరించారు.
దీనికోసం అరబ్ పార్టీలతో పాటు కొన్ని మతపరమైన పార్టీలు ఓటింగ్‌కు దూరంగా ఉండాల్సి వస్తుంది.
నెతన్యాహు రాజకీయ వ్యూహాలతో లేదా భద్రతాపరమైన ఉద్రిక్తతలతో ఈ ప్రక్రియను అడ్డుకోకముందే వీలైనంత త్వరగా కూటమిని ఏర్పాటు చేయాలని ఆయన సూచించారు.
ఐజెన్‌కోట్ ముందున్న విభిన్న కూటమి ఎంపికలను యూఏఈకి చెందిన స్కై న్యూస్ అరేబియా చానల్ పరిశీలించింది.
అరబ్ పార్టీలతో సహకారంపై నెతన్యాహు వ్యతిరేక శిబిరంలో ఉన్న ఉద్రిక్తతలను ఈ చానల్ హైలైట్ చేసింది.
ప్రతిపక్ష నాయకుడు అవిగ్దోర్ లీబర్‌మన్ అరబ్ పార్టీల ఓట్లపై ఆధారపడే ఎలాంటి ప్రభుత్వానికైనా వ్యతిరేకంగా ఉన్నారని పేర్కొంది.
అలాగే కఠినమైన సంప్రదాయవాద యూదు పార్టీలతో ఒప్పందం చేసుకోవడం లేదా నెతన్యాహు శిబిరంలోని కొన్ని వర్గాలను కలుపుకుని విస్తృత "జాతీయ ఐక్య ప్రభుత్వాన్ని" ఏర్పాటు చేయడం వంటి ఇతర అవకాశాలను కూడా చానల్ చర్చించింది.
'నెతన్యాహుకు దూరంగా అమెరికా'
ఇరాన్ అనుకూల అరబ్ మీడియా సంస్థలు కూడా ఈ పరిణామాలపై స్పందించాయి. నెతన్యాహు "ఇజ్రాయెల్ సమాజంలో విభజనలు సృష్టిస్తున్నారని" ఐజెన్‌కోట్ ఆరోపించినట్లు బేరూత్ కేంద్రంగా పనిచేసే అల్-మయాదీన్ టీవీ నవంబర్ 7న ఒక కథనం ప్రసారం చేసింది.
ఇజ్రాయెల్‌లోని అరబ్ సమాజంపై నెతన్యాహు పదేపదే చేస్తున్న వ్యాఖ్యల నేపథ్యంలో ఐజెన్‌కోట్ ఈ ప్రకటన చేశారు.
ఐజెన్‌కోట్ నాయకత్వంలోని ఏర్పడే ప్రభుత్వానికి అరబ్ పార్టీలు మద్దతిస్తే అవి "ఇజ్రాయెల్‌ను లోపలి నుంచే నాశనం చేస్తాయి" అని నెతన్యాహు అంతకుముందు వ్యాఖ్యానించారు.
నెతన్యాహుతో కూటమి చేరే ప్రసక్తే లేదని ఐజెన్‌కోట్ స్పష్టం చేసినట్లు ఇరాన్‌కు చెందిన అల్-ఆలం టీవీ నవంబర్ 8న పేర్కొంది.
మరోవైపు అమెరికా కూడా నెతన్యాహుకు దూరంమవుతోందని ఇజ్రాయెల్‌కు ఏటా ఇచ్చే సుమారు 4 బిలియన్ డాలర్ల సహాయాన్ని నిలిపివేస్తున్నట్లు ప్రకటించిందని చానల్ తెలిపింది.
ఇది కేవలం ఆర్థిక పరమైన నిర్ణయం మాత్రమే కాదని, ఇజ్రాయెల్‌కు మద్దతు ఇవ్వడం వల్ల పెరుగుతున్న భారాన్ని ప్రతిబింబిస్తూ అమెరికా విధానంలో వచ్చిన ఒక పెద్ద మార్పు అని విశ్లేషించింది.
(బీబీసీ కోసం కలెక్టివ్ న్యూస్‌రూమ్ ప్రచురణ)
(బీబీసీ తెలుగును వాట్సాప్‌, ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)