آپ اس وقت اس ویب سائٹ کا ٹیکسٹ پر مبنی ورژن دیکھ رہے ہیں جو کم ڈیٹا استعمال کرتا ہے۔ مرکزی ویب سائٹ جہاں تمام تصاویر اور ویڈیوز موجود ہیں دیکھیے
بنگلہ دیش اور انڈیا کی سرحد پر چار روز سے پھنسی خاتون جن کو دونوں ملک اپنا شہری ماننے کو تیار نہیں
- مصنف, سجل داس
- عہدہ, بی بی سی نیوز بنگلہ
- وقت اشاعت
- مطالعے کا وقت: 7 منٹ
کھلے آسمان تلے ایک چٹائی اور باریک کمبل کے ساتھ موجود ایک نوجوان خاتون۔۔۔
یہ منظر ہے بنگلہ دیش اور انڈیا کے سرحدی مقام زیرو پوائنٹ کا جہاں ایک جانب بنگلہ دیش اور دوسری جانب انڈیا کی سرحدی فورسز اپنی اپنی پوزیشن پر الرٹ ہیں اور ان کے بیچ ایک خاتون گزشتہ چار روز سے اپنی شہریت کو تسلیم نہ کیے جانے پر بے یار و مددگار بیٹھی ہیں۔
یہ منظر سوشل میڈیا اور مقامی ذرائع ابلاغ میں بھی توجہ کا مرکز بن گیا ہے۔
بنگلہ دیش کے ضلع جمال پور کی دیوان گنج تحصیل کے سرحدی علاقے پاتھر چار میں بیٹھی خاتون منگل کی صبح سے زیرو لائن میں موجود ہیں اور بنگلہ دیش اور انڈیا، دونوں ممالک انھیں اپنا شہری تسلیم کرنے سے انکار کر رہے ہیں، جس کی وجہ سے وہ سرحدی علاقے میں پھنس کر رہ گئی ہیں۔
بنگلہ دیش بارڈر گارڈ (بی جی بی) کا الزام ہے کہ انڈیا کی بارڈر سکیورٹی فورس (بی ایس ایف) نے خاتون کو زبردستی بنگلہ دیشی حدود میں داخل کرنے کی کوشش کی۔ تاہم اس معاملے پر انڈین حکام کا مؤقف سامنے نہیں آیا ہے۔
بی جی بی کے مطابق خاتون کو انڈیا سے بنگلہ دیش میں داخل کرنے کی کوشش کی گئی تھی، تاہم مقامی لوگوں اور بنگلہ دیش بارڈر گارڈ نے انھیں داخل ہونے سے روک دیا۔
اس کے بعد سے وہ خاتون دونوں ممالک کے درمیان واقع زیرو لائن میں موجود ہیں۔ واقعے کے چار روز گزر جانے کے باوجود نہ بنگلہ دیش اور نہ ہی انڈیا اس خاتون کی ذمہ داری قبول کرنے پر آمادہ ہے۔
End of سب سے زیادہ پڑھی جانے والی
اس معاملے کے حل کے لیے دونوں ممالک کی سرحدی فورسز کے درمیان غیر رسمی رابطے بھی ہوئے لیکن کوئی پیش رفت نہ ہو سکی۔
جمعے کی دوپہر تک صورتِ حال جوں کی توں تھی اور اطلاعات کے مطابق دونوں جانب کے حکام اپنے اپنے مؤقف پر قائم تھے۔
شناخت کا معمہ
بنگلہ دیش اور انڈیا کی سرحد پر واقع زیرو لائن میں چار روز سے موجود خاتون کی شناخت تاحال واضح نہیں ہو سکی ہے۔
بنگلہ دیش بارڈر گارڈ (بی جی بی) اور انڈین بارڈر سکیورٹی فورس (بی ایس ایف) اس بارے میں مختلف مؤقف رکھتے ہیں کہ خاتون کس ملک کی شہری ہیں، تاہم دونوں میں سے کوئی بھی انھیں اپنی حدود میں داخل ہونے کی اجازت نہیں دے رہا۔
جمعے کو سرحدی علاقے کے مقامی لوگوں نے بی بی سی بنگلہ کو بتایا کہ واقعے کے بعد سے وہ خاتون کو چاول، بسکٹ اور ڈبل روٹی جیسی اشیا پہنچاتے رہے تھے، لیکن جمعے کو ایسا کرنا بھی ممکن نہ رہا۔
چار روز سے کھلے آسمان تلے دھوپ اور سردی کا سامنا کرنے والی خاتون کی حالت اب تشویشناک ہے۔
مقامی صحافیوں نے دونوں ممالک کی سرحدی فورسز کی موجودگی میں خاتون سے بات بھی کی۔
جمال پور کے صحافی فتحی الف حفیظ بابو نے بی بی سی بنگلہ کو بتایا کہ خاتون اپنا درست پتہ نہیں بتا سکیں۔
ان کے مطابق خاتون نے اپنا نام فوجی بیگم اور والد کا نام حنیف بتایا جبکہ عمر تقریباً 30 سال بتائی۔ تاہم کبھی انھوں نے کہا کہ ان کا گھر بنگلہ دیش کے ضلع پیروج پور میں ہے، کبھی جھالاکاٹھی اور کبھی باریسال کا نام لیا۔
صحافی کے مطابق خاتون کی باتوں میں تضاد تھا اور وہ ذہنی طور پر بھی غیر معمولی حالت میں محسوس ہو رہی تھیں۔
انھوں نے کہا کہ ’جب وہ انڈیا کی طرف جاتی ہیں تو بی ایس ایف انھیں روک دیتی ہے اور جب بنگلہ دیش کی طرف آتی ہیں تو بی جی بی آگے نہیں آنے دیتی۔‘
مقامی رہائشیوں کا کہنا ہے کہ حالیہ دنوں میں بڑی تعداد میں لوگ خاتون کو دیکھنے سرحد پر پہنچے، تاہم اب سکیورٹی مزید سخت کر دی گئی ہے اور لوگوں کو نہ تو ان کے قریب جانے کی اجازت دی جا رہی اور نہ ہی کھانا پہنچانے کے لیے آگے جانے دیا جا رہا۔
مقامی صحافی فرہاد رضا کے مطابق ابتدا میں بی جی بی کی اجازت سے خاتون تک پانی اور خشک خوراک پہنچائی جا رہی تھی لیکن جمعے کو بی ایس ایف نے اس پر اعتراض کیا۔
ان کا دعویٰ ہے کہ گذشتہ چند روز کے دوران صحافی قریب جا کر رپورٹنگ کر سکتے تھے مگر جمعے کو صورتحال زیادہ کشیدہ ہو گئی اور انھیں قریب جانے کی اجازت نہیں دی گئی۔
دوسری جانب بی جی بی کا دعویٰ ہے کہ خاتون کی شناخت اب تک ثابت نہیں ہو سکی کیونکہ وہ کوئی واضح معلومات فراہم نہیں کر پا رہی ہیں۔
جمال پور 35 بی جی بی کے کمانڈر لیفٹیننٹ کرنل حسن الرحمٰن نے بی بی سی بنگلہ کو بتایا کہ خاتون کوئی مکمل پتہ نہیں بتا رہیں اور صرف ادھوری معلومات فراہم کر رہی ہیں۔
ان کے مطابق ’وہ کوئی واضح پتہ نہیں بتا سکتیں۔ ان کی معلومات نامکمل ہیں اور ان سے معمول کے مطابق بات چیت کرنا بھی مشکل ہو رہا ہے۔‘
سرحدی گشت میں اضافہ
زیرو لائن پر بیٹھی خاتون کی شہریت کا سوال اب اس معاملے کا مرکزی نکتہ بن گیا ہے۔
بنگلہ دیش بارڈر گارڈ (بی جی بی) اور انڈین بارڈر سکیورٹی فورس (بی ایس ایف) اس بات پر متفق نہیں کہ خاتون بنگلہ دیش کی شہری ہیں یا انڈیا کی۔
جمال پور 35 بی جی بی کے کمانڈر لیفٹیننٹ کرنل حسن الرحمٰن نے کہا ہے کہ اس معاملے میں بی جی بی سرحد پر اپنا سخت مؤقف برقرار رکھے گی۔
انھوں نے بی بی سی بنگلہ کو بتایا کہ زیرو لائن میں موجود خاتون کے معاملے پر بی ایس ایف کے ساتھ رابطہ جاری ہے اور کوشش کی جا رہی ہے کہ انڈین فورس انھیں واپس لے جائے۔
ان کے مطابق ’سرحد پر بی جی بی اور بی ایس ایف دونوں موجود ہیں، خاتون پہلے کی طرح زیرو لائن میں بیٹھی ہیں اور ابھی تک اس معاملے کا کوئی حل نہیں نکلا۔‘
لیفٹیننٹ کرنل حسن الرحمٰن کا دعویٰ ہے کہ بی جی بی کے پاس ایسے شواہد موجود ہیں جن سے ظاہر ہوتا ہے کہ بی ایس ایف نے خاتون کو زبردستی بنگلہ دیش میں داخل کرنے کی کوشش کی۔
انھوں نے کہا کہ ’بی ایس ایف کا مؤقف ہے کہ خاتون بنگلہ دیشی ہیں جبکہ ہمارا کہنا ہے کہ انھیں انڈیا سے بھیجا گیا۔ ہمارے پاس اس کے ثبوت ہیں، لیکن وہ اسے تسلیم نہیں کرنا چاہتے۔‘
ان کا کہنا تھا کہ اس مسئلے پر دونوں ممالک کی سرحدی فورسز کے درمیان رابطہ جاری ہے اور مختلف سطحوں پر بات چیت ہو رہی ہے۔
تاہم چار روز سے زیرو لائن میں موجود خاتون کے معاملے پر دونوں ممالک کے درمیان باضابطہ فلیگ میٹنگ کے امکان کے بارے میں کوئی اطلاع سامنے نہیں آئی۔
اس وجہ سے خاتون کو سرحدی علاقے سے نکالنے اور ان کی شہریت کا تعین کرنے کا معاملہ بدستور غیر یقینی ہے۔
یاد رہے کہ رواں سال جون میں کوری گرام کے راؤماری سرحدی علاقے میں دو بچوں سمیت ایک خاندان کے چار افراد کو مبینہ طور پر سرحد پار دھکیلنے کے واقعے کے بعد 96 گھنٹے گزرنے پر بچایا گیا تھا۔
اس کے علاوہ جمال پور کے کمال پور اور جھاؤڈانگا سرحدی علاقوں میں بھی ایسے واقعات وسیع بحث کا موضوع بن چکے ہیں۔
یاد رہے کہ 2024 میں بنگلہ دیش کی سیاسی صورتحال تبدیل ہونے کے بعد سے بنگلہ دیش اور انڈیا کے تعلقات میں کشیدگی دیکھی گئی ہے۔
اس دوران سرحدی علاقوں میں پیش آنے والے مختلف واقعات نے دونوں ممالک کے درمیان وقتاً فوقتاً تناؤ پیدا کیا ہے۔
خاص طور پر غیر قانونی سرحدی دراندازی اور مبینہ ’پش اِن‘ (زبردستی داخل کرنے) کے واقعات پر دونوں ممالک کی سرحدی فورسز کئی بار آمنے سامنے آ چکی ہیں۔
بنگلہ دیش کا الزام ہے کہ انڈیا بعض افراد کو بنگلہ دیشی شہری قرار دے کر زبردستی اس کی حدود میں داخل کرنے کی کوشش کرتا ہے۔ تاہم انڈیا کی بارڈر سکیورٹی فورس (بی ایس ایف) ان الزامات کی مسلسل تردید کرتی رہی ہے۔
یہ معاملہ بنگلہ دیش کی قومی پارلیمان میں بھی زیرِ بحث آ چکا ہے، جہاں حزبِ اختلاف حکومت سے متعدد بار اس بارے میں سوالات کر چکی ہے۔
حال ہی میں بنگلہ دیش کے وزیرِ داخلہ صلاح الدین احمد نے پارلیمان کو بتایا کہ حکومت کی ہدایت پر سرحدی فورسز کے سخت مؤقف کے باعث ہمسایہ ملک سے ہونے والے مبینہ ’دھکیلنے‘ کے واقعات میں نمایاں کمی آئی ہے۔
ان کے مطابق یکم جنوری 2025 سے 16 فروری 2026 تک، یعنی موجودہ بی این پی حکومت کے اقتدار میں آنے سے پہلے، انڈیا سے مبینہ طور پر 2,482 افراد کو بنگلہ دیش میں دھکیلے جانے کے واقعات ریکارڈ کیے گئے تھے۔
وزیرِ داخلہ نے کہا کہ اس کے بعد رواں سال آٹھ نومبر تک ایسے واقعات کی تعداد کم ہو کر 37 رہ گئی ہے۔
انھوں نے کہا کہ مغربی بنگال میں اقتدار کی تبدیلی کے بعد بنگلہ دیشی سرحد پر پش اِن کی کوششوں سے حکومت نے ’انتہائی صبر و تحمل‘ کے ساتھ نمٹا ہے۔
صلاح الدین احمد نے یہ دعویٰ بھی کیا کہ موجودہ بی این پی حکومت کے اقتدار سنبھالنے کے بعد بنگلہ دیش اور انڈیا کی سرحد پر ہلاکتوں کے واقعات میں بھی کمی آئی ہے۔
'BBC News اردو' ایڈیشن کا انتخاب کریں اور نیوز الرٹس، تحقیقاتی اور تفصیلی رپورٹس، سب کچھ ایک ہی جگہ پر حاصل کریں۔
نوٹ: نئی ایپ برطانیہ اور امریکہ میں دستیاب نہیں ہے اور اس کا انگریزی زبان میں ایڈیشن موجود نہیں۔