ٹرمپ خاندان کے کرپٹو کاروبار کی تحقیقات کا امکان: پاکستان اور ورلڈ لبرٹی فنانشل کے درمیان کیا روابط ہیں؟

پاکستان کا کہنا ہے کہ اس نے امریکی صدر ٹرمپ کے خاندان سے وابستہ کرپٹو کمپنی ورلڈ لبرٹی فنانشل میں کوئی سرمایہ کاری نہیں کی ہے۔

یہ کمپنی ٹرمپ کے بیٹوں اور مشرقِ وسطیٰ کے لیے امریکہ کے خصوصی ایلچی سٹیو وٹکوف کے بچوں نے قائم کی تھی۔ صدر ٹرمپ نے اس کمپنی سے لاتعلقی کا اظہار کیا ہے تاہم امریکی وسط مدتی انتخابات میں فتح کے بعد ڈیموکریٹس نے عندیہ دیا ہے کہ وہ کانگریس کے تفتیشی اختیارات استعمال کرتے ہوئے ٹرمپ خاندان کے کرپٹو کاروبار اور اس کے غیر ملکی روابط کا جائزہ لینا چاہتے ہیں۔

بی بی سی کو بھجوائے گئے اپنے مؤقف میں پاکستان ورچوئل اثاثہ جات ریگولیٹری اتھارٹی (پی وی اے آر اے) کا کہنا ہے کہ ورلڈ لبرٹی فنانشل کے ساتھ پاکستان کا تعلق ’بنیادی طور پر تکنیکی تعاون اور مالیاتی نظام کے مستقبل سے متعلق امکانات کا جائزہ لینے تک محدود رہا ہے۔‘

ادھر ورلڈ لبرٹی فنانشل کے ایک ترجمان ڈیوڈ واکس مین نے بی بی سی کو بتایا ہے کہ 2025 میں کمپنی سے وابستہ ایک ادارے نے حکومتِ پاکستان کے ساتھ معاہدہ کیا تھا تاکہ امریکی ڈالر سے منسلک سٹیبل کوائنز کو مالیاتی نظام میں شامل کرنے کے امکانات کا جائزہ لیا جا سکے۔

واضح رہے کہ مارچ 2025 میں حکومتِ پاکستان نے کرپٹو کونسل قائم کی تھی، بعد ازاں اسی کونسل کے تحت اپریل 2025 میں ورلڈ لبرٹی فنانشل (ڈبلیو ایل ایف) کے ساتھ ایک لیٹر آف انٹینٹ پر دستخط کیے گئے تھے۔

لیٹر آف انٹینٹ ایک ایسی ابتدائی نوعیت کی دستاویز کو کہتے ہیں جس میں حتمی معاہدے سے پہلے فریقین کے درمیان بنیادی شرائط، توقعات اور باہمی سمجھ بوجھ کا خاکہ طے کیا جاتا ہے۔

اس کے بعد 14 جنوری 2026 کو پاکستان نے ورلڈ لبرٹی فنانشل کے ساتھ ایک مفاہمتی یادداشت پر دستخط کیے۔

یادداشت پر دستخط کے موقع پر پاکستان کے وزیرِ اعظم شہباز شریف، چیف آف ڈیفینس فورسز فیلڈ مارشل عاصم منیر اور ڈبلیو ایل ایف کے چیف ایگزیکٹو آفیسر زچری وٹکوف سمیت دیگر حکام موجود تھے۔

تاہم، ٹرمپ کے خاندان سے وابستہ یہ کمپنی اب امریکہ میں بڑھتی ہوئی سیاسی اور قانونی بحث کا مرکز بنتی دکھائی دے رہی ہے۔

اس کمپنی کے غیر ملکی سرمایہ کاروں، بیرونِ ملک شراکت داریوں اور ڈونلڈ ٹرمپ اور ان کے خاندان کے مالی مفادات کے بارے میں سوالات ایک عرصے سے اٹھائے جا رہے ہیں، تاہم امریکی وسط مدتی انتخابات میں ٹرمپ مخالف ڈیموکریٹس کی کامیابی کے بعد ان معاملات کی باقاعدہ تحقیقات کا امکان پہلے سے زیادہ بڑھ گیا ہے۔

ڈیموکریٹ رہنما عندیہ دے چکے ہیں کہ وہ کانگریس کے تفتیشی اختیارات استعمال کرتے ہوئے ٹرمپ خاندان کے کرپٹو کاروبار اور اس کے غیر ملکی روابط کا جائزہ لینا چاہتے ہیں۔

’میں اس بارے میں کچھ نہیں جانتا‘: ٹرمپ کا اظہارِ لاتعلقی

اس بحث کو حال ہی میں اُس وقت مزید توجہ ملی جب امریکی نشریاتی ادارے سی بی ایس کے پروگرام 60 منٹس میں ٹرمپ سے ان کے کرپٹو کاروبار کے بارے میں سوال کیا گیا۔

امریکی صدر سے پوچھا گیا کہ ان کا بیٹا ورلڈ لبرٹی فنانشل نامی کرپٹو کرنسی کمپنی کا انتظام سنبھالتا ہے، اور اس کمپنی میں جزوی ملکیت ایسے سرمایہ کاروں کی بھی ہے جن کے روابط متحدہ عرب امارات کی حکومت سے بتائے جاتے ہیں۔

ٹرمپ نے جواب دیا: ’میں اس کے بارے میں کچھ نہیں جانتا۔‘

ان کا مزید کہنا تھا کہ ’میرے بیٹے یہ کمپنی چلاتے ہیں۔ ان سے یہ کہنا مشکل ہے کہ چونکہ میں صدر ہوں، اس لیے وہ چار سال تک کوئی کام نہ کریں۔‘

اس پر سوال کیا گیا کہ دیگر ممالک سے تعلق رکھنے والے وہ سرمایہ کار، جو صدر اور ان کے بیٹوں کی مشترکہ ملکیت والی کمپنی میں سرمایہ کاری کر رہے ہیں، کیا یہ نہیں سمجھتے ہوں گے کہ اس طرح وہ امریکی حکومت میں اثر و رسوخ حاصل کر سکتے ہیں؟

جواب میں ٹرمپ نے کہا کہ انھیں نہیں معلوم کہ غیر ملکی سرمایہ کار اس طرح سوچتے ہیں یا نہیں، تاہم ان کے بقول مفادات کے ممکنہ ٹکراؤ کے ایسے سوالات ہر امریکی صدر کے ساتھ وابستہ رہے ہیں۔

ڈونلڈ ٹرمپ نے کہا کہ ان کے خیال میں یہ مسئلہ صرف ان تک محدود نہیں بلکہ جارج واشنگٹن کے زمانے سے ہر صدر کو کسی نہ کسی شکل میں ایسی صورتحال کا سامنا رہا ہے۔

انھوں نے یہ مؤقف بھی اختیار کیا کہ ہر دور میں صدور کے کاروباری یا مالی مفادات رہے ہیں، فرق صرف اتنا ہے کہ آج یہ معاملہ کرپٹو کرنسی سے متعلق ہے۔

ورلڈ لبرٹی فنانشل سے ٹرمپ کو 50 کروڑ ڈالر سے زیادہ آمدنی ہوئی

یہ سوالات اس لیے بھی اہم سمجھے جا رہے ہیں کیونکہ حالیہ مالی دستاویزات سے معلوم ہوتا ہے کہ کرپٹو کرنسی سے وابستہ منصوبے اب ٹرمپ خاندان کے سب سے منافع بخش کاروباروں میں شمار ہونے لگے ہیں۔

صدر ڈونلڈ ٹرمپ نے رواں سال جون میں 927 صفحات پر مشتمل اپنی مالی تفصیلات جاری کیں۔ میڈیا رپورٹس کے مطابق کرپٹو کرنسی سے وابستہ کاروبار ان کی آمدنی کا ایک بڑا ذریعہ بن چکے ہیں۔

بی بی سی کی یکم جولائی 2026 کی رپورٹ کے مطابق ڈونلڈ ٹرمپ نے 2025 کے دوران کرپٹو کرنسی سے متعلق کاروباروں سے مجموعی طور پر ایک ارب 43 کروڑ ڈالر سے زیادہ آمدنی ظاہر کی۔

مالی دستاویزات کے مطابق ٹرمپ نے 63 کروڑ 50 لاکھ ڈالر ایسی رائلٹی کی صورت میں ظاہر کیے جو $TRUMP میم کوائن سے منسلک ایک ادارے سیلیبریشن کوائنز سے حاصل ہوئی۔

انہی مالی تفصیلات میں ٹرمپ نے 50 کروڑ ڈالر سے زیادہ آمدنی ورلڈ لبرٹی فنانشل سے ظاہر کی۔

امریکی جریدے فوربز کے صحافی ڈین الیگزینڈر کا کہنا ہے کہ 2024 سے 2025 کے درمیان ڈونلڈ ٹرمپ کی دولت میں تقریباً تین ارب ڈالر کے اضافے کے پیچھے کرپٹو کاروبار کا بڑا ہاتھ تھا، اور اس میں ورلڈ لبرٹی فنانشل کی حیثیت کلیدی تھی۔

اتوار (آٹھ نومبر) کو سوشل میڈیا پلیٹ فارم ایکس پر ایک طویل تھریڈ میں ڈین الیگزینڈر نے لکھا کہ اس کمپنی کی کہانی 2024 کے صدارتی انتخاب سے قبل شروع ہوئی، جب ٹرمپ نے ورلڈ لبرٹی فنانشل کے نام سے ایک نیا کرپٹو وینچر متعارف کرایا جس کے بارے میں ’مالیاتی انقلاب‘ جیسے دعوے کیے گئے۔

ان کے مطابق ابتدا میں کرپٹو دنیا نے اس منصوبے میں زیادہ دلچسپی نہیں دکھائی، مگر صورت حال اس وقت بدلی جب کرپٹو ارب پتی جسٹن سن نے، جن پر ایک وقت میں امریکی ریگولیٹرز کی جانب سے فراڈ کے الزامات بھی عائد کیے گئے تھے، تین کروڑ ڈالر کی سرمایہ کاری کا اعلان کیا۔

الیگزینڈر کے مطابق اس سرمایہ کاری کے بعد ٹرمپ خاندان اور دیگر شراکت داروں کو مالی فوائد ملنا شروع ہو گئے اور مزید سرمایہ کاری کا سلسلہ تیز ہو گیا۔

جسٹن سن نے ٹرمپ کی تقریبِ حلف برداری سے ایک روز قبل مزید ساڑھے چار کروڑ ڈالر کی سرمایہ کاری کا اعلان کیا جبکہ اسی دوران ٹرمپ نے اپنا میم کوائن، یعنی اپنے نام سے منسوب ایک کرپٹو ٹوکن، بھی متعارف کرا دیا۔

ان کے مطابق ٹرمپ کے اقتدار سنبھالنے کے بعد بھی سرمایہ کاری کا سلسلہ جاری رہا، خصوصاً متحدہ عرب امارات سے۔

وہ لکھتے ہیں کہ مختلف اماراتی اداروں اور امارات سے وابستہ سرمایہ کاروں نے کروڑوں ڈالر کے ٹوکن خریدے جبکہ بعد کی رپورٹوں سے معلوم ہوا کہ ابوظہبی کے شاہی خاندان سے وابستہ نمائندوں نے ورلڈ لبرٹی فنانشل میں 49 فیصد حصص تقریباً 50 کروڑ ڈالر میں خریدے۔

یہی وہ پس منظر ہے جس کی وجہ سے ناقدین ورلڈ لبرٹی فنانشل کو محض ایک کرپٹو کمپنی نہیں بلکہ ٹرمپ خاندان کے اہم مالی مفادات میں شمار کرتے ہیں، اور یہ کمپنی اب کانگریس کی ممکنہ تحقیقات کے دائرے میں آتی دکھائی دے رہی ہے۔

ڈیموکریٹس کا تحقیقات کا اعلان

خبر رساں ادارے ایسوسی ایٹڈ پریس (اے پی) کی پانچ نومبر کی خبر کے مطابق ڈیموکریٹ رہنماؤں نے عندیہ دیا ہے کہ وہ ٹرمپ، ان کے خاندان اور ان کے قریبی ساتھیوں کے کاروباری معاملات کی جانچ پڑتال کے لیے کانگریس کی تفتیشی اور سمن جاری کرنے کی طاقت استعمال کریں گے۔

ڈیموکریٹس کی جانب سے جن معاملات میں تحقیقات کی بات کی جا رہی ہے، ان میں ورلڈ لبرٹی فنانشل بھی شامل ہے۔

اے پی کے مطابق سینیٹ تحقیقاتی کمیٹی کے متوقع سربراہ رچرڈ بلومنتھال نے کہا ہے کہ ان کی کمیٹی ٹرمپ کے کرپٹو کاروباری معاملات کا جائزہ لینا چاہتی ہے۔

بلومنتھال نے خاص طور پر مشرقِ وسطیٰ کے لیے امریکی خصوصی ایلچی سٹیو وٹکوف کے ساتھ ٹرمپ کے کرپٹو کاروباری روابط کا ذکر کیا، جو، اے پی کے مطابق، ٹرمپ خاندان کے کرپٹو منصوبے ورلڈ لبرٹی فنانشل میں ان کے شراکت دار رہے ہیں۔

اس سلسلے میں ڈیموکریٹس کے عزائم اس وقت مزید واضح ہو گئے جب امریکی جریدے پولیٹیکو نے رپورٹ کیا کہ رچرڈ بلومنتھال نے حال ہی میں درجنوں نجی کمپنیوں اور ٹرمپ انتظامیہ کے دو عہدے داروں کو خطوط ارسال کیے ہیں جن میں پہلے سے مانگی گئی معلومات فراہم نہ کرنے پر متبادل اقدامات کی تنبیہ کی گئی ہے۔

پولیٹیکو کے مطابق جن کرپٹو کمپنیوں کو یہ خطوط بھیجے گئے ان میں بائنانس اور ورلڈ لبرٹی فنانشل شامل ہیں۔

خطوط میں کہا گیا کہ ان کمپنیوں نے ذیلی کمیٹی کی جانب سے طلب کی گئی معلومات اور ریکارڈز فراہم کرنے کے سلسلے میں خاطر خواہ تعاون نہیں کیا، اور اگر چار جنوری 2027 تک مطلوبہ دستاویزات جمع نہ کرائی گئیں تو کمیٹی تعمیل یقینی بنانے کے لیے مزید اقدامات پر غور کر سکتی ہے۔

پولیٹیکو پر شائع شدہ اس خبر کی سرخی ہے ’ٹرمپ سے وابستہ کمپنیوں کے خلاف تحقیقات تیز کرنے کی تیاری‘ اور رچرڈ بلومنتھال نے اپنے ایکس اکاؤنٹ پر اسے شیئر بھی کیا ہے۔

’پاکستان نے ورلڈ لبرٹی فنانشل میں سرمایہ کاری نہیں کی‘

اور یہاں پاکستان اس بحث کا حصہ بنتا ہے۔

کیوں کہ عوامی سطح پر دستیاب معلومات کے مطابق اس کمپنی کے ساتھ جڑنے والے ممالک میں نمایاں طور پر دو نام سامنے آتے ہیں: متحدہ عرب امارات اور پاکستان۔

خبر رساں ادارے ایسوسی ایٹڈ پریس نے 14 اپریل 2026 کی ایک رپورٹ میں وال سٹریٹ جرنل کے حوالے سے بتایا تھا کہ ٹرمپ خاندان نے ورلڈ لبرٹی فنانشل میں تقریباً نصف حصہ ایک اماراتی حکومت سے منسلک کمپنی کو 50 کروڑ ڈالر میں فروخت کیا تھا۔

اے پی کے مطابق بعد ازاں امارات کے ایک سرکاری سرمایہ کاری فنڈ نے ورلڈ لبرٹی فنانشل کے جاری کردہ سٹیبل کوائن کے ذریعے بائنانس میں دو ارب ڈالر کی سرمایہ کاری کی۔

واضح رہے کہ سٹیبل کوائن ایک ایسی کرپٹو کرنسی ہوتی ہے جس کی قدر کسی روایتی اثاثے، عموماً امریکی ڈالر، کے ساتھ منسلک رکھی جاتی ہے تاکہ اس کی قیمت میں عام کرپٹو کرنسیوں کی طرح شدید اتار چڑھاؤ نہ آئے۔

تاہم، متحدہ عرب امارات کی تمام معلومات ذرائع ابلاغ کی رپورٹنگ کے ذریعے منظر عام پر آئی تھیں، جبکہ پاکستان کے معاملے میں صورتحال مختلف ہے۔ پاکستان اور ورلڈ لبرٹی فنانشل کے درمیان جو بھی روابط اور معاہدے ہوئے، ان کا اعلان سرکاری سطح پر کیا گیا تھا۔

جب اپریل 2025 میں پاکستان کرپٹو کونسل اور ورلڈ لبرٹی فنانشل میں لیٹر آف انٹینٹ پر دستخط ہوئے تھے تو اس کا اعلامیہ وزیرِ اعظم پاکستان کے دفتر سے جاری کیا گیا تھا۔

بعد ازاں، جب 14 جنوری 2026 کو پاکستان اور ورلڈ لبرٹی فنانشل کے درمیان ایک مفاہمتی یادداشت پر دستخط ہوئے تو پاکستان کی جانب سے اس پر دستخط وفاقی وزیرِ خزانہ محمد اورنگزیب نے کیے تھے، جبکہ اس موقع پر وزیرِ اعظم شہباز شریف اور فیلڈ مارشل عاصم منیر بھی موجود تھے۔

پاکستان ورچوئل اثاثہ جات ریگولیٹری اتھارٹی (پی وی اے آر اے) کے ایکس اکاؤنٹ سے شائع کی گئی پوسٹ میں کہا گیا تھا کہ یہ مفاہمتی یادداشت ورلڈ لبرٹی فنانشل اور پاکستان کی وزارتِ خزانہ کے درمیان طے پائی ہے۔

مفاہمتی یادداشت کے بعد معاملات عملی طور پر کس حد تک آگے بڑھے اور کیا پاکستان نے ورلڈ لبرٹی فنانشل کے ذریعے کرپٹو کرنسی میں سرمایہ کاری بھی کی؟

جب بی بی سی نے یہ سوال وزیرِ خزانہ محمد اورنگزیب کے مشیر خرم شہزاد کے سامنے رکھا تو انھوں نے پاکستان ورچوئل اثاثہ جات ریگولیٹری اتھارٹی (پی وی اے آر اے) کا مؤقف لینے کا مشورہ دیا۔

بی بی سی کے رابطہ کرنے پر پی وی اے آر اے کا کہنا ہے کہ پاکستان نے ورلڈ لبرٹی فنانشل میں ’کوئی حصہ خریدا اور نہ ہی اس کے لیے کوئی سرکاری سرمایہ مختص کیا۔‘

پی وی اے آر اے کا کہنا ہے کہ ورلڈ لبرٹی فنانشل کے ساتھ ہونے والے معاہدے سرمایہ کاری کے معاہدے نہیں تھے۔

ادارے کا موقف ہے کہ ورلڈ لبرٹی فنانشل کے ساتھ رابطوں کا مقصد سستی، تیز تر اور زیادہ مؤثر بین الاقوامی ادائیگیوں کے امکانات کا جائزہ لینا تھا۔

پی وی اے آر اے کے مطابق پاکستان گذشتہ مالی سال کے دوران 41 ارب 60 کروڑ ڈالر سے زائد کی ترسیلاتِ زر وصول کر چکا ہے اور سرحد پار رقوم کی منتقلی کی لاگت میں معمولی کمی بھی لاکھوں پاکستانی خاندانوں کے لیے نمایاں معاشی فوائد کا باعث بن سکتی ہے۔

پی وی اے آر اے نے کہا کہ اسی تناظر میں پاکستان سٹیبل کوائنز اور بلاک چین پر مبنی ادائیگیوں کے نظام سمیت ابھرتی ہوئی ٹیکنالوجیز کا جائزہ لے رہا ہے، جن کے ذریعے بین الاقوامی ادائیگیوں کو تیز تر، زیادہ مؤثر اور کم لاگت بنایا جا سکتا ہے۔

ادارے کا مزید کہنا تھا کہ حکومت کا مقصد ’کسی ایک کمپنی یا مخصوص ٹیکنالوجی کی حمایت کرنا نہیں بلکہ ایسے قابلِ عمل حل تلاش کرنا ہے جو مالیاتی نظام کی کارکردگی بہتر بنانے اور ترسیلاتِ زر سے وابستہ اخراجات کم کرنے میں معاون ثابت ہو سکیں۔‘

پی وی اے آر اے کے مطابق اس حوالے سے کوئی عملی اقدام جب بھی کیا گیا تو وہ ’پاکستان کے ضابطہ جاتی تقاضوں، مالیاتی استحکام اور قومی مفادات کے تحت ہو گا۔‘

اس معاملے پر ورلڈ لبرٹی فنانشل نے بھی بی بی سی کے سوالات کے جواب میں اپنا مؤقف پیش کیا۔

ورلڈ لبرٹی فنانشل کے ترجمان ڈیوڈ واکس مین نے کہا کہ 2025 میں کمپنی سے وابستہ ایک ادارے نے حکومتِ پاکستان کے ساتھ معاہدہ کیا تھا تاکہ امریکی ڈالر سے منسلک سٹیبل کوائنز کو مالیاتی نظام میں شامل کرنے کے امکانات کا جائزہ لیا جا سکے۔

ان کے مطابق ’پاکستان میں تقریباً چار کروڑ کرپٹو صارفین موجود ہیں جبکہ بین الاقوامی ترسیلاتِ زر، جو ملکی معیشت کے لیے اہم ہیں، پرانی ٹیکنالوجی کے استعمال کے باعث اکثر مہنگی پڑتی ہیں۔‘

اگرچہ ڈیموکریٹس کی توجہ اس وقت ورلڈ لبرٹی فنانشل کے غیر ملکی روابط اور سرمایہ کاروں پر مرکوز ہے، تاہم دستیاب معلومات کے مطابق پاکستان کا نام تا حال کسی تحقیقاتی مطالبے یا عوامی بیان میں سامنے نہیں آیا۔

BBC World Service کی نئی ایپ ڈاؤن لوڈ کریں۔

’BBC News اردو‘ ایڈیشن کا انتخاب کریں اور نیوز الرٹس، تحقیقاتی اور تفصیلی رپورٹس، سب کچھ ایک ہی جگہ پر حاصل کریں۔

نوٹ: نئی ایپ برطانیہ اور امریکہ میں دستیاب نہیں ہے اور اس کا انگریزی زبان میں ایڈیشن موجود نہیں۔