یہ صفحہ مزید اپ ڈیٹ نہیں کیا جا رہا ہے!
بی بی سی اردو کی لائیو پیج کوریج جاری ہے تاہم یہ صفحہ مزید اپ ڈیٹ نہیں کیا جا رہا ہے۔
نو نومبر کی خبریں جاننے کے لیے یہاں کلک کریں۔
آپ اس وقت اس ویب سائٹ کا ٹیکسٹ پر مبنی ورژن دیکھ رہے ہیں جو کم ڈیٹا استعمال کرتا ہے۔ مرکزی ویب سائٹ جہاں تمام تصاویر اور ویڈیوز موجود ہیں دیکھیے
امریکی ووٹرز فیصلہ سنا چکے، اب وائٹ ہاؤس اپنی سمت کا تعین کرے: عباس عراقچی کی واشنگٹن کو تنبیہ
سماجی رابطے کی ویب سائٹ ایکس پر اپنے ایک بیان میں عباس عراقچی نے کہا کہ اگر امریکہ ایران کی شرائط پوری کرے، جن میں ’تمام محاذوں پر جنگ کے خاتمے‘ سمیت دیگر امور شامل ہیں، تو اس کے مثبت نتائج سامنے آ سکتے ہیں۔ ایرانی وزیر خارجہ نے خبردار کیا کہ اگر واشنگٹن نے جنگ کا راستہ اختیار کیا تو پھر ایران کے ’الرٹ اور جنگی تجربہ رکھنے والے جنگجو‘ بھرپور جواب دیں گے۔
خلاصہ
- اپنے موبائل فون یا ٹیبلٹ پر بی بی سی اردو تک براہِ راست رسائی کے لیے BBC WORLD SERVICE ایپ ڈاؤن لوڈ کر کے BBC News اردو ایڈیشن کا انتخاب کریں اور نیوز الرٹس، تحقیقاتی اور تفصیلی رپورٹس، سب کچھ ایک ہی جگہ پر حاصل کریں
- پاسدارانِ انقلاب کی بحریہ کا دعویٰ ہے کہ آبنائے ہرمز کے قریب دو آئل ٹینکر بارودی سرنگوں سے ٹکرانے کے بعد آگ کی زد میں آ گئے ہیں۔
- حوثیوں کے مطابق یمن کے دارالحکومت صنعا کے قریب سعودی فضائی حملوں میں کم از کم 33 افراد ہلاک اور 39 زخمی ہو گئے ہیں۔
- سینٹ کام نے بحیرۂ عمان میں ایک تجارتی جہاز کو ناکارہ بنا نے کا دعویٰ کیا ہے۔
- ہتھیاروں اور مالیاتی نیٹ ورک کی نگرانی: امریکہ کا ایران کے خلاف نئی ٹاسک فورس ’آئرن گیٹ‘ قائم کرنے کا اعلان
لائیو کوریج
گوجرانوالہ کے حلقہ این اے 77 کے ضمنی انتخاب میں حکمران جماعت مسلم لیگ کے امیدوار کامیاب, احتشام شامی، صحافی
گوجرانوالہ کے قومی اسمبلی کے حلقہ این اے 77 کے ضمنی انتخاب میں مسلم لیگ (ن) کے امیدوار راشد بشیر ورک کامیاب ہوگئے ہیں۔
الیکشن کمیشن پاکستان کی جانب سے فارم 45 کے تحت حلقے کے تمام 333 پولنگ سٹیشنز کے غیر سرکاری اور غیر حتمی نتائج جاری کر دیے گئے ہیں، جن کے مطابق مسلم لیگ (ن) کے امیدوار راشد بشیر ورک 43 ہزار 365 ووٹ حاصل کر کے کامیاب قرار پائے ہیں۔
مرکزی مسلم لیگ کے امیدوار محمد ابراہیم گجر 30 ہزار 218 ووٹ لے کر دوسرے نمبر پر رہے، جبکہ آزاد امیدوار الفت رسول وڑائچ 5 ہزار 373 ووٹوں کے ساتھ تیسرے نمبر پر آئے۔
یہ نشست مسلم لیگ (ن) کے رکن قومی اسمبلی محمود بشیر ورک کی وفات کے باعث خالی ہوئی تھی۔ پارٹی نے ان کے بیٹے راشد بشیر ورک کو ضمنی انتخاب میں اپنا امیدوار نامزد کیا تھا۔
پاکستان تحریک انصاف (پی ٹی آئی) نے اس ضمنی انتخاب کا بائیکاٹ کیا تھا، جبکہ پاکستان پیپلز پارٹی نے اپنا امیدوار میدان میں نہ اتارتے ہوئے مسلم لیگ (ن) کے امیدوار کی حمایت کی تھی۔
انتخابی عمل کے دوران مرکزی مسلم لیگ کی جانب سے مسلم لیگ (ن) کے حامیوں پر دھاندلی کے الزامات بھی عائد کیے جاتے رہے۔ دوسری جانب الیکشن کمیشن کے مقرر کردہ ڈسٹرکٹ مانیٹرنگ آفیسر سید باسط علی نے ضابطہ اخلاق کی مبینہ خلاف ورزی پر مسلم لیگ (ن) کی دو خواتین ارکانِ قومی اسمبلی اور چار خواتین ارکانِ صوبائی اسمبلی کو شوکاز نوٹس جاری کیے۔
ادھر این اے 77 کے ضمنی انتخاب میں ضابطہ اخلاق کی مبینہ خلاف ورزی کے معاملے پر وفاقی وزیر اطلاعات و نشریات عطا تارڑ کے وکیل اتوار کو الیکشن کمیشن گوجرانوالہ میں پیش ہوئے۔
عطا تارڑ نے اپنے وکیل کے ذریعے شوکاز نوٹس کا جواب جمع کرا دیا۔ ڈسٹرکٹ مانیٹرنگ آفیسر نے وفاقی وزیر کو جاری نوٹس میں انہیں اتوار کی صبح 11 بجے الیکشن کمیشن کے سامنے پیش ہونے کی ہدایت کی تھی۔
پمز کے ڈاکٹروں کا اڈیالہ جیل دورہ، عمران خان اور بشریٰ بی بی کا طبی معائنہ, شہزاد ملک، بی بی سی اردو ڈاٹ کام، اسلام آباد
راولپنڈی کی اڈیالہ جیل کے حکام کے مطابق پاکستان انسٹی ٹیوٹ آف میڈیکل سائنسز (پمز) کے ڈاکٹروں پر مشتمل ایک ٹیم نے جیل کا دورہ کیا ہے اور سابق وزیرِ اعظم عمران خان اور ان کی اہلیہ بشریٰ بی بی کا طبی معائنہ کیا ہے۔
جیل حکام کا کہنا ہے کہ ڈاکٹروں کی ٹیم تقریباً دو گھنٹے تک اڈیالہ جیل میں موجود رہی، جہاں دونوں کی صحت کا جائزہ لیا گیا۔ تاہم معائنے کی تفصیلات اور ڈاکٹروں کی سفارشات کے بارے میں فوری طور پر کوئی معلومات جاری نہیں کی گئیں۔
دوسری جانب بشریٰ بی بی کے وکیل بیرسٹر سلمان صفدر نے اسلام آباد ہائی کورٹ میں ایک درخواست دائر کی ہے، جس میں بشریٰ بی بی کی بینائی سے متعلق خدشات کا اظہار کیا گیا ہے۔
درخواست میں مؤقف اختیار کیا گیا ہے کہ بشریٰ بی بی کو مناسب طبی سہولیات فراہم کی جائیں اور ان کا معائنہ و علاج ان کے ذاتی معالج سے کرانے کی اجازت دی جائے۔ درخواست میں عدالت سے اس سلسلے میں مناسب احکامات جاری کرنے کی استدعا بھی کی گئی ہے۔
امریکی ووٹرز فیصلہ سنا چکے، اب وائٹ ہاؤس اپنی سمت کا تعین کرے: عباس عراقچی کی واشنگٹن کو تنبیہ
ایران کے وزیر خارجہ عباس عراقچی نے امریکا کو مخاطب کرتے ہوئے کہا ہے کہ امریکی ووٹرز اپنا فیصلہ سنا چکے ہیں اور اب باری وائٹ ہاؤس کی ہے کہ وہ اپنی راہ کا انتخاب کرے۔
امریکی صدر ڈونلڈ ٹرمپ اور ان کے نائب صدر جے ڈی وینس دونوں نے اعتراف کیا ہے کہ ایران کے ساتھ جنگ نے ریپبلکن کی شکست میں کردار ادا کیا۔
سماجی رابطے کی ویب سائٹ ایکس پر اپنے ایک بیان میں عباس عراقچی نے کہا کہ ایران کی جانب سے پیش کی گئی دو روزہ تجویز اب بھی برقرار ہے۔ ان کے بقول اگر امریکہ ایران کی شرائط پوری کرے، جن میں ’تمام محاذوں پر جنگ کے خاتمے‘ سمیت دیگر شرائط شامل ہیں، تو اس کے مثبت نتائج سامنے آ سکتے ہیں۔
واضح رہے کہ اس مجوزہ ایرانی منصوبے کے تحت پہلے مرحلے میں امریکہ معاہدے پر عمل درآمد کے لیے عملی اقدامات کرے گا، جبکہ اگلے روز آبنائے ہرمز بحری ٹریفک کے لیے کھول دی جائے گی اور جہازوں کی آمد و رفت معمول پر آ جائے گی۔
ایرانی وزیر خارجہ نے خبردار کیا کہ اگر واشنگٹن نے جنگ کا راستہ اختیار کیا تو پھر ایران کے ’الرٹ اور جنگی تجربہ رکھنے والے جنگجو‘ بھرپور جواب دیں گے۔
پی ٹی آئی کا عمران خان اور بشریٰ بی بی کو تنہائی سے نکالنے اور اہلِ خانہ تک رسائی دینے کا مطالبہ
پی ٹی آئی خیبر پختونخوا نے عمران خان اور بشریٰ بی بی کی صحت، اہلِ خانہ سے ملاقاتوں پر پابندی اور عدالتی احکامات پر عمل درآمد سے متعلق تحفظات کا اظہار کیا ہے۔
پی ٹی آئی خیبر پختونخوا سیکریٹریٹ کی جانب سے جاری بیان میں کہا گیا ہے کہ سابق وزیر اعظم عمران خان اور ان کی اہلیہ بشریٰ بی بی کو مسلسل تنہائی میں رکھنے، اہلِ خانہ اور قریبی افراد سے ملاقاتوں میں رکاوٹ ڈالنے اور مبینہ غیر انسانی سلوک کے باعث ان کی صحت اور فلاح سے متعلق تشویش میں اضافہ ہو رہا ہے۔ پارٹی نے حکومت، جیل انتظامیہ اور متعلقہ حکام کو دونوں کی صحت، سلامتی اور عزتِ نفس کا ذمہ دار قرار دیا ہے۔
بیان کے مطابق دو نومبر کو بیرسٹر سلمان صفدر کی ملاقات کے بعد اہلِ خانہ اور پارٹی قیادت نے عمران خان کے بلند فشارِ خون اور بگڑتی ہوئی صحت پر گہری تشویش کا اظہار کیا، جبکہ بشریٰ بی بی کی بینائی متاثر ہونے کا خدشہ بھی ظاہر کیا گیا۔ پارٹی کا کہنا ہے کہ دونوں کو فوری طور پر ماہر ڈاکٹروں سے معائنہ اور علاج کی سہولت فراہم کی جانی چاہیے۔
پی ٹی آئی نے مؤقف اختیار کیا کہ طبی ماہرین پہلے ہی خبردار کر چکے ہیں کہ طویل تنہائی اور اہلِ خانہ سے محدود رابطہ عمران خان کی جسمانی اور ذہنی صحت پر منفی اثرات مرتب کر سکتا ہے۔ ڈاکٹروں نے باقاعدہ خاندانی ملاقاتوں، ورزش اور بہتر جیل سہولیات کی بھی سفارش کی تھی۔
بیان میں یاد دلایا گیا کہ سپریم کورٹ نے 18 اگست 2026 کو عمران خان کا شفا انٹرنیشنل ہسپتال کے ماہر ڈاکٹروں سے معائنہ کرانے، ان کے ذاتی معالج کو اس عمل میں شامل کرنے اور اہلِ خانہ سے رابطے کی سہولت فراہم کرنے کی ہدایت دی تھی۔ تاہم پارٹی کے مطابق ان احکامات پر مکمل عمل درآمد کے حوالے سے اب بھی سوالات موجود ہیں۔
اسی طرح اسلام آباد ہائی کورٹ نے یکم ستمبر 2026 کو عمران خان اور بشریٰ بی بی کو تنہائی میں رکھنے سے روکنے، اہلِ خانہ سے ملاقاتوں اور رابطوں کی اجازت دینے اور عمل درآمد رپورٹ جمع کرانے کا حکم دیا تھا، لیکن پی ٹی آئی کا کہنا ہے کہ ان ہدایات پر مکمل عمل درآمد کے بارے میں خدشات برقرار ہیں۔
پارٹی نے مؤقف اختیار کیا کہ طبی سفارشات اور عدالتی احکامات کے باوجود دونوں کو تنہائی میں رکھنا اور اہلِ خانہ سے مناسب رابطے سے محروم کرنا غیر انسانی سلوک اور نفسیاتی اذیت کے مترادف ہے۔ بیان میں مطالبہ کیا گیا کہ اگر کسی قسم کی غفلت، رکاوٹ یا بنیادی حقوق کی خلاف ورزی ثابت ہو تو ذمہ دار افراد کے خلاف کارروائی کی جائے۔
پی ٹی آئی خیبر پختونخوا نے عدلیہ سے بھی مطالبہ کیا کہ وہ اپنے فیصلوں پر مکمل عملدرآمد یقینی بنائے، کیونکہ عدالتی احکامات پر عمل نہ ہونے کی صورت میں قانون کی حکمرانی، عدلیہ کی ساکھ اور عوامی اعتماد متاثر ہو سکتا ہے۔
بیان میں کہا گیا کہ پارٹی اس معاملے کو قانونی، آئینی، پارلیمانی، سیاسی اور انسانی حقوق کے قومی و بین الاقوامی فورمز پر اٹھاتی رہے گی۔ پی ٹی آئی نے مطالبہ کیا کہ عمران خان اور بشریٰ بی بی کو فوری طور پر ماہر ڈاکٹروں، ذاتی معالجین اور اہلِ خانہ تک رسائی دی جائے، ان کی تنہائی ختم کی جائے اور تمام عدالتی احکامات پر مکمل عمل درآمد کیا جائے۔
بیان کے مطابق قیدیوں کی جان، صحت اور انسانی وقار کسی سیاسی رعایت کا نہیں بلکہ بنیادی انسانی حقوق کا معاملہ ہے، جن کے تحفظ کی ذمہ داری ریاستی اداروں پر عائد ہوتی ہے۔
اسرائیل کو فوری طور پر نئی قیادت کی ضرورت ہے: گادی آئزنکوٹ
اسرائیلی صدر کی جانب سے حکومت بنانے کی ایڈوائس ملنے کے بعد گادی آئزن کوٹ نے کہا ہے کہ اسرائیل کو فوری طور پر ایک نئے رہنما اور ایک مؤثر قومی ہنگامی حکومت کی ضرورت ہے۔
انھوں نے کہا کہ موجودہ سیاسی صورتحال غیر معمولی اقدامات کا تقاضا کرتی ہے اور ملک مزید سیاسی تعطل یا بار بار انتخابات کا متحمل نہیں ہو سکتا۔ ان کے بقول، حکومت سازی کے عمل میں تاخیر اسرائیل کے مفاد میں نہیں۔
پارلیمانی انتخابات میں کسی بھی جماعت یا اتحاد کو واضح اکثریت حاصل نہ ہونے کے بعد صدر آئزک ہرزوگ نے مختلف سیاسی رہنماؤں سے مشاورت کے بعد آئزن کوٹ کو حکومت تشکیل دینے کی ذمہ داری سونپی۔
آئزن کوٹ نے عندیہ دیا کہ اگر ان کی قیادت میں حکومت سازی پر اتفاق ہو جائے تو بنیامین نیتن یاہو بھی اس کا حصہ بن سکتے ہیں۔ تاہم انھوں نے خبردار کیا کہ ذاتی یا سیاسی مفادات کی خاطر قومی اتحاد کی کوششوں میں رکاوٹ ڈالنے والوں کو تاریخ مثبت انداز میں یاد نہیں رکھے گی۔
دوسری جانب صدر آئزک ہرزوگ نے کہا ہے کہ اسرائیل کو غیر یقینی اور حساس علاقائی حالات کا سامنا ہے، لہٰذا پہلے سے کہیں زیادہ مضبوط اور مستحکم حکومت کی ضرورت ہے۔
ادھر اسرائیلی وزیر دفاع اسرائیل کاٹز نے بھی ایران کے جوہری پروگرام کو درپیش خطرات کے تناظر میں قومی اتحاد پر زور دیتے ہوئے کہا کہ ایران کے معاملے پر اسرائیل کا کام ابھی ختم نہیں ہوا۔
قطر کی ریاض پر حوثیوں کے حملے کی مذمت
قطر نے سعودی عرب کے مختلف علاقوں، بشمول دارالحکومت ریاض، پر حوثیوں کے حملوں کی مذمت کی ہے۔
قطری وزارت خارجہ نے ایک بیان میں کہا ہے کہ حوثیوں کے میزائل اور ڈرون حملے ایک ’جارحانہ اقدام‘ ہیں اور ان کی مذمت کی جاتی ہے۔
بیان میں اس بات پر زور دیا گیا کہ قطر شہریوں اور شہری اہداف پر ہونے والے کسی بھی حملے کو سختی سے مسترد کرتا ہے اور ان ’غیر ذمہ دارانہ کارروائیوں‘ کو فوری طور پر روکنے کی ضرورت پر زور دیتا ہے۔
یمن کے حوثیوں نے اتوار کو ایک بیان میں کہا کہ انہوں نے بیلسٹک اور کروز میزائلوں نیز ڈرونز کے ذریعے کئی اہداف کو نشانہ بنایا ہے، جن میں ریاض کا مالیاتی مرکز اور ہوائی اڈہ، آرامکو کے تیل کے ٹینک، اور مشرقی سعودی عرب کا شہر ابقیق شامل ہیں۔
اس سے قبل، سعودی عرب کی قیادت میں قائم اتحاد نے حوثیوں کے دو میزائلوں کو فضا میں ہی ناکارہ بنانے کا دعویٰ کیا تھا، اور کچھ دیر بعد سعودی وزارت توانائی نے بتایا کہ ’گرنے والے ملبے‘ کے باعث ریاض میں آرامکو آئل کمپنی کی عمارت کو نقصان پہنچا ہے۔
نیتن یاہو بھی میری حکومت میں شامل ہو سکتے ہیں: آئزنکوٹ کی پیشکش
اسرائیل کے سابق آرمی چیف اور اپوزیشن رہنما گاڈی آئزنکوٹ نے کہا ہے کہ وہ نیتن یاہو اور اُن کی جماعت کے انتہائی دائیں بازو کے اتحادی کو اپنی حکومت میں شامل کرنے کے لیے تیار ہیں۔ لیکن شرط یہ ہے کہ یہ حکومت اُن کی قیادت میں بنے۔
آئزنکوٹ کا اشارہ نیتن یاہو کی پارٹی لیکوڈ اور انتہائی دائیں بازو کے وزیرِ خزانہ سموٹریج کی ’ریلیجس زایونسٹ‘ پارٹی کی جانب تھا۔
آئزنکوٹ نے کہا کہ صدر یہ کہہ چکے ہیں کہ یہ اتحاد کا وقت ہے تو کوئی وجہ نہیں کہ ’لیکوڈ‘ اور ’ریلیجس زایونسٹ‘ میری قیادت میں میرے وضع کردہ اُصولوں پر مبنی حکومت کی تشکیل کی حمایت نہ کریں۔
اُنھوں نے یہ بھی کہا کہ اسرائیلی جمہوریت اپنی تاریخ کے انتہائی نازک اور کمزور دور سے گزر رہی ہے۔
خیال رہے کہ اسرائیل کے صدر نے آئزنکوٹ کو حکومت بنانے کی دعوت دی ہے، جس کے لیے وہ جوڑ توڑ میں مصروف ہیں۔
حوثیوں نے ریاض پر حملے کی ذمہ داری قبول کر لی
یمن کے حوثی گروپ نے اتوار کو سعودی عرب کے دارالحکومت ریاض کے مالیاتی مرکز پر حملے کی ذمہ داری قبول کرتے ہوئے دعویٰ کیا ہے کہ اس کارروائی میں آرامکو کی ملکیت ایک بلند و بالا عمارت کو نقصان پہنچا۔
حوثیوں کے بیان کے مطابق ’یمنی مسلح افواج نے اللہ تعالیٰ کی مدد سے بیلسٹک میزائلوں، کروز میزائلوں اور ڈرونز کے ذریعے چار خصوصی فوجی کارروائیاں انجام دیں۔‘
بیان میں کہا گیا ہے کہ ’حملوں کا ہدف ریاض کا مالیاتی مرکز، ہوائی اڈہ، آرامکو کے تیل کے ذخائر اور مشرقی سعودی عرب کا شہر ابقیق تھے۔‘
اس سے قبل ریاض میں آرامکو کی ایک عمارت پر حملے کی اطلاعات کے بعد سعودی وزارتِ توانائی نے تصدیق کی تھی کہ عمارت کو نقصان پہنچا ہے، تاہم وزارت نے اس کی وجہ گرتا ہوا ملبہ قرار دیا تھا۔
وزارت کے مطابق ریاض میں آرامکو کے دفتر کی عمارت کو ’معمولی نقصان‘ پہنچا اور اس واقعے میں کسی جانی نقصان یا زخمی ہونے کی اطلاع نہیں ملی۔
دوسری جانب یمن میں حوثیوں کے خلاف سرگرم سعودی قیادت میں قائم اتحاد نے پہلے اعلان کیا تھا کہ ریاض کی جانب داغے گئے دو میزائلوں کو راستے میں تباہ کر دیا گیا تھا۔
پاسدارانِ انقلاب کا امریکی ساختہ دفاعی سازوسامان کی ریورس انجینیئرنگ کا دعویٰ
ایران کی پاسدارانِ انقلاب کی ایرو سپیس فورس کے کمانڈر کے مشیر علی بلالی نے دعویٰ کیا ہے کہ ایرانی دفاعی صنعت کے ماہرین امریکی ساختہ دفاعی سازوسامان کی ریورس انجینیئرنگ کر رہے ہیں۔
علی بلالی کا کہنا ہے کہ ایران کے اسلحے کے ذخائر بھی آئندہ کئی برسوں کے لیے محفوظ ہیں اور ایرانی مسلح افواج مکمل طور پر تیار اور متحرک ہیں۔
انھوں نے خبردار کیا کہ اگر دشمن نے کوئی غلط اندازہ لگایا یا کسی قسم کی غلطی کی تو اسلامی جمہوریہ ایران کا جواب انتہائی سخت اور تباہ کن ہوگا۔
ان کے بقول ’مسلح افواج دشمن کی کسی بھی غلط حرکت اور مناسب موقع کی منتظر ہیں۔ اگر ضرورت پڑی تو ایسا جواب دیا جائے گا جسے مخالف فریق کبھی فراموش نہیں کر سکے گا۔‘
ایران کے حوالے سے ہمارا مشن ابھی ختم نہیں ہوا: اسرائیلی وزیرِ دفاع کا انتباہ
اسرائیل میں نیتن یاہو کے سیاسی حریف کی جانب سے نئی حکومت تشکیل دینے کا عمل شروع ہونے کے ساتھ ہی، ملک کے وزیر دفاع نے ’ایرانی جوہری خطرے‘ کے پیشِ نظر ’اتحاد اور یکجہتی‘ پر زور دیا ہے۔
اسرائیل کاٹز نے ایران پر الزام لگایا کہ وہ ’جوہری بم بنانے کی کوششیں دوبارہ شروع کر رہا ہے‘ اور خبردار کیا: ’ایران کے حوالے سے، ہمارا مشن ابھی ختم نہیں ہوا ہے۔‘
ایران نے ہمیشہ اپنے جوہری پروگرام کے پرامن نوعیت کے حامل ہونے پر زور دیا ہے۔
اسرائیل کاٹز نے کہا، ’کسی بھی صورتحال کے لیے تیار رہنا ہمارا فرض ہے۔ ہمارے سامنے جو اہم مشنز ہیں، ان کے لیے ہمیں متحد رہنا ہوگا۔‘
اُنھوں نے مزید کہا کہ اسرائیل کے دشمنوں کو ’یہ معلوم ہونا چاہیے کہ اگرچہ ہمارے درمیان اختلافات موجود ہیں، پھر بھی ہم ان لوگوں کے خلاف پختہ عزم اور متحد کھڑے ہیں جو ہمارے وجود کے لیے خطرہ ہیں۔‘
اسرائیلی پارلیمانی انتخابات میں کسی بھی سیاسی جماعت یا گروہ کی جانب سے حکومت سازی کے لیے درکار تعداد (کورم) حاصل نہ کر پانے کے بعد، اسرائیل کے صدر نے سیاسی رہنماؤں سے مشاورت کے بعد گاڈی آئزنکوٹ کو نئی حکومت تشکیل دینے کی ذمہ داری سونپی ہے۔
آبنائے ہرمز میں ہونے والے دھماکوں اور آگ لگنے کے واقعات میں تین تیل بردار جہازوں کو نقصان پہنچا: پاسدارانِ انقلاب کا دعویٰ
ایران کے پاسدارانِ انقلاب کے مطابق اتوار کو آبنائے ہرمز میں ہونے والے دھماکوں اور آتشزدگی کے واقعات میں تین تیل بردار جہاز (آئل ٹینکرز) کو نقصان پہنچا ہے۔
سپاہ پاسداران کے بیان میں کہا گیا ہے کہ یہ جہاز ’قوانین کی خلاف ورزی‘ کر رہے تھے اور ایک ’غیر مجاز‘ راستے سے گزر رہے تھے۔
ایران کا کہنا ہے کہ جنوبی راستہ، جو عمان کے ساحل کے قریب واقع ہے اور جہاں امریکہ گزرنے والے بحری جہازوں کو تحفظ فراہم کرتا ہے، غیر قانونی ہے۔
سپاہ پاسداران کے شعبہ تعلقاتِ عامہ کا کہنا ہے کہ ان جہازوں میں آگ لگنے کی وجہ ’نیویگیشن (راستہ تلاش کرنے) اور شناخت کے نظاموں کا ناکارہ ہونا‘ اور ’امریکہ کی جانب سے ان جہازوں کی حوصلہ افزائی کے لیے کیے گئے اشتعال انگیز اقدامات‘ ہیں۔
ڈونلڈ ٹرمپ انتظامیہ کا دعویٰ ہے کہ اس وقت آبنائے ہرمز سے گزرنے والے تیل کی مقدار، ایران کے ساتھ جنگ کے آغاز کے وقت کے مقابلے میں زیادہ ہے۔
گذشتہ چند دنوں کے دوران تیل کی قیمتوں میں کمی آئی ہے، لیکن یہ اب بھی جنگ سے پہلے کی سطح کے مقابلے میں کافی زیادہ ہیں۔
ایران جنگ کے باعث بڑھتی ہوئی مہنگائی، جاپان میں جرابوں کی قیمتیں بڑھنے پر احتجاج
امریکہ اور اسرائیل کی ایران کے ساتھ جنگ اور مشرقِ وسطیٰ سے تیل کی برآمدات میں رکاوٹوں نے جاپان میں اشیا کی پیداوار اور ترسیل کی لاگت بڑھا دی ہے۔ ایسے ملک میں، جہاں صارفین کئی دہائیوں تک قیمتوں میں کمی یا استحکام کے بعد اب بھی بڑھتی ہوئی قیمتوں کے خلاف احتجاج کر رہے ہیں۔
خبر رساں ادارے اے ایف پی کے مطابق، کپڑوں کی کمپنی یونیکلو نے صارفین کے احتجاج کے بعد اپنے عام جرابوں کی قیمت بڑھانے کا فیصلہ جلد ہی واپس لے لیا۔
دریں اثنا، ریستورانوں کی چین سیزرز نے اپنے صارفین سے معذرت کی کیونکہ اس نے اپنی ایک مقبول ڈش کی قیمت میں محض 20 ین، یعنی تقریباً 13 سینٹ، اضافہ کیا تھا۔
جاپان، جو توانائی کی درآمدات پر انحصار کرتا ہے، یوکرین جنگ کے بعد پہلے ہی بڑھتی ہوئی قیمتوں سے متاثر ہو چکا تھا، لیکن ایران کے ساتھ جنگ اور آبنائے ہرمز سے گزرنے والے ٹینکروں کی آمد و رفت میں رکاوٹوں نے اب ملک کے کاروباروں پر مزید دباؤ ڈال دیا ہے۔
لاگت میں اضافے کے باوجود، جاپان کی بہت سی کمپنیاں صارفین سے محروم ہونے کے خوف سے قیمتیں بڑھانے سے گریز کر رہی ہیں۔
بنگلہ دیش کا ایک بار پھر انڈیا سے شیخ حسینہ کو واپس بھیجنے کا مطالبہ
بنگلہ دیش کے وزیرِ قانون محمد اسد الزمان نے کہا ہے کہ انڈیا سے درخواست کی گئی ہے کہ وہ سابق وزیر اعظم شیخ حسینہ کو ’مجرموں کی حوالگی کے معاہدے‘ کے تحت بنگلہ دیش واپس بھیجے۔
اُنھوں نے یہ بات اتوار کے روز دارالحکومت کے ایک ہوٹل میں تربیتی ورکشاپ کے افتتاح کے بعد صحافیوں کے سوالات کے جواب میں کہی۔
وزیر قانون نے کہا، ’ہم نے شیخ حسینہ کے معاملے میں قانونی طور پر ضروری تمام اقدامات، مقررہ ضابطے کے مطابق مکمل کر لیے ہیں۔ ان کے ساتھ قانون کے مطابق ہی معاملہ کیا جائے گا۔‘
اُن کا کہنا تھا کہ ’آپ دیکھیں گے کہ جب ہم کوئی قدم اٹھاتے ہیں تو اس میں جذبات کا کوئی عمل دخل نہیں ہوتا۔ بات صرف اتنی ہے کہ ہم قانون پر عمل درآمد کریں گے۔ اگر ہم قانون پر درست طریقے سے عمل نہیں کرتے، تو آپ ہمیں بتا سکتے ہیں۔‘
جب صحافیوں نے پوچھا کہ کیا مقدمے کی کارروائی انڈین عدالتوں میں ہوگی، تو وزیر قانون نے کہا، ’یہ انڈین حکومت کا معاملہ ہے۔ ہم نے ان سے ’مجرموں کی حوالگی کے معاہدے‘ کے تحت درخواست کی ہے۔‘
اسد الزمان نے کہا، ’اگر وہ انھیں ہمارے حوالے کرتے ہیں، تو ہم قانون کے تقاضوں کے مطابق، مقررہ قانونی عمل کے ذریعے ہی آگے بڑھیں گے۔‘
جب صحافیوں نے پوچھا کہ اگر شیخ حسینہ انڈیا میں قیدی نہیں بلکہ ’سرکاری مہمان‘ (state guest) ہیں، تو انھیں ’قیدیوں کے تبادلے کے معاہدے‘ کے تحت کیسے واپس لایا جائے گا؟ تو وزیر قانون نے کہا، ’میری نظر میں وہ ایک مجرم ہیں۔‘
امریکہ کا آئرن گیٹ منصوبہ محض ’الفاظ کا کھیل‘ ہے: ترجمان ایرانی پاسدارانِ انقلاب
ایرانی پاسدارانِ انقلاب کے ترجمان کا کہنا ہے کہ امریکہ کا ’آئرن گیٹ‘ منصوبہ محض الفاظ کا کھیل ہے۔
ترجمان حسین محبی کی جانب سے جاری کیے گئے بیان میں اُن کا کہنا تھا کہ ایران کا زمینی راستوں سے محاصرہ کرنے کا امریکی منصوبہ بھی غیر اہم ہے۔
حسین محبی کا کہنا تھا کہ امریکہ مختلف عنوانات اور منصوبوں کے تحت ایران کا معاشی محاصرہ کرنے کی کوشش کر رہا ہے، لیکن وہ ناکام رہے گا۔
اُن کا کہنا تھا کہ ’ہمارے اپنے پڑوسیوں کے ساتھ اچھے تعلقات ہیں اور ان روابط کے لیے ہمارے پاس مختلف راستے موجود ہیں؛ امریکہ اتنا کمزور ہے کہ وہ ان راستوں کو بند نہیں کر سکتا۔‘
خیال رہے کہ ایران کے کئی ماہ تک جاری رہنے والے بحری محاصرے کے بعد، امریکی سینٹرل کمانڈ نے سنیچر کو ایک خصوصی ٹاسک فورس تشکیل دینے کا حکم دیا تھا۔ اس کا مقصد زمینی سرحدوں اور بحیرہ کیسپیئن کے راستے جدید ہتھیاروں کے نظام اور دیگر پابندی زدہ ایرانی اشیاء کی نقل و حمل کو محدود کرنا ہے۔
آئرن گیٹ کہلانے والی اس خصوصی ٹاسک فورس میں تقریباً 20 فوجی اور سویلین اہلکار شامل ہوں گے۔ اس کا مرکز فلوریڈا کے شہر ٹمپا میں ہوگا اور یہ اپنی سرگرمیوں کے حوالے سے امریکی حکومت کے دیگر اداروں کے ساتھ رابطہ اور ہم آہنگی رکھے گی۔
سعودی عرب کا ریاض کے اُوپر دو بیلسٹک میزائلوں کا تباہ کرنے کا دعویٰ
عینی شاہدین نے اتوار کو خبر رساں ادارے اے ایف پی کو بتایا کہ ریاض کے مالیاتی علاقے میں ہونے والے حملوں کے نتیجے میں آرامکو کی ایک عمارت کو نقصان پہنچا ہے۔
ایک عینی شاہد نے کنگ عبداللہ فنانشل ڈسٹرکٹ کا حوالہ دیتے ہوئے کہا: ’اتنا تو یقینی ہے کہ اس علاقے میں واقع آرامکو ٹاور کو نشانہ بنایا گیا ہے۔‘
یہ اطلاعات اس اعلان کے بعد سامنے آئیں جس میں سعودی قیادت والے فوجی اتحاد نے کہا کہ اس نے ریاض کی جانب داغے گئے دو بیلسٹک میزائلوں کو فضا میں ہی تباہ کر دیا ہے۔ یہ حملہ سعودی دارالحکومت میں زور دار دھماکوں کی آوازیں سنائی دینے کے بعد رپورٹ کیا گیا۔
ایک عینی شاہد نے خبر رساں ادارے رائٹرز کو بتایا کہ دھماکوں سے کچھ دیر پہلے سعودی سول ڈیفنس نے ریاض کے علاقے میں انتباہ جاری کیا تھا۔ بعد میں سعودی حکام نے اعلان کیا کہ خطرہ ٹل گیا ہے۔
سعودی عرب نے یہ بھی کہا کہ اس نے ریاض اور ملک کے جنوبی علاقے کی جانب آنے والے دو کروز میزائلوں کو بھی تباہ کر دیا ہے۔
حوثیوں نے حالیہ کشیدگی کے دوران متعدد بار سعودی عرب کے ہوائی اڈوں، بندرگاہوں اور تیل کی تنصیبات کو نشانہ بنایا ہے۔ اس کے جواب میں سعودی عرب یمن میں فضائی حملے کر رہا ہے۔
یہ واقعہ ایک دن بعد پیش آیا جب یمن میں حوثیوں کی وزارتِ صحت نے دعویٰ کیا تھا کہ صنعا کے قریب سعودی فضائی حملوں میں کم از کم 33 افراد ہلاک ہوئے ہیں۔ جبکہ 24 گھنٹوں میں سعودی حملوں میں ہلاکتوں کی تعداد 83 ہو چکی ہے۔
سعودی حکام کا کہنا ہے کہ وہ ان اطلاعات کا جائزہ لے رہے ہیں۔
گزشتہ 24 گھنٹوں میں سعودی حملوں میں 83 افراد ہلاک ہوئے: حوثیوں کا دعویٰ
یمن میں حوثیوں نے دعویٰ کیا ہے کہ سعودی عرب کی قیادت میں قائم فوجی اتحاد کے فضائی حملوں میں گزشتہ 24 گھنٹوں کے دوران 83 افراد ہلاک ہوئے ہیں۔
حوثیوں سے وابستہ ذرائع ابلاغ کے مطابق حالیہ حملوں میں تقریباً 50 افراد زخمی بھی ہوئے ہیں۔
دوسری جانب سعودی حکام نے کہا ہے کہ وہ ان اطلاعات کا جائزہ لے رہے ہیں۔
اقوام متحدہ نے 2018 میں سعودی عرب کی قیادت والے اتحاد پر الزام عائد کیا تھا کہ یمن کی جنگ میں عام شہریوں کی ہلاکتوں کے حوالے سے اس کا کردار دیگر فریقوں کے مقابلے میں زیادہ نمایاں رہا ہے۔
تاہم اس وقت سعودی عرب نے ان رپورٹس کو جانبدارانہ قرار دیتے ہوئے مسترد کر دیا تھا۔
ایران میں احتجاج کے دوران گرفتار تین افراد کو پھانسی دے دی گئی
ایرانی عدلیہ سے منسلک میزان نیوز ایجنسی نے کرج میں جنوری 2026 کے احتجاج کے دوران گرفتار کیے گئے تین افراد کو اتوار کی صبح پھانسی دیے جانے کی تصدیق کر دی ہے۔
میزان کے مطابق تینوں افراد کو ’اسرائیل اور امریکہ کے ساتھ آپریشنل تعاون‘ اور 8 اور 9 جنوری کے مظاہروں میں مسلح ہو کر شرکت کرنے کے الزام میں سزائے موت سنائی گئی تھی۔
ان پر عوامی مقامات اور بجلی کی تنصیبات کو نقصان پہنچانے اور انھیں نذرِ آتش کرنے کا الزام بھی عائد کیا گیا تھا۔
میزان نیوز ایجنسی کا کہنا ہے کہ ایران کی سپریم کورٹ کی توثیق کے بعد ان سزاؤں پر عمل درآمد کیا گیا جبکہ ان افراد کی جائیداد بھی ضبط کی جا رہی ہے۔
اس مقدمے میں مزید 10 افراد کو بھی گرفتار کیا گیا تھا جبکہ دیگر ملزمان کو پانچ سے 10 سال قید کی سزائیں سنائی گئی ہیں۔
کارگو جہاز میں آگ لگنے کے بعد 22 افراد کو بحفاظت نکال لیا گیا: نیشل گارڈ یو اے ای
متحدہ عرب امارات کے نیشنل گارڈ کا کہنا ہے کہ انھوں نے بحیرۂ عمان میں ایک کارگو جہاز میں آگ لگنے کے بعد 22 افراد کو بحفاظت نکال لیا ہے۔
خبر رساں ادارے روئٹرز کے مطابق نیشنل گارڈ نے اتوار کے روز بتایا ہے کہ بچائے گئے تمام افراد عرب ممالک کے شہری ہیں۔
تاحال آگ لگنے کی وجہ، جہاز کی شناخت اور بحیرۂ عمان میں حالیہ امریکی فوجی پیش رفت کے ساتھ اس واقعے کے ممکنہ تعلق کے بارے میں کوئی تفصیلات فراہم نہیں کی گئیں۔
قومی اسمبلی کے حلقہ این اے 77 گوجرانوالہ میں ضمنی انتخاب کے لیے پولنگ جاری, احتشام شامی، صحافی
پنجاب کے ضلع گوجرانوالہ کے قومی حلقہ این اے 77 میں آج ضمنی انتخاب ہورہا ہے اور پولنگ شروع ہوچکی ہے۔
اس نشست کے لیے ضمنی الیکشن میں مجموعی طور پر 11 امیدوار مدمقابل ہیں تاہم مسلم لیگ ن کے راشد بشیر ورک اور پاکستان مرکزی مسلم لیگ کے محمد ابراہیم گجر کے درمیان کانٹے کے مقابلے کی توقع کی جارہی ہے۔
قومی اسمبلی کی یہ نشست مسلم لیگ ن کے ایم این اے محمود بشیر ورک کی وفات کے بعد خالی ہوئی تھی،ن لیگ نے محمود بشیر ورک کے بیٹے راشد بشیر ورک کو اپنے امیدوار کے طور پر میدان میں اتارا ہے۔
یاد رہے کہ الیکشن کمیشن نے گوجرانوالہ کے حلقے این اے 77 میں ضمنی انتخاب کے دوران وفاقی وزیر اطلاعات و نشریات عطا اللہ تارڑ کی جانب سے ضابطۂ اخلاق کی مبینہ خلاف ورزی کا نوٹس لیا ہوا ہے اور متعلقہ حکام سے رپورٹ طلب کر لی ہے۔
الیکشن کمیشن کی سات نومبر کو جاری کردہ پریس ریلیز کے مطابق میڈیا رپورٹس میں بتایا گیا تھا کہ وفاقی وزیر نے ہیلی کاپٹر کے ذریعے حلقے کا دورہ کیا اور ایک اجتماع میں شرکت کی۔
اتوار کے روز ہونے والے انتخاب میں الیکشن کمیشن سے جاری اعداد و شمار کے مطابق حلقہ کے پانچ لاکھ 18 ہزار 620 ووٹرز اپنا حق رائے دہی کا استعمال کرسکتے ہیں یہاں مرد ووٹرز کی تعداد 2 لاکھ 77 ہزار 480 اور خواتین ووٹرز کی تعداد 2 لاکھ 41 ہزار 149 ہے۔
الیکشن کمیشن کے مطابق حلقہ این اے 77 میں کل 333 پولنگ اسٹیشن قائم کیے گئے ہیں۔
امن و امان کی صورتحال کے پیش نظر 12 پولنگ انتہائی حساس، 34 حساس اور 287 نارمل قرار دیے گئے ہیں، انتہائی حساس پولنگ اسٹیشنوں پر اضافی نفری تعینات کی گئی ہے۔