امریکی ووٹرز فیصلہ سنا چکے، اب وائٹ ہاؤس اپنی سمت کا تعین کرے: عباس عراقچی کی واشنگٹن کو تنبیہ

لائیو کوریج

1. 6 نومبر 2026تقریباً ایک سال قبل آسٹریلیا میں بونڈائی ساحل حملے کے دوران زخمی ہونے والی خاتون وفات پا گئیں

   گزشتہ برس دسمبر میں آسٹریلیا کے بونڈائی ساحل پر ہونے والی فائرنگ کے دوران گولی لگنے والی 90 سالہ خاتون سڈنی کے ایک ہسپتال میں وفات پا گئی ہیں۔

   ایوا گیلر ان درجنوں افراد میں شامل تھیں جو 14 دسمبر کو بونڈائی ساحل پر ایک یہودی تقریب پر دو مسلح افراد کی فائرنگ کے نتیجے میں شدید زخمی ہوئے تھے۔ اس حملے میں 10 سالہ بچی سمیت 15 افراد ہلاک ہوئے تھے۔

   گذشتہ دسمبر میں ہونے والا یہ حملہ تقریباً تین دہائیوں میں ہونے والا آسٹریلیا کا بدترین اجتماعی فائرنگ لا واقعہ تھا، جس کے بعد اسلحہ سے متعلق قوانین میں وسیع اصلاحات کی گئیں اور نفرت انگیز تقاریر کے خلاف کریک ڈاؤن کیا گیا۔

   حملہ آوروں میں سے ایک، 50 سالہ ساجد اکرم، موقع پر پولیس کی فائرنگ سے ہلاک ہو گیا تھا۔ اس کے بیٹے نوید اکرم کو 15 افراد کے قتل، 40 افراد کے قتل کی کوشش اور ایک دہشت گرد کارروائی کے ارتکاب کے الزام میں گرفتار کر کے فردِ جرم عائد کی گئی تھی۔ ان کے خلاف مقدمہ اب بھی عدالت میں زیرِ سماعت ہے۔

   پولیس نے فی الحال کوئی تفصیل فراہم نہیں کی ہے کہ آیا ایوا گیلر کی وفات کے نتیجے میں حملہ آور پر مزید الزامات لگائے جائیں گے۔

2. 6 نومبر 2026آبنائے ہرمز میں یونانی آئل ٹینکر پر ’میزائل حملے‘ کی اطلاعات، کمپنی کا عملے کے ایک رکن کی ہلاکت کا دعویٰ

   ایک یونانی کمپنی کے منیجر کا کہنا ہے کہ آبنائے ہرمز میں ان کے آئل ٹینکر پر بظاہر ایک میزائل حملے کے نتیجے میں ہونے والے دھماکے میں جہاز کے عملے کا ایک رکن ہلاک ہو گیا ہے۔

   یونانی کمپنی وولوس ٹینکرز کا کہنا ہے کہ ایم ٹی وولوس ٹینکر کو بحرین جاتے ہوئے آبنائے ہرمز میں نشانہ بنایا گیا۔ حملے کے وقت جہاز کالی تھا۔

   کمپنی کی جانب سے جاری بیان میں کہا گیا ہے کہ ’کمپنی انتہائی افسوس کے ساتھ اپنے عملے کے ایک رکن کی وفات کا اعلان کرتی ہے، جسے دھماکے کے بعد ابتدائی طور پر لاپتہ قرار دیا گیا تھا، تاہم بعد میں وہ جہاز پر ہی جان لیوا زخموں کے ساتھ پایا گیا۔‘

   اسی دوران، برطانوی میری ٹائم ٹریڈ آپریشنز آرگنائزیشن (یو کے ایم ٹی او) نے آبنائے ہرمز میں ایک آئل ٹینکر پر حملے کی اطلاع دی ہے۔

   ادارے کے مطابق، ایک آئل ٹینکر کے کپتان نے اطلاع دی کہ یہ واقعہ عمان کے شہر خصب کے ساحل سے 30 کلومیٹر دور اس وقت پیش آیا جب جہاز آبنائے ہرمز سے گزر رہا تھا۔

   تاہم یو کے ایم ٹی او ادارے کا کہنا ہے کہ حملے میں ٹینکر کے عملے کو کوئی نقصان نہیں پہنچا اور جہاز اب بھی اپنا سفر جاری رکھنے کے قابل ہے۔

   اس سے قبل جمعہ کی صبح پاسدارانِ انقلاب کے شعبۂ تعلقاتِ عامہ نے اعلان کیا تھا کہ آبنائے ہرمز میں دو آئل ٹینکروں میں ’بحری بارودی سرنگ‘ سے ٹکرانے کے بعد آگ لگ گئی تھی۔

3. 6 نومبر 2026ایران کے بارے میں دو ہفتوں میں فیصلہ کریں گے: ٹرمپ

   امریکی صدر ڈونلڈ ٹرمپ نے کہا ہے کہ واشنگٹن آئندہ دو ہفتوں میں یہ فیصلہ کرے گا کہ ایران کے حوالے سے مزید اقدامات کیے جائیں یا کسی ممکنہ معاہدے کی توثیق کی جائے۔

   وائٹ ہاؤس میں صحافیوں سے گفتگو کرتے ہوئے ٹرمپ نے کہا کہ ایران جن تجاویز پر غور کر رہا ہے، ان کی تفصیلات سے قطع نظر ایک بات واضح ہے کہ ’ایران جوہری ہتھیار حاصل نہیں کرے گا۔‘ ان کا کہنا تھا کہ تہران امریکی منظوری کے بغیر کوئی بڑا قدم نہیں اٹھائے گا۔

   ٹرمپ نے دعویٰ کیا کہ گذشتہ سات ماہ کے دوران امریکہ نے ایران سے متعلق اپنے تمام اہم اہداف حاصل کر لیے ہیں۔ انھوں نے کہا کہ ’آپ کو جلد ہی معلوم ہو جائے گا کہ ہم ایران کے بارے میں کیا فیصلہ کرتے ہیں۔‘ تاہم انھوں نے یہ بھی کہا کہ وہ ایران کو تباہ ہوتے نہیں دیکھنا چاہتے، لیکن ’اگر ضرورت پڑی تو ایسا کرنا پڑ سکتا ہے۔‘

   دوسری جانب ایران کی سپریم نیشنل سکیورٹی کونسل کے نائب سربراہ علی باقری کنی نے سرکاری ٹیلی وژن سے گفتگو میں کہا کہ تہران محض ’کاغذی وعدوں‘ سے مطمئن نہیں ہوگا اور کسی بھی نئی سفارتی پیش رفت سے قبل امریکہ سے عملی اقدامات کا خواہاں ہے۔

   آبنائے ہرمز اور امریکی کارروائیوں پر ایران کا سخت مؤقف

   ایرانی فوج کے ترجمان نے خبردار کیا ہے کہ خطے میں کسی بھی نئی جارحیت یا فوجی کارروائی کے نتیجے میں آبنائے ہرمز خودبخود نہیں کھلے گی۔ ان کے مطابق اس اہم بحری گزرگاہ کو دوبارہ مکمل طور پر کھولنا ایران کی جانب سے طے کی گئی شرائط پوری ہونے سے مشروط ہے۔

   ترجمان نے کہا کہ اگر ایران پر حملہ کیا گیا تو تہران جغرافیائی حدود کی پروا کیے بغیر امریکہ کے تمام مادی اور غیر مادی مفادات کو نشانہ بنا سکتا ہے۔ ادھر ایران کے سپریم لیڈر نے بھی فوجی قیادت سے ملاقات میں کسی بھی حملے کا فوری جواب دینے کی ضرورت پر زور دیا۔

4. 6 نومبر 2026ہم امریکی کاغذی وعدوں سے مطمئن نہیں ہوں گے: ایرانی عہدیدار

   ایران کی سپریم نیشنل سیکیورٹی کونسل کے ڈپٹی سیکریٹری علی باقری کنی کا کہنا ہے کہ ایران سفارت کاری کے نئے دائرے میں داخل ہونے سے پہلے امریکہ کی طرف سے ’کاغذی وعدوں‘ سے مطمئن نہیں ہوگا۔

   ایرانی میڈیا رپورٹس کے مطابق علی باقری کنی نے سفارت کاری کے اس میدان میں داخل ہونے کا پس منظر ایران کے ساتھ امن کے لیے امریکہ کے عملی اقدامات کا مشاہدہ سمجھا۔

   انھوں نے یہ بھی کہا کہ کونسل کے سیکریٹری محسن رضائی کے دورہ روس اور ان کی روسی صدر ولادیمیر پوتن سے ملاقات کا بنیادی مقصد رہبر معظم مجتبیٰ خامنہ ای کا روس کو پیغام پہنچانا تھا۔

5. 6 نومبر 2026پی ٹی آئی، مولانا اور ہمسایہ ممالک سے ہی لڑتے رہے تو عوامی مسائل کب حل ہوں گے؟ بلاول بھٹو

   چیئرمین پیپلز پارٹی بلاول بھٹو زرداری نے کہا ہے کہ ایران کے خلاف امریکہ اور اسرائیل کی جنگ اور خطے میں کشیدگی کا معاشی بوجھ امریکہ سے لے کر پاکستان کے دور دراز علاقوں تک عام لوگ اٹھا رہے ہیں، جبکہ مہنگائی، غربت، بے روزگاری اور بھوک جیسے مسائل نے عوام کی مشکلات میں مزید اضافہ کر دیا ہے۔

   لاڑکانہ میں ایک ہسپتال کی افتتاحی تقریب سے خطاب کرتے ہوئے بلاول بھٹو نے کہا کہ اگر وفاقی حکومت اور تمام متعلقہ فریق عوامی مسائل اور معیشت پر توجہ مرکوز کریں تو موجودہ چیلنجز کا مقابلہ کیا جا سکتا ہے۔ تاہم اگر ہم پی ٹی آئی سے، مولانا (فضل الرحمٰن) سے، دہشت گردوں سے، افغانستان یا انڈیا سمیت دیگر علاقائی تنازعات میں ہی الجھے رہیں تو عوامی مسائل کب حل ہوں گے؟‘

   بلاول بھٹو نے کہا کہ بطور سابق وزیر خارجہ وہ علاقائی اور عالمی معاملات کی اہمیت سے بخوبی آگاہ ہیں، لیکن بطور پاکستانی شہری وہ یہ بھی جانتے ہیں کہ عام آدمی اس وقت شدید معاشی مشکلات سے دوچار ہے۔ ان کے مطابق پاکستانی عوام کے لیے معاشی طور پر زندگی گزارنا دن بہ دن مشکل ہوتا جا رہا ہے اور ہمارے تنازعات میں الجھاؤ سے عوامی فلاح کے لیے درکار توجہ اور توانائی میسر نہیں آ سکے گی۔

   چیئرمین پیپلز پارٹی نے کہا کہ امریکی عوام نے امن کے نعرے کو ووٹ دیا تھا، تاہم خطے میں جاری جنگ کے معاشی اثرات امریکہ، پاکستان اور دنیا کے دیگر ممالک کے عوام کو متاثر کر رہے ہیں۔ انھوں نے خبردار کیا کہ اگر سیاسی جماعتیں باہمی محاذ آرائی میں الجھی رہیں اور ملک بیک وقت سیاسی کشیدگی، دہشت گردی اور علاقائی تنازعات کا سامنا کرتا رہے تو اس کا سب سے زیادہ نقصان عام شہریوں کو اٹھانا پڑے گا۔

   انھوں نے زور دیا کہ تمام سیاسی قوتوں کو اختلافات بھلا کر معیشت، عوامی فلاح اور ملکی استحکام کو اپنی ترجیحات میں سرفہرست رکھنا چاہیے۔

   بلاول بھٹو نے یہ بھی بتایا کہ وزیر اعظم سے ان کی حالیہ ملاقات مثبت رہی، جس میں باہمی تعاون کے ساتھ آگے بڑھنے اور قومی مسائل کے حل کے لیے مشترکہ لائحہ عمل پر غور کیا گیا۔ ان کے بقول موجودہ حالات میں تمام سیاسی قوتوں کو عوامی اور معاشی مسائل کے حل کو ترجیح دینی چاہیے۔

   انتخابی اصلاحات پر اپوزیشن کو ساتھ بیٹھنا چاہیے

   بلاول بھٹو زرداری نے انتخابی اصلاحات کو ملک کا ایک بنیادی مسئلہ قرار دیتے ہوئے کہا کہ اس حوالے سے ابھی بہت کام ہونا باقی ہے۔ انھوں نے کہا کہ وزیراعظم نے پیپلز پارٹی کی تجویز قبول کرتے ہوئے انتخابی اصلاحات کے لیے پارلیمانی کمیٹی بنانے پر آمادگی ظاہر کی ہے۔

   ان کے مطابق پیپلز پارٹی نے تجویز دی ہے کہ اپوزیشن کے نمائندوں کو بھی مکمل تعداد میں اس کمیٹی کا حصہ بنایا جائے تاکہ تمام سیاسی جماعتوں کی شرکت یقینی بنائی جا سکے۔

   بلاول بھٹو نے کہا کہ اگر اپوزیشن کو انتخابات میں دھاندلی سے متعلق شکایات ہیں تو ان کے ازالے کے لیے بہترین فورم یہی پارلیمانی کمیٹی ہے، جہاں تمام معاملات پر سنجیدگی سے غور کیا جا سکتا ہے۔

   انھوں نے کہا کہ قومی اسمبلی کو مضبوط اور فعال بنانا تمام سیاسی جماعتوں کی مشترکہ ذمہ داری ہے، جبکہ پیپلز پارٹی ہمیشہ اس بات کی حامی رہی ہے کہ قومی معاملات کے فیصلے پارلیمان کے ذریعے ہوں۔

   بلاول بھٹو کے مطابق انتخابی اصلاحات کی پارلیمانی کمیٹی پارلیمانی بالادستی کے فروغ، سیاسی مکالمے اور انتخابی نظام میں اعتماد بحال کرنے کی جانب ایک اہم قدم ثابت ہو سکتی ہے۔

6. 6 نومبر 2026علاقائی بحران کے حل کے لیے سفارتی کوششیں، صدر ٹرمپ کا قطر کے امیر سے ٹیلی فونک رابطہ

   امریکی صدر ڈونلڈ ٹرمپ نے قطر کے امیر شیخ تمیم بن حمد آل ثانی سے ٹیلی فونک پر بات کی ہے۔

   قطری حکام کے مطابق امیرِ قطر نے جمعے کے روز امریکی صدر ڈونلڈ ٹرمپ کے ساتھ ایک ٹیلی فونک گفتگو میں خطے کی تازہ صورتحال پر تبادلہ خیال کیا۔

   سرکاری خبر رساں ادارے قطر نیوز ایجنسی کے مطابق، اس گفتگو کے دوران قطر کے امیر اور امریکی صدر نے بین الاقوامی سطح پر جاری سفارتی کوششوں پر بات چیت کی، خصوصاً قطر کی ان ثالثی کوششوں پر جن کا مقصد متحارب فریقوں کے مؤقف میں قربت پیدا کرنا اور مذاکراتی عمل کو آگے بڑھانے میں مدد فراہم کرنا ہے۔

   اس گفتگو میں قطر کے امیر نے تنازعات کے حل کے لیے مکالمے کے تسلسل اور سفارت کاری کو مؤثر ذریعہ بنانے کی اہمیت پر زور دیا۔

   اُنھوں نے کہا کہ یہ خطے میں کشیدگی میں مزید اضافے کو روکنے، بین الاقوامی آبی گزرگاہوں میں جہازرانی کی آزادی کو برقرار رکھنے اور توانائی کی فراہمی کے تحفظ کو یقینی بنانے کے لیے ضروری ہے۔

7. 6 نومبر 2026گھٹتی شرحِ پیدائش کے باعث دو بچوں کی حد کا قانون اپنا جواز کھو چکا ہے، انڈین سپریم کورٹ, شکیل اختر، بی بی سی اردو ڈاٹ کام، دلی

   انڈیا کی سپریم کورٹ نے قرار دیا ہے کہ ایسے قوانین، جن کے تحت دو سے زیادہ بچوں والے افراد کو پنچایت انتخابات لڑنے یا بعض سرکاری سہولتوں سے فائدہ اٹھانے سے روکا جاتا ہے، تیزی سے گھٹتی ہوئی شرحِ پیدائش کے تناظر میں اپنا جواز کھو چکے ہیں۔

   عدالتِ عظمیٰ نے یہ ریمارکس مہاراشٹر کی رہائشی منگلا بھیم راؤ اینگلے کی اپیل منظور کرتے ہوئے دیے۔ اینگلے گاؤں کاکوڈا کی سرپنچ منتخب ہوئی تھیں، تاہم ان کا انتخاب ریاستی قانون کے تحت کالعدم قرار دے دیا گیا تھا، کیونکہ ان کے دو سے زیادہ بچے ہیں۔

   جسٹس پی ایم نرسمہا اور جسٹس آلوک آرادھے پر مشتمل دو رکنی بینچ نے اینگلے کو دوبارہ سرپنچ کے عہدے پر بحال کرتے ہوئے کہا کہ دو سے زیادہ بچوں والے والدین پر پابندیاں عائد کرنے والے قوانین اب اپنی بنیاد کھو چکے ہیں۔

   فیصلے میں کہا گیا کہ ان قوانین کی بنیاد آبادی میں بے تحاشا اضافے کے خدشے پر رکھی گئی تھی، مگر گذشتہ چند دہائیوں میں آبادی کے رجحانات میں نمایاں تبدیلی آ چکی ہے۔ عدالت کے مطابق آج یہ قوانین شہریوں کو ایک غیر ضروری انتخاب پر مجبور کرتے ہیں کہ یا تو وہ جمہوری عمل میں حصہ لیں یا اپنی مرضی کے مطابق خاندان تشکیل دیں۔

   بینچ نے کہا کہ یہ فیصلہ کہ کسی شخص کو کتنے بچے پیدا کرنے ہیں، بنیادی طور پر نجی اور ذاتی نوعیت کا معاملہ ہے اور عام حالات میں ریاست کو اس پر دباؤ نہیں ڈالنا چاہیے۔

   سپریم کورٹ نے اپنے 2003 کے اس فیصلے پر بھی نظرِثانی کے لیے معاملہ ایک بڑے بینچ کے سپرد کرنے کی سفارش کی ہے، جس میں دو بچوں کی حد سے متعلق قوانین کو آئینی قرار دیا گیا تھا۔

   جسٹس نرسمہا نے نشاندہی کی کہ 2003 میں انڈیا میں شرحِ پیدائش 3.02 تھی، جو اب کم ہو کر 1.9 رہ گئی ہے۔ انھوں نے کہا کہ آبادی کو موجودہ سطح پر برقرار رکھنے کے لیے شرحِ پیدائش کا 2.1 ہونا ضروری سمجھا جاتا ہے، جبکہ انڈیا اس سطح سے بھی نیچے آ چکا ہے۔

   عدالت کے مطابق اگرچہ انڈیا کی مجموعی آبادی ابھی کم ہونا شروع نہیں ہوئی، لیکن شرحِ پیدائش میں مسلسل کمی کے باعث مستقبل میں آبادی کا ڈھانچہ بدل سکتا ہے، جس سے بزرگ افراد کی تعداد بڑھنے اور کام کرنے والی آبادی میں کمی کا خدشہ پیدا ہوگا۔

   فیصلے میں کہا گیا کہ 2014 میں 60 سال یا اس سے زائد عمر کے افراد آبادی کا 8.3 فیصد تھے، جو 2024 میں بڑھ کر 9.7 فیصد ہو چکے ہیں۔ حکومتی تخمینوں کے مطابق 2036 تک یہ شرح 15 فیصد تک پہنچ سکتی ہے۔

   سپریم کورٹ نے کہا کہ آبادی پر قابو پانے کے لیے بنائے گئے قوانین بدلتے ہوئے سماجی اور آبادیاتی حالات میں اپنی افادیت کھو چکے ہیں۔ عدالت کے مطابق ماضی کا یہ تصور بھی تبدیل ہو رہا ہے کہ زیادہ آبادی لازماً ترقی کی راہ میں رکاوٹ بنتی ہے۔ اب ضرورت اس بات کی ہے کہ معاشرہ صرف آبادی میں اضافے کے منفی پہلوؤں پر توجہ دینے کے بجائے ایک متوازن اور صحت مند آبادیاتی نمو کی حوصلہ افزائی کرے۔

8. 6 نومبر 2026ایلون مسک کے لیے یہ چند روز بہت مہنگے ثابت ہوئے ہیں: مسک کے قریبی ساتھی کا اعتراف

   جیسا کہ ہم رپورٹ کر رہے ہیں، حالیہ وسط مدتی انتخابات میں متعدد ڈیموکریٹس نے مصنوعی ذہانت (AI) کی تیز رفتار ترقی اور ڈیٹا سینٹرز کی تیزی سے بڑھتی تعمیرات کو محدود کرنے کے وعدوں کے ساتھ انتخابی مہم چلائی۔

   ٹیسلا اوراسپیس ایکس کے سربراہ ایلون مسک، جو طویل عرصے سے اے آئی مصنوعات میں سرمایہ کاری کرتے رہے ہیں، نے ریپبلکن انتخابی مہم پر بھاری رقم خرچ کی۔

   انھوں نے ریپبلکن سیاسی امیدواروں کی حمایت میں تقریباً 45 کروڑ ڈالر (33 کروڑ 40 لاکھ پاؤنڈ) خرچ کیے، جو کسی بھی انتخابی دور میں ایک فرد کی جانب سے خرچ کی جانے والی سب سے بڑی رقم ہے۔

   اس میں وہ لاکھوں ڈالر بھی شامل ہیں جو انھوں نے ٹیکساس میں سینیٹ کی نشست کے لیے ریپبلکن امیدوار کین پیکسٹن کی حمایت پر خرچ کیے، جو انتخاب ہار گئے۔ ٹیکساس ہی سپیس ایکس اور ٹیسلا دونوں کے کارپوریٹ ہیڈکوارٹرز کا مرکز ہے۔

   ٹیکساس کی نومنتخب گورنر، ڈیموکریٹ جینا ہینوخوسا، نے ریاست میں کم از کم جنوری تک نئے ڈیٹا سینٹرز کی تعمیر کی منظوریوں پر پابندی عائد کرنے کا مطالبہ کیا ہے۔

   مسک نے بدھ کے روز ایکس پر لکھا: ’خلا میں ڈیٹا سینٹرز کا خیال اس وقت کافی پرکشش لگ رہا ہے۔‘

   جمعرات کو سپیس ایکس اور ٹیسلا دونوں کے حصص گرنے والوں میں شامل تھے۔

   ٹیسلا میں مسک کے سابق قریبی ساتھی پیٹر بارڈنفلیتھ ہینسن کا کہنا ہے کہ ان کے سابق باس کے لیے ’یہ چند دن کافی مہنگے ثابت ہوئے ہیں۔‘

9. 6 نومبر 2026فضائی حملوں کے بعد ایران کے میزائل اڈوں پر نئی تعمیرات، زیرِ زمین تنصیبات کے آثار, شایان سرداری زادہ، بینیڈکٹ گارمن اور میٹ مرفی

   سیٹلائٹ تصاویر کے تجزیے سے ظاہر ہوتا ہے کہ ایران کم از کم اپنے دو اہم میزائل اڈوں کے قریب بڑے پیمانے پر تعمیراتی منصوبوں پر کام کر رہا ہے، جبکہ حالیہ مہینوں میں امریکی اور اسرائیلی فضائی حملوں سے نقصان اٹھانے والے اڈوں کی مرمت بھی کی جا رہی ہے۔

   برطانوی انٹیلی جنس کمپنی MAIAR کے تجزیہ کاروں کے مطابق، جنھوں نے ان تصاویر کا جائزہ لیا، نومبر میں ریکارڈ کی گئی سیٹلائٹ تصاویر میں تہران کے قریب کرج میں واقع گارمدرہ فوجی اڈے اور شمالی ایران میں واقع شاہرود اڈے پر کھدائی اور نئی عمارتوں کی تعمیر کے شواہد دیکھے جا سکتے ہیں۔

   کم از کم 12 دیگر فوجی مقامات، جن میں میزائل کمپلیکس اور فضائی اڈے شامل ہیں، میں بھی مرمت کے آثار دکھائی دیتے ہیں۔ مغربی ایران میں عراقی سرحد کے قریب کرمانشاہ میزائل اڈے پر تباہ شدہ عمارتوں پر نئی چھتیں ڈال دی گئی ہیں۔ جبکہ تہران کے مشرق میں واقع پرچین فوجی کمپلیکس میں نقصان زدہ عمارتوں اور ملبے کو ہٹا دیا گیا ہے۔ یہ کمپلیکس متعدد فضائی حملوں کے باوجود بار بار مرمت کیا گیا ہے۔

   ایران پر توجہ مرکوز رکھنے والے سی آئی اے کے سابق تجزیہ کار جم لیمسن نے کہا کہ شاہرود کے قریب کھدائی کا تعلق ممکنہ طور پر میزائلوں کی پیداوار سے ہو سکتا ہے۔ ان کے مطابق، چونکہ شاہرود کے قریب فضائی اڈے کو حالیہ برسوں میں کئی مرتبہ نشانہ بنایا گیا ہے، اس لیے غالب امکان ہے کہ اسلامی انقلابی گارڈ کور اپنی پیداواری تنصیبات کو زیر زمین منتقل کرنے کے طریقے تلاش کر رہی ہے۔

   مایار کے ایک تجزیہ کار نے کہا کہ ایران میں ’مزید حملوں سے تحفظ کے لیے بنیادی ڈھانچے کو زیر زمین منتقل کرنے کا رجحان‘ موجود ہے۔

   دفاعی تجزیہ کار اور آئرش فوج کے سابق سربراہ مارک میلیٹ نے کہا کہ زیر زمین تنصیبات کی تعمیر کا ایک اضافی فائدہ یہ بھی ہے کہ اس سے ’بیرونی مبصرین کے لیے ان کے حجم اور عملی حیثیت کا اندازہ لگانا زیادہ مشکل ہو جاتا ہے۔‘

   حالیہ ہفتوں میں یہ قیاس آرائیاں بڑھ گئی ہیں کہ رواں ہفتے ہونے والے وسط مدتی انتخابات کے بعد امریکہ ایران پر حملے دوبارہ شروع کر سکتا ہے۔

   تاہم، امریکی نائب صدر جے ڈی وینس نے بدھ کے روز کہا کہ جنگ کے منفی اثرات نے ووٹروں پر اثر ڈالا، جس کے نتیجے میں اس ہفتے کے انتخابات میں ریپبلکن پارٹی کی کارکردگی کمزور رہی۔ ان کے مطابق، ممکن ہے کہ اسی وجہ سے ان کی جماعت آئندہ ’چھ سال کے لیے‘ سینیٹ کا کنٹرول کھو بیٹھی ہو۔

10. 6 نومبر 2026سعودی اتحاد کا مکہ کے قریب ڈرون حملہ ناکام بنانے کا دعویٰ

    سعودی عرب کی قیادت میں قائم عسکری اتحاد نے اعلان کیا ہے کہ مکہ ریجن کی جانب آنے والے ایک ڈرون (یو اے وی) کو بروقت نشانہ بنا کر تباہ کر دیا گیا۔

11. 6 نومبر 2026تیل کی قیمت دوبارہ 100 ڈالر فی بیرل کے قریب پہنچ گئی

    عالمی منڈی میں جمعے، چھے نومبر کی صبح تیل کی قیمتوں میں ایک بار پھر اضافہ دیکھنے میں آیا اور خام تیل 100 ڈالر فی بیرل کی سطح کے قریب پہنچ گیا۔

    یہ اضافہ ایسے وقت میں ہوا ہے جب امریکی کانگریس کے انتخابات کے نتائج کے اثرات کے باعث توانائی کی منڈیوں میں گذشتہ دو روز کے دوران نمایاں گراوٹ دیکھی گئی تھی۔

    تاہم جمعے کی صبح شمالی سمندر کے برینٹ خام تیل کی قیمت بڑھ کر 99.96 ڈالر فی بیرل تک پہنچ گئی، جو گذشتہ روز کے مقابلے میں زیادہ ہے۔

12. 6 نومبر 2026رکنِ قومی اسمبلی نور عالم کے بھانجے فہد خان پشاور میں فائرنگ سے ہلاک

    رکن قومی اسمبلی نور عالم خان کے بھانجے فہد خان پشاور کے بڑے رہائشی علاقے حیات آباد میں نامعلوم افراد کی فائرنگ سے ہلاک ہو گئے ہیں۔ وہ نیشنل ڈیٹا بیس اینڈ رجسٹریشن اتھارٹی (نادرا) میں ملازمت کرتے تھے۔ نور عالم خان نے سوشل میڈیا سائٹ ایکس پر اس واقعے کی تصدیق کی۔

    پولیس ترجمان عالم خان کی جانب سے جاری بیان کے مطابق ابتدائی اطلاعات کے مطابق تھانہ حیات آباد کی حدود میں فیز 5 میں نادرا دفتر کے عقب میں فائرنگ کا واقعہ پیش آیا، جس میں فہد خان ولد شاروم خان جان کی بازی ہار گئے۔ فہد خان نادرا میں ڈپٹی اسسٹنٹ ڈائریکٹر کے طور پر خدمات انجام دے رہے تھے۔

    بیان میں کہا گیا ہے کہ اطلاع ملتے ہی پولیس کی نفری فوری طور پر جائے وقوعہ پر پہنچ گئی۔ پولیس نے موقع سے 30 بور پستول کے آٹھ خالی خول برآمد کر لیے ہیں۔

    فہد خان کی لاش پوسٹ مارٹم کے لیے ہسپتال منتقل کر دی گئی ہے، جبکہ پولیس واقعے کے محرکات اور ملزمان کی شناخت کے لیے مختلف پہلوؤں سے تحقیقات کر رہی ہے۔

    حیات آباد کے فیز 5 میں متعدد سرکاری دفاتر، ہسپتال اور سرکاری افسران و ملازمین کی رہائش گاہیں واقع ہیں۔ نادرا دفتر کے قریب بینکوں کے علاوہ خیبر میڈیکل یونیورسٹی اور خیبر گرلز میڈیکل کالج بھی موجود ہیں۔

    اس واقعے کے حوالے سے سی سی پی او ڈاکٹر میاں سعید اور ایس ایس پی آپریشنز فرحان خان سے مؤقف لینے کی کوشش کی گئی، تاہم ان سے رابطہ نہیں ہو سکا اور نہ ہی واٹس ایپ پر بھیجے گئے پیغامات کا کوئی جواب موصول ہوا۔

    حیات آباد پشاور کا ایک اہم اور نسبتاً محفوظ تصور کیا جانے والا علاقہ ہے، جہاں بڑی تعداد میں ارکانِ قومی و صوبائی اسمبلی، سیاست دانوں اور اعلیٰ سرکاری افسران کی رہائش گاہیں واقع ہیں۔

13. 6 نومبر 2026فرانس میں طلبہ کی بس حادثے کا شکار، ایک بچے سمیت دو افراد ہلاک

    فرانسیسی حکام کے مطابق مشرقی فرانس میں طلبہ کو لے جانے والی ایک بس کے حادثے میں ایک بچے اور ایک نوجوان کی موت ہو گئی ہے، جبکہ متعدد افراد زخمی ہوئے ہیں۔

    یہ حادثہ جمعے کی صبح مقامی وقت کے مطابق تقریباً سات بجے قصبے لینت میں پیش آیا، جو لیون کے شمال مشرق میں اور سوئٹزرلینڈ کی سرحد سے تقریباً 55 کلومیٹر دور واقع ہے۔

    قصبے کے میئر ایو کرسٹین کے مطابق بس میں تقریباً 70 افراد سوار تھے جب یہ سڑک سے اتر کر ایک کھائی میں موجود درخت سے جا ٹکرائی۔

    مقامی پراسیکیوٹر کے دفتر کے مطابق تین افراد کی حالت تشویشناک ہے، جبکہ 13 افراد کو معمولی زخمی ہونے کی اطلاعات ہیں۔

    فرانسیسی وزیرِ تعلیم ایدوار جیفرے نے کہا کہ حادثے میں طلبہ متاثر ہوئے ہیں اور ایسے واقعات ہمیشہ انتہائی افسوسناک ہوتے ہیں۔ دوسری جانب وزیرِ ٹرانسپورٹ فلپ تبارو نے بتایا کہ وہ جائے حادثہ کی جانب روانہ ہو گئے ہیں۔

    فرانسیسی میڈیا میں نشر ہونے والی تصاویر میں نیلے اور سفید رنگ کی بس سڑک کنارے کھائی میں جھکی ہوئی دکھائی دیتی ہے، جبکہ اس کا اگلا حصہ بری طرح تباہ ہو چکا ہے۔

    امدادی ٹیمیں موقع پر موجود ہیں اور شدید زخمیوں کو خصوصی ہسپتال منتقل کرنے کے لیے ہیلی کاپٹر بھی تعینات کیا گیا ہے۔

14. 6 نومبر 2026آخر یہ اے آئی ڈیٹا سینٹر ہے کیا؟

    ڈیٹا سینٹر دراصل بڑے گودام نما مراکز ہوتے ہیں جن میں ہزاروں طاقتور کمپیوٹر سرورز نصب ہوتے ہیں۔ یہی مراکز جدید ڈیجیٹل دنیا کی بنیاد سمجھے جاتے ہیں اور بینکاری، سرکاری خدمات، ویڈیو اسٹریمنگ، کلاؤڈ کمپیوٹنگ اور مصنوعی ذہانت (اے آئی) سمیت متعدد آن لائن سروسز کو چلانے میں کلیدی کردار ادا کرتے ہیں۔ روزمرہ زندگی میں بیشتر لوگ دن میں درجنوں بلکہ سینکڑوں بار کسی نہ کسی ڈیٹا سینٹر سے جڑی سروس استعمال کرتے ہیں۔

    مصنوعی ذہانت کے حالیہ فروغ کے مرکز میں بھی یہی ڈیٹا سینٹرز ہیں، کیونکہ چیٹ جی پی ٹی، کلاڈ اور دیگر اے آئی سروسز کو چلانے کے لیے درکار جدید کمپیوٹر چپس اور سرورز یہیں موجود ہوتے ہیں۔

    تاہم ان مراکز کی تیزی سے بڑھتی تعداد، بھاری مقدار میں بجلی کا استعمال اور ماحولیات پر ممکنہ اثرات دنیا کے مختلف حصوں میں عوامی تشویش کو جنم دے رہے ہیں۔

    روایتی طور پر ڈیٹا سینٹرز شہروں یا ان کے نزدیک قائم کیے جاتے تھے، جہاں ہائی وولٹیج بجلی کی ترسیل اور سرورز کو ٹھنڈا رکھنے کے لیے پانی تک رسائی نسبتاً آسان ہوتی ہے۔ لیکن جیسے جیسے ان کا حجم بڑھ رہا ہے، نئے ڈیٹا سینٹرز دیہی علاقوں میں بھی تعمیر کیے جا رہے ہیں۔

    صلاحیت کے لحاظ سے امریکہ اس شعبے میں واضح برتری رکھتا ہے، جبکہ چین دوسرے نمبر پر ہے۔ اس کے برعکس یورپ ڈیٹا سینٹرز کی مجموعی گنجائش اور ترقی کی رفتار کے معاملے میں ان دونوں خطوں سے خاصا پیچھے ہے۔

15. 6 نومبر 2026پاکستان کا سعودی عرب سے یکجہتی کا اعادہ، حوثی حملوں کی مذمت

    پاکستان نے ایک بار پھر سعودی عرب پر حوثی باغیوں کے حملوں کی مذمت کرتے ہوئے واضح کیا ہے کہ وہ سعودی عرب کی خودمختاری، علاقائی سالمیت اور حرمین شریفین کے تحفظ کے لیے اس کے ساتھ کھڑا ہے۔

    اسلام آباد میں ہفتہ وار بریفنگ کے دوران ترجمان دفتر خارجہ سجاد حیدر خان نے کہا کہ پاکستان نے 26 اکتوبر کو مکہ مکرمہ اور مدینہ منورہ کے علاقوں کو نشانہ بنانے والے حوثیوں کے بیلسٹک میزائل حملوں کی شدید مذمت کی تھی۔ ان کا کہنا تھا کہ ان حملوں سے مقدس مقامات کے قریبی علاقے بھی متاثر ہوئے۔

    ترجمان کے مطابق پاکستان نے ان حملوں کو سعودی عرب کی خودمختاری اور علاقائی سالمیت کی سنگین خلاف ورزی قرار دیا تھا، جبکہ انھیں اسلام کے مقدس ترین مقامات کے تقدس اور شہریوں کی سلامتی کے لیے خطرہ بھی قرار دیا گیا تھا۔

    سجاد حیدر خان نے کہا کہ پاکستان نے سعودی عرب کے ساتھ اپنی غیر متزلزل یکجہتی کا اعادہ کرتے ہوئے مکہ مشترکہ دفاعی معاہدے کے تحت حرمین شریفین کے دفاع اور تحفظ کے عزم کا اظہار کیا ہے۔

    انھوں نے بتایا کہ 28 اکتوبر کو مکہ مشترکہ دفاعی معاہدے کے پہلے سیکرٹری جنرل لیفٹیننٹ جنرل نعمان محمود نے نائب وزیراعظم و وزیر خارجہ سینیٹر اسحاق ڈار سے وزارت خارجہ میں ملاقات کی۔ اس موقع پر اسحاق ڈار نے علاقائی اور عالمی امن و استحکام کے فروغ کے لیے پاکستان کی کوششوں کو اجاگر کیا اور خطے میں پائیدار امن کے قیام میں معاہدے کے کردار کی اہمیت پر زور دیا۔

    فلسطینی ریاست کے قیام کی حمایت

    ترجمان نے بتایا کہ 23 اکتوبر کو پاکستان سمیت آر فور ممالک کے وزرائے خارجہ نے فلسطین اور یمن سمیت اہم علاقائی معاملات پر تبادلہ خیال کیا۔

    ان کے مطابق اجلاس میں 4 جون 1967 کی سرحدوں کی بنیاد پر ایک آزاد اور خودمختار فلسطینی ریاست کے قیام پر زور دیا گیا، جس کا دارالحکومت مشرقی یروشلم ہو۔ وزرائے خارجہ نے غزہ میں فوری جنگ بندی، بلا رکاوٹ انسانی امداد کی فراہمی اور دو ریاستی حل پر تیز رفتار عمل درآمد کا بھی مطالبہ کیا۔

    سجاد حیدر خان نے کہا کہ اجلاس میں یمن میں حوثیوں کی جانب سے سعودی عرب اور بحیرہ احمر میں تجارتی جہازوں پر حملوں کی مذمت کی گئی، جبکہ یمنی حکومت اور سعودی عرب کے ساتھ یکجہتی کا اظہار کیا گیا۔

    انھوں نے بتایا کہ شرکا نے علاقائی تنازعات کے حل کے لیے مذاکرات اور سفارت کاری کی اہمیت پر زور دیا اور جاری سفارتی کوششوں کا خیرمقدم کیا۔ اجلاس میں آبنائے ہرمز سے بحری جہازوں کی محفوظ اور بلا رکاوٹ آمدورفت بحال کرنے کا مطالبہ بھی کیا گیا۔

    یورپی وزرائے خارجہ سے ملاقات

    ترجمان کے مطابق 23 اکتوبر کو استنبول میں آر فور ممالک کے وزرائے خارجہ نے فرانس، جرمنی، اٹلی اور برطانیہ کے وزرائے خارجہ سے بھی ملاقات کی۔

    ملاقات میں ایران، فلسطین، سعودی عرب اور یمن کی صورتحال، حوثی حملوں، آبنائے ہرمز، باب المندب اور بحیرہ اسود میں بحری سلامتی سمیت اہم علاقائی اور عالمی امور پر تبادلہ خیال کیا گیا۔ فریقین نے کشیدگی میں کمی، مذاکرات اور سفارت کاری کے ذریعے تنازعات کے حل کے عزم کا اعادہ کیا اور مشاورت کا عمل جاری رکھنے پر اتفاق کیا۔

    اردن میں حملے کی مذمت

    سجاد حیدر خان نے کہا کہ پاکستان نے 24 اکتوبر کو اردن میں ایک چرچ کے جنازے کے جلوس پر ہونے والے دہشت گرد حملے کی شدید مذمت کی تھی۔ پاکستان نے ہلاک ہونے والے افراد کے اہل خانہ سے تعزیت، زخمیوں کی جلد صحت یابی کی دعا اور دہشت گردی کے خلاف جنگ میں اردن کے ساتھ مکمل یکجہتی کا اظہار کیا۔

    سنگاپور کے وزیر خارجہ کا دورہ

    ترجمان نے سنگاپور کے وزیر خارجہ ڈاکٹر ویوین بالاکرشنن کے حالیہ دورۂ پاکستان کا بھی ذکر کیا اور بتایا کہ ان کی نائب وزیراعظم و وزیر خارجہ اسحاق ڈار سے ملاقات ہوئی، جس میں دوطرفہ تعلقات اور علاقائی امور پر تبادلہ خیال کیا گیا۔

    ترجمان نے اس موقع پر ایک بار پھر پاکستان کے مؤقف کا اعادہ کرتے ہوئے کہا کہ مسئلہ کشمیر کے منصفانہ حل کے بغیر جنوبی ایشیا میں پائیدار امن کا قیام ممکن نہیں اور پاکستان کشمیریوں کی سیاسی، سفارتی اور اخلاقی حمایت جاری رکھے گا۔

16. 6 نومبر 2026آبنائے ہرمز میں دو آئل ٹینکروں میں آگ، ایران کا بارودی سرنگ سے ٹکرانے کا دعویٰ

    پاسدارانِ انقلاب کی بحریہ کے شعبۂ تعلقاتِ عامہ کے مطابق آبنائے ہرمز سے گزرنے کی کوشش کرنے والے دو آئل ٹینکروں میں بارودی سرنگ سے ٹکرانے کے بعد آگ بھڑک اٹھی ہے۔

    پاسداران انقلاب کا کہنا ہے کہ دونوں ٹینکروں نے اپنے نیوی گیشن اور شناختی نظام بند کر رکھے تھے اور وہ آبنائے ہرمز سے ایک ’غیر مجاز‘ راستے کے ذریعے گزرنے کا ارادہ رکھتے تھے۔

    ایرانی حکام نے ٹینکروں کی شناخت یا ان سے متعلق مزید تفصیلات فراہم نہیں کیں۔

    ایران کا مؤقف ہے کہ آبنائے ہرمز سے گزرنے والے بحری جہازوں کو اس کی جانب سے مقرر کردہ راستوں کی پابندی کرنا چاہیے۔ اطلاعات کے مطابق حالیہ ہفتوں میں بعض جہاز اور آئل ٹینکر ایران کی جانب سے عائد پابندیوں سے بچنے کے لیے متبادل راستوں کا استعمال کر رہے ہیں۔

    آبنائے ہرمز دنیا کی اہم ترین آبی گزرگاہوں میں شمار ہوتی ہے اور عالمی توانائی کی ترسیل میں مرکزی کردار ادا کرتی ہے۔ رواں سال فروری میں ایران، امریکہ اور اسرائیل کے درمیان کشیدگی اور جنگ کے آغاز سے قبل عالمی سطح پر تجارت ہونے والے تیل اور مائع قدرتی گیس (ایل این جی) کا تقریباً پانچواں حصہ اسی راستے سے گزرتا تھا۔

17. 6 نومبر 2026سرمایہ کاروں کی بے چینی برقرار، یورپی منڈیوں میں وسیع پیمانے پر گراوٹ

    یورپی سٹاک مارکیٹوں میں بھی فروخت کا دباؤ جمعے کی صبح برقرار رہا، اگرچہ وہاں گراوٹ کی شدت امریکہ اور ایشیا کے مقابلے میں کم رہی۔

    ابتدائی کاروبار کے دوران برطانیہ کے ایف ٹی ایس ای 100 اور جرمنی کے ڈیکس انڈیکس تقریباً 1.5 فیصد نیچے آ گئے، جبکہ فرانس کے کیک 40 انڈیکس میں 1.1 فیصد کمی دیکھی گئی۔

    اس کے مقابلے میں امریکہ اور ایشیا کی بعض اہم مارکیٹوں میں 5 سے 6 فیصد تک گراوٹ ریکارڈ کی گئی، جہاں ٹیکنالوجی کمپنیوں کے حصص میں اتار چڑھاؤ کا اثر عموماً زیادہ نمایاں ہوتا ہے۔

    تاہم یورپ میں صورتحال اس اعتبار سے مختلف دکھائی دے رہی ہے کہ تقریباً تمام شعبوں کے حصص دباؤ کا شکار ہیں۔ اس سے ظاہر ہوتا ہے کہ سرمایہ کار صرف ٹیکنالوجی کمپنیوں کے حصص فروخت نہیں کر رہے بلکہ مارکیٹ میں فروخت کا رجحان وسیع پیمانے پر پھیل چکا ہے اور خدشات مختلف شعبوں تک سرایت کر گئے ہیں۔

18. 6 نومبر 2026امریکہ کے وسط مدتی انتخابات کے بعد اے آئی خدشات، عالمی ٹیکنالوجی کمپنیوں کے حصص گر گئے

    امریکہ کے وسط مدتی انتخابات کے بعد مصنوعی ذہانت (اے آئی) کی ترقی کی رفتار سست پڑنے کے خدشات کے باعث امریکہ، یورپ اور ایشیا کی بڑی ٹیکنالوجی کمپنیوں کی مارکیٹ ویلیو سے کھربوں ڈالر کم ہو گئے۔

    منگل کے روز ہونے والے وسط مدتی انتخابات میں ڈیموکریٹس کی کامیابی کے بعد ٹیکنالوجی شعبے سے وابستہ کمپنیوں کے حصص میں نمایاں کمی دیکھی گئی۔

    ڈیموکریٹک پارٹی کے کئی امیدواروں نے اپنی انتخابی مہم کے دوران اے آئی کی ترقی کی رفتار کم کرنے کی بات کی تھی۔

    اس کے علاوہ سرمایہ کاروں میں یہ خدشات بھی پائے جاتے ہیں کہ اس ٹیکنالوجی پر خرچ ہونے والی بھاری رقوم مطلوبہ نتائج دے سکیں گی یا نہیں۔

    یاد رہے کہ امریکی صدر ڈونلڈ ٹرمپ نے جمعرات کو سوشل میڈیا پلیٹ فارم ٹروتھ سوشل پر متعدد پیغامات میں سٹاک مارکیٹ میں آنے والی گراوٹ کا ذمہ دار اپنے سیاسی مخالفین کو ٹھہرایا ہے۔

    ٹیکنالوجی کمپنیوں پر مشتمل امریکی سٹاک انڈیکس نیسڈیک جب جمعرات کے روز بند ہوا تب تک 5.5 فیصد سے زیادہ کمی ریکارڈ کی جا چکی تھی۔

    ڈاو جونز کے اعداد و شمار کے مطابق اس دوران تقریباً 2.5 کھرب ڈالر مارکیٹ ویلیو کم ہوئی۔

    امریکہ کے دیگر بڑے سٹاک انڈیکسز میں بھی نمایاں گراوٹ دیکھی گئی، جو 2025 کے بعد ان کا بدترین دن قرار دیا جا رہا ہے۔

    ایشیا میں جمعے کی صبح ٹیکنالوجی کمپنیوں پر مشتمل انڈیکسز بھی نیچے آ گئے، جبکہ اے آئی کے لیے درکار چپس اور دیگر آلات تیار کرنے والی کمپنیوں کے حصص میں بھی کمی دیکھی گئی۔

    فروخت کے اس دباؤ کا اثر یورپی چپ ساز کمپنیوں پر بھی پڑا ہے۔

    جمعرات کو یورپی مارکیٹ میں چپ بنانے والی کمپنی انفینیون کے حصص 8.5 فیصد سے زیادہ گر گئے جبکہ ٹیکنالوجی آلات بنانے والی کمپنی اے ایس ایم ایل کے حصص میں 6.5 فیصد کمی ریکارڈ کی گئی۔

    سٹاک مارکیٹ کی تاریخ کے بدترین دنوں میں سے ایک دن: ٹرمپ

    صدر ٹرمپ نے ٹروتھ سوشل پر لکھا کہ ’انتخابی نتائج کی وجہ سے سٹاک مارکیٹ کی تاریخ کے بدترین دنوں میں سے ایک دن دیکھنے میں آیا۔ یہ دیکھ کر بہت افسوس ہوتا ہے۔ ہمیں ایسی سطح تک پہنچانے کے لیے بہت محنت کرنا پڑی تھی جو پہلے کبھی نہیں دیکھی گئی، اور پھر یہ ہوا۔‘

    ٹرمپ نے مزید لکھا کہ ’یاد رکھیں، یہ ریپبلکنز نہیں تھے بلکہ ڈیموکریٹس تھے۔ تاہم خوف زدہ نہ ہوں، ہم جلد ہی، کسی نہ کسی طریقے سے، پہلے سے زیادہ مضبوط ہو جائیں گے۔‘

    بعد میں ایک اور پیغام میں انھوں نے کہا کہ ’آج سٹاک مارکیٹ اس لیے گر گئی کیونکہ منگل کو ڈیموکریٹس نے بڑی کامیابی حاصل کی۔ یہ دیکھ کر افسوس ہوتا ہے، اس کے ذمہ دار آپ خود ہیں۔‘

19. 6 نومبر 2026ایران کے بارے میں جلد فیصلہ کریں گے: صدر ٹرمپ

    امریکی صدر ڈونلڈ ٹرمپ نے کہا ہے کہ واشنگٹن کو یہ فیصلہ کرنا ہو گا کہ آیا ایران کے خلاف مزید اقدامات کیے جائیں یا کسی ممکنہ معاہدے کی توثیق کی جائے۔

    وائٹ ہاؤس میں صحافیوں سے گفتگو کرتے ہوئے ٹرمپ نے کہا کہ ’ایران جن تجاویز پر غور کر رہا ہے، ان کی تفصیلات اہم نہیں ہیں کیونکہ ان کے پاس جوہری ہتھیار نہیں ہوں گے۔‘

    ان کا کہنا تھا کہ تہران واشنگٹن کی منظوری کے بغیر کوئی قدم نہیں اٹھائے گا۔

    بی بی سی عربی کے مطابق ٹرمپ کا یہ بھی کہنا تھا کہ وہ نہیں چاہتے کہ ’ایران کی باقیات کو تباہ کیا جائے، تاہم مجھے ایسا کرنا پڑ سکتا ہے‘۔

    ٹرمپ ککے دعوے کے مطابق امریکہ نے سات ماہ قبل ایران میں اپنی مداخلت شروع ہونے کے بعد سے ان تمام معاملات پر کنٹرول حاصل کر لیا ہے جن پر وہ کنٹرول کرنا چاہتا تھا۔

    انھوں نے کہا کہ ’آپ کو جلد ہی معلوم ہو جائے گا کہ ہم ایران کے بارے میں کیا فیصلہ کریں گے۔‘

20. 6 نومبر 2026پاکستان کا بیرونی قرضہ دس سال میں تقریباً دوگنا ہو کر 135 ارب ڈالر سے تجاوز کر گیا: عالمی بینک, تنویر ملک ، صحافی

    عالمی بینک نے اپنی ایک رپورٹ میں انکشاف کیا ہے کہ گزشتہ دس برسوں میں پاکستان کا مجموعی بیرونی قرضہ تقریباً دوگنا ہو کر 2025 میں 135.1 ارب ڈالر تک پہنچ گیا ہے۔

    عالمی بینک کی انٹرنیشنل ڈیٹ رپورٹ 2026 میں بتا یا گیا ہے کہ پاکستان کا بیرونی قرضہ 2015 میں 68 ارب 67 کروڑ 30 لاکھ ڈالر تھا، جو 2025 میں بڑھ کر 135 ارب 10 کروڑ 70 لاکھ ڈالر ہو گیا۔

    اس مجموعی قرضے میں 107 ارب 7 کروڑ 60 لاکھ ڈالر سرکاری اور حکومتی ضمانت کے تحت حاصل کیے گئے قرضوں پر مشتمل ہیں، جبکہ نجی شعبے کا 17 ارب 58 کروڑ ڈالر کا قرضہ بھی شامل ہے جس کی حکومت نے ضمانت نہیں دی۔

    اس کے علاوہ قلیل مدتی قرضوں کا حجم 10 ارب 45 کروڑ ڈالر رہا۔ رپورٹ کے مطابق پاکستان کے سرکاری قرضوں میں سے 56 ارب 83 کروڑ ڈالر کثیر ملکی مالیاتی اداروں، 42 ارب 43 کروڑ ڈالر دوسرے ممالک جبکہ 7 ارب 80 کروڑ ڈالر نجی قرض دہندگان کے واجب الادا ہیں۔

    چین پاکستان کا سب سے بڑا انفرادی قرض دینے والا ملک ہے، جس کے 22 ارب 40 کروڑ ڈالر پاکستان کے ذمے واجب الادا ہیں۔

    عالمی بینک کے 19 ارب 20 کروڑ ڈالر جبکہ ایشیائی ترقیاتی بینک کے 16 ارب 83 کروڑ ڈالر کے قرضے بھی شامل ہیں۔

    عالمی بینک کی رپورٹ کے مطابق سرکاری مالیاتی اداروں سے حاصل کیے گئے قرضوں کی واپسی کی اوسط مدت 16 سال ہے، جبکہ ان قرضوں پر اوسط شرح سود 3.6 فیصد ہے۔

    ان قرضوں کی ادائیگی شروع کرنے سے پہلے چار سال کی رعایتی مدت بھی دی جاتی ہے۔ اس کے برعکس نجی قرض دہندگان سے حاصل کیے گئے قرضوں پر اوسط شرح سود 8.6 فیصد ہے۔

    ان قرضوں کی ادائیگی کی اوسط مدت تین سال جبکہ رعایتی مدت صرف ایک سال ہے۔ رپورٹ میں بتایا گیا ہے کہ مشرق وسطیٰ، شمالی افریقہ، افغانستان اور پاکستان کے خطے میں قرضوں کی ادائیگی اور سود کی ادائیگی کے تناسب میں بہتری آئی ہے، تاہم اس خطے کے بیرونی قرضے اور مجموعی قومی آمدنی کا تناسب 2025 میں بڑھ کر 29.4 فیصد ہو گیا، جو ایک سال پہلے 26.7 فیصد تھا۔

    عالمی بینک کے مطابق یہ کسی بھی خطے میں ایک سال کے دوران اس تناسب میں سب سے زیادہ اضافہ ہے، جو ظاہر کرتا ہے کہ خطے کے ممالک پر بیرونی قرضوں کا بوجھ مسلسل بڑھ رہا ہے۔

    رپورٹ کے مطابق 2025 میں چین نے پاکستان کو دیے گئے دو ارب ڈالر کے قرضوں کی واپسی کی مدت میں توسیع کی، جبکہ عالمی مالیاتی فنڈ (آئی ایم ایف) نے توسیعی فنڈ سہولت اور پائیداری و استحکام کی سہولت کے تحت پاکستان کو 2.3 ارب ڈالر کے نئے قرضے فراہم کیے۔