امریکی ووٹرز فیصلہ سنا چکے، اب وائٹ ہاؤس اپنی سمت کا تعین کرے: عباس عراقچی کی واشنگٹن کو تنبیہ

لائیو کوریج

1. 7 نومبر 2026مشرقِ وسطیٰ میں حملوں کے خطرے کے پیشِ نظر امریکی شہریوں کے لیے سکیورٹی الرٹ جاری

   امریکہ نے مشرقِ وسطیٰ میں موجود اپنے شہریوں کو خبردار کیا ہے کہ وہ خطے میں مسلح حملوں کے بڑھتے ہوئے خطرے کے پیشِ نظر زیادہ محتاط رہیں۔

   امریکی حکام کے مطابق یہ خطرہ حوثی جنگجوؤں کی جانب سے ممکنہ حملوں اور ایرانی کوششوں سے متعلق ہے جن کا مقصد خطے میں امریکی حکومتی عہدیداروں کو نشانہ بنانا ہے۔

   امریکہ نے فضائی پروازیں منسوخ ہونے، فضائی حدود بند کیے جانے اور سفری نظام میں خلل پڑنے کے خدشے سے بھی آگاہ کیا ہے۔ امریکی شہریوں کو ہدایت کی گئی ہے کہ وہ متعلقہ ملک کے لیے جاری کردہ سکیورٹی ہدایات پر عمل کریں۔

   یہ انتباہ ایسے وقت میں سامنے آیا ہے جب ایران اور امریکہ کے درمیان کشیدگی برقرار ہے اور یمن کے حوثی جنگجوؤں کے حملوں سے خلیجی ممالک کی سکیورٹی کو بھی خطرات لاحق ہیں۔

   حوثی جنگجو اس سے قبل سعودی عرب کے مختلف شہروں اور ہوائی اڈوں کو میزائلوں اور ڈرونز سے نشانہ بنا چکے ہیں، جس کے باعث خطے میں کشیدگی میں مزید اضافے کا خدشہ ہے۔

2. 7 نومبر 2026ایل پی جی اور پیٹرولیم مصنوعات میں قیمتوں میں اضافے کی وجہ سے سالانہ بنیاد پر ہفتہ وار مہنگائی میں 12 سے زائد کا اضافہ, تنویر ملک، صحافی

   پاکستان میں سالانہ بنیادوں پر اس ہفتے مہنگائی میں 12.31 فیصد کا اضافہ ریکارڈ کیا گیا ہے۔

   پاکستان ادارہ شماریات کے مطابق سالانہ بنیادوں پر مہنگائی میں اضافے کی بڑی وجہ توانائی سے متعلق اشیا کی قیمتوں میں نمایاں اضافہ رہا۔

   مائع پیٹرولیم گیس (ایل پی جی) کی قیمتوں میں 114.88 فیصد، بجلی کے صارفین کے لیے نرخوں میں 52.38 فیصد، ہائی سپیڈ ڈیزل کی قیمت میں 39.27 فیصد جبکہ پیٹرول کی قیمت میں 36.34 فیصد اضافہ ریکارڈ کیا گیا۔

   یہ اضافہ علاقائی عدم استحکام کے باعث عالمی منڈی میں تیل کی قیمتوں میں اضافے کے اثرات کا نتیجہ ہے، جس کے باعث خوردہ قیمتوں میں حالیہ کمی کے باوجود ملک میں ایندھن اور کھانا پکانے کے اخراجات بلند سطح پر برقرار رہے۔

   غذائی اشیا کی قیمتوں میں بھی اضافہ مہنگائی کا سبب بنا۔ اس دوران ٹماٹر 78.89 فیصد، گندم کا آٹا 33.95 فیصد اور مرغی کا گوشت 31.81 فیصد مہنگا ہوا۔

   ہفتہ وار بنیادوں پر حساس قیمتوں کا اشاریہ (ایس پی آئی) معمولی 0.29 فیصد اضافے سے 374.59 پوائنٹس پر پہنچ گیا، جو گذشتہ ہفتے 373.51 پوائنٹس ریکارڈ کیا گیا تھا۔ ہفتے کے دوران ٹماٹر کی قیمت میں 54.18 فیصد، ایل پی جی میں 3.72 فیصد، آلو میں 2.07 فیصد، انڈوں میں 1.17 فیصد اور لہسن میں 1.06 فیصد اضافہ ہوا۔

   اس کے برعکس پیٹرول کی قیمت میں 4.20 فیصد اور ہائی سپیڈ ڈیزل میں 2.97 فیصد کمی ریکارڈ کی گئی، جس سے صارفین کو معمولی ریلیف ملا۔

   دالوں، چینی اور گندم کے آٹے کی قیمتوں میں بھی معمولی کمی ہوئی۔ دریں اثنا ایل پی جی کی شفاف نیلامی کے لیے قائم کمیٹی کے پہلے اجلاس میں فیصلہ کیا گیا کہ مقامی ایل پی جی پیدا کرنے والے ادارے اپنی پیداوار کا 10 فیصد سرکاری مارکیٹنگ کمپنیوں دور دراز علاقوں کی ضروریات پوری کرنے کے لیے مختص کریں گے بقیہ 90 فیصد مقامی ایل پی جی میڈیا کی موجودگی میں شفاف نیلامی کے ذریعے فروخت کی جائے گی۔

   نیلامی میں ہر کمپنی کو یومیہ زیادہ سے زیادہ 20 میٹرک ٹن ایل پی جی حاصل کرنے کی اجازت ہوگی، ایل پی جی کی یومیہ پیداوار کی نگرانی کی جائے گی اور اعداد و شمار وزیراعظم کو پیش کیے جائیں گے۔

3. 7 نومبر 2026ایران کا زیرِ زمین میزائل اڈوں کے وسیع نیٹ ورک کے قیام کا دعویٰ

   پاسداران انقلاب کے ترجمان نے دعویٰ کیا ہے کہ ایران نے ملک کے وسیع جغرافیے سے فائدہ اٹھاتے ہوئے زیرِ زمین میزائل اڈوں اور تنصیبات کا ایک وسیع نیٹ ورک قائم کیا ہے جنھیں مقامی مہارت سے تیار کیا گیا ہے۔

   ایران کے سرکاری خبر رساں ادارے پریس ٹی وی کے مطابق پاسداران انقلاب کے ترجمان برگیڈیئر جنرل محبی نے اپنے بیان میں دعویٰ کیا کہ ایران اور اسرائیل کے درمیان حالیہ تنازع کے دوران آئی آر جی سی کی ایرو سپیس فورس نے ’دشمن کے 260 طیارے مار گرائے۔‘

   انھوں نے یہ دعویٰ بھی کیا کہ ایران نے دشمن کی بمباری کے باوجود میزائلوں اور ڈرونز کی پیداوار جاری رکھی اور پیداواری تنصیبات کو زمین کے اوپر سے زیرِ زمین منتقل کرنے میں کامیابی حاصل کی۔

4. 7 نومبر 2026سٹیفن ملر وائٹ ہاؤس کے نئے چیف آف سٹاف مقرر

   امریکی صدر ڈونلڈ ٹرمپ نے سٹیفن ملر کو وائٹ ہاؤس کا نیا چیف آف سٹاف مقرر کر دیا ہے جو سوزی وائلز کی جگہ لیں گے۔

   یاد رہے کہ سوزی وائلز کے لیے کہا جا رہا ہے کہ انھوں نے وسط مدتی انتخابات میں ریپبلکن پارٹی کی شکست کے بعد استعفیٰ دیا ہے۔

   صحافیوں سے گفتگو کرتے ہوئے صدر ٹرمپ نے کہا کہ ’سوزی وائلز نے بہت اچھا کام کیا لیکن کبھی کبھی تبدیلیاں کرنا پڑتی ہیں۔‘

   41 سالہ سٹیفن ملر پیر سے اپنی نئی ذمہ داری سنبھالیں گے۔ وہ ٹرمپ کے قریبی ساتھیوں میں شمار ہوتے ہیں اور 2020 کے صدارتی انتخاب میں شکست کے بعد بھی ان کے ساتھ رہے تھے۔

   جمعے کو ایکس پر اپنے بیان میں ملر نے ٹرمپ کو امریکی تاریخ کا سب سے زیادہ تبدیلی لانے والا سیاسی رہنما قرار دیا۔

   اپنے پیغام میں انھوں نے سوزی وائلز کی خدمات کو بھی سراہا اور کہا کہ اب ان کا مقصد صدر ٹرمپ کی حمایت اور امریکہ کے دفاع کے لیے کام کرنا ہے۔

   سی بی ایس نیوز کے مطابق وائلز نے جمعرات کی رات ٹرمپ کو اپنا استعفیٰ پیش کیا۔

   وائلز نے ایکس پر اپنے پیغام میں لکھا کہ ٹرمپ کی ٹیم کا حصہ بننا زندگی کا سب سے بڑا اعزاز تھا۔

   سٹیفن ملر کون ہیں؟

   سٹیفن ملر کا تعلق کیلیفورنیا کے شہر سانتا مونیکا کے ایک اشکنازی یہودی خاندان سے ہے۔

   انھوں نے ڈیوک یونیورسٹی میں تعلیم حاصل کی اور بعد میں الاباما کے قدامت پسند سینیٹر جیف سیشنز کے معاون بنے، جو ٹرمپ کی حمایت کرنے والے پہلے سینیٹر تھے۔

   ملر 2016 میں ٹرمپ کی صدارتی مہم میں شامل ہوئے اور تب سے ان کے قریبی مشیروں میں شمار ہوتے ہیں۔

   وہ سخت گیر امیگریشن پالیسیوں، زیرو ٹالرنس پروگرام، سفری پابندیوں اور ملک بدری سے متعلق اقدامات کے حامی رہے ہیں۔

   اسرائیل کے مضبوط حامی سمجھے جانے والے ملر ایران کے حوالے سے امریکہ اور اسرائیل کی مشترکہ فوجی کارروائی کے بھی حامی رہے ہیں۔

5. 7 نومبر 2026مشرقِ وسطیٰ میں امریکی شہریوں کے لیے سفری انتباہ جاری

   امریکہ نے مشرقِ وسطیٰ میں موجود اپنے شہریوں کو خطے کی صورتحال کے سبب زیادہ محتاط رہنے کی ہدایت کی ہے۔

   امریکی حکام کی جانب سے جاری الرٹ میں کہا گیا ہے کہ حوثی گروہ کی جانب سے مسلح حملوں کے بڑھتے ہوئے خطرات اور خطے میں امریکی حکام کو نشانہ بنانے کی مبینہ کوششوں کے خدشات بڑھ گئے ہیں جس کے باعث الرٹ دیا جا رہا ہے۔

   امریکی حکام نے خبردار کیا ہے کہ فضائی پروازوں کی منسوخی، فضائی حدود کی بندش اور سفر میں رکاوٹوں کا سامنا کرنا پڑ سکتا ہے۔

   حکام نے اپنے شہریوں کو میزبان ممالک سے متعلق تازہ ترین سفری انتباہات اور سکیورٹی ہدایات پر نظر رکھنے کی ہدایات جاری کی ہیں۔

6. 7 نومبر 2026ایران سے بات چیت میں پیش رفت ہو رہی ہے: صدر ٹرمپ

   امریکی صدر ڈونلڈ ٹرمپ نے کہا ہے کہ واشنگٹن کی تہران کے ساتھ بات چیت جاری ہے اور ایران کے حوالے سے معاملات آگے بڑھ رہے ہیں۔

   وائٹ ہاؤس سے روانگی کے وقت صحافیوں سے گفتگو میں ٹرمپ نے کہا کہ ’صورتحال پر ہمارا مکمل کنٹرول ہے، تاہم ہم ایران کے ساتھ بات چیت کر رہے ہیں اور دیکھتے ہیں کہ معاملات کس سمت میں بڑھتے ہیں۔‘

   ٹرمپ نے مزید دعویٰ کیا کہ امریکہ نے گزشتہ چھ یا سات ماہ کے دوران اپنی کوئی فوجی نہیں کھویا۔

   یاد رہے کہ صدر ٹرمپ کے بیانات ایسے وقت میں سامنے آئے ہیں جب ایرانی میڈیا نے ہفتے کی صبح جنوبی ایران میں جزیرہ قشم سمیت بعض مقامات پر حملوں کی اطلاعات دی ہیں تاہم سرکاری طور پر ان حملوں کے نقصانات سے متعلق تاحال تصدیق نہیں کی گئی۔

7. 7 نومبر 2026قطر کی ایران امریکہ مذاکرات کی ناکامی کی خبروں کی تردید: ’ایسے بیانات کا مقصد سفارتی کوششوں کو نقصان پہنچانا ہے‘

   قطر نے سوشل میڈیا اور دیگر آن لائن پلیٹ فارمز پر گردش کرنے والی ان رپورٹس کو مسترد کرتے ہوئے انھیں غلط اور گمراہ کن قرار دیا ہے جن میں قطر کے وزیرِ اعظم اور وزیرِ خارجہ سے منسوب کرتے ہوئے یہ دعویٰ کیا گیا تھا کہ امریکہ اور ایران کسی معاہدے تک پہنچنے میں ناکام رہے ہیں۔

   قطر کے بین الاقوامی میڈیا آفس کی جانب سے جاری بیان کے مطابق ’وزیرِ اعظم کے بیانات کو جان بوجھ کر ان عناصر نے توڑ مروڑ کر پیش کیا ہے جو خطے میں جنگ اور عدم استحکام کے تسلسل سے فائدہ اٹھاتے ہیں۔‘

   بیان کے مطابق ’ان میں سے بہت سے دعوے جعلی اکاؤنٹس کے ذریعے پھیلائے جا رہے ہیں، جن کا مقصد سفارتی کوششوں کو نقصان پہنچانا اور کشیدگی میں مزید اضافہ کرنا ہے۔ یہ انتہائی غیر ذمہ دارانہ طرزِ عمل ہے۔‘

   بیان میں کہا گیا کہ ’قطر کے وزیرِ اعظم نے واضح کیا ہے کہ دونوں فریق اب بھی کسی معاہدے تک پہنچنے کے لیے کام کر رہے ہیں اور قطری ثالث امریکہ اور ایران کے ساتھ قریبی رابطے میں ہیں تاکہ جاری مذاکرات کی حمایت جاری رکھی جا سکے۔‘

8. 7 نومبر 2026امریکہ کی ایران کے جوہری پروگرام سے متعلق معلومات پر دو کروڑ ڈالر انعام کی پیشکش

   امریکہ نے ایران کے جوہری پروگرام سے متعلق معلومات فراہم کرنے والوں کے لیے 20 ملین ڈالر تک کے انعام کا اعلان کیا ہے۔

   امریکی محکمۂ خارجہ کے پروگرام ریوارڈز فار جسٹس نے اپنے اعلان میں کہا ہے کہ ’یہ پیشکش ایران کے جوہری پروگرام سے وابستہ تنصیبات، آلات، سائنس دانوں اور دیگر افراد کے بارے میں معلومات پر لاگو ہوتی ہے، جبکہ ایسے آلات کی منتقلی سے متعلق معلومات بھی اس میں شامل ہیں۔‘

   پروگرام کے مطابق اس اقدام کا مقصد امریکی قومی سلامتی اور مفادات کا تحفظ ہے۔ اعلان میں بین الاقوامی جوہری توانائی ایجنسی (آئی اے ای اے) کی 2025 کی رپورٹ کا حوالہ بھی دیا گیا ہے، جس میں کہا گیا تھا کہ ایران نے یورینیم کو 60 فیصد تک افزودہ کیا ہے۔

   امریکی محکمۂ خارجہ کا یہ پروگرام ماضی میں بھی ایرانی تیل کی فروخت، نقل و حمل کے نیٹ ورکس اور پاسدارانِ انقلاب سے متعلق معلومات پر انعامات کی پیشکش کر چکا ہے۔

9. 7 نومبر 2026بی بی سی نیوز اُردو اب موبائل ایپ پر بھی دستیاب، ابھی ڈاؤن لوڈ کیجیے

   بی بی سی اُردونے اپنی نئی ایپ لانچ کر دی ہے، جس کے ذریعے اب صارفین اپنی دلچسپی کی تمام علاقائی و عالمی خبریں، تجزیے اور معلومات براہ راست اپنے موبائل فون یا ٹیبلٹ پر حاصل کر سکیں گے۔

   بی بی سی اُردو کا تمام مواد بی بی سی ورلڈ سروس کی نئی ایپ پر دستیاب ہو گا جسے آپ اپنے موبائل فون یا ٹیبلٹ کی مناسبت سے ایپ سٹور یا گوگل پلے سے ڈاؤن لوڈ کر سکتے ہیں۔

   نئی ایپ کیسے ڈاؤن لوڈ کی جائے؟

   گوگل پلے سٹور سے اینڈروئڈ ڈیوائسزکے لیے بی بی سی ایپ ڈاؤن لوڈ کرنے کے لیے یہاں کلک کریں

   ایپ سٹور سے آئی فون اور آئی پیڈ کے لیے بی بی سی ایپ ڈاؤن لوڈ کرنے کے لیے یہاں کلک کریں

   BBC World Service ایپ ڈاؤن لوڈ کرنے کے بعد آپ کو اپنی پسند کا ایڈیشن یعنی ’BBC News اردو‘ کا انتخاب کرنا ہو گا جہاں آپ کو پاکستان اور دنیا کے مختلف خطوں میں موجود بی بی سی کے صحافیوں کی رپورٹس دستیاب ہوں گی۔

   نوٹ: یہ ایپ برطانیہ اور امریکہ میں دستیاب نہیں اور اس کا انگریزی زبان کا کوئی ایڈیشن بھی نہیں ہے۔

10. 7 نومبر 2026امریکہ نے ایران کی مدد کے الزام میں آٹھ کینیڈین مالیاتی کمپنیوں پر پابندیاں عائد کر دیں

    امریکہ نے ایران کے ساتھ مبینہ مالی روابط کے الزام میں کینیڈا میں قائم آٹھ مالیاتی خدمات فراہم کرنے والی کمپنیوں پر پابندیاں عائد کر دی ہیں۔

    امریکی محکمۂ خزانہ کا دعویٰ ہے کہ یہ کمپنیاں ایرانی ریال اور دیگر کرنسیوں کو ڈیجیٹل اثاثوں میں تبدیل کرنے کی سہولت فراہم کرتی تھیں، جس کے ذریعے ایرانی حکومت، اسلامی انقلابی گارڈ کور (آئی آر جی سی) اور دیگر پابندیوں کا سامنا کرنے والے افراد و اداروں کو رقوم منتقل کرنے میں مدد ملتی تھی۔

    امریکہ کے سٹیٹ ڈپارٹمنٹ کے اعلامیے میں کہا گیا ہے کہ ان میں سے کئی کمپنیوں نے ایسے ایرانی کرپٹو کرنسی ایکسچینجز کے ساتھ بھی کام کیا جن پر امریکہ پہلے ہی پابندیاں عائد کر چکا ہے۔

    امریکی حکومت کے مطابق حالیہ اقدام کا مقصد ایران کی جانب سے پابندیوں سے بچنے کے لیے ڈیجیٹل اثاثوں کے استعمال کو محدود کرنا ہے۔ امریکہ نے خبردار کیا ہے کہ دنیا میں کہیں بھی موجود کوئی بھی شخص یا ادارہ جو تہران کو پابندیوں سے بچنے میں مدد دے گا، اس کے خلاف کارروائی کی جا سکتی ہے۔

    امریکی محکمہ کے مطابق بعض کاروباروں نے شناخت سے بچنے کے لیے اپنے نام اور پتے بھی تبدیل کیے اور ان کے بارے میں خدشات سامنے آنے کے باوجود اپنی سرگرمیاں جاری رکھیں۔

    اعلامیہ میں کہا گیا ہے کہ ’آپریشن اکنامک آؤٹ کاسٹ‘ کے تحت وہ ان مالی ذرائع کو نشانہ بناتا رہے گا جنھیں اس کے بقول ایران دہشت گردی، ہتھیاروں کے پھیلاؤ اور مشرقِ وسطیٰ میں اپنے اتحادی گروہوں کی معاونت کے لیے استعمال کرتا ہے۔

    سٹیٹ ڈپارٹمنٹ کے اعلامیے کے مطابق پابندیوں کا سامنا کرنے والی بعض کمپنیوں کا تعلق منشیات کی سمگلنگ سے حاصل ہونے والی رقوم کی منتقلی سے بھی تھا، اور وہ کینیڈا سمیت اپنے بین الاقوامی شراکت داروں کے ساتھ مل کر ایسے نیٹ ورکس کے خلاف کارروائی جاری رکھے گا۔

11. 7 نومبر 2026جزیرہ قشم کو دو میزائلوں سے نشانہ بنائے جانے کی اطلاعات: ایرانی میڈیا

    ایران کی نیم سرکاری تسنیم نیوز ایجنسی کے مطابق جزیرہ قشم کو دو میزائلوں سے نشانہ بنایا گیا ہے تاہم اس حملے کے ممکنہ نقصان کے بارے میں تاحال کوئی سرکاری اطلاع سامنے نہیں آئی۔

    تسنیم کا کہنا ہے کہ متعلقہ حکام کی جانب سے واقعے کی تصدیق کے بعد مزید تفصیلات جاری کی جائیں گی۔

    یاد رہے کہ قشم آبنائے ہرمز کا سب سے بڑا جزیرہ ہے اور یہاں نمک، تیل اور گیس سمیت متعدد قدرتی وسائل پائے جاتے ہیں۔ ی

    یاد رہے کہ ایران کی سرکاری خبر رساں ایجنسی ارنا نے اس سے قبل رپورٹ کیا تھا کہ مقامی عینی شاہدین کا کہنا ہے کہ جنوبی ایران کے جزیرہ قشم میں دو پروجیکٹائل (گولے) آ کر گرے، جبکہ اسی دوران جزیرے کے اوپر ایک طیارے کی پرواز کی آواز بھی سنی گئی تاہم اس خبر کی بی بی سی آزادانہ طور پر تصدیق نہیں کر سکا۔

12. 7 نومبر 2026گزشتہ روز کی اہم خبروں کا خلاصہ

    بی بی سی کی لائیو کوریج جاری ہے تاہم سنیچر کے روز خبروں کا سلسلہ آگے بڑھانے سے قبل گزشتہ روز کی اہم خبروں کا خلاصہ پیش خدمت ہے۔

    • پاکستان میں پیٹرول اور ڈیزل کی قیمتیں مزید کم کر دی گئی ہیں۔ نوٹیفکیشن کے مطابق پیٹرول کی قیمت میں چھ روپے 59 پیسے فی لیٹر جبکہ ہائی سپیڈ ڈیزل کی قیمت میں چار روپے 25 پیسے فی لیٹر کمی کی گئی ہے جس کے تحت پیٹرول 346 روپے فی لیٹر جبکہ ہائی سپیڈ ڈیزل 378 روپے فی لیٹر میں اگلے نوٹیفیکیشن تک دستیاب ہو گا۔
    • امریکی صدر ڈونلڈ ٹرمپ نے ایک بار پھر ایران کے خلاف عسکری کارروائی کے اپنے فیصلے کا دفاع کرتے ہوئے کہا ہے کہ اگر وہ ایران کو جوہری ہتھیار حاصل کرنے سے روکنے میں کامیاب نہ ہوتے تو ’آج اسرائیل اور درحقیقت پورا مشرق وسطیٰ موجود نہ ہوتا۔‘
    • ایک یونانی کمپنی کے منیجر کا کہنا ہے کہ آبنائے ہرمز میں ان کے آئل ٹینکر پر بظاہر ایک میزائل حملے کے نتیجے میں ہونے والے دھماکے میں جہاز کے عملے کا ایک رکن ہلاک ہو گیا ہے۔
    • امریکی محکمہ خزانہ نے ’آپریشن اکنامک آؤٹ کاسٹ‘ کے تحت کرپٹو کرنسی ایکسچینج ایم ای ایکس سی گلوبل (MEXC Global) کی امریکی مالیاتی نظام تک رسائی ختم کرنے کا اعلان کیا ہے۔
    • برطانوی شہزادہ ہیری کی اہلیہ اور سابق امریکی اداکارہ میگھن مارکل کے والد تھامس مارکل کو بچوں کے جنسی استحصال سے متعلق مواد رکھنے کے الزام میں گرفتار کیا گیا ہے۔
    • امریکی صدر ڈونلڈ ٹرمپ نے کہا ہے کہ واشنگٹن آئندہ دو ہفتوں میں یہ فیصلہ کرے گا کہ ایران کے حوالے سے مزید اقدامات کیے جائیں یا کسی ممکنہ معاہدے کی توثیق کی جائے۔
    • ایران کی سپریم نیشنل سیکیورٹی کونسل کے ڈپٹی سیکریٹری علی باقری کنی کا کہنا ہے کہ ایران سفارت کاری کے نئے دائرے میں داخل ہونے سے پہلے امریکہ کی طرف سے ’کاغذی وعدوں‘ سے مطمئن نہیں ہوگا۔
    • انڈیا کی سپریم کورٹ نے قرار دیا ہے کہ ایسے قوانین، جن کے تحت دو سے زیادہ بچوں والے افراد کو پنچایت انتخابات لڑنے یا بعض سرکاری سہولتوں سے فائدہ اٹھانے سے روکا جاتا ہے، تیزی سے گھٹتی ہوئی شرحِ پیدائش کے تناظر میں اپنا جواز کھو چکے ہیں۔

13. 7 نومبر 2026غیر قانونی مالی لین دین کا الزام، امریکہ نے کرپٹو ایکسچینج ایم ای ایکس سی گلوبل پر پابندیاں عائد کر دیں

    امریکی محکمہ خزانہ نے ’آپریشن اکنامک آؤٹ کاسٹ‘ کے تحت کرپٹو کرنسی ایکسچینج ایم ای ایکس سی گلوبل (MEXC Global) کی امریکی مالیاتی نظام تک رسائی ختم کرنے کا اعلان کیا ہے۔

    محکمہ خزانہ کے الزام کے مطابق اس پلیٹ فارم کے ذریعے کم از کم 16 ارب ڈالر کا ایسا مالی لین دین ہوا جس سے ایران، شمالی کوریا اور روس جیسے ممالک کو امریکہ کی عائد کردہ پابندیوں سے بچنے میں مدد ملی، جبکہ اس کا تعلق سائبر جرائم سے حاصل ہونے والی رقوم کی منتقلی سے بھی جوڑا گیا ہے۔

    امریکی محکمہ خزانہ کے بیان میں کہا گیا ہے کہ فنانشل کرائمز انفورسمنٹ نیٹ ورک کے جاری کردہ حکم کے تحت امریکی مالیاتی ادارے اب MEXC Global سے متعلق رقوم کی منتقلی نہیں کر سکیں گے۔

    امریکی وزیر خزانہ سکاٹ بیسنٹ نے کہا کہ امریکہ ایرانی حکومت کی معاشی سرگرمیوں اور ڈیجیٹل اثاثوں کے ذریعے پابندیوں سے بچنے کی کوششوں کو روکنے کے لیے اقدامات جاری رکھے گا۔

14. 7 نومبر 2026پیٹرول کی قیمت میں 6.59 روپے، ڈیزل میں 4.25 روپے فی لیٹر کمی

    پاکستان میں پیٹرول اور ڈیزل کی قیمتیں مزید کم کر دی گئی ہیں۔

    نوٹیفکیشن کے مطابق پیٹرول کی قیمت میں چھ روپے 59 پیسے فی لیٹر جبکہ ہائی سپیڈ ڈیزل کی قیمت میں چار روپے 25 پیسے فی لیٹر کمی کی گئی ہے۔

    نئی قیمتوں کے تحت پیٹرول 346 روپے فی لیٹر جبکہ ہائی سپیڈ ڈیزل 378 روپے فی لیٹر میں دستیاب ہو گا۔

    سنیچر اور اتوار کی چھٹی کے بعد نو نومبر کی سرکاری تعطیل کے باعث نئی قیمتوں کا اطلاق سات سے 10 نومبر تک ہو گا۔

15. 7 نومبر 2026ٹرمپ نے سوزی وائلز کی جگہ سٹیون ملر کو وائٹ ہاؤس کا چیف آف سٹاف مقرر کر دیا

    امریکی صدر ڈونلڈ ٹرمپ نے اعلان کیا ہے کہ ان کے قریبی مشیر اور موجودہ ڈپٹی چیف آف سٹاف اسٹیون ملر نو نومبر سے وائٹ ہاؤس کے چیف آف اسٹاف کی ذمہ داریاں سنبھالیں گے۔

    یہ تبدیلی ایسے وقت میں کی گئی ہے جب ریپبلکن پارٹی کو حالیہ وسط مدتی انتخابات میں بھاری شکست کا سامنا کرنا پڑا اور اسے ایوان نمائندگان اور سینیٹ دونوں میں اکثریت سے ہاتھ دھونا پڑا۔

    ٹرمپ نے جمعہ کو جاری ایک بیان میں کہا کہ سٹیون ملر موجودہ چیف آف سٹاف سوزی وائلز کی جگہ لیں گے، جبکہ سوزی وائلز کو وائٹ ہاؤس سے ہٹا کر ٹرمپ کی سیاسی اور انتخابی سرگرمیوں کی نگرانی کرنے والی ٹیم میں منتقل کیا جا رہا ہے۔

    ٹرمپ نے ان کی کارکردگی کو سراہتے ہوئے کہا کہ انھوں نے چیف آف سٹاف کے طور پر ’غیر معمولی کام‘ کیا۔

    انتخابات سے قبل امریکی میڈیا میں ایسی اطلاعات سامنے آتی رہی تھیں کہ ٹرمپ بعض مشیروں اور ریپبلکن جماعت کی انتخابی حکمت عملی سے مطمئن نہیں ہیں۔

    اکتوبر میں خبر رساں ادارے روئٹرز اور امریکی اخبار واشنگٹن پوسٹ نے بھی رپورٹ کیا تھا کہ پارٹی کے اندر بعض حلقوں کی تنقید کا رخ سوزی وائلز کی جانب ہے اور سٹیون ملر کو ان کا ممکنہ جانشین تصور کیا جا رہا ہے۔

    سوزی وائلز کی تبدیلی سے قبل ایسی رپورٹس سامنے آئی تھیں کہ وہ ایران کے ساتھ جنگ کے سیاسی اور معاشی نتائج کے بارے میں تشویش رکھتی تھیں۔

    امریکی اخبار نیو یارک ٹائمز کے مطابق وائلز کو خدشہ تھا کہ مشرق وسطیٰ میں ایک اور جنگ امریکہ کو طویل تنازع میں الجھا سکتی ہے اور انتخابات سے قبل ایندھن کی قیمتوں میں اضافے کا سبب بن سکتی ہے، تاہم بعد میں انھوں نے ایران کے خلاف فوجی کارروائی کی حمایت کی تھی۔

    ٹائم میگزین نے بھی رپورٹ کیا تھا کہ وائلز اور بعض دیگر مشیروں نے ٹرمپ کو خبردار کیا تھا کہ جنگ طویل ہونے کی صورت میں اس سے ان کی مقبولیت اور ریپبلکن پارٹی کے انتخابی امکانات متاثر ہو سکتے ہیں۔

    ایندھن کی بڑھتی ہوئی قیمتیں اور مہنگائی ایران جنگ کے بعد امریکی وسط مدتی انتخابات کے اہم موضوعات میں شامل رہی ہیں۔ خود ٹرمپ بھی یہ تسلیم کر چکے ہیں کہ جنگ نے انتخابی نتائج پر اثر ڈالا، تاہم انھوں نے واضح نہیں کیا کہ چیف آف سٹاف کی تبدیلی کا فیصلہ کس حد تک انتخابی شکست یا جنگ کے اثرات سے منسلک ہے۔

    سٹیون ملر طویل عرصے سے ٹرمپ کے قریبی ساتھی سمجھے جاتے ہیں اور ان کا شمار سخت گیر امیگریشن پالیسیوں کے اہم معماروں میں کیا جاتا ہے۔

16. 7 نومبر 2026اگر میں ایران کو جوہری ہتھیار حاصل کرنے سے نہ روکتا تو آج اسرائیل اور پورا مشرق وسطیٰ موجود نہ ہوتا: ٹرمپ

    امریکی صدر ڈونلڈ ٹرمپ نے ایک بار پھر ایران کے خلاف عسکری کارروائی کے اپنے فیصلے کا دفاع کرتے ہوئے کہا ہے کہ اگر وہ ایران کو جوہری ہتھیار حاصل کرنے سے روکنے میں کامیاب نہ ہوتے تو ’آج اسرائیل اور درحقیقت پورا مشرق وسطیٰ موجود نہ ہوتا۔‘

    ٹرمپ نے جمعہ کو اپنے سوشل میڈیا پلیٹ فارم ٹروتھ سوشل پر جاری بیان میں کہا کہ ’کوئی اس بارے میں کھل کر بات نہیں کرنا چاہتا، لیکن سب جانتے ہیں کہ یہ حقیقت ہے۔‘

    یہ بیان ایسے وقت میں سامنے آیا ہے جب حالیہ امریکی وسط مدتی انتخابات میں ریپبلکن پارٹی کو شکست کا سامنا کرنا پڑا ہے اور بعض مبصرین ایران کے خلاف جنگ کو اس شکست کی ایک وجہ قرار دے رہے ہیں۔

    امریکی نائب صدر جے ڈی وینس نے بھی تسلیم کیا ہے کہ ان کے خیال میں ریپبلکنز کی انتخابی ناکامی کی ایک بڑی وجہ ایران کے ساتھ جنگ تھی۔

    انھوں نے ایک تفصیلی سوشل میڈیا پوسٹ میں لکھا تھا کہ ’ہماری شکست کی وجہ جنگ تھی۔ صدر نے بھی گذشتہ رات یہی بات کہی۔ ہر کوئی جانتا ہے کہ ہم کیوں ہارے اور مستقبل کی حکمت عملی پر ہر سنجیدہ بحث کا آغاز اسی نکتے سے ہونا چاہیے۔‘

    بعد ازاں ٹرمپ نے کہا کہ وہ اپنے نائب صدر کی کئی باتوں سے اتفاق کرتے ہیں، تاہم اگر ماضی میں واپس جانے کا موقع ملے تو وہ ایران کے خلاف کارروائی کا فیصلہ دوبارہ بھی کریں گے۔

    انھوں نے مزید کہا کہ ’ایران جنگ کے نتیجے میں ڈیزل کی قیمتوں میں اضافہ ہوا اور عوام اس مہنگائی پر ناراض تھے، جنگ پر نہیں۔‘

    دوسری جانب ایرانی حکام مسلسل یہ مؤقف دہراتے رہے ہیں کہ ایران کا جوہری پروگرام پُر امن مقاصد کے لیے ہے اور تہران جوہری ہتھیار بنانے کا ارادہ نہیں رکھتا۔

17. 6 نومبر 2026قلعہ عبداللہ میں پانچ روزہ دھرنا مغوی شخص کی بازیابی کے بعد ختم، دو مقتولین کی تدفین کا اعلان, محمد کاظم، بی بی سی اردو، کوئٹہ

    بلوچستان کے افغانستان سے متصل ضلع قلعہ عبداللہ میں دو لاشوں کے ہمراہ گذشتہ پانچ روز سے جاری دھرنا ایک مغوی شخص کی بازیابی اور حکومتی وفد سے کامیاب مذاکرات کے بعد ختم کر دیا گیا۔

    دھرنا یکم نومبر کو علاقے تنگ مسے زئی میں نا معلوم مسلح افراد کی فائرنگ سے دو افراد کے قتل اور ایک شخص کے اغوا کے خلاف دیا جا رہا تھا۔

    مقتولین میں باپ اور بیٹا شامل تھے جبکہ مغوی شخص کی شناخت محمد حیدر کے نام سے ہوئی تھی۔

    علاقہ مکینوں نے مقتولین کی تدفین کے بجائے ان کی لاشوں کے ہمراہ احتجاجی دھرنا جاری رکھا۔ حزب اختلاف کی تمام جماعتوں نے نہ صرف کوئٹہ چمن شاہراہ پر جاری اس دھرنے کی حمایت کی بلکہ ان کے کارکن بھی احتجاج میں شریک رہے۔

    ضلع قلعہ عبداللہ میں لاشوں کے ہمراہ یہ اپنی نوعیت کا پہلا اور طویل ترین دھرنا قرار دیا جا رہا ہے۔

    دھرنے کے شرکا کے مطالبات میں علاقے میں امن و امان کی بحالی کے علاوہ مغوی شخص کی بازیابی بھی شامل تھی۔

    وزیر داخلہ بلوچستان میر ضیاء اللہ لانگو کی سربراہی میں حکومتی وفد نے دھرنے کے شرکا سے دو مرتبہ مذاکرات کیے۔ حکام کے مطابق گذشتہ شب مغوی شخص کی بازیابی کے بعد وفد نے ایک بار پھر مظاہرین سے مذاکرات کیے اور دیگر مطالبات پر عمل درآمد کی یقین دہانی کرائی، جس کے بعد دھرنا ختم کرنے کا اعلان کیا گیا۔

    محکمہ داخلہ بلوچستان کے ترجمان بابر یوسفزئی کے مطابق مذاکرات کامیاب رہے اور دھرنے کے شرکا نے مقتولین کی تدفین کا اعلان کر دیا ہے۔

18. 6 نومبر 2026پنجاب پولیس کا سات کروڑ روپے مالیت کا لوٹا گیا سونا بازیاب کرانے کا دعویٰ

    پنجاب پولیس نے سیالکوٹ میں کارروائی کے دوران سات کروڑ روپے مالیت کا لوٹا گیا سونا بازیاب کرانے کا دعویٰ کیا ہے۔

    ترجمان پنجاب پولیس کے مطابق علی الصبح دو مسلح ملزمان سیڑھی کے ذریعے ایک سنار کے گھر میں داخل ہوئے اور اسلحے کے زور پر ملازم کو یرغمال بنا کر دو کلوگرام سے زائد سونا لوٹ کر فرار ہو گئے۔

    واضح رہے کہ پاکستان میں سونے کی فی تولہ قیمت 4 لاکھ 29 ہزار 136 روپے ہے۔

    ایک کلوگرام سونا تقریباً 85.73 تولے کے برابر ہوتا ہے، اس حساب سے ایک کلو سونے کی مالیت تقریباً تین کروڑ 67 لاکھ روپے جبکہ دو کلوگرام سونے کی مالیت سات کروڑ 35 لاکھ روپے سے زیادہ بنتی ہے۔

    ترجمان کا کہنا ہے کہ واقعے کی اطلاع ملنے پر پولیس نے علاقے کا گھیراؤ کر کے سرچ آپریشن شروع کر دیا۔

    ترجمان کے مطابق ’پولیس کے تعاقب اور گرفتاری کے خوف سے ملزمان سونا کھیتوں میں پھینک کر فرار ہو گئے‘ جسے سرچ آپریشن کے دوران تلاش کر لیا گیا۔

    پولیس کا کہنا ہے کہ فرار ملزمان کی گرفتاری کے لیے خصوصی ٹیمیں تشکیل دے دی گئی ہیں اور مختلف مقامات پر چھاپے مارے جا رہے ہیں۔

19. 6 نومبر 2026میگھن مارکل کے والد تھامس مارکل بچوں کے جنسی استحصال سے متعلق مواد رکھنے کے الزام میں گرفتار

    برطانوی شہزادہ ہیری کی اہلیہ اور سابق امریکی اداکارہ میگھن مارکل کے والد تھامس مارکل کو بچوں کے جنسی استحصال سے متعلق مواد رکھنے کے الزام میں گرفتار کیا گیا ہے۔

    امریکی محکمہ انصاف کے مطابق 82 سالہ تھامس وین مارکل کو ریاست فلوریڈا کے شہر لیک لینڈ میں گرفتار کیا گیا اور ان پر بچوں کی فحش تصاویر رکھنے کا ایک الزام عائد کیا گیا ہے۔

    محکمہ انصاف کے الزام کے مطابق تھامس نے تقریباً دو دہائیوں تک لاس اینجلس کے علاقے میں کرائے پر لیے گئے دو سٹوریج یونٹس میں بچوں کے جنسی استحصال سے متعلق مواد محفوظ رکھا، جس میں نا بالغ لڑکیوں کے ساتھ ان کی اپنی جنسی نوعیت کی تصاویر بھی شامل تھیں۔

    بیان کے مطابق 2008 سے کرائے پر لیے گئے ان سٹوریج یونٹس کی تلاشی کے دوران اہلکاروں نے تقریباً 78 اشیا قبضے میں لیں، جن میں سلائیڈز، فلم نیگیٹوز اور ایسی کتابیں شامل تھیں جن میں بچوں کے جنسی استحصال سے متعلق مواد موجود تھا۔

    ایف بی آئی کے ڈائریکر کاش پٹیل نے کہا کہ حکام نے تیزی سے کارروائی کرتے ہوئے مواد کی نشاندہی کی اور تھامس مارکل کو گرفتار کر لیا۔ ان کے بقول تھامس نے مبینہ طور پر معصوم بچوں کو نشانہ بنایا اور ان کی ’معصومیت چھیننے‘ کی کوشش کی۔

    گذشتہ ماہ میگھن مارکل نے کہا تھا کہ انھیں 2019 میں میٹروپولیٹن پولیس کی جانب سے ایک خط موصول ہوا تھا جس میں ان کے والد سے متعلق ’تشویش ناک الزامات‘ کا ذکر تھا۔

    ان کا کہنا تھا کہ وہ ان اطلاعات سے ’بہت پریشان‘ ہیں اور ان کی ہمدردیاں ہر اس بچے کے ساتھ ہیں جو ممکنہ طور پر متاثر ہوا ہو۔

    دوسری جانب تھامس مارکل ماضی میں اپنے خلاف عائد الزامات کی تردید کرتے رہے ہیں اور بچوں کے استحصال سے متعلق تصاویر رکھنے کے دعوؤں کو ’بیمار ذہن کی جھوٹی باتیں‘ قرار دیتے رہے ہیں۔

20. 6 نومبر 2026روسی شدت پسند خواتین مخالف گروہ ’میل سٹیٹ‘ کی جعلی بم دھمکیاں بھیجنے کی تردید, سارہ رینسفورڈ، بی بی سی

    روس کے شدت پسند خواتین مخالف گروہ ’میل سٹیٹ‘ جس کا نام رواں ہفتے اٹلی کے ہوائی اڈوں کو بھیجی گئی جعلی بم دھمکیوں میں لیا جا رہا تھا نے تردید کی ہے کہ یورپ بھر میں پروازوں میں خلل کا باعث بننے والی ان جھوٹی وارننگز میں ان کا کوئی ہاتھ ہیں۔

    بی بی سی سے بات کرتے ہوئے گروہ نے یہ موقف ایسے وقت میں اختیار کیا جب ایئرلائنز کو مزید بم دھمکیوں کی اطلاعات سامنے آنا شروع ہوئیں۔ ان میں روم سے لزبن جانے والی ایک ریان ایئر پرواز اور پراگ سے روم جانے والی ایک وِز ایئر پرواز شامل ہیں، جسے وینس کی جانب موڑ دیا گیا۔

    جمعے کے روز آئرلینڈ کے کئی نمایاں میڈیا اداروں کو بھی بم دھمکیوں کی اطلاعات موصول ہوئیں، جس کے بعد عمارتیں خالی کرا لی گئیں۔ آئرش حکومت نے ایک بیان میں کہا کہ بظاہر یہ ’خلل ڈالنے کی مربوط مہم‘ کا حصہ ہے۔

    بی بی سی روسی سروس کو جواب دیتے ہوئے ٹیلیگرام پر موجود ایک اکاؤنٹ، جو نام نہاد ’میل سٹیٹ‘ اور اس کے بانی ولادیسلاو پوزدنیاکوف سے منسلک متعدد اکاؤنٹس میں سے ایک ہے، نے اس تاثر کا مذاق اڑایا کہ گروہ کا سن دھمکی آمیز ای میلز بھیجنے سے کوئی تعلق ہے۔

    چینل پر شائع ہونے والے پیغام میں کہا گیا کہ ’کون سا میل سٹیٹ؟ آپ نے اسے کہاں دیکھا ہے؟ یہ تو کئی برسوں سے موجود ہی نہیں۔‘

    پیغام میں مزید کہا گیا ’اگر کل وہ [دھمکی آمیز] خط پر، مثال کے طور پر، پوتن کا نام لکھ دیں تو کیا آپ پھر ہمارے صدر سے رابطہ کرنے کی کوشش کریں گے تاکہ اپنا یہ احمقانہ سوال پوچھ سکیں؟ً‘