کورونا کا تیل پیدا کرنے والے ممالک پر اثر، معیشت 7.6 فیصد تک گِر سکتی ہے

لائیو کوریج

1. 29 جون 2020برطانوی وزیر اعظم: 'ابھی ہم مشکلات سے باہر نہیں نکلے‘

   برطانیہ کے وزیر اعظم بورس جانسن نے کہا ہے کہ ان کی حکومت کو لیسسٹر شہر میں کورونا وائرس متاثرین کی تعداد میں اضافے پر تشویش ہے۔

   ویسٹ لندن میں ایک تعمیراتی جگہ کے دورے کے موقع پر انھوں نے کہا ہمیں لیسسٹر سے متعلق تشویش ہے اور ہمیں ہر اس جگہ سے متعلق تشویش ہے جہاں یہ وائرس مقامی طور پر پھیل رہا ہے۔

   انھوں نے کہا کہ میں عوام سے یہ کہنا چاہتا ہوں کہ ہم ابھی خطرات سے باہر نہیں نکلے ہیں۔

   انھوں نے کہا کہ اگرچہ ہم احتیاطی تدابیر کے ساتھ دوبارہ کاروبار زندگی بحال کرنے کی طرف جا رہے ہیں اور جتنا ممکن ہوسکا ملک چار جولائی تک کھول دیا جائے گا مگر ایسے کاروبار زندگی یا شعبے جو اس وائرس کے لیے خطرات کا موجب بنیں وہ ابھی نہیں کھولے جائیں گے۔

   برطانوی وزیر اعظم کے مطابق ہمیں بہت چوکنا رہنا ہوگا اور اس وائرس پر قابو پانے کے لیے بہترین حکمت عملی اختیار کرنا ہوگی۔

2. 29 جون 2020کورونا کا پھیلاؤ: کیا دلی نے لاک ڈاؤن کا موقع ضائع کر دیا؟, اپرنا الوری، بی بی سی نیوز، دلی

   80 ہزار سے زیادہ کووڈ۔19 کے متاثرین کے بعد انڈیا کا دارالحکومت دلی، ملک کا سب سے بڑا ہاٹ سپاٹ بن گیا ہے۔

   ایسے لگتا ہے کہ جیسے شہری انتظامیہ نے پورے ملک میں دو ماہ سے زیادہ لگائے گئے سخت لاک ڈاؤن سے حاصل ہونے والا موقع بظاہر ضائع کر دیا ہے۔

   کونٹیکٹ ٹریسنگ میں کمی، ضرورت سے زیادہ بیوروکریسی، نجی صحت کی سہولیات سے برا یا بالکل بھی نہ ہونے کے برابر تعاون اور سیاسی کشمکش متاثرین کی تعداد میں اضافے کا سبب بنی ہے۔

   چھوٹے شہر کورونا وائرس کے پھیلاؤ کو روکنے کے حوالے سے دارالحکومت سے بہت بہتر نظر آ رہے ہیں۔

   لیکن معاشی دارالحکومت ممبئی کی طرح، جس کو بھی وائرس نے بہت متاثر کیا ہے، دلی کے ہسپتال بھی، جو کہ ملک میں سب سے بڑے ہسپتالوں میں سے ہیں، متاثرین سے بھر گئے ہیں۔

3. 29 جون 2020مائیک پینس کی ماسک پہننے کی تاکید، ٹرمپ تذبذب کا شکار

   اگرچہ صدر ڈونلڈ ٹرمپ ماسک پہننا لازمی قرار دینے کے حق میں نہیں ہیں لیکن امریکہ میں لوگوں پر دباؤ بڑھ رہا ہے کہ وہ عوامی مقامات پر چہرہ ڈھانپیں۔

   ٹیکساس ان ریاستوں میں سے ایک ہے جہاں کووڈ 19 کے متاثرین میں تیزی سے اضافہ ہوا ہے۔ یہاں کے گورنر گریگ ایبٹ نے کہا ہے کہ ’صورتحال نے ایک خطرناک موڑ لے لیا ہے کیونکہ 40 سال سے کم عمر کے لوگوں میں انفیکشن کی تعداد بڑھ رہی ہے۔‘

   دوسری جانب امریکی نائب صدر مائیک پینس کا کہنا ہے کہ لوگوں کو اپنے چہرے کو ڈھانپنے کے لیے مقامی قوانین پر عمل کرنا چاہیے۔

   =اس کے جواب میں ایوان کی ڈیموکریٹک سپیکر نینسی پیلوسی نے کہا ہے کہ صدر ماسک کو لازمی قرار دیں اور ایک مثال قائم کریں۔ ساتھ ہی انھوں نے مزید کہا ’حقیقی مرد ماسک پہنتے ہیں۔‘

4. 29 جون 2020پاکستان میں کورونا وائرس طبی عملے کے 89 افراد کی جان لے چکا ہے, عزیزاللہ خان، پشاور

   پاکستان میں کورونا وائرس کے خلاف فرنٹ لائن پر موجود طبی عملہ بھی اس وائرس سے بری طرح متاثر ہو رہے ہیں اور اب تک 89 ڈاکٹرز، نرسز اور دیگر طبی عملے کے ارکان انتقال کر چکے ہیں۔

   صوبائی ڈاکٹرز ایسوسی ایشن خیبرپختونخوا کے ترجمان نے بی بی سی کو بتایا کہ انھوں نے پاکستان کے تمام شہروں سے اعدادوشمار حاصل کیے ہیں اور جب سے کورونا وائرس پاکستان میں آیا ہے تب سے اب تک پاکستان میں طبی عملے کے 89 افراد کی اموات ہو چکی ہیں۔

   ان کا کہنا تھا کہ ان میں 72 ڈاکٹر، 17 نرسز، ٹیکنیشنز، ڈسپنسرز، فارماسسٹ اور کلاس فور کے ملازمین شامل ہیں۔

   محکمہ صحت کے ایک ایمبولینس ڈرائیور بھی اس وائرس سے وفات پا گئے ہیں جو متاثرہ مریضوں یا میتوں کو منتقل کرتے تھے۔

   پی ڈی اے کے مطابق اس وائرس سے متاثرہ طبی عملے کی تعداد کہیں زیادہ ہے اور اس بارے میں وہ تمام فہرستیں مرتب کر رہے ہیں۔

   پی ڈی اے کے ترجمان کے مطابق خیبر پختونخوا میں 600 ڈاکٹرز اس وائرس سے متاثر ہوئے ہیں جن میں سے بیشتر صحتیاب ہو گئے ہیں۔

5. 29 جون 2020بلوچستان: ٹیسٹنگ میں بتدریج کمی، 28 جون کو صرف 459 ٹیسٹ کیے گئے, محمد کاظم، بی بی سی اردو کوئٹہ

   بلوچستان میں گزشتہ دس روز کے دوران پہلے کے مقابلے کورونا ٹیسٹنگ کی تعداد میں کمی آئی ہے اور ان کی تعداد ہزار تک بھی نہیں پہنچ پائی۔

   محکمہ صحت حکومت بلوچستان کی رپورٹس کے مطابق 18جون کو 14سو سے زائد ٹیسٹ کیے گئے تاہم اس کے بعد ٹیسٹنگ کی تعداد میں کمی آتی رہی جس کا اندازہ اس سے لگایا جاسکتا کہ 28 جون کو ٹیسٹوں کی کل تعداد 459 تھی۔

   بلوچستان میں گزشتہ ساڑھے تین ماہ کے دوران مجموعی ٹیسٹوں کی تعداد 50 ہزار تک بھی نہیں پہنچی سکی ہے۔

   محکمہ صحت کی رپورٹس کے مطابق 28 جون تک ان کی تعداد 48194 تھی۔ جہاں ٹیسٹنگ کی تعداد میں کمی آئی ہے وہاں تصدیق شدہ کورونا کیسز کی تعداد میں بھی کمی واقع ہورہی ہے۔

   حکومت بلوچستان کے ترجمان لیاقت شاہوانی کے مطابق کورونا کے کیسز میں کمی لوگوں کی احتیاطی تدابیر کے رحجان میں اضافے کی وجہ سے آرہی ہے۔

   تاہم ایک سرکاری اعلامیہ کے مطابق محکمہ صحت بلوچستان نے عوامی مشکلات کا احساس کرتے ہوئے کوئٹہ شہر کے مزید آٹھ مقامات پر کورونا وائرس کے ٹیسٹ کے لیے سمپل لینے کی سہولت مہیا کر دی ہے۔

6. 29 جون 2020ڈیکسا میتھازون دوا کن مریضوں کو دی جائے گی؟

   ڈیکسا میتھازون دوا کن مریضوں کو اور کن حالات میں دی جائے گی ۔ اس بارے میں ہماری ساتھی عالیہ نازکی نے این ایچ ایس لندن سے وابستہ ماہر امراض تنفس ڈاکٹر سلیم انور سے بات کی ۔۔ انھوں نے کیا کہا ۔۔جانتے ہیں اس پوڈکاسٹ میں ۔۔

7. 29 جون 2020کورونا وائرس کے متعلق غلط تصورات کو ختم کیا جائے، میڈیا سیشن میں ڈاکٹروں کی ہدایت

   پنجاب کےڈائریکٹر جنرل ہیلتھ کی سربراہی میں کورونا وائرس کے ماہر ایڈوائزری ڈاکٹرز گروپس نے عیدالضحی کے حوالے سے پالیسی اور حفاظتی اقدامات کے حوالے سے میڈیا سیشن منعقد کیا۔

   میڈیا سیشن کے دوران مختلف سرکاری ہسپتالوں میں کام کرنے والے ڈاکٹروں نےعوام میں پھیلے وہموں کے خاتمے کے لیے درج ذیل ہدایات جاری کی ہیں:

   • گرم موسم سے وائرس کے خاتمے کا قطعی تعلق نہیں ہے البتہ 70 درجہ حرارت پر وائرس کے خاتمے کا امکان بڑھ جاتا ہے
   • ہمارا محتاط رویہ شرح اموات میں کمی کے لیے بہت اہم ہے
   • سنا مکی اور اس طرح کی جڑی بوٹیاں کورونا کے خاتمے کے لیے بالکل مفید نہیں ہیں بلکہ یہ بہت سے امراض جیسے بلڈ پریشر اور ڈایریا میں اضافے کا باعث بن رہی ہیں
   • کسی بھی طرح کے وٹامنز کا استعمال اس وائرس کے خاتمے کے لیے بالکل مفید نہیں ہے، وائرل بیماری میں ان کا استعمال نقصان دہ ہو سکتا ہے
   • متوازن خوراک ہر طرح کی بیماری بالخصوص کورونا کیلے بھی بہت مفید ہے۔ زیادہ سے زیادہ تازہ پھل اور سبزیاں استعمال کریں
   • ماسک کا درست استعمال بہت ضروری ہے ، خود بھی استعمال کریں اور دوسروں کو بھی تاکید کریں
   • این-95 ماسک کا استعمال صرف ڈاکٹرز اور پیرامیڈکس کے لیے ہے اس کا استعمال عام افراد نہ کریں
   • سماجی فاصلہ، احتیاطی تدابیر اور ماسک کا درست استعمال اس بیماری سے بچاؤ کے لیے بہت ضروری ہے
   • بیماری کے خاتمے کے لیے پلازمہ کی منتقلی، اینٹی بایئوٹیکس، وٹامن اور سٹیرایئڈز کا استعمال ابھی تحقیقات کے مرحلے میں ہے، اس کا ابھی کوئی حتمی علاج دریافت نہیں ہو سکا
   • عید الاضحی کے متعلق ایس او پی پر لازمی عمل کریں
   • مذہبی تہواروں پر اجتماع سے اجتناب کریں، احتیاطی تدابیر پر لازمی عمل کریں
   • عید پر گلے ملنے سے اجتناب کریں اور سماجی فاصلے پر عمل کریں
   • عید سے 15 دن پہلے مویشی منڈیاں لگائی جائیں گی، شہر اور گنجان علاقے میں منڈی لگانے کی اجازت نہیں ہے، ان میں داخلی اور خارجی راستے پر ماسک کا استعمال کیا جاے گا
   • ہر مویشی منڈی میں میڈیکل کیمپ لازم ہوگا، تمام ایس او پیز کی تشہیر ہر جگہ کی لوکل زبان میں کی جائیں گی اور داخلی راستوں پر ہر فرد کا ٹمپریچرچیک کیا جائے گا۔ ڈسٹرکٹ گورنمنٹ، ہیلتھ ڈیپارٹمنٹ اس میں مشترکہ ذمہ داریا ں ادا کریں گی
   • جانورں پر کورونا کا ٹیسٹ صرف تحقیقی طور پر کیا جا رہا ہے ابھی ان سے وائرس کے پھیلاؤ کے کوئی شواہد نہیں ہیں
   • زیادہ عمر کے افراد اور بچوں کی مویشی منڈی میں داخلے پر سخت پابندی ہو گی
   • ٹیسٹوں میں بظاہر کمی اس لیے محسوس ہو رہی ہے کیونکہ فلائیٹ کی ٹیسٹنگ نہیں کی جا رہی ہے
   • والڈسٹی میں کم مریضوں کے باوجود لاک ڈاون اس کے گنجان آباد ہونے کی وجہ سے کیا گیا
   • ہماری ٹیسٹنگ کی صلاحیت روزبروز بڑھ رہی ہے۔ 12000 ٹیسٹنگ کی صلاحیت ہے اور اس میں 1000 کا فوری اضافہ کیا جا رہا ہے
   • مویشی منڈیاں لگانے کے لیے محتاط فاصلہ طے کیا گیا ہے، شہر سے 5 کلو میٹردور مویشی منڈیاں لگائی جایئں گی اور ڈسٹرکٹ گورنمنٹ اس کا تعین کرے گی
   • کونٹیکٹ ٹریسنگ میں کورونا وائرس کی علامات والوں کا ٹیسٹ کیا جا رہا ہے، فلایئٹ لوڈ کی کمی کی وجہ سے اس میں بظاہر کمی آرہی ہے ،اس کے ساتھ ہم نے سمارٹ سامپلنگ، رینڈم سامپلنگ میں اضافہ کیا ہے
   • مارکیٹس اور دیگر گنجان آباد جگہ کی سیمپلنگ کی جا رہی ہے تاکہ وائرس سے مشتبہ افراد کی نشاندہی کی جا سکے
   • قربانی سے متعلق تمام ایس او پیز کو عید سے پہلے عوام کو بتا دیا جائے گا جن پر عمل درآمد کر کے اس وبا کے خاتمے میں مدد ملے گی

8. 29 جون 2020لاک ڈاؤن کی واپسی کے پیشِ نظر تیل کی قیمتیں دباؤ کی شکار

   دنیا کے کئی ممالک میں کورونا وائرس متاثرین کی تعداد میں اضافے سے جہاں لاک ڈاؤن کی واپسی کے خدشات پیدا ہوئے ہیں، وہیں ان کا اثر تیل کی عالمی قیمتوں پر بھی دیکھا جا رہا ہے۔

   خبر رساں ادارے روئٹرز کے مطابق پیر کو برینٹ خام تیل کی قیمت میں 84 سینٹ یا 2 فیصد تک کی کمی دیکھی گئی اور اسے 40.18 ڈالر فی بیرل پر دیکھا گیا۔ اسی طرح امریکی خام تیل کی قیمت میں 72 سینٹ کمی ہوئی اور اسے 37.77 ڈالر فی بیرل کی سطح پر دیکھا گیا۔

   جے بی سی اینرجی کے مطابق ’دونوں سودوں پر دباؤ لاک ڈاؤن کی واپسی کے امکانات کے پیشِ نظر دیکھا جا رہا ہے۔‘

   اتوار کو کورونا وائرس سے دنیا بھر میں ہلاکتوں کی تعداد پانچ لاکھ سے تجاوز کر گئی تھی۔

   تجزیہ کاروں کے مطابق تیل کی قیمتیں ریفائننگ کے مارجن میں کمی، ذخیرہ کرنے کی لاگت میں اضافے، اور امریکہ کی جانب سے پیداوار کی بحالی کی وجہ سے بھی دباؤ کی شکار ہیں۔

9. 29 جون 2020چمن احتجاج: پاکستان اور افغانستان کے درمیان مال بردار گاڑیوں کی آمدورفت چھٹے روز بھی معطل, محمد کاظم، بی بی سی اردو کوئٹہ

   بلوچستان کے سرحدی شہر چمن کے مقامی تاجروں اور مزدوروں کو روزانہ کی بنیاد پر کاروبار اور محنت مزدوری کے لیے افغانستان آمدورفت کی اجازت نہ ملنے کے خلاف احتجاج کے باعث پاکستان اور افغانستان کے درمیان گاڑیوں کی آمد و رفت پیر کو چھٹے روز بھی بند رہی۔

   کورونا کے باعث سرحد کی بندش کے نتیجے میں جو پابندیاں عائد کی گئی تھیں ان میں سے متعدد نرم کردی گئیں لیکن مقامی تاجروں اور محنت کشوں کی روزانہ آمد ورفت پر پابندی اب بھی برقرار ہے۔

   چمن کے تاجر رہنما صادق اچکزئی کے مطابق چمن میں لوگوں کے معاش اور روزگار کا انحصار سرحدی تجارت پر ہے جس پر پابندی نہ ہٹانے کے خلاف تاجر اور مزدور احتجاج پر ہیں۔

   اگرچہ اس حوالے سے احتجاج کا آغاز 25 روز قبل شروع ہوا تھا لیکن چھ روز قبل دونوں ممالک کے درمیان شاہراہ پر رکاوٹیں کھڑی کرکے اس کو بند کر دیا گیا تھا۔

   شاہراہ کی بندش سے دونوں مالک کے درمیان افغان ٹرانزٹ ٹریڈ، نیٹو سپلائی اور دو طرفہ تجارت کی گاڑیوں کی آمد و رفت معطل ہے۔

10. 29 جون 2020لیسٹر: لاک ڈاؤن میں دو ہفتوں تک توسیع کی جاسکتی ہے

    لیسٹر کے مئیر کا کہنا ہے کہ شہر میں پب اور ریستوران کورونا وائرس کے متاثرین میں اضافے کی وجہ سے مزید دو ہفتوں کے لیے بند رہ سکتے ہیں۔

    سر پیٹر سولسبی نے بی بی سی ریڈیو 4 کے پروگرام میں بتایا کہ حکومت نے حالیہ پابندیوں کو مزید پندرہ دن برقرار رکھنے کی سفارش کی ہے۔

    گذشتہ دو ہفتوں سے لے کر 23 جون تک شہر میں 866 متاثرین رپورٹ ہوئے ہیں۔ یہ وبائی مرض شروع ہونے کے بعد سے 2987 افراد میں سے 29 فیصد میں کورونا کی تصدیق ہوئی ہے۔

    اتوار کے روز ہوم سکریٹری پریتی پٹیل نے کہا تھا کہ شہر کو ممکنہ طور پر مقامی لاک ڈاؤن کا سامنا کرنا پڑ سکتا ہے۔

    محکمہ صحت اور سماجی نگہداشت کے ترجمان کا کہنا ہے کہ ’ہم پبلک ہیلتھ انگلینڈ کے ساتھ مل کر لیسٹر میں کونسل اور مقامی افراد کی مدد کے لیے کام کر رہے ہیں تاکہ وائرس کی مزید منتقلی کو روکنے میں مدد ملے۔‘

11. 29 جون 2020ڈیکسا میتھازون اور پلازمہ کا استعمال کب کرنا چاہیے؟

    دنیا بھر کی طرح پاکستان میں بھی کورونا وائرس کے علاج کے بارے میں جاننے کی تگ و دو جاری ہے۔جہاں ایک طرف ڈیکسامیتھازون دوا کو علاج کے لیے ایک اہم پیشرفت کا خطاب ملنے کے بعد وہ اب مارکٹ میں دستیاب نہیں ہے وہیں دوسری جانب پلازمہ ڈونیٹ کرنے کے بارے میں جیسے ہی اطلاع عام ہوئی تو لوگوں نے ایک لاکھ کی رقم کے عوض اپنے پلازمہ لوگوں میں بانٹے۔لیکن ماہرین نے متنبہ کیا ہے کہ یہ تمام طریقہ اور ادویات اس وقت انڈر ٹرائل ہیں۔ اور ان کو کورونا وائرس کا مکمل علاج سمجھنا غلط ہے۔

    اس بارے میں بی بی سی نے آغا خان یونیورسٹی ہسپتال کے شعبہ وبائی امراض کے سیکشن ہیڈ ڈاکٹر فیصل سے بات کی، انھوں نے اس تمام تر صورتحال کے بارے میں کہا دیکھیے اس ویڈیو میں

12. 29 جون 2020کرناٹک: متاثرین کو گھروں میں رکھنے کے لیے الیکٹرانک ٹیگ منگوانے کا فیصلہ

    انڈیا کی جنوبی ریاست کرناٹک میں ایسے افراد کے لیے الیکٹرانک ٹیگ منگوائے جا رہے ہیں جنھیں گھروں میں سخت قرنطینہ کی ہدایات ہیں۔

    مقامی میڈیا کے مطابق یہ فیصلہ دارالحکومت بنگلور میں ایک ہزار سے زیادہ نئے مریضوں اور سات اموات کے بعد کیا گیا ہے۔

    متاثرین کی تعداد میں حالیہ اضافے ریاست کے عہدیداروں کو تشویش میں مبتلا کردیا ہے جو مہاراشٹر اور تمل ناڈو کے مقابلے میں اب تک انفیکشن پھیلنے کی شرح کم رکھنے میں کامیاب رہے ہیں۔

    ایک سرکاری عہدیدار نے بنگلور مرر اخبار کو بتایا کہ گذشتہ ہفتے 13،000 افراد نے اپنے گھر پر قرنطینہ ہدایات کی خلاف ورزی کی تھی۔

    مبینہ طور پر عہدیدار ٹیگ تیار کرنے کے لیے کسی فرم سے بات کر رہے ہیں جو کلائی کے گرد پہنا جائے گا۔ اگر ٹیگ پہنے شخص نے پروٹوکول کی خلاف ورزی کی تو حکام کو مطلع کیا جائے گا۔

    کرناٹک میں اب تک 13،000 سے زیادہ متاثرین کی تصدیق ہوچکی ہے۔ انڈیا دنیا میں وائرس سے متاثرہ ممالک کی فہرست میں چبتھے نمبر پر ہے اور ملک میں 530،000 سے زیادہ متاثرین اور 16،475 اموات ہو چکی ہیں۔

13. 29 جون 2020بورس جانسن: کورونا وائرس برطانیہ کے لیے 'آفت' ہے، 'درست وقت' پر انکوائری کا عزم

    برطانیہ کے وزیرِ اعظم بورس جانسن نے کورونا وائرس کو ملک کے لیے 'آفت' قرار دیا ہے مگر اصرار کیا ہے کہ یہ مبینہ غلطیوں کی انکوائری کا درست وقت نہیں ہے۔

    ٹائمز ریڈیو سے بات کرتے ہوئے وزیرِ اعظم نے کہا کہ 'یہ ایک آفت ہے۔ ہمیں لگی لپٹی رکھے بغیر کہنا چاہیے۔ میرا مطلب ہے کہ یہ اس ملک کے لیے ایک برا خواب ہے اور ملک ایک بدترین صدمے سے گزرا ہے۔'

    بورس جانسن جنھوں نے خود بھی کووڈ 19 کے باعث انتہائی نگہداشت میں وقت گزارا تھا، نے کہا کہ حکومت پر تمام ہلاک شدگان اور متاثرہ افراد کی طرف سے یہ پتا چلانے کی ذمہ داری ہے کہ 'کب کیا غلط ہوا۔'

    'میں اس چیز کو سمجھتا ہوں اور ہم ایسا کریں گے۔ مجھے لگتا ہے کہ اس کے لیے یہ درست وقت نہیں ہے۔ مجھے نہیں لگتا کہ اس وقت اتنی بڑی تعداد میں سرکاری وقت اس پر صرف کرنے کا درست وقت ہے۔'

    'لیکن ہم مسلسل نئے سبق سیکھ رہے ہیں۔'

14. 29 جون 2020نئے متاثرین کی تعداد میں کمی، سری لنکا نے کرفیو اٹھا لیا

    سری لنکا نے ملک سے کرفیو مکمل طور پر اٹھا لیا ہے جسے مارچ میں نافذ کیا گیا تھا۔

    اپریل میں حکام نے اس کرفیو کو صرف رات کے وقت تک کے لیے محدود کر دیا تھا۔

    اتوار کو جب کرفیو ہٹایا گیا تو حکام کا کہنا تھا کہ وہ ملک میں کورونا وائرس کا پھیلاؤ روکنے میں کامیاب ہوچکے ہیں۔

    ملک میں متاثرین کی سب سے بڑی تعداد مئی کے اواخر میں سامنے آئی تھی جب ایک روز میں 150 افراد میں وائرس کی تصدیق ہوئی تھی۔

    تب سے اب تک نئے متاثرین کی تعداد میں تیزی سے کمی ہوئی ہے۔ سنیچر کو 19 لوگوں میں وائرس پایا گیا تھا۔

    سری لنکا میں اب تک 2000 سے زائد متاثرین سامنے آئے ہیں جبکہ یہاں 11 لوگوں کی موت ہوئی ہے۔

15. 29 جون 2020یورپی یونین: منگل تک کورونا سے ’محفوظ ممالک‘ کی فہرست تیار ہو جائے گی

    ہسپانوی وزیر خارجہ ارانچا گونزالاز لیا کا کہنا ہے کہ یورپی یونین ممالک میں سفر کے لیے کورونا وائرس سے محفوظ ممالک کی فہرست منگل تک تیار ہو جائے گی۔

    انھوں نے مقامی ریڈیو کڈینا ایس آر کو بتایا کہ بیشتر ممالک میں کورونا وائرس کے خاتمے کے بعد، یورپی یونین کے عہدیداروں نے 15 ممالک کی ایک فہرست تیار کی ہے جہاں سے آنے والے مسافروں کے لیے سرحدیں کھولنا محفوظ ہیں۔

16. 29 جون 2020روس میں دو مہینوں بعد کووڈ 19 انفیکشن کی کم ترین تعداد سامنے آئی

    روس میں پیر کو ناول کورونا وائرس کے 6719 نئے مریض رپورٹ ہوئے۔ 29 اپریل کے بعد یہ یومیہ متاثرین کی سب سے کم ایک روزہ اضافہ ہوا ،تعداد ہے۔

    ملک میں مجموعی طور پر 641،156 افراد کورونا وائرس سے متاثر ہیں۔

    نیشنل کورونا وائرس ٹاسک فورس نے بتایا کہ گذشتہ 24 گھنٹوں کے دوران 93 افراد ہلاک ہو گیے ، جس کے بعد سرکاری سطح پر اموات کی تعداد 9،166 ہوگئی ہے۔

    امریکہ اور برازیل کے بعد روس کورونا وائرس سے متاثرہ ممال ک میں تیسرے نمبر پر ہے۔

17. 29 جون 2020نیویارک: 15 مارچ کے بعد پہلی مرتبہ یومیہ اموات کی سب سے کم تعداد رپورٹ

    امریکہ میں ریاست نیویارک کورونا وائرس سے سب سے زیادہ متاثر ہوئی ہے۔ جان ہاپکنز یونیورسٹی کے اعداد و شمار کے مطابق نیویارک میں کووڈ 19 کے باعث 30،000 سے زیادہ اموات ہوئیں، جو کسی بھی دوسری ریاست سے دوگنی تعداد بنتی ہے۔

    لیکن مہنیوں بعد صورتحال بہتر ہو رہی ہے۔

    اتوار کے روز گورنر اینڈریو کوومو نے کہا کہ وائرس کا شکار صرف پانچ افراد کی ہلاکت ہوئی ہے، جو 15 مارچ کے بعد یومیہ اموات کی سب سے کم تعداد ہے۔

    انھوں نے کہا ’بھر کی ریاستیں دوبارہ کھلنے کے بعد وائرس کی نئی لہر سے نمٹنے کی جدوجہد کر رہی ہیں لیکن نیو یارک میں متاثرین کی تعداد مسلسل نیچے جارہی ہے۔‘

18. 29 جون 2020کورونا وائرس آپ کے جسم کے ساتھ کرتا کیا ہے؟

    کورونا وائرس گذشتہ برس دسمبر میں سامنے آیا لیکن اب کوویڈ-19 عالمی وبا کی شکل اختیار کر گیا ہے۔

    اس بیماری میں مبتلا ہونے والے زیادہ تر افراد میں اس بیماری کا اتنا اثر نہیں ہوتا اور وہ صحت یاب بھی ہو رہے ہیں، تاہم کچھ افراد اس کی وجہ سے ہلاک بھی ہو چکے ہیں۔

    تو سوال یہ ہے کہ یہ وائرس جسم پر کیسے اثر انداز ہوتا ہے، اس کے نتیجے میں کچھ افراد ہلاک کیوں ہو رہے ہیں اور اس بیماری کا علاج کیسے کیا جاتا ہے؟ اس بارے میں جاننے کے لیے مزید پڑھیے

19. 29 جون 2020کورونا وائرس کہاں پھیل رہا ہے اور کہاں کم ہو رہا ہے؟

20. 29 جون 2020آئرلینڈ میں شراب خانے، ریستوران اور حجاموں کی دکانیں کھل گئیں

    آئرلینڈ میں ریستوران، کیفے، ہیئر ڈریسر اورکھانا سرو کرنے والے شراب خانے اور بار پھر سے کھل رہے ہیں۔

    کووڈ 19 پر قابو پانے کے لیے لگائی گئی پابندیوں میں نرمی کی جا رہی ہے لیکن انھیں جگہوں پر معاشرتی دوری کے قواعد پر عمل کرنا لازم ہوگا۔

    یہ اقدام ملک کو چار مراحل میں دوبارہ کھولنے والے منصوبے کے فیز تین کا ایک حصہ ہے۔