Thierry Henry ya zaro ƙwallon farko. Real Madrid ce!
Wa za ta kara da su?
Labaran wasannin BBC Hausa
Wannan shafi na kawo muku labaran wasanni da kasuwar 'yan wasanni ta duniya daga nan BBC Hausa daga 24 zuwa 30 ga watan Agusta
Taƙaitattu
- Alvarez na shirin zuwa Arsenal, Man Utd na son Balde
- An ci tarar Messi bayan marin danwasa
- Man City ta amince da farashin Fernandez, Balde na son tafiya Man Utd
- Ferran Torres ya fara wasa a PSG da ƙafar dama
- Barcelona ta ce 'yansanda sun yi amfani da karfi kan magoya bayanta
- Rikicin Crystal Palace da Mateta na kara dagulewa
- Arbeloa da Alonso abokan juna da za su fafata a Premier
Rahoto kai-tsaye
Muhammad Buhari Fagge
Me yasa Real Madrid ba za ta iya wasa da Liverpool ba a Anfield?
Asalin hoton, Getty Images
Liverpool, Real Madrid, Inter Milan da Arsenal na cikin kungiyoyi 36 da za su shiga jadawalin zaɓen matakin lig na gasar Champions League ta kakar 2026-27 a ranar Alhamis.
Wadannan kungiyoyi hudu, wadanda duk sun taba kaiwa wasan karshe na Champions League sau da dama, suna cikin tukunya ta farko a jadawalin zaɓen.
Wannan na nufin suna cikin kungiyoyi tara da Uefa ta fi bai wa matsayi mafi girma da za su fafata a matakin lig na gasar bana.
Sai dai wata sabuwar doka da Uefa ta gabatar a wannan kakar za ta takaita yiwuwar wasu wasanni da za su iya shafar dukkan kungiyoyin hudu.
An fara amfani da tsarin matakin lig ne a kakar 2024-25, inda kowace kungiya ke buga wasanni takwas.
Wadannan wasannin sun kunshi abokan hamayya takwas daban-daban, inda biyu ke fitowa daga kowace tukunya cikin tukwane hudu. Kowace kungiya tana buga wasa daya a gida da kuma daya a waje da kungiyar daga kowace tukunya.
Amma daga wannan shekara, ba za a yarda wata kungiya ta karbi bakuncin kungiyar da ta taba karawa a gida a matakin lig a kowanne daga cikin kakar wasanni biyu da suka gabata ba.
Wasanni biyu kacal ne suka cika wannan sharadi kafin zaɓen na ranar Alhamis. Su ne Liverpool da Real Madrid, da kuma Inter Milan da Arsenal.
Tukunya ta huɗu
- Viking (Norway)
- Slovan Bratislava (Slovakia)
- Slavia Prague (Czech Republic)
- VfB Stuttgart (Germany)
- LASK (Austria)
- AEK Athens (Greece)
- Como (Italy)
- Lens (France)
- Sabah (Azerbaijan)
Tukunya ta uku
- Feyenoord (Netherlands)
- Lille (France)
- Bodo/Glimt (Norway)
- Napoli (Italy)
- RB Leipzig (Germany)
- Villarreal (Spain)
- Shakhtar Donetsk (Ukraine)
- Galatasaray (Turkey)
- Fenerbahce (Turkey)
Henry ya lashe kyautar shugaban Uefa ta shekara
Asalin hoton, Getty Images
Ana bayar da wannan kyauta a kowace shekara ga mutanen da suka bayar da gagarumar gudunmawa ga ƙwallon ƙafa.
Daga cikin waɗanda suka taba lashe ta a baya akwai Bobby Robson, Johan Cruyff, David Beckham da Didier Drogba.
Da yake sanar da wanda ya lashe kyautar ta wannan shekara, shugaban UEFA Aleksander Ceferin ya ce "Na zaɓi Thierry Henry."
Thierry Henry na nan a birnin Monaco domin karɓar wannan gagarumar karramawa.
Tsohon ɗan wasan na Arsenal da Faransa ana ɗaukarsa a matsayin ɗaya daga cikin fitattun 'yan wasa a tarihin ƙwallon ƙafa, bayan ya lashe manyan kofuna tare da ƙungiyoyi da ƙasar Faransa, kuma ya kasance ɗaya daga cikin mafiya tasiri a wasan ƙwallon ƙafa na zamani.
Ƙungiyoyin Premier biyar ne a cikin gasar
Arsenal, Aston Villa, Liverpool, Manchester City da Manchester United za su san abokan karawarsu a gasar Zakarun Turai ta Champions League a yau.
Akwai kungiyoyin Premier League biyar a cikin jadawalin zaɓen, tare da kungiyoyi biyar daga La Liga.
Hakan ya faru ne saboda duka lig-ligen biyu sun samu guraben European Performance Spots, waɗanda ake bai wa ƙasashe biyu da suka fi kowa kyakkyawan sakamako a haɗe a gasar Champions League, Europa League da Conference League.
Bayan kammala kakar wasa a matsayi na biyar a lig-ligensu, Liverpool da Real Betis su ne kungiyoyin biyu da suka amfana da waɗannan guraben.
Tukunya ta biyu
- Borussia Dortmund (Germany)
- Roma (Italy)
- Sporting (Portugal)
- Aston Villa (England)
- Porto (Portugal)
- Manchester United (England)
- Club Brugge (Belgium)
- Real Betis (Spain)
- PSV Eindhoven (Netherlands
Tukunyar Farko
- Paris St-Germain (France)
- Bayern Munich (Germany)
- Real Madrid (Spain)
- Liverpool (England)
- Inter Milan (Italy)
- Manchester City (England)
- Arsenal (England)
- Barcelona (Spain)
- Atletico Madrid (Spain)
Ya ya tsarin rukunin Champions Lig zai kasance?
Kungiyoyi 36 da suka samu gurbin shiga gasar an raba su zuwa tukwane hudu bisa ga matsayinsu a jadawalin ƙungiyoyi na Uefa.
Za a fara da tukunya ta farko, inda za a zaro kowace ƙungiya daban-daban. Daga nan kuma manhajar kwamfuta ta Uefa za ta zaɓa mata abokan hamayya takwas.
Paris St-Germain, Bayern Munich, Real Madrid, Liverpool, Inter Milan, Manchester City, Arsenal, Barcelona da Atletico Madrid duk suna cikin tukunya ta farko.
Kowace ƙungiya za ta buga wasanni takwas gaba ɗaya, ciki har da ƙungiyoyi biyu daga kowace tukunya, wasa ɗaya a gida da wasa ɗaya a waje.
Kungiyoyin Ingila ba za su iya karawa da wata ƙungiyar Ingila ba a wannan matakin na gasar.
Ba za a iya shirya wasa da ƙungiya daga ƙasa ɗaya ba, haka kuma ba za a buga fiye da wasanni biyu da ƙungiyoyi daga wata ƙasa guda ba.
Za a ci gaba da wannan tsarin har sai an tantance jadawalin wasannin dukkan ƙungiyoyi 36.
Ko PSG za ta iya ɗauka karo uku a jere?
Paris Saint-Germain ta ƙara jaddada girmanta a matsayin ɗaya daga cikin manyan ƙungiyoyin ƙwallon ƙafa mafiya girma a tarihin Turai bayan ta zama ƙungiya ta biyu kacal da ta ɗauki gasar UEFA Champions League a jere.
Bayan da ta doke Arsenal, PSG ta zama ƙungiya ta farko da ta yi nasarar kare kofinta tun bayan da Real Madrid ta lashe gasar sau uku a jere tsakanin shekarun 2016 zuwa 2018.
Haka kuma, ita ce ƙungiya ta biyu kawai da ta cimma wannan nasara tun bayan da aka fara tsarin Champions League a shekarar 1993.
A tarihin gasar wanda ya kai shekaru 71, PSG ta zama ƙungiya ta 10 kacal da ta lashe kofin nahiyar Turai sau biyu a jere.
Fili ya ɗauki harama
Asalin hoton, Getty Images
Kwanaki 89 kacal bayan da Paris Saint-Germain (PSG) ta doke Arsenal a bugun fenariti domin lashe kofin Champions League karo na biyu a jere, lokaci ya kusa yi da za a san jadawalin wasannin zangon farko na kakar 2026-27.
Masoya ƙwallon ƙafa a faɗin Turai suna ɗaukin jiran fitar da jadawalin, wanda zai bayyana waɗanne ƙungiyoyi za su kara da juna a sabon tsarin gasar Champions League.
PSG ta kare kambunta ne bayan fafatawa mai zafi da Arsenal a wasan ƙarshe, kuma yanzu hankula sun koma kan sabuwar kakar wasa, inda manyan ƙungiyoyin nahiyar za su sake fafatawa domin neman lashe gasar.
Da zarar an kammala fitar da jadawalin, ƙungiyoyi za su fara tsara yadda za su tunkari wasanninsu a zangon farko na gasar, wadda ake sa ran za ta sake kawo manyan wasanni masu kayatarwa a nahiyar Turai.
Shugaban Hukumar kwallon Ƙafa ta Najeriya Gusau ya yi murabus
Shugaban Hukumar Kwallon Ƙafa ta Najeriya Ibrahim Gusau ya yi murabus daga muƙamisa.
Gusau ya shaida haka ne a yau Alhamis a shedikwatar Hukumar Kwallon Kafa ta kasar a wani taron manema labarai.
An ta suka kan yadda tawagogin Najeriya na mata da maza suka gaza ƙoƙari a 'yan shekarun bayan nan, ciki har da gaza samun gurbi a gasar kofin duniya.
Rahotanni sun ce hukumomin Najeriya na bincike kan hukumar ta NFF game da yadda ta kashe wasu kuɗaɗe naira 17bn don biyan albashi da sauran hidimar ‘yan wasa.
A bangaren wasannin cikin gida kuma an yi zargin cewa alkalan wasa ba su samu kudadensu ba tun daga mako na 25 zuwa mako na 38, da dai sauran wasu korafe-korafe.
Aston Villa na dab da sayan Jackson daga Chelsea
Aston Villa na dab da cimma yarjejeniya da Chelsea domin daukar ɗan wasan gaba Nicolas Jackson a cinikin da zai kai darajar fam miliyan 65, wanda zai ba Villa damar sayar da Ollie Watkins.
Akwai fahimtar juna tsakanin kungiyoyin biyu kan sharuddan cinikin Jackson mai shekaru 25. Chelsea na daf da samun adadin kudin da take nema, inda za ta karbi fam miliyan 47.5 daga farko, tare da karin fam miliyan 17.5 ta hanyar wasu kari cikin sharuddan yarjejeniya.
Idan dan wasan na Senegal ya amince da sharuddan kwantiraginsa kuma ya kammala komawa Aston Villa, ana sa ran isowarsa za ta bude hanya ga dan wasan Ingila Ollie Watkins ya koma kungiyar Al-Hilal ta gasar Saudi Pro League.
A wata yarjejeniya da za ta kai kimanin fam miliyan 51, Watkins mai shekaru 30 zai bar Villa Park bayan ya koma kungiyar daga Brentford a shekarar 2020.
Tun bayan zuwansa Aston Villa, Watkins ya kafa tarihi a matsayin wanda ya fi kowa cin kwallaye a kungiyar a gasar Premier League, inda ya zura kwallaye 91 a gasar firimiyar, sannan 108 a dukkan gasa.
Asalin hoton, Getty Images
Ana samun ci gaba a cinikin Liverpool kan Barcola
Asalin hoton, Getty Images
Liverpool na tattaunawa mai zurfi da Paris Saint-Germain PSG domin kammala cinikin ɗan wasan gaba da suka sanya a gaba a jerin burinsu, Bradley Barcola.
Majiyoyi sun shaida wa BBC Sport cewa tattaunawar ta samu babban ci gaba a cikin sa'o'i 48 da suka gabata, kuma yanzu ɓangarorin biyu suna dab da cimma cikakkiyar yarjejeniya.
PSG ta yi wa Barcola farashin fam miliyan 140, amma ana sa ran jimillar kuɗin da Liverpool za ta biya za ta kasance ƙasa da wannan farashi.
Har yanzu akwai wasu ƙananan bayanai da ake kammalawa, amma ana sa ran yarjejeniyar za ta kai aƙalla fam miliyan 100, yayin da kuɗin zai iya ƙaruwa bisa wasu ƙarin sharuɗɗa da kari (add-ons) da aka tanada a cikin kwantiragin.
Caicedo zai iya buga wasan Brighton
Asalin hoton, Getty Images
Kocin Chelsea, Xabi Alonso, ya tabbatar da cewa Moises Caicedo da sabon dan wasa Marco Pallestra ba za su kasance cikin tawagar da za ta buga wasa na gaba ba, bayan dukkansu sun rasa wasan farko na Premier League da Fulham.
Da yake magana game da lafiyarsu, Alonso ya ce "Ba dukkansu ba ne za su kasance a shirye gobe. Za mu gani, muna fatan Moi (Caicedo) zai iya dawowa a karshen mako. Muna bukatar mu sake duba yanayin Marco sosai."
Kocin ya kuma bayyana cewa babu wani sabon rauni da kungiyar ta samu bayan nasarar da ta yi a Craven Cottage.
A gefe guda, Alonso ya kwantar wa magoya baya hankali game da Cole Palmer, wanda aka ga yana dingishi lokacin da aka maye gurbinsa a rabin na biyu na wasan.
Alonso ya ce Palmer yana cikin koshin lafiya kuma babu wata matsala mai tsanani game da lafiyarsa.
Wannan labari ne mai dadi ga Chelsea, musamman game da Palmer, yayin da kungiyar ke kokarin gina kyakkyawan farawa a karkashin sabon koci Xabi Alonso.
Har yanzu Barcelona ba ta yanke ƙauna ba kan Alvarez - Laporta
Asalin hoton, Getty Images
Shugaban Barcelona, Joan Laporta, ya yi magana kan yunkurin da kungiyar ke yi na daukar dan wasan gaba na Atletico Madrid da kuma tawagar Argentina, Julian Alvarez.
An dade ana rade-radin wannan ciniki tun farkon bazara, amma yayin da kwanaki kadan suka rage kafin rufe kasuwar musayar 'yan wasa, har yanzu babu wata alama ta cewa an kusa cimma matsaya.
Laporta ya ce "Gaskiyar magana ita ce muna da matukar sha'awar wannan dan wasan kuma muna son a amince da tayin da muka gabatar."
Ya kara da cewa "Muna fadin hakan ne cikin cikakken girmamawa ga Atletico Madrid, kuma muna son su sani cewa idan suna da niyyar sayar da shi a wannan kasuwar musayar 'yan wasa ta bazara, a shirye muke mu sayi dan wasan bisa ga tayin da muka mika musu."
Wane zaɓi ne ke gaban Aston Villa?
Asalin hoton, Getty Images
Aston Villa na ci gaba da neman sabon dan wasan gaba da zai maye gurbin Ollie Watkins, wanda ake sa ran zai bar kungiyar, bayan sabbin rahotanni sun nuna cewa kungiyar tana kallon zabuka biyu.
Rahoton The Athletic ya bayyana cewa tayin da Aston Villa ta miƙa wa Crystal Palace domin sayen Jean-Philippe Mateta bai kai kimar da Palace ke bukata ba. Dan wasan mai shekara 29 na cikin jerin ‘yan wasan da Villa ke so, amma akwai babban gibi tsakanin kudin da Villa ke son biya da kuma abin da Palace ke nema.
A lokaci guda kuma, Foot Mercato ta ruwaito cewa Villa na dab da kammala yarjejeniya ta euro miliyan 70 domin sayen dan wasan gaba na Chelsea da Senegal, Nicolas Jackson.
Wannan na nuna cewa Villa na hanzarta neman sabon dan wasan gaba kafin rufe kasuwar saye da sayarwa, musamman idan Ollie Watkins ya kammala sauya sheka zuwa wata kungiya.
Zabukan Aston Villa a gaba Jean-Philippe Mateta na Crystal Palace,Tattaunawa na ci gaba, amma har yanzu akwai bambanci kan farashin dan wasan.
Nicolas Jackson na Chelsea, Rahotanni na nuna cewa yarjejeniya na kusa da kammaluwa kan kusan £59.8m.
Idan Villa ta samu Nicolas Jackson, zai kasance daya daga cikin manyan sayen da kungiyar ta yi a wannan bazarar, tare da burin cike gibin da ka iya samuwa idan Watkins ya tafi.
A yanzu dai, alamu na nuna cewa Nicolas Jackson ya fi kusa da komawa Aston Villa fiye da Jean-Philippe Mateta, duk da cewa kungiyar na ci gaba da nazarin dukkan zabukan da ke gabanta.
Bawka ya koma Lille daga Forest a matsayin aro
Asalin hoton, Getty Images
Dan wasan gefe na Nottingham Forest, Dilane Bakwa, ya koma kungiyar Lille ta Faransa a matsayin aro na kakar wasa guda.
Bakwa, wanda ya cika shekara 24 a yau, ya koma Nottingham Forest ne daga Strasbourg a bazarar da ta gabata kan kudin da ya kai fam miliyan 30.
Sai dai dan wasan na Faransa ya kasa samun damar taka leda akai-akai a City Ground. A kakar da ta gabata ya fara wasa sau shida kacal a Premier League, yayin da Forest ta yi fama da sauyin koci hudu kafin daga bisani ta kammala kakar a matsayi na 16 a teburin gasar.
A jimlace, Bakwa ya buga wasanni 24 a dukkan gasa, amma bai samu nasarar zura kwallo ko daya ba, lamarin da ya sa kungiyar ta amince da barinsa aro domin samun karin damar buga wasa.
Yanzu zai koma Lille, wadda ta kammala kakar Ligue 1 da ta gabata a matsayi na uku, abin da ya ba ta gurbin shiga gasar Champions League ta bana.
Ana sa ran komawar Bakwa zuwa Faransa za ta ba shi damar farfado da aikinsa, musamman ganin ya taba nuna bajinta a Ligue 1 lokacin da yake Strasbourg kafin komawarsa Premier League. Lille kuma na fatan saurin gudunsa da kwarewarsa a bangaren hari za su taimaka mata a gasar cikin gida da kuma Champions League.
Chelsea na duba yiwuwar ɗaukar Martinez
Asalin hoton, Getty Images
Chelsea ta fara tuntubar wakilan golan Aston Villa Emiliano Martinez yayin da kungiyar ke duba yiwuwar kawo sabon mai tsaron gida kafin rufe kasuwar saye da sayar da 'yan wasa.
Rahotanni sun nuna cewa Chelsea na nazarin zabukan da take da su a bangaren masu tsaron raga, kuma dan wasan kasar Argentina Emi Martinez yana cikin jerin 'yan wasan da take sa ido a kansu.
Makomar Martinez a Aston Villa na cikin rashin tabbas bayan yunkurin komawarsa Juventus ya rushe a farkon wannan bazarar. Haka kuma Villa ta kammala sayen golan Japan Zion Suzuki daga Parma, lamarin da ya kara haifar da tambayoyi kan matsayin Martinez a kungiyar.
A wasan da Aston Villa ta sha kashi 4-0 a hannun Brighton ranar Lahadi, sabon golan Zion Suzuki bai buga wasan ba yana canji, yayin da Marco Bizot ya fara wasa a matsayin golan farko.
Chelsea na ci gaba da tantance halin da masu tsaron gidanta suke ciki, musamman bayan kura-kuran da aka samu daga bangaren golan a lokuta daban-daban. Saboda haka, yiwuwar daukar Martinez, wanda ya lashe Kofin Duniya tare da Argentina a 2022, na iya zama wata hanya ta kara kwarewa da gogewa a kungiyar.
Martinez mai shekaru 33 ya kasance daya daga cikin fitattun masu tsaron gida a Premier League tun bayan komawarsa Aston Villa daga Arsenal, inda ya taimaka wa Villa ta samu gagarumar nasara a shekarun baya-bayan nan, ciki har da shiga gasar zakarun Turai.
Rayan ba na sayarwa ba ne
Asalin hoton, Getty Images
Nick ya tambaya: Me ya sa Liverpool ba ta mai da hankali kan matashin dan wasan gefe na dama kamar Rayan ba, maimakon neman Bradley Barcola wanda ya fi taka leda a bangaren hagu?
Amsar ita ce, Rayan ba ya waɗanda za a sayar a wannan lokaci. Dan wasan ya koma Bournemouth ne kawai a watan Janairu, kuma babu wata alama da ke nuna cewa shi ko Bournemouth za su amince da sauya sheka bayan dan kankanin lokaci.
Duk da cewa Liverpool ta san tun watan Mayu cewa Mohamed Salah zai bar kungiyar, samun wanda zai maye gurbinsa ba abu ne mai sauki ba. Kasuwar 'yan wasan gefe masu inganci a matakin koli ba ta da yalwa sosai a yanzu, kuma kungiyoyin da ke da irin wadannan 'yan wasa ba sa son sayar da su cikin sauki.
Wannan ne ya sa Liverpool ta karkata ga Bradley Barcola, duk da cewa ya fi taka leda a bangaren hagu. Kocin Liverpool, Andoni Iraola, na iya ganin Barcola a matsayin dan wasan da zai iya taka rawar gani a bangarori daban-daban na harin kungiyar.
Daga hangen nesa na magoya baya, ana iya cewa Liverpool ta yi jinkiri wajen magance gibin da Salah zai bari. Amma daga bangaren kulob din, babban kalubalen shi ne samun dan wasan da yake da inganci, mai yiwuwa a saya, kuma wanda ba zai zo da farashi mai tsanani fiye da kima ba.
A takaice, rashin samuwar Rayan a kasuwa da karancin fitattun 'yan wasan gefe masu iya canja kulob cikin sauki su ne manyan dalilan da suka sa Liverpool ta ci gaba da bibiyar Barcola duk da cewa kungiyar tana bukatar karin karfi a bangaren dama.