Police arrest boy wey allegedly murder 15-year-old Ghanaian for America

Police for New York say dem don arrest 17-year-old suspect in connection wit di killing of Ghanaian teenager Javits Frimpong for Bronx, US last month.

Di suspect, wey dem neva name becos say e be minor, dey face charges of murder, manslaughter and two counts of criminal possession of weapon.

E dey expected to dey arraigned on Thursday.

Dem shoot 15-year-old Javits Frimpong, dead while e dey on im way to school for 29 October, 2026.

Police don dey search for three suspects in connection wit di murder.

Surveillance images appear to show di teenager running for im life while dem dey chase am, one of di assailants wear an all-black outfit and a mask.

Im father, Thomas Frimpong, say principal of im school bin tell am say im son dey bullied, wey lead to the suspension of two pupils.

E dey unclear weda di bully dey linked to im death.

Im mother, Doris Adu Gyamfi, tell di BBC say she dey demand justice for di killing of her only son.

Im father also say for press conference: "All I want to say na say I want justice for my son."

Ghana govment don condemn di killing and demanded justice as call don dey come for stricter gun control legislation in di United States.

Frimpong wan become doctor and, according to im sister, also want to serve in di military.

Im funeral dey scheduled for 20 November in di US.

"Earlier dis morning, NYPD detectives arrest a 17-year-old male for di murder of 15-year-old Javits Frimpong on October 29, 2026 in di Bronx. E go dey charged wit murder," New York police say.

'Dem bully my son' - Javits Frimpong papa

Di papa of Ghanaian teenager Javits Frimpong don describe how dem bully im son bifor dem kpai am for di Bronx borough of New York City, United States.

Dem shoot and kpai Thomas Frimpong 15-year-old son wen e bin dey go school on Thursday, 29 October.

Police officers bin rush am to St Barnabas Hospital, wia e later kpai from im injuries.

Authorities dey search for three teenage suspects, wey dem believe to be between 16 and 18 years old, wey reportedly run comot from di scene wearing black clothing and blue surgical masks.

Police neva announce any arrest, while di motive for di shooting remain under investigation.

Di victim papa, Thomas Frimpong, believe say bullying wey im son allegedly experience for school fit dey connected to di killing.

"E no easy, e no easy. I dey here wit im. E just reach one year wey e come from Africa. Na yesterday e reach one year for here. E no dey tok, e dey quiet, e no dey tok, e dey always dey on im phone," Thomas tok.

"Di principal tell me say two guys dey disturb my son and say e don suspend dem. E say my son dey innocent and e dey school."

Thomas say im son tell am say anytime wey im dey go for lunch, one of di boys dey always dey bully am.

Ghana react to killing of Javits Frimpong

Di killing don leave residents of di neighbourhood shocked, and some dey raise concerns about violence wey involve young pipo and call for more programmes to keep teenagers engaged in positive activities.

Meanwhile, di govment of Ghana don express condolences to di family of di young boy.

Ghana Foreign Affairs Minister, Sam Okudzeto Ablakwa, disclose dis inside one statement, wia e tok say e don tok to di victim papa to convey di condolences of di Ghanaian govment and pipo.

E say officials of Ghana Permanent Mission for New York don visit di bereaved family and dey coordinate wit local authorities.

According to Ablakwa, di Foreign Ministry go work tirelessly wit US authorities to ensure justice for di deceased.

"Di family of Javits and im loved ones remain in our thoughts and prayers," di minister tok.

Ghana govment urge relevant authorities for di Bronx, New York, to conduct thorough investigation and ensure say dose wey dey responsible face justice.

Gun violence remain major public safety and public health challenge for di United States, as tens of thousands of pipo dey die from firearm-related injuries evri year.

Di widespread availability of guns, differences in state firearm regulations and disagreements ova gun ownership don continue to shape di debate about how to address di problem.

Di US Constitution Second Amendment protect di right to keep and bear arms - pipo wey oppose stricter gun control dey cite dis provision well-well.

However, advocates of tighter regulations argue say stronger background checks, safe-storage requirements and restrictions on access to firearms fit help prevent deaths.