Ukraine's president, Zelensky say Russian shelling dey affect evacuation for Mariupol

Live Coverage

1. 3 March 2022'We no get any wia to run and we no wan run'

   Andrew Licholit, wey dey from Kharkiv, don join di city militia and e say e dey "help di regular arm and police to defend di borders of di city".

   E bin join last week afta di invasion, afta e bin serve for 2015 and 2018 for di Donbas kasala.

   E say dem dey control di situation but Russia dey commit military crimes.

   "Dem dey commit air assaults for places for our city wey no get any military targets dia".

   E say di Russians dey use pipo for di city to mark targets wey dem dey strike and di militia dey try find dis pipo and if possible catch dem.

   "Right now, I know say we dey fight big and powerful army. But dis na our home, and we no get anywia to go. We no get wia to run, And honestly, we no wan run," na wetin Andrew tok.

2. 3 March 2022'No provoke Russian soldiers' - new rules for Kherson locals

   Wit di key southern port city of Kherson now under Russian control, one resident tells us say new rules don dey implemented for di city.

   Nina (di BBC don decide not to use her full name) say: "Now for di city tins dey quiet. Yesterday e quiet also. Before, fights and explosions dey.

   "Yesterday nobody go out from dia house sake of say e dey too dangerous but today pipo dey going out, to try buy some food."

   But she say dem still dey hear fight for di outskirt of di city.

   "We get some rules to follow. Dey agree wit our goment say make we no provoke di Russian soldiers.

   "We no fit dey as groups, we no fit drive cars fast. We must dey ready to stop and show wetin we get for our car and no provoke anyone."

   Residents now get water, electricity and di internet, and we dey hear say medical supplies fit dey expected, she add.

   "I just hope say e no go take too much time and say we we go dey OK.

   "All ordinary pipo dey against all di war, against fighting, but we no fit do nothing."

3. 3 March 2022Putin tell Macron say Russia go achieve im am to 'demilitarise' Ukraine

   Russian President Vladimir Putin don tell im French counterpart Emmanuel Macron say di goals of Russia's operation for Ukraine - im demilitarisation and neutral status - go dey achieved, di Kremlin don tok.

   Di pair share one 90 minute call earlier on Thursday.

   Putin tok say any attempts by Kyiv to delay negotiations go result in Moscow adding to im list of demands.

4. 3 March 2022RT television wey Russia dey support criticise UK for broadcast ban

   Russian goment supported television channel RT don criticise British goment afta e disappear from all platforms for UK sake of EU sanctions.

   Although UK no follow for EU, di bloc target satellite companies for Luxembourg and France wey dey provide di RT feed give Sky, Freesat and Freeview.

   RT deputy editor-in-chief, Anna Belkina tell tori pipo Reuters say “e don tey wey” di Russian channel "stop to expect any legitimacy or reason for Britain attempts to restrict media freedoms".

   She add say: "Now e be like say e don forget Brexit and e dey try to force influence over di rest of Europe too."

5. 3 March 2022Hungary fit host peace tok, Prime Minister Orban tell BBC

   Hungarian Prime Minister Viktor Orban tok again say im kontri dey willing to host peace tok between Russia and Ukraine.

   For wetin e follow BBC tok for di Hungary-Ukraine border, Orban say di responsibility to end di war lie, above all, on di Russia side.

   For di past,Orban don enjoy close relation wit President Putin, wit 11 meetings for di past 12 years, di most recent be one month ago for Moscow.

   At di same time, im goment bin don get by force relations wit Ukraine, sake of one language law wey di government say dey discriminate against di large Hungarian minority for Ukraine.

   Dis morning, as e visit one refugee reception centre for Beregsurany for di Hungary-Ukranian border, I ask am wetin be im message to President Zelenszky of Ukraine and President Putin of Russia.

   "I no any message to anybody. I get message only to those refugees wey dey here," Orban bin reply.

   "Hungary be good friend of Ukraine and Ukrainian pipo, if dem need any help here, dem fit can count on us. I no think say di leaders need any message and advice from my side. Dey be big guys and dey sabi pass me for wetin dem suppose do. Wetin di Hungarian wish be, no be advice, no be message. Just wish from my heart. Peace, please, peace."

   Di Hungarian goment don offer Budapest as venue for future peace tok between Russia and Ukraine, as one alternative to one kind low-level tok wey don already happun for Belarus capital, Minsk.

   "Di war can fit dey stopped only by negotiation, and peace tok and one ceasefire," Orban tok.

6. 3 March 2022Batch of stranded Nigerians for Ukraine don begin board plane from Poland

   Di first batch of stranded Nigerians from Poland don begin enta plane Air Peace Air bus A230 for Warsaw Chopin Airport as dem prepare to take off to Nigeria

   Di chartered flight wey fit cari close to 180 pipo leave Nigeria around 2 am on Wednesday and land Poland for 9: am local time.

   Dia evacuation dey happun hours afta Nigerian presido, Muhammadu Buhari

   approve $8.5 million for di immediate evacuation of at least 5,000 Nigerians from Ukraine.

   Zubairu Dada, minister of state for foreign affairs,say dem don contract Air Peace and Max Air airlines to provide three aircraft to facilitate di evacuation of Nigerians.

   But Air Peaceoga, Allen Onyema say dem suffer small delay to go evacuate Nigerians sake of delay for proper documentation and flight clearance.

7. 3 March 2022Another night for underground as Kyiv dey bombarded

   Kyiv residents of all age, adults and children again go underground last night as di capital city continue to be target.

   Some, as e dey for picture here, bin go down to di metro stations wey bin dey used as bomb shelters. As many as 15,000 pipo dey shelter for di stations, di city mayor don estimate.

   Some bin manage to sleep while odas try to dey entertain young children.

   Witnesses bin hear four major explosions overnight and capture am on video, although e no dey clear wetin di targets be or if casualties dey.

   BBC correspondents don tok say di blasts fit dey heard from two storeys underground for dia bunker.

8. 3 March 2022Ukraine Russia War - See who dey support Moscow vs who support Kiev

9. 3 March 2022First seven days of Russia war on Ukraine - Summary

10. 3 March 2022Russian Foreign Minister say 'Third World War fit be nuclear'

11. 3 March 2022How African kontris vote on UN resolution against Ukraine invasion

    17 African kontris abstain from di vote at di UN General Assembly to condemn Russian invasion of Ukraine.

    UN General Assembly vote in favour of one resolution wey condemn Russia invasion and ask make Russia immediately pull all dia forces comot from Ukraine.

    Five kontries vote against condemning Russia invasion for di emergency.

    UN General Assembly for New York. Di UNHCR dey beg for nearly $2bn (£1.5bn) for relief operation as refugees hit one million.

12. 3 March 2022Zelensky: Another virus don attack us

    And dis na more from Ukrainian President Zelensky latest video update.

    Im refer directly to Vladimir Putin, tell di Russian president to: "Go home. To your home."

    Im say Putin should defend di Russian-speaking pipo - not around di whole world - "but in your home".

    "E get quite a few of dem there too. About 150 million."

    Dis appears to be one reference to Moscow claim say dia action na in defence of Russian-speaking pipo for parts of Ukraine.

    Zelensky also liken Russia invasion to one virus, say e don be two years since Ukraine record im first Covid case: "E don reach one week now wey another virus attack."

13. 3 March 2022Get ready to pay for di wrong una do, Zelensky tell Russians

    And another line from di Ukrainian president:

    Afta days of shelling for Ukraine cities, Zelensky vow say dem go rebuild di kontri and im say Russia go learn about "reparations".

    "Even if you destroy all our Ukrainian cathedrals and churches, you no go destroy our faith, our sincere belief in Ukraine and God, belief in pipo," im tok.

    "We go rebuild every single house, every single street, every single city."

    "And we dey tell Russia - learn di words 'reparations' and 'contributions'. You go pay back fully to us for wetin you don do against our state, against our every single Ukrainian."

14. 3 March 2022Who dey Putin inner circle wey dey help am run di war?

15. 3 March 2022Breaking, Russian Foreign Minister say 'Third World War fit be nuclear'

    Russian Foreign Minister Sergei Lavrov dey give news conference in Moscow.

    Lavrov say US President Joe Biden don tok say di only alternative to sanctions go be a third world war.

    And e go on to say a third world war could only be "nuclear war".

    Di Foreign Minister say e dey only inside di heads of Western politicians - and e no dey inside di heads of the Russian people.

    "If real war is waged against us then those wey make such plans gatz think about and [and] in my opinion such plans dey being made," e tok.

    We go bring una more updates from Lavrov's conference soon.

    Lavrov compare US to Hitler for 'dominating Europe'

    He repeat di Russian claim say Ukrainian goment be a neo-Nazi goment.

    And e say gangs loot towns and cities, including for Mariupol.

    BBC never see evidence to support dis claims dem.

    Lavrov also tok say Ukrainians dey "now try to use civilians as human shields".

    He again and again refer to Hollywood and say make pipo no "just look at dis Hollywood movie" wey di Western media "wia ultimate evil boku" dey make.

    Di Russian foreign minister also say Nato dey try to bolster di West security at di cost of Russia.

    He dey compare di US to Napoleon and Hitler, saying "back in di days, Napoleon and Hitler bin get a goal to dominate and control Europe - now Americans dey do so".

    He says di cancelling of the Nordstream 2 gas pipeline" shows di place" of di EU, suggesting say US dey behind di decision.

16. 3 March 2022Ukraine-Russia war - Timeline of five major invasions around di world

17. 3 March 2022Air Peace don deploy aircraft to evacuate stranded Nigerians for Ukraine

    Air Peace confam dem don deploy dia aircraft to evacuate Nigerians wey dey stranded for Europe as a result of di invasion of Ukraine by Russia.

    Dis na di first batch of Nigerians dem go evacuate since di war start eight days ago.

    Di aircraft depart Nigeria at 2:20am today, Thursday, March 3, 2022, for Warsaw, Poland.

18. 3 March 2022Ukraine-Russia War - Wetin be di nuclear risks?

19. 3 March 2022Breaking, Russia and Belarus don dey banned from 2022 Paralympics

    Di International Paralympic Committee [IPC] say dem no go allow athletes from Russia and Belarus for di 2022 Winter Paralympics for Beijing.

    Pipo bin criticise di International Paralympics Committee after dem first allow di athletes to compete as neutrals.

    One statement on Thursday tok say diem no fit defend di “situation for di athlete villages”

    IPC president Andrew Parsons say di athletes wey dey affected na victims of dia govment actions.

    Di Winter Paralympics go begin on Saturday, and di opening ceremony go take place on Friday.

    "We be very firm believers say sport and politics no suppose mix," Parsons tok.

    "However, di war don come to dis Games and behind di scenes many govment dey get influence ontop our cherished event.

    "E dey important to ensure safety and security of athlete, and di situation in di athlete villages dey escalate and e dey untenable.”

    Russia suppose get 71 competitors and Belarus suppose get 12 – plus guides for di two kontris for di competition for Beijing.

    Parsons tok say "overwhelming number of members" don tok to di IPC and say dem no go compete in di game if dem allow Russia and Belarus compete.

    Im tok say dia decision to stop di athletes go “preserve di integrity” of di games and di safety of all participants.

20. 3 March 2022Wetin be di latest for Ukraine?

    If you just dey joining us, dis na update of wetin we sabi on day eight of Russia invasion of Ukraine:

    • For Kyiv, witnesses don capture four major explosions in di past few hours on video, but e no dey clear wetin be di targets and if casualties dey

    • •BBC correspondents say dem fit hear di blasts from two storeys underground for dia bunker

    • One US defence official say one massive convoy of Russian military vehicles close to Kyiv don "hook" sake of fuel and food shortages

    • Russian forces don seize control of di key southern port city of Kherson, according to local officials. Dis na di first major Ukrainian city wey dem go take since di invasion start

    • Dem don also bombard di kontri second largest city, Kharkhiv wit shells.

    • For di southern port city of Mariupol, fear be say hundreds of pipo don die afta hours of sustained shelling, di city deputy mayor says. Ukraine military claim di city remain in Ukrainian hand

    • Ukrainian President Volodymyr Zelensky release one late-night video, dey praise di courage of citizens wey dey defend dia kontri

    • More than one million pipo don run from Ukraine since di start of di invasion, di UN tok, and di number dey rise rapidly

    • The International Criminal Court for The Hague don launch one investigation into possible war crimes for Ukraine

    • For di first time, Russia admit say dem dey take heavy military casualties during im attack on Ukraine, wit 498 troops killed and 1,597 injure