Ukraine's president, Zelensky say Russian shelling dey affect evacuation for Mariupol

Live Coverage

1. 9 March 2022Evacuations from at least one city bin stop - reports

   As we bin dey report, Ukraine and Russia don agree to hold 12-hour ceasefire for six cities for Ukraine today to allow civilians escape some of di heaviest fighting.

   But we dey hear say no be all di planned evacuations of civilians dey happun.

   For Izyum, eastern Kharkiv, one regional official dey claim say di evacuation of civilians dey "prevented by Russian shelling".

   Oleh Synehubov say di explosions for suburbs mean say di evacuation convoys no fit leave.

   For Mariupol, for south-east, di situation no too clear.

   Ukraine foreign minister write on Twitter say Russia continue to block evacuation attempts and di delivery of humanitarian aid.

   BBC no fit verify di situation for ground.

   For Sumy, north east Ukraine, di picture dey quite different.

   Pipo don fit leave di city for private cars and on bus since this morning, di city mayor tok.

   And for Enerhodar, southern Ukraine, convoys of mainly women and children don begin leave, im mayor tok.

2. 9 March 2022Court don adjourn Hanifa murder case to 22nd of March, Prosecution go present dia final witnesses on March 22

   

   Wia dis foto come from, Other

   Court don adjourn Hanifa murder case to 22nd of March.Justice Usman Na’abba of Kano High Court on Wednesday adjourn di case before am of di murder of di five-year-old student Hanifa Abubakar to 22nd of March 2022 for further hearing.

   On dat day, di prosecution team led by attorney general of Kano state Barrister Musa Lawal go present dia final two witnesses before di court (already dem don present seven for di case).

   Dem present shovel wey second defendant Hashim Isyaku allegedly use dig hole wey dem bury di remains of Hanifa although im lawyer argue say as a labourer and bricklayer wey im client be e, no dey out of place to find shovel under im bed.

3. 9 March 2022Court nack popular Ponzi Scheme operator Umanah Umanah with 20 years imprisonment

   

   Wia dis foto come from, EFCC

   Di Uyo Zonal Command of di Economic and Financial Crimes Commission, EFCC, don secure di conviction and sentencing of one notorious Ponzi scheme operator, Umanah Umanah to 20 years imprisonment before Justice Agatha Okeke of di Federal High Court Uyo, Akwa Ibom State on 8 March 2022.

   Na 2020 di case start wen operatives of EFCC arrest Umanah following petition by one of im victims, wey allege say Umanah dupe am of over N2.9million (two million, nine hundred Thousand Naira) and give am N500, 000. 00 (Five hundred thousand naira) cheque, wey bounce as di bank dishonor am because di account no dey funded.

   During investigation, EFCC discover say Umanah lure im victims through big-big promises of return on investment of up to 50% in seven days through im company, No Burn Global Limited, wey get network for several States of di federation. Di court find am guilty on di two count charge bordering on false issuance of dud cheque and obtaining by false pretense to di turn of N2.9 million naira.

   Read more hia.

4. 9 March 2022Ukraine First Lady tok about di war horrors and call for no-fly zone

   

   Wia dis foto come from, Ukraine President

   Ukraine First Lady Olena Zelenska don release her first public statement inside letter wey she address to di global community.

   Inside am, she tok about di horrors of war, particularly for women and pikin dem. She also name some pikin wey don die for di war so far:

   • “Eight-year-old Alice wey die on di streets of Okhtyrka while her grandfather dey try to to protect her.
   • “Polina from Kyiv, wey die inside di shelling with her parents.
   • “14-year-old Arseniy wey dey hit on di head by tins wey destroy for di attack, and dem bin no fit save am because ambulance no reach am on time because of intense fires.

   “Wen Russia say dem no dey 'wage war against civilians,' I call out di names of di murdered children first,” she write.

   She than di support of di international community, and neighbouring nations wey don take in refugees. But she also repeat di calls of her husband, President Zelensky, for Western nations to declare a no-fly zone. Nato no wan dis action because e go involve Western forces to likely engage dia military against Russian aircraft.

   “We need those in power to close di sky. Close di sky and we go manage di war on di ground ourselves."

   “With dis letter, I testify and tell di world: di war for Ukraine no be war 'somewhere out there'. Dis na war inside Europe, close to di EU borders."

   “If we no stop Putin, who dey threaten to start a nuclear war, dia no go be safe place for di world for any of us.”

5. 9 March 2022Court confam as exhibits statements wey suspects for Hannifa murder give police

   

   Wia dis foto come from, Other

   Court on Wednesday for Kano rule say statements wey prime suspect Abdulmalik Tanko and two odas give police on di murder of five-year-old Hanifa Abubakar dey valid and admissible for court.

   For di trial within trial wey hold for court, defence counsel Mukhtar Usman bin wan make Justice Usman Na’abba dismiss di statements wey di suspects give police adding say dem give am under duress.

   For im ruling, Justice Na’abba say di suspects no prove say police beat or threaten dem and infact di third defendant Fatima Musa use her own mouth tok say dem no beat her.

   Normal trial go continue as di prosecution team go continue to present witlessness to prove dia case.

   

6. 9 March 2022Ghana Police name rogue officers wey dey behind bullion van robberies

   

   Wia dis foto come from, Ghana Police Service

   Police for Ghana say dem kill two police officers who be suspects inside de series of bullion van robberies wey hit de country.

   Dem shoot de two police officers for dia Borteyman hideout near Ashaiman on Tuesday.

   Inside statement wey public affairs director, DCOP Kwesi Ofori release, he explain say exchange of gunshots happen during de raid, wey two policemen, No.58284 Constable Reindolph Gyimah Ansah den No. 53549 Lance Corporal Stephen Kwaku Nyame wey dem arrest earlier in connection with de Bullion Van Robberies chop bullet den die.

   More on de story dey here.

7. 9 March 2022800,000 pikin dem dey among two million wey dey run from Ukraine: Save the Children

   

   Wia dis foto come from, Slovak Interior Ministry

   Save The Children say an estimated number of 800,000 pikin dem dey among di two million pipo wey don run comot Ukraine afta Russia invasion begin.

   Many of dem dey make di trip on dia own di agency don warn.

   “Parents dey take di most desperate, heart-breaking measures to protect dia pikin. Dis one include to dey send dia pikin away with neighbours and friends, to seek safety outside of Ukraine, while dem stay home to protect dia homes,” na so Irina Saghoyan from di NGO tok.

   Report come yesterday of one of such case– one 11-year-old boy, Hassan, wey leave im home for Zaporizhzhia on im own because im mama no fit leave im grandmother,

   He arrive safely for Slovakia, afta one 1,200km train journey, e carry just two small bags, im passport, and im relatives phone number wey im write for im hand.

   

   Wia dis foto come from, Slovak Interior Ministry

   More dan half of di refugees wey dey leave Ukraine dey go Poland, and den Hungary and Slovakia.

8. 9 March 2022Wetin dey happun for Ukraine?

   

   Wia dis foto come from, reuters

   Na Day 14 of Russia full-scale invasion of Ukraine. See wetin you need to know about di main developments in di last 12 hours:

   • Reports say air sirens sound on Wednesday morning for several Ukrainian cities, including di capital Kyiv
   • Both evacuation stages from di north-eastern city of Sumy - wey for days bin don dey under serious Russian shelling - dey successfully completed, Ukraine tok

   • Ukrainian President Volodymyr Zelensky give one ogbonge address from im office for Kyiv to UK lawmakers for di House of Commons
   • E refer to Winston Churchill, wia e warn Russia say "we go fight for di forests, for di fields, on di shores, for di streets"
   • US President Joe Biden announce a complete US ban on Russian oil, gas and coal imports
   • UN say two million refugees now don run go Ukraine - in wetin now don become di fastest growing refugees crisis for Europe since World War Two
   • McDonald's, Starbucks and Coca-Cola become di latest Western companies to stop dia work for Russia

9. 9 March 2022Una good morning

   Una welcome to our live coverage today of tori from around di world.

   We go bring una tori from Nigeria, across Africa and di rest of di world.

   Di world eye still dey Ukraine afta Russian invade dem.

   Today make am 14 days - Two weeks since di invasion.

10. 8 March 2022Good Night

    We go end today Live Page here.

    No forget to scroll down to read all di tori wey you miss out during di day.

    Na Faith, Helen, Victor, Dooshima and Onyinye bring una all di tori for today.

    Una bye bye for now!

11. 8 March 2022President Zelensky speak to UK MPs

    President Volodymyr Zelensky address united Kingdom House of Commons and promise to continue fighting against Russia.

    Two weeks afta di invasion of Ukraine begin, Zelensky quote William Shakespeare, thank Boris Johnson and call for more sanctions on Russia.

    Di leader spoke virtually from Ukraine capital – dis na di first time wey foreign leader dey address Members of Parliament inside chamber.

    "We no go give up and we no go lose. We go continue fighting for our land, whatever di cost."

    

12. 8 March 2022PDP announce replacement for Govnor Umahi and im Deputy

    

    Wia dis foto come from, PDP

    Nigeria main opposition party, PDP don submit di name of Iduma Igariwe and Fred Udogwu as govnor and deputy govnor of Ebonyi State to Independent National Electoral Comission (INEC).

    National chirman of di party Iyorchia Ayu say dem select dem afta plenti consultation within di party and in line wit di court order for di party to submit replacement for both di govnor and deputy seat.

    Ayu make di announcement afta di Federal High Court for Abuja declare di porting of Ebonyi state govnor and im deputy govnor illegal, null and unconstitutional.

    Justice Inyang Ekwo make dis judgement based on case wey PDP file to ask for di removal of govnor and im deputy from office.

    But govnor Dave Umahi say im go appeal di decision of di Federal High Court for Abuja wey sack am sake of im defect or port go APC.

13. 8 March 2022Bamise: Lagos state govnor say ‘no plan to cover up’

    Lagos state goment say dem no get any plan to cover-up di investigation concerning di killing of late Ayanwole Bamise, di 22-year old fashion designer.

    Govnor Babajide Sanwo-Olu wey tok one wen e dey yarn wit tori pipo on Tuesday, say goment no go fit cover up any tin wey concern di killing of Ayanwole Bamise wey die as as she enter BRT bus.

    Police confam di arrest di BRT driver wey carry 22-year-old Oluwabamise Ayanwole on Monday.

14. 8 March 2022UK Parliament give President Zelensky standing ovation

    

    Wia dis foto come from, UK Parliamentary Recording Unit

    Ukrainian President Volodymyr Zelensky don receive ovation from British politicians for di UK House of Commons.

    Zelensky wey tok to di House of Commons through live video link compare Ukraine fight against Russia to di British war against Nazi Germany for World War Two.

    "Una no wan lose una kontri wen Nazis wan take una kontri and una need to fight for Britain," e tok.

    E call for more sanctions especially di ones wey go keep dia sky “safe”.

    "We no go give up and we no go lose. We go continue to fight for our land, whatever di cost," President Zelensky

    Responding to Zelensky speech to di MPs, UK Prime Minister Boris Johnson say ordinary Ukrainians dey inspire millions by dia courage.

15. 8 March 2022Desperate attempts to run from home unda heavy Russian fire

    Children and adults wey dey run from Russian bombardments near di Ukrane capital don dey forced to escape while shooting dey happun.

    Families gats waka 20 kilometres to Kyiv, as dem dey find cover from shelling. Some children and adults don die.

    Di BBC follow groups wey climb ova one destroyed bridge for di town of Irpin, near wia one huge Russian convoy arrange demsef.

16. 8 March 2022US announce ban on Russian oil

    President Joe Biden don announce a complete US ban on Russian oil, gas and importation of coal.

    E say di move mean say "American pipo go deal anoda powerful blow" to Putin leadership.

    "We no go dey part of subsidising Putin war," Biden add.

    Despite mounting fears of rising gas price, all di different political party for di US accept dis action.

    Oil prices don begin increase ahead of Biden announcement - wit di price of brent crude, di international benchmark, rising more dan 5%, to $130 per barrel.

    

    Wia dis foto come from, Pool

17. 8 March 2022'Make una ignore dat judgment’ , Umahi tell Ebonyi pipo

    Ebonyi state govnor, Dave Umahi say di judgement of Justice Inyang Ekwo no fit remove am as govnor of di state.

    Oga Umahi for interview e do wit tori pipo for Abakaliki, di state capital say nobody fit sue govnor on di basis of im election afta di tribunal.

    E add say di Nigerian constitution don tok how dem fit take remove governor wey pipo elect.

    On Tuesday, one federal High Court for Abuja declare di porting of Ebonyi state govnor and im deputy govnor illegal, null and unconstitutional.

18. 8 March 2022Six-year old girl die from lack of water - Mariupol mayor

    Di mayor of di city of Mariupol wey troops don subdue, Vadym Boychenko, say dem pull out di body of one six-year-old girl wey her name na Tanya from di wreak of one residential building wey bomb touch.

    E say di girl die from lack of water.

    “Her mother bin don already die. We no know how long di girl dey fight for her life. We no fit imagine how much suffering she endurre bear. For di last minutes of her life she dey alone, weak, fear, and thirsty.”

    Di mayor say President Volodymyr Zelensky also mention di tori of di girl earlier today for im address, saying wetin happun to girl na “one of many tragic tori of Mariupol, di city swey dey blockade for di past eight days”.

19. 8 March 2022Court no fit remove me from power - Dave Umahi

    Ebonyi state govnor, Dave Umahi say im go appeal di decision of di Federal High Court for Abuja wey sack am sake of im defect or port go APC.

    On Tuesday, di Abuja High Court declare di porting of Ebonyi state govnor and im deputy govnor illegal, null and unconstitutional.

    Justice Inyang Ekwo make dis judgement based on case wey PDP file to ask for di removal of govnor and im deputy from office.

20. 8 March 2022Sumy road don open – if you go fit make am to di meeting point

    

    Wia dis foto come from, Reuters

    Buses wey dey carry pipo wey wan escape from di northeastern city of Sumy don dey road and dem dey go di central city of Poltava, according to Ukrainian authorities say. Dem bin stop small sake of shooting wey bin shele as dem dey try cross di Ukrainian checkpoint.

    Russian military vehicles bin just show and start dey shoot but dem no aim di buses na so di head of Sumy administration Dmytro Zhyvytskiy tok.

    E no dey clear if anybody injure.

    Inside Sumy, pipo still dey struggle to reach di meeting point for evacuations - e dey shele for di outside parts of di city.

    BBC bin tok to Otunla Samuel wey dey study for di Sumy National Agrarian University and dey trapped inside bunker wit 60 oda international students.

    E bin tok say dem dey trapped and movement for dat side dey risky as di side dey suffer serious military attacks.

    Im bin dey hope for goment response to rescue im and di oda students before dem run out of supplies.