Faransiiska oo wajahaya hubanti la'aan siyaasadeed kadib markii doorashadii baarlamaanka aaney cidna helin aqlabiyad

Tebin toos ah

1. 20 Oktoobar 2026Dad badan oo rayid ah oo ku dhintay weeraradii ugu dambeeyay ee diyaaradaha aan duuliyaha lahayn ee Suudaan

   

   Xigashada Sawirka, MSF via Reuters

   Ciidanka Suudaan ayaa lagu eedeeyay inay fuliyeen dhowr weerar oo loo adeegsaday diyaaradaha aan duuliyaha lahayn (drones), kuwaas oo la sheegay inay dileen in ka badan 200 oo qof, oo ay ku jiraan dad badan oo ku sii jeeday aas.

   Ilo-wareedyo ayaa u sheegay hay’adda 'Sudan War Observatory' — oo la socota xaaladda colaadda ka dhex qaraxday ciidanka qaranka iyo xoogagga garabka milatariga ee 'Rapid Support Forces' (RSF) sannadkii 2023-kii — in tirada dadka ku dhintay duqeymo ka dhacay laba goobood oo ka tirsan gobolka Kordofan-ta Galbeed, fiidnimadii Axadda, ay gaartay 150 qof.

   Wasiirka warfaafinta ee gobolka Abyei — oo ah dhul xuduudeed ay ku muransan yihiin Suudaan iyo Koonfurta Suudaan — ayaa sheegay in 73 qof lagu dilay suuq halkaas ku yaalla, ka dib markii ay ku dhaceen diyaaradaha aan duuliyaha lahayn (drones).

   Ilo dhanka militariga ah ayaa u sheegay BBC-da in ciidanka milatarigu ay fuliyeen weerarkii Abyei, iyagoo sheegay in suuqaasi uu ahaa goob shidaalka looga keeno ciidamada RSF-ta.

   Weerarku wuxuu kordhiyay xiisadda u dhaxaysa Koonfurta Suudaan iyo Suudaan, kuwaas oo si wadajir ah u maamula gobolka Abyei; labada dhinacba waxay sheeganayaan lahaanshaha gobolkan saliidda hodanka ku ah, waana khilaaf aan xal loo helin tan iyo markii Koonfurta Suudaan ay go’day sannadkii 2011-kii.

   Koonfur Suudaan ayaa u yeertay safiirka Suudaan si ay u gudbiso cabasho rasmi ah. Waxa jira walaac laga qabo in colaaddu ay u gudbi karto dhinaca kale ee xuduudka.

   Wararka kale ee dheeraadka:

   Abiy Ahmed oo sheegay in Eritrea wajihi doonto cawaaqib xun hadii ay sii waddo 'ku tiirsanaanta wadamada kale'

   Obama oo difaacay Ilhaan Cumar, kana digay in hay'adaha federaalka loo adeegsado cadaadis siyaasadeed

   Soomaaliya oo garaacday Kenya, Tanzania iyo Rwanda iyadoo mar kale dhigtay taariikh weyn

   Titanic: Sheekada ninkii keliya ee Afrikaan ahaa ee saarnaa markabka

   Wax ka ogoow dibadbaxyada Faransiiska ee sababay in la xiro 1,200 oo qof, bililiqo iyo dab lagu dhajiyay dhismayaal.

2. 20 Oktoobar 2026UK oo diyaarado dagaal u diraysa Sacuudi Carabiya si ay uga difaacdo weerarrada Xuutiyiinta

   

   Xigashada Sawirka, MOD

   Dowladda UK ayaa sheegtay inay geyn doonto diyaaradaha dagaalka ee nooca Typhoon-ka (ee ka tirsan Ciidanka Cirka ee UK) si ay u difaacaan Sacuudi Carabiya, taas oo jawaab u ah weerarrada gantaallada iyo diyaaradaha aan duuliyaha lahayn ee ay kooxda Xuutiyiintu sii kordhinayaan.

   Hawlgalkan difaaca ah — oo uu oggolaaday Ra'iisul Wasaare Andy Burnham — ayaa gacan ka geysan doona difaaca magaalooyinka iyo kaabayaasha dhaqaalaha ee Sacuudi Carabiya, iyadoo laga hortagayo weerarrada dhanka hawada ah ee ay geysanayaan kooxda ay taageerto Iiraan.

   Tani waxay daba socotaa weerarro ay Xuutiyiintu ku qaadeen caasimadda Sacuudiga ee Riyaad, iyo sidoo kale goobaha tamarta oo ku yaalla xeebaha dalkaas.

   "Diyaaradahan waxay ka hawlgeli doonaan door difaac ah, mana qaadi doonaan weerarro dagaal oo ka dhan ah Xuutiyiinta," ayuu yiri Xoghayaha Difaaca Wes Streeting, isagoo ku sheegay bayaan qoraal ah oo soo baxay Talaadadii.

   Xuutiyiintu waxay ku jiraan dagaal sokeeye oo ay kula jiraan dowladda Yemen ee caalamku aqoonsan yahay, taas oo ay taageerto Sacuudi Carabiya.

   Wararka kale ee dheeraadka

   Obama oo difaacay Ilhaan Cumar, kana digay in hay'adaha federaalka loo adeegsado cadaadis siyaasadeed

   Soomaaliya oo garaacday Kenya, Tanzania iyo Rwanda iyadoo mar kale dhigtay taariikh weyn

   Titanic: Sheekada ninkii keliya ee Afrikaan ahaa ee saarnaa markabka

   Wax ka ogoow dibadbaxyada Faransiiska ee sababay in la xiro 1,200 oo qof, bililiqo iyo dab lagu dhajiyay dhismayaal

3. 20 Oktoobar 2026Abiy Ahmed oo sheegay in Eritrea wajihi doonto cawaaqib xun hadii ay sii waddo 'ku tiirsanaanta wadamada kale'

4. 20 Oktoobar 2026Ronaldo oo laga joojiyay xulka qaranka Portugal muddo 30 maalmood ah ganaax lacageedna lagu riday

   

   Xigashada Sawirka, Getty Images

   Cristiano Ronaldo ayaa lagu soo rogay ganaax 30 maalmood ah iyo ganaax lacageed oo dhan 255 Yuuro (£215), taas oo ay go’aamisay Xiriirka Kubadda Cagta ee Portugal (FPF), ka dib markii uu bishii hore ka baxay xerada tababarka ee xulka qarankiisa.

   Kabtankan oo 41 jir ah ayaa bishii Sebtembar ka baxay xulka Portugal ee ka qaybgalaya tartanka Nations League, ka dib markii kaydka la geliyay balse aan la ciyaartii Norway, ka dibna uu ogaaday inaan lagu soo bilaabi doonin ciyaarta Denmark ee dhacaysa 1-da Oktoobar.

   Ronaldo wuxuu sheegay inuu go’aansaday inuu baxo sababtoo ah Jorge Jesus ma ixtiraamin heshiiskii ay gaareen. Wuxuu tababaraha ku eedeeyay inuu khiyaanay kalsoonidii uu siiyay.

   Dhankiisa, tababaraha reer Portugal ayaa beeniyay inay jirtay wax heshiis ah oo uu la galay Ronaldo, balse wuxuu sheegay in albaabka kooxda uu u furan yahay haddii ciyaaryahanku uu doonayo inuu dib ugu soo laabto.

   Ronaldo, oo shan jeer ku guuleystay abaalmarinta Ballon d'Or, ayaa ah ciyaaryahanka ugu safashada badan heer caalami ee kubadda cagta ragga, isagoo dalkiisa Portugal u ciyaaray 146 jeer.

   Wararka kale ee dheeraadka

   Obama oo difaacay Ilhaan Cumar, kana digay in hay'adaha federaalka loo adeegsado cadaadis siyaasadeed

   Soomaaliya oo garaacday Kenya, Tanzania iyo Rwanda iyadoo mar kale dhigtay taariikh weyn

   Titanic: Sheekada ninkii keliya ee Afrikaan ahaa ee saarnaa markabka

   Wax ka ogoow dibadbaxyada Faransiiska ee sababay in la xiro 1,200 oo qof, bililiqo iyo dab lagu dhajiyay dhismayaal

5. 20 Oktoobar 2026Itoobiya oo uga digtay Eritrea inay taageerto kooxaha mucaaradka

   

   Xigashada Sawirka, Ethiopian Prime Minister's Office

   Ra'iisul Wasaaraha Itoobiya Abiy Axmed ayaa uga digay Eritrea inay la kulmi doonto "jawaab adag" haddii ay sii waddo taageeridda kooxaha mucaaradka ah ee gudaha Itoobiya, isagoo dowladda Eritrea ku tilmaamay "wakiil wax burburin".

   Xiriirka labada dal ayaa si weyn u xumaaday, iyadoo xiriirkii diblomaasiyadeed uu go’ay, xiisaduna ay sii kordhayso. Itoobiya ayaa ku eedaysay Eritrea inay taageerto kooxo hubeysan oo ka soo horjeeda dowladdeeda, isla markaana ay ku lug leedahay colaadda ka socota waqooyiga Itoobiya. Eritrea ayaa beenisay eedeymahaas.

   Khilaafka diblomaasiyadeed ayaa sii xoogaystay ka dib markii Itoobiya ay ku dhawaaqday xiritaanka safaaraddeeda ku taal Asmara, oo ah caasimadda Eritrea, taariikhdu markay ahayd 1-da Oktoobar 2026, iyo inay dalkeeda ka eriday 10 diblomaasi oo u dhashay Eritrea. Eritrea ayaa iyaduna qaadday tallaabooyin la mid ah, taas oo ugu dambayntii keentay in xiriirkii diblomaasiyadeed ee kala dhexeeyay Itoobiya ay gebi ahaanba u jarto.

   Wareysi uu dhawaan bixiyay, Abiy wuxuu ku sheegay in dalalka taageera Eritrea aysan awoodi doonin inay ka difaacaan cawaaqibka ka dhalan kara falalkeeda.

   "Waxa aan si adag u aaminsanahay in kuwa taageera Eritrea aysan awoodin wax ka badan inay siiyaan rasaas iyo agab ciidan, mana xallin karaan dhibaatooyinka Eritrea," ayuu yiri, isagoon magacaabin dalka ama dhinacyada uu ula jeeday.

   Abiy ayaa sidoo kale ku eedeeyay Eritrea inay dooratay inay noqoto "goob ay ku ciyaaraan cadawga," halkii ay ka noqon lahayd lamaane ka qayb qaata horumarinta gobolka.

   "Hase yeeshee, haddii ay sii waddo iska indho-tirka baaqyadeenna, khatartu aad bay u weynaan doontaa," ayuu uga digay.

   Ra'iisul wasaaraha ayaa sidoo kale dhaliilay xaaladda gudaha ee Eritrea, isagoo ku dooday in dowladda dalkaas ay ku guuldareysatay inay mudnaan siiso horumarinta.

   "Ka hor xorriyadda, magaalooyinka Eritrea waxay ahaayeen kuwo firfircoon oo barwaaqo ah. Maantase, waxay isu beddeleen tuulooyin," ayuu yiri.

   Abiy ayaa intaas ku daray in dad badan oo reer Eritrea ah ay waayeen fursado dhaqaale tan iyo markii dalku xorriyadda qaatay, isagoo sheegay in caqabadaha ay wajahayaan ay ka dhasheen guuldarrada dowladda ee dhanka maamulka.

   "Dadka reer Eritrea, oo ah kuwo shaqo-jecel oo deeqsi ah, ayaa noqday astaan ​​muujinaysa tahriibka iyo nolol ay ka buuxaan dhibaatooyin. Haddii la weydiiyo sababta xaaladdan u dhacday, waa dowladdu oo ka joojisay maalgelinta horumarinta iyo dhisidda hay'adaha, beddelkeedana waxay noqotay qalab ay adeegsadaan cadawga Itoobiya," ayuu yiri.

   Wararka kale ee dheeraadka

   Obama oo difaacay Ilhaan Cumar, kana digay in hay'adaha federaalka loo adeegsado cadaadis siyaasadeed

   Soomaaliya oo garaacday Kenya, Tanzania iyo Rwanda iyadoo mar kale dhigtay taariikh weyn

   Titanic: Sheekada ninkii keliya ee Afrikaan ahaa ee saarnaa markabka

   Wax ka ogoow dibadbaxyada Faransiiska ee sababay in la xiro 1,200 oo qof, bililiqo iyo dab lagu dhajiyay dhismayaal

6. 20 Oktoobar 2026Saadaasha oo tilmaamaysaa in Alberta ay si aqlabiyad leh ugu codeysay inay kasii mid ahaato Canada

   

   Xigashada Sawirka, Getty Images

   Dadka ku nool Alberta ayaa si aqlabiyad ah ugu codeeyay inay qayb ka sii ahaadaan Canada, sida laga soo xigtay natiijooyinka la saadaaliyay, ka dib markii dadka deggan gobolka galbeed lagu weydiiyay codbixin dadweyne inay rabaan afti taariikh dambe la qabto oo ku saabsan madaxbannaanida iyo in kale.

   Iyadoo la tiriyay inta badan codadka, in ka badan saddex-meelood laba meelood oo ka mid ah codbixiyayaasha ayaa doortay inay sii ahaadaan qayb ka mid ah dalka, halkii ay raadin lahaayeen afti, sida ay sheegtay hay'adda Elections Alberta.

   Ra’iisul Wasaare Mark Carney ayaa natiijada ku tilmaamay "doorasho cad" oo ay sameeyeen dadka reer Alberta.

   Munaasabad ay isugu soo baxeen taageerayaasha gooni-goosadka oo ka dhacaysay magaalada Edmonton, ayaa hadalkii iyo buuqii farxadda lahaa uu si degdeg ah u aamusay markii dadkii goobta joogay ay arkeen natiijooyinka la soo bandhigay. Si kastaba ha ahaatee, mid ka mid ah hoggaamiyeyaasha gooni-goosadka ayaa ku adkaystay in ololihiisu uusan weli dhammaan.

   Codbixintan waxaa horraantii sannadkan ku baaqday hoggaamiyaha gobolka, Danielle Smith, iyadoo ka jawaabaysa codsi dadweyne. Waxaa loo arkayay inay tahay imtixaan weyn oo ku wajahan midnimada qaranka.

   Wararka kale ee dheeraadka

   Obama oo difaacay Ilhaan Cumar, kana digay in hay'adaha federaalka loo adeegsado cadaadis siyaasadeed

   Soomaaliya oo garaacday Kenya, Tanzania iyo Rwanda iyadoo mar kale dhigtay taariikh weyn

   Titanic: Sheekada ninkii keliya ee Afrikaan ahaa ee saarnaa markabka

   Wax ka ogoow dibadbaxyada Faransiiska ee sababay in la xiro 1,200 oo qof, bililiqo iyo dab lagu dhajiyay dhismayaal

7. 20 Oktoobar 2026Taliyaha awoodda bdan ee militariga Pakistaan Asim Munir oo gaaray Tehran

   

   Xigashada Sawirka, EPA

   Taliyaha ciidamada qalabka sida ee Pakistan, Asim Munir, ayaa gaaray magaalada Tehran ee caasimadda Iran.

   Munir ayaa ah dhexdhexaadiyaha ugu weyn ee dadaallada lagu xallinayo khilaafka u dhexeeya Iran iyo Mareykanka.

   Tani waa booqashadiisii shanaad ee rasmiga ahayd ee uu ku tago Tehran tan iyo markii la dhaqan geliyay heshiiska xabbad-joojinta.

   Booqashadiisii hore ee 2-dii Sebtember, wuxuu kulamo la yeeshay madaxweynaha Iran, Masoud Pezeshkian, xoghayaha Golaha Sare ee Amniga Qaranka, Mohsen Rezaei, guddoomiyaha baarlamaanka, Mohammad Baqer Qalibaf, wasiirka arrimaha dibadda, Abbas Araghchi, iyo wasiirka arrimaha gudaha, Eskandar Momeni.

   Wararka kale ee dheeraadka

   Obama oo difaacay Ilhaan Cumar, kana digay in hay'adaha federaalka loo adeegsado cadaadis siyaasadeed

   Soomaaliya oo garaacday Kenya, Tanzania iyo Rwanda iyadoo mar kale dhigtay taariikh weyn

   Titanic: Sheekada ninkii keliya ee Afrikaan ahaa ee saarnaa markabka

   Wax ka ogoow dibadbaxyada Faransiiska ee sababay in la xiro 1,200 oo qof, bililiqo iyo dab lagu dhajiyay dhismayaal

8. 20 Oktoobar 2026Iran oo Mareykanka uga digtay cawaaqibka ka dhalan kara haddii uu adeegsado bamka “Hooyada Dhammaan Bambooyinka”

   

   Xigashada Sawirka, Getty Images

   Xilli baarlamaanka Iran uu ansixiyay wasiirro cusub, wasiirka cusub ee gaashaandhigga, Mehrdad Akhlaqi, ayaa sheegay in dalkiisu isu diyaarinayo inuu ka jawaabo haddii Mareykanku adeegsado waxa loogu yeero “Hooyada Dhammaan Bambooyinka”.

   Akhlaqi ayaa wariyeyaasha u sheegay in arrintan laga yeeshay wada-hadallo muhiim ah, balse Iran ay xaaladda si deggan u wajahayso.

   “Waxaan arrintan ka yeelannay wada-hadallo muhiim ah, waana deggannahay. Waxaan shaqadeenna sii wadi doonnaa annaga oo aan cabsi qabin, isla markaana ku kalsoon awooddeena,” ayuu yiri.

   Wuxuu sheegay in madaxweynaha Mareykanka ay habboon tahay inuu ka fikiro sidii uu ciidamadiisa si nabad ah ugala bixi lahaa gobolka, halkii uu weerar ka qaadi lahaa.

   “Marka uu bamka tuuro, wuxuu arki doonaa inta askari ee meydadkooda uu halkaas kala bixi doono,” ayuu yiri wasiirku.

   Akhlaqi ayaa sheegay in tani ay tahay sababta Mareykanku uusan weli u qaadin tallaabooyin gaarsiisan heerka hanjabaadihiisa.

   Si kastaba ha ahaatee, wuxuu uga digay Mareykanka in haddii uu hanjabaadaha afka ah u beddelo ficil, uu la kulmi doono cawaaqibka ka dhalanaya tallaabadaas.

   Wararka kale ee dheeraadka

   Obama oo difaacay Ilhaan Cumar, kana digay in hay'adaha federaalka loo adeegsado cadaadis siyaasadeed

   Soomaaliya oo garaacday Kenya, Tanzania iyo Rwanda iyadoo mar kale dhigtay taariikh weyn

   Titanic: Sheekada ninkii keliya ee Afrikaan ahaa ee saarnaa markabka

   Wax ka ogoow dibadbaxyada Faransiiska ee sababay in la xiro 1,200 oo qof, bililiqo iyo dab lagu dhajiyay dhismayaal

9. 20 Oktoobar 2026Sida ay u sameysmaan iyo sida looga hortago dhagaxyada ku beerma kilyaha

   

   Xigashada Sawirka, .

   Mid kamid ah awoodaha layaabka leh ee uu leeyahay jirka bini’aadamka ayaa ah in uu ku beermo oo uu soo saaro dhagxaan

   Waxaana jirta goobo badan oo uu ku beermo dhagaxa waxaana kamid ah kiliyaha, tubbooyinka kaadi mareenka, iyo kaadiheysta waxaa sidoo kale jira goobo jirka kamid ah oo uu ku beermo sida xameytida inkasta oo ay kala duwan yihiin qaabka ay ugu kala beermaan.

   Faahfaahinta ku dhufo lifaaqa hoose

   Sida ay u sameysmaan iyo sida looga hortago dhagaxyada ku beerma kilyaha

10. 20 Oktoobar 2026Iran oo sheegtay inay jawaab ka bixin doonto weerar kasta oo lagu soo qaado

    Afhayeenka Wasaaradda Arrimaha Dibadda Iran ayaa ka digay in dalkiisu uusan ka hari doonin wax weerar ah oo lagu qaado, isaga oo sheegay in Iran ay ka jawaabi doonto weerar kasta oo lagu soo qaado.

    Isagoo ka jawaabayay su’aal shir jaraa’id lagu weydiiyay oo ku saabsan in Mareykanku farriin u diray Iran, kana codsaday inaysan ka jawaabin haddii uu weeraro xarunta Buurta Kalang ilaa xaaladdu ka degayso, ayuu Ismaaciil Baaqaei sheegay in dalkiisu hore u muujiyay inuusan weerar aan jawaab laga bixin ku dhaafi doonin.

    “Ficil ahaan, waxaan muujinnay inaanan ka hari doonin weerar kasta oo nagula soo qaado. Haddii jawaabtayadu aysan ka xoog badnaan weerarka nalagu soo qaaday, waxay hubaal ahaan ula kulmi doonaan awood la mid ah tii ay adeegsadeen,” ayuu yiri.

    Waxa uu intaas ku daray in sheegashada ah in Mareykanku weeraray xarunta Buurta Kalang, Iran-na aysan wax jawaab ah ka bixin, ay tahay mala-awaal iyo eedeyn aan sal lahayn.

    “Waqtigii albaabka la garaaci jiray waa dhammaaday,” ayuu yiri afhayeenku.

    Madaxweynaha Mareykanka, Donald Trump, ayaa dhowaan mar kale ku hanjabay inuu weerari karo xarunta Koh Kalang ee Iran.

    Koh Kalang waa xarun ku taalla meel u dhow xarunta nukliyeerka ee Natanz. Mas’uuliyiinta Iran ayaa sheegaya in xaruntaasi loo adeegsado soo saarista iyo isku-geynta qalabka casriga ah ee lagu kobciyo uranium-ka, kuwaas oo loo yaqaan centrifuges.

    Hase yeeshee, ilo xog-ogaal ah oo reer Galbeed ah ayaa aaminsan in Iran laga yaabo inay isku dayayso inay dhisto xarun kobcinta uranium-ka ah oo aan si rasmi ah loo shaacin.

    Wararka kale ee dheeraadka

    Obama oo difaacay Ilhaan Cumar, kana digay in hay'adaha federaalka loo adeegsado cadaadis siyaasadeed

    Soomaaliya oo garaacday Kenya, Tanzania iyo Rwanda iyadoo mar kale dhigtay taariikh weyn

    Titanic: Sheekada ninkii keliya ee Afrikaan ahaa ee saarnaa markabka

    Wax ka ogoow dibadbaxyada Faransiiska ee sababay in la xiro 1,200 oo qof, bililiqo iyo dab lagu dhajiyay dhismayaal

11. 20 Oktoobar 2026Selena Gomez oo sheegtay in sigaarka elektaroonigga ah uu saameeyay codkeeda

12. 20 Oktoobar 2026Trump oo oggolaaday kulan saddex geesood ah oo uu la yeesho Putin iyo madaxweynaha Shiinaha

    

    Xigashada Sawirka, Getty Images

    Madaxweynaha Mareykanka, Donald Trump, ayaa sheegay inuu oggol yahay in kulan saddex geesood ah uu la yeesho madaxweynaha Ruushka, Vladimir Putin, iyo madaxweynaha Shiinaha, si looga wada hadlo hubka nukliyeerka, balse waxa uu caddeeyay in dagaalka Ukraine uusan noqon doonin qodobka ugu weyn ee kulanka.

    Arrintan ayaa timid kaddib markii warbaahinta Mareykanka ay sheegtay in Putin uu soo jeediyay kulan ay saddexda hoggaamiye kaga arrinsanayaan mustaqbalka dagaalka Ukraine.

    Trump ayaa sheegay in mowqifka Ruushka ee ku aaddan Ukraine uu yahay mid “la aqbali karo”.

    Warbixin uu daabacay wargeyska The Wall Street Journal oo ku saabsan soo jeedinta Putin ayaa walaac ka abuurtay dalalka Yurub, waxaana cambaareeyay dowladda Ukraine.

    Trump ayaa sidoo kale mar kale dhaliilay madaxweynaha Ukraine, Volodymyr Zelensky, isaga oo sheegay in laga yaabo inay tahay waqtigii qof kale uu wadaxaajoodka ugu matali lahaa Kyiv.

    Wararka kale ee dheeraadka

    Obama oo difaacay Ilhaan Cumar, kana digay in hay'adaha federaalka loo adeegsado cadaadis siyaasadeed

    Soomaaliya oo garaacday Kenya, Tanzania iyo Rwanda iyadoo mar kale dhigtay taariikh weyn

    Titanic: Sheekada ninkii keliya ee Afrikaan ahaa ee saarnaa markabka

    Wax ka ogoow dibadbaxyada Faransiiska ee sababay in la xiro 1,200 oo qof, bililiqo iyo dab lagu dhajiyay dhismayaal

13. 20 Oktoobar 2026Dadka ku nool Riyaad oo loogu digay khatar dhanka cirka ah

    Dadka ku nool caasimadda Sacuudiga ee Riyaad ayaa telefoon loogu diray digniino ku saabsan khatar dhanka cirka ah, xilli ay sii socdaan weerarrada Xuutiyiinta ee ka dhanka ah Sacuudiga.

    Ilaa hadda, lama soo sheegin wax dhaawac ah ama burbur ka dhashay khatartaas.

    Isniintii, mas’uuliyiinta Sacuudiga ayaa sheegay inay ka baaqanayaan ka qaybgalka fool-ka-foolka ah ee shirka maalgashiga kaddib markii uu sii xoogaystay dagaalka ay kula jiraan Xuutiyiinta.

    Shirkaas maalgashiga ayaa la qorsheeyay inuu qabsoomo 26-ka ilaa 29-ka October.

    Dhanka kale, dagaalka Yemen ayaa isna sii xoogaystay. In ka badan 50 askari ayaa la dilay, halka 200 oo kalena ay ku dhaawacmeen weerar ay Xuutiyiintu ku qaadeen xero milatari oo ay leeyihiin ciidamada dowladda Yemen, kuwaas oo taageero ka hela Sacuudiga.

    Weerarka ayaa lagu bartilmaameedsaday askar dhowaan la qoray oo ku sugan koonfurta Yemen.

    Wararka kale ee dheeraadka

    Obama oo difaacay Ilhaan Cumar, kana digay in hay'adaha federaalka loo adeegsado cadaadis siyaasadeed

    Soomaaliya oo garaacday Kenya, Tanzania iyo Rwanda iyadoo mar kale dhigtay taariikh weyn

    Titanic: Sheekada ninkii keliya ee Afrikaan ahaa ee saarnaa markabka

    Wax ka ogoow dibadbaxyada Faransiiska ee sababay in la xiro 1,200 oo qof, bililiqo iyo dab lagu dhajiyay dhismayaal

14. 20 Oktoobar 2026JD Vance oo diiday inuu taageero Netanyahu ka hor doorashada Israa’iil

    

    Xigashada Sawirka, Getty Images

    Madaxweyne ku-xigeenka Mareykanka, JD Vance, ayaa ka gaabsaday inuu taageero Ra’iisul Wasaaraha Israa’iil, Benjamin Netanyahu, ka hor doorashada dalkaas, xilli Madaxweyne Donald Trump uu taageeray Netanyahu.

    Wareysi uu siiyay warbaahinta dhijitaalka ah ee Towi, ayuu Vance ku sheegay inuusan doonayn inuu faragelin ku sameeyo doorashada Israa’iil.

    Vance, oo horay u booqday Budapest xilligii doorashada Hungary, halkaas oo uu ku taageeray Viktor Orbán, ayaa sheegay inuu taageero musharraxiinta Mareykanka, isla markaana uu diiradda saarayo doorashada xilliga dhexe ee Mareykanka.

    “Ma diidani in dib loo doorto Netanyahu, balse sidoo kale ma taageersani in dib loo doorto. Faragelin kuma sameeyo doorashada Israa’iil,” ayuu yiri Vance.

    Doorashada Israa’iil ayaa la filayaa inay dhacdo toddobaadka soo socda. Waxay noqon doontaa doorashadii ugu horreysay ee dalkaas ka dhacda tan iyo weerarradii Xamaas ee 7-dii Oktoobar.

    Wararka kale ee dheeraadka

    Obama oo difaacay Ilhaan Cumar, kana digay in hay'adaha federaalka loo adeegsado cadaadis siyaasadeed

    Soomaaliya oo garaacday Kenya, Tanzania iyo Rwanda iyadoo mar kale dhigtay taariikh weyn

    Titanic: Sheekada ninkii keliya ee Afrikaan ahaa ee saarnaa markabka

    Wax ka ogoow dibadbaxyada Faransiiska ee sababay in la xiro 1,200 oo qof, bililiqo iyo dab lagu dhajiyay dhismayaal

15. 20 Oktoobar 2026Christiane Amanpour oo ka tagaysa CNN sannadka soo socda kaddib 43 sano oo ay ka shaqaynaysay

    

    Xigashada Sawirka, Jeff Overs/BBC

    Weriyaha caalamiga ah ee telefishinka CNN, Christiane Amanpour, ayaa ku dhawaaqday inay sannadka soo socda ka tagi doonto telefishinka, kaddib in ka badan 40 sano oo ay u shaqaynaysay.

    “Ka dib bilo aan arrintan ka fikirayay iyo habeenno badan oo aan hurdo la’aan ahaa, waxaan go’aansaday inaan ka tago CNN, oo aan 43 sano oo cajiib ah ka soo shaqaynayay,” ayay Ms Amanpour ku sheegtay bayaan ay soo saartay.

    Suxufiyaddan oo 68 jir ah, asal ahaanna British-Iiraani ah, ayaa sheegtay inay rajaynayso inay mustaqbalka ka shaqayso mashaariic cusub oo xiiso leh, isla markaana ay mar walba taageeri doonto CNN.

    Madaxweynaha CNN, Mark Thompson, ayaa Christiane Amanpour ku tilmaamay “mid ka mid ah suxufiyiinta ugu ixtiraamka iyo jacaylka badan dunida”.

    Waxa uu sheegay in telefishinku ka faa’iidaysan doono muddada ka harsan inta aysan shaqada ka tegin sannadka soo socda, si loo aqoonsado loona xuso shaqadii ay u soo qabatay.

    Christiane Amanpour waxay shaqadeeda CNN ka bilowday sannadkii 1983-kii, iyadoo ahayd kaaliye ka tirsan waaxda wararka caalamiga ah. Waxay si tartiib tartiib ah u noqotay mid ka mid ah suxufiyiinta ugu caansan telefishinka.

    Intii ay ku jirtay mihnadda saxaafadda, waxay marar badan warar ka soo tabisay goobaha dagaalladu ka socdaan iyo meelaha ay colaadaha saameeyeen. Waxa kale oo ay wareysiyo la yeelatay tobannaan hoggaamiye oo caalami ah iyo shakhsiyaad magac ku leh dunida.

    Tan iyo sannadkii 2009-kii, waxay CNN International ka soo jeedinaysay barnaamijkeeda habeenlaha ah ee wareysiyada iyo doodaha.

    Wararka kale ee dheeraadka

    Obama oo difaacay Ilhaan Cumar, kana digay in hay'adaha federaalka loo adeegsado cadaadis siyaasadeed

    Soomaaliya oo garaacday Kenya, Tanzania iyo Rwanda iyadoo mar kale dhigtay taariikh weyn

    Titanic: Sheekada ninkii keliya ee Afrikaan ahaa ee saarnaa markabka

    Wax ka ogoow dibadbaxyada Faransiiska ee sababay in la xiro 1,200 oo qof, bililiqo iyo dab lagu dhajiyay dhismayaal

16. 20 Oktoobar 2026"Kaamarada taleefankaagu waa hubkaaga" Sida haweenka Ciraaq ay geesinimo ugu wajahayaan hanjabaadaha dilka ee tacadiyada jinsiga

17. 20 Oktoobar 2026TPLF oo diiday in weerarrada xarumaha milatari lagu tilmaamo falal argagixisanimo

    

    Xigashada Sawirka, Reuters

    Jabhadda Xoreynta Shacabka Tigray (TPLF) ayaa sheegtay inaysan aqbalayn hadalka Xoghayaha Arrimaha Dibadda ee Mareykanka, Marco Rubio, ee weerarrada lagu qaado xarumaha milatariga ku tilmaamay falal argagixisanimo.

    War-saxaafadeed ay TPLF soo saartay 9-kii Sebtembar 2019 ayay ku muujisay sida ay uga xun tahay hadalka Rubio, kaas oo uu ku sheegay in diidmada Tigray ee gooni-u-goosadka iyo weerarrada lagu qaado xarumaha milatariga ay yihiin falal argagixisanimo.

    Xoghayaha Arrimaha Dibadda ee Mareykanka ayaa Sabtidii, isagoo ka hadlayay xaaladda Itoobiya, sheegay in ay dalka ka jiraan kooxo gooni-u-goosad ah oo weerarro fulinaya, isla markaana dowladda Itoobiya ay ka jawaabayso weerarradaas.

    Waxa uu sidoo kale weerar diyaaradeed oo aan duuliye lahayn oo ka dhacay Addis Ababa la xiriiriyay argagixisanimo.

    TPLF ayaa sheegtay in hadalka Rubio uu iska indho-tirayo sababaha dib u soo cusboonaaday dagaalka, gaar ahaan sida ay sheegtay, in dowladda federaalku ay fulin weyday heshiiskii xabbad-joojinta ee lagu saxiixay Pretoria, taas oo ku qasabtay shacabka Tigray inay is-difaacaan.

    Jabhaddu waxay sheegtay inaysan aqbalayn hadalka xoghayaha arrimaha dibadda ee Mareykanka.

    TPLF ayaa xusuusisay inay marar badan ku baaqday in wada-hadallo nabadeed la bilaabo ka hor inta uusan dagaalku dib u qarxin.

    Waxay sidoo kale Mareykanka iyo quwadaha kale ku dhaliishay inay qaadi waayeen tallaabo wax ku ool ah oo lagu joojinayo dagaalka.

    “Waxaa nalagu qasbay inaan dadkeenna ka difaacno dilka iyo burburka markii dowladda federaalku ay ku dhawaaqday dagaal ballaaran,” ayaa lagu yiri bayaanka.

    Jabhaddu waxay intaas ku dartay inay Mareykanka ka filaysay inuu gacan ka geysto soo afjaridda dagaalka iyo fududeynta wada-hadallo wax-ku-ool ah.

    TPLF ayaa ku tilmaantay arrin “aad looga xumaado” in tallaabooyinka ay ku sheegtay is-difaac lagu tilmaamo falal gooni-u-goosad ah.

    Waxay sheegtay in hadalka Rubio uu “qalloocinayo taariikhda iyo ujeeddada halganka shacabka ee nabadda, sinnaanta iyo jiritaankooda,” isla markaana uu mugdi gelinayo doorka ay dowladda talada haysa ku leedahay hor istaagga xal nabadeed.

    Ugu dambeyn, TPLF ayaa Mareykanka ugu baaqday inuu dib u eego mowqifkiisa, isla markaana uu door muhiim ah ka qaato xaqiijinta nabadda iyo xasilloonida Itoobiya.

    Wararka kale ee dheeraadka

    Obama oo difaacay Ilhaan Cumar, kana digay in hay'adaha federaalka loo adeegsado cadaadis siyaasadeed

    Soomaaliya oo garaacday Kenya, Tanzania iyo Rwanda iyadoo mar kale dhigtay taariikh weyn

    Titanic: Sheekada ninkii keliya ee Afrikaan ahaa ee saarnaa markabka

    Wax ka ogoow dibadbaxyada Faransiiska ee sababay in la xiro 1,200 oo qof, bililiqo iyo dab lagu dhajiyay dhismayaal

18. 20 Oktoobar 2026Xog ku saabsan kulan qarsoodi ah oo dhexmaray Netanyahu iyo xoghayaha Difaaca Maraykanka

    

    Xigashada Sawirka, @SecWar

    Xoghayaha Difaaca Maraykanka, Pete Hegseth, ayaa xaqiijiyay inuu booqasho ku tagay Bariga Dhexe, saacado kaddib markii warbaahinta Axios ay sheegtay inuu kulan aan hore loo shaacin la yeeshay ra’iisul wasaaraha Israa’iil, Benjamin Netanyahu.

    Hegseth ayaa bartiisa X ku baahiyay sawir isaga oo la jooga askar Maraykan ah, isaga oo sheegay inay sharaf u ahayd inuu la kulmo ciidamada Maraykanka ee hoos taga taliska dhexe ee milatariga Maraykanka, CENTCOM.

    Warbaahinta Axios iyo Walla ayaa, iyaga oo soo xiganaya ilo xog-ogaal ah, sheegay in kulanka qarsoodiga ahi ka dhacay garoonka diyaaradaha Ovda ee magaalada Eilat ee Israa’iil.

    Wargeyska Jerusalem Post ayaa isaguna qoray in saraakiil Imaaraati ah ay ka mid ahaayeen dadkii kulanka joogay.

    Wasaaradda Difaaca Maraykanka ayaan weli faahfaahin ka bixin kulanka la sheegay.

    Wararkan ayaa imanaya xilli madaxweynaha Maraykanka, Donald Trump, la sheegay inuu taageerayo Netanyahu ka hor doorashooyinka guud ee Israa’iil, halka saraakiisha milatariga Iiraan ay ka digeen suurtagalnimada dagaal cusub oo dhex mara Iiraan iyo Maraykanka.

    Wararka kale ee dheeraadka

    Obama oo difaacay Ilhaan Cumar, kana digay in hay'adaha federaalka loo adeegsado cadaadis siyaasadeed

    Soomaaliya oo garaacday Kenya, Tanzania iyo Rwanda iyadoo mar kale dhigtay taariikh weyn

    Titanic: Sheekada ninkii keliya ee Afrikaan ahaa ee saarnaa markabka

    Wax ka ogoow dibadbaxyada Faransiiska ee sababay in la xiro 1,200 oo qof, bililiqo iyo dab lagu dhajiyay dhismayaal

19. 20 Oktoobar 2026Shan xaqiiqo oo mucjiso ah oo la xiriira noloshii Saddaam Xuseen

20. 20 Oktoobar 2026Iiraan oo sheegatay inay soo ridday diyaarad aan duuliye lahayn oo Maraykanku leeyahay

    

    Xigashada Sawirka, REX/Shutterstock

    Ilaalada Kacaanka Iiraan ayaa sheegtay inay soo rideen diyaarad aan duuliye lahayn oo nooca MQ-9 ah, taas oo ay sheegeen inay ku burburiyeen hawada marin-biyoodka Hormuz.

    War-saxaafadeed ay soo saareen Talaadadii, 19-ka Oktoobar, ayay ku sheegeen in diyaaradda lagu soo riday nidaam cusub oo difaaca hawada ah, kaas oo ay maamusho shabakadda isku-dhafan ee difaaca cirka ee dalka.

    Ilaa hadda, sheegashadaas ma jiraan xog madax-bannaan oo halkan lagu xaqiijiyey.

    Wararka kale ee dheeraadka

    Obama oo difaacay Ilhaan Cumar, kana digay in hay'adaha federaalka loo adeegsado cadaadis siyaasadeed

    Soomaaliya oo garaacday Kenya, Tanzania iyo Rwanda iyadoo mar kale dhigtay taariikh weyn

    Titanic: Sheekada ninkii keliya ee Afrikaan ahaa ee saarnaa markabka

    Wax ka ogoow dibadbaxyada Faransiiska ee sababay in la xiro 1,200 oo qof, bililiqo iyo dab lagu dhajiyay dhismayaal