குஜராத்தில் உச்சம், மும்பையில் சரிவு: ஸ்ரேயஸ் தலைமையிலான பஞ்சாபில் ஹர்திக் பாண்ட்யா எப்படி பொருந்துவார்?

ஐபிஎல் வட்டாரத்தில் கடந்த சில மாதங்களாக பேசப்பட்டு வந்த ஹர்திக் பாண்ட்யா - அர்ஷ்தீப் சிங் பரிமாற்றம் நடந்து முடிந்துள்ளது.

இதன்படி, மும்பை இந்தியன்ஸ் அணியின் கேப்டனாக இருந்த ஹர்திக் பாண்ட்யா, பஞ்சாப் கிங்ஸ் அணிக்குச் செல்கிறார். பஞ்சாப் கிங்ஸ் அணியின் இடக்கை வேகப்பந்து வீச்சாளர் அர்ஷ்தீப் சிங், அடுத்து வரும் சீசனில் மும்பை அணிக்காக விளையாடவுள்ளார்.

மும்பை அணியில் ரூ.16.35 கோடிக்கு வாங்கப்பட்ட பாண்ட்யா, பஞ்சாப் கிங்ஸ் அணிக்கு கூடுதலாக ரூ.1.65 கோடிக்கு பரிமாற்றம் செய்யப்பட்டுள்ளார். பஞ்சாப் அணியை சேர்ந்த அர்ஷ்தீப் சிங் அதே ரூ.18 கோடிக்கு மும்பைக்குப் பரிமாற்றம் செய்யப்பட்டுள்ளார்.

மும்பை இந்தியன்ஸ் அணியின் மேட்ச் வின்னராகத் திகழ்ந்த பாண்ட்யா, 2022 இல் குஜராத் அணியில் இணைந்து கேப்டன் பொறுப்பையும் ஏற்றார்.

பாண்ட்யா தலைமையில் களமிறங்கிய குஜராத் அணி, தனது முதல் சீசனிலேயே ஐபில் கோப்பையை வென்றது.

2023 இல் பாண்ட்யா தலைமையில் குஜராத் அணி தொடர்ச்சியாக இரண்டாவது முறை இறுதிப்போட்டிக்கு முன்னேறி இரண்டாம் இடம் பிடித்தது.

குஜராத் டைட்டன்ஸ் அணியின் கேப்டனாகப் பொறுப்பேற்ற பிறகு பாண்ட்யாவின் தனிப்பட்ட ஆட்டமும் சிறப்பாக அமைந்தது.

முதல் சீசனிலேயே கோப்பை வென்று கொடுத்ததால், குஜராத் டைட்டன் ரசிகர்கள் மத்தியில் பாண்ட்யாவின் செல்வாக்கு உயர்ந்தது.

தோல்வியில் முடிந்த கேப்டன்சி அத்தியாயம்

குஜராத் அணியில் கில் உள்ளிட்ட வீரர்களும் பாண்ட்யாவுக்கு ஒத்துழைப்புக் கொடுத்தனர். வியூகம் வகுப்பதில் அணியின் தலைமைப் பயிற்சியாளர் ஆஷிஸ் நெஹ்ரா பாண்ட்யாவுக்கு பக்க பலமாக இருந்தார். இரண்டே ஆண்டுகளில், குஜராத் டைட்டன்ஸ் அணியின் அடையாளமாகவே பாண்ட்யா மாறிப்போனார்.

ஆனால், 2024 இல் யாரும் எதிர்பாராத விதமாக பாண்ட்யா மீண்டும் மும்பை இந்தியன்ஸ் அணிக்குத் திரும்பினார் .

மும்பை இந்தியன்ஸ் அணி ரோஹித் சர்மாவுக்குப் பதிலாக பாண்ட்யாவை கேப்டனாக நியமித்தது. ஐந்து ஐபிஎல் கோப்பைகளை வென்ற ரோஹித் சர்மாவுக்குப் பதிலாக பாண்ட்யா கேப்டனாக நியமிக்கப்பட்டது மும்பை இந்தியன்ஸ் ரசிகர்களிடம் அதிருப்தியை ஏற்படுத்தியது.

2024 சீசனின் போது மும்பை ரசிகர்களாலேயே மைதானத்தில் பாண்ட்யா கேலிக்கு ஆளானார் என்றும் மும்பை அணியின் மூத்த வீரர்கள் பாண்ட்யாவின் அணுகுமுறை குறித்து பயிற்சியாளர்களிடம் புகார் தெரிவித்ததாகவும் இந்தியன் எக்ஸ்பிரஸ் இதழில் செய்தி வெளியானது.

ஹர்திக் பாண்ட்யா கேப்டன்சியில் மும்பை இந்தியன்ஸ் அணி எதிர்பார்ப்புக்கு மாறாக பின்னடைவையே சந்தித்தது.

பாண்ட்யா தலைமையிலான மும்பை அணி 2025 ஐபிஎல் சீசனில் பிளேஆஃப் சுற்றுக்கு முன்னேறியது. ஆனால், 2024 மற்றும் 2026 சீசன்களில் முறையே புள்ளிப்பட்டியலில் 10 மற்றும் 9 ஆவது இடங்களிலேயே நிறைவு செய்தது.

இந்த நிலையில், தற்போது பஞ்சாப் கிங்ஸ் அணிக்கு பாண்ட்யா பரிமாற்றம் செய்யப்பட்டுள்ளார். இதையடுத்து, இந்திய டி20 அணியின் கேப்டனானவும் உள்ள ஸ்ரேயஸ் ஐயர் தலைமையில் பஞ்சாபுக்காக விளையாடவுள்ளார்.

கடந்த மூன்றாண்டு கால கிரிக்கெட் வாழ்க்கை, பாண்ட்யாவுக்கு ரோலர் கோஸ்டர் ரைடாக இருந்துள்ளது. குஜராத் அணியின் கேப்டனாக உச்சத்தைத் தொட்ட பின் மீண்டும் மும்பை அணிக்குத் திரும்ப எடுத்த முடிவு பாண்ட்யாவுக்கு கைகொடுக்கவில்லை.

பாண்ட்யாவை மும்பை ரசிகர்கள் ஏன் வெறுத்தார்கள்?

ஸ்ரேயஸ் தலைமையின் கீழ் பாண்ட்யா விளையாட வேண்டும் என்பதை பஞ்சாப் கிங்ஸ் அணி நிர்வாகம் தெளிவுபடுத்தியுள்ளது ஒரு மாஸ்டர் ஸ்ட்ரோக் என்கிறார் கிரிக்கெட் விளையாட்டு செய்திகளில் அனுபமுள்ள ஆர்.மோகன்.

ஹர்திக் பாண்ட்யாவின் மும்பை மறுவருகை அத்தியாயம் வெற்றிபெறாததற்கு, ரோஹித் சர்மா மீது ரசிகர்களுக்கு இருந்த அபிமானமே காரணமென்கிறார் ஆர்.மோகன்.

"பாண்ட்யாவின் மும்பை மறுவருகை அந்த சமயத்தில் பெரிய பேசுபொருளாக மாறியது. ஆனால், ரோஹித் சர்மாவிடம் இருந்து கேப்டன்சி பறிக்கப்பட்டதை மும்பை ரசிகர்கள் விரும்பவில்லை. ஐந்து முறை ஐபிஎல் கோப்பைகளை வென்ற ஒரு கேப்டனை போகிற போக்கில் நீக்கியதை மும்பை ரசிகர்களும் அணியின் மூத்த வீரர்களும் ரசிக்கவில்லை." என்று கூறுகிறார் அவர்.

ஹர்திக் பாண்ட்யாவை மும்பை ரசிகர்கள் ஏன் வெறுத்தார்கள் என்பதைப் புரிந்துகொள்ள முடியவில்லை என்று இந்திய முன்னாள் வீரர் அஸ்வின் தெரிவித்துள்ளார்.

"குஜராத் டைட்டன்ஸ் அணியின் கேப்டனாக பாண்ட்யா அபாரமாக செயல்பட்டார். முன்னின்று வழிநடத்தி முதல் சீசனிலேயே கோப்பையையும் வென்றுகொடுத்தார். எல்லாம் சுமூகமாக சென்றுகொண்டிருந்த நேரத்தில் அவர் மும்பை இந்தியன்ஸ் அணிக்குத் திரும்பியது தவறான முடிவாக அமைந்துவிட்டது." என்று தனது யூடியூப் சேனலில் அவர் பேசியுள்ளார்.

’என்னுடைய கேப்டன் ஸ்ரேயஸ், என்னுடைய அணி பஞ்சாப்'

பாண்ட்யா குஜராத் டைட்டன்ஸ் அணியைவிட்டு வெளியேறியது மிகப்பெரிய தவறு என்று இந்திய முன்னாள் வீரர் கைஃப் கருத்து தெரிவித்துள்ளார்.

" மும்பை இந்தியன்ஸ் அணிக்கு கேப்டன் பொறுப்பேற்பது பாண்ட்யாவுக்கு உணர்வுபூர்வமான முடிவாக இருந்திருக்கும் என்று நினைக்கிறேன். மும்பை இந்தியன்ஸ் அணியுடன் அவருக்கு ஒரு தொடர்பு இருந்தது. அதுவே அவரை மீண்டும் அந்த அணிக்குச் செல்லத் தூண்டியிருக்கலாம். ஆனால், மும்பை இந்தியன்ஸ் கேப்டனாக பின்னடைவை சந்தித்தார். மும்பை அணியுடனான இரண்டாவது அத்தியாத்தை முடிந்தவரை விரைவாக மறந்துவிட்டு, அடுத்த கட்டத்தை நோக்கி நகர்வது அவருக்கு நல்லது" என்று கைஃப் தனது யூடியூப் சேனலில் தெரிவித்துள்ளார்.

ஐபிஎல் கோப்பை வென்ற கேப்டனான பாண்ட்யா, ஸ்ரேயஸ் தலைமையில் எப்படி விளையாடுகிறார் என்பதைப் பார்ப்பது சுவாரஸ்யமாக இருக்கும் என்கிறார் கிரிக்கெட் எழுத்தாளர் ஜாய் பட்டாச்சார்யா.

"கோப்பை வென்ற ஒரு கேப்டனை தலைமை தாங்குவது சாதாரண விஷயமல்ல. மும்பை அணியில் ரோஹித் , பாண்ட்யா இடையே அது சுமூகமாக அமையவில்லை. அதே சமயம், இந்த பரிமாற்றம் மும்பை இந்தியன்ஸ் அணிக்கு சாதகமாக அமைந்துள்ளது. பாண்ட்யா அணியில் தொடர முடியாது என்றான பிறகு, அர்ஷ்தீப் சிங்கைப் பெற்றது மதிப்புமிக்க பரிமாற்றமாக மாறியுள்ளது. வேகம் அதிகமான வான்கடே மைதானத்தில் பந்துவீசுவதை அர்ஷ்தீப் சிங் விரும்புவார்," என்று தனது எக்ஸ் தளத்தில் பதிவிட்டுள்ளார் அவர்.

அதேநேரம், ஸ்ரேயஸ் ஐயர் கேப்டன்சிக்கு தன்னுடைய முழு ஒத்துழைப்பு இருக்கும் என்பதை குறிப்பிடும் விதமாக இன்ஸ்டாகிராம் பக்கத்தில் ஹர்திக் பாண்ட்யா பதிவிட்டுள்ளார்.

"என்னுடைய கேப்டன் ஸ்ரேயஸ், என்னுடைய பயிற்சியாளர் பாண்டிங், என்னுடைய அணி பஞ்சாப்" என்று அவர் தன்னுடைய பதிவில் குறிப்பிட்டுள்ளார்.

- இது, பிபிசிக்காக கலெக்டிவ் நியூஸ்ரூம் வெளியீடு