விடுதலைப் புலிகள், பிரபாகரன், ராஜீவ் படுகொலை குறித்து சோனியா காந்தி புத்தகத்தில் கூறியவை என்ன?

முன்னாள் பிரதமர் ராஜீவ் காந்தியின் மனைவியும் காங்கிரஸ் மூத்த தலைவருமான சோனியா காந்தி, தனது நினைவுக் குறிப்பான 'பிலாங்கிங்: எ ஜர்னி ஆஃப் லவ் (Belonging: A Journey of Love)' நூலில், ராஜீவ் காந்தியின் படுகொலைக்கு விடுதலைப் புலிகள் அமைப்பின் தலைவர் வேலுப்பிள்ளை பிரபாகரனை நேரடியாகக் குற்றம்சாட்டியுள்ளார்.

1987-ஆம் ஆண்டு இந்திய – இலங்கை அமைதி ஒப்பந்தத்துக்குப் பிறகு இந்திய அமைதிப்படைக்கும் விடுதலைப் புலிகளுக்கும் இடையே ஏற்பட்ட மோதல்களே பிரபாகரனுக்குப் பழிவாங்கும் உணர்வை ஏற்படுத்தியதாகவும், அதுவே 1991-ஆம் ஆண்டு ராஜீவ் காந்தியின் படுகொலைக்குக் காரணமானதாகவும் அவர் எழுதியுள்ளார்.

மேலும் அவர் விடுதலைப் புலிகளை பயங்கரவாத அமைப்பு என்றும் அந்த அமைப்பினர்தான் ராஜீவ் காந்தியை கொலை செய்தனர் என்றும் குற்றம் சாட்டியுள்ளார்.

ராஜீவ் காந்தியின் படுகொலைக்குப் பின்னணியில் இருந்த அரசியல் சூழலையும், அப்போது தனது குடும்பம் எதிர்கொண்ட அச்சுறுத்தல்களையும் இந்த நூலில் சோனியா காந்தி விவரித்துள்ளார்.

இந்திய – இலங்கை அமைதி ஒப்பந்தமும் பிரபாகரனின் எதிர்ப்பும்

இலங்கை அதிபராக இருந்த ஜெயவர்த்தனே, விடுதலைப் புலிகளின் ஆயுதப் போராட்டத்தைத் தனியாக எதிர்கொள்ள முடியாத சூழலில் இருந்ததாகவும் இலங்கையில் நீடித்துவந்த இன மோதலுக்குத் தீர்வு காணும் நோக்கில் இந்தியப் பிரதமராக இருந்த ராஜீவ் காந்தி தலையிட்டதாகவும் சோனியா காந்தி தெரிவித்துள்ளார்.

இதன் விளைவாக, 1987 ஜூலை 29-ஆம் தேதி கொழும்பில் ராஜீவ் காந்தியும் ஜெயவர்த்தனேவும் இந்திய – இலங்கை அமைதி ஒப்பந்தத்தில் கையெழுத்திட்டனர் என சோனியா காந்தி குறிப்பிட்டுள்ளார்.

இந்த ஒப்பந்தத்தின் மூலம் இலங்கைத் தமிழர்களுக்கு மாகாண சுயாட்சி உள்ளிட்ட சில உரிமைகள் வழங்கப்படுவது உறுதி செய்யப்பட்டது என்றும் அதற்குப் பதிலாக விடுதலைப் புலிகள் உள்ளிட்ட ஆயுதக் குழுக்கள் தங்களது ஆயுதங்களை ஒப்படைக்க வேண்டும் என முடிவெடுக்கப்பட்டது என்றும் சோனியா காந்தி தெரிவித்துள்ளார்.

''இந்தியாவின் தலையீடு இலங்கையின் உள்நாட்டுப் பிரச்னையில் நேரடியாக இந்திய ராணுவத்தையும் ஈடுபடுத்தியது. ஒப்பந்தத்தைச் செயல்படுத்துவதுடன், ஆயுதக் குழுக்களிடமிருந்து ஆயுதங்களைப் பெற்று அமைதியை நிலைநாட்டுவதும் இந்திய அமைதிப்படையின் முக்கியப் பணியாக இருந்தது.'' என சோனியா காந்தி குறிப்பிட்டுள்ளார்.

''ஆனால், ஒப்பந்தம் கையெழுத்தான சில மாதங்களிலேயே நிலைமை மாறியது. விடுதலைப் புலிகள் தங்களது ஆயுதப் போராட்டத்தைத் தீவிரப்படுத்தினர். இலங்கையில் அமைதியை நிலைநாட்ட அனுப்பப்பட்ட இந்திய அமைதிப்படைக்கும் விடுதலைப் புலிகளுக்கும் இடையே நேரடியாக ஆயுத மோதல்கள் வெடித்தன. பல கடுமையான சண்டைகள் நடைபெற்றன. இந்திய வீரர்களும் உயிரிழந்தனர். 1989 மற்றும் 1990 காலகட்டத்தில் இந்திய அமைதிப்படை இலங்கையிலிருந்து திரும்பப் பெறப்பட்டது.'' என்கிறார் அவர்

இந்தச் சம்பவங்களுக்குப் பிறகு பிரபாகரன் ராஜீவ் காந்தியைப் பழிவாங்கச் சபதம் எடுத்திருந்ததாக சோனியா காந்தி தனது நூலில் குறிப்பிட்டுள்ளார். 1987-ஆம் ஆண்டு இலங்கையில் இந்திய ராணுவத்தின் தலையீட்டால் ஏற்பட்ட பகைமையே ராஜீவ் காந்தியின் படுகொலைக்குப் பின்னணியாக இருந்ததாக அவர் எழுதியுள்ளார்.

'தமிழ்நாடு உள்ளிட்ட பகுதிகளில் விடுதலைப் புலிகளின் செயல்பாடுகள்'

தமிழகத்திலும் விடுதலைப் புலிகள் அமைப்பின் செயல்பாடுகள் இருந்ததாக சோனியா காந்தி குறிப்பிட்டுள்ளார். தமிழ்நாடு மட்டுமின்றி, அதனை ஒட்டியுள்ள புதுச்சேரி மற்றும் கர்நாடகப் பகுதிகளிலும் விடுதலைப் புலிகள் அமைப்பைச் சேர்ந்தவர்கள் செயல்பட்டு வந்ததாக அவர் எழுதியுள்ளார்.

இலங்கைத் தமிழர் பிரச்னை தமிழகத்திலும் தாக்கத்தை ஏற்படுத்தியிருந்த நிலையில், விடுதலைப் புலிகள் அமைப்பின் செயல்பாடுகள் இந்தியாவின் பாதுகாப்பு தொடர்பான கவலைகளையும் ஏற்படுத்தியதாக அவர் பதிவு செய்துள்ளார்.

வேறு பல பயங்கரவாத அமைப்புகளிடமிருந்தும் ராஜீவ் காந்திக்கு அச்சுறுத்தல்கள் இருந்ததாக சோனியா காந்தி தெரிவித்துள்ளார்.

ராஜீவ் காந்தியின் பாதுகாப்புப் பொறுப்பில் இருந்த சிறப்புப் பாதுகாப்புப் படையின் தலைவர், தங்களது வீட்டுக்கு அனுப்பப்பட்ட பல கடித வெடிகுண்டுகள் இடைமறிக்கப்பட்டது என சோனியா காந்தி தெரிவித்துள்ளார்.

குடும்பத்தினர் அனைவரும் இந்த அச்சுறுத்தல்களுக்கு மத்தியிலேயே வாழ்ந்ததாகவும் அவர் எழுதியுள்ளார்.

ராஜீவ் காந்தி படுகொலை செய்யப்படுவதற்கு ஏறத்தாழ ஓராண்டுக்கு முன்பே விடுதலைப் புலிகள் பயன்படுத்தியதாகக் கூறப்படும் வானொலித் தகவல் தொடர்பு இடைமறித்துப் பதிவு செய்யப்பட்டதாகவும் சோனியா காந்தி குறிப்பிட்டுள்ளார்.

யாழ்ப்பாணத் தமிழில் இருந்த அந்த உரையாடல் மொழிபெயர்க்கப்பட்டபோது, "ராஜீவ் காந்தியின் தலையைச் சிதறடிக்க வேண்டும். அவரை ஒழித்துக்கட்ட வேண்டும். கொல்ல வேண்டும்" என்று கூறப்பட்டிருந்ததாக அவர் எழுதியுள்ளார்.

சந்திரிகா குமாரதுங்கா மீதான தாக்குதலையும் நினைவுகூரும் சோனியா

இலங்கையின் முன்னாள் அதிபர் சந்திரிகா குமாரதுங்கா மீதான தற்கொலைப்படைத் தாக்குதலையும் சோனியா காந்தி தனது நூலில் குறிப்பிட்டுள்ளார்.

''1999 டிசம்பர் 18-ஆம் தேதி கொழும்பில் நடைபெற்ற தேர்தல் பிரசாரக் கூட்டத்தில் பங்கேற்றுவிட்டு தனது காரை நோக்கிச் சென்றபோது, சந்திரிகா குமாரதுங்கா மீது தற்கொலைப்படைத் தாக்குதல் நடத்தப்பட்டது. இதில் வெடிகுண்டுச் சிதறல்கள் அவரது முகம் மற்றும் கழுத்துப் பகுதியில் தாக்கின. இதனால் அவர் வலது கண்ணின் பார்வையை நிரந்தரமாக இழந்தார்'' என குறிப்பிட்டுள்ளார்.

இந்தச் சம்பவத்தை நினைவுகூரும் சோனியா காந்தி, தற்கொலைப்படைத் தாக்குதல்கள் இலங்கையில் ஏற்படுத்திய பாதிப்புகளையும் பதிவு செய்துள்ளார்.

1991-ஆம் ஆண்டு மே 21-ஆம் தேதி ஸ்ரீபெரும்புதூரில் நடைபெற்ற தற்கொலைப்படைத் தாக்குதலில் ராஜீவ் காந்தியும் கொல்லப்பட்டார் என சோனியா காந்தி கூறியுள்ளார்.

விடுதலைப் புலிகள் அளித்த பதில் என்ன?

ராஜீவ் காந்தி படுகொலை தொடர்பாக விடுதலைப் புலிகள் அமைப்பின் தலைமை வெளிப்படையாக என்ன கூறியது என்பது குறித்து இலங்கையைச் சேர்ந்த இருவரிடம் பேசினோம்.

ஈழ மக்கள் புரட்சிகர விடுதலை முன்னணியின் தலைவர் சுரேஷ் பிரேமச்சந்திரன், ராஜீவ் காந்தி படுகொலை தொடர்பாகப் பல்வேறு புத்தகங்களும் விசாரணை தொடர்பான பதிவுகளும் வெளியாகியுள்ளதாகக் குறிப்பிட்டார்.

கிளிநொச்சியில் நடைபெற்ற சர்வதேசப் பத்திரிகையாளர் சந்திப்பில் ராஜீவ் காந்தி படுகொலை தொடர்பாகக் கேள்வி எழுப்பப்பட்டபோது, அது ஒரு துன்பியல் சம்பவம் என்றும், அதனை மறந்து கடந்து செல்ல வேண்டும் என்றும் விடுதலைப் புலிகள் தரப்பில் தெரிவிக்கப்பட்டது என்கிறார் சுரேஷ் பிரேமச்சந்திரன்.

அந்தப் பதில், படுகொலைக்கும் விடுதலைப் புலிகளுக்கும் தொடர்பில்லை என்று வெளிப்படையாக மறுப்பதாக அமையவில்லை என்பது சுரேஷ் பிரேமச்சந்திரனின் கருத்து.

அதே பத்திரிகையாளர் சந்திப்பில் பங்கேற்ற மூத்த இலங்கை ஊடகவியலாளர் ஏ.ஆர்.வி. லோஷனும் இதே சம்பவத்தை நினைவுகூர்ந்தார்.

கிளிநொச்சி அறிவியல் நகரில் நடைபெற்ற அந்தச் சந்திப்பில் ராஜீவ் காந்தி படுகொலை தொடர்பாகக் கேள்விகள் எழுப்பப்பட்டதாகவும், அப்போது விடுதலைப் புலிகளின் அரசியல் ஆலோசகர் ஆன்டன் பாலசிங்கமும் ஆங்கிலத்தில் பதிலளித்ததாகவும் அவர் தெரிவித்தார்.

ஆனால், ''பிரபாகரனோ ஆன்டன் பாலசிங்கமோ தாங்கள்தான் இந்தப் படுகொலையைச் செய்ததாக ஒப்புக்கொள்ளவில்லை; அதே நேரத்தில் தங்களுக்குத் தொடர்பில்லை என்றும் மறுக்கவில்லை'' என்பது லோஷனின் விளக்கம்.

இதற்கிடையே, ஆன்டன் பாலசிங்கம் ராஜீவ் காந்தி படுகொலையை விடுதலைப் புலிகள் செய்த மிகப்பெரிய அரசியல் தவறு என்று தனிப்பட்ட முறையில் ஒப்புக்கொண்டதாக மார்க் சால்டரின் To End A Civil War நூலில் குறிப்பிடப்பட்டுள்ளது.

நார்வேயின் முன்னாள் சிறப்புத் தூதர் எரிக் சொல்ஹெய்மிடம் பாலசிங்கம் இதனைத் தெரிவித்ததாக அந்த நூல் பதிவு செய்கிறது.

ராஜீவ் காந்தி படுகொலை வழக்கில் தண்டிக்கப்பட்ட நளினியைப் பிரியங்கா காந்தி சந்தித்தது குறித்தோ, இந்த வழக்கில் தண்டிக்கப்பட்டவர்களை மன்னிப்பு வழங்க வேண்டும் என்ற கோரிக்கை குறித்தோ சோனியா காந்தி இந்த நூலில் விவாதிக்கவில்லை.

- இது, பிபிசிக்காக கலெக்டிவ் நியூஸ்ரூம் வெளியீடு